Febrero
Miércoles 1 de febrero
Jehová Diosajj taqe khitinakatï jupar artʼasipki ukanakan jakʼapankiwa (Sal. 145:18).
Diosajj taqe servirinakapajj kusisit jakasipjjaspa ukwa muni. Jupajj janiw sapa mayni jiwasanakat jayankkiti, kunapachas aynachtʼata sapakjam jikjjatastan uk yatiwa (Sal. 145:18, 19). Jehová Diosajj kunjamsa Elías profetar yanaptʼäna uk uñjañäni. Israel markajj jan walin uñjaskäna uka tiemponwa Elías profetajj jakäna. Diosan jachʼa enemigonakapajja, servirinakapar jan waltʼayañatakiw arknaqapjjäna, Eliasarojj jiwayañ kunwa munapjjäna (1 Rey. 19:1, 2). Elías profetajja, Jehová Diosan profetanakapat jupa sapakis jiltʼjjaspa ukham amuyasisajj wal llakisïna (1 Rey. 19:10). Uk uñjasasti Diosajj jankʼakiw yanaptʼäna. Mä angelap toqew jan sapakïtapa, Diosar jan jitheqtas servir walja israelitanakan utjaskatap yatiyäna (1 Rey. 19:5, 18). Jesusajja jilat kullakanakaw jumanakatakejj familiamjamäni sasaw discipulonakapar munasiñamp säna (Mar. 10:29, 30). Jehová Diosasti servirinakajarojj janipuniw jaytanukkäti sasaw arsuwayaraki (Sal. 9:10). w21.06 págs. 8, 9 párrs. 3, 4
Jueves 2 de febrero
Diosankirïki ukajj Diosan arunakap istʼiwa (Juan 8:47).
Bibliat yatichktan ukajja, falso religionanakajj Bibliarjam jan yatichapjjatapwa qhanstayi, ukatwa waljanejj jiwasat pächasipjje. Religión pʼeqtʼirinakajja, Diosajj jan wali jaqenakar infiernonwa tʼaqesiyi sasin yatichasaw jaqenakarojj munañaparjam apnaqapjje, ukampis jiwasajja uka yatichäwejj jan cheqätapwa qhanstaytanjja. Jan jiwir almanïtanwa sasaw religionanakajj yatichapjje, ukatï cheqäspajja jiwatat jaktañajj janiw munaskaspati, ukampis uka yatichäwejj janiw Bibliarjamäkiti sasaw qhanstaytanjja. Taqe kunanaktï lurktan ukjja Diosaw jayäkipan amtjjäna sasaw religionanakajj yatichapjje, ukampis jiwasajj mayni pachpaw Diosar serviniti janicha uk amtañapa sasaw yatichtanjja. Uk istʼasajj religión pʼeqtʼirinakajj wal colerasipjje. Jiwasatï cheqäki ukar munasstanjja, Diosajj kuntï siskistu ukarojj creyiñäniwa (Juan 8:45, 46). Supayajj kunatï cheqäki ukatwa saranuküna, jiwasajj janiw saranukuñasäkiti (Juan 8:44). Servirinakapajj Jesusat yateqasipjjaspa ukwa Diosajj muni. Ukatwa jupanakarojj “kunatï jan walïki ukjja uñisipjjam, kunatï walïki ukat katjjarusipjjam” sasin säna (Rom. 12:9; Heb. 1:9). w21.05 págs. 10, 11 párrs. 10, 11
Viernes 3 de febrero
Diablo contra saytʼasipjjam, jupajj jumanakat jaltjjaniwa (Sant. 4:7).
Jiwasatï jachʼa jachʼa tuksna, jiwasatakik taqe kuns munjjsna ukhajja, Supayan uka trampapat escapsnawa sasaw apóstol Pablojj qhanañchäna (2 Tim. 2:26). Jehová Diosajj Supayat sipans jukʼamp chʼamaniwa. Jupan yanaptʼaptï thaqañänejja, Supayan trampanakapat escapañäniwa. Trampanakapar jaltʼasin escapañatak chʼamachasiskañat sipansa, qalltatpachwa ukanakat jarkʼaqasiñasa. Ukatakejj Diosakiw yanaptʼistaspa, ukhamajj juparuw kunjamäskis amuyusasa luratanakasas uk amuykiptʼasiñatak yanaptʼa mayisiñasa (Sal. 139:23, 24). Janipun Supayan trampanakapar jaltʼañäniti. Jupajj walja maranakaw animalanak katuri jaqenakjam trampaparu waljanir jaltʼayaski. Ukampis niyaw katuntat uñjasini, tiempompejj tʼunjatäniwa (Apoc. 20:1-3, 10). Ukañkamajj Supayan trampanakapat amuyasipjjañäni. Jan jachʼa jachʼa tukupjjañäniti, janirak maynitakik taqe kun munañampis apayasipjjañäniti. “Diablo contrajj saytʼasipjjarakim, jupajj jumanakat jaltjjaniwa” siski uka ewjjtʼar istʼapjjañäni. w21.06 pág. 19 párrs. 15, 17
Sábado 4 de febrero
Khititï cosecha apthapiyaski ukarojj trabajirinak cosechapar khitaniñapatak mayipjjam (Mat. 9:38).
Mä jaqejj Bibliat yatichayasi ukat kuntï yateqki uk mayninakar parlaraki ukhajja, Jehová Diosajj wal kusisi (Prov. 23:15, 16). Jichhürunakan markapar kusisita predicaskiri yatichaskir uñjasajj ukhamarakiw wal kusispacha. Pandemia usu utjkipansa, 2019 septiembre phajjsit 2020 agosto phajjsikamajja, 7.705.765 ukhaniruw Bibliat yatichasiwayi, ukajj 241.994 jaqenakaruw Diosar vidap katuyasipjjañapataki, bautisasipjjañapatak yanaptʼawayi. Jupanakajj ukhamarakiw yaqhanakar Bibliat yatichapjjani, bautisasipjjañapatakis yanaptʼapjjarakini (Luc. 6:40). Jesusan discipulopar tukupjjañapatak jaqenakar yanaptʼasajj Diosaruw kusisiytanjja. Jaqenakar Jesusan discipulopar tukuyañajj chʼamakiwa, ukampis Diosan yanaptʼapampejj Bibliat yatjjatasipki ukanakarojj jupar munasipjjañapatakiw yanaptʼsna. Wakiskani ukhajj parlktan ukanakaruw ‘¿Bibliat yateqañ janit munkasma?’ sasin jisktʼsna. Ukhamtï lurañänejja jupanakat maynis yateqañ munaniwa. w21.07 págs. 6, 7 párrs. 14-16
Domingo 5 de febrero
Diosan utapar wal munasitaj laykojja, kunanaktï sagrado utatak wakichkta taqe ukanakat sipansa, Diosajan utapatakejj qorijampi qollqejampwa churaskta (1 Crón. 29:3).
David reyejja templo lurasiñapatakejj walja qollqepampiw yanaptʼäna (1 Crón. 22:11-16). Jumatï edadanëjjsta, construccionan yanaptʼañatakis chʼamamajj jan utj-jjchejja, contribución churasaw qhawqtï puedkta ukamp yanaptʼasma. Diosar walja maranak servisajj kunanaktï yateqawaykta uk wayn tawaqonakar cuenttʼasaw yanaptʼarakisma. Apóstol Pablot wajjtʼasirïñwa yateqsna. Jupajj misionerot servisa viajkäna ukhajja, Timoteo waynaruw compañtʼañapatak invittʼäna, kunjamsa jupajj predicäna, yatichäna ukanakwa Timoteor yatichäna (Hech. 16:1-3). Pablon ukham yatichatapaw Timoteorojj Diosan arunakap sum predicañataki, sum yatichañatak yanaptʼäna (1 Cor. 4:17). Timoteosti kunanaktï Pablojj yatichkäna ukanakampejj yaqhanakaruw yaticharakïna. w21.09 pág. 12 párrs. 14, 15
Lunes 6 de febrero
Jumanak taypin envidiasiñanaka chʼajjwañanakaw utji (1 Cor. 3:3).
Apolos chachampi Pablompejj Qellqatanak sum uñtʼapjjäna, wali uñtʼatäpjjänwa, suma yatichirïpjjarakïnwa. Panpachanirakiw Jesusan discipulopar tukupjjañapatak waljanir yanaptʼapjjäna, ukampis janiw envidiasipkänti (Hech. 18:24). Apolosajj Corintot sarjjäna ukhat mä qhawqha tiempotjja, kuttʼaniñapatakiw Pablojj jupar wal mayïna (1 Cor. 16:12). Kuntï sum lurañ yatkäna ukampejj wali sumwa Apolosajj yanaptʼaskäna. Suma yatiyäwinakwa predicäna, jilat kullakanakaruw chʼamañchtʼarakïna. Jupajj humilde chuymanïnwa, Aquilampi Priscilampejj “Diosan thakipat cheqaparjam wali sum qhanañchapjjäna” ukhajj colerasïnwa sasajj janiw Bibliajj siskiti (Hech. 18:24-28). Apolosan suma luratanakap Pablojj yatïnwa, ukampis ukham sum luratapat janiw mayjtʼaskänti. Corinto markankir congregacionar ewjjtʼkäna uka cartapanjja, Pablon humildëtapa, amuytʼirïtapa, llampʼu chuymanïtapaw qhan amuyasi (1 Cor. 3:4-6). w21.07 págs. 18, 19 párrs. 15-17
Martes 7 de febrero
Walja jaqenakaw cheqapar sarnaqer jaqet uñjatäpjjani (Rom. 5:19).
Adanampi Evampejj jupanak pachpaw Diosar jan istʼañ amtapjjäna, ukatwa Diosan familiap taypit jaqsutäpjjañapajj wakisïna. Ukampis Diosan jaqenakar wal munasitapatjja, jupar istʼirinakat yaqheparojj familiap taypin katoqañatakejj kunatï wakiski ukwa lurawayi. Jaqenak layku jiwañapatak mä sapa Yoqap churasaw uk lurawayi (Juan 3:16). Uka sacrificio toqew jupar jan jitheqtas serviri 144.000 jaqenakarojj wawanakapjam katoqawayi (Rom. 8:15-17; Apoc. 14:1). Diosar istʼasiri walja millón jaqenakaw voluntädap lurasipki. Jupanakajj waranqa maranak tukuyar yantʼat uñjasipkani uka pasatat Diosan familiapar tukuñwa suyasipki (Sal. 25:14; Rom. 8:20, 21). Jupanakajj Jehová Diosar “Awkija” sasaw jichhatpach jakʼachasipjje (Mat. 6:9). Jaktanipkani ukanakajj Diosat yateqañ puedipjjarakiniwa. Jupanakat khitinakatï Diosar istʼañ amtapkani ukanakajja, jupan familiap taypinkapjjarakiniwa. w21.08 pág. 5 párrs. 10, 11
Miércoles 8 de febrero
Kunanakatejj jukʼamp importantëki ukanak amuyapjjam (Filip. 1:10).
Apóstol Pablojj mä luräwi katoqäna, ukajj jakäwipan wali importantënwa. ‘Jaqenak nayraqatansa utat utsa’ taqe chuymaw predicäna (Hech. 20:20). Jupajj taqe horasaw predikirïna. Mä kutejja, Atenas markan masinakapar suykasaw suma yatiyäwinak wali importante jaqenakar predicäna, yaqhepanakajj istʼapjjänwa (Hech. 17:16, 17, 34). Alquilat utapan ‘cadenanakampi chinuntatäkäna’ ukhasa, khitinakarutï predicañ puedkäna taqe ukanakaruw predicäna (Filip. 1:13, 14; Hech. 28:16-24). Pablojj janiw tiempop ina chʼusar aptʼirïkänti. Yaqhanakarus jupamp predicañatakiw invittʼirïna. Misionerot nayrïr kuti viajkäna ukhajja, Juan Marcos chacharuw invittʼäna, misionerot payïr kuti viajkäna ukhasti Timoteo waynaruw invittʼarakïna (Hech. 12:25; 16:1-4). Uka chachanakarojj congregacionanak organiztʼapjjañapataki, suma awatirïpjjañapataki, suma yatichirïpjjañapatakiw yanaptʼäna (1 Cor. 4:17). w22.03 pág. 27 párrs. 5, 6
Jueves 9 de febrero
Diosajj janiw sapa mayni jiwasanakat jayankkiti (Hech. 17:27).
‘Kuntï uñjkta ukarukiw creyta’ sasaw yaqhepajj sapjje, ukatwa mä Luririn utjatapar jan creyipkiti. Ukampis kunanaktï jan uñjapki ukarojj creyisipkiwa. Sañäni, thayar janis uñjapkchejja utjatap qhan amuyasajj creyipjjewa. Biblian parlki uka kasta confiyañajj ukhamarakiwa, ‘kunanakatï jan uñjatäki ukanakajj cheqapun utjaskatapajj’ qhanaw amuyasi (Heb. 11:1). Cheqas ukanak sum amuyañatakejj tiempow munasi, chʼamachasiñaw wakisiraki, ukampis waljaniw ukham lurañ jan munapkiti. Ukatwa Diosajj janiw utjkiti sasin amuyapjje. Kunanakatï utjki ukajj maynin luratätap yatjjatasajja, yaqhep cientificonakajj Diosaw alajjpachsa oraqsa lurawayi sasaw sapjje. Universidadanakanjja taqe kunas maynin luratawa sasajj janiw yatichaskiti. Ukampis walja cientificonakaw Diosar uñtʼasajj jupar munasjjapjje. Wali yatjjatatäkstansa janisa, jiwasajj jupanakjamarakiw Diosar jukʼamp confiyañatak chʼamachasiñasa. w21.08 pág. 14 párr. 1; págs. 16, 17 párrs. 6, 7
Viernes 10 de febrero
Jehová Diosajj taqenimpis suma Diosawa, taqe luratanakapanwa khuyapayasirïtapajj uñjasi (Sal. 145:9).
Jesusajj mä uñachtʼäwin herencia tukuntir waynatwa parläna, uka uñachtʼäwimpiw khuyapayasiñajj Jehová Diosar wal gustatap yatichäna. Uñachtʼäwin parlkäna uka waynajja utapat sarjjasajj ‘jan wal sarnaqasaw herenciap tukjasïna’ (Luc. 15:13). Tiempompejja, qʼañu juchanak luratapat arrepentisïnwa, humillasirakïnwa ukatsti utaparuw kuttʼjjäna. Jesusajj akham sänwa: “Awkipasti jayankkipanwa jupar uñjarakïna, walpun uka wawapat sinttʼasïna. Ukatwa jupan ukarojj tʼijüna. Wali munasiñampiw qhomantäna, jampʼattʼarakïna” sasa. Humillañat sipansa awkipajj khuyaptʼayasïnwa, perdonänwa, familiap taypirus mayampiw katoqjjäna. Yoqapajj walja juchanakwa luräna, ukampis arrepentisitapatwa awkipajj perdonäna. Uñachtʼäwin parlki uka khuyapayasir awkejj Jehová Diosampi sasiwa. Jehová Diosajj juchanakapat taqe chuyma arrepentisirinakarojj perdonañwa muni, ukwa chuymar purtʼkir uka uñachtʼäwimpejj Jesusajj yatichäna (Luc. 15:17-24). w21.10 pág. 8 párr. 4; pág. 9 párr. 6
Sábado 11 de febrero
Diosajj yaqha markanakaruw katoqe, sutipatakejj uka markanak taypit mä marka ajllisi (Hech. 15:14).
Jichha tiemponjja, religión pʼeqtʼirinakat waljaniw Diosan sutip imtʼañatakejj chʼamachasipjje. Biblianakapatsa Diosan sutip apsupjjewa, yaqhepasti Diosan sutip iglesianakapan aytapjjañapsa jarkʼapjjewa. Jehová Diosan Testigonakapakiw Diosan sutipar wali respetomp uñjapjje. Janiw kawkïr religionas jiwasjamajj Diosan sutip walja jaqenakar uñtʼayapkiti. Jiwasajj Jehová Diosan Testigonakapäpjjtanwa, ukhamajja kuntï sutisajj siski uk uñachtʼayañatakiw wal chʼamachastanjja (Is. 43:10-12). Machaq Mundon Jakirinakataki sat Bibliajja, 240 millonats jilaw lurasiwayi. Yaqha Biblianak traducirinakajj Diosan sutip apsuwayapjjewa, ukampis Bibliasanjja kawkjantï Diosan Jehová sutipajj uñstañapäki ukjan taqpachaw uñsti. Ukatjja 1.000 jila arunakanwa Bibliat apstʼat qellqatanak luraraktanjja, ukanakansa Diosan sutipajj uñstarakiwa. w21.10 págs. 20, 21 párrs. 9, 10
Domingo 12 de febrero
Mä jilamajj pobreptani ukhajja, janiw chuym qalarayasipjjañamäkiti, janirakiw michʼasipjjañamäkiti (Deut. 15:7).
Yanaptʼa munapki uka jilat kullakanakar yanaptʼasaw Jehová Diosar adortanjja. Pobrenakar yanaptʼiri israelitanakarojj bendisiñwa Diosajj arsuwayäna (Deut. 15:10). Yanaptʼa munki ukar yanaptʼtan ukhajja, Jehová Diosajj mä regalsa jupar churksna ukhamwa uñji (Prov. 19:17). Pablojj katuntatäkäna ukhajja, filiponkirinakajj mä regalo apayapjjäna, aka regalojj ‘Diosan chuymapar purtʼkiri sacrificiowa’ sasaw jupajj säna (Filip. 4:18). Congregacionasat amuytʼasajj akham jisktʼasiñäni: “¿Khitirus yanaptʼiristjja?” sasa. Yanaptʼa munapki ukanakarojj tiempo apstʼasisa, chʼamasampi, kuntï lurañ yatktan ukanakampi, utjkistu ukanakamp yanaptʼktan ukajja, Jehová Diosar wal gusti. Ukanak lurasajj juparus adorksna ukhamwa uñji (Sant. 1:27). Diosar sum adorañatakejja tiempo apstʼasiñasawa, chʼamachasiñasarakiwa, ukanak phoqañajj janiw chʼamäkiti (1 Juan 5:3). ¿Kunatsa? Jehová Diosarus jilat kullakanakasarus munastanwa, ukatwa ukanak phoqañajj jan chʼamäkiti. w22.03 pág. 24 párrs. 14, 15
Lunes 13 de febrero
Jupajj jan wali jaqetakisa suma jaqetakisa taqenitakiw intip jalsuyani (Mat. 5:45).
Jiwasatï jilat kullakanakat llakisitasa sinttʼasitas uñachtʼayañ munstan ukhajja, kuna problemanakansa uñjasipjje ukanakatwa lupʼiñasa. Sañäni, inas mä kullakajj jan wali usunïchi. Jupajj ‘usutätwa’ sasajj inas jan quejaskchiti, ukampis yanaptʼsna ukhajj wal kusisispa. ¿Janit manqʼa phaytʼarapksna, utaps apthaptʼarapksna? Inas mä jilatajj jan trabajoni uñjaschi, ¿janit trabajo jikjjatañapkamajj mä jukʼa qollqempi yanaptʼksna? Jan kun sasakiw ukham yanaptʼsna. Sinttʼasirïñ munstan ukhajja, janiw jilat kullakanakan jiwasar yanaptʼa mayiñap suyañasäkiti. Kunjamtï Jehová Diosajj lurkejja, ukhamarakiw jiwasajj yanaptʼañ amtañasa. Jupajj jan maykataw inti sapüru jalsuyani, intin calorapajj yuspärasirinakarusa jan yuspärasirinakarus taqeniruw yanaptʼi. Kuntï munktan uk churasaw Diosajj jiwasar munasitap uñachtʼayistu. Wali munasiri, wajjtʼasiri Diosätapat jupar wal munastanjja. w21.09 pág. 23 párrs. 12, 13
Martes 14 de febrero
Jehová Dios Tata, jumajj suma Diosätawa, perdonañatakis jankʼakirakïtawa, jumar artʼasipktam ukanakarojj wali munasiñampiw uñjtajja, janirakiw jaytjktati (Sal. 86:5).
Diosan munasirïtapasa jan jaytjasirïtapas perdonañatakiw chʼamañchtʼistu. Diosajj juchanakapat arrepentisiri, cambiañatak chʼamachasiri maynir uñji ukhajja, munasirïtapa jan jaytjasirïtapaw perdonañatak chʼamañchi. Mä salmonjja Davidajj Diosat akham sänwa: “Jupajj janiw juchanakasarjamajj uñjkistuti, janirakiw pantjasitanakasat kunatï katoqañajj waktʼkistu ukarjamajj castigkistuti” sasa (Sal. 103:8-11). Chuymapajj maynir juchañchki ukhajja, janiw sum jikjjataskiti uk Davidajj sum yatïna. Ukampis Diosajj ‘perdonañatak jankʼakïtapwa’ jupajj yateqäna. Jichhürutak ajllit textonwa kunatsa Diosajj perdoni ukajj qhanañchasi. Kunjamtï Davidajj oracionapan siskänjja, Diosajj munasirïtapata jan jaytjasirïtapatwa perdón mayisipki ukanakar perdoni. Mä juchar purtʼastan ukhajja, uk luratasat pisayasitasajj walikïskiwa, ukaw perdón mayisiñatakisa cambionak lurañatakis yanaptʼistaspa. w21.11 pág. 5 párrs. 11, 12
Miércoles 15 de febrero
Alajjpachankir nanakan Awkija, sutimajj jachʼañchatäpan (Mat. 6:9).
Jehová Diosajj sutipar munasiwa, taqenin respetapjjañapwa munaraki (Is. 42:8). Ukampis mä 6.000 maranakaw Diosan sutipajj qʼañuchat uñjasi (Sal. 74:10, 18, 23). Diosajj Adanampir Evampirojj kusisit jakasiñatsa jarkʼkaspa ukhamwa Diablojj (ukajj “kʼarintiri” sañwa muni) Diosar kʼarintäna, ukhamatwa ukajj qalltawayi (Gén. 3:1-5). Ukhat aksaruw Diablojj Jehová Diosar kʼarintaski, jaqenakajj kunanaktï cheqpachapun munapki ukanakatsa Diosajj jarkʼkaspa ukhamwa kʼarintaski. Kunjamsa Awkipan sutipajj sapürutjam qʼañuchat uñjasïna uk uñjasajja, Jesusajj wal llakisïna. Jehová Dios sapakiw alajjpachansa aka oraqensa apnaqañatakejj derechoni, Jupjam suma apnaqerejj janiw utjkiti (Apoc. 4:11). Ukampis Diablojja, Diosajj janis apnaqañatak derechonïkaspa ukham amuyapjjañapatakiw angelanakarusa jaqenakarus engañjañ munäna. Niyaw Jehová Dios sapaki sum apnaqerïtap taqeni yatipjjani, Reinop toqekiw sumankañasa suman jakasiñas aka oraqen utjani, uksa yatipjjarakiniwa. w21.07 pág. 9 párrs. 5, 6
Jueves 16 de febrero
Jehová Dios laykojj nayajj wali kusisitäyäwa, nayar salvir Diosaj laykojj wali kusisitäyäwa (Hab. 3:18).
Mä familia pʼeqtʼirejja, esposaparusa wawanakaparusa, manqʼaña isi jan faltañapatakiw llakisi, utanïñsa munarakiwa. ¿Qollqet pistʼatat jakasiskta? Ukham uñjasiñajj chʼamakïpachawa. Ukampis Jehová Diosar jukʼamp confiyañatakiw chʼamachasisma. Jehová Diosar orasim, kuntï Jesusajj Mateo 6:25-34 texton siskäna uka arunak liytʼam ukatsti lupʼirakim. Kunjamsa Jehová Diosajj jichha tiempon servirinakaparojj jupan Reinop nayrar uchapjjatapat jan kuns faltayki ukanakatsa lupʼirakim (1 Cor. 15:58). Ukaw alajjpachankir Awkimar jukʼamp confiyañatak yanaptʼätam, jumjam jan walinakan uñjasipkäna ukanakarojj yanaptʼawayiwa, jumarojj yanaptʼarakïtamwa. Diosajj kunansa yanaptʼatäñ munta, kunjamsa yanaptʼiristam uk yatiwa. Jakäwiman kunjamsa yanaptʼtam uk uñjäta ukhajja, jukʼampiw jupar confiyäta, jutïrin jukʼamp jan walinakan uñjaskäta uksa aguantarakïtawa. w21.11 pág. 20 párr. 3; pág. 21 párr. 6
Viernes 17 de febrero
Maynitejj juchar purini ukhajja, jiwasajj mä yanapirinïtanwa, jupajj Awkimp chikäki uka Jesucristowa (1 Juan 2:1).
Jesusajj juchat kutsuyawaykistu uka yatichäwiw walja cristianonakarojj Diosar jukʼamp confiyañatak chʼamañchtʼawayi. Jupanakajj jarkʼatpachas predicasipkakïnwa, kunayman yantʼanakwa jiwañkam aguantawayapjje. Apóstol Juanat parltʼañäni. Jupajj 60 maranakats jilaw Cristotsa, Criston jaqenak layku jiwatapatsa jan jaytjas predicäna. Niya 100 maranëjjäna ukhajja, markaruw jan waltʼayi sasaw Roma markankir gobiernojj Patmos islar apayäna. ‘Diosat parlatapata, Jesusjjat qhanañchatapatwa’ apayäna (Apoc. 1:9). Diosar confiyatapasa aguantatapas wali yateqaskayawa. Qellqkäna uka libronakanjja, apóstol Juanajj Jesusar wal munasitapa, jaqenak layku vidap loqtasitapat wal yuspäratapwa qellqäna. Uka qellqatanakanjja, 100 jilaw Jesusan vidap jiwas layku loqtasitapatsa, kuna askinakatï uka laykojj utjawayki ukanakats uñsti (1 Juan 2:2). Juanajj Jesusan jaqenakar juchat kutsuyatapat wal yuspäräna. w21.04 pág. 17 párrs. 9, 10
Sábado 18 de febrero
Janiw mä oqar jaqerojj maldisiñamäkiti janirakiw mä juykhu jaqen nayraqataparojj mä kunsa uchañamäkiti (Lev. 19:14).
Jehová Diosajja servirinakapajj oqaranakatsa, juykhunakatsa, yaqha ukham usutanakatsa khuyaptʼayasipjjañapwa munäna. Ukatwa israelitanakarojj mä oqara jaqer jan maldisipjjañap mayïna, janiw jan walsa jupat parlapjjañapäkänti. Mä oqara jaqer uk lurañajj jan walipunïnwa. Niyakejjay oqarächïnjja janiw arjjatasiñ puedkaspänti. Levítico 19:14 ukanjja “janirakiw mä juykhu jaqen nayraqataparojj mä kunsa uchañamäkiti” sasaw Diosajj markapar säna. Mä librojja, ukham usutanakat akham siwa: “Israel markanjja jaqenakajj jupanakar jiskʼachapjjänwa, tʼaqesiyapjjarakïnwa” sasa. Inas maynejj mä juykhur usuchjañataki jan ukajj jupat larusiñataki nayraqatapan mä kun uchirïchïna. Levítico 19:14 leyimpejja, Jehová Diosajj markaparuw yanaptʼaskäna, ukhamat jupanakajj oqaranakarusa, juykhunakarusa, yaqha ukham usutanakarus khuyapayasiñamp uñjapjjañapataki. w21.12 págs. 8, 9 párrs. 3, 4
Domingo 19 de febrero
Jacobojj wal ajjsarayasïna, wal llaktʼasirakïna (Gén. 32:7).
Jacobojj jilapan jupa contra chuyma ustʼatakïskatapatwa wal llakisïna. Ukatwa Jehová Diosar taqe chuyma mayisïna. Ukatsti Esaú jilaparojj walja regalonakwa apayäna (Gén. 32:9-15). Jilapampi jikisïna ukhajja, Jacob chachaw nayraqatajj jilap nayraqatan altʼasïna, janiw mayaksa ni payaksa altʼaskänti, jan ukasti paqallq kutiw altʼasïna. Wali respetompi humilde chuymampiw Jacob chachajj jilapampi sumankthapïna (Gén. 33:3, 4). Jacob chachajj jilapampi jikisir sarañatakejj kunjamsa wakichtʼasïna, kunjamsa juparojj jakʼachasïna ukanakat yateqassnawa. Nayraqatajja Jehová Diosaruw humilde chuymampi yanaptʼa mayisïna. Ukatjja jilapampi sumankthapiñatakiw wal chʼamachasïna, ukhamatwa mayisitaparjam luräna. Jupamp jikisïna ukhajja, khitis juchanïna uka toqet janiw parlkänti. Antisas jilapampi sumankthapiñwa munäna. ¿Kunjamsa jumajj jupat yateqasisma? (Mat. 5:23, 24). w21.12 pág. 25 párrs. 11, 12
Lunes 20 de febrero
Diosajj chuymasat sipansa jukʼamp jachʼawa, taqe kunwa yatiraki (1 Juan 3:20).
Awisajj pantjasir chuymasaw engañjistaspa, janis kunatak sirvksna, janis munatäñasajj wakiskaspa ukhamwa amuyayistaspa. Ukatwa Jesusan jiwatapajj janis juchanakas perdonkaspa ukham amuyjjsna (1 Juan 3:19). Ukham amuyañäni ukhajja, ‘Diosajj chuymasat sipansa jukʼamp jachʼätapwa’ amtañasa. Munasir Jehová Diosajj janis munkistaspa, janis perdonkistaspa ukhamsa amuykstanjja, jupajj munasistuwa, perdonarakistuwa. Diosan munasiñapat jan pächasiñapatakiw chuymasar yanaptʼañasa. Ukatakejj sapüruw Bibliat yatjjatañasa, orasiñasa, jilat kullakanakampis chikachasiñasaraki. Kunatsa ukanak lurañajj wali wakiskiri uk uñjañäni. Jehová Diosajj kunjam Diosasa uk jukʼampiw yatiñäni, qhawqsa munasistu uksa amuyarakiñäniwa. Bibliat sapür lupʼiñajj sum amuytʼasiñataki, chuymasansa amuyusans “kunatejj jan walïki ukanak askichañataki[w]” yanaptʼistani (2 Tim. 3:16). w21.04 págs. 23, 24 párrs. 12, 13
Martes 21 de febrero
Diosaruw nayajj artʼasëjja, jupasti istʼitaniwa (Sal. 77:1).
Diosar jukʼamp confiyañatakejj janiw aleq yatjjatañasakïkiti. Kuntï yatjjatasktan uka toqetwa lupʼiñasa. Salmo 77 qellqerit amuytʼañäni, jupasa mayni israelitanakas janis Jehová Diosamp sumat uñjatäjjapjjaspa ukham amuyasaw wal llakisïna. Ukham llakitäsajja, janiw arumanakas ikjjänti (versículos 2-8). ¿Kunsa jupajj luräna? Jehová Diosar akham sänwa: “Taqe luratanakamatwa nayajj amuykiptʼäjja, kunanaktï jumajj lurkta ukanakatwa nayajj wal amuykiptʼarakëjja” sasa (versículo 12). Kunsa nayrajj Jehová Diosajj markap layku luräna uk sumwa uka salmo qellqerejj yatïna. Ukhampachas akham sasaw jisktʼasiskakïna: “¿Diosajj jiwasar sum uñjañ armasjjeti, jan ukajj colerasitap laykuch jan khuyaptʼa[yasirëjje]?” sasa (versículo 9). Kunanaksa nayrajj Jehová Diosajj luräna, kunjamsa khuyaptʼayasirïtapsa, sinttʼasirïtapsa nayrajj uñachtʼayäna ukanakatwa amuykiptʼäna (versículo 11). Ukham lurasajja, Jehová Diosajj janipuniw markapar jaytanukkaniti sasaw confiyjjäna (versículo 15). w22.01 págs. 30, 31 párrs. 17, 18
Miércoles 22 de febrero
Jupatakejj taqe uka jaqenakajj jakasipkiwa (Luc. 20:38).
Waljaniw Jehová Diosar jan jitheqtas servis jiwapjje, ukampis jupanakar wasitamp uñjañ wal jupajj muni (Job 14:15). Abrahán amigoparus wal uñjañ munaraki (Sant. 2:23). Moisesampejj ‘ajanut ajanuw’ parlirïna, juparus ukhamarakiw wal uñjañ munpacha (Éx. 33:11). David reyirusa, mayni salmonak qellqerinakarusa cantatanakap wasitampi istʼañ wal munpacha (Sal. 104:33). Uka amigonakapajj jiwañansa iktʼjjapjjchejja, janiw jupanakat armaskiti (Is. 49:15). Uka servirinakapajj kunjamäpjjänsa ukjja, Jehová Diosajj taqwa amtaski. Mä uruw jupanakar jaktayjjani, ukat wasitampiw oracionanakapsa istʼjjani, jupar servipjjatapatsa kusisirakiniwa. Uk yatiñajj munat familiarapajj jiwjje ukanakatakejj wali chuymachtʼkiriwa. Edén jardinan Dios contra saytʼapkäna ukhajja, uka jan walinak janïr askichaskipan jukʼamp jan walinak utjañap Diosajj yatïnwa. Jichha tiempon ina chʼusat tʼaqesiñanaka ukat yaqha ukham jan walinak uñjktan ukanak Jehová Diosajj uñisiwa. w21.07 pág. 10 párr. 11; pág. 12 párr. 12
Jueves 23 de febrero
Luratasampi cheqapampi munasiñasawa (1 Juan 3:18).
Uka munasiñjja, Jesusajj juchat kutsuyawaykistu ukat yuspärasaw uñachtʼaytanjja. Jesusajj janiw jiwas laykuki vidap loqtasiwaykiti, jan ukasti jilat kullakanakas laykus loqtasiwayarakiwa. Ukham lurasajj jupanakar wali valoranit uñjatapwa uñachtʼayi (1 Juan 3:16-18). Kunjamsa jilat kullakanakar uñjtan ukanwa jupanakar munasitasajj qhanajja (Efes. 4:29, 31-5:2). Usuntapki, jan walinakan uñjasipki, oraqen jan waltʼäwinakajj utjki ukhajj yanaptʼtanwa. Ukampis mä jilatatï jan ukajj kullakatï chuym ustʼayistani ukhajja, ¿kunsa lurañäni? ¿Jupanakar perdonañajj chʼamakiti? (Lev. 19:18). Ukhamächi ukhajja, “maynit maynikam aguantasisipkakim, jumanakkamajj taqe chuyma perdonasipjjarakim. Kunjamtï Jehová Diosajj taqe chuyma perdonapktamjja, ukhamarak jumanakajj perdonasipjjam” siski uka ewjjtʼarjamaw lurañasa (Col. 3:13). Jilat kullakanakasar sapa kuti perdontan ukhajja, juchat kutsuyawaykistu ukat cheqapun Jehová Diosar yuspärataswa uñachtʼaytanjja. w21.04 pág. 18 párrs. 12, 13
Viernes 24 de febrero
Diosat katoqapkta ukarjam maynit maynikam yanaptʼasipjjam (1 Ped. 4:10).
Inas Jehová Diosatak wal trabajstan, waljanirus bautisasipjjañapatak yanaptʼarakstan. Taqe ukanak jupan yanaptʼapampiw lurtanjja. Jukʼamp privilegionak katoqasajj jukʼampiw congregacionan sumankañ utjañapataki, mayachtʼatäñapatak yanaptʼsna. Ancianonakasa siervo ministerialanakas Jesusar istʼapjjañapataki, Jesusat yateqasipjjañapatakiw congregacionar yanaptʼapjje. Ukham lurapjjatapat wal yuspärtanjja (1 Cor. 4:6, 7). Cheqas sapa mayniw mä kuns sum lurañ yattanjja, Diosaw ukham luristu. Luratasajj jukʼakïkaspas ukham inas amuyasstan. Ukampis kunjamtï chʼukunakajj isir mayachthapkejja, ukhamarakiw jukʼa luratasajj congregacionan mayachtʼatäñapatak yanaptʼi. Ukhamajj taqeniw mayninakat jilanksnas ukham jan amuyañatak chʼamachasiñasa, congregacionan sumankañ utjañapatakisa mayachtʼatäñapatakis wal chʼamachasiñasaraki (Efes. 4:3). w21.07 pág. 19 párrs. 18, 19
Sábado 25 de febrero
Jilamajj sartjjaniwa (Juan 11:23).
Jumajj ukhamarakiw munat familiaranakaman jaktaniñapat jan payachasiñamäkiti. Jesusajj llakit amigonakaparu chuymachtʼkasin jachaqtʼaskäna ukat ¿kunsa yateqsna? Jupajj jiwatanakar wal jaktayañ muni (Juan 11:35). Maynin jiwatapat llakitäsipki ukanakarojj yanaptʼasmawa. Jesusajj janiw Martampi Mariampi chikakejj jachkänti, jan ukasti jupanakarojj istʼänwa, chuymachtʼarakïnwa (Juan 11:25-27). Khitinakantï munat familiarapajj jiwki ukanakarojj ukhamarakiw yanaptʼsna. Australia markan jakiri, Dan sat mä ancianojj akham siwa: “Esposajan jiwatap qhepatwa yanaptʼa munayäta. Casarata jilat kullakanakajj nayar kuna horasas istʼañatakejj jankʼakïpjjänwa. Jachaqtʼaskayäta ukhajj janiw mayjtʼasipkänti. Jan chʼamanjam jikjjatasiyäta ukhajja, jupanakaw autsa jareqtʼaraqapjjetäna, mercadorus sarapjjäna, manqʼsa phaytʼapjjarakïnwa. Sapa kutiw nayamp chika orapjjäna. ‘Jan walinakan’ uñjaskayäta ukhajja, jupanakaw nayan cheqpach amigonakajäpjjäna, jilat kullakanakajäpjjarakïna” sasa (Prov. 17:17). w22.01 pág. 16 párrs. 8, 9
Domingo 26 de febrero
Jakañ churiri cheqañchäwir istʼki ukajja yatiñan jaqenak taypinwa jaki (Prov. 15:31).
Jehová Diosajj sum jakasiñaswa muni (Prov. 4:20-22). Jupajj Biblia toqe, Bibliat apstʼat qellqatanak toqe, experienciani mä jilata jan ukajj mä kullak toqe ewjjtʼkistu ukajja, jiwasar munasitapwa uñachtʼayistu (Heb. 12:9, 10). Kunjamsa ewjjtʼapjjestu uk amuyañat sipansa kunsa ewjjtʼapjjestu uk amuyañasawa. Awisajja maynejj janis sum ewjjtʼkistaspa ukhamwa amuyassna, cheqas ewjjtʼirejj wali amuyumpi ewjjtʼañatakiw chʼamachasiñapa (Gál. 6:1). Ukampis jiwasarutï ewjjtʼapjjestanejja, janiw sum ewjjtʼkituti sasin amuyañat sipansa, kunsa ewjjtʼasipkistu uk amuyañasawa. Inas akham jisktʼassna: “Janisay kunjamtï munkta ukham ewjjtʼkchitojja, ¿razonanikti saskpachïtu? ¿Ewjjtʼirin pantjasitanakap uñchʼukiñat sipansa kuntï sawaykitu ukar istʼiristti?” sasa. Ewjjtʼapkistani ukhajja katoqtʼasiñajj wali askïspawa. w22.02 pág. 12 párrs. 13, 14
Lunes 27 de febrero
Jehová Diosan amtayäwinakapajj confiykañawa, jan experiencianïki ukarus yatiñaniruw tukuyi (Sal. 19:7)
Jan wali amuyunaka jan wali luräwinak apanukuñatakejj tiempow munasi, chʼamachasiñasarakiwa, uk Jehová Diosajj yatiwa (Sal. 103:13, 14). Ukampis jupajj Arup toqe, espíritu santop toqe, markap toqew cambiañasatakejj yatiñanïñsa, chʼamsa, yanapsa churistu. Kunjamäsktasa uk uñakiptʼasiñatakejj Bibliaw yanaptʼiristam. Bibliajj espejor uñtatawa, ukhamajj kunanaksa lupʼiskta, kunanaksa parlaskta, luraskarakta ukanak uñakiptʼasiñamatakiw yanaptʼiristam (Sant. 1:22-25). Diosajj jumar yanaptʼañatakejj jankʼakiwa. Niyakejjay chuymam yatchejja, jupakiw sum yanaptʼiristam (Prov. 14:10; 15:11). Ukhamajj orasipunim, Bibliats sapüru yatjjatarakim. Diosan leyinakapat sipans jukʼamp sumajj janiw utjkiti. Kuntï Jehová Diosajj siskistu ukajj jiwasan askisatakiwa. Jupan leyinakaparjam sarnaqerinakajja, jukʼamp valoranitwa uñjasipjje, mä amtampiw jakasipjje, kusisitäpjjarakiwa (Sal. 19:8-11). w22.03 pág. 4 párrs. 8-10
Martes 28 de febrero
Jarkʼaqasiñ murallanakap sum uñtapjjam. Jachʼa torrenakap inspeccionapjjam, ukhamat jutïr wawanakar ukanak yatiyañataki (Sal. 48:13).
Jehová Diosarojj jupar serviñatak utanak lurasa ukat cuidasaw adortanjja. Tabernáculo lurañasa, ukan utjkäna ukanak lurañas Diosatakejj sagradönwa (Éx. 36:1, 4). Jichha tiemponjja, Tantachasiñ Utanakajj luraski ukasa yaqha ukham utanak luraski ukanakas Diosatakejj sagradorakiwa. Yaqhepajj walja horanakaw ukan trabajipjje, Diosan Reinopat jukʼamp yatiyasiñapatak ukham yanaptʼapjjatapat walpun yuspärtanjja. Jupanakajja predicañatakejj tiempo apsusipjjarakiwa. Yaqhepajj inas precursorat serviñ munapjjarakchi. ¿Kunjamsa ancianonakajj jupanakar yanaptʼapjjaspa? Uka wali trabajtʼiri jilat kullakanakatï precursorat serviñ puedipjjchi ukhajja, ukham servipjjañapatakiw jupanakar uttʼayapjjaspa. Jiwasajj construccionan trabajtʼañatakejj yatjjatatästansa janisa, taqeniw Diosar serviñatak utanak qʼomachsna jan ukajj sumäskakiñapatak yanaptʼsna. w22.03 pág. 22 párrs. 11, 12