Marzo

Mateo 25:31-36 textonakan ‘ovejanakajja’ siski uka arunakajja, tukuy tiempon jakiri cheqap sarnaqer jaqenakäpjjewa, aka oraqen jakañatak suytʼäwinïpjjewa, mä arunjja yaqha ovejanakat uñtʼatäpjjewa. Jupanakajj Criston jilanakaparuw jan jitheqtas yanaptʼapjje, jukʼampis oraqpachan predicasiñapataki yatichasiñapatakiw yanaptʼapjje (Mat. 24:14; 28:19, 20). Jesusan jiwatap amtañataki uru janïra purinkipanjja, sapa maraw yaqha ovejanakajj Criston jilanakapar yanaptʼapjjatap uñachtʼayapjje. ¿Kunjamsa uk lurapjje? Semananak faltkipanwa oraqpachan invitacionanak jaqenakar churapjje, ukhamat sarañ munirinakajj uka tantachäwir sarapjjañapataki. Ukatjja oraqpachanwa Jesusan jiwatap amtañatakejj wakichtʼapjjaraki. Criston jilanakapar ukham yanaptʼasajja, yaqha ovejanakajj wali kusisitäpjjewa. Kuntï ajllit cristianonak layku lurapki ukjja, Jesús laykuw lurasipki (Mat. 25:37-40). w22.01 pág. 22 párrs. 11, 12

Jesusajj kunjam chuymanïnsa, kunjamsa mayninakar uñjäna uk yateqastan ukhajja, Jehová Diosatwa yateqasisktanjja. Jesusajj munasiñampiw lepra usuni mä jaqerojj uñjäna, usuntat mä warmirojj wali sinttʼasiñampiw uñjäna, llakitäpkäna ukanakatsa khuyaptʼayasirakïnwa (Mar. 1:40, 41; 5:25-34; Juan 11:33-35). Jiwasatï Jehová Diosat yateqasiñatak chʼamachasiñäni ukhajja, jukʼampiw jupar jakʼachasiñäni. Jesusan kayup arkañäni ukhajja, janiw akapachampejj apayaskañäniti. Janïr jiwayatäkäna uka qhep qhepa arumajja, Jesusajj akham sänwa: “Nayajj akapachar atipjawaytwa” sasa (Juan 16:33). Ukampejj akapachan amuyunakapampi, luräwinakapampi, amtanakapampejj janiw apayaskti sañwa munäna. Jesusajj kunarutï aka oraqer jutkäna uk janipuniw armaskänti. Jupajj Diosan sutip qʼomachiriw jutäna. Jehová Diosar serviñat kunaymaninakaw apaqestaspa, ukampis Diosan voluntädap lurañatak chʼamachasiñäni ukhajja, Jesusjamarakiw ‘akapachar atipjañäni’ (1 Juan 5:5). w21.04 págs. 3, 4 párrs. 7, 8

Apóstol Pablojja, Jesusajj nayar “confiyapjjatap uñachtʼayapki” ukanakajj wiñay jakañ katoqapjjani siskäna uka promes sum uñtʼäna (Juan 3:16; Rom. 6:23). Pablojj Jesusan jaqenak layku jiwataparojj taqe chuymaw confiyäna. Maynejj jachʼa juchar purtʼasis arrepentiski ukhajja, Diosajj perdoniwa, Pablojj janiw ukat pächaskänti (Sal. 86:5). Jupa layku jiwañapatak Diosajj Yoqapar khitanitap yatïnwa, ukatwa Diosajj nayar wal munasitu sasin confiyäna. Gálatas 2:20 textot amuytʼañäni, Pablojj akham sänwa: ‘Diosan Yoqapajj nayarojj wal munasitu, naya laykurakiw jakäwip churäna’ sasa. Jupajj Diosamp munatäñatakejj janis walïkaspa ukham janiw amuykänti. Janiw akham siskänti: ‘Diosajj jilat kullakanakar munasiwa, ukampis janipuniw nayar munaskitaspati’ sasa. Antisas Romankir cristianonakar akham sänwa: “Juchararäkayätan ukhaw Cristojj jiwas layku jiwawayi” sasa (Rom. 5:8). Diosajj taqeniruw munasistu, munasiñapajj qhawqha chʼamanisa uk Pablojj yatïnwa, Israel markar wali pacienciampi uñjatapsa yatirakïnwa. w21.04 pág. 22 párrs. 8-10

Yateqerisar Bibliat yatichkasajja, Jehová Diosar munasiñapatakiw yanaptʼañasa. Jehová Diosajj kunjam Diosasa uka toqet parltʼañatak tiempo apstʼasiñasawa. Jehová Diosajj kusisir Diosätapa, jupar munasipki ukanakar yanaptʼirïtap amuyañapatakiw yateqerir yanaptʼañasa (1 Tim. 1:11; Heb. 11:6). Kuntï yateqki ukarjam sarnaqasajj kuna askinaksa jikjjatani ukwa qhanañchtʼañasa. ‘Uka askinakajja, Jehová Diosajj jumar wal munasitapwa uñachtʼayi’ sasaw qhanañchtʼañasaraki (Is. 48:17, 18). Diosar jukʼamp munasisajja, jukʼampiw cambionak lurañ munani. Yateqerejja bautisasiñatakejj waljanak jaytañapaw wakisini, inas kunanakapatï utjki ukanak apanukuñapajj wakisirakchini. Waljanejja Diosar jan munasiri nayra amigonakap jaytapjjañapäniwa, yaqhepasti Testigonak conträpki uka familiaranakapan uñisitaw uñjasipjjarakini. Ukampis Jesusajj Diosan markapan wali munasir familia jikjjatapjjani sasaw säna (Mar. 10:29, 30). w21.06 págs. 4, 5 párrs. 8, 9

Apóstol Pablojja jaqenakar Jesusan discipulopar tukuyañajj alinak ayruñampi, jilayañampi sasiwa sänwa. Ukhamatwa ayruñat sipansa jukʼamp luraña munasitap qhanañchäna. Corinto markankir cristianonakarojj akham sasaw amtayäna: “Nayaw ayruntayäta, Apolosasti umampiw warjjatarakïna [...]. Jumanakajj Diosan oraqepäpjjtawa, juparakiw uka oraqer yapuchaski” sasa (1 Cor. 3:6-9). ‘Diosan oraqepan’ trabajirinakäpjjtanwa, ukhamajja predicasaw jathanak ayrunttanjja, yatichasaw umampi warjjataraktanjja. Ukampis Diosaw uka jathanak jilayi. Predicañasa yatichañas mä suma bendicionawa, uk lurañajj wal kusisiyistu. Pablojj Tesalónica markankirinakat waljaniruw Jesusan discipulopäñapatak yanaptʼäna, ukham yanaptʼasajj akham sänwa: ‘Jesús Tatitusajj kuttʼanjjani uka tiemponjja, ¿jupa nayraqatan khitinakänisa nanakan suytʼañanakajasa, kusisiñanakajasa? ¿Janit jumanakäpkta? Cheqpachansa jumanakäpjjtawa nanakan jachʼañchasiñanakajasa, kusisiñanakajasa’ sasa (1 Tes. 2:19, 20; Hech. 17:1-4). w21.07 pág. 3 párr. 5; pág. 7 párr. 17

Jehová Diosaw serviripäñasatak sapa maynir jawsistu (Juan 6:44). ¿Kunsa ukajj uñachtʼayi? Aka oraqpachankir walja millón jaqenakajj kunjamäpjjesa uk sapa maynir uñjkasajja, suma chuymanïtaswa Diosajj uñjistu, jupajj munasitaniwa sasaw amuyaraki (1 Crón. 28:9). Diosajj uñtʼistuwa, kunjamäsktansa uk amuyistuwa, munasirakistuwa. Ukajj wal chuymachtʼistu. Diosajj wal munasistu, sapa mayni jilat kullakanakarus wal munasiraki. Qhawqsa munasistu uk amuyañasatakejj mä uñachtʼäwimpiw Jesusajj qhanañchäna. Mä awatiritï 100 ovejanakapat may chhaqayani ukhajj ¿kunsa lurani? ‘99 ovejanak mä qollu patar jaytawayasajj chhaqat ovejapar thaqeriw sarani’. Jikjjatasasti janiw ovejatak colerkaniti, antisas wal kusisini. ¿Kunsa ukajj yatichistu? Diosatakejj sapa mayni ovejanakapaw wali valorani. Jesusajj akham sänwa: “Jupajj janiw aka jiskʼanakat maynin chhaqañapsa munkiti” sasa (Mat. 18:12-14). w21.06 pág. 20 párrs. 1, 2

Jupan munasiñapajj jan tukusirïtapat lupʼtan ukhajja, jukʼampiw Jehová Diosar munastanjja, suma amigoparakïtanwa (Rom. 8:38, 39). Jesusat yateqasiñasatakiw chʼamañcharakistu (1 Ped. 2:21). Jesusan jiwatap amtañ uru jakʼajja, janïr jiwayatäkäna uka qhepa semanajj kunsa Jesusajj aka oraqenkkasajj luräna, kunjamsa jiwayapjjäna, jaktarakïna, uka toqenakatwa Bibliat liytʼasajj amthaptanjja. Ukatjja Jesusan jiwatap amtañatak tantachasktan uka arumajja, qhawqsa Jesusajj munasistu uka toqetwa discursojj amtayarakistu (Efes. 5:2; 1 Juan 3:16). Kunjamsa Jesusajj taqe chuyma sacrificiot loqtasïna uka toqet liytʼañasa, lupʼiñasa, ‘kunjamtï Jesusajj sarnaqkäna ukham sarnaqañatakiwʼ chʼamañchistu (1 Juan 2:6). Jehová Diosan amigopäskakiñatakis yanaptʼarakistuwa (Jud. 20, 21). Jupar istʼañataki, sutip jachʼañchañataki, chuymap kusisiyañatak chʼamachastan ukhajja, Diosan wali munataw jakastanjja (Prov. 27:11; Mat. 6:9; 1 Juan 5:3). Jesusan jiwatap amtañatak tantachäwir sarañajja, “¡wiñayatakiw juman amigomäskakiñ munta!” sasin Jehová Diosar sañatakiw chʼamañchtʼistu, uksti sapüruw luratanakasamp uñachtʼaytanjja. w22.01 pág. 23 párr. 17; pág. 25 párrs. 18, 19

Kunsa jakäwisampi lurañäni uk sapa mayni amtirwa Diosajj lurawayistu. Uka regalo churatapatjja, kunsa jakäwisamp lurañäni uk jiwaspachpaw amtsna. Jupar serviñ amttan ukhajj munasiri Diosasajj wal kusisi (Sal. 84:11; Prov. 27:11). Uka regalompejj yaqha suma amtanakaruw puriraksna. Jesusajja jupat llakisiñat sipansa mayninakatwa jukʼamp llakisïna, jiwasajj jupatwa yateqassna. Mä kutejj Jesusampi apostolonakapampejj wali qaritäpjjänwa, ukatwa mä chʼusa lugarar samartʼir sarjjapjjäna. Ukampis kawkjarutï sarapkäna ukarojj walja jaqenakaw Jesusan yatichäwinakap istʼañatak jutapjjäna, ukatwa samartʼañ jan puedipkänti. Colerañat sipansa Jesusajj uka jaqenakat sinttʼasïnwa, ukatwa “kunayman toqenakat yatichañ qalltäna” (Mar. 6:30-34). Jesusat yateqasisajj tiemposampi chʼamasampi mayninakar yanaptʼtan ukhajj Diosaruw jachʼañchtanjja (Mat. 5:14-16). w21.08 pág. 3 párrs. 7, 8

Jehová Diosarojj taqe kunas jan mä igualakïtapajj wal gusti. Jupajj kunayman kasta animalanaka, plantanaka, jaqenakwa lurawayi. Janiw pä igual jaqejj utjkiti, ukatwa Diosajj janipun khitimpis igualaykistuti. Antisas kunjam chuymanïtansa ukwa uñjistu (1 Sam. 16:7). Kunanaksa lurañ yattan, kunjamsa jilsuwaytan uks yatirakiwa. Qhawqtï lurañ puedktan ukakwa mayistu. Jupatwa yateqasiñasa, ukham lurasajj ‘suma amuytʼasirïtaswa’ uñachtʼayañäni, janirakiw mayninakat sipan jilanksnasa, minusäksnas ukham amuyaskañäniti (Rom. 12:3). Mayninakan yateqasiñajj walikïskiwa, predicañ sum yatki uka jilatata jan ukajj kullakatwa yateqassna (Heb. 13:7). Ukajj suma yatichirïñatakiw yanaptʼistaspa (Filip. 3:17). Ukampis maynin suma luräwinakapat yateqasiñampi, maynejj jiwasat sipan jukʼamp sumti luri janicha uk igualayañampejj janiw pachpäkiti. w21.07 pág. 20 párrs. 1, 2

Jiwasatï animalanaka, plantanaka, warawaranak wali amuyump uñchʼukiñänejja, taqe kun Luririrojj jukʼampiw confiyañäni (Sal. 19:1). Ukanak jukʼamp yatjjatasas mä Luririn utjatapar jukʼampiw confiyarakiñäni. Bibliat apstʼat qellqatanakasanjja kunjamsa Diosajj taqe kuns lurawayi uka toqet parlir yatichäwinakajj sapa kutiw uñsti. Diosan taqe luratanakapat yatjjatkasajja kunsa ukajj Luririsat yatichistu ukwa amuyañasa (Rom. 1:20). Sañäni, intejja janiw aka oraqen jakañ utjañapatakejj qhana, calora ukak utjaykiti, jan ukasti jan waltʼayiri rayos ultravioleta qhanwa utjayaraki. ¿Kunas uka qhanat jarkʼaqestu? Aka oraqejj capa de ozono sat gasaniwa, ukaw mä escudjam uka qhanat jarkʼaqestu. Rayos ultravioleta ukajj jiljjatti ukhajj capa de ozono gasajj jiljjattarakiwa. ¿Taqe ukanak uñjasajj janit mä wali yatiñäni munasiri Luririn utjatap amuyktanjja? w21.08 pág. 17 párrs. 9, 10

Maynejj bautisasjje ukhajja, jupar munasiskakiñasawa, respetaskakiñasarakiwa (1 Juan 4:20). Jupar confiyasaw uk lursna. Sañäni, kunatsa ukham luri uk jan entiendktan ukhajja, jan wali amtampis uk lurkaspa ukham janiw amuyañasäkiti. Antisas jupar respetañasawa, jiwasat sipan jilankkaspas ukhamwa amuyañasa (Rom. 12:10; Filip. 2:3). Jichhürunakan taqeniruw khuyaptʼayasiñampi munasiñampi uñjañasa. Wiñayatak Diosan familiap taypinkañ munstan ukhajja, Biblian yatichäwinakaparjamaw jakañasa. Sañäni, Jesusajja enemigonakasaru taqe jaqenakar khuyaptʼayasiñampi munasiñampi uñjañwa yatichäna (Luc. 6:32-36). Awisajj uk lurañajj chʼamjamäspawa. Jiwasatakitï ukhamächi ukhajja, Jesusjam amuyaña, lurañwa yateqañasa. Jehová Diosar istʼañataki, Jesusat yateqasiñataki chʼamachastan ukhajja, wiñayataki familiap taypinkañ munataswa Diosarojj uñachtʼaytanjja. w21.08 pág. 6 párrs. 14, 15

Jehová Diosar confiyañwa yateqañasa. Jiwasatï jupar confiyañäni ukat jupar serviñ nayrar uchañäni ukhajja, walja bendicionanakwa katoqañäni. Diosar jukʼamp serviñatak wal chʼamachasipkäna uka sarnaqäwinakajj Biblian waljaw utji. Jupanakajj Diosar confiyapjjatap layku mä kun lurañ amtjjapjjäna uka qhepatwa bendicionanak katoqapjjäna. Sañäni, Abrahanajj ‘jan kawkir sarañap yatkasin’ utapat sarjjäna uka qhepatwa Diosan bendicionap katoqäna (Heb. 11:8). Jacob chachajj mä angelamp nuwasïna uka qhepatwa mä bendición katoqäna (Gén. 32:24-30). Israelitanakajj Suma Oraqer mantañampïpkäna ukhajja, sacerdotenakajj umar taktʼapkäna ukhakiw israelitanakajj Jordán jachʼa jawira paskatañ puedipjjäna (Jos. 3:14-16). Jichha tiempon Diosar jukʼamp serviñatak chʼamachasipki, jupar confiyapki uka jilat kullakanakatsa yateqasiraksnawa. w21.08 págs. 29, 30 párrs. 12-14

Chuymankipstat jilat kullakanaka, nayrajj kunjamas taqe kunas lurasïna uk sumwa yatipjjtajja, cambionak utjawayki ukarjam lurañajj kunja wakiskirisa uksa amuyapjjaraktawa. Inas jumanakat yaqhepajj jichhak bautisasipjjsta, jumanakas yaqhanakar yanaptʼapjjarakismawa. Wayn tawaqonakajj experiencianakam wal istʼañ munapjje. Kuntï yatipkta uk yaqhanakar yatichäta ukhajja, Diosajj bendisipjjätamwa (Luc. 6:38). Edadani jilat kullakanakasa wayn tawaqonakas purapatwa chʼamañchtʼasipjjaspa (Rom. 1:12). Cheqas sapa mayniw mä kuns sum lurtʼañ yati. Edadani jilat kullakanakajja, Diosar walja maranak servisajj yatiñanïpjjewa, experiencianïpjjarakiwa. Wayn tawaqonakasti chʼamanïpjjewa. Wayn tawaqonakampi edadani jilat kullakanakampejj amigonakjam yanaptʼasipjje ukhajja, Diosarojj wal jachʼañchapjje, congregacionatakis mä bendicionäpjjarakiwa. w21.09 pág. 8 párr. 3; pág. 13 párrs. 17, 18

Jesusar kunjamtï jiwayapkäna uk uñjasajja, ¿kunatsa walja judionakajj jupat pächasipjjäna? Lunthatanaka, jachʼa juch luririnakakiw lawar chʼakkatata jiwayatäpjjerïna, ukatwa Mesiasätapat pächasipjjäna (Deut. 21:22, 23). Jesusat pächasipkäna uka judionakajja, Jesusajj cheqapunis juchanïkaspa, janis ina chʼusat kʼarintatäkaspa, ukham tʼaqesiñapajj wakiskaspasa ukhamwa amuyapjjäna. Jesusarojj janiw cheqaparjam juzgapkänti. Judionakan jachʼa tribunalapajj jankʼakiw tantachtʼasipjjäna, leyinak pʼakintasaw Jesusar juchañchapjjäna (Luc. 22:54; Juan 18:24). Juezanakajja, jaqenakajj kuna kʼarinaktï Jesusat parlapkäna ukajj cheqäskapuniti, janicha uk janiw yatjjatapkänti, antisas “Jesusar jiwayañatakiw kʼari testimonio” thaqapjjäna (Mat. 26:59; Mar. 14:55-64). Jesusajj jaktjjäna uka qhepatjja, uka kʼari juezanakajj Jesusan sepulturap cuidiri romano soldadonakarojj “walja qollqe churapjjäna”, ukhamat kunatsa sepulturajj chʼusakëjjäna uk jaqenakar kʼarisisa yatiyapjjañapataki (Mat. 28:11-15). w21.05 pág. 11 párrs. 12, 13

Jehová Diosajj aka jan wali pacharojj niyaw tukjaspäna. Ukampis pacienciampi suytʼatapajj wal yanaptʼawayistu. Adanampin Evampin taqe wawanakapajj juchararaw nasiwaytanjja. Ukhamäkchisa Jehová Diosajj wal munasistu, cuidarakistuwa, niyarakiw aka jan wali pacharojj tukjani, jupaw uk arsuwayi (1 Juan 4:19). Kunapachas uka tʼaqesiñanak chhaqtayani uk amtjjewa. Ukhamajja Diosan jiwasar munasitap laykojj qhawqha tiempoy aguantañajj wakischini uk jupamp chikaw aguantañasa. Aguantañ toqet Jehová Diosaw wali yateqaskayajja. Jesusajj Awkipat yateqasisaw aguantarakïna. Aka oraqenkkäna ukhajja, jiwasanak laykuw jupa contra jan walinak parlatasa, phenqʼachatasa, tʼaqesiñ lawan jiwayatas aguantäna (Heb. 12:2, 3). Awkipan aguantatapaw juparojj aguantañatak yanaptʼäna, jiwasarus ukaw aguantañatakejj yanaptʼarakistaspa. w21.07 págs. 12, 13 párrs. 15-17

Alajjpachankir Awkisajj sapüruw khuyaptʼayasistu (Sal. 103:10-14). Jesusajj ukhamarakiw discipulonakapat khuyaptʼayasïna, perdonarakïna. Juchanakasan perdonatäñapatakejj vidapwa sacrificiot loqtasïna (1 Juan 2:1, 2). Maynir perdontan ukhajja, Diosan markapan jukʼamp munasiñ utjañapatakiw yanaptʼtanjja (Efes. 4:32). Awisajj perdonañajj chʼamakiwa, ukampis chʼamachasiñasawa. Mä kullakarojja, Yatiyañataki revistan mä yatichäwipaw wal yanaptʼäna. Jupajj siwa: “Uka yatichäwejja, kunjamsa mayninakar perdonirista uk amuyañatakiw yanaptʼawayitu. Mayninakar perdonañajj jan wali luratapajj walikïkaspas ukham janiw sañ munkiti. Antisas perdonañajj jupatak jan coleratäjjaña, chuymasan sumak jikjjatasjjaña sañwa muni” sasa. Jilat kullakanakar perdonasajja, jupanakar munasitasa, Jehová Diosat yateqasitaswa uñachtʼaytanjja. w21.09 págs. 23, 24 párrs. 15, 16

Jesusajj Diosat kunatï cheqäki ukarusa kunanaktï Diosajj jutïrin lurkani ukanakarus munasïnwa. Ukarjamaw jakäna, yaqhanakarus uk uñtʼayarakïnwa (Juan 18:37). Jesusan cheqpach discipulonakapajj cheqa yatichäwinakar munasipjjarakïnwa (Juan 4:23). Pedrojja, cristianonakan religionaparojj ‘cheqa thaki’ sasaw säna (2 Ped. 2:2). Nayrïr cristianonakajj cheqa yatichäwinakar wal munasipjjäna, ukatwa kʼari religionanakan yatichäwinakaparusa jaqenakan costumbrenakaparusa amuyunakaparus jan istʼapkänti, kunattejj cheqa yatichäwinak contränwa (Col. 2:8). Jichhürunakan cheqpach cristianonakajj ‘cheqa yatichäwinakarjam sarnaqañatakiwʼ chʼamachasipjjaraki (3 Juan 3, 4). Testigonakajj ‘kuntï Bibliajj yatichki uk sum amuyapjjta’ sasajj janiw sapkiti. Awisajj Biblian mä yatichäwip qhanañchasajj pantjasipjjewa, congregacionajj kunjam organiztʼatäñapasa ukans pantjasipjjarakiwa. Ukampis mä kunas qhanstjje ukhajj ratukiw askichapjje. w21.10 págs. 21, 22 párrs. 11, 12

Nayra tiemponjja, mä markan murallanakapajj enemigonakatwa ukan jakirinakarojj jarkʼaqerïna. Diosan munasiñat jan jaytjasirïtapajj uka murallanakar uñtasitawa, ukaw kunanakatï Diosamp sum apasitas jan waltʼaykaspa ukanakat jarkʼaqestu. Diosan munasiñat jan jaytjasirïtapajj jupan ukaruw aparakistu (Jer. 31:3). Kunjamsa Diosajj markapar jarkʼaqe uk qhanañchañatakejja, Davidajj akham sänwa: “Diosaw nayan seguro imantasiñajajja, munasirïtapa jan jaytjasirïtapa uñachtʼaykitu uka Diosätawa”. “Jupaw munasirïtapsa jan jaytjasirïtapsa uñachtʼayitu, jupaw jachʼa perqanakampi muyuntat markajasa, seguro imantasiñajasa, salvirijasa, escudojasa, juparuw nayajj imantasta” sasa (Sal. 59:17; 144:2). Davidajj Diosan munasiñat jan jaytjasirïtapajj mä seguro imantasiñar uñtasitawa, jachʼa perqanakani markar uñtasitawa sasaw säna. Ukhamajj kawkjansay jakaskchiñänejja, Diosan serviripäskakiñäni ukhajj jupamp sum apasiskakiñatakejj jarkʼaqapunistaniwa. w21.11 pág. 6 párrs. 14, 15

Mä kutejj Jesusampi discipulonakapampejj barcotwa viajisipkäna, ukhamaruw qota taypin jachʼa thayajj sartäna. Kunatï ukan paskäna ukampiw Jesusajj discipulonakaparojj Diosar jukʼamp confiyapjjañap wakisitap amuytʼayäna (Mat. 8:23-26). Jachʼa thayajj wali chʼamampiw thaytʼanïna, oladanakas barcor chhaqtayänwa, ukatwa discipulonakapajj wal sustjasisin Jesusar ikit sartayapjjäna, ukhamat jupanakar salvañapataki. Jesusasti jupanakar akham sänwa: “Diosar jan taqe chuym confiyir jaqenaka, ¿kunatsa wal sustjasipjjta?” sasa. Inas jumajj thayar uñtasit jan walinakan uñjasisksta, jan ukajj inas mä jan wali usojj jan waltʼayaskstam, ukhamïpan inas jan kuns lurañ puedkstati, inas wal llakisiraksta. Ukampis Jehová Diosar confiyaskakiñamawa. Kunjamas jikjjatasta taqe ukanak jupar yatiyam. Ukatjja kunjamsa Jehová Diosajj yanaptʼawaytam ukanakat lupʼisa jupar jukʼamp confiyam (Sal. 77:11). Jupajj janipuniw jichhasa ni kunapachas jaytanukkätamti. w21.11 pág. 22 párrs. 7, 10

Maynejj akhamwa amuyaspa: ‘Jaqenkir jan kun aptasajja, uka mandamiento phoqasktwa’ sasa. Ukampis yaqha toqenakatwa lunthatasiskaspa. Sañäni: mä aljirejja, engañjañatakejj balanzanakapsa, mediñanakapsa janiw phoqat apnaqkaspati, uk lurasajj lunthatasiskiwa. Levítico 19:13 ukan “janiw jaqe masimarojj engañjañamäkiti” sasajja, lunthatasiñampi jan honradöñampejj niya pachpakïtapwa amuyayistu. Ukhamajj maynitï negociopansa trabajopansa jan honradökani ukhajja, lunthatasiskiwa. Kimsaqallqöri mandamiento sum amuyañatakejja, kuntï Levítico libron siski ukaw yanaptʼistu. Mä arunjja kunjamsa taqe kunan honradösna uk amuyañatakiw yanaptʼistu. Kunjamsa Jehová Diosajj jan honradöñaru, lunthatasiñaru uñji uka toqet lupʼiñajj wali wakiskiriwa. Akham sasaw jisktʼassna: “Kuntï Levítico 19:11-13 textojj siski ukarjamajja, ¿negociojansa jan ukajj trabajojansa kunan cambiañajäspasa?” sasa. w21.12 págs. 9, 10 párrs. 6-8

Oraskasajj kunanakansa uka urojj pantjastan ukanakatwa lupʼiñasa, ukatsti Jehová Diosaruw perdón mayisiñasa. Mä jachʼa juchar purtʼasstan ukhajja, ancianonakaruw yanaptʼa mayiñasaraki, jupanakajj jiwasar sum istʼasajj munasiñampiw Bibliamp ewjjtʼapjjestani. Jiwasampiw orapjjarakini, Diosarus Jesusan vidap loqtasitapjjaruw jiwasar perdonañapatak mayipjjarakini, ukhamat Diosamp sum apasiskakiñasataki (Sant. 5:14-16). Kunjamsa Jesusajj jiwas layku tʼaqesis jiwäna uka toqet lupʼisajja, inas chuym wal chʼalljjtayasstan. Ukampis Jesusan jiwas layku jiwatapat lupʼiñäni ukhajj jukʼampiw juparusa Diosarus munasiñäni. Jesusan jiwatap amtañatak tantachäwir sapa mara sarasa, mayninakar ukar sarapjjañapatak taqe chuyma invittʼasaw Jesusan jiwas layku jiwatapat jukʼamp yuspäratas uñachtʼayaraktanjja. Jehová Diosajj Yoqapat yaqhanakar yatichañasatak jaytkistu ukajj mä suma bendicionawa. w21.04 págs. 18, 19 párrs. 13-16

Jesusajj mä qollu thiyankaskänwa, ¿jupan ukar walja jaqenak jutir uñjasajj kunsa lurpachäna uk amuytʼasmati? Jupajj arum paqaraw orasïna, ukhamajj wali qaritäpachänwa. Ukampis taqe uka jaqenakar uñjasajja, pobrenakatsa usutanakatsa wal khuyaptʼayasïna. Janiw usutanakaruk qollkänti, jan ukasti wali chʼamañchtʼkir discurswa Qollun arstʼarakïna (Luc. 6:12-20). Jesusajj mayninakar yanaptʼañatakejj tiempo apstʼasirïnwa. Jupajj Bautisir Juanar jiwayapjjatap yatisajja, ¿kunjamakis jikjjataspachäna? Bibliajj akham siwa: “Uk istʼasasti Jesusajj mä chʼusa cheqaruw botet sarjjäna, sapakïñ munasaw ukar saräna” sasa (Mat. 14:10-13). Ukampis walja jaqenakaw jupar suyjjapjjäna (Mar. 6:31-33). Uka jaqenakajj Diosan chuymachtʼatäña yanaptʼatäñ munapjjatapwa Jesusajj amuyäna, ukatsti jankʼakiw jupanakar yanaptʼäna (Luc. 9:10, 11). w22.02 pág. 21 párrs. 4, 6

¿Mä jilataru jan ukajj mä kullakaru chuym ustʼayatas amuyasstan ukhajj kunsa lurañasa? Jehová Diosaruw orasiñasa, jilatampi jan ukajj kullakampi sumankthapiñatak chʼamachasktan ukar bendisiñapatakis mayiñasarakiwa. Jiwaspachpaw amuykiptʼasiñasa, akham sasaw jisktʼassna: “¿Nayaw pantjasta sasin humilde chuymamp perdón mayiñatakisa jupamp sumankthapiñatakis dispuestötti? ¿Nayatï sumankthapiñatak nayraqat chʼamachasï ukhajj kunjamas Jehová Diosasa Jesusas jikjjatasipjjani?” sasa. Kunjamjjay uka jisktʼanakar jayschiñäni ukaw Jesusar istʼañatakisa, jilatampi jan ukajj kullakampi sumankthapiñatakis yanaptʼistani. Jiwasatï maynimp sumankthapir sarañäni ukhajj ukhamarakiw humilde chuymanïñasa (Efes. 4:2, 3). Chuym ustʼayktan ukamp parlañäni ukhajja, jiwasamp wasitat sum apasjjañapatakiw jupar yanaptʼañasa. Khitis pantjasïna uk thaqaskañat sipansa, sumankthapiñaw jukʼamp wakiskirejja (1 Cor. 6:7). w21.12 págs. 25, 26 párrs. 13-16

Judionakajj janiw Reinon suma yatiyäwinakap istʼañ munapjjañapäkänti, uk yatisaw Jesusajj wal llakisïna. Ukham jan istʼapjjatap laykuw Jerusalén markajj tʼunjata uñjasiñapäna, jan jiwapkäna uka judionakas preso apataw uñjasipjjañaparakïna (Luc. 21:20-24). Kunjamtï Jesusajj siskänjja, cheqapuniw jilaparte judionakajj jupar jan katoqapkänti. ¿Jakaskta uka cheqan jaqenakajj Diosan Reinopat yatiyatajj istʼapjjeti? Yatichañatak chʼamachaskta ukar jukʼa jaqenakakis istʼapkstamjja, ¿Jesusan jachaqtʼasitapat kunsa yateqasma? Jehová Diosajj jaqenakar wal munasi. Jesusan jachaqtʼasitapajja, Jehová Diosajj jaqenakar wal munasitapwa amtayistu. “Janiw khitin jiwañapsa jupajj munkiti, jan ukasti taqenin arrepentisipjjañapwa muni” (2 Ped. 3:9). Jiwasajja jaqe masisarojj wal munastanjja, ukatwa suma yatiyäwinak chuymapar purtʼañapataki chʼamachastanjja (Mat. 22:39). w22.01 pág. 16 párrs. 10-12

Kunanaksa Jehová Diosajj markap laykusa, sapa mayni laykus lurawayi ukanakat lupʼiñäni ukhajja, Diosarojj jukʼampiw confiyañäni, jukʼampiw jupar munasirakiñäni. Jukʼampis munasiñaw Jehová Diosar istʼañatakisa, jupar kusisiyañatak sacrificionak lurañatakisa, jan waltʼäwinak aguantañatakis yanaptʼistani (Mat. 22:37-39; 1 Cor. 13:4, 7; 1 Juan 5:3). Munat Jehová Diosasan amigopäñaw taqe kunat sipans jukʼamp importantejja (Sal. 63:1-7). Kunjamtï yatjjataniwayktanjja, orasisasa, yatjjatasasa, lupʼisas Jehová Diosaruw adorasktanjja. Kunjamtï Jesusajj lurirïkänjja, ukhamarakiw Jehová Diosampïñatak chʼusa lugaranakar sarañasa. Kunanakatï pantjasiykistaspa ukanak maysaruw apanukuñasa. Tantachäwinakankkasasa, Bibliat yatjjatkasasa, jan ukajj yaqha ukhamanak lurkasasa, wali atencionamp istʼañataki wali amuyump yatjjatañatakejj Jehová Diosaruw yanaptʼa mayisiñasa. Jiwasatï tiempos jan ina chʼusar aptʼaskañäni ukhajja, Jehová Diosajj jutïrin wiñay jakañ churasaw bendisistani (Mar. 4:24). w22.01 pág. 31 párrs. 18-20

Cheqas kunanaktï lupʼktan ukarakwa lurtanjja, ukatwa Jesusajj kuna amuyunakatï jachʼa juchar purtʼasiykistaspa ukanak apanukupjjam sasin yatichäna (Mat. 5:21, 22, 28, 29). Niyakejjay alajjpachankir Awkisar kusisiyañ munstanjja, jan wali amuyunak jankʼakiw apanukuñasa. Jesusajj akham sänwa: “Lakat mistki ukajj chuymatwa juti” sasa (Mat. 15:18). Chuyma manqhasan kunjamätansa ukajja, parlatasanwa qhan amuyasi. Akham jisktʼasim: “¿Jan walinakan uñjasisajj kunatï cheqäki ukti parltjja? Nayatï casaratästjja, ¿mayninakamp parlkasajj formaläñatak chʼamachastti? ¿Qʼañu juchanakat jan parlañatakejj chʼamachastti? ¿Maynejj colertʼaykitu ukhajj pacienciampit jaystjja?” sasa. Uka jisktʼanakat lupʼiñatak tiempo apstʼasim. Jumatï mayninakar jiskʼachañanaka, kʼarisiñanaka, qʼañu juchanakat parlañanak apanuküta ukhajja, nayrajj kunjam jaqëyätasa uk apanukuñajj janiw chʼamäkaniti. w22.03 pág. 5 párrs. 12-14

Khitinakatï ewjjtʼayasiñ suyañat sipans ewjjtʼa mayipki ukanakaw Diosar serviñan jukʼamp nayrar sartapjje. Ukhamajj ewjjtʼa suyaskañat sipans jiwasaw ewjjtʼa mayiñasa. ¿Kunapachas mä jilataru jan ukajj mä kullakar ewjjtʼa maysna? Uka toqet mä qhawqha uñjañäni. 1) Mä kullakajja Bibliat yatichki ukar compañtʼayasiñatakiw experienciani mä publicadorar mayi, ukatsti jukʼamp suma yatichirïñatakejj kunansa chʼamachasiñapa ukwa jisktʼaraki. 2) Mä soltera kullakajj pantalonanakwa alasiñ muni, ajlliski ukajj walikïskiti janicha uka toqetwa experienciani mä kullakar jisktʼasi. 3) Mä jilatajja nayrïr discursopwa arstʼañapa, jupajj discurso arstʼañ toqet experienciani mä jilataruw istʼañapatak mayi, ukhamat kunanakansa chʼamachasiñapa uka toqet ewjjtʼañapataki. Discurso arstʼañatak experiencianëjjapjje uka jilatanakasa, yaqha jilatanakaruw uka toqet ewjjtʼa mayipjjaspa, ukatjja ukarjamaw lurapjjarakispa (Prov. 19:20). w22.02 pág. 13 párrs. 15-17

Jesusajj aka oraqenkkäna ukhajja, Jehová Diosajj munasiñampiw jupar uñjäna, jiwasarojj munasiñampiw uñjarakistu (Juan 5:20). Jupar confiyaskakiñapatakiw Jesusar yanaptʼäna, llakitäkäna ukhajj chʼamañchtʼänwa, kunatï jakañatak munaski uks janiw faltaykänti. Qhawqsa jupar munasïna uks yatiyarakïnwa (Mat. 3:16, 17). Jesusajja Awkipajj jupampïskatap yatïnwa, ukatwa sapak jan jikjjataskänti. Jiwasajj Jesusjamarakiw Diosan munasiñap walja kuti uñjtanjja. Jehová Diosajj amigopäñasatakiw invittʼistu, munasiri mayachtʼata familiaparuw irpanirakistu, ukajj wal kusisiyistu, llakitäktan ukhajj jupanakaw wal chʼamañchtʼapjjestu (Juan 6:44). Diosajj jupar confiyaskakiñatakejj kunatï wakiski ukwa churistu, kunatï jakañatak munaski uks janiw faltaykistuti (Mat. 6:31, 32). Qhawqsa jupajj munasistu uka toqet lupʼtan ukhajja, jukʼampiw jupar munastanjja. w21.09 pág. 22 párrs. 8, 9

Testigonakapampi janïr Bibliat yatjjatkayäta ukhajja, ¿kunjamänsa jakäwimajja? Waljanejj janiw uka tiempot amtañsa munapkiti. Kunatï walïki jan walïkaraki uka toqetjja, inas jiwasajj akapachankir jaqenakjam amuychiyätan, sarnaqarakchiyätan. Jiwasatï ukhaman uñjaschiyätan ukhajja, jan kuna suytʼañani, “Diosar jan uñtʼasa” ukhamaw jakayätanjja (Efes. 2:12). Ukampis Bibliat yatjjatkasajja, alajjpachankir Dios Awkisajj qhawqsa jumar munastam ukwa yatjjatawaytajja. Ukatjja Diosar kusisiyañatakisa, jupar servipki uka familiap taypir mantañatakisa, jakäwimana ukhamarak amuyuman cambionak lurañ wakisitapwa amuyarakpachätajja. Diosan leyinakapar respetañsa yateqarakpachätawa (Efes. 5:3-5). Niyakejjay Jehová Diosajj Luririsächejja, familiapankirinakajj kunjamsa sarnaqapjjañapa uk amtañatakejj derechoniwa. Bautisasiñ munapki ukanakarojj akham sarakiwa: ‘Nayrajj kunjam jaqëpjjayätas ukanaksa jan wali luräwinakamsa isïkaspas ukham apsusipjjam’ sasa. w22.03 pág. 2 párrs. 1-3

Yaqha ovejanakajja, Jesusan jiwatap amtañatak tantachäwir sarasin kunjamsa uk amtapjje uk uñjasajj wal kusisipjje, kuna suytʼäwinïpjjesa ukatsa lupʼipjjarakiwa. Jupanakajj kunas uka tantachäwin arstʼasini uk istʼañwa munapjje. Uka tantachäwinjja, jilapartejj Cristompita, 144.000 ajllit cristianonakampitwa arstʼasi, kunsa Waranqa Maranak apnaqasajj jan jitheqtas serviri cristianonak laykojj lurapjjani ukaw arstʼasi. Alajjpachan apnaqerinakajja, Jesucristo Reyin pʼeqtʼatäsajj mä Paraisoruw aka oraq tukuyapjjani, istʼasirinakajj jukʼat jukʼatwa perfectöjjapjjarakini. Jesusan jiwatap amtañatak tantachäwinkir walja millón jaqenakajja, kunjamsa jutïrin profecianakajj phoqasini uk amuytʼasajj wal kusisipjje. Yaqhep profecianakajja, Isaías 35:5, 6; 65:21-23; Apocalipsis 21:3, 4 textonakankiwa. Kunjamsa machaq mundon munat amigonakapampis familiapampis jikisjjapjjani uk amuytʼasajja, taqe chuymaw uk suytʼapjje, jukʼampiw Jehová Diosar serviñ munapjjaraki (Mat. 24:13; Gál. 6:9). w22.01 pág. 21 párrs. 5-7

¿Juchat kutsuyañajj kunasa? Griego Arut Qellqatanakarjamajja, kuntï Adanajj aptʼawaykäna uk kutsuyañatak Jesusajj pagawayki ukawa (1 Cor. 15:22). ¿Kunatsa uk muntanjja? Moisesar churaskäna uka Leyirjamajja, Jehová Diosajj “jakañatjja jakañaraki” churasiñapwa mayïna (Éx. 21:23, 24). Adanajj perfecto jakäwipwa aptʼasiwayi. Ukhamajja, kuntï Jehová Diosajj maykäna uk phoqañatakejj Jesusaw perfecto vidap churañapäna (Rom. 5:17). Ukhamatwa jupajj khitinakatï jakäwip loqtasitapar confiyapki ukanakatakejj ‘Wiñay Awkipar’ tukuwayi (Is. 9:6; Rom. 3:23, 24). Jesusajj Awkipar munasitapata jiwasar munasitapatwa vidap loqtasïna (Juan 14:31; 15:13 ). Uka munasiñaw Awkipat jan jitheqtas jiwañkam aguantañatakisa, voluntädap lurañatakis yanaptʼäna. w21.04 pág. 14 párrs. 2, 3