Abril

Jesusajj taqe chuyma vidap churasaw jiwasar munasitap uñachtʼayistu (Juan 15:13). Kunanaktï Jehová Diosas Jesusas jiwasar munasipjjatap laykojj lurapki ukanakatjja, janiw kunampis kuttʼayksnati, ukampis sum sarnaqatasampiw yuspärasirïtas uñachtʼaysna (Col. 3:15). Ajllit cristianonakajja, uka laykuw mä suma suytʼäwinïpjje, ukatwa Jesusan ukham luratap wali valoranit uñjapjje (Mat. 20:28). Jesucriston sacrificiot loqtasitapar confiyapjjatap laykojja, Jehová Diosajj cheqapar sarnaqer jaqetwa jupanakar uñji, wawanakaparjamaw katoqjjaraki (Rom. 5:1; 8:15-17, 23). Yaqha ovejanakasti, Jesusan jupanak layku vidap loqtasitaparojj wali valoranitwa uñjapjjaraki, Criston wilap wartasitapar confiyapjjatap laykuw jupanakajj Diosamp sumat uñjatäpjjaspa, ‘jachʼa tʼaqesiñatsa’ salvasipjjarakispa (Apoc. 7:13-15). Paypach gruponakajj Jesusan jiwatap amtañatak tantachäwirojj sapa maraw sarapjje, ukhamat yuspärapjjatap uñachtʼayañataki. w22.01 pág. 23 párrs. 14, 15

Jesusarojja Jehová Dios contras jan wal parlkaspa, Diosan sutipsa qʼañuchkaspa ukham kʼarintasaw jiwayapjjäna. Ukham jiwayatäñaw jupatakejj tʼaqesiñat sipansa jukʼamp jan walïna (Mat. 26:64-66). Diosar jan respetirit kʼarintatäñaw Jesusar wal llakisiyäna, ukatwa Awkiparojj ukham jiskʼachatäñat qhespiyañapatak mayïna (Mat. 26:38, 39, 42). Judionakar mä maldicionat salvañatakiw Jesusajj lawar chʼakkatat jiwañapäna (Gál. 3:10). Jupanakajja, Diosan Leyinakap phoqañwa arsupjjäna, ukampis janiw phoqapkänti, ukatwa maldisitäpjjäna. Janiw ukakïkänti, Adanan wawanakapjamajja, jupat jucha katoqasajj jiwapjjañaparakïnwa (Rom. 5:12). Diosan leyiparjamajja, mä jaqetï mä jachʼa jucha luraspäna ukhajj jiwayatäñapänwa. Ukatsti, jiwayasajj lawaruw awisajj cuerpop warkkatapjjerïna (Deut. 21:22, 23; 27:26). Ukhamajja Jesusajj lawaru chʼakkatata jiwatapatjja, judionakajj salvasipjjaspänwa. w21.04 pág. 16 párrs. 5, 6

Jesusajj jiwayatäkäna uka urojj kunas pasäna uk amuytʼapjjañäni. Juparojj romano soldadonakajj jan sinttʼasisaw chicotempi jawqʼjapjjäna (Mat. 26:52-54; Juan 18:3; 19:1). Uka chicotejj Jesusan jañchipsa chʼiyjänwa, ukatsti mä jathi lawa qʼepiyapjjäna. Jiwayatäñapäkäna ukaruw qatatiñ qalltäna. Ukampis janiw apañatakejj chʼamanëjjänti, ukatwa soldadonakajj uka cheq pasaskir mä chachar qʼepiñapatak obligapjjäna (Mat. 27:32). Jiwayatäñapäkäna uka cheqar Jesusajj purïna ukhajja, soldadonakajj lawar amparanakapa, kayunakapa clavompi chʼakuntasajj law saytʼayapjjänwa, ukhajj jukʼampiw amparanakapas kayunakapas chʼiyjtäna. Jupar uñjasajj amigonakapas mamitapas wal jachapjjäna, ukampis marka apnaqerinakajj jupat larusipjjänwa (Luc. 23:32-38; Juan 19:25). Walja horanakaw tʼaqesïna. Lloqopas pulmonanakapas wali qaritäjjänwa, samsuñas wali chʼamäjjänwa. Ukatjja qhep qhepa kutiw Awkipar orasïna, jakäwip Awkipan amparapar katuyasisaw jiwjjarakïna (Mar. 15:37; Luc. 23:46; Juan 10:18; 19:30). w21.04 pág. 16 párr. 4

Jesusajj 11 apostolonakaparojj aka pä pactonakat parläna: machaq pactompita, Reinotak pactompita (Luc. 22:20, 28-30). Uka pactonak utjatapatwa uka apostolonakasa, mä qhawqha cristianonakas alajjpachan reyïpjjaspa sacerdotëpjjarakispa (Apoc. 5:10; 14:1). Uka pä pactonakajja, aka oraqen jiltʼapki uka ajllit cristianonakamppachatakiwa, ukatwa Jesusan jiwatap amtañatak tantachäwin jupanakajj tʼantʼatsa manqʼapjje vinotsa umtʼapjje. Jehová Diosajj mä musparkañ suytʼäwi jupanakar churi: jupanakajj wiñayatakiw alajjpachan jakapjjani, Jesucristomp chikaw servipjjarakini, Jehová Diosarus uñjapjjarakiniwa (1 Cor. 15:51-53; 1 Juan 3:2). Ajllit cristianonakajja, jiwañkamaw Diosat jan jitheqtas servipjjañapa (2 Tim. 4:7, 8). w22.01 pág. 21 párrs. 4, 5

Jesusamp chikajja, pä lunthatanakaruw chʼakkatapjjäna (Luc. 23:40, 41). Jupanakat maynejj Jesusar uñtasajj akham sänwa: “Reinomar mantjjäta ukhajj nayat amttʼasitätawa” sasa (Luc. 23:42). Jesusajj Awkipajj wali khuyaptʼayasirïtap yatïnwa, ukatwa niya jiwañampïskäna uka lunthatarojj uka suytʼäwi churäna (Sal. 103:8; Heb. 1:3). Jehová Diosajj jiwasanakar perdonañsa, khuyaptʼayañsa wal munistu. Ukhamajj jiwasatï jan wali luratanakasat taqe chuyma arrepentisiñäni, Jesusan vidap loqtasitaparus confiyañäni ukhajja, jupajj perdonistaniwa (1 Juan 1:7). Ukampis ‘Jehová Diosajj janjamakiw jan wali luratanakajat perdonkitaspati’ sasin awisajj pächasiñäni ukhajja, ¿kunsa lurañasa? Aka toqetwa amuytʼañasa: Jesusajj janïr jiwkasajja, ukhaki jupar creyiñ qalltaskäna uka lunthatat khuyaptʼayasïnwa. Ukhamajja Jehová Diosajj jupar jan jitheqtasa servisipki uka servirinakapat wal khuyaptʼayasi (Sal. 51:1; 1 Juan 2:1, 2). w21.04 pág. 9 párrs. 5, 6

Niya jiwañampëjjäna ukhakamajja, Jesusajj kuntï Awkipajj lurañap munkäna ukwa phoqäna. Jiwañkam Diosat jan jitheqtasajja, waljanakwa Jesusajj jikjjatawayi. Maya, Supayan kʼarïtapwa uñachtʼayawayi. Supayan jan waltʼayatpachas mä perfecto jaqejj Diosat janipuniw jitheqtkaspati, ukwa uñachtʼayawayi. Paya, jiwasar salvañatakiw vidap churawayi. Ukham luratapatwa jucharar jaqëkasas Jehová Diosamp sum apassna, wiñay jakañsa jikjjataraksna. Kimsa, Jesusajj Jehová Diosaki suma gobernantëtapwa uñachtʼayäna, sutipsa qʼomacharakïnwa. Diosat jan jitheqtatas uñachtʼayañatakejj jichhürukis utjkistaspa ukhamwa jakañasa. Ukham lurañäni ukhajja, jiwkchiñäni ukhasa Jehová Diosarojj akham sañäniwa: “Jumat jan jitheqtañatakejj wal chʼamachasiwayta, Supayan kʼarïtap uñachtʼayañatakisa, sutim qʼomachañatakisa, jumaki suma gobernantëtam uñachtʼayañatakis wal chʼamachasiwayta” sasa. w21.04 pág. 12 párrs. 13, 14

Enemigonakapaw Jesusar kʼarintapjjäna, mä jan walsa lurkaspa ukham kʼarintasaw jiwayatäñapatak juchañchapjjäna. Ukatsti jupat larusipjjänwa, jan sinttʼasisaw tʼaqesiyapjjäna, mä lawaruw chʼakkatapjjarakïna. Niyakejjay amparanakapas kayunakapas clavompi chʼakkatatächïnjja, sapa kuti samskäna, parlkäna ukhajj walpun ustʼayasïna. Ukampis wali wakiskirinak sañapaw wakisïna, ukatwa ukhampachas parlaskakïna. Jesusan qhep qhepa arunakapatjja, wali wakiskir yatichäwinakwa apssna. Mayninakar perdonañasawa, Jehová Diosajj perdonitaniwa sasaw confiyañasaraki, ukwa uka arunakajj amtayistu. Walja jilat kullakanakaw jiwasar yanaptʼañatakejj utjistu. Ukampis yanaptʼa munstan ukhajja, jupanakaruw mayiñasa. Jan waltʼäwinakan uñjaskañäni ukhajja, Diosaw aguantañatak yanaptʼistani. Diosat jan jitheqtatas uñachtʼayañatakejj jichhürukis utjkistaspa ukham jakañajj kunja wakiskirisa uk amuytanwa. Ukatjja jiwjjañäni ukhas Diosaw jaktayistani sasajj taqe chuymaw confiyaraktanjja. w21.04 pág. 8 párr. 1; pág. 13 párr. 17

Jesusan kayup arkañäni ukhajja, wiñay jakañwa jikjjatañäni. Kunsa wiñay jakañ jikjjatañatakejj lurañaja sasin mä qamir waynajj Jesusar jisktʼkäna ukhajja, jupajj akham sänwa: “Jutam, nayar arkita” sasa (Mat. 19:16-21). Cristötap jan creyir judionakarojja, Jesusajj akham sänwa: “Ovejanakajasti [...] arkapjjarakituwa. Nayaw jupanakarojj wiñay jakañ churta” sasa (Juan 10:24-29). Kuntï Jesusajj siskäna, lurkäna ukarjam sarnaqtan ukhajja, jupar confiyataswa uñachtʼaytanjja. Ukhamatwa wiñay jakañar apir thakit jan saranukkañäniti (Mat. 7:14). Jesusan kayup wali amuyumpi arkañatakejja, sapürutjamaw jupar sum uñtʼañasa, mä arunjja kunjam chuymanisa, kunjamsa piensi ukwa yateqañasa, mandamientonakapsa yateqañasarakiwa. Diosar uñtʼatasat jukʼa jan ukajj walja tiempos pasjjchejja, taqeniw Jehová Diosaru Jesusar sum uñtʼaskakiñatakejj chʼamachasiñasa. w21.04 pág. 4 párrs. 9, 10

Apóstol Pablojj kunanaktï janïr cristianökasajj lurkäna ukanakat lupʼisajj wal llakispachäna. Taqe jucharar jaqenakat “nayaw jukʼamp juchararätjja” sasaw säna, uk sasajj janiw kʼariskänti (1 Tim. 1:15). Janïr cristianökasajj walja markanakanwa cristianonakar jan waltʼayañatak arknaqäna, yaqheparojj carcelaruw apayäna, yaqhepanakar jiwayapkäna ukhas apoyänwa (Hech. 26:10, 11). Akham amuytʼañäni: cristianöjjasajja, nayrajj mä cristiano chacha warmir jiwayapjjañapatak apoykäna ukan wawapar uñtʼasajj ¿kunjamakis Pablojj jikjjatasispäna? Nayra luräwinakapat Pablojj wal arrepentisïna, ukanak jan cambiañ pueditap yatïnwa. Jesusan jupa layku jiwatapat jan pächasisajj akham sänwa: “Diosan wali khuyapayasiñapatwa ukham serviskta” sasa (1 Cor. 15:3, 10). Cristojj sapa mayni laykuw jiwawayi, ukhamatwa Diosampejj sum apassna (Hech. 3:19). Pantjasiwayktan uka pachajj Testigöchiyätansa janisa, kuntï jichhasa jutïrinsa lurkañäni ukaw Diosatakejj jukʼamp importantejja (Is. 1:18). w21.04 pág. 23 párr. 11

Jesusajj aka oraqenkkäna ukhajja, walja judionakajj janiw Mesiasan jiwañap suyapkänti, ukampis mä profeciajj akham sänwa: ‘Jiwañaruw katuyasïna, mä juchan jaqëkaspas ukhama, ukampis walja jaqenakan juchanakap jupajj aparakïna, juchararanakatwa arjjatasirakïna’ sasa (Is. 53:12). Ukhamajja Jesusar juchan jaqjam jiwayapkäna uk uñjasajj janiw judionakajj jupat pächasipjjañapäkänti. Jichhürunakanjja, kuntï jaqenakajj sapki ukajj cheqäskapuniti janicha uk sumwa yatjjatañasa. Jesusajj Olivos Qollun yatichkäna ukhajja, “kunayman jan wali” arunakampiw yaqhepajj kʼarintapjjätam sasaw discipulonakapar säna (Mat. 5:11). Uka kʼarinakajj Supayatwa juti. Jupaw enemigonakasarojj jiwasat jan walinak parlapjjañapatak amtayi (Apoc. 12:9, 10). Uka kʼarinakarojj janipuniw creyiñasäkiti, ni sustjasiñasäkisa, Jehová Diosarus confiyaskakiñasawa. w21.05 pág. 12 párrs. 14, 16

Jehová Diosar confiyañapatakiw yateqerisar yanaptʼañasa. Diosajj wal munasipjjtam, jupaw yanaptʼapjjätam sasaw Jesusajj discipulonakapar säna (Mat. 10:19, 20, 29, 30). Jiwasasti Diosaw yanaptʼaskätam sasaw yateqerir amtayañasaraki. Kunanak lurañtï amtki uka toqet jupamp chik orasaw Jehová Diosar confiyañ yatichsna. Polonia markankir Franciszek sat jilatajj akham siwa: “Yatichirijan oracionanakapar kunjamsa Jehová Diosajj istʼäna uk uñjasajja, ukhamarakiw orasiñ qalltta. Machaq trabajojanjja, tantachäwinakar sarañatakisa asamblear sarañatakis permiso churapjjetänwa, ukhaw Diosajj kunjamsa yanaptʼaskitäna uk amuyta” sasa. Jehová Diosajj yateqerinakasat wal llakisi. Jupar uñtʼapjjañapataki jaqenakar Bibliat yatichañatak chʼamachasitas valoranitwa uñji, wal munasirakistu (Is. 52:7). Inas jichhajj jan khitirus Bibliat yatichkstanti, ukampis yatichirinakar compañtʼasaw Bibliat yateqasipki ukanakar bautisasipjjañapatakejj yanaptʼsna. w21.06 pág. 7 párrs. 17, 18

Sapa kuti Biblia liyisajja, valoranïtapwa uñachtʼaytanjja. Bibliat sapak yatjjatañatakejj mä horarionïñasawa, janiw tiemponïktan ukhak liyiñasäkiti. Jiwasatï mä horarionïñänejja, Diosarojj jukʼampiw confiyañäni. Akapachan ‘yatiñanïpki wali amuytʼanïpki’ uka jaqenakat sipansa, Biblian yatichäwiparjamaw Diosar confiytanjja (Mat. 11:25, 26). Bibliat yatjjatatasatwa kunatsa akapachajj jukʼamp jan walin uñjasi, kunsa Diosajj ukanak askichañatak lurani ukanak yattanjja. Ukhamajj Diosar confiyañatak chʼamachasiskakiñäni, jaqenakarus yanaptʼaskakiñäni (1 Tim. 2:3, 4). Aka oraqen taqe jakirinakajj Diosar jachʼañchapkani uka uru puriniñapsa suyaskakiñäni, jupanakajj Apocalipsis 4:11 textonkir arunakampiw Diosar jachʼañchapjjani, ukan akham siwa: ‘Nanakan Jehová Diosaja, jumaw jachʼañchäwi, katoqañatakejj derechonïtajja. Jumaw taqe kunsa lurtajja’ sasa. w21.08 pág. 19 párrs. 18-20

Niyakejjay ancianonakajj awatirinakäpjjchejja, ewjjtʼañajj wakiski ukanakarojj jupanakaw ewjjtʼapjjañapa. Ewjjtʼanakamp chʼamañchtʼañatakisa, yanaptʼañatakis chʼamachasipjjañapawa, ukham ewjjtʼanakajj maynin ‘chuymap kusisiyiwa’ (Prov. 27:9). Ancianonakajj jilat kullakanakar munasipjjewa, ukatwa maynejj jan wali thakir saranukuski ukhajj munasiñat ewjjtʼapjje (Gál. 6:1). Mä ancianojj maynir ewjjtʼkani ukhajja, apóstol Pablojj munasiñ toqet kamsänsa uka toqenakatwa amuytʼañapa, jupajj akham sasaw säna: “Munasir jaqejj paciencianiwa, khuyapayasiriwa. […] Taqe kunansa amukiw tʼaqesi, taqe kun creyiraki, taqe kun suytʼi, taqe kun aguanti” sasa (1 Cor. 13:4, 7). Uka versiculonakat lupʼiñajja, munasiñatti ewjjtʼaski janicha uk amuytʼasiñatakiw mä ancianor yanaptʼani, suma chuymamp ewjjtʼañatakis yanaptʼarakiniwa. Ewjjtʼatäki ukatï jupat llakisisin mä ancianojj ewjjtʼatap amuyasini ukhajja, taqe chuymaw uka ewjjtʼa katoqtʼasispa. w22.02 pág. 14 párr. 3; pág. 15 párr. 5

Jehová Diosajj angelanakarusa jaqenakarus perfectwa lurawayi. Ukampis Dios contra saytʼiri angelajja, mä arunjja Supayajja (ukajj “kutkatasiri” sañwa muni) perfectöpkäna uka Adanampiru Evampiruw Jehová Dios contra saytʼapjjañapatak amtayäna. Ukatsti yaqha angelanakasa, yaqha jaqenakas ukhamarakiw Dios contra saytʼapjjäna (Jud. 6). Razonaniw Jehová Diosajj chuyma ustʼata jikjjatasïna. Ukampis aguantaskakiwa, jupa contra saytʼirinakaru tukjañ uru puriniñapkamajj aguantaskakiniwa. Jehová Diosar jan jitheqtas servirinakajj jupamp chika akapachan jan walinak aguantasipki ukanakajj wal kusisipjjani. Supayajj Job chachar kʼarintkäna ukhajja, Diosar jan jitheqtas servirinakajj interés laykukis Diosar servipkaspa ukhamwa amuyayäna (Job 1:8-11; 2:3-5). Diablojj jichhürunakkamaw jaqenakar ukham kʼarintaskaki (Apoc. 12:10). Jupan kʼarïtapjja jan walinak aguantasa, Diosar munasiñat jan jitheqtas servisaw uñachtʼaysna. w21.07 pág. 9 párrs. 7, 8

Cambionak lurañajj kunatsa wali wakiskiri uk amuytʼasiñasatakejja, Pablojj wali musparkañ uñachtʼäwitwa parläna. Nayrajj kunjam jaqëyätansa uk lawar chʼakkatapjjam sasaw säna (Rom. 6:6). Jesusajj Jehová Diosaruw kusisiyañ munäna, ukatwa lawar chʼakkatayasiñatakejj dispuestokïna. Jiwasampejj ukhamarakiwa, Diosarutï kusisiyañ munstanjja uñiski uka jan wali amuyunaksa, jan wali luräwinaksa apanukuñasawa. Ukham lurañäni ukhajj qʼoma conciencianïñäniwa, wiñayatak jakasiñsa taqe chuymaw suytʼarakiñäni (Juan 17:3; 1 Ped. 3:21). Janiw Diosajj jiwasar kusisiyañatakejj leyinakap cambykaniti, jan ukasti jiwasaw leyinakaparjam sarnaqañatakejj cambiañasa (Is. 1:17, 18; 55:9). Bautisasjjasas jan wali amuyunak apanukuñatak chʼamachasiñamajj wakisiskakiniwa. Diosar yanaptʼa mayim, espíritu santomp yanaptʼayasim, jan chʼamamarojj confiyasimti (Gál. 5:22; Filip. 4:6). Nayrajj kunjam jaqëyätasa uk apanukuñatakisa, jan mayamp ukar kuttʼañatakis wal chʼamachasiñamawa. w22.03 pág. 6 párrs. 15-17

Jiwasanakatï Jehová Diosan Reinop nayrar uchañäni, mandamientonakap respetañäni ukhajja jupajj janiw manqʼañsa, issa, utsa faltaykistaniti (Mat. 6:33). Uka promesar confiytan ukhajja, ‘akapachan utjki uka cosasanakaw jarkʼaqestani, kusisit jakasiñsa churistani’ sasajj janiw amuyktanti. Diosan voluntädap lurañäni ukhakiw cheqpachapun sumak jikjjatasiñäni (Filip. 4:6, 7). Jiwasatï walja yänak alasiñatak qollqenïstan ukhasa, ukanak cuidañatakis apnaqañatakis tiempos chʼamas utjaniti janicha ukwa amuytʼasiñasa. Akhamwa jisktʼasiñasa: “¿Kunanakatï utjkitu ukanakarukit chuym uchtjja?” sasa. Jehová Diosajj familiap taypin trabajwa churistu, ukhamajj janipun kunampis tiempo apaqayasiñäniti. Jesusajj aka oraqenkkäna ukhajja, mä waynajj kunanakapatï utjkäna ukanakar jukʼamp munasisajj janiw Jesusan discipulopar tukkänti, ukhamatwa Jehová Diosar serviñsa, jutïrin Diosan wawapjam katoqatäñsa aptʼasïna (Mar. 10:17-22). w21.08 pág. 6 párr. 17 

Bibliat yatjjatkasajja Jehová Diosajj kunjam Diosasa ukwa yateqtanjja, ukanakajj taqe luratanakapanwa uñjasi. Jehová Diosajj kunjam Diosasa ukanakat yatjjatañajja, jupajj cheqapun utjaskatapat jan pächasiñatakiw jiwasar yanaptʼistani (Éx. 34:6, 7; Sal. 145:8, 9). Diosar jukʼamp uñtʼasajj jukʼampiw jupar confiyañäni, munasiñäni, suma amigoparakïñäniwa. Diosar creyitas mayninakar parlapjjañäni. Predicacionan maynitï Diosajj janiw utjkpachati sistani ukat jan kamsañs puedkañäni ukhajj ¿kunsa lursna? Bibliat apstʼat qellqatanakan uka toqet parlir qhanañchäwinakwa thaqtañasa, ukatjja ukwa jupar uñachtʼayañasa. Maysa toqetjja experienciani mä jilataru jan ukajj mä kullakaruw yanaptʼa maysna. Uka jaqejj kuntï Bibliajj siski uk katoqpas janisa, Diosan utjatapat yatjjatatasajj yanaptʼistaniwa, kunattejj jukʼampiw Diosar confiyañäni. w21.08 pág. 18 párrs. 14, 15

Jehová Diosar kusisiyañatakejja, janiw taqe kunanakatï gustkistu ukanak jaytañapunejj wakiskiti (Ecl. 5:19, 20). Ukampis gustkistu ukanak jan jaytañ layku Diosar jukʼamp jan serviñ munksna ukhajja, Jesusajj mä uñachtʼäwin parlkäna uka jaqjamaw pantjassna, jupajj suma cosasanak jikjjatañatak wal trabajisaw Diosat armasjjäna (Luc. 12:16-21). Jan walinakan uñjasktan ukhajja, Diosaruw yanaptʼa mayistanjja ukat kunjamsa uka jan walirojj jiwasajj saykatsna ukwa amuytʼasiraktanjja (Prov. 3:21). Jupajj kunayman toqetwa bendisistu, jiwasajj jupar jachʼañchañatak wal chʼamachasisaw yuspäratas uñachtʼaysna (Heb. 13:15). Jukʼamp predicasaw bendicionanak katoqaraksna. Ukhamajja Jehová Diosan suma Diosätap uñjañatak sapüru yantʼañäni (Sal. 34:8). Ukhamatwa Jesusjamajj akham sañäni: ‘Manqʼajajj khitankitu ukan munañap lurañawa, kuna lurañtï jupajj churkitu uk tukuyañajarakiwa’ sasa (Juan 4:34). w21.08 págs. 30, 31 párrs. 16-19

Supayajj jachʼa jachʼa tuksna ukwa muni. Jiwasatï ukham tuksna ukhajj jupjamäjjsnawa, wiñay jakañsa aptʼassnawa, uk Supayajj yatiwa. Ukatwa maynitï jachʼa jachʼa tukuni ukhajja, ‘kunjamtï Diablojj juchañchatäki ukham juchañchataw uñjasirakini’ sasin Pablojj ewjjtʼäna (1 Tim. 3:6, 7). Walja maranakasa jan ukajj jukʼa maranakakis Diosar serviskstanjja, taqeniruw ukajj pasistaspa. Jachʼa jachʼa tukur jaqejja, jupatakikiw taqe kuns muni. Supayajja Jehová Diosat llakisiñat sipansa jiwas pachpatak llakissna ukwa muni, yamas jan walinakan uñjasktan ukhajj jukʼampiw uk muni. Sañäni, ¿maynejj jumar ina chʼusat kʼarintirïtamti? ¿Ina chʼusat tʼaqesiyat uñjasirïtati? Ukanakat Diosaru, jilat kullakanakar juchañchsna ukwa Supayajj muni. Diosajj Biblia toqe yanaptʼa churkistu ukarjam lurañat sipansa, amtasarjam lurasakis sum askichksna ukham amuyañaswa Supayajj munaraki (Ecl. 7:16, 20). w21.06 pág. 15 párrs. 4, 5

Jehová Diosajja, Ageo profetarojj mä wakiskir luräwi churäna. Ageo profetajja, 537 antes de Cristo maran Babiloniar apatanakajj Jerusalenar kuttʼapkäna ukanakat maynïrïpachänwa. Jerusalenar purjjapjjäna uka qhepatjja, Diosar servirinakajj templon cimientonakapwa uchapjjäna (Esd. 3:8, 10). Ukampis uka jakʼankirinakan jan munapjjatapatjja, aynachtʼasajj templo lurañ jaytjjapjjänwa (Esd. 4:4; Ageo 1:1, 2). Ukatwa khä 520 antes de Cristo maran Diosajj ‘judionakar yanaptʼam, templo lurañ tukuyapjjañapatak chʼamañchtʼam’ sasin Ageor mayïna (Esd. 6:14, 15). Ageo profetan yatiyäwipajja, Diosar jukʼamp confiyapjjañapatakiw judionakar yanaptʼäna. ‘Ejercitonakan Jehová Diosapa’ siski uka arunakajj judionakar wal chʼamañchtʼpachäna. Templo tukuyañatakejja, Jehová Diosaruw confiyapjjañapäna, jupajj mä jachʼa ejército angelanakaniwa. w21.09 pág. 15 párrs. 4, 5

Jichha tiemponjja, oraqpachankir Jehová Diosan Testigonakapajj munasipjjtanwa, mayachtʼatäpjjaraktanwa. Yaqha markatäkstansa kunayman costumbrenïkstansa mä familiakïtanwa, ukatwa mayni religionanakat mayjätanjja. Uka munasiñajj tantachäwinakana, asambleanakanwa uñjasi. Taqe ukanakajja, kunjamtï Jehová Diosajj munki ukham adoratasat jan pächasiñatakiw jukʼamp yanaptʼistu (Juan 13:34). Bibliajj akham siwa: “Maynit maynikam wal munasipjjam” sasa (1 Ped. 4:8). Pantjasirïkstansa, maynit maynikam perdonasisa aguantasisaw uka munasiñ uñachtʼaytanjja. Taqe jilat kullakanakar katoqtʼañataki, mä kun wajjtʼañatakiw chʼamachasiraktanjja, chuym ustʼayapkistu ukanakarus ukhamwa uñjtanjja (Col. 3:12-14). Ukham munasiñampi uñjasisajja, cheqpach cristianötaswa uñachtʼaytanjja. w21.10 pág. 22 párrs. 13, 14

¿Jan arrepentisir jucha luririr jaqerojj congregacionat jaqsuñajj cambiañapatak yanaptʼaspati? Jïsa, yanaptʼaspawa. Jachʼa jucha luririnakat waljanejja, ‘congregacionat jaqsutäñaw kuntï lurkayäta ukajj jan walïtap amuyasiñataki, arrepentisiñataki, jan wali lurañ jaytjjañataki, Jehová Diosar kuttʼjjañatak yanaptʼawayitu’ sasaw sapjje (Heb. 12:5, 6). Ovej awatirit amuytʼañäni. Mä ovejapan usutätap amuyi ukhajja, qollañatakejj tamat yaqhachiwa. Ukampis ovejanakajj janiw sapakïñ munapkiti, tamamp chikäñwa munapjje. Sapaki uyur jaytatajja, uks akswa tʼijunaqapjje. Ukhamajja, ¿ovejapar qollañataki tamat yaqhachasajj awatirejj jan waltʼayiwa sasat sissna? Cheqas janiw ukham sisksnati. Jupatï tamat jan yaqhachkani ukhajja, usut ovejapajj tamaruw usu apkataspa. Ukhamajj usut ovejaru tamat yaqhachasajj taqpach ovejanakaruw usut jarkʼaqe. w21.10 pág. 10 párrs. 9, 10

Oraqpachanwa jilat kullakanakajj utjistu, uka munasiri familia taypinkatasat wal yuspärtanjja. Taqe jaqenakajj jiwasamp chika Diosar adorapjjaspa ukwa munaraktanjja. Ukatwa Jehová Diosan sutipsa, markapsa jan qʼañuchañ munktanti. Suma yatiyäwinak jaqenakan istʼañ munapjjañapatakejja, sum sarnaqañatakipuniw chʼamachastanjja. Diosar istʼatasat awisajj yaqhepajj uñisipjjestaniwa, arknaqataw uñjasirakiñäni. ¿Kunanaktï creyktan ukanakat mayninakar parlañ ajjsarayastan ukhajj kunsa jiwasajj lursna? Jehová Diosampi Jesusampiw yanaptʼapjjestani, janipuniw uk armañasäkiti. Jesusajja, ‘kamsäsa kunjamsa parläjja’ sasin jan llakisipjjañapatakiw discipulonakapar ewjjtʼäna. Akham sänwa: “Parlañ horasanjja yanapajj utjaniwa. Janiw jumanakakejj parlapkätati, jan ukasti Awkiman espiritupaw jumanakar parlañ yanaptʼapjjätam” sasa (Mat. 10:19, 20). w21.09 pág. 24 párrs. 17, 18

Moisesajj niya ukar uñtasitwa sarakïna (Sal. 90:1). Janïr jiwkasajja uka toqet jupajj akham sarakïnwa: “Nayra tiempotpachas Diosajj jarkʼaqasiriwa, wiñay amparanakapas jumar katjjasisktamwa” sasa (Deut. 33:27). ¿“Wiñay amparanakapas jumar katjjasisktamwa” siski uka arunakajj kunsa Jehová Diosat yatichistu? Jehová Diosaw jarkʼaqetani sasin confiytan ukhajja, chuymachtʼataw jikjjatastanjja. Ukampis awisajj aynachtʼsnawa. Ukhamanakan uñjaskañäni ukhajj ¿kunjamsa Diosajj yanaptʼistani? (Sal. 136:23). Amparanakapampiw katjjasistani, munasiñampiw jan llakitäjjañasatak yanaptʼarakistani (Sal. 28:9; 94:18). Diosajj yanaptʼapunistaniwa sasin confiyañajja, aka pä bendicionanak amtañatakiw yanaptʼistu. Maya, kawkjansay jakaskchiñänejja Diosajj jarkʼaqapunistaniwa. Paya, wali munasiri alajjpachankir Awkisajj wal jiwasat llakisi. w21.11 pág. 6 párrs. 15, 16

Discipulonakajj ina chʼusat tʼaqesiyata uñjasisajja, Diosar confiyapjjatapajj yantʼataw uñjasipjjäna. Uk aguantapjjañapatakejja, Jesusajj Lucas libronkir sarnaqäwitwa cuenttʼäna. Jupajja kunjamsa mä viudajj jan cheqapar uñjir juezaru kutin kutin wal ruwtʼasïna uka toqetwa parläna. Uka viudajj ‘juezarutï mayiskakëjja, jupajj yanaptʼitaniwa’ sasaw confiyäna. Juezajj cheqapuniw yanaptʼäna. ¿Kunsa ukat yateqsna? Jehová Diosajj cheqapar uñjir Diosawa, ukatwa Jesusajj akham säna: “¿Janit Diosajj uruy aruma arnaqasir ajllitanakaparojj yanaptʼkani, ukhamat cheqapar uñjatäpjjañapataki?” sasa (Luc. 18:1-8). Ukatsti akham sarakïnwa: “Jaqen Yoqapajj purinkani ukhajja, ¿Diosar ukham confiyir jaqenak oraqen jikiniti?” sasa. Ina chʼusat tʼaqesiyata uñjasktan ukhajja, uka viudjam Diosar wal confiyataswa uñachtʼayañasa. Ukham confiyasaw Diosan yanaptʼapat jan payachaskañäniti, orasiñajj qhawqha chʼamanisa ukarus confiyarakiñäniwa. w21.11 pág. 23 párr. 12; pág. 24 párr. 14

Wayn tawaqo, ¿Jehová Diosan leyinakapar istʼañajj kunanaktï lurañ munkta ukanakatwa jarkʼitu sasat awisajj amuyta? Supayaw ukham amuyañam muni, ancho thakin saririnakajj kunsa lurapjje, kunja kusisitjamäpjjesa, ukanak uñjasma ukwa muni. Escuelankir compañeronakamasa, Internetan utjki uka jaqenakas jumat sipans wali kusisitas jakapkaspa, jumarojj Diosan leyinakap istʼañajj sum jakasiñatsa jarkʼkiristam ukham amuyañamwa munaraki. Uka ancho thakin saririnakajj kunarus puripjjani uk amuyasipjjañapjja, janiw Supayajj munkiti (Mat. 7:13, 14). Ukampis Jehová Diosajja, jakañar apiri thakin saraskakïta ukhajj kunja sumas jakasïta uk yatiyjjtamwa (Sal. 37:29; Is. 35:5, 6; 65:21-23). w21.12 pág. 23 párrs. 6, 7

Mayninakarojj taqe chuymaw perdonañasa, ukham lurañajj cheqapawa, ukampis perdonañajj chʼamakïspawa. Pedrotakis ukhamarakïnwa (Mat. 18:21, 22). ¿Kunas yanaptʼistaspa? Maya, Diosajj qhawqha kutis perdonistu uka toqetwa lupʼiñasa (Mat. 18:32, 33). Diosamp perdonatäñatakejj janis askïkstanjja, jupajj sapa kutiw perdonistu (Sal. 103:8-10). Ukatwa ‘jiwasajj maynit maynikam munasiñatak obligatätanjja’. Ukhamasti jilat kullakanakasar perdonañatakejj obligatätanwa (1 Juan 4:11). Paya, maynir perdontan ukhajj kunas pasi uka toqet lupʼiñaw yanaptʼistaspa. Sañäni, perdonasajja jan wal lurkistu uka jaqerojj yanaptʼtanwa, congregacionas mayachtʼatarakiwa, Diosampis sumwa apastanjja, sumakiw jikjjatasiraktanjja (2 Cor. 2:7; Col. 3:14). Kimsa, Diosar orasiñaw yanaptʼarakistaspa, jupaw mayninakar perdonañas muni. Supayajj jilat kullakanakampi jan sum apasiñas munki ukar janipun istʼañäniti (Efes. 4:26, 27). Supayan trampapar jan jaltʼañatakejj Jehová Diosan yanaptʼapwa muntanjja. w21.06 pág. 22 párr. 11; pág. 23 párr. 14

Davidarojj Israel marka apnaqeri Saúl reyiw jiwayañ amtäna, ukatwa Davidajj escapaskäna. Manqʼañap jan utj-jjepanjja, Nob sat markaruw purïna, ukanwa phesqa tʼantʼanak mayïna (1 Sam. 21:1, 3). Uka qhepatsti, Davidampi servirinakapampejj mä qollu pʼiyaruw imantasipjjäna (1 Sam. 22:1). ¿Kunatsa Davidajj ukhaman uñjasïna? Davidajj wali uñtʼatäjjänwa, walja guerranakanwa atipjarakïna, ukatwa Saúl reyejj jupat wal envidiasjjäna. Jan istʼasirïtapatwa reyïñat Diosamp rechazayasïna, Diosajj Israel marka apnaqañapatakejj Davidaruw ajllïna, uksa Saulajj yatirakïnwa (1 Sam. 23:16, 17). Israel markan apnaqeripjamajja, Saúl reyejj mä jachʼa ejercitonïnwa, waljanirakiw jupar apoyapjjäna, ukatwa Davidajj salvasiñatak escapjjäna. ¿Saulajj kuntï Jehová Diosajj Davidat siskäna uka contrajj saytʼaspänti? (Is. 55:11). Bibliajj janiw uka toqet kamskisa, ukampis akwa amtañasa: jupa pachpaw jan waltʼayasiskäna. Dios contra saytʼirinakajja, aynachtʼapjjapuniwa. w22.01 pág. 2 párrs. 1, 2

Jesusajj yatichañatakiw wal chʼamachasïna. Niyakejjay jaqenakar munaschïnjja, taqe cheqanwa yatichäna (Luc. 19:47, 48). Jupanakat sinttʼasitap laykuw ukham luräna. Awisajja walja jaqenakaw kuntï yatichkäna uk wal istʼañ munapjjäna, ukhamïpansti discipulonakapatakisa, jupatakis ‘janiw manqʼasiñatakejj tiempojj utjkänti’ (Mar. 3:20). Mä chachajj arum toqeru jupamp parlañ munäna ukhasa, Jesusajj jupar istʼañatakejj tiempo apstʼasïnwa. Jesusar istʼapkäna uka jaqenakajj janiw taqenipunejj discipulopar tukupkänti, ukampis taqeniruw Jesusajj yatiyäna. Jiwasajja ukhamarakiw taqe jaqenakaru Diosan arunakap yatiyañ muntanjja (Hech. 10:42). Kuna horasas jiwasatak predicañajj walïspa uk thaqaskañat sipansa, kuna horanakas jaqenakarojj jikjjatsna ukhaw predicañasa. Ukhamtï lurañänejja, Jehová Diosajj wal kusisini. w22.01 pág. 17 párrs. 13, 14

Jichhürunakanjja khitinakatï autoridadanïpki ukanakar confiyañajj waljanitakejj chʼamakiwa. ¿Kunatsa? Leyinakasa politicasa, jila partejj wali qollqenïpki autoridadanïpki jupanak favorakiwa. Ukampis pobrenakajj janiw cheqapar uñjatäpkiti. Ukatjja religión pʼeqtʼirinakat yaqhepajj janiw sum sarnaqapkiti, uka kawsaw yaqhepanakajj Diosar jan confiyjjapjjarakiti. Ukatwa jiwasajj Bibliat yateqerinakasarojj Diosar confiyapjjañapataki, khitinakarutï jupajj markapar irpañatak aka oraqen uttʼayki ukanakar confiyañ yateqapjjañapataki yanaptʼañasa. Janiw Bibliat yateqerinakakejj Jehová Diosaru ukat markapar confiyañ yateqapjjañapäkiti, walja maranak jupar servisktan ukanakasa, kunjamtï Jehová Diosajj taqe kuns lurki ukajj jiwasan askisatakipuniwa sasaw confiyaskakiñasa, kuna laykutejj Diosar confiyatasajj yantʼataw uñjasispa. w22.02 pág. 2 párrs. 1, 2