Mayo

Jehová Diosajj wal munasistu, ukatwa Yoqapar sum uñtʼañasatakejj pusi Evangelionak Bibliar qellqayäna. Uka Evangelionakajj Jesusan jakäwipata, predicatapatwa parli. Jupajj kamsänsa, kunanaksa luräna, kunjamas jikjjatasïna ukanakatwa parli. Uka pusi libronakajj Jesusan yateqaskay sarnaqäwipat wali amuyump lupʼiñatakiw yanaptʼistu. Mä arunjja, uka libronakanwa Jesusan taktʼatanakap uñjtanjja. Jiwasatï uka Evangelionakat yatjjatañäni ukhajja, Jesusarojj sapürutjamaw sum uñtʼañäni, kayupsa sum arkarakiñäni. Uka Evangelionakat jukʼamp yateqañatakejj janiw aleqak liyiñasäkiti, jan ukasti yatjjatañatakejj tiempo apsusiñasawa, liyktan ukatsa lupʼiñasarakiwa (Josué 1:8 uñjjattʼarakïta). Kuntï Evangelionakan parlki uk niyas uñjksna ukhamwa amuytʼañasa. Ukatakejja kunas ukan pasäna uk uñjksnasa, istʼksnasa, jiwasarus paskistaspa ukhamwa amuytʼañasa. Diosan markapajj qellqatanak churkistu ukaw yanaptʼistaspa. w21.04 pág. 5 párrs. 11-13

Mesiasarojj 30 metal qollqenakaruw jan sinttʼasis aljantapjjani sasajja, Jesusajj janïr aka oraqer jutkäna ukhaw Jehová Diosajj Arupan qhanañchäna (Zac. 11:12, 13). Amigonakapat mayniw aljantañapäna (Sal. 41:9). Zacarías profetajj akhamwa qellqarakïna: “Awatirirojj jiwayam, ovej tamasti aywitatapjjaniwa” sasa (Zac. 13:7). Suma chuyman jaqenakajj ukanak uñjkasas janiw Jesusat jitheqtapkänti, jan ukasti kunjamsa profecianakajj phoqasïna uk uñjasajj jukʼampiw jupar confiyapjjäna. ¿Jichhürunakan ukhamarakiti? Jïsa. Ukampis wali uñtʼat Testigonakat mä qhawqhanejja, Diosar serviñat jitheqtasajj Dios contraw saytʼjjapjje, mayninakarus jupanakjam tukupjjañapatakiw chʼamañchapjjaraki. Internet toqe, televisión toqew Diosan markapat jan walinak parlapjje, jila partejj kʼarinakwa parlapjje. Ukampis cheqa yatichäwinakar munasirinakajj janiw engañjayasipkiti, kunattejj jayäkipanwa Bibliajj ukanak qhanañchjjäna (Mat. 24:24; 2 Ped. 2:18-22). w21.05 pág. 11 párr. 12; págs. 12, 13 párrs. 18, 19

Diosan markapajj cheqa yatichäwinak jukʼamp sumwa tiempompejj amuyapjjani sasaw Bibliajj qhanañchi (Col. 1:9, 10). Jehová Diosajj jukʼat jukʼatwa cheqa yatichäwinak qhanstayaski, ukhamajja, pacienciampiw cheqa yatichäwinak sum amuyañaskam suytʼañasa. Diosan markapar pʼeqtʼapki uka jilatanakajja, kunjamtï mä yatichäwit nayrajj amuykayätan uk mayjtʼayañ wakisitap amuyapjje ukhasa, kunjamtï nayrajj mä kun lurkayätan uk mayjtʼayañ wakisitap amuyapjje ukhasa, ratukiw askichapjje. Jichha tiemponjja walja iglesianakajj arkirinakapan chuymapar purtʼañataki, jan ukajj akapachan wali uñtʼatäñatakiw yatichäwinakap mayjtʼayapjje. Ukampis Jehová Diosan Testigonakapajja, Diosar jukʼamp jakʼachasiñataki, kunjamtï Jesusajj adorkäna ukham adorañatakiw uka cambionak lurtanjja (Sant. 4:4). Janiw jaqenakan amuyunakap cambiapjjatap laykuki yatichäwinak cambyktanti, jan ukasti Biblian mä yatichäwip jukʼamp sum amuyjjatasatwa cambytanjja. Cheqa yatichäwinakar wal munastanjja (1 Tes. 2:3, 4). w21.10 pág. 22 párr. 12

Jiwasatï sapakjam amuyasstan ukhajja, Jehová Diosajj kunjamsa yanaptʼaskistu uka toqetwa lupʼiñasa (Sal. 55:22). Ukaw yanaptʼistani. Sapakjam jikjjatasipki uka jilat kullakanakarojj kunjamsa Diosajj yanaptʼaski ukanak toqetwa lupʼiñasaraki (1 Ped. 5:9, 10). Hiroshi sat jilatajj walja maranakaw familiapan jupa sapak Diosar serviski, jupajj akham siwa: “Taqeniw Diosar sum serviñatakejj chʼamachasisktanjja, uk yatiñaw Diosar jan serviri familianinakarojj chʼamañchtʼistu” sasa. Sapürurakiw orasiñasa, tantachäwinakarus sarañasa. Kunjamas jikjjatastan kunas llakisiyistu taqe ukanakwa Jehová Diosar yatiyañasa. Biblia sapüru liyiñajj wali importantewa, Diosajj qhawqsa munasistu uka toqet parlir sarnaqäwinakatsa lupʼiñasarakiwa. Yaqhep jilat kullakanakajja, kawkïr textonakatï chʼamañchtʼkaspa ukanakwa pʼeqer yatsupjje, ukanakat yaqhepajj Salmo 27:10 ukat Isaías 41:10 textonakawa. Yaqhepanakajj tantachäwinakatak wakichtʼasiñatakisa Biblia liyiñatakis grabacionanakwa ischʼukipjje. Ukaw jan sapakjam jikjjatasiñatak yanaptʼitu sasaw sapjje. w21.06 págs. 9, 10 párrs. 5-8

Jumantï mä familiaramajj jiwchi ukhajja, jiwatanakajj jaktanipjjaniwa sasin confiyañatakejj Biblian kunjamsa yaqhepanakajj jiwatat jaktapjjäna ukanakwa liyiñama. ¿Mä familiaman congregacionat jaqsutätap laykuti llakitäskta? Ukhamächi ukhajja, Diosan cheqañchatäñajj kunja wakiskirisa uk amuyañatakejj Bibliat yatjjatam. Kuna jan walinsay uñjaskstajja, ukajj Jehová Diosar jukʼamp confiyañatakiw yanaptʼätam. Kunjamas jikjjatasta uk oracionan Diosar yatiyam. Jilat kullakanakat janipun jitheqtamti (Prov. 18:1). Kunanakatï pasawayktam ukanakat lupʼisajj jachkchïtasa, kunanakatï aguantañatak yanaptʼkiristam ukanak luram (Sal. 126:5, 6). Tantachäwinakarusa, predikirisa saraskakim, Biblsa liyiskakim. Kuna suma bendicionanaktï Jehová Diosajj churkistani ukanakatsa lupʼiskakim. Jehová Diosajj kunjamsa yanaptʼtam uk uñjäta ukhajja, juparojj jukʼampiw confiyäta. w21.11 pág. 23 párr. 11; pág. 24 párr. 17

¿Kunansa Jesusan discipulonakapajj ‘jiskʼa wawanakjamäpjje’? Amuytʼañataki, akapachankir jaqenakajja, wali qollqenïpki, wali uñtʼatäpki, autoridadanïpki ukanakarukiw wali importantet uñjapjje. Ukampis Jesusan discipulonakapat jila partejj janiw ukhamäpkiti. Ukatwa ‘jiskʼanakäpkaspasa’, janis importantëpkaspa, janis yäqañjamäpkaspa ukham jaqenakajj uñjapjje (1 Cor. 1:26-29). Ukampis Diosajj janiw servirinakapar ukham uñjkiti. Mä kutejja, “¿khitis alajjpachankir Reinon jilïrïnejja?” sasinwa discipulonakapajj Jesusar jisktʼapjjäna, ukhaw jupajj jiskʼanakat parläna (Mat. 18:1). Uka tiemponjja, walja judionakaw wali importantet uñjatäñ munapjjerïna. Uka toqet yatjjattʼat mä jaqejj akham siwa: “Chachanakajj jachʼañchatäña, wali uñtʼatäña, respetatäñwa munapjjerïna” sasa. Judionakajj mayninakat jilïrïpkaspasa ukhamwa amuyasipjjerïna, Jesusan discipulonakapajj jan ukhamäñatakiw chʼamachasipjjañapäna. w21.06 pág. 20 párr. 2; pág. 21 párrs. 6, 8, 9

Apóstol Pablojj ancianonakatakejj wali yateqaskayawa. Wakiskäna ukhajja, jan payachasisaw Tesalónica markankir jilat kullakanakar ewjjtʼäna. Ukampis cartanakapanjja Diosar jan jitheqtas servipjjatapata, munasiñat ukham lurapjjatapata, aguantapjjatapat nayraqatajj felicittʼänwa. Jupanakajj kunjamas jakasipjjäna uk amuyänwa, arknaqat uñjasipjjatapsa kunayman jan walinakan uñjasipjjatapsa Pablojj yatirakïnwa (1 Tes. 1:3; 2 Tes. 1:4). Mayni cristianonakatakejj kunja yateqaskayäpjjesa uksa jupanakar sarakïnwa (1 Tes. 1:8, 9). ¡Ukham chʼamañchtʼatajj wal kusisipjjpachäna! Pablojj jupanakar munasitapatjja janiw payachasipkänti. Ukatwa kuntï Pablojj pä cartanakapan ewjjtʼkäna ukajj jupanakar wal yanaptʼäna (1 Tes. 4:1, 3-5, 11; 2 Tes. 3:11, 12). w22.02 pág. 15 párr. 6

Supayajj kʼari religionanakan pʼeqtʼirinakap toqew Jehová Diosajj janis munasirïkaspa, janis sinttʼasirïkaspa, Jupas taqe tʼaqesiñanakat juchanïkaspa ukham amuyayi. Mä wawajj jiwi ukhajja, ‘Diosajj mä angelito alajjpachan munäna, ukatwa apasjje’ sasaw yaqhepajj sapjje. Ukajj Jehová Diosar jan respetatapwa uñachtʼayi. Ukampis munasir Diosätap jiwasajj yattanwa, ukatwa wal usuntktan jan ukajj mä familiasajj jiwjje ukhajj Diosar jan juchañchktanti. Antisas ‘jupaw jutïrin uka tʼaqesiñanak askichani’ sasaw confiytanjja. Istʼapkistani ukanakarojja, ‘Jehová Diosajj munasiriwa’ sasaw yatiysna, ukhamatwa jupat jan wal parlirirojj jan cheq parlatap Diosajj uñachtʼayani (Prov. 27:11). Jehová Diosajj wali khuyaptʼayasiriwa. Ukatwa arknaqasin tʼaqesiyapkistu, jan ukajj usuntat tʼaqesktan, juchanakas kawsa tʼaqesktan ukanak uñjasajj tʼaqesiraki (Sal. 22:23, 24). Kunjamsa tʼaqestan uk amuyiwa, ukatwa jankʼak uk tukjañ muni (Éxodo 3:7, 8; Isaías 63:9 uñjjattʼarakïta). w21.07 págs. 9, 10 párrs. 9, 10

Niyaw istʼasir jaqenakajj jukʼamp sumäki uka privilegio katoqapjjani. Adanampi Evampejj Diosan familiap jaytasajj kuna jan walinaktï utjayapki taqe ukanakwa Jesusajj askichani. Jehová Diosajj walja millón jaqenakaruw jaktayani, jupanakarojja Paraisor tukuyata aka oraqen jan usuntasa wiñayatak jakasipjjañapatakiw yanaptʼani (Luc. 23:42, 43). Diosar serviri jaqenakajj perfectöjjapjjani ukhajja, taqeniw Davidajj qellqkäna ukham ‘kʼajkirïpjjani, jachʼañchatäpjjarakini’. Jumatï jan khitins jaktʼkaña ‘walja jaqenak’ taypinksta ukhajj mä suma suytʼäwinïtawa (Apoc. 7:9). Diosajj munastamwa, familiap taypinkasma ukwa munaraki. Ukhamajj jupar kusisiyañatak wal chʼamachasim. Diosan promesanakapat sapüru lupʼim, chuymamar katjjasirakim. Diosar adorañ privilegiomsa, wiñayatak jupar jachʼañchañ suytʼäwims wali valoranit uñjam. w21.08 pág. 7 párrs. 18, 19

Jeremías profetarojj janis jaqenakajj istʼapkchïna, jupa contras saytʼapkchïnjja, jupajj 40 jila maranakaw Diosat yatiyäna. Jupar insultapkäna burlasipkäna ukhajj aynachtʼänwa, ukhamïpan janipuniw Diosat parljjäti sasaw säna (Jer. 20:8, 9). Ukampis predicaskakïnwa. ¿Kunas jan aynachtʼasin kusisita predicaskakiñatak yanaptʼäna? Akanakat lupʼiñaw yanaptʼäna: maya, kuntï predickäna ukajj jaqenakarojj “mä suma suytʼäwi jutïritak” churaspäna (Jer. 29:11). Paya, Diosajj sutip apañapataki, yatiyañapatakiw jupar ajllïna (Jer. 15:16). Aka jan wali pachanjja, jiwasajj ukhamarakiw suma yatiyäwinak jaqenakar yatiytanjja, Jehová Diosan Testigopjamajj sutipwa aparaktanjja. Uka toqenakat lupʼtan ukhajja, jaqenakajj istʼapjjestpansa janisa, kusisitaw predicaskaktanjja. Ukhamajj yateqerisatï kunjamtï munkayätan ukarjam jan jankʼak nayrar sartkchi ukhajj janiw aynachtʼañasäkiti, chʼamachasiskakiñasawa, Diosar serviñ amtañapkamajj pacienciampi suytʼañasawa (Sant. 5:7, 8). w21.10 pág. 27 párrs. 12, 13

Jukʼa tiempokisa jan ukajj walja tiempos Jehová Diosar serviskstanjja, jupar jukʼamp confiyañatakejj chʼamachasiskakiñasawa. Jan ukham lurksna ukhajj jukʼat jukʼat janiw Diosar confiyjjsnati. Diosar confiyañajj kunanakatï jan uñjatäki ukanakan cheqapun utjaskatap qhan amuyañawa. Kunanaktï jan uñjktan uk facilakwa armastanjja, ukatwa Pablojj Diosar jan confiyañajj ‘facilak maniyjkiri juchawa’ sasin säna. Ukhamajj ¿kunsa Diosar jukʼamp confiyaskakiñatak lursna? (2 Tes. 1:3). Sapa kutiw Diosarojj espíritu santop mayiñasa. Ukaw jupar confiyañatak yanaptʼistaspa (Gál. 5:22, 23). Espíritu santotï jan yanaptʼkistaspajja, janiw Diosar jukʼamp confiyjjsnati. Ukhamajj Diosar espíritu santop mayiskakiñäni, jupasti churistaniwa (Luc. 11:13). ‘Jumar jukʼamp confiyañ yanaptʼapjjeta’ sasaw mayissna (Luc. 17:5). Diosan Arupats yatjjatañasarakiwa (Sal. 1:2, 3). w21.08 págs. 18, 19 párrs. 16-18

Edadani jilat kullakanakajja, Diosan markapan wal yanaptʼapjjaspa. Janis nayrjam chʼamanëjjapjjchejja, Diosar walja maranak servisajj wali experiencianïpjjewa. Jehová Diosajja janis kunatak sirvjjapjjaspa ukham janiw amuykiti, antisas kunayman luräwinakwa jupanakar churi. Edadanëjjasas kunjamsa nayra servirinakapajj jupar servisipkakïna ukajj Biblian qellqatajj waljaw utji. Moisés chachajj mä 80 maranëjjäna ukhaw Diosan profetapat servïna, Israel markarus pʼeqtʼarakïna. Daniel profetajja, amuyatajj 90 jila maranëjjäna ukhas profetat serviskakïnwa. Apóstol Juanajja, amuyatajj 90 jila maranëjjäna ukhaw Diosan amuytʼayatäsajj Apocalipsis libro qellqäna. Edadani Simeón chachat Bibliajj jukʼakwa parli, ukampis Diosajj jupar sumwa uñtʼäna, ukatwa aka privilegionak churäna: Jesusaruw uñjayäna, Jesusatsa, mamitapats mä profecía arsuñapatakiw yanaptʼarakïna (Luc. 2:22, 25-35). w21.09 págs. 3, 4 párrs. 5-7

Awk taykanakajja janiw wawaparojj yaqhampi igualayañapäkiti, ni qhawqtï lurañ puedki ukat sipan jukʼamp lurañapsa mayipjjañapäkiti (Efes. 6:4 ). Sachiko sat mä kullakajj akham siwa: “Mamitajajj examenan janipun akchʼas pantjasiñajwa munäna, ukajj janiw phoqañjamäkänti. Colegio tukuyatajat walja maranakas pasjjchejja, Diosatak wal trabajitajajj janis Jupatak sumäkaspa ukhamwa awisajj amuyta” sasa. David reyejj akham sänwa: ‘Janiw nayajj kunanakatï wali jachʼäki ukanak jikjjatañ thaqkti, janirakiw nayajj jan jikjjatirjamäkta ukanaksa thaqkti’ sasa (Sal. 131:2). Jupajj humildëtapat sumaw jikjjatasïna ukatjja kusisitarakïnwa. Awk taykanakajja wawanakapajj qhawqtï lurañ puedipki ukat jukʼamp lurapjjañap janiw suyapjjañapäkiti. Wawanakapar mä kun lurapjjañapataki chʼamañchkasajja, jupanakan sum jikjjatasipjjañapatakejj kunanaksa sum lurañ yatipjje ukarjamaw amuytʼapjjañapa. w21.07 págs. 21, 22 párrs. 5, 6

Jehová Diosajj jiwaspachp kuns amtirwa lurawayistu. Ukhamajj Diosar istʼañäniti janicha uk sapa mayniw amtsna. Yaqhepajj janiw yateqaskay awk taykani jilsuwayapkiti, ukhamäkchisa Diosar jan jitheqtasaw servisipki. Yaqheparusti awk taykapajj Diosar munasiñapatakiw wal yanaptʼawayapjje, ukampis jilsjjasajj Diosat jitheqtjjapjjewa (Jos. 24:15). Awk taykanaka, wawamatï Jehová Diosar jaytjjchejja, jan jumanak pachpa ukat juchañchasipjjamti. Awisajj awkiwa jan ukajj taykawa Jehová Diosar jaytjje, yamas yaqhepajj familiap kunwa jaytjjapjje (Sal. 27:10). Awk taykapar suma ejemplot uñjiri wawanakajja, uk uñjasajj wali llakitaw jikjjatasipjje. Wayn tawaqonaka, papitumatï jan ukajj mamitamatï congregacionat jaqsuta uñjaschi ukhajja, kunja llakitas jikjjatasipjjta uk Diosajj yatiskiwa. Jupajj munasipjjtamwa, jupar jan jaytjatamsa wali valoranitwa uñji. Papitumana jan ukajj mamitamana jan wal amtatapatjja janiw jumanakajj juchanïpktati. w21.09 pág. 27 párrs. 5-7

Congregacionat jaqsutäki ukajja, mä usut ovejamp sasiwa. Niyakejjay Jehová Diosamp jan sum apasjjchitejja, usutäkaspas ukhamawa (Sant. 5:14). Contagioso usuni mä jaqejja, mayninakar contagiaspawa, Diosampi jan sum apasjje uka jaqejja, ukhamarakiw jan walinak lurapjjañapatak mayninakar chʼamañchaspa. Ukatwa jupar congregacionat jaqsuñajj wakisi. Ukham lurañajj qhawqsa Diosajj jupat jan jitheqtir servirinakaparojj munasi ukwa uñachtʼayi, jucha luratapajj kunja jan walisa uk amuyasiñapataki, arrepentisiñapatakiw juchachasirirojj yanaptʼaspa. Jaqsutäkchisa tantachäwinakarojj saraskaspawa, ukanwa Biblian ewjjtʼanakap katoqaspa, Diosarus wasitampiw jukʼamp confiyjjarakispa. Qellqatanaksa mayisispawa, JW Broadcasting^®. programsa uñtarakispawa. Ancianonakajj jupan cambiaskatap uñjasajja, yanaptʼañatakejj ewjjtʼapjjaspawa, Jehová Diosamp sum apasjjañapatakisa, markapar kuttʼanjjañapatakis yanaptʼapjjarakispawa. w21.10 pág. 10 párrs. 9, 11

Jichhürunakanjja kunjamtï nayrïr cristianonakajj adorapjjerïkänjja, ukhamarakiw Jehová Diosar adortanjja. Sañäni, nayrïr cristianonakjam organiztʼatätanwa, superintendente de circuitonaka, ancianonaka, siervo ministerialanakaw utjistu (Filip. 1:1; Tito 1:5). Maynimp ikthapiñ toqetsa, matrimoniotsa, wila jan uchayasiñatsa nayrïr cristianonakjamarakiw Diosan leyinakap respetompi uñjtanjja, jachʼa jucha lurasin jan arrepentisiñ munapki ukanakatsa congregacionar jarkʼaqaraktanwa (Hech. 15:28, 29; 1 Cor. 5:11-13; 6:9, 10; Heb. 13:4). Ukampis “creyiñasatakejj mä cheqa thakikiw” utji, ukaw Diosamp sumat uñjatajja sasaw Bibliajj qhanañcharaki (Efes. 4:4-6). Diosan markapankañasa, kunatï Jupat cheqäki uk yatiñasa, amtanakapat yatiñas mä suma privilegiowa. Ukhamajj cheqa yatichäwinakat janipun pächasiñatak chʼamachasiskakiñäni. w21.10 pág. 23 párrs. 15-17

Jehosafat reyejj mä jan waltʼäwinwa uñjasïna. Moabitanakampi ammonitanakampi Seír qollunak toqen jakir jaqenakampejja, mayachtʼasisaw Jehosafat reyi contra, familiap contra, marka contra nuwasiñatak jutapjjäna (2 Crón. 20:1, 2). Ukhaman uñjasisajj reyejj Diosaruw yanaptʼsa chʼamsa mayisïna. 2 Crónicas 20:5-12 texton Jehosafat reyin oracionapajj qellqatäki ukajja, qhawqsa Diosar confiyäna ukwa uñachtʼayistu. Diosajj Jahaziel levita toqew jichhürutak apstʼat textonkir arunak Jehosafat reyir säna. Diosar confiyasajja, Jehosafat reyejj ukarjamaw luräna. Reyimpi markampejj enemigonakapampi nuwasir sarapkäna ukhajja, soldadonakar nayrar uchañat sipansa reyejj jan armantat chachanakaruw nayrar uchäna, jupanakajj cantasaw sarapjjäna. Jehová Diosan arunakaparjamaw Jehosafat reyejj enemigonakapar atipjäna (2 Crón. 20:18-23). w21.11 págs. 15, 16 párrs. 6, 7

Jan waltʼäwinakan uñjaskañäni ukhajja, Diosajj jupamp sum apasiskakiñatakejj yanaptʼistaniwa (2 Cor. 4:7-9). Jehová Diosajj munasirïtapsa jan jaytjasirïtapsa uñachtʼayaskakistaniwa, ukar taqe chuymaw confiytanjja, Biblian akham siwa: “Jehová Diosan nayranakapajj khitinakatï jupar ajjsarapki ukanakaruw uñchʼukiski, khitinakatï jupan munasiñapsa jan jaytjasirïtapsa suytʼasipki ukanakaruw uñchʼukiski” sasa (Sal. 33:18-22). Janïr jupar sirvkayätan ukhatpachaw Diosajj taqe jaqenakar munasjjestäna. Ukampis jupar serviñ qalltjjtan ukhat aksarojj munasiñat jan jaytjasirïtapwa uñj-jjtanjja. Uka munasiñapatwa jarkʼaqestu. Diosajj janipuniw jaytjkistaniti, sum jakasiñaswa muni, kunanaktï jiwasatak amtki ukanaks phoqapuniniwa (Sal. 46:1, 2, 7). Ukhamasti kuna jan walinakansay uñjaskchiñänejja, Jehová Diosajj jupat jan jitheqtañasatakejj chʼam churistaniwa. w21.11 pág. 7 párrs. 17, 18

Niya taqeniw ak amuypachätanjja, yaqhepajj escuelankiri jan ukajj trabajonkiri compañeropataki jan ukajj mä familiarapatakejj chuyma ustʼataw sarnaqapjje, yamas yaqhepajj walja maranakaw ukham sarnaqapjje. Josean tunka jilanakapajj jupatak chuyma ustʼatäpjjänwa, ukatwa uñisiñat jan wal lurapjjäna (Gén. 37:2-8, 25-28). Ukampis Joseajj janiw jan walit jan walimpi kuttʼaykänti. Joseajj autoridadanëjjäna ukhajj jilanakapat vengasispänwa, ukampis khuyapayasiñampiw jupanakar uñjäna. Jilanakapatak chuyma ustʼatäñat sipansa, kunjamtï qhepat Levítico 19:18 texton qellqaskäna ukarjamaw luräna (Gén. 50:19-21). Jehová Diosar kusisiyañ muniri cristianojja, Joseat yateqasisajj vengasiñat sipansa, chuyma ustʼat sarnaqañat sipansa perdonaniwa. Jiwas contra jucha luririnakarojj perdonañasawa sasaw Jesusajj säna (Mat. 6:9, 12). Pablojj ukhamarakiw cristianonakar akham sasin ewjjtʼäna: “Munat jilatanaka, jan vengasipjjamti” sasa (Rom. 12:19). w21.12 pág. 11 párrs. 13, 14

Jesusajja 33 maran 14 de nisán arumaw Getsemaní jardinar saräna, ukanwa Jehová Diosar taqe llakinakap yatiyäna (Luc. 22:39-44). Ukham llakit uñjaskasaw ‘jachʼat artʼasisa jachtʼasis mayisïna’ (Heb. 5:7). ¿Kunsa Jesusajj janïr jiwayatäkäna uka arumajj Jehová Diosar mayisïna? Jupat jan jitheqtañataki, voluntadap phoqañatakiw chʼam mayisïna. Jehová Diosajj Yoqapan taqe chuyma mayisitaparojj istʼänwa, ukatwa jupar chʼamañchtʼañapatakejj mä angelar khitanïna. Jesusajj Awkipan sutip arjjatañajj jupatak wali importantënwa. Jehová Diosajja, Yoqapan taqe chuyma ruwtʼasitaparojj istʼänwa. ¿Kunatsa? Jesusajj janipuniw Awkipat jitheqtañ munkänti, sutipsa arjjatañwa munarakïna, ukatwa istʼäna. Jiwasatakitï Jehová Diosar serviñajj nayrankchi ukhajja, yanaptʼa mayisitasarojj istʼistaniwa (Sal. 145:18). w22.01 págs. 17, 18 párrs. 15-17

Politicar jan mitisitasatjja, walja jaqenakaw jiwasat pächasipjje. Marka apnaqerinak ajlliski ukhajja, Testigonakajj mä partidor apoyapjjañapawa sasaw amuyapjje. Ukampis jiwasatï mä jaqeru gobernañapatak ajllsna ukhajja, Jehová Diosan gobernatäñ janis munksna ukhamäspawa (1 Sam. 8:4-7). Yaqhepajj ‘hospitalanaka, escuelanaka, yaqha ukhamanakwa markar yanaptʼañatakejj lurapjjañapa’ sasaw jiwasat parlapjjaraki. Jiwasajj janiw akapachan jan waltʼäwinakap jankʼak askichasiñapatak chʼamachasktanti, jan ukasti predicañatakiw chʼamachastanjja, ukatwa jaqenakajj jiwasat pächasipjje (Mat. 7:21-23). Jesusajj kuna lurañtï jaytawaykistu ukaw jiwasatakejj taqe kunat sipans jukʼamp wakiskirejja. Janiw politicarusa, markasan jan waltʼäwinak utjki uk askichañarus mitisktanti. Antisas jaqenakar munastanwa, kuna jan walinakantï uñjasipki ukats llakistanwa. Diosan Reinopat yatichasa, Diosamp sum apasipjjañapatak yatichasaw jupanakar jukʼamp yanaptʼsna. w21.05 pág. 7 párrs. 19, 20

Marka apnaqerinakat waljanejja Jehová Diosaruw servipjjta sasins sapkchejja, janiw cargop jaytañ munapkiti. Kunjamtï Jesusajj aka oraqenkkäna uka tiempon lurapkänjja, ukhamarakiw jichha tiempon Diosan servirinakapar jan waltʼayasajj Ajllitap contra saytʼapjje (Hech. 4:25-28). Suma yatiyäwinak jan istʼañ munapjjatapatjja, Salmo 2:10-12 qellqatan Diosajj akham siwa: “Reyinaka, jichhajj suma amuytʼasirïpjjam, oraqenkir juezanaka, cheqañchäwi katoqasipjjam. Jehová Diosarojj ajjsaras servipjjam, kusisipjjam, jupa nayraqatansa khatatipjjarakim. Diosan wawapar jachʼañchapjjam, jan ukasti Diosajj colerasiniwa, jumanakasti jiwarapjjarakïtawa, kuna laykutejj jupajj jankʼak colerasiriwa” sasa. Jehová Diosajj suma Diosawa, ukatwa jupa contra saytʼirinakarojj cambiapjjañapataki Reinopar iyawsapjjañapatak tiempo churaski, uka tiempojj tukusiskiwa (Is. 61:2). Ukhamajja jankʼakiw jaqenakajj kunatï cheqäki uk uñtʼapjjañapa, Diosar serviñsa amtapjjañaparaki. w21.09 págs. 15, 16 párrs. 8, 9

Apóstol Pablojj kunatï jakañatak utjkistu ukampejj kusisitakïñasawa sañwa munaskäna (Filip. 4:12). Kunanakatï utjkistu ukat sipansa, Jehová Diosamp sum apasiñaw jukʼamp valoranejja (Hab. 3:17, 18). Kuntï Moisesajj israelitanakar siskäna uk uñjañäni, israelitanakajj 40 maranak wasarankjjapjjäna ukhajja, jupajj akham sänwa: “Taqe kunanaktï jumanakajj lurapkta ukanakanjja Jehová Diosajj bendisipjjtamwa. [...] Aka 40 maranakajja jumanakan Jehová Diosamajj jumanakampïskänwa, janirakiw kunas faltapkayätamti” sasa (Deut. 2:7). Uka 40 maranakanjja, Jehová Diosajj maná tʼantʼwa jupanakar churäna. Egipto markat mistunipkäna uka isinakapas janiw merqʼeskänti (Deut. 8:3, 4). Jiwasatï utjkistu ukanakamp kusisit jakasiñ yateqañäni, mä arunjja Diosajj churkistu ukajj jiskʼäkchi ukhas valoranit uñjañäni, mä bendicionarjam uñjañäni, yuspärarakiñäni ukhajja, Jehová Diosajj wal kusisini. w22.01 pág. 5 párrs. 10, 11

Esposonaka, jumanakaw familiamar uñjañatakejj encargatäpjjtajja, ukatwa familiamar yanaptʼañataki, jan walinakat jarkʼaqañatak chʼamachasipjjtajja. Ukampis problemanak askichañatakejj jan chʼamamaruk confiyasipjjamti, jan ukasti Diosar orasis yanaptʼa mayisipjjam. Esposamampis taqe chuyma orapjjarakim. Biblia liytʼasa, Bibliat apstʼat qellqatanak liytʼasa Diosan yanaptʼap thaqapjjam, jikjjatapkäta uka ewjjtʼanakarjam lurapjjarakim. Biblian ewjjtʼanakaparjam amtanakar puripjjatamajj janis walïkaspa ukhamwa yaqhepajj amuyapjjaspa. Familiamar jarkʼaqañatakejj qollqenïñamawa, cosasanakanïñamawa sasaw sapjjarakiristam. Ukampis Jehosafat reyit amtasipjjam (2 Crón. 20:1-30). Jupajj Jehová Diosaruw confiyatapjja luratanakapampiw uñachtʼayäna. Diosajj janiw jupar jaytjkänti, janirakiw jumanakarus jaytjapkätamti (Sal. 37:28; Heb. 13:5). w21.11 pág. 15 párr. 6; pág. 16 párr. 8

Jehová Diosajj jupar uñtasitwa lurawayistu, ukatwa maynir cheqaparjam jan uñjaski ukajj jan gustkistuti. Niyakejjay pantjasirïstanjja, taqpach yatkasas janiw cheqaparjam juzgksnati (Gén. 1:26). Kunas Jonasar pasäna uk amtañäni, Jehová Diosajj ninivitanakat khuyaptʼayaskäna ukhajj jupajj wal colerasïna (Jon. 3:10-4:1). Ukampis Diosan khuyaptʼayasitapatjja, 120.000 ninivitanakaw salvasipjjäna. Cheqansa Jonasaw pantjasïna, janiw Jehová Diosajja. Diosajj kunatsa mä kun lurañ amti uk jiwasar qhanañchañapajj janiw wakiskiti. Nayra tiemponjja, kun lurañsa Jehová Diosajj amtäna jan ukajj kun amtañampïskänsa ukanakat kunsa servirinakapajj amuyapjje uk jupanakar istʼänwa (Gén. 18:25; Jon. 4:2, 3). Awisajj kunatsa mä kunsa lurañ amtäna uks qhanañcharakïnwa (Jon. 4:10, 11). Ukampis Jehová Diosajj janïr mä kun lurañ amtkasasa, jan ukajj mä kun amtjjasas janiw jiwasar jisktʼañapajj wakiskiti (Is. 40:13, 14; 55:9). w22.02 págs. 3, 4 párrs. 5, 6

‘Sullkäksnas’ ukham tukuñatakejja, mayninakajj jiwasat “jilïrïpkaspas” ukham amuyañasawa (Filip. 2:3). Ukham amuyañatak chʼamachasiñäni ukhajja, janiw mayninakar chuym ustʼaykañäniti. Taqe jilat kullakanakaw mä kunansa jiwasat jilankapjje, ukjja kuna sumanaktï lurañ yatipki uk uñjañatak chʼamachasisaw amuysna. Pablojj kuntï Corinto markankir jilat kullakanakar ewjjtʼkäna ukaruw istʼañasa. Jupajj akham sänwa: “¿Khitis jumarojj mayninakat sipans jukʼamp jilar uchtamjja? ¿Janit jumajj taqe kunsa Diosat katoqkta? Jumatï taqe kuns Diosat katoqstajja, ¿kunatarak chʼamachasitamatsa katoqkasma ukham jachʼa jachʼa tuktasti?” sasa (1 Cor. 4:7). Ukhamajj janipuniw jachʼañchatäñ suyañasäkiti, jiwasas mayninakat jilïrïksna ukhamsa amuyasiñasäkiti. Mä jilatatï discursonak sum arstʼañ yatchi, jan ukajj mä kullakatï walja jaqenakar Bibliat yatichaskchi ukhajja, Jehová Diosarupuniw jachʼañchañapa. w21.06 págs. 21, 22 párrs. 9, 10

Jaqenakaru utapan parlañajj sapürutjamaw walja Testigonakatakejj jukʼamp chʼamäjje. Yaqhepajj guardian cuidata edificionakajj utjki, mantañajj wali controlatäki uka zonanakanwa jakasipjje. Ukanak cuidirinakajj janiw utanin jan invitatanakarojj mantayapkiti. Yaqhep lugaranakanjja, jilat kullakanakatakejj utat uta yatiyañajj janiw chʼamäkiti, ukampis jukʼa jaqenakakwa utapan jikjjatapjje. Yaqhep jilat kullakanakajja, jukʼa jaqek utjki uka cheqanakanwa predicapjje. Maynimpi parlañatakejj inas wali jaya viajipjjañapächi, ukampis purisajj janiw khitirus utapan jikjjatapkiti. Jiwasatï ukhaman uñjasstan ukhajja, janiw aynachtʼañasäkiti. Janiw mä pachpa horaruki yatiyañasäkiti. Kuna horasas jaqenakajj utapankki uka horaru yatiyir sarañäni ukhajja, walja jaqenakampiw parlañäni. Jaqenakajj janis utapankchejja, kuttʼanipjjaniwa. Walja jilat kullakanakajja, tardenaka, arumthapinak predicasaw walja jaqenak jikjjatapjje. Uka horasanakaw jaqenakajj tiemponïpjje. w21.05 pág. 15 párrs. 5, 7

¿Jichhürunakan ukhamarakiti? Jïsa. Niyakejjay cumpleañosa, Navidadasa, ukat yaqha ukham costumbrenakas jan Bibliarjamäkchitejja, Testigonakajj janiw ukanak amtktanti, janirakiw markasan fiestanakaparus mitisktanti, maynejj jiwjje ukhas janiw kuna costumbrenaks lurktanti ukatwa waljanejj jiwasatak wal colerapjje. Inas uka jaqenakajj suma chuymanïsipkchi, costumbrenak lurasajj Diosarus servipkaspa ukham amuyasipkchi. Ukampis Biblian yatichäwinakapar istʼañat sipansa, jaqenakan costumbrenakap phoqañatakik chʼamachasipjjani ukhajja, Jehová Diosajj janiw jupanakarojj sumat uñjkaniti (Mar. 7:8, 9). Ukanakamp jan apayasiñatakejj Diosan leyinakaparu, wiñay yatichäwinakapar taqe chuyma munasiñaw yanaptʼistani. Kunatï kʼarïki ukanak uñisiñasarakiwa (Sal. 119:97, 113, 163-165). Jiwasatï Diosar munasstanjja, kuna costumbrenakatï jan gustki ukanak janiw lurkañäniti. Jupar munasiñaw taqe kunat sipans nayrankani. w21.05 pág. 6 párrs. 15, 16

Jehová Diosar jukʼamp confiyañatakejja, sapüruw Bibliat yatjjatañasa, orasiñasapuniwa, Diosajj kuna luräwtï jaytkistu uk sum phoqañatakiw chʼamachasiñasa (2 Tim. 4:4). Diosar confiyañäni ukhajja, Diosan markapat jan walinak parlapjjani ukhajj janiw ajjsarayaskañäniti ni llakiskañänisa (Is. 28:16). Jiwasatï Diosaru, Aruparu, jilat kullakanakaru munasiñänejja, Diosan markapat jitheqtawayjjapjje ukanakampejj janiw engañjayaskañäniti. Nayra tiempon waljaniw Jesusat pächasipjjäna. Janiw jupar creyipkänti, ukampis waljaniw creyipjjarakïna. Jupanakat maynejj sanedrinankirïnwa, ‘walja sacerdotenak kunaw creyipjjarakïna’ (Hech. 6:7; Mat. 27:57-60; Mar. 15:43). Jichha tiempon ukhamarakiw walja millón jaqenakajj Jesusar arkañ amtawayapjje. Jupanakajj Bibliankir cheqa yatichäwinakwa uñtʼapjje, ukarojj munasipjjarakiwa. Bibliajj akham siwa: “[Leyinakam] munirinakajj suman jakasipjje, janiw kunas jupanakarojj tinkuykiti” sasa (Sal. 119:165). w21.05 pág. 13 párrs. 20, 21

Kunanaktï Diosar serviñatak lurkäna uk Jehová Diosan yanaptʼapampi luratapwa apóstol Pablojj amuyasïna. Arknaqatasa carcelansa yaqha jan walinakansa uñjaskchïnjja, Diosajj espíritu santop toqew lurañanakap sum phoqaskakiñapatak chʼam churäna. Timoteojj Diosan yanaptʼapampirakiw lurañanakap sum phoqäna. Pablojj misionerot wali jayanak viajkäna ukhajja, Timoteojj compañänwa, awisajj yaqhep congregacionanakar visitañapatakiw Pablojj khitarakïna (1 Cor. 4:17). Inas Timoteojj uka asignacionanak jan phoqerjam amuyaschïna, ukatwa Pablojj akham sispachäna: “Jan khitis jumarojj waynäskatam laykojja jiskʼachpanti” sasa (1 Tim. 4:12). Uka tiempon Timoteojj sapa kutiw usuntäna sasaw Bibliajj qhanañcharaki, ukajj jañchipan mä chʼapïkaspas ukhamänwa (1 Tim. 5:23). Ukampis Timoteojj espíritu santow predicaskakiñatakisa jilat kullakanakar yanaptʼaskakiñatakis chʼam churitani sasaw confiyäna (2 Tim. 1:7). w21.05 págs. 21, 22 párrs. 6, 7

Santiago 1:19 texton jikjjataski uka wiñay yatichäwejja, ewjjtʼapki ukanakatakiwa. Santiagojj akham sänwa: “Sapa maynis istʼañatakejj jankʼakïñapawa, janiw jan amuytʼasisajj parlañapäkiti, janirakiw jankʼak colerasiñapäkisa” sasa. Mä ancianojja, ewjjtʼkani uka jilatasa jan ukajj uka kullakas kunjamäskis uk sumsa yatkaspa ukham janiw amuyañapäkiti. Proverbios 18:13 textojj akham siwa: “Maynejj janïr kun istʼkasin jankʼak jayski ukhajja, ukajj jan amuytʼasiñawa, jiskʼachasiñarakiwa” sasa. Kunjamäskisa ukwa ancianojj jisktʼañapa, ukatakejj janïr ewjjtʼkasajj istʼañapawa. Mä ancianojj akhamwa jisktʼaspa: “¿Kunjamäsktasa?”, “¿kunjamsa yanaptʼirisma?” sasa. Ancianonakatï jilat kullakanakajj kunjamäsipkisa uk yatiñatak tiempo apstʼasipjjani ukhajja, jilat kullakanakarojj yanaptʼapjjaniwa. Ewjjtʼanakasajj maynir yanaptʼañapatakejj janiw mä qhawqha textonak liytʼañakejj wakiskiti, ni kunsa lurañapa uk sañakis wakiskiti. Jan ukasti jilat kullakanakajj jupanakat llakisitasa, yanaptʼañ munataswa amuyapjjañapa. w22.02 pág. 17 párrs. 14, 15