Junio

Viuda warmitakejja pobrëtap laykojj jakañajj wali chʼamawa, qollqepajj janiw kun alasiñatakis alcanskiti. Jupajj qollqe uchañar jakʼachasisajj jan amuykayakiw pä sencill qollqe iranti, qollqen jalantatapas janiw istʼaskiti. Ukampis Jesusajj jukʼa valorani pä sencill qollqenak uchatap amuyiwa. Uka tiemponjja, uka pä jiskʼa sencill qollqenakajj janiw ni mä gorrión jamachʼi alañatakis alcanskänti. Uka viuda warmin luratapajja, Jesusan chuymaparuw purtʼi. Ukatsti discipulonakapar jawsasajj akham sasaw qhanañcharaki: “Aka pobre viuda warmejja qollq uchapki taqe ukanakat sipansa jukʼampwa uchi. Taqe uka jaqenakajj [yamas qollqeninakajj] jiltʼakwa uchapjje, ukampis uka warmejj wali pobrëkasas qhawqhatï jakañapatak utjkäna ukanak qʼal uchi” sasa (Mar. 12:43, 44). Qhawqha qollqepatï utjkäna uk uchasajja, uka viuda warmejj Diosaw cuidaskitani sasin confiyatapwa uñachtʼayäna (Sal. 26:3). w21.04 pág. 6 párrs. 17, 18

Jesusajj aka oraqenkkäna ukhajja, kusisit chuymampiw yatiyirïna, discipulonakapajj ukham yatiyaraksna ukwa muni (Juan 4:35, 36). Jesusajj discipulonakapampïskäna ukhajja, jupanakajj kusisitaw yatiyapjjerïna (Luc. 10:1, 5-11, 17). Ukampis Jesusar katuntjjapjjäna, jiwayjjapjjäna ukhajja, mä jukʼa tiempojj janiw predicañ munjjapjjänti (Juan 16:32). Jaktjjäna uka qhepatsti, Jesusajj predicación nayrar uchapjjañapatakiw chʼamañchtʼäna. Alajjpachankjjäna ukhasti wali kusisitaw yatiyapjjäna, ukatwa enemigonakapajj jichhürutak apstʼat texton kuntï siski uka arunak sapjjäna. Nayra cristianonakarojj Jesusaw predicapjjañapatakejj yanaptʼäna, Jehová Diosan bendicionapampejj waljaniw suma yatiyäwinak istʼapjjäna. Sañäni, 33 maran Pentecostés urunjja, mä 3.000 jaqenakaw bautisasipjjäna (Hech. 2:41). Discipulonakajj walipuniw jiljjattäna (Hech. 6:7). Qhepa urunakanjja, walja jaqenakaw suma yatiyäwinak istʼapjjani sasaw Jesusajj arsuwayäna (Juan 14:12; Hech. 1:8). w21.05 pág. 14 párrs. 1, 2

Kunatï cheqäki uk yateqasajj ¿kunjamakis jikjjatasiyätan uk amtastanti? Uka yatichäwinak taqeniw creyipjjani sasaw amuyayätan. Kusisit jakasipjjañapatakiw jichhas yanaptʼani, jutïritakis mä suma suytʼäwinïpjjaniwa sasaw confiyarakiyätan (Sal. 119:105). Ukatwa kuntï yateqkayätan uk amigonakasaru, familiaranakasar wali kusisit yatiyayätanjja. Ukhamäkchïnsa jupanakat jilapartejj janiw istʼañ munapkistänti, ukatwa wal mayjtʼasiyätan. Ukampis kuntï predicktan uk jaqenakajj jan istʼañ munapkistu ukhajj janiw mayjtʼasiñasäkiti. Jesusajj aka oraqenkkäna ukhajja, milagronakwa luräna, ukaw Jehová Diosajj yanaptʼaskatap uñachtʼayäna. Ukhamäkchïnsa, waljaniw jupar jan creyipkänti. Sañäni, Jesusajj Lazaror jaktaykäna ukhajja, judionakan pʼeqtʼirinakapajj uk sumsa yatipkchïnjja, janiw Jesusan Mesiasätap creyiñ munapkänti. Antisas Jesusampir Lazarompirojj jiwayañwa amtapjjäna (Juan 11:47, 48, 53; 12:9-11). w21.05 pág. 2 párrs. 1, 2

Tantachäwinakat jan faltasiñatakiw chʼamachasiñasa, ukanwa jilat kullakanakarojj jukʼamp sum uñtʼtanjja, chʼamañchtʼasiraktanjja. Wali yateqaskayäpki uka jilat kullakanakajj janis jiwas mitäpkpan, yaqha markatäpasa, amigopäñasawa. Bibliajja jilïr jaqenakajj suma yatiñanïpjjewa sasaw amtayistu (Job 12:12). Edadani jilat kullakanakasa, Jehová Diosat jan jitheqtir wayn tawaqonakat waljanakwa yateqapjjarakispa. Davidajj Jonatán chachat wali sullkänwa, ukampis wali suma amigöpjjänwa (1 Sam. 18:1). Jan waltʼäwinakan uñjaskasajj Diosar serviñatakejj yanaptʼasipjjänwa (1 Sam. 23:16-18). Irina kullakat parltʼañäni, familiapan jupa sapakiw Testigöna, kullakajj akham siwa: “Jilat kullakanakaw awk taykasjama jil kullakasjamäpjjaspa. Jehová Diosajj jupanakaruw familiasarjam tukuyaspa” sasa. Amigonakasajj yanaptʼaña, chʼamañchtʼañwa munapjjestu, ukampis kunjamsa yanaptʼapjjestaspa uk jupanakar yatiyañasawa. w21.06 págs. 10, 11 párrs. 9-11

Jesusajj mä reyimpita mä esclavopampitwa parläna. Jan kunampis phoqerjamäkäna uka manupwa reyejj esclavopar perdonäna, ukampis uka esclavojj mayni esclavo masipar jukʼa manup janiw perdonkänti. Reyisti jan khuyaptʼayasir esclavorojj carcelaruw llawintayäna. Kuntï uka esclavojj lurkäna ukajj janiw juparuk jan waltʼaykänti, yaqhanakarus jan waltʼayarakïnwa. Esclavo masiparojj jan wali chuymampiw uñjäna, ‘carcelaruw llawintayäna, manup phoqañapkama’. Uk uñjapkäna uka esclavonakarus jan waltʼayarakïnwa, Jesusajj akham sänwa: “Ukanak uñjasasti mayni esclavonakajj wal llaktʼasipjjäna” sasa (Mat. 18:30, 31). Luratanakasajj ukhamarakiw mayninakar jan waltʼayaspa. ¿Jan wal luratapat maynir jan perdonksna ukhajj kunas pasaspa? Maya, jan perdonañ munasajj chuymapwa ustʼaysna. Janiw munasiñampis uñjjsnati. Paya, jilat kullakanakajj maynimpi jan sum apasitas amuyasajj mayjtʼasipjjaspawa. w21.06 pág. 22 párrs. 11, 12

Jaqenakajj Jehová Diosat yateqasiñataki luratätanwa, ukampis Supayajj qʼañu juchanak lurayañwa munistu. Noé chachajj jakkäna uka tiemponjja, Jehová Diosajj ‘jaqenakan jan wali luratanakapajj waljapunïtapwa uñjäna’, ukatsti ‘jaqenakar oraqen luratapatjja wal amtasïna, chuymsa wal usuyasirakïna’ (Gén. 6:5, 6, 11). ¿Ukhat aksarojj sumti jaqenakajj sarnaqjjapjje? Janiwa. Jichha tiemponjja, jaqenakajj kunayman jan wali qʼañu juchanakwa lurapjje, chacha pura, jan ukajj warmi puraw qʼañu juchanak lurapjje, ukanak uñjañajj Diablor wal gusti (Efes. 4:18, 19). Yamas Diosan mä serviripajj juchar purtʼasi ukhajja, walpun kusisi. Supayan apnaqat akapachanjja, ‘jaqejj pachpa jan waltʼäwipatakiw jaqerojj apnaqe’, Diosajj kunjamtï aka oraqerusa animalanakarus cuidapjjañap munkäna ukham janiw cuidapkiti (Ecl. 8:9; Gén. 1:28). Ukhamätapat jutïr maranakanjja, mä millón kunayman kasta animalanaka, plantanakaw aka oraqet chhaqtjjani sasaw cientificonakajj sapjje. w21.07 pág. 12 párrs. 13, 14 

Diosan yaqhep servirinakapajja, jan wali luratanakapat amtasisajj llakisipjjewa. Arrepentisipkchi ukhas janis Diosajj perdonkaspa ukhamwa chuymapajj juchañchaskaki. Ukham jikjjatassta ukhajja, Diosajj jumar munasiñat jan jaytjañ munatap yatiñaw yanaptʼiristam, ukhamatwa juparojj qʼoma concienciampi kusisita servirakïta. Kuna laykutejj “Jesús Yoqapan wila[pajj] taqe juchanakasatwa qʼomachistu” (1 Juan 1:7). Mä kun jan sum lurirïtasat aynachtʼat jikjjatasstan ukhajja, Diosajj juchanakapat arrepentisirinakar perdonañatak jankʼakïtapwa amtañasa. Salmonak qellqeri Davidajj Diosan munasiñat jan jaytjasirïtapat kamsänsa uk amuytʼañäni, jupajj akham sänwa: “Kunjamtï alajjpachanakajj oraqet wali altonkkejja, ukham jachʼarakiw Diosan munasiñapasa jan jaytjasirïtapasa, khitinakatï jupar ajjsarapki ukanakatakejja. Kunjamtï inti jalsojj inti jalantat wali jayankkejja, ukhamwa Diosajj jiwasan juchanakasjja wali jayar usku” sasa (Sal. 103:11, 12). w21.11 págs. 5, 6 párrs. 12, 13

Cristiano chachajj esposapar respetompiw uñjañapa (1 Ped. 3:7). Valoranit esposapar uñjasaw uk uñachtʼayaspa. Qhawqtï lurañ puedki ukat sipan janiw jukʼamp lurañap mayiñapäkiti, janirakiw mayni warminakampis igualayañapäkiti. ¿Mayninakamp igualayañajj kunjamsa maynir jan waltʼayaspa? Rosa kullakat parltʼañäni. Esposopajj janiw Testigökiti, juparojj sapa kutiw yaqha warminakamp igualayi. Chuyma usuchjir arunakapajja, janis kunatak sirvkaspa, janis khitis jupar munkaspa ukhamwa kullakar amuyayi. Kullakajj akham siwa: “Jehová Diosajj nayar valoranit uñjatap sapa kuti amtayatäñwa munta” sasa. Ukampis cristiano chachanakajja, esposaparojj wali respetompiw uñjapjje, ukhamatwa esposapampisa Jehová Diosampis sum apasipjje. Esposapar respetirinakajja esposapat sum parlapjje, munasipjjewa, felicittʼapjjarakiwa. w21.07 pág. 22 párrs. 7, 8

Mä encargo puriniñapsa wal suyasksna ukham amuytʼañäni, ukampis munktan ukarjam jan jankʼak purinkaspa ukhajja, ¿kunjamakis jikjjatassna? ¿Kunatsa jan jankʼak purinki sasinti sissna? ¿Janit pacienciampi suytʼksna? Kunatsa paciencianïñajj wakisi ukwa Proverbios 13:11 textojj yatichistu. Ukan akham siwa: ‘Ratuk jikjjatat yänakajja jukʼaptaniwa, ukampis jukʼat jukʼat jikjjatat yänakajja jiljjattaniwa’ sasa. Ukarjamajja pacienciampi kuns lurañaw jukʼamp sumajja. Uka toqetjja Proverbios 4:18 textojj akham siwa: ‘Cheqap sarnaqerinakan thakipajja alwa qhantʼir qhanar uñtasitawa, uka qhanajj jukʼamp jukʼampiw qhantʼi, suma qhana uru utjañapkama’ sasa. Uka textojja Jehová Diosajj amtanakap markapar jukʼat jukʼat yatichatapwa qhan uñachtʼayistu, maysa toqetjja kunjamsa mä cristianojj Diosar serviñan jukʼat jukʼat nayrar sartawayi ukwa uñachtʼayarakistu. Uk lurañapatakejj tiempow munasi, janiw jankʼaki nayrar sartkaspati. w21.08 pág. 8 párrs. 1, 3, 4

Niyakejjay akapachan tukusiñapajj wali jakʼankjjchejja, wali trabajonïtanwa (Mat. 24:14; Luc. 10:2; 1 Ped. 5:2). Jehová Dios Awkisarojj qhawqhatï chʼamasajj utjki ukampiw serviñ muntanjja. Walja jilat kullakanakaw jupar jukʼamp serviñ amtawayapjje. Yaqhepajj precursorata, Betelana jan ukajj Diosar serviñatak utanakajj luraski ukanakan yanaptʼañwa munapjje. Yaqhep jilatanakajja, siervo ministerialata jan ukajj ancianot serviñatakiw wal chʼamachasisipki (1 Tim. 3:1, 8). Diosajj ukham serviñ chuymanïpjjatapat wal kusispacha (Sal. 110:3). Ukampis kun lurañtï amtkayätan uk jan phoqañ pueditasat llakisstan ukhajja, kunjamas jikjjatastan uk Diosar yatiyapjjañäni (Sal. 37:5-7). Kunansa jukʼamp chʼamachasiñasajj wakisi ukwa experienciani jilat kullakanakar jisktʼañasa, ukat uka ewjjtʼanakarjam lurañatakiw chʼamachasiñasa, ukhamtï lurañänejja amtas phoqañäniwa. w21.08 pág. 20 párr. 1; pág. 21 párr. 4

Ana profetisajj 84 marani viuda warmïnwa, “templorojj sarapunirïnwa”. Jehová Diosajj jupar jan jaytjasa servitapatjja, Jesús wawar uñjayasaw bendisïna (Luc. 2:36-38). Jichha tiemponjja, edadani walja jilat kullakanakajj wayn tawaqonakatakejj wali yateqaskayäpjjewa. Kunjamsa Jehová Diosan markapan kusisita servipjjäna ukanak jisktʼañatakisa, cuenttʼapkistani uk istʼañatakis tiempo apstʼasiñäni ukhajja, wali chʼamañchtʼataw jikjjatasiñäni. Edadani jilat kullakanakajj Jehová Diosan markapan wali wakiskirïpjjewa. Kunjamsa Diosajj markaparusa, jupanakarus bendisiwayi uk jupanakajj uñjawayapjjewa. Pantjasitanakapatsa yateqawayapjjewa. Ukhamajj wali ‘yatiñanïpjjewa’, uk valoranit uñjapjjañäni, experiencianakapatsa yateqasipjjarakiñäni (Prov. 18:4). Jupanakar sum uñtʼañatak tiempo apstʼasiñäni ukhajja, Jehová Diosarojj jukʼampiw confiyañäni. w21.09 pág. 3 párr. 4; pág. 4 párrs. 7, 8; pág. 5 párrs. 11, 13

Kunjamtï Isaías profetajj siskänjja, ‘markanakan lechepajj’ Jehová Diosan markaparuw yanaptʼañapäna (Is. 60:5, 16). Wali valorani jilat kullakanakan yanaptʼapampejja, 240 markanakana territorionakanwa predicasiski, 1.000 jila arunakaruw Bibliat apstʼat qellqatanakajj lurasiskaraki. Aka tukuy tiemponjja, taqe markanakar thaljasiski ukajj mä amtar puripjjañapatakiw taqe jaqenakar obligaski. ¿Jehová Diosan Reinoparut apoyapjjani, jan ukajj akapachankir gobiernonakaruch confiyapjjani? Jehová Diosan servirinakapajj kawkïr markantï jakasipki uka markan leyinakap istʼapkchisa, janiw politicar akchʼas mitisipkiti (Rom. 13:1-7). Diosan Reinopakiw taqe problemanakas askichani sasaw confiyapjje, uka Reinojj janiw akapachankirïkiti (Juan 18:36, 37). w21.09 págs. 17, 18 párrs. 13, 14

Familiamat maynitï Jehová Diosar jaytawayjjchi ukhajja, Diosamp sum apasiñatak chʼamachasiskakiñamawa, familiamarus yanaptʼañamarakiwa. ¿Kunjamsa uk lurasma? Sapüruw Biblia liyiñama, kuntï liykta ukats lupʼiñamarakiwa, tantachäwinakats janiw faltasiñamäkiti. Yovana sat kullakan papitupampi kullakapampiw Diosan markap jaytjjapjjäna, kullakajj akham siwa: “Biblian Abigaíl, Ester, Job, José ukat Jesús jupanakan sarnaqäwipat liyta ukhajja, sumakiw jikjjatasta. Sarnaqäwinakapajj wal chʼamañchtʼitu, jan llakisiñatakiw yanaptʼarakitu” sasa. Wali llakitäkäta ukhajj Jehová Diosar orasiñ jan armasimti. Kunjamtï jupajj amuyki ukham amuyañataki, suma amuyu jumar churañapatak munasiri Diosasar ruwtʼasim (Sal. 32:6-8). Kunjamas jikjjatasta uk Diosar yatiyañajj awisajj chʼamakïspawa, ukampis jupajj uk sumwa yati. Diosajj taqe llakinakam jupar yatiyañatakiw invitaraktam (Éx. 34:6; Sal. 62:7). w21.09 pág. 28 párrs. 9, 10

Kunapachatï 32 maran Pascuajj pasjjäna ukhajja, Pedro, Santiago, Juan uka apostolonakajj mä musparkañ visionwa uñjapjjäna. Mä jachʼa qollunjja, Jesusajj jupanak nayraqatanwa kʼajkirir tuküna, uka qollojj inas Hermón qollun mä cheqapächïna. “Ajanupajj intir uñtataw kʼajtäna, patjja isinakapas mä qhanar uñtataw kʼajtarakïna” (Mat. 17:1-4). Apostolonakajj Diosaruw akham siri istʼapjjäna: “Jupajj wali munat Wawajawa, nayajj wal jupat kusista. Jupar istʼapjjam” sasa. Ukhat uksarojj kunjamsa uka kimsa apostolonakajj jakapjjäna ukanwa Jesusar istʼapjjatapajj qhan amuyasïna, jiwasajj jupanakat yateqasiñwa muntanjja. Jehová Diosajj munasiñampiw “congregacionan pʼeqepäki” uka Jesucristo toqejj pʼeqtʼistu, ukat wal yuspärtanjja (Efes. 5:23). Pedro, Santiago, Juan apostolonakat yateqasisaw Jesusar istʼaskakiñasa. Jiwasatï ukham lurañänejja, walja bendicionanakwa jichha tiempon katoqañäni, jutïrinsa wiñayatakiw kusisita jakasiñäni. w21.12 pág. 22 párr. 1; pág. 27 párr. 19

Corinto markankir mä cristianojja, awkipan esposapampiw ikintasïna, ukatwa apóstol Pablojj jupar jaqsupjjañapatak mayïna. Uka jaqen qʼañu jucha luratapajj yaqhepanakaruw jan waltʼayaskäna, yaqhepajj uka luratapajj janiw sinti jan walïkiti sasaw amuyapjjäna (1 Cor. 5:1, 2, 13). Mä qhawqha tiempotjja, Pablojj uka jaqen arrepentisitapwa yatïna. Akham sasaw ancianonakar ewjjtʼarakïna: “Munasiñampi perdonapjjam, chuymachtʼapjjarakim” sasa. Pablojj uka arrepentisir jaqet wal sinttʼasïna, janiw jachʼa jucha luratapat wal llakisisina aynachtʼañap munkänti (2 Cor. 2:5-8, 11). Jichhürunakanjja ancianonakajj Jehová Diosjamarakiw mayninakat khuyaptʼayasipjje. Wakiski ukhajja, jan ajjsarasaw cheqañchapjje, ukampis kawkhakamatï khuyaptʼayañajj wakiski ukhakamaw khuyaptʼayapjjaraki. Jupanakatï jucha luririr jan cheqañchapkaspajja, janiw khuyaptʼayasiñ uñachtʼayapkaspati, jan ukasti jan wali luratapajj walikiw sapkaspas ukhamäspawa. w21.10 págs. 11, 12 párrs. 12-15

Chuyma ustʼatäñajj mä heridampi sasiwa: yaqhep heridajj jiskʼakiwa, yaqhepasti jachʼarakiwa. Inas manqʼa phaykasajj lukʼanas cuchillompi mä jukʼa khartʼassna. Qalltan uka heridajj wal usustaspa, ukampis mä pä urutjja qollatäjjaniwa, kawkjatsa khartʼasiyätan uks janiw amtasjjañäniti. Niya ukhamarakiw mä amigosajj jan amuytʼasisin arsutapampi jan ukajj luratapampi colerayistaspa, jan ukajj chuym ustʼayistaspa, ukampis jupar taqe chuyma perdonañajj janiw chʼamäkaspati. Maysa toqetjja, heridasatejj wali jachʼäspa ukhajja, inas doctoran chʼuktʼañapa jan ukajj vendamp uchañap wakischispa, ukampis jiwasatï uka herida llawqʼaskakiñäni ukhajja, jiwas pachpaw jukʼamp jan wal lurasiñäni. Wali chuyma ustʼata sarnaqerimpejj ukhamarakiw pasaspa. Kunjamsa jupar chuym usuchjapjje, jan wal lurapjje ukak piensaskani ukhajja, jupa pachpaw jan waltʼayasini. Ukatpï jichhürutak ajllit texton ewjjtʼaparjam lurañajj jukʼamp sumajja. w21.12 pág. 12 párr. 15

Mä ancianojja, mä jilatana jan ukajj mä kullakan isisitapajj janis walïkaspa ukham amuyasajj akhamwa jisktʼasispa: “¿Ukham isisisajj Biblian leyinakapti pʼakintaski, ewjjtʼañajj wakisiti?” sasa. Jupatï amuyupampik jan apayasiñ munkchi ukhajja, yaqha ancianoru jan ukajj experienciani mä jilataruw jisktʼasispa. Ukatsti panipaw kuntï apóstol Pablojj isisiñ toqetsa kʼachachasiñ toqetsa siskäna uk amuykiptʼapjjaspa (1 Tim. 2:9, 10). Pablojja kunjamsa isisiñasa uka toqet janiw mä lista churkänti, antisas humilde chuymampi wali amuyumpi isthapisipjjam sasaw ewjjtʼäna. Sapa mayni cristianonakaw kunjamsa isisini uk amtjjañapa, ukampis ukajj Bibliarjamäñapawa, ukwa Pablojj yatïna. Maynejj humilde chuymampiti wali amuyumpiti isisi janicha ukwa ancianonakajj amuykiptʼapjjañapa. Experienciani pä jilatanakajja, janiw mä kuns mä pachpak amtapkaspati, ukampis paypach amtaw walikïskaspa. Ukhamajj kunatï amuyusarjamajj walïki, jan walïkaraki ukarjam lurapjjañapatak janiw jilat kullakanakar obligañasäkiti. w22.02 pág. 16 párrs. 9, 10

Munasiñampi uñjasiñatakisa jan jaytjasiñatakis walja razonanakaw utjistu. Ukanakat yaqhepjja Biblianwa jikjjatsna, ukan akham siwa: ‘Munasiñasa jan jaytjasiñasa jan jumar jaytanukupkpanti. Ukhamatwa Dios nayraqatansa jaqenak nayraqatansa jumajj suma uñjatäyäta’; “munasiri jan jaytjasiri jaqejja, jupa pachpaw askinak jikjjati”; ‘munasiña jan jaytjasiña uñachtʼayañatak chʼamachasir jaqejja, jakañwa jikjjatani’ sasa (Prov. 3:3, nota; 3:4; 11:17, nota; 21:21). Ukarjamajj ¿kunatsa munasiñat jan jaytjasiñasäki? Maya, Dios nayraqatan valoranitwa uñjayistu. Paya, mayninakamp sum apasiskakiñatakiw yanaptʼistu. Kimsa, jiwasatï munasiñat jan jaytjasirïkañänejja, jutïrin walja bendicionanakwa katoqañäni, ukanakat mayajj wiñay jakañawa. Diosajj “maynit maynikam munasipjjam janirak jaytjasipjjamti” sasin ewjjtʼkistu uka mandator istʼañatakejj walja razonanakaw utjistu. w21.11 pág. 8 párrs. 1, 2

Kuna jan walinakantï uñjasiwaykta, jan ukajj jichhas uñjasisksta ukatï Diosar jan confiyatam uñachtʼaychi ukhajja, jan jumajj aynachtʼamti. Ukajj Jehová Diosar jukʼamp confiyañatakiw yanaptʼitani sasaw amuyañama. Taqe chuymaw jupar mayisiñama, yamas jan walinakan uñjaskta ukhajj jukʼampiw mayisiñama. Familiam toqe, jilat kullakanak toqe Diosajj yanaptʼasktam uk katoqasiñamawa. Jumatï jichha tiempon jan walin uñjaskasin Diosampi yanaptʼayasïtajja, jan walinakantï uñjaskäta uk aguantañatakejj Diosaw yanaptʼitani sasaw confiyarakïta. Kunanakansa Diosar jukʼamp confiyapjjañapäna ukanakwa Jesusajj discipulonakapar amuytʼayäna, ukampis kuna jan walinakantï uñjasipkaspäna ukarojj Diosan yanaptʼapampejj atipjapjjaspänwa (Juan 14:1; 16:33). Walja jaqenakarakiw Jehová Diosar wal confiyapjjatapat jachʼa tʼaqesiñ uru jakkirpacha pasapjjaspäna (Apoc. 7:9, 14). Jumatï chʼamachasïta ukhajja, jupan yanaptʼapampejj uka taypinkarakïtawa (Heb. 10:39). w21.11 pág. 25 párrs. 18, 19

Jichhürunakanjja janiw mä milagro toqe jarkʼaqatäñ suyktanti. Ukampis akwa yattanjja: Jehová Diosar confiyirinakajja, jiwapkani ukhas wiñay jakañwa katoqapjjani. Akat mä jukʼampirojja, Jehová Diosajj jiwasar jarkʼaqañatak chʼamanïtapar confiyatasajj yantʼataw uñjasini. Magog oraqenkiri Gog sasin uñtʼatäki ukajj jiwas contra saytʼkani, mä arunjja mayachtʼat markanakajj jiwas contra saytʼapkani ukhajja, qʼal jiwarayistani sasin amuyañjamäniwa. Ukapachasti Jehová Diosaw salvistaspa, cheqas jupaw salvistani sasin confiyañasaw wakisini. Uka markanakatakejja, jan khiti jarkʼaqerini ovejanakäksnas ukhamäñäniwa (Ezeq. 38:10-12). Jiwasajj janiw armanakanïktanti, ni guerran nuwasiñatakis yatichatäktanti, ukatwa fácil atipjañjamäksnas ukham amuyapjjani. Jehová Diosan angelanakapajj jiwasar jarkʼaqañatakejj listokïpjjewa. Ukampis mayachtʼat markanakajja, Diosar jan confiyapjjatap laykojj janiw uk yatipkiti. Jiwasajj Jehová Diosar confiyatas laykuw uk yattanjja. Alajjpachankir ejercitonakajj jiwas lanti nuwasipkani ukhajja, jupanakajj wal musparapjjani (Apoc. 19:11, 14, 15). w22.01 pág. 6 párrs. 12, 13

Jehová Diosatakejj jilat kullakanakajj wali importantewa, jiwasanakatakejj ukhamäñaparakiwa. Jilat kullakanakar jarkʼaqañataki, cuidañatak kunatï wakiski uk lurañatakejj jankʼakïñasawa. Jiwasatï mä jilataru jan ukajj mä kullakar chuym ustʼaystanjja, janis kunas paskaspa ukham janiw amuyañasäkiti, ‘jupaw nayar perdonañapa, kunatï paski uksa armjjañapawa’ sasajj janiw sañasäkiti. ¿Kunatsa yaqhepajj chuym ustʼayasipjjaspa? Kunjamtï jilsuwayapki ukarjamaw janis valoranïkaspa ukham amuyasisin chuym ustʼayasipjjaspa. Yaqhepajj jichhakiw Diosan markapar mantasipki, mayninakan pantjasitanakap perdonañ janïraw yateqapkiti, ukatwa chuym ustʼayasipjjaspa. Kunatäskpansay uk askichañatakejj chʼamachasiñasawa. Ukampis maynitï mä kunatsa jankʼak chuym ustʼayasirïchi ukhajja, ukajj jan walïtapwa amuyasiñapa, ukatsti jan ukhamäñatakiw chʼamachasiñapa. Ukhamatwa sumaki jikjjatasini, mayninakarus yanaptʼarakini. w21.06 pág. 21 párr. 7

Kunjamas jikjjatasta uk Jesusajj amuyiwa. Wali llakita jikjjatasktan ukhajja, kunjamäsktansa uk amuyiri amigonïñajj wali kusiskañawa. Yamas jiwasjam jan walin uñjaskäna uka amigonïñajj wali askiwa. Jesusajj uka kasta amigowa, aynachtʼatäñasa yanaptʼa munañas kunjamasa uk jupajj yatiwa. Kunjam luratätansa uksa yatirakiwa, ukhamajja jupaw yanaptʼa munkañäni ukhajj “horasapar” yanaptʼa katoqañasatakejj encargasini (Heb. 4:15, 16). Jesusajj Getsemaní jardinanjja, mä angelan yanaptʼap katoqtʼasïnwa. Jiwasajj jupjamarakiw Jehová Diosajj churkistu uka yanaptʼa katoqasiñasa, jupajj Bibliat apstʼat mä qellqata, mä video, mä discurso toqew yanaptʼistu. Janiw ukakïkiti, mä anciano jan ukajj Diosar serviri mä amigo toqew Jehová Diosajj yanaptʼarakistu (Luc. 22:39-44). Jehová Diosaw sumankañap churätam, chʼamañchtʼarakïtam. Orasktan ukhajja, ‘Jehová Diosaw sumankañap churistu, uka sumankañapasti kuntï jaqejj amuyki ukat sipansa jukʼampiwa’ (Filip. 4:6, 7). w22.01 págs. 18, 19 párrs. 17-19

Jehová Diosajj taqe kuns cheqaparupuniw luri. Ukampis markapar irpapki ukanakar confiyañajj chʼamakïspawa. ¿Jupanakajj Diosan munañaparjamat lurasipki, jan ukajj amtanakaparjamakich lurasipki? sasaw jisktʼassna. Jehová Diosajja markap irpapki ukanakarojj confiyiwa. Ukhamajj jiwasatï jupanakar jan confiykañänejja, nayajj Jehová Diosar confiytwa sasajj janiw sisksnati. Jichhürunakanjja ‘suma phoqeri amuyasir esclavo’ toqew Diosajj markapar irpaski (Mat. 24:45). Kunjamtï nayrïr patak maranakan cuerpo gobernantejj lurirïkänjja, ukhamarakiw uka esclavojj kunanakatï oraqpachan lurasiski ukanak pʼeqtʼaski, congregacionankir ancianonakarus instruccionanak churaraki. Ancianonakajj uka instruccionanakarjam congregacionan lurasiñapatakiw encargasipjje. Diosan markapana ukhamarak ancianonakan instruccionanakaparjam lurañäni ukhajja, kunjamtï Jehová Diosajj lurki ukar confiyataswa uñachtʼayañäni. w22.02 pág. 4 párrs. 7, 8

¡Jehová Diosan Testigopäsajj kusisitätanwa! ‘Wiñay jakañatak suma chuymanïpki’ ukanakar Diosar servipjjañapatak yanaptʼañajj kusiskañawa (Hech. 13:48). Jesusan discipulonakapajj predicacionat kuttʼanisajja, wali suma experiencianakwa jupar cuenttʼapjjäna, Jesusajj uk istʼasajj ‘kusisiñampi espíritu santompi phoqtʼatänwa’, jiwasajj jupjamarakiw jikjjatastanjja (Luc. 10:1, 17, 21). Pablojj Timoteor akham sänwa: “Kunjamsa sarnaqaskta, kunjamsa yatichaskta ukanakatjja amuytʼasipunim. [...] Ukhamatwa juma pachpas salvasïta khitinakatï jumar istʼapktam ukanakas salvasipjjarakiniwa” sasa (1 Tim. 4:16). Ukhamajj predicatasajj vidanakwa salvaspa. Diosan Reinopat yatiyirinakjamajj sarnaqatasat sumwa amuytʼasiñasa. Sarnaqatasampejj Diosaruw jachʼañchañ muntanjja, kuntï yatiyktan ukar creyitassa sarnaqatasampiw uñachtʼayañ munaraktanjja (Filip. 1:27). Predicañatak sum wakichtʼasktan, jaqenakamp parlir sarañatak Diosar yanaptʼa mayisktan ukhaw kunjamsa yatichasktan ukanakat sum amuytʼasitas uñachtʼaytanjja. w21.10 pág. 24 párrs. 1, 2

‘Machaq jaqëñamp isthapisiñajja’, Jehová Diosat yateqasiña sañwa muni. Machaq jaqëñamp isthapiski uka jaqejja, espíritu santon achuparjamaw kuns luri. Amuyupansa, chuymapansa, luratapansa espíritu santompiw irpayasi. ‘Machaq jaqëñamp isthapisir’ jaqejja, Jehová Diosarus jupan servirinakaparus munasiwa (Mat. 22:36-39). Jan walinakan uñjasisas kusisitakïskiwa (Sant. 1:2-4). Sumankañwa thaqaraki (Mat. 5:9). Pacienciampi munasiñampiw mayninakar uñjaraki (Col. 3:13). Kunatï walïki ukarojj munasiwa, ukarjamaw sarnaqaraki (Luc. 6:35). Diosar wal confiyatapjja, luratanakapampiw uñachtʼayaraki (Sant. 2:18). Jupamp nuwasiñ munapki jan ukajj colerayañ munapki ukhajja, llampʼu chuymampiw ukanakar saykati (Tito 3:2). Yantʼanakan uñjasisas janiw munañapamp apnaqayaskiti (1 Cor. 9:25, 27). Machaq jaqëñamp isthapisiñatakejja, kuntï Gálatas 5:22, 23 textona ukat yaqha textonakan qhanañchki ukarjamaw sarnaqañasa. w22.03 págs. 8, 9 párrs. 3, 4

Apóstol Pablot yateqasisajja, ancianonakajj janiw utat utatak predicapjjañapäkiti, jan ukasti taqe horasanwa predicapjjañapa (Efes. 6:14, 15). Pabljamarakiw predicacionan mayninakar wakichtʼañatakejj tiempo apstʼasipjjaspa, siervo ministerialanakaruw wakichtʼapjjaspa (1 Ped. 5:1, 2). Ukampis ancianonakajj janiw congregacionan lurañanakapamp sinti ocupatäpjjañapäkiti. Ukhamäspa ukhajja, janiw predicañatakejj tiemponëjjapjjaspati (Mat. 28:19, 20). Taqe lurañanakapampi phoqañatak tiemponïñatakejja, awisajj yaqhep luräwinak jan katoqasipjjañapaw wakisini. Uka toqet orasjjasajja, inas mä asignación katoqasisajj jukʼamp importantëki ukanak apanukusipkatap amuyasipjjchispa. Sañäni, Familiampi Bibliat Yatjjataña, predicaña, jan ukajj wawanakapar predicañ yatichañ apanukusipkatapwa amuyasipjjaspa. Ancianonakajj taqe lurañanakap wali amuyumpi phoqañ munapjjatap Jehová Diosajj amuyiwa. w22.03 pág. 27 párrs. 4, 7; pág. 28 párr. 8

Bibliat yatjjataskayätan ukhajja, ¿Testigöñ ajjsarayasiyätanti? Utat ut predicañ janipuniw puedkäti, familiaranakajasa amigonakajas naya contraw saytʼapjjani sasin inas ajjsarchiyätan. Ukhamächïna ukhajja, yateqerisar uka pachpa pasani ukhajj kunjamas jupajj jikjjatasi uk amuysnawa. Yaqhepajj ajjsarayasipjjaniwa sasaw Jesusajj säna, ukampis ajjsarañajj janiw jumanakarojj Diosar serviñat jarkʼañapäkiti sasaw discipulonakapar säna (Mat. 10:16, 17, 27). Kuntï yateqki uk yaqhanakar parlañapatakiw Bibliat yateqerisar jukʼat jukʼat yatichañasa. Jesusajj predicapjjañapatak discipulonakapar khitkäna ukhajj ajjsarayasipjjpachänwa, ukampis khitinakarusa ukat kunjamsa predicapjjañapäna ukatakejj taqe chuymaw yanaptʼäna (Mat. 10:5-7). ¿Kunsa jupat yateqassna? Khitinakarus predicaspa ukatakiw yateqerir yanaptʼañasa. ‘¿Khitis Bibliat mä kun yatiñ munaspa?’ sasaw jupar jisktʼsna. Ukatsti kunjamsa fácil amuykaña qhanañchtʼaspa ukatakiw yanaptʼañasa. w21.06 pág. 6 párrs. 15, 16

“Mä qhawqha minutonakanakwa tiendanakasa edificionakas qʼal allthaptäna”. “Jaqenakajj wali sustjatäpjjänwa [...]. Mä ratukiw ukajj pasawayi sapjjänwa, ukampis nayatakejj wali jayjamänwa”. Ukham sasaw 2015 maran Nepal markan terremotojj paskäna ukat yaqhep salvasirinakajj sapjjäna. Ukampis taqeniw yaqha kasta thaljäwin jakasktanjja, Jehová Diosajj aka oraqpachankir taqe markanakaruw thaljaski. Ageo profetajj uk akham sasaw arsüna: ‘Jehová Diosajj akham siwa: “Akat mä jukʼa tiempotjja, wasitampiw nayajj alajjpachanaksa, oraqsa thaljäjja”’ sasa (Ageo 2:6). Terremotonakajj jan walinakak utjayi, ukampis Ageojj parlkäna uka thaljäwejj sumanakwa utjayi. Diosajj akham sänwa: “Taqe markanakaruw nayajj thaljäjja, taqe markanakan kunanakatï wali valoranïki ukanakajja aka utaruw mantapjjani, aka utjja jachʼañchäwimpiw phoqtʼayarakëjja” sasa. w21.09 pág. 14 párrs. 1-3

Suma amigonakajj sapa kutiw parltʼasipjje, kunjamas jikjjatasipjje uks cuenttʼasipjjarakiwa. Jehová Diosampejj ukhamarakiwa. Kunjamas jikjjatastan kunsa pienstan, kunanakas llakisiyistu ukanak cuentʼtan ukhajja, jupar confiyataswa uñachtʼaytanjja. Jiwasar munasitapwa amuyaraktanjja (Sal. 94:17-19; 1 Juan 5:14, 15). Diosat jan jitheqtiri servirinakapamp chikachasiñajj Diosan regalopawa (Sant. 1:17). Diosajj “taqe horasan” munasiri jilat kullakanak churasaw jiwasat llakisitap uñachtʼayistu (Prov. 17:17). Colosas markankir cristianonakar qellqkäna uka cartapanjja, apóstol Pablojj jupar yanaptʼkäna ukanakan sutinakapwa aytäna, ‘jupanakaw wal chuymachtʼapjjetu’ sasaw sarakïna (Col. 4:10, 11). Jesusas amigonakapan yanaptʼap munarakïnwa, yanaptʼap katoqasajj yuspärarakïnwa, juparojj angelanaka, jaqenakaw yanaptʼapjjäna (Luc. 22:43). Experienciani amigosar llakinakas cuenttʼañajja, janis suma amuytʼasirïksna ukham janiw sañ munkiti, antisas ukham lurañajj yanaptʼistaspawa. w21.04 págs. 24, 25 párrs. 14-16

¿Mä jilatana jan ukajj mä kullakan luratapajj chuym ustʼayistaspa ukhajj kunsa lursna? Jupamp sumankañatakiw wal chʼamachasiñasa. Kunjamas jikjjatastan uk Jehová Diosaruw cuenttʼañasa. Chuym ustʼaykistu ukar bendisiñapatakiw mayiñasa, kunjamtï jupajj uñjki ukham uñjañatakiw mayiñasarakiwa (Luc. 6:28). Jan perdonañ puedkstan ukhajja, kunjamatsa jupamp parltʼsna ukwa amuytʼañasa. Ina chʼusatsa uk lurkistaspa ukham janiw amuyañasäkiti (Mat. 5:23, 24). Jupamp parlkañäni ukhajja, kuntï lurkäna ukajj jiwasar yanaptʼañatakïkaspas ukhamwa amuyañasa. Ukampis ¿jan sumankthapiñ munkaspa ukhajj kuns lursna? Bibliajja, “maynit maynikam aguantasisipkakim” siwa. Ukhamajj pacienciamp uñjaskakiñasawa (Col. 3:13). Janiw jupatak colerata sarnaqañasäkiti, ukham lurasajj janiw Diosampejj sum apasjjsnati. Jan kunas lanktʼasiykistani ukhajja, Diosar jukʼamp munasitaswa uñachtʼayañäni (Sal. 119:165). w21.06 pág. 23 párr. 15