Julio

Congregacionat maynir jaqsuñatakejj ancianonakajj kuna amtarutï puripkani ukar istʼañamawa, ukajj taqeniruw yanaptʼi, juchachasirirus yanaptʼarakiwa. ‘Ancianonakajj maynir jaqsusajj pantjasipjjewa’ sasin inas yaqhepajj sapjjchispa. Ukampis kunjamapunïnsa uk janiw yatktanti. Ukhamajja comité judicial ukan uñjawayapki uka ancianonakar confiyañasawa. Jupanakajj Bibliarjam lurañatakiw wal chʼamachasipjje, “Jehová Diosatakiw” juzgapjjaraki (2 Crón. 19:6). Juchachaski uka familiamar ancianonakajj congregacionat jaqsuñ amtawayapki ukar apoyäta ukhajja, juchachasir familiamarojj Diosar kuttʼaniñapatakiw yanaptʼasma. Elizabeth kullakajj akham siwa: “Yoqajampi janipun akchʼas parlañajj nanakatak wali chʼamapunïnwa. Ukampis Jehová Diosar kuttʼanjjäna ukhajja, congregacionat jaqsutäñapajj wakisiskapunitapwa yatiyapjjetäna” sasa. w21.09 págs. 28, 29 párrs. 11, 12

Jan utjirini viuda warmejja, Jehová Diosarojj jukʼamp churañwa munaspäna. Ukampis jan pueditapatjja, qhawqhapatï utjkäna ukwa churäna; Jesusasti viuda warmejj churkäna ukajj Awkipatak wali valoranïtap yatïnwa. ¿Kunsa ukat yateqsna? Diosarojj kunatï sumäki uk churtan, mä arunjja taqe chuymasampi, taqe almasampi jupar sirvtan ukhajj kusisiwa (Mat. 22:37; Col. 3:23). Diosarojj tiempo apstʼasisa chʼamasampiw sirvtanjja. Sañäni, tantachäwinakar sarasa predicacionar sarasaw uk lurtanjja. ¿Kunjamsa viuda warmit kuntï yateqawayktan ukarjam lursna? ‘Jehová Diosajj qhawqtï lurañ puedkta ukarjam chʼamachasitamat wal kusisi’ sasajj khiti kullakanakarus amtaysna ukwa pienstʼañasa. Inas mä kullakajj edadanïtap layku, jan ukajj usutätap laykojj jan nayrjam predicañ puedjjchiti, inas jan kunatak servirjam amuyasisajj wal llakisirakchi. w21.04 págs. 6, 7 párrs. 17, 19, 20

Kunapachas aka jan wali pacharojj tukjañajj wakisi uk Jehová Diosakiw yati. Diosan paciencianïtap laykuw walja millón jaqenakajj jupar servisipki, jachʼañchasipkaraki. Diosatï jan aguantkaspänjja, janiw jupanakajj utjapkaspänti, jupar munasiñsa janiw yateqapkaspänti, ni jakäwipsa katuyasipkaspänti, ukatwa aguantatapat yuspärapjje. Jiwasanakat walja millonanakajj tukuykama aguantatasat premio katoqkañäni ukhajja, Diosan pacienciampi aguantañ amtatapajj wali wakiskirïtapwa amuyañäni. Supayajj kunayman jan walinaksa utjaykchejja, Jehová Diosajj kusisitaw aguantaskaki (1 Tim. 1:11). Jupajj sutip qʼomachañapkama, jupaki taqe kun apnaqañatak derechonïtap uñachtʼayañapkama, taqe jan walinak tukjañapkama, kunanakatï tʼaqesiykistu ukanak chhaqtayañapkam pacienciampi suykasajja, ukhamarakiw kusisit aguantsna. Diosajj aguantaskakiwa, ukhamajj aguantaskakiñäni, chuymachtʼasiskakiñäni. w21.07 pág. 13 párrs. 18, 19

Jesusajj jakkäna uka tiempon walja jaqenakaw jupar jan creyipkänti, jupanakatakejj mä aleq carpinteron yoqapakïnwa. Jesusajj Nazaret markatänwa, uka markajj yaqhepatakejj jan yäqañjam markakïnwa. Jesusan discipulopar qhepat tukkäna uka Natanael chachas qalltan uka markat akham sänwa: “¿Nazaret markat mä suma jaqejj mistuspati?” sasa. Inas jupajj Miqueas 5:2 profeciat amtasin ukham sischïna. Uka profeciarjamajja, Mesiasajj Belén markanwa nasiñapäna, janiw Nazaret markan nasiñapäkänti. Isaías profetajja Jesusajj kawkitsa, kuna familiatsa jutäna uka toqet janiw enemigonakapajj llakisipkaniti sasaw mä profecian säna (Is. 53:8). Jupanakatï uka toqet sum yatjjatapjjaspänjja, Jesusajj Belenan nasitapa, David reyit jutatap yatipjjaspänwa (Luc. 2:4-7). Miqueas 5:2 texton utjki uka profeciarjamajja, kawkjantï Jesusajj nasiñapäkäna ukanpunwa Jesusajj nasïna. Ukhamajj ¿kunatsa pächasipjjäna? Jesusat jan sum yatjjatasaw jan sum amuyapkänti. Ukatwa jupat pächasipjjäna jan creyipkarakïnti. w21.05 págs. 2, 3 párrs. 4-6

Bibliajja ewjjtʼanak katoqasiri jaqenakatwa parli, ukhamäpjjatapat Diosajj jupanakar bendisïnwa. Job chachat parltʼañäni. Jupajj Diosar kusisiykirsa sarnaqañ munkchïnjja, janiw perfecto jaqëkänti. Jan walin uñjasisajj jan walinakwa parläna. Ukatwa Jehová Diosasa Elihú chachas jupar cheqak ewjjtʼapjjäna. ¿Ukham ewjjtʼatajj kamachänsa? Humilde chuymampiw ewjjtʼanak katoqtʼasïna. Jupajj akham sänwa: “Jan amuytʼasisaw parlayäta [...]. Ukatwa nayajj ukanak arsutajat arrepentista, uk uñachtʼayañatakejj laqʼa patjjana qhella patjjan qontʼasirakta” sasa. Humilde chuymanïtapatjja Diosajj bendisïnwa (Job 42:3-6, 12-17). Elihú chachajj jupat sipans sullkäkchïnsa, humilde chuymampiw Job chachajj ewjjtʼanakap taqe chuym istʼäna (Job 32:6, 7). Ewjjtʼatäñajj janis wakiskaspa ukham amuyañäni, jan ukajj jiwasat sipans jukʼamp sullkäki ukajj ewjjtʼistani ukhajja, humilde chuymanïñaw uka ewjjtʼa katoqasiñatak yanaptʼistani. Taqeniw espíritu santon achupan luräwinakap uñachtʼayañ yateqaskakiñasa, suma yatichirïñatakis chʼamachasiskakiñasawa. w22.02 pág. 11 párr. 8; pág. 12 párr. 12

Taqeniw congregacionan sumankaña, munasiña utjañapatak yanaptʼañasa, ukhamatwa jan khitis sapakjam jikjjataskaniti. Kuntï siskañäni lurkañäni ukajj mayninakar wal chʼamañchtʼaspa. ¿Jehová Diosar sapak servipki ukanakan jan sapakjam amuyasipjjañapatakejj kunsa lursna? Jiwasaw maynin amigopäñatak chʼamachasiñasa. Congregacionar jichhak jutasipki ukanakar munasiñampiw katoqtʼañasa (Rom. 15:7). Ukampis tiempompejj amigosar tukuñapatakiw chʼamachasiñasa. Ukatakejja jichhak jutasipki ukanakarojj munasiñampiw uñjañasa, jupanakat llakisitaswa uñachtʼayañasa, kuna jan walinakansa uñjasipjje uk amuyañatakiw chʼamachasiñasaraki. Ukampis janiw jakäwipar mitisiñasäkiti. Yaqhepanakatakejj kunjamas jikjjatasipjje uk sañajj chʼamakiwa, ukhamajj yatiñpunsa munksna ukham janiw amuyayañasäkiti. Antisas munasiñampi wali amuyumpiw jisktʼañasa, pacienciampiw istʼañasaraki. Sañäni, kunjamsa Diosar uñtʼawayapjje ukwa jisktʼsna. w21.06 pág. 11 párrs. 13, 14

‘Mä sapa tamaki’ ukat ‘mä sapa awatiriniki’ Diosar mayachtʼata servitasatjja wal yuspärtanjja. Organizados para hacer la voluntad de Jehová sat libron página 165 ukan akham siwa: “Diosan markapan mayachtʼatäñapatakiw yanaptʼañasa. [...] Jehová Diosajj kunjamtï jilat kullakanakar uñjki ukham uñjañäni ukhajja, jupanakampejj sumaw apasiñäni” sasa. Diosajj taqeniruw ‘jiskʼanakaparjam’ wali valoranit uñjistu. Jiwasajj ukhamarakiw jilat kullakanakasar valoranit uñjañasa. Diosajj kuntï jilat kullakanakasar yanaptʼañatak lurktan ukjja, valoranitwa uñji (Mat. 10:42). Jilat kullakanakar wal munastanjja, ukhamajj “janipun mä jilatasan nayraqataparojj mä lanktʼayir qalsa” uchañäniti (Rom. 14:13). Jilat kullakanakajj jiwasat jilankapkaspasa ukham amuyapjjañäni, taqe chuymarak perdonapjjañäni, janipun mayninakan luratapampejj lanktʼasiñäniti. Antisas “kunanakatï mayninakamp sumankañataki [...] yanaptʼkistu ukanak lurañatakejj chʼamachasiskakiñäni” (Rom. 14:19). w21.06 pág. 24 párrs. 16, 17

Jiwasatï Biblia toqe, Diosan markap toqe ewjjtʼanak katoqtan ukanak wali amuyumpi yatjjatañäni, ukarjam lurarakiñäni ukhajja, jukʼat jukʼatwa Cristojj kunjam jaqëkäntï ukham tukuñäni, Diosarus jukʼamp sumwa uñtʼañäni. Jesusajj mä uñachtʼäwipanjja, Reinon suma yatiyäwinakapajj mä jiskʼa jathar uñtasitaw suma chuyman jaqenakan chuymapan jukʼat jukʼat jilti sasaw säna. Akham sänwa: ‘Jathanakajj alsunisajj wali jachʼanakaw jilari, ukampis uka jaqejj mä arunjja, satirejj janiw ukanak yatkiti. Oraqejj jukʼat jukʼatwa achoqe: nayraqatajj alinakaw jilti, puyanakas misturakiwa, ukatsti puyanakajj poqorjjarakiwa’ sasa (Mar. 4:27, 28). Reinon suma yatiyäwinakap istʼir jaqejja, mä plantar uñtasitaw jukʼat jukʼat Diosar serviñan jilti. Bibliat yateqerinakasampejj ukaw pasaraki, jupanakajj Jehová Diosar jukʼat jukʼat jakʼachasipjje ukhajja, cambionak lurirwa uñjtanjja (Efes. 4:22-24). w21.08 págs. 8, 9 párrs. 4, 5

‘Kunanaktï nayranakapajj uñjki’ ukanakat kusisiri jaqejja, kunatï jupan utjki ukampejj kusisitakiwa. Ukampis ‘kunanaktï munki ukan qhepap uksa aksa sarnaqeri’ jaqejja, kuntï jan jikjjatañ puedki uk jukʼamp munaskakiwa. ¿Kunsa ukajj yatichistu? Kusisitäñatakejja kunatï utjkistu ukatakwa lupʼiñasa, kuntï jan jikjjatirjamäktan ukat janiw lupʼiñasäkiti. Kunanaktï jan lurañ yatktan uk yateqañajj taqeniruw gustistu, ukhamajj ¿kunanakatï utj-jjestu ukamp kusisitäñ puedsnati? Jïsa. Kunanakatï jichhajj utjkistu ukanakamp kusisitakïsnawa. Jesusajj talento qollqenakat mä uñachtʼäwin parlkäna uk amtañäni, ukajj Mateo 25:14-30 textonkiwa. Ukanjja kusisitäñatakejj kunsa jiwasajj lursna, kunjamantï jichhajj jakasktan ukamp kusisitäñatakejj kunanaksa luraraksna ukanakatwa qhanañchasi. w21.08 pág. 21 párrs. 5, 6

Jehová Diosajj khitinakatï ‘llaktʼat sarnaqapki’ ukanakat wal llakisi. Jiwasajj ukham jilat kullakanakarojja, jupanakat taqe chuyma llakisisaw chʼamañchtʼsna. Diosajj qhawqsa ovejanakapar munasi uk uñachtʼayañaswa muni (Prov. 19:17). Maysa toqetjja, humildësa llampʼu chuymanïsaw jupanakar yanaptʼaraksna. Jiwasas sum lurañ yatksna ukham janiw amuyayañasäkiti, ukham lurasajj mayninakan envidiasipjjañapatakiw chʼamañchsna. Arsutasampisa luratasampis maynit maynikamaw chʼamañchtʼasipjjañasa (1 Ped. 4:10, 11). Jesusajj kunjamsa discipulonakapar uñjirïna ukat yateqasisaw mayninakar sum uñjsna. Jesusjam wali importante jaqëkasas ‘humilde chuymanïnwa’ (Mat. 11:28-30). Jaqenakarojj fácil amuykañ arunakampi, fácil amuykañ uñachtʼäwinakampiw yatichäna, ukaw humilde jaqenakan chuymapar purtʼäna (Luc. 10:21). w21.07 pág. 23 párrs. 11, 12

Edadani jilat kullakanakampi parltʼañatakejj jiwasaw jupanakar jakʼachasiñasa. Inas jupanakajj jan nayrjam sum uñj-jjapjjchiti, inas kʼachatak sarnaqjjapjjchi, inas arupas jan nayrjamäjjchiti. Ukampis chuymapan wayn tawaqösipkiwa, Jehová Diosampis ‘sumat uñjatäpjjewa’ (Ecl. 7:1). Kunatsa Diosajj jupanakar wali valoranit uñji uk amtañasapuniwa, respetaskakiñasarakiwa. Eliseo profetjamäñasawa, jupajj qhepakamaw Elías profetarojj jan jaytanukkänti, kimsa kutiw “janipuniw jaytanukkämati” sasin sarakïna (2 Rey. 2:2, 4, 6). Edadani jilat kullakanakat llakisiñawa (Prov. 1:5; 20:5; 1 Tim. 5:1, 2). Inas akham jisktʼsna: “¿Kunas cheqa thakinkatamat jan pächasiñatakejj yanaptʼawaytam? ¿Kunanakas Diosar jukʼamp jakʼachasiñatak yanaptʼawaytam? ¿Kunas Jehová Diosar kusisita serviskakiñatakejj yanaptʼawaytam?” sasa (1 Tim. 6:6-8). Ukatjja kuntï siskistani uk sumwa istʼañasa. w21.09 pág. 7 párrs. 14, 15

Jesusajj predicañatak mä mandato churkistu uk phoqañatak wal chʼamachastan ukhajja, Diosar munataswa uñachtʼaytanjja (1 Juan 5:3). Ak amuytʼañäni: Jehová Diosar munatasatwa utat uta prediktan. ¿Jesusan uka mandatopar istʼañajj facilakïnti? Inas chʼamakïchïna. Mä utar nayrïr kuti leqtʼkayätan ukhajj inas wal ajjsarayaschiyätan. Ukampis Jesusan uk lurañas munatap yatisaw ukham lurtanjja. Inas jichhajj predicañ jan ajjsarayasjjstanti, ukampis ¿mayniru Bibliat yatichañ ajjsarayastanti? Ukhamächi ukhajja, Jehová Diosaruw yanaptʼa mayiñasa, jupaw jan ajjsarañatakisa, jaqenakar Bibliat yatichañatak invittʼañatakis chʼam churistani. Juparakiw Jesusan discipulopar tukuyañ munañatakis yanaptʼistani. w21.07 pág. 3 párr. 7

Nayra tiemponjja esclavonakarojj mä marcaw uchasirïna, ukhamatwa khitis patronapäna ukajj yatisirïna. Jichha tiemponjja ukar uñtasitarakiw taqenis parapana, amparapana mä marcanïpjjañap gobiernonakajj suyapjjani, mä arunjja taqenin jupanakar apoyapjjañapwa suyapjjani. ¿Kunsa lurañäni? ¿Uka marca katoqañäniti, gobiernonakarojj apoyañäniti? Jan marcatäñ munirinakajj jan walinwa uñjasipjjani. Apocalipsis librojja, ‘marcatäpki ukanakakiw alañsa ukat aljañsa puedipjjani’ siwa (Apoc. 13:17). Ukampis Apocalipsis 14:9, 10 texton parlki uka marca katoqerinakarojj kunsa Jehová Diosajj lurani uk servirinakapajj yatipjjewa, ukatwa uka marca katoqañat sipans “Jehová Diosanktwa” sasas amparapar qellqantasipkaspa ukhamäni (Is. 44:5). Diosar jan jitheqtas serviñatakejj jichhaw chʼamachasiñasa, ukhamatwa jupankatasat Diosajj wal kusisini. w21.09 pág. 18 párrs. 15, 16

Predicañatakejj mayninakaw yanaptʼapjjestaspa. Apóstol Pablojja, kunjamsa jaqenakar yatiyirïna, yatichirïna ukwa Timoteor yatichäna, ukatjja mayni jilat kullakanakar uk yatichañapatakiw chʼamañchtʼäna (1 Cor. 4:17). Jiwasajj Timoteot yateqasisaw congregacionasankir experienciani jilat kullakanakat yateqasiraksna. Ukampis predikir sarañatakejj Diosaruw yanaptʼa mayiñasa. Espíritu santopatï jan yanaptʼkistaspajja, janiw kuns lurañ puedksnati (Sal. 127:1; Luc. 11:13). Kunansa yanaptʼatäñ muntan uk qhanwa Diosar mayiñasa. Sañäni, Diosar uñtʼañ munasipki suma chuymanïpki uka jaqenakar jikjjatañatak yanaptʼita sasaw mayissna. Bibliat sapaki yatjjatañatakis tiempo apsusiñasawa. Bibliajj akham siwa: ‘Jumanak pachpa Diosan munañap yatipjjam. Diosan munañapajj sumawa, perfectowa, jupan chuymapsa kusisiyarakiwa’ sasa (Rom. 12:2). Bibliajj kuntï yatichki ukar confiytan ukhajja, jan pächasisaw prediktanjja. w21.05 pág. 18 párrs. 14-16

Jiwasat amuytʼañäni, maynir Bibliat sum yatichañatakejj chʼamachastanwa, oraraktanwa, ukampis yateqki ukarjam jan sarnaqatapat jaytjjtanwa, jan ukajj janiw bautisasiñapatak yanaptʼjjtanti, ukhamïpan ¿jiwasas juchanïksna, Diosajj janis bendiskistaspa ukhamti amuyañasa? Kunarjamas Jehová Diosajj sumti predicasajj phoqasktan janicha uk uñji uk amuytʼañasawa. Jupajj chʼamachasitasa, aguantataswa uñji. Jaqenakajj janis istʼkchistojja, jupar munasitasat taqe chuym predicktan ukhajj Diosajj wal kusisi. Pablojj akham sänwa: “Diosajj cheqapar uñjir Diosawa, jupajj janiw luratanakamatsa ni sutipar munasipjjatamatsa armaskiti, ukanakjja santo jilatanakar jichhakam servisaw uñachtʼayapjjtajja” sasa (Heb. 6:10). Janis maynirus bautisasiñapatak yanaptʼkstanjja, qhawqsa chʼamachastan, juparus munastan uk janiw Jehová Diosajj armkiti. Ukhamajj kuntï Pablojj siskäna ukajj jiwasatakirakiwa, ukajj jichhürutak ajllit textonkiwa. w21.10 pág. 25 párrs. 4-6

Jesusajj khuyapayasiñampi munasiñampiw discipulonakapar uñjirïna. Jan mä igualaki lurañ yatipjjatapsa jan mä igualaki jakasipjjatapsa yatïnwa, ukhamajj janiw mä pachpa luräwik katoqapkaspänti, ni mä igualaksa predicapkaspänti. Ukampis sapa maynin chʼamachasitap valoranitwa uñjäna. Ukajj talento qollqenakat parlir uñachtʼäwinwa qhan amuyasi. Ukanjja kunjamsa mä uywirejj sapa mayni esclavonakapar “chʼamaparjam” mä trabajo churäna ukatwa parläna. Trabajop sum phoqeri pä esclavonakat mayniw jukʼamp ganäna. Ukampis uywiripajj paniniruw akham sasin felicitäna: “Suma phoqeri esclavo, ¡walik ukham lurtajja” sasa (Mat. 25:14-23). Jesusajj khuyapayasiñampi munasiñampiw uñjarakistu. Jan mä pachpak lurañ yatitassa jakasitassa yatiwa, qhawqtï lurañ puedktan ukarjam wal chʼamachasitasat kusisirakiwa. Jupatwa yateqasiñasa. w21.07 pág. 23 párrs. 12-14

David reyejja, janiw khuyaptʼayapunirïkänti. Sañäni, jan sinttʼasiri Nabal chachajj jupar toqjjäna, jaqenakapar manqʼañ jan churañ munkäna ukhajja, Davidajj wal colerasïna, Nabal chachampiru utapankirinakampirojj jiwayañwa amtäna. Ukampis Nabal chachan Abigaíl esposapajj munasiñampi pacienciampiw uk jan lurañapatak parläna, jankʼakirakiw Davidarojj manqʼañanak churäna. Ukhamatwa Davidajj jaqe jiwayañar jan purtʼaskänti (1 Sam. 25:9-22, 32-35). Davidajj coleramp apayasïna ukhajja, ‘Nabal chachampi utapankirinakampejj jiwañapawa’ sasaw säna. Ukat Natán profetajj mä uñachtʼäwin parlkäna uka jaqejj jiwañapawa sasaw säna. Davidajj suma jaqënwa, ukhamajj ¿kunatsa oveja lunthatasirirojj “jiwañapawa” sasin jan sinttʼasis juchañchäna? Davidajj kunjamansa jikjjatasïna uk amuytʼañäni. Uka pachajja, concienciapajj janiw qʼomäkänti. Maynejj jan sinttʼasisa maynir juchañchi ukhajja, Diosamp jan sum apasitapwa uñachtʼayi. w21.10 pág. 12 párrs. 17, 18; pág. 13 párr. 20

¿Kunsa jichhürutak apstʼat textot yateqsna? Jehová Diosajj taqet sipans santo Diosawa, ukampis jiwasajj jupat yateqassnawa. Pantjasirïtas laykojj santöñajj chʼamäspawa sañjamäkchisa, sarnaqatasan santösnawa, mä arunjja santöñasawa. Apóstol Pedrojj walja kutiw pantjasïna, ukampis sarnaqäwipajj santöñ pueditaswa uñachtʼayistu. Mä santo jaqejj janipuniw lartʼaskiti, religioso isinakampiw isisiraki sasaw yaqhep lugaranakan amuyapjje. Ukampis ukajj janiw cheqäkiti. Jehová Diosajj santo Diosäkchisa, ‘kusisiri Diosawa’ (1 Tim. 1:11). Jupan servirinakapas kusisitäpjjewa sasaw Bibliajj saraki (Sal. 144:15). Jesusajja kayukam puriri isisirinakarusa, jaqenakamp uñjayasiñ laykuki cheqapar sarnaqerinakarus juchañchänwa (Mat. 6:1; Mar. 12:38). Ukampis cristianonakajja, santöñajj kamsañsa muni uk yatjjtanwa, kunattejj Bibliaw uk yatiyistu. Jehová Diosajj wali munasiriwa, ukhamajj kuntï jan lurañ puedksna uk janipuniw maykistaspati. w21.12 pág. 2 párrs. 1, 3

Diosajj munasiñat walja regalonakwa churistu, uka regalonakapat mayajj jupar adorañawa. ‘Mandamientonakap phoqasawʼ Diosar munasitas uñachtʼaytanjja (1 Juan 5:3). Uka mandamientonakat mayajja Jesusajj discipulopar tukupjjañapataki ukhamarak bautisasipjjañapatak jaqenakar yanaptʼañas maykäna ukawa (Mat. 28:19). Ukatjja Jesusajj maynit maynikam munasiñaswa mayirakistu (Juan 13:35). Diosajj mandamientonakap istʼapki ukanakaruw oraqpachankir familiap taypin katoqani (Sal. 15:1, 2). Jehová Diosan munasirïtapaw jukʼamp jilanki (1 Juan 4:8). Janïr uñtʼkayätan ukhatpachaw jupajj jiwasar munasjjestäna (1 Juan 4:9, 10). Mayninakar munasisajj jupatwa yateqasisktanjja (Efes. 5:1). Jaqenakar munasitasjja, janïr akapach tukjatäkipan Diosar uñtʼapjjañapatak yanaptʼasaw uñachtʼaysna (Mat. 9:36-38). Ukhamatwa Diosan familiap taypinkañatakejj kunsa lurapjjañapa uk yateqapjjaspa. w21.08 pág. 6 párrs. 13, 14

Jesusajj walpun Jehová Diosar munasïna, ukatwa jupa layku ukat jiwas layku sacrificionak luräna (Juan 14:31). Jaqenakar munasitapjja, aka oraqen kunjamtï jakkäna ukampiw uñachtʼayäna. Jaqenakarojj wali munasiñampiw uñjäna, sinttʼasirakïnwa. Jupa conträpkäna ukanakarus munasiñampiw uñjarakïna. Jaqenakarojj Diosan Reinopatwa parlirïna, ukhamatwa jupanakar munasitap uñachtʼayäna (Luc. 4:43, 44). Ukatjja Jehová Diosampiru jaqenakampir wal munasitapjja, jucharar jaqenakan amparapan tʼaqesiñataki, jiwañataki dispuestokïsaw uñachtʼayäna. Ukham luratapatwa wiñayatak jaksna. Jehová Dios Awkisar munasitasatwa jakäwis katuyastanjja, bautisasiraktanjja. Ukhamajj jaqenakar munasisaw Jehová Diosar munasitas uñachtʼayañasa, Jesusajj ukhamwa lurirïna. Apóstol Juanajj akham sänwa: “Maynitejj jilapar uñjkasas jan munaskchi ukhajja, janirakiw jan uñjkañ Diosarojj munaskaspati” sasa (1 Juan 4:20). w22.03 pág. 10 párrs. 8, 9

Jehová Diosampïñajj walsa gustkchistojja, awisajj jan tiemponïtas laykojj jupar adorañatakejj janiw tiempojj utj-jjestaspati. Trabajompi, familiampi yaqha luräwinakampi wali ocupatäsajja, janis orasiñataki, yatjjatañataki, lupʼiñataki tiempojj utj-jjestaspa ukhamwa amuyassna. Ukampis yaqhanakaw tiempo apaqarakistaspa. Ukanakajj janis jan walïkchejja, jiwasatï jan amuyaskañäni ukhajj Jehová Diosar jukʼamp jakʼachasiñatwa tiempo apaqestaspa. Cheqas taqeniruw mä rato samartʼañasa kusistʼañasa gustistu. Ukampis ukanakaruki tiempos aptʼasiñäni ukhajja, Jehová Diosar adorañatakejj janiw tiempojj utj-jjestaniti. Kunanaktï kusistʼañatak lurktan ukanakajj janiw jukʼamp importantëñapäkiti (Prov. 25:27; 1 Tim. 4:8). w22.01 pág. 26 párrs. 2, 3

Jehová Diosajj jaqe masimar munasiñamawa sasin israelitanakar sasajja, janiw juma kasta jaqenakarukiw munasiñama, jan ukajj markamankir jaqenakarukiw munasiñama sañ munkänti. Jupanakamp jakkäna uka extranjero jaqenakarus munasipjjañaparakïnwa. Ukajj qhanaw Levítico 19:33, 34 texton uñjasi. Extranjero jaqerojj ‘marka masiparjamaw’ uñjapjjañapäna, jupa pachparjamaw munasipjjañaparakïna. Ukatwa extranjeronakampina pobrenakampin apthapisipjjañapatakejj yapu thiyanak jiltʼayapjjañapäna (Lev. 19:9, 10). Jichha tiemponjja, cristianonakajj extranjero jaqenakarojj munasiñampiw uñjañasaraki (Luc. 10:30-37). ¿Kunjamsa uk lursna? Oraqpachan walja millón jaqenakaw yaqha markanakar jakir sarjjapjje, jupanakat yaqhepajj jiwas jakʼanwa jakapjjaspa. Uka chachanakaru, warminakaru, wawanakaru respetompi sum uñjañasawa. w21.12 pág. 12 párr. 16

Jehová Diosan yanaptʼap thaqapuniñäni ukhajja, jutïrins yanaptʼitaniwa sasaw jukʼamp confiyarakiñäni. Sañäni, asamblear sarañatak jefesar permiso mayiñatakejj Jehová Diosar confiyañaw wakisi. Taqpach tantachäwinakar sarañatakisa, jukʼamp predicañatakis inas jefesarojj horario cambiañap maychiñäni, ukatakejj Jehová Diosar confiyañaw wakisirakini. Ukampis jefesajj kuntï mayktan ukar janis istʼkistaspa, trabajos aptʼasksnasa ukham amuytʼañäni. Ukhaman uñjasisajj Jehová Diosajj janipuniw jaytjkitaniti, kunatï jakañatak wakiski ukanaks churapunitaniwa ¿sasat confiyaskakiñäni? (Heb. 13:5). Precursorat servipki uka walja jilat kullakanakajja, yanaptʼa munapkäna ukhajj kunjamsa Jehová Diosajj yanaptʼapunïna ukanakat walja experiencianakwa cuenttʼapjjestaspa. Jehová Diosajj jan jaytjasiri Diosawa. Jehová Diosatï jiwasampïskchejja, janiw kunatï jutïrin paskani ukar ajjsarañasäkiti. Juparutï jakäwisan nayrar uchañäni ukhajja, janipuniw jaytjkistaniti. w22.01 pág. 7 párrs. 16, 17

Mä amigosaru jan ukajj familiasat mayniru congregacionat jaqsuski ukhajja, ancianonakar confiyatasajj yantʼataw uñjasispa. Ancianonakajj janiw sum yatjjatapkpachati, janiw kunjamtï Jehová Diosajj munki ukham juzgapkpachati sasin amuyasaw llakissna. ¿Kuntï ancianonakajj amtapki ukajj walikïskiwa sasin amuyañatakejj kunas yanaptʼistaspa? Akwa amtañasa, juchachasirir congregacionat jaqsuski ukjja, Jehová Diosaw congregacionan askipataki, juchachasirir yanaptʼañatak uttʼayawayi. Juchapat jan arrepentisiritï congregacionankaskakispajja, congregacionarojj jan waltʼayaspawa (Gál. 5:9). Ukatjja juchapajj janis sinti jan walïkaspa, Jehová Diosamp wasitat sum apasjjañatakejj amuyupsa luratanakapsa janis cambiañapajj wakiskaspa ukhamwa amuyjjarakispa (Ecl. 8:11). Congregacionat maynir jaqsusiniti janicha uk amtañajja, ancianonakatakejj wali jachʼa responsabilidadawa. w22.02 pág. 5 párrs. 13, 14

Maynejj Biblian ewjjtʼanakaparjam qalltan jan lurañ munki, jan ukajj jan ukarjam jankʼak lurki ukhaw pacienciampi munasiñampi uñjañajj wali wakiskiri. Ukham pasipan janiw ancianonakajj colerapjjañapäkiti. Mä ancianojja ewjjtʼa necesitki ukar yanaptʼañatakejj Jehová Diosaruw orasiñapa, ukhamat kunatsa ewjjtʼa katoqasiñapa uk amuyañapataki ukat ukarjam lurañapataki. Kuntï ewjjtʼapki uka toqet lupʼiñapatakejj tiempow munasispa. Ancianotï pacienciampi munasiñampi ewjjtʼanejja, ewjjtʼap katoqasiñajj janiw chʼamäkaniti, ukampis Bibliarjamapuniw ewjjtʼañapa. Ewjjtʼanakasajj yanaptʼkirïñapawa, maynin ‘chuymaps kusisiyañaparakiwa’ (Prov. 27:9). w22.02 pág. 18 párr. 17; pág. 19 párr. 19

Mä jan walir saykatañataki, jan ukajj kunatï Diosar jan gustki uk jaytañatak chʼam mayisstan ukhajja, Jehová Diosajj janis oracionanakasar jankʼak jayskistaspa ukham inas amuysna. ¿Kunatsa jupajj oracionanakasar jan jankʼak jayskistu? Diosajj qhawqsa jupar confiytan ukwa uñjañ muni (Heb. 11:6). Cheqapunit kuntï mayktan ukarjam lurañatak chʼamachastan ukwa uñjañ munaraki (1 Juan 3:22). Diosar kunatï jan gustki uk jan lurañatak maystan ukhajja, inas paciencianïña, uk jaytañatak chʼamachasiñajj wakischini. Yaqhep mayisitanakasarojj Diosajj janiw jankʼak jayskistaniti, ukwa Jesusajj amuyayistu, jupajj akham sänwa: “Mayisipkakim, churatäpjjätawa; thaqasipkakim, jikjjatapjjätawa; leqtʼasipkakim, llawiratäpjjätawa. Taqe khititï mayki ukajj katoqewa, taqe khititï thaqki ukajj jikjjatiwa, taqe khititï leqtʼki ukajj llawiratäniwa” sasa (Mat. 7:7, 8). w21.08 pág. 8 párr. 1; pág. 10 párrs. 9, 10

Jehová Diosar jukʼamp confiyañatakejj Bibliat yatjjataskakiñasawa (Jos. 1:8). Kunjamsa taqe profecianakapajj phoqasi, kunjamsa Bibliajj mä pachpa amtamp qellqata ukanak amuytʼañäni. Ukanakaw wali yatiñani, munasiri mä Luririn utjatapar jukʼamp confiyañatak yanaptʼistani (2 Tim. 3:14; 2 Ped. 1:21). Bibliat yatjjatkasajja, ewjjtʼanakapajj kunja yanaptʼkirisa ukwa amuytʼañasa. Sañäni, Bibliajja nayra tiempotpachaw qollqe sinti munañajj kunayman jan walinakana, ‘kunayman llakinakan’ uñjasiyistu sasin sisjjäna (1 Tim. 6:9, 10; Prov. 28:20; Mat. 6:24). Ukhamajja qollqe jan sinti munapjjamti sasin Biblian ewjjtʼki ukajj wali wakiskiriwa. ¿Biblian kawkïr yaqha ewjjtʼanakapas yanaptʼawaytam uk amtastati? Biblian ewjjtʼanakap jukʼamp valoranit uñjañäni ukhajja, Diosajj kunatï jiwasatak jukʼamp sumäki uk yatiwa sasaw confiyañäni (Sant. 1:5). Ukham lurasajj jukʼamp kusisitaw jakasiñäni (Is. 48:17, 18). w21.08 págs. 17, 18 párrs. 12, 13

Jumatï edadanëjjsta ukhajja, akwa amtañama: Diosajj jupar serviñatak kunanaktï lurawaykta ukanakat janiw armaskiti. Jumajj taqe chuymaw predicawaytajja, kunayman yantʼanakaruw atipjawayarakta, ukanakat yaqhepajj wali chʼamänwa. Biblian leyinakapsa arjjatawaytawa. Diosan markapan privilegionak katoqasajj sumwa phoqawaytajja, yaqhanakarus uk yatichawayaraktawa. Diosan markapan cambionak utjawayki ukarjam lurañatakis wal chʼamachasiwaytajja. Precursoranakarus yanaptʼawaytawa, chʼamañchtʼawayaraktawa. Diosajj jupat jan jitheqtatamat wal munastamjja, jupajj ‘nayat jan jitheqtirinakarojj janiw jaytanukkäti’ sasaw arsuwayi (Sal. 37:28). Ukat akham sarakiwa: “Janqʼo pʼeqekëjjäta ukhasa nayajj yanaptʼaskakïmawa” sasa (Is. 46:4). Ukhamajja janis Diosan markapan wakiskirëjjasma ukham jan amuyamti. ¡Wali wakiskirïtawa! w21.09 pág. 3 párr. 4

Jehová Diosajj wali yatiñaniwa, kunatï taqe luratanakapatak sumäki ukarjamapuniw kuns amti. “Alajjpachat jutki uka yatiña[jja]”, “khuyapayasiñampi phoqantatawa, suma achunakanirakiwa” sasaw Bibliajj qhanañchi (Sant. 3:17). Diosajj mä munasir awkjamarakiw wawanakapat khuyaptʼayasiñajj jupanakan askipatakïtap yati (Is. 49:15). Servirinakapajj pantjasirïpkchisa, khuyaptʼayasiñap laykuw jutïritak mä suytʼäwinïpjje. Wali yatiñani Diosjamajja, razonajj utjki ukhajj khuyaptʼayapunistuwa. Ukampis khuyaptʼayañajj kunapachas jan wakiski uksa yatirakiwa, janipuniw khuyaptʼayasirïtap laykojj taqe kunsa perdonkakiti. Diosan mä serviripajj yatkasin juchan sarnaqañ amtaspa ukhajj ¿kunsa lursna? Pablojj akham sänwa: “Jan jukʼampi uka jaqempejj chikachasipjjamti” sasa (1 Cor. 5:11). Juchanakapat jan arrepentisirinakarojj congregacionat jaqsusiwa. Diosan servirinakapar jarkʼaqañataki, Diosan leyinakap apoyatas uñachtʼayañatakiw ukham lurañajj wakisi. w21.10 págs. 9, 10 párrs. 7, 8

Jehová Diosan Reinopat yatiyasiñapataki donacionanakasamp yanaptʼasaw Jehová Diosar adortanjja. Israelitanakajj janiw chʼusa amparaki Dios nayraqatan uñstapjjañapäkänti (Deut. 16:16). Qhawqtï puedipkäna ukarjamaw ofrenda apapjjañapäna. Ukham lurasaw kunanaktï Jehová Diosajj jupanak laykojj lurkäna ukanakat yuspärapjjatap uñachtʼayapjjäna. ¿Kunjamsa Diosar munasitasa kunanaktï jiwas layku lurawayki ukanakat yuspäratas uñachtʼaysna? Mä toqetjja, qhawqtï puedktan ukarjamaw congregacionasataki ukat oraqpachan yatiyasiski ukar yanaptʼañatak qollqe chursna. Pablojj akham sänwa: “Taqe chuyma churktan ukaw Diosarojj wal kusisiyi. Diosajj janiw kuntï maynejj jan churirjamäki uk suykiti, jan ukasti qhawqhatï maynin utjki ukarjam churañapwa jupajj suyi” sasa (2 Cor. 8:4, 12). Jehová Diosatakejja, taqe chuyma churktan uka donacionanakasajj jukʼäkchis wali valoraniwa (Mar. 12:42-44). w22.03 pág. 24 párr. 13

Ancianonakajj kuna jan walinakantï uñjasktan ukanak janiw chhaqtayañ puedipkaniti. Ukampis jilat kullakanakar chʼamañchtʼañataki, sum uñjañataki chʼamachasipjjañapwa Jehová Diosajj muni. Ancianonakajj wali ocupatäpkchisa, Pablot yateqasisaw jilat kullakanakar yanaptʼañatak tiempo apstʼasipjjañapa, munasiñampirakiw uñjapjjañapa. Pablojj jilat kullakanakar felicittʼapunirïnwa, chʼamañchtʼarakirïnwa (1 Tes. 2:7). Pablojja nayasa Jehová Diosas wal munasipjjsma sasaw jilat kullakanakar sirïna (2 Cor. 2:4; Efes. 2:4, 5). Amigonakaparjamaw uñjirïna, jupanakampïñatakis tiempo apstʼasirakirïnwa. Llakinakapatsa pantjasitanakapatsa, wali qhanwa jupanakar parläna, ukhamatwa jupanakar confiyatap uñachtʼayäna (2 Cor. 7:5; 1 Tim. 1:15). Problemanakapat sint llakisiñat sipansa, jilat kullakanakaruw yanaptʼäna. w22.03 pág. 28 párrs. 9, 10