Agosto

Jesusajja inas lawar chʼakkatapkäna uka Romano soldadonakat parlaskchïna. Jesusajj ina chʼusat tʼaqesiyatas uñjaskchïnjja, janiw chuyma ustʼatäkänti, ni coleratäkänsa (1 Ped. 2:23). Jiwasajj Jesusjamarakiw mayninakar perdonañatakejj jankʼakïñasa (Col. 3:13). Yaqhep jaqenakasa, jan ukajj familiarasasa, janiw kuntï creyktan, kunjamtï jakasktan ukanak amuyapkaspati, ukatwa jiwas contra saytʼapjjaspa. Inas jiwasat kʼarinak parlapjjchispa, mayninak nayraqatan jiskʼachapjjchistaspa, Bibliat apstʼat qellqatanakas chʼiyanoqapjjchispa, jan ukajj nuwjämaw sasin ajjsaraychistaspa. Chuyma ustʼat sarnaqañat sipansa, Jehová Diosaruw jupar uñtʼapjjañapatak maysna (Mat. 5:44, 45). Awisajj jupanakar perdonañajj chʼamakïspawa, yamas jan wal lurchistu ukhajj jukʼamp chʼamäspawa. Ukampis jiwasatï colerasiñäni, chuyma ustʼat sarnaqañäni ukhajja, jiwas pachpakiw jan waltʼayasjjañäni (Sal. 37:8). Maynir perdonañ amttan ukhajja, jan wal luratas janiw chuyma ustʼata ukhamarak colerata sarnaqktanti (Efes. 4:31, 32). w21.04 págs. 8, 9 párrs. 3, 4

Maynejj congregacionat jaqsuta uñjasi ukhajja, familiapajj chuyma ustʼataw jikjjatasipjje. Familiap taypinkapkäna ukanakat walja angelanakajj jupa contra saytʼjjapjjäna ukhajja, Diosajj wali chuyma ustʼataw jikjjataspachäna (Jud. 6). Wali munat Israel markapajj kutin kutin jupa contra saytʼapkäna ukhajj wali llakitaw jikjjatasirakpachäna (Sal. 78:41). Familiamat maynejj Diosar jaytjje ukhajja, alajjpachankir Awkisajj wali llakitaw jikjjatasiraki. Kunjsa tʼaqesta uk amuyiwa, jupaw jumat khuyaptʼayasisajj chʼamañchtʼätam yanaptʼarakïtam. Mä munat wawapajj Jehová Diosar jaytjje ukhajja, kunampsa jan jaytañapatakejj luririskayäta sasaw walja awk taykanakajj jisktʼasipjje. Mä jilatajj akham sänwa: “Nayas juchanïkirista ukhamwa amuyasiyäta” sasa. Mä kullakajj ukhaman uñjasisajj akham sarakiwa: “¿Kunansa taykjamajj pantjaspachäta? Diosar munasiñapatakejj janiw yoqajarojj sum yatichkpachätti sasaw sapa kuti lupʼiyäta” sasa. w21.09 págs. 26, 27 párrs. 1, 2, 4

Testigonakat yaqhepanakajj akham sapjjewa: “Janiw wali uñtʼat escuelar Bibliat yatjjatañatakejj sarapkiti, ukhamajj janiw Bibliat yatichapjjañapajj wakiskiti” sasa. Ukampis ukajj cheqati janicha uk sum yatjjatapjjañapawa. Lucas qellqerejj uk lurañatakiw chʼamachasïna. Mä Evangelio janïr qellqkasajja, nayraqatajj ‘taqe ukanak qalltatpach sum yatjjatañatakiw’ chʼamachasïna. Qellqatap liytʼirinakajj kuntï Jesusat istʼapkäna uk ‘cheqaparjam sum yatipjjañapwa’ munäna (Luc. 1:1-4). Nayra Berea markankir judionakajj ukhamarakiw sum yatjjatapjjäna. Jesusat nayrïr kuti suma yatiyäwinak istʼasajja, Hebreo Arut Qellqatanak wali sum yatjjatapjjäna, ukhamat kuntï Jesusat istʼapkäna ukajj cheqati janicha uk yatiñataki (Hech. 17:11). Maynejj ukhamarakiw cheqapuniti janicha uk sum yatjjatañapa. Ukatakejj kuntï Testigonakajj yatichapki uk Bibliampiw igualtʼayañapa. Ukatjja Diosan markapajj jichha tiempon kunanaksa lurawayi ukwa yatjjatañaparaki. Ukham yatjjatasaw mayninakan jan wali parlatapamp jan apayaskaniti. w21.05 pág. 3 párrs. 7, 8

¿Congregacionan khitirus jiwasajj invittʼsna? Yaqhep jilat kullakanakajja, maran yaqhep urunakajj jupamp chikäsna ukhajj wal kusisipjjaspa. Sañäni, kawkïr jilat kullakanakantï familiapajj jan Testigöki ukanakatakejja, familiapajj markan costumbrenakap amtapki ukhajj jupanakatak wali chʼamäspawa. Yaqhepanakajja, yaqhep urunakajj wali llakitaw jikjjatasipjjaspa. Sañäni, sapa maraw kuna urutï mä familiarapajj jiwkäna uka urojj wali llakita jikjjatasipjjaspa, uka urunakan jupanakampïñatak tiempo apstʼastan ukhajja, jupanakat llakisitaswa uñachtʼaytanjja (Filip. 2:20). Jilat kullakanakajj kunaymaninakatwa awisajj sapakjam jikjjatasipjjaspa, ukampis akwa amtañasa: Jehová Diosajj kunjamas jikjjatastan ukjja sumwa yati. Ukatwa jilat kullakanak toqe yanaptʼistu (Mat. 12:48-50). Jiwasajja jilat kullakanakar yanaptʼañatak chʼamachasisaw Jehová Diosar yuspäratas uñachtʼaysna. Awisajj kunjamsay jikjjataskchiñänejja, Diosajj janiw sapak jaytkistuti, jupajj jiwasamp chikäskiwa. w21.06 pág. 13 párrs. 18-20

Yaqhep jaqenakajj janis Jesusar istʼañ munapkchïnjja, jan qarjtasaw kusisit yatiyaskakïna. Kunatï cheqäki uk jaqenakan yatipjjañap wakisitapwa yatïna, ukatwa waljanir yanaptʼañ munäna. Yaqhepajj qalltan janiw Diosan Reinopat istʼañ munapkaspänti, ukampis qhepat istʼjjapjjaspänwa, ukwa Jesusajj yatïna. Familiapampejj ukaw pasäna. Kimsa mara chikataniw Jesusajj aka oraqen predicäna, ukapachajj janiw ni mä jilapas discipulopäkänti (Juan 7:5). Ukampis jiwatat jaktjjäna uka qhepat cristianoruw tukjjapjjäna (Hech. 1:14). Predicktan ukanakat khitis Jehová Diosan serviripar tukuni uk janiw yatktanti. Yaqhepanakajj janiw kuntï yatichktan ukar jankʼak istʼapkiti. Jan istʼañ munapkistu ukanakajja, jiwasar sum sarnaqatas uñjasasa, jan qarjtas kusisita predikir uñjasas tiempompejj ‘Diosar jachʼañchjjapjjarakispawa’. w21.05 pág. 18 párrs. 17, 18

Jesusajj aka oraqenkkäna ukhajja, pä kasta luräwi discipulonakapar mayïna. Jupajj Reinon suma yatiyäwinakap predicapjjam sasaw säna, ukatsti kunjamsa uk lurapjjaspa ukwa uñachtʼayarakïna (Luc. 8:1). Jaqenakajj suma yatiyäwinak istʼapkani ukhajj kunsa lurapjjañapa, jan istʼañ munapkani ukhajj kunsa lurapjjañaparaki ukwa qhanañchtʼäna (Luc. 9:2-5). Ukatjja discipulonakapajj walja jaqenakaru, walja lugaranakanwa predicapjjañapäna, ukhamat “taqe markanakan yatipjjañapataki” (Mat. 24:14; Hech. 1:8). Taqe kuntï nayajj jumanakar yatichapksma ukanak phoqañ jaqenakar yatichapjjarakim sasaw Jesusajj discipulonakapar sarakïna. Kuntï Jesusajj maykäna ukajj jichha tiempokamaw lurasiñapäna, mä arunjja “akapachajj tukuskani ukapachkama” (Mat. 28:18-20). Apóstol Juanar mä visión toqe uñjaykäna ukanjja, taqe discipulonakapajj jaqenakar Diosat yateqañatak yanaptʼapjjaspa uk munatapaw qhan amuyasi (Apoc. 22:17). w21.07 pág. 3 párrs. 3, 4

Akapachanjja, walja jaqenakajj mayninakat sipan jilankkaspas ukham amuyasiñatakejj kuns lurapjjakiwa. Sañäni, empresani mä jaqejj empresapak mayninakat jilankañapatakejj mayninakaruw jan waltʼayaspa. Mä pelot anatiristi, atipañ laykojj aleqatwa mayni equipon anatiriparojj usuchjaspa. Mä yateqerejj wali uñtʼat universidadar mantañatakejj examenan trampwa lurarakispa. Ukanak lurañajj jan walïtap cristianonakajj yattanwa, kuna laykutejj ukanakajj ‘jañchin lurañanakapawa’ (Gál. 5:19-21). Congregacionanjja, yaqhep jilat kullakanakajj inas jan amuyasisa, atip atipa sarnaqañar chʼamañchasipkchispa. Ukanakat amuyasiñasawa. ¿Kunatsa? Ukham sarnaqaña utjaspa ukhajja, congregacionajj janiw mayachtʼatäjjaspati. Nayra tiempon Diosat jan jitheqtiri chachanakata warminakat yateqasipjjañäni, jupanakajj janiw atip atipa kuns lurapkänti. w21.07 pág. 14 párrs. 1, 2

Aynachtʼatanakar yanaptʼañatakejja munasirïñasawa jan jaytjasirïñasarakiwa. Jichhürunakan munasiri walja jilat kullakanakaw llakitäpki aynachtʼatäpki uka jilat kullakanakar yanaptʼasipki. Jilat kullakanakarojj wal munasipjje, ukatwa qhawqtï puedipki ukarjam yanaptʼañ munapjje (Prov. 12:25; 24:10). Ukham lurasaw Pablon ewjjtʼaparjam lurapjje, jupajj akham sänwa: “Llakitanakarus chuymachtʼapjjam, jan chʼamaninakarus yanaptʼapjjarakim, taqenirus pacienciampi uñjapjjam” sasa (1 Tes. 5:14). ¿Kunjamsa aynachtʼat mä jilataru jan ukajj mä kullakar yanaptʼsna? Awisajj istʼañakiw wakisi, jan ukajj ‘munassmawa’ sañakiw wakisi. Jehová Diosajja, valorani mä ovejapar yanaptʼañatakejj kunsa lurasktan uk uñjaskiwa. Proverbios 19:17 textojj akham siwa: “Khititï yanaptʼa munir jaqet khuyaptʼayaski ukajja Jehová Diosaruw maytʼaski, ukham luratapatjja Diosajj jupar kuttʼayjjaniwa” sasa. w21.11 pág. 10 párrs. 11, 12

¿Jutïritak wakichtʼasiñatakejj kunsa jichhatpach lursna? Kunatï jakañatak wakiski ukampejj kusisitakïñasawa, Jehová Diosan amigopäsajj wali kusisitäñasarakiwa. Jehová Diosar jukʼamp sum uñtʼañäni ukhajja, Magog oraqenkiri Gog sasin uñtʼatäki ukajj jiwas contra saytʼkani ukhajj Diosaw jarkʼaqestani sasaw confiyañäni. Jichhürutak ajllit textojja, kunatsa Davidajj Jehová Diosan yanaptʼapar confiyäna ukwa uñachtʼayistu. Davidajj Diosaruw confiyäna, Diosasti juparojj yanaptʼapunïnwa. Waynitükasajj Goliat sat filisteo jachʼa jaqempiw nuwasïna, juparojj akham sänwa: “Jichhürpachaw Jehová Diosajj amparajar jumar katuyätam” sasa (1 Sam. 17:46). Uka qhepatjja, Davidajj Saúl reyiruw servïna, Saúl reyisti juparojj walja kutiw jiwayañ munäna, ukampis Diosaw Davidampïskäna (1 Sam. 18:12). Niyakejjay Jehová Diosan yanaptʼap nayrajj katoqchïnjja, jichhajj jan walinakan uñjaskä ukhajj yanaptʼaskakitaniwa sasaw confiyäna. w22.01 pág. 6 párrs. 14, 15

Jehová Diosajj mä kuns luri ukhajj pacienciampiw luri, qhawqha tiempoy munaschi ukarjamaw luri. Sutip jachʼañchañataki, mayninakar yanaptʼañatakiw ukham luri. Kunjamsa jaqenakan jakasiñapatakejj aka oraqe jukʼat jukʼat wakichtʼäna uk uñjañäni. Bibliajja Jehová Diosaw ‘oraqen medidanakap uttʼayäna’, ‘columnanakap’ uchäna, ukat ‘esquin jachʼa qalap uchäna’ sasaw qhanañchi (Job 38:5, 6). Diosajj luratanakapat amuytʼañatakis tiempo apsusirakïnwa (Gén. 1:10, 12). Kunjamsa Jehová Diosajj taqe kunanak jukʼat jukʼat luräna ukanak uñjasajja, angelanakajj wal kusisipjjpachäna, ukatwa mä kutejj Diosar ‘jachʼañchañatakejj jachʼat arnaqasipjjäna’. ¿Kunsa yateqsna? Jehová Diosajj walja waranq maranakanwa aka oraqsa, warawaranaksa, kunanakatï aka oraqen utjki ukanaks luräna, ukatsti taqe luratanakap uñjasajja, ‘wali sumätapwa’ amuyäna (Gén. 1:31). w21.08 pág. 9 párrs. 6, 7

Mä uñachtʼäwinjja, Jesusajj jaya markar viajir jaqetwa parläna. Janïr sarkasajja, esclavonakapar jawsayasajj sapa mayniruw negocionak lurapjjañapatak talento qollqenak churäna. Maynirojj phesqa talento qollqe churäna, maynirusti paya, maynirusti mayaraki, qhawqtï sapa maynejj lurkaspa ukarjamaw churäna. Nayrïr pä esclavonakajja, uywiripatak jukʼamp qollqe ganañatakejj wal trabajipjjäna. Ukampis mä talento katoqeri esclavojj janiw kunsa uka qollqempejj lurkänti, ukatwa uywiripajj alisnukjjäna. Nayrïr pä esclavonakajj uywiripat katoqapkäna uka luräwjja, wali importantetwa uñjapjjäna, ukatwa uywiripatak wal trabajipjjäna. Ukham lurasajj qhawqtï katoqapkäna ukat sipansa, mä ukhampwa talento qollqenak ganapjjäna. Uk uñjasajj uywiripajj wal kusisïna, jukʼamp luräwinak katoqañatak wakichtʼatäpjjataps amuyarakïnwa. w21.08 pág. 21 párr. 7; pág. 22 párrs. 9, 10

Aka qhepa urunakanjja, Jehová Diosajj wali paciencianïtapwa uñachtʼayi. Jupajj janiw khitin jiwañapsa munkiti (2 Ped. 3:9). Ukampis pacienciapajj tukusiniwa. Khitinakatï jan arrepentisipkani ukanakajja, Moisesan tiempopan jakir faraón chachjamaw uñjasipjjani. Jehová Diosajj faraón chacharojj akham sänwa: “Jumarusa markamarus niyaw jan wali usunakamp castigañatakejj amparaj aytjjeriskayäta, niyarakiw jumarojj oraqet chhaqtayjjerismänjja. Ukampis aka laykuw nayajj jumar jakayasksma: chʼamaj jumar uñachtʼayañataki ukhamarak sutijajj taqe oraqpachan yatiyasiñapataki” sasa (Éx. 9:15, 16). Niyaw taqe markanakajj Jehová Dios sapak cheqa Diosätap yatipjjani (Ezeq. 38:23). Jichhürutak apstʼat texton thaljäwit parlki ukarjamajja, khitinakatï faraón chachjam Jehová Dios sapaki gobernañatak derechonïtapar jan iyawsapkani ukanakajj wiñayatak tukjataw uñjasipjjani. w21.09 págs. 18, 19 párrs. 17, 18

¿Mä munat familiaraman congregacionat jaqsutätap laykut chuyma ustʼatäskta? ¿Ukhaman uñjasisajj mayninakajj jukʼampikit arsutapamp chuym ustʼaytam? ¿Kunsa lurasma? Cheqas janiw taqenipunejj sum parlapkaniti (Sant. 3:2). Pantjasirïtas laykojja yaqhepajj kunjamats chuym ustʼayapunïtamwa, jan ukajj inas jan kamsañs puedipkchïtamti. Ukhajj Pablon aka arunakapatwa amtasiñama: “Maynitejj yaqha contra quejasiñatak razonanïchi ukhasa, maynit maynikam aguantasisipkakim, jumanakkamajj taqe chuyma perdonasisipkakim” sasa (Col. 3:13). Jaqsutäki ukan familiapar yanaptʼaskakiñäni. Jupanakajj munasiñamp uñjatäña, chʼamañchtʼatäñwa munapjje (Heb. 10:24, 25). Jaqsutanakan familianakapat yaqhepajja, jupanakamppachas jaqsutäpkaspa ukhamwa amuyasipjje. ¡Janipun ukham lurañäniti! Awkipa jan ukajj taykapajj jaqsutäki uka wayn tawaqonakajj chʼamañchtʼatäña felicittʼatäñwa munapjje. w21.09 pág. 29 párrs. 13, 14; pág. 30 párr. 16

Mä wayna jilatampi edadani mä jilatampi parltʼapjje ukhajja, panpachaniw chʼamañchtʼasipjje (Rom. 1:12). Wayna jilatajja, Jehová Diosajj jupat jan jitheqtas servirinakaparojj kunjamsa uñji ukarojj jukʼampiw confiyi, edadani jilatasti wali munatätapwa amuyasi, Diosajj kunjamsa bendisiwayi ukanak cuenttʼasajj wali kusisitarakiwa. Maynejj edadanëjje ukhajj inas nayrjam jan suma uñnaqtʼanëjjchiti. Ukampis Jehová Diosatakejja, sapa maratjamaw jupat jan jitheqtas servirinakapajj jukʼamp suma uñnaqtʼanïpjje (1 Tes. 1:2, 3). Diosan espiritupaw sapa maratjam jukʼamp suma jaqer tukupjjañapatak yanaptʼawayi. Edadani jilat kullakanakar jukʼamp uñtʼañäni, jupanakat jukʼamp yateqasirakiñäni ukhajja, jukʼamp valoranitwa uñjapjjañäni. Wayn tawaqonakajj edadani jilat kullakanakar valoranit uñjapjje ukhakejj janiw congregacionajj chʼamañchtʼatäkiti, jan ukasti edadani jilat kullakanakajj wayn tawaqonakar valoranit uñjapjje ukhaw chʼamañchtʼataraki. w21.09 pág. 7 párrs. 15-18

Janipun jan sinttʼasis juzgapjjañäniti, antisas Jehová Diosjam khuyapayasirïñatak chʼamachasipjjañäni, jupan “khuyapayasiñapajj wali jachʼawa” (Efes. 2:4). Jiwasatï khuyaptʼayasirïstanjja, janiw mayninakat aleqaki sinttʼaskañäniti, jan ukasti yanaptʼañatakejj kuns lurañäniwa. Familiansa, congregacionansa jan ukajj territorionsa khitirus yanaptʼsna uk taqeniw lupʼsna. Ukhamtï lurañänejja, kunayman toqenakat khuyaptʼayañ pueditaswa amuyañäni. ¿Khitich chuymachtʼatäñ munaski? ¿Janit manqʼa aparapisa jan ukajj yaqha ukhamanak lurasa yanaptʼksna? ¿Congregacionar kuttʼanjje uka jilatasa jan ukajj uka kullakas janit mä amigomp chʼamañchtʼatäña chuymachtʼatäña munki? ¿Suma yatiyäwinak janit yaqhanakar yatiyksna? (Job 29:12, 13; Rom. 10:14, 15; Sant. 1:27). Khitinakas khuyaptʼayatäñ munapjje uk amuytʼañäni ukhajja, kunayman toqenakat khuyaptʼayañ pueditaswa amuyañäni. Khuyapayasirïñäni ukhajja, Diosarojj wal kusisiyañäni. w21.10 pág. 13 párrs. 20-22

Salmo 23 ukanjja, Davidajj kunatï wali wakiskirïki ukanakwa ayti, mä arunjja Jehová Diosar Awatiripjam uñjatap laykojj kuna suma bendicionanaksa katoqäna ukanakwa ayti. Diosaw juparojj ‘cheqap thaknam irpäna’, walinsa jan walinsa janipuniw jaytanukkänti. Jehová Diosan ‘walja pastonakapansa’ jakkchïnjja, jan walinakan uñjasispänwa, Davidajj uk sumwa yatïna. Awisajj inas aynachtʼata jikjjatasisajj ‘wali chʼamak vallensa sarnaqkaspa’ ukham amuyaschïna, nayar uñisirinakas utjarakiniwa sasaw sarakïna. Ukampis niyakejjay Jehová Diosajj Awatiripächïnjja, Davidajj “janiw kuna jan walirus ajjsarkti” sasaw sarakïna. ¿Kunatsa Davidarojj janiw ‘kunas’ faltkänti sasajj sissna? Diosar serviñan janiw kunas faltkänti. Kusisitäñapatakejj janiw walja utjirinïñapajj wakiskänti. Kuntï Jehová Diosajj jupar churkäna ukampejj kusisitakïnwa. Davidatakejj Jehová Diosan bendicionap katoqaña, jupamp jarkʼaqatäñaw jukʼamp wakiskirïna. Kuntï Davidajj siskäna ukarjamajja, janiw wali utjirinïñajj taqe kunat sipans nayrankañapäkiti, ukwa yateqtanjja. w22.01 págs. 3, 4 párrs. 5-7

Nayra tiempotpachaw Diosan servirinakapajj jaqenakar predicapjjäna, ukampis waljaniw jan istʼapkänti. Sañäni, “kunatï cheqapäki uk yatiyiri” Noé chachajj walja maranakaw Diosat yatiypachäna (2 Ped. 2:5). Jupajja ‘jaqenakajj istʼapjjetaniwa’ sasaw amuyarakpachäna, ukampis Jehová Diosajj janiw ‘ukhamäniwa’ sasajj yatiykänti. Antisas kunjamsa arca lurani uka toqet qhanañchkasajj akham sänwa: “Arcarusti jumampi yoqanakamampi esposamampi ukhamarak yojjchʼanakamampiw mantapjjäta” sasa (Gén. 6:18). Diosajj luram siskäna uka arcajj kawkchʼäñapänsa uk yatisajja, jukʼa jaqenakakiw istʼapjjetani sasaw amuypachäna (Gén. 6:15). Ukhamapuniw pasäna. Uka jan wali lurir jaqenakat janiw maynis jupar istʼkänti (Gén. 7:7). ¿Noé chachajj janiw sum predickiti sasat Jehová Diosajj amuypachäna? Janiwa. Jupajja taqe kunanaktï Diosajj siskäna ukhampunwa luräna, ukaw Diosarojj wal kusisiyäna (Gén. 6:22). w21.10 pág. 26 párrs. 10, 11

Rut warmejj suegrapar ukham parlir istʼasajja, yanaptʼañatakejj taqe kunwa luräna, sañäni jupamp chikaw jachäna, chuymachtʼänwa, walja urunakaw jupamp chika viajirakïna. Ukhamäkchïnsa, “Jehová Diosajj chʼusa amparak kuttʼayanjjetu” sasaw Noemí warmejj säna. Rut warmejj jupamp chikäskchïnsa, Noemí warmejj janis yanaptʼap valoranit uñjkaspa ukhamänwa. Ukajj Rut warmirojj wal chuym ustʼaypachäna, ukampis suegraparojj janiw jaytjkänti (Rut 1:3-18). Llakita mä kullakar yanaptʼañatak chʼamachaskchiñänisa, inas kullakajj qalltan arunakapampi chuym ustʼaychistaspa. Ukampis janiw jankʼaki chuym ustʼayasiñasäkiti. Jupamp chikäskakiñasawa, Diosaruw kunjamsa chuymachtʼsna ukatakejj yanaptʼa mayiñasa (Prov. 17:17). Inas mä kullakajj yanaptʼatäñ qalltan jan munkchiniti. Ukampis munasirïña jan jaytjasirïñaw jupamp chikäskakiñatak yanaptʼistani (Gál. 6:2). w21.11 págs. 11, 12 párrs. 17-19

Biblian santo aru uñstki ukajja, sarnaqatasansa Diosar servitasansa qʼomäña sañwa muni. Uka arojj yaqhachatäña jan ukajj Diosar serviñatak yaqhachatäña sañwa munarakispa. Mä arunjja, sarnaqatasan qʼomäñäni, Jehová Diosajj kunjamtï munki ukarjam jupar serviñäni, Jupampis wali sum apasiñäni ukhakiw santo jaqëñäni. Jehová Diosajj wali santo Diosawa, jiwasajj pantjasir jaqekïtanwa, ukhamäkchisa amigopäsnawa. Jehová Diosajj taqe kunanwa qʼoma Diosajja. Tronop jakʼankapki uka yaqhep serafín angelanakajja, akham sapjjänwa: “Ejercitonakan Jehová Diosapajja santo, santo, santo Diosawa” sasa (Is. 6:3). Uka angelanakatï jan santöpkaspajja, janiw Diosampejj ukham sum apasipkaspati. w21.12 pág. 3 párrs. 4, 5

Walja wayn tawaqonakaw jakäwipat llakisipjje. Yatichirinakapasa, jan Testigöpki uka familiaranakapasa, universidadar sarapjjañapataki, suma trabajo jikjjatapjjañapataki, walja qollqe ganapjjañapatakiw jupanakar chʼamañchapjjaspa. Ukampis yateqañ utanakar sarasajj janiw tiemponëjjapjjaspati. Maysa toqetjja, awk taykanakapasa, congregacionankir jilat kullakanakas Jehová Diosar servipjjañapatakiw chʼamañchapjjarakispa. ¿Diosar munasir wayn tawaqonakarojj kunas suma amtar puriñatak yanaptʼaspa? Jupanakajja Efesios 5:15-17 texto liytʼapjjaspa. Uka toqet lupʼisajj “‘¿kun lurañajsa Jehová Diosajj muni?’, ¿kuna amtar puriñajas jupar kusisiyani?, ¿kuna amtar puriñas jan ina chʼusar tiempo aptʼasiñatak yanaptʼitani?” sasaw jisktʼasipjjaspa. ‘Jan wali urunakanwa jakastanjja’, Supayan apnaqat akapachas niyaw tʼunjatarakïni, uk jan armasiñäniti. w22.01 pág. 27 párr. 5

¿Kunapachas Santiagojj Jesusan jan jitheqtiri discipulopäjjäna? Jesusajj jaktanjjäna uka qhepatjja, “Santiagoruw uñstäna, ukatjja taqe apostolonakaruw uñstarakïna” (1 Cor. 15:7). Jesusajj jilapar uñstäna uka qhepatwa Santiagojj discipulopäjjäna. Jesusan apostolonakapajj Jerusalenan mä altus utankasipkäna ukhajja, Santiagojj jupanakamp chikaw espíritu santo katoqañ suyaskäna (Hech. 1:13, 14). Qhepatjja, Santiagojj nayrïr patak maranakan utjkäna uka cuerpo gobernante taypinwa servïna (Hech. 15:6, 13-22; Gál. 2:9). Janïra 62 maräkäna ukhajja, Diosan amuytʼayatäsajj ajllit cristianonakaruw mä carta qellqäna. Uka cartajja, alajjpachar sarañataki suytʼäwinïkstansa, jan ukajj aka oraqen jakañatak suytʼäwinïkstansa taqeniruw yanaptʼistu (Sant. 1:1). Historia toqet yatjjatata Josefo sat chachan aruparjamajja, Ananías judío jachʼa jilïr sacerdotew Santiagor jiwayañapatak mayïna. Santiagojj aka oraqen jakäwip tukuyañkamaw Jehová Diosar jan jitheqtas servïna. w22.01 pág. 9 párrs. 3, 5

Jichhürutak apstʼat textorjamajja, Jehová Diosaw yantʼanakat jarkʼaqaskitani sasajj janiw suyañasäkiti. Jesusjamarakiw Diosar jan jitheqtas serviñasa, jiwañ wakischini ukhasa janiw jitheqtañasäkiti (Mat. 16:24, 25). Ukampis Jehová Diosajj janiw kuntï jan aguantirjamäktan ukat jukʼampi yantʼatäñas munkaniti (1 Cor. 10:13). Inas Jesusjam ina chʼusat tʼaqesiyata uñjasirakchiñäni (1 Ped. 2:19, 20). Jaqenakajj janiw jan wali luratasat jiwas conträpkiti, jan ukasti jan akapachankirïtasata, kunatï cheqäki uk predicatasatwa jiwas conträpjje (Juan 17:14; 1 Ped. 4:15, 16). Kunatsa Jehová Diosajj tʼaqesiñat jupar jan jarkʼaqkäna uk Jesusajj yatïnwa. Ukampis Diosar jan jitheqtas servirinakapat yaqhepajja, jan walin uñjasisajj ¿kunatsa Diosajj ukhamak uñchʼukitu? sasaw jisktʼasipjje (Hab. 1:3). Jehová Diosajj khuyaptʼayasiri pacienciani Diosawa. Janis jupar confiyapkaspa ukham janiw jupanakat amuykiti, jan ukasti jupaki churkaspa uka chuymachtʼäwi munapjjatap yatiwa (2 Cor. 1:3, 4). w21.04 pág. 11 párrs. 9, 10

Jehová Diosarojj munañaparjam munasiñampi respetompi adorañäni ukhajja, jupajj katoqtʼasiniwa. Juparukiw adorañ muntanjja, ukatwa jupar wali sum adorañasa. Mä toqet orasisaw jupar adortanjja. Oracionanakasajj inciensor uñtasitawa sasaw Bibliajj qhanañchi, qalltanjja inciensojj tabernaculonwa loqtasirïna, qhepatsti templonwa loqtasjjarakïna. Uka inciensojja, Jehová Diosatakejj chuymar purtʼkirïnwa. Janisay mayninakjam wali suma arunakamp oraskchiñänejja, chuymatpach orasiñäni ukhajja ukhamarakiw Diosajj ‘wal kusisini’ (Prov. 15:8; Deut. 33:10). Oraskasajj qhawqsa jupar munastan uk sistan, yuspäraraktan ukhajj Jehová Diosajj wal kusisi. Kunanaksa muntan, kunanakas llakisiyistu, kunsa jutïrit suytʼasktan uka toqet jupamp parlsna ukjja, wal jupajj muni. Ukhamajj janïr oraskasajj ¿kamsañänisa uka toqet sum amuytʼañajj janit wakiskaspa? Ukhamtï lurañänejja, alajjpachankir Awkisarojj wali suma “incienso” loqtañäni. w22.03 pág. 20 párr. 2; pág. 21 párr. 7

Armagedonanjja khitis Jehová Diosamp khuyaptʼayatäñapa, khitis janiraki uk amtañajj janiw jiwasar waktʼkistaniti (Mat. 25:34, 41, 46). ¿Ukapachajj Diosar confiyañäniti jan ukajj kuntï amtkani ukamp jan acuerdösajj janich jupar sirvjjañäni? Jutïrin jan payachasis Jehová Diosar confiyañatakejja, jichhaw jupar jukʼamp confiyañatak chʼamachasiñasa. Diosan machaq mundopan wal kusisiñäni. Janiw falso religionasa, qollqe chuyma jaqenakasa, ni jaqenakar tʼaqesiyir gobiernonakas utj-jjaniti. Janirakiw usuntañasa awkiptañas utj-jjaniti, munat familiaranakasas janirakiw jiwjjapjjaniti, Supayampi demonionakapampejj 1.000 maranakaw jistʼantatäpjjani. Supayana demonionakapan Dios contra saytʼasipjjatap laykojj kuna jan walinakatï utjawayki ukanakajj chhaqtjjaniwa (Apoc. 20:2, 3). Kunjamsa Jehová Diosajj taqe kuns luri ukar confiyatasatjja, ¡walpun kusisiñäni! w22.02 págs. 6, 7 párrs. 16, 17

Jesusajj sumankañ thaqerïna, jan waltʼayasipki ukanakarus uk askichapjjañapatakiw chʼamañchirïna. Diosajj ofrendanakap katoqañapatakejja, jilapampiw maynejj nayraqat sumankthapiñapäna, ukwa Jesusajj yatichäna (Mat. 5:23, 24). Apostolonakapajj khitis jilïrejja uka toqet chʼajjwapjjäna ukhajja, kutin kutiniw Jesusajj jan ukham chʼajjwapjjañapatak chʼamañchäna (Luc. 9:46-48; 22:24-27). Sumankañ thaqañatakejja janiw jan walinak utjayañasäkiti. Sumankthapiñwa nayraqat thaqañasa, jilat kullakanakasarus sumankthapipjjañapatakiw chʼamañchtʼañasaraki (Filip. 4:2, 3; Sant. 3:17, 18). Akhamwa jisktʼassna: “¿Mayninakamp sumankthapiñatakejj kuna sacrificionaksa lurtjja? Mä jilatatï jan ukajj mä kullakatï chuym ustʼaychistojja, ¿jupatak coleratakïskti? ¿Chuym ustʼaykitu ukaw sumankthapiñatakejj nayraqat jutañapa sasat sistjja? Jan ukajj mayniw juchani sasas amuykstjja, ¿nayat jupamp nayraqat sumankthapiñ thaqtjja?” sasa. w22.03 pág. 10 párrs. 10, 11

Jehová Diosan markapajja, taqe chuymaw Jesusan pʼeqtʼatajj Jupar servini sasaw Bibliajj jaya tiempökipan säna (Sal. 110:3). Uka profeciajj jichha tiemponwa phoqasiski. Jehová Diosan servirinakapajja, sapa maraw jan khitin obligata walja millón horanaka taqe chuyma predicapjje, uk lurapjjatapat janiw khitis jupanakar pagkiti. Jupanakajja jilat kullakanakapar jañchi toqet yanaptʼañataki, chʼamañchtʼañataki, Diosar serviñan yanaptʼañatakiw tiempo apstʼasipjje. Ancianonakasa siervo ministerialanakasa walja horanakaw asignacionanakap wakichtʼasiñatakisa, jilat kullakanakar chʼamañchtʼañatakis tiempo apstʼasipjje. Jupanakajj Jehová Diosaru, jaqe masipar munasipjjatap laykuw taqe ukanak lurapjje (Mat. 22:37-39). Jesusajj jupa pachpat llakisiñat sipansa, mayninakatwa llakisïna, cristianonakajj jupat yateqasiñatakiw wal chʼamachasiñasaraki (Rom. 15:1-3). Ukham lurañäni ukhajja, walja askinakwa jikjjatañäni. w22.02 pág. 20 párrs. 1, 2 

Israel markan jilaparte jaqenakajj yapu lurañanwa trabajipjjerïna, ukampis trabajirinakarojj uru tukuyaruw pagapjjerïna. Mä trabajirejj pagop jan katoqkäna ukhajja, familiapar uka uru manqʼayañatakejj janiw qollqenëjjänti. Jehová Diosajj akham sänwa: “Uka jaqejj pobrewa, uka pagompikiw jupajj jakasiraki” sasa (Deut. 24:14, 15; Mat. 20:8). Jichha tiemponjja jilaparte jaqenakajj janiw pagop sapüru katoqapkiti, jan ukasti phajjsin mä kuti jan ukajj pä kutiw katoqapjje. Ukampis Levítico 19:13 texton yatichäwipajj jichhüruns yanaptʼaskakistuwa. Yaqhepajja, trabajirinakapar jukʼak pagasaw jupanakat aprovechasipjje, kuna laykutejj ‘yaqha trabajo jan utjipan jukʼak pagatas trabajisipkakiniwa’ sasaw amuyapjje. Mä arunjja, jefenakajj ‘jurnäla trabajir jaqen pagopwa’ katuntasisipki. Mä cristianotï negociopan trabajirinakanïchi ukhajja, taqe chuymaw uka ewjjtʼar istʼañapa. w21.12 pág. 10 párrs. 9, 10

Lawan chʼakkatatäsajj Jesusajj wal usuyasïna, ukatwa umat wal pharjayaspachäna. Um churapjjañapwa munäna. Jesusajj kunansa yanaptʼatäñ muntan uk sañajj janis walïkaspa ukham janiw amuykänti, jiwasajj ukhamarakiw yanaptʼa mayiñ jan ajjsarañasäkiti. Kunansa yanaptʼatäñ muntan uk mayninakar sañajja, jila partejj chʼamakïspawa. Ukampis yanaptʼa munkañäni ukhajja, mayninakar jan ajjsaras mayipjjañäni. Sañäni, edadanëjjstan jan ukajj usutästan ukhajj mä amigoruw alasir sarañatakisa, doctoran ukar sarañatakis yanaptʼap maysna. Llakitästan ukhajja, mä jilïr irpiriru, jan ukajj confiykay jilataru jan ukajj kullakaruw jiwasar istʼañapataki, ‘suma arunakampi’ chʼamañchtʼañapatak maysna (Prov. 12:25). Jilat kullakanakajj wal munasipjjestu, ‘llakisiñ horasans’ wal yanaptʼañ munapjjarakistu (Prov. 17:17). Ukampis kunas llakisiyistu, kunansa yanaptʼatäñ muntan uk janiw yatipkiti, ukatwa yanaptʼa katoqañatakejj jupanakar yatiyañasa. w21.04 págs. 11, 12 párrs. 11, 12

Jakäwin cambionakajj utji ukhajja, waljanitakejj janiw faciläkiti. Yaqhepajja walja maranak betelana, precursor especialata, jan ukajj yaqha ukhamanakan servisajj yaqha asignación katoqawayapjje. Yaqhepajj jilïrëjjapjjatap laykuw wal gustkäna uka privilegiop jaytawayapjje. Ukhamanakan uñjassna ukhajj llaktʼassnawa. Jiwasatï Jehová Diosjam amuyañatak chʼamachasiñäni ukhajja, uka cambionakar yatinoqtañajj janiw chʼamäkaniti. Diosajj wali musparkañanakwa jichha tiempon luraski, ukan yanaptʼañajj jiwasatakejj mä jachʼa privilegiowa (1 Cor. 3:9). Diosajj qhawqsa munasistu ukajj janipuniw cambykiti. Ukhamajj jiwasarutï mä asignacionat cambiapjjchistojja, kunatsa uka cambiojj utjpacha sasajj janiw llakisiñasäkiti. “Nayra tiempojj jichhat sipansa jukʼamp sumän[wa]” sasin llakisiskañat sipansa, jichhajj servisktan ukan kuna sumanakas utji uk amuyañatakiw Diosar yanaptʼa mayisiñasa (Ecl. 7:10). Jakañ vidasajj cambionakajj utjkani ukhajj kusisitakïskañasawa, Jehová Diosar jan jitheqtas serviskakiñas wali importantewa. w22.03 pág. 17 párrs. 11, 12

¿Diosajj khitinakarus munasiñat jan jaytjasirïtap uñachtʼayi? Waljanakaruw munastanjja sasaw Bibliajj qhanañchi, sañäni: ‘Cheqañchäwiru’, ‘yatiñaru’, ‘vinoru aceiteru’ ukat yaqha ukhamanakampiru (Prov. 12:1; 21:17). Ukampis jaqenakarukiw munasiñat jan jaytjksnati. Ukhamajj ¿taqenirut Diosajj munasiñat jan jaytjasirïtap uñachtʼaypacha? Janiwa, jupamp wali sum apasipki ukanakarukiw uñachtʼayi. Diosasajj amigonakaparojj munasiñampiw uñji, janirakiw jaytanukkiti, jupanakatakejj wali suma amtaniwa. Jehová Diosajj taqe jaqenakaruw munasiñamp uñjistu. Jesusajj Nicodemor akham sänwa: “Diosajj [taqe jaqenakar] wal munatap laykuw mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” sasa (Juan 3:1, 16; Mat. 5:44, 45). w21.11 pág. 2 párr. 3; pág. 3 párrs. 6, 7

Akapachan jakañajj chʼamakiwa, inas jutïrin jukʼamp jan walinakan uñjaschiñäni (Mat. 24:21). Cheqas taqe ukanakajj tukusjjaniwa, janiw mayampsa amtjjañäniti (Is. 65:16, 17). Ukhamajj aguantañ yateqaskakiñasawa. ¿Kunatsa? Jesusajj uka toqet akham sänwa: “Aguantapjjatam laykojj jakañanakamsa salvasipjjätawa” sasa (Luc. 21:19). ¿Kunas ukatakejj yanaptʼistaspa? Jiwasjam jan walinakan uñjasipki ukanakajj kunjamsa aguantapjje ukanakatwa lupʼiñasa. ¿Aguantañ toqet khitis suma yateqaskayajja? Jehová Diosawa, inas jupat jan lupʼkchiyätanti, ukampis ak amuytʼañäni. Akapachjja Supayaw apnaqaski, ukatwa kunayman jan walinakajj utji. Jehová Diosajj taqe uka jan walinak jichpachaw tukjaspa, ukampis kuna urutï tukjañ amtki uka uru puriniñap pacienciampiw suytʼaski (Rom. 9:22). Uka uru puriniñapkamajj Diosajj aguantaskakiwa. w21.07 pág. 8 párrs. 2-4