Octubre

Kuntï yatichktan ukhamarak creyktan ukajj Bibliarjamawa. Ukampis Diosarojj janiw costumbrenak lurasa sirvktanti, janirakiw kuntï jaqenakajj istʼañ munapki ukarjamas yatichktanti, ukatwa waljanejj Jehová Diosan markapat pächasipjje. ¿Kunas jan pächasiñatak yanaptʼistaspa? Apóstol Pablojj Romankir cristianonakar akham sänwa: ‘Yatiyäwinak istʼki ukhakiw maynejj ukar confiyaspa. Maynejj Cristot yatiyki ukhakiw uka yatiyäwinakajj istʼasiraki’ sasa (Rom. 10:17). Religionanakan costumbrenakapajj janiw Bibliarjamäkiti. Ukhamajj ukar mitisiñajj janiw Diosar confiyañatak yanaptʼkistaniti, antisas Bibliat yatjjatañasawa, ukaw Diosar jukʼamp confiyañatak yanaptʼistani. Diosar confiyañatakejj jupar sumwa uñtʼañasa, ¿kunatsa? “Maynitejj Diosar jan confiykaspajja, janiw kunäkipansa Diosarojj kusisiykaspati” (Heb. 11:1, 6). Ukhamajja cheqa thakinkatasat jan pächasiñatakejj janiw musparkañ señalanak uñjañ suyañasäkiti. Antisas Bibliat yatjjatañasawa, ukaw Diosar jukʼamp confiyañatakisa jan pächasiñatakis yanaptʼistani. w21.05 págs. 4, 5 párrs. 11, 12

Apóstol Pablojj kunayman jan walinakanwa uñjasïna. Jawqʼjata, qalampi kʼupjata ukat carcelar llawintata uñjaskäna ukhajja, Diosan yanaptʼapwa munäna (2 Cor. 11:23-25). Janis Diosatakejj valoranïkaspa ukhamaw awisajj jikjjatasïna, uk sañ janiw pʼenqaskänti (Rom. 7:18, 19, 24). ‘Chʼapir uñtataw’ mä usojj jupar tʼaqesiyäna, uk apaqañapatakiw Jehová Diosar wal mayisïna (2 Cor. 12:7, 8). Pablojj jan walinakansa uñjaskchïnjja, Jehová Diosaw predicaskakiñapatakejj chʼam churäna. Roma markan mä utan jistʼantatäkäna ukhajja, taqe chuymaw judionakan pʼeqtʼirinakap nayraqatan suma yatiyäwinak arjjatäna (Hech. 28:17; Filip. 4:21, 22). Roma marka apnaqeri reyin guardianakaparusa, jupar visitir jutapkäna ukanakarus predicarakïnwa (Hech. 28:30, 31; Filip. 1:13). Uka pacharakiw Diosajj cartanak qellqañapatak Pablor amuytʼayäna, uka cartanakajj nayrïr cristianonakarojj wal yanaptʼäna, jichha tiemponsa ukhamarakiw yanaptʼistu. w21.05 pág. 21 párrs. 4, 5

Uzías reyejj jachʼa jachʼa tukutapatwa kunatï jupar jan waktʼkäna uk luräna, cheqañchatas janirakiw istʼkänti. Uka chachajj walja guerranakwa atipjäna, walja markanakwa lurayäna, uywanakapas yapunakapas waljaw utjarakïna. ‘Jehová Diosajj jupar bendisïnwa’ (2 Crón. 26:3-7, 10). Ukampis ‘reinopan wali chʼamanëjjatapat jachʼa jachʼaw tukjjäna, uka laykusti aynachtʼañaruw purjjäna’ sasaw Bibliajj qhanañchi. Sacerdotenakakiw templon incienso loqtapjjañapäna, ukampis Uziasajj jachʼa jachʼa tukusajj incienso loqtañatakiw templor mantäna. Diosarojj janiw ukajj gustkänti, ukatwa lepra usump castigäna (2 Crón. 26:16-21). ¿Jiwasajj Uziasjamarakit jachʼa jachʼa tuksna? Jïsa, jiwas pachpatak llakisisaw ukhamar purtʼassna. Kun lurañtï yatktan, kuna privilegionaktï congregacionan katoqktan ukajj Diosatwa juti (1 Cor. 4:7). Jiwasatï jachʼa jachʼa tukuñäni ukhajja, Jehová Diosajj janiw kuna luräwsa churkistaniti. w21.06 pág. 16 párrs. 7, 8

Jesusajja discipulonakapajj janiw predicacionan suma experiencianakpun sapa kuti jikjjatapkaspänti uk yatïnwa. Jesusan discipulonakapar istʼapkäna ukanakat qhawqhanis cristianor tukupjjäna uk janiw yatktanti. Jupanakajj janiw jaqenakan istʼapjjatap laykuki kusisipjjañapäkänti, jan ukasti chʼamachasipjjatapajj Diosar kusisiyatap yatisaw kusisipjjañapäna. Predicaskakiñäni ukhajj wiñay jakañwa katoqañäni. Suma yatiyäwinak predicañataki, yatichañataki chʼamachastan ukhajj ‘espíritu santomp irpayasisaw’ phawasktanjja, ukham lurasajj espíritu santompiw jakäwisan yanaptʼayasisktanjja. Janisay maynirus bautisasiñapatak yanaptʼkchiñänejja, ‘jan qarjtkañäni’ ukhajj wiñay jakañwa Jehová Diosajj churistani (Gál. 6:7-9). w21.10 pág. 26 párrs. 8, 9

Mä kutejja, Jesusampi discipulonakapampejj wal predicapjjatap laykojj wali qaritäjjapjjänwa, ukatwa samartʼañatakejj yaqha cheqar sarjjapjjäna. Ukampis walja jaqenakaw ukan suyasipkäna. Jupanakat sinttʼasisasti, Jesusajj “kunayman toqenakat yatichañwa qalltäna”. Kunjamas uka jaqenakajj jikjjatasipjjäna uk amuyasajj yanaptʼañwa munäna. Jupanakajj wal tʼaqesitapa, mä suytʼäwi munapjjatapwa yatïna. Jichha tiemponjja, jaqenakajj kusisitjamäpkchisa, jan walinakan uñjasisajj ukhamarakiw mä suytʼäwi munapjje. Jupanakajj jan awatirini, ananukuta, chhaqat ovejanakjamäpjjewa. Apóstol Pablojja, jan suytʼañani, Diosar jan uñtʼasa, ukhamaw jakapjje sasaw säna (Efes. 2:12). Territoriosankir jaqenakan Diosar uñtʼapjjañapajj kunja wakiskirisa uka toqet lupʼtan ukhajja, jupanakar munasisa sinttʼasisajj wal yanaptʼañ muntanjja. Bibliat yatichañatak invittʼasaw jupanakar yanaptʼsna. w21.07 pág. 5 párr. 8

Jachʼa jachʼa tukur jaqejja, jupatakikiw taqe kuns muni. Ukham jaqejja janiw kunatï yaqhan utjki ukak munkiti, jan ukasti kunapatï maynin utjki uk apaqañwa munaraki. Cheqas maynir envidiasiñajj jupar uñisiñampi sasiwa. Wali wal tukuñampi envidiasiñampejja, kunanakatï avionan combustiblepar qʼañuchki ukampi sasiwa. Uka qʼañunakajj avión jalkipan combustiblen mangueranakap taptʼaspa ukhajja, avionajj jalaqtjjakispawa. Maynin chuymapantï wali wal tukuña envidiasiñajj utjani ukhajja, ukhamarakiw Jehová Diosar mä qhawqha tiempo sirvkasajj aynachtʼjjani (Prov. 16:18). Jehová Diosar janiw sirvjjaniti, jupa pachpaw jan waltʼayasini, mayninakarus jan waltʼayarakiniwa. Apóstol Pablon ewjjtʼaparjam lurañäni ukhajja, wali wal tukuñar atipjañäniwa. Jupajj sänwa: “Jan kunsa jumanakajj jiskhisiñ laykusa ni wali wal tukuñ laykus lurapjjamti, jan ukasti mayninakarojj humilde chuymamp uñjapjjam” sasa (Filip. 2:3). w21.07 págs. 15, 16 párrs. 6-8

Yaqhep jaqenakajj cheqa religionajj taqe jisktʼanakaruw qhanañchañapa, Biblian jan sum qhanañchaski ukanakarus wali sum qhanañchañapawa sasaw amuyapjje. ¿Ukham amuyañajj walikïskiti? Kunsa Pablojj luräna uk uñjañäni. “Taqe kunas ukhamapunïskiti janicha ukjja sum amuykiptʼapjjam” sasas cristianonakar siskchïnjja, janiw taq entiendkti sarakïnwa (1 Tes. 5:21). “Janiw phoqatpach yatktanti”, “metalat lurat mä espejotsa uñjksna ukhamwa jiwasajj chhayphu chhayphuk uñjtanjja” sasaw säna (1 Cor. 13:9, 12). Pablojj janiw taqe kun yatkänti, jiwasas janirakiw yatktanti. Ukampis kuntï Bibliajj Diosat yatichki uk yatïnwa, cheqa yatichäwinakar confiyañatakejj qhawq yatiñapas wakisi uks yatirakïnwa. ¿Cheqa yatichäwinakat jan pächasiñatakejj kuns lursna? Diosar kunjam adorañtï Jesusajj yatichkäna ukjja, jichha tiempon kunjamsa Testigonakajj adorapjje ukampwa igualtʼaysna. w21.10 págs. 18, 19 párrs. 2-4

Edadani jilat kullakanaka, precursoratsa servisipksta janisa, mayninakarojj wal yanaptʼapjjasma. Jichhajj servisipkta ukan kusisita serviñ yateqasa, kunanaktï lurapkasma ukanak lurañ amtasa, qhawqtï lurañ puedipkta ukanak lurasaw yanaptʼapjjasma. Davidajj Jehová Diosatak mä templo lurañ munäna, ukampis Salomón yoqamaw lurani sasin Diosajj säna ukhajj istʼänwa, taqe chuymaw yoqapar yanaptʼarakïna (1 Crón. 17:4; 22:5). Yoqajajj waynakïskiwa, janiw experiencianïkiti, nayaw uka uta lurañaja sasin janiw siskänti (1 Crón. 29:1). Jehová Diosan bendicionapampikiw uka utajj lurasispäna, janiw lurañan pʼeqtʼapki ukanakan jila maranïpjjañapasa, experiencianïñapas wakiskapunïnti. Jichhürunakanjja edadani jilatanakajj Davidjamarakiw Diosatak wal trabajisipkaki. Nayrajj lurapkäna ukjja wayna jilatanakaw lurjjapjje, Diosaw jupanakar yanaptʼaskani sasaw amuyapjje. w21.09 pág. 9 párr. 4; pág. 10 párrs. 5, 8

Mä kun phoqañ amtampi Jehová Diosar sirvtan ukhajja, kusisitaw jakastanjja. Ukampis uka amtanakajj qhawqtï lurañ puedktan ukarjamäñapawa, janiw mayninakan amtapar arkañasäkiti. Ukhamtï lursnajja aynachtʼsnawa, llakisiraksnawa (Luc. 14:28). Diosan familiapanjja sapa mayniw wali valoranïtanjja, janiw jiwasar uñtasitajj khitis utjkiti. Jehová Diosajj janiw mayninakat sipan jukʼamp sum lurañ yatitasat markapar irpankistuti, jan ukasti humildëtasata, jupat yatiñ munatasata, cambiañ munatasatwa irpanistu. Jupar serviñatak qhawqtï lurañ puedktan ukarjam chʼamachasitasat wal kusisi. Aguantatasasa, jupar jan jitheqtas servitasas ‘suma chuymanïtaswa’ uñachtʼayi (Luc. 8:15). Ukhamajj kunatï jiwasat jukʼamp sumäki uk Diosar churaskakiñäni. Ukhamtï lurañänejja, kuntï jiwas pachpajj lurktan ukat kusisiñäniwa (Gál. 6:4). w21.07 pág. 24 párr. 15; pág. 25 párr. 20

Cheqaparjam kun lurasiñapatakejj paciencianïñaw wakisi. Sañäni, mä jilatana jan ukajj mä kullakan jachʼa juchar purtʼasitap ancianonakajj yatipjje ukhajja, Diosaruw “alajjpachat jutki uka yatiña” mayipjje, ukhamat kunjamtï jupajj uñjki ukham uñjañataki (Sant. 3:17). Ancianonakajj juchar purtʼasirirojj ‘pantjat thakipat kuttʼaniñapatakiw’ yanaptʼañ munapjje (Sant. 5:19, 20). Congregacionarus jan walit jarkʼaqañataki, llakitäpki ukanakar chuymachtʼañatakis chʼamachasipjjarakiwa (2 Cor. 1:3, 4). Maynin jachʼa juchar purtʼasitap yatisajja, uka toqet sumwa yatjjatapjjañapa, ukatakejj tiempow munasi. Ukatjja orapjjañapawa, Bibliampiw wali amuyump ewjjtʼapjjañapa, ‘kawkikamatï wakiski ukhakamaw’ cheqañchapjjañapa (Jer. 30:11). Janiw wali apurat uk lurapjjañapäkiti. Diosan ewjjtʼaparjam lurapjjani ukhajja, congregacionarojj wal yanaptʼapjjani. w21.08 pág. 11 párrs. 12, 13

Israel markan manqʼat pistʼañ utjatapatwa Noemí warmimpi esposopampi, ukat pä yoqanakapampejj Moab oraqeru sarjjapjjäna. Ukansti esposopaw jiwjjäna. Pä yoqanakapajj casarasjjapjjänwa, ukampis jupanakas jiwjjapjjarakïnwa (Rut 1:3-5). Ukham jan walinakan uñjasisajja, Noemí warmejj jukʼampiw aynachtʼjjäna. Ukham llakimp wali aynachtʼatäsajja, Diosajj jupa conträkaspas ukhamwa amuyjjäna. Akham sarakinwa: “Jehová Diosajj naya contrawa”, ‘Taqe Chʼamani Diosajj llakinakampiw nayar aynachtʼayitu’, “jupaw llakinakan uñjasiyitu” sasa (Rut 1:13, 20, 21). “Yatiñani mä jaqejj tʼaqesiyat uñjasisajj loqheraspawa” uk Diosajj yatiwa (Ecl. 7:7). Ukampis Rut toqew yanaptʼäna, jupajj munasiñat janiw Noemí warmir jaytanukkänti, khuyaptʼayasisajj munasiñampiw yanaptʼäna, ukhamatwa Noemí warmejj kusisitäjjäna, Diosajj jupar munasiskatapsa amuyjjarakïnwa. w21.11 pág. 9 párr. 9; pág. 10 párrs. 10, 13

Jiwasatï Jehová Diosar serviñan wal chʼamachasiskstan ukhajja, janis jukʼamp chʼamachasiñasajj wakisjjaspa ukham janiw amuyañasäkiti. Antisas sum predicañatakisa, sum yatichañatakisa, jilat kullakanakar yanaptʼañatakis kunas yanaptʼistaspa ukanak lurañwa amtsna. Jiwasatï amuytʼasirïñäni, humilde chuymanïñäni, jiwasatak llakisiñat sipansa mayninakar yanaptʼañat llakisiñäni ukhajja, uka amtanakas phoqañäniwa (Prov. 11:2; Hech. 20:35). ¿Kunanak lurañsa jiwajj amtsna? Kuna amtanaktï phoqañ puedksna uk yatiñatakejj Jehová Diosaruw yanaptʼa mayiñasa (Prov. 16:3). ¿Janit precursor auxiliarata, precursor regularata, Betelana jan ukajj construccionan serviñ amtksna? ¿Janit jukʼamp jaqenakar predicañatak yaqha aru yateqksna, jan ukajj kawkjantï yanapajj munaski ukar yanaptʼiris sarksna? w21.08 pág. 23 párrs. 14, 15

Jehová Diosatakejj munasirïñasa ukat jan jaytjasirïñas wali wakiskiriwa (Os. 6:6). Miqueas profetap toqejja, ‘munasiñaru jan jaytjasiñaru munasiñaswa’ mayistu (Miq. 6:8, nota). Ukatakejja ukajj kamsañsa muni uk yatiñasawa. Machaq Mundon Jakirinakataki sat Biblianjja, mä 230 kutiw ‘munasirïtapa jan jaytjasirïtapa’ sat arunakajj uñsti. ¿Uka arunakajj kamsañsa muni? Uka Biblian glosariopan akham siwa: “Ukham munasiñajja, mä compromiso phoqañampi, taqpach chuymampi Diosar serviñampi, jan jaytjasiñampi, taqe chuym maynir mayachasis munasiñawa. Jilapartejj qhawqsa Diosajj jaqenakar munasi uka toqet parlañatakiw apnaqasi” sasa. Munasirïña jan jaytjasirïña toqetjja, Jehová Diosajj wali yateqaskayawa. Ukatwa David reyejj jupat akham sispachäna: “¡Dios Tata, munasirïtamasa jan jaytjasirïtamasa wali valoraniwa!” sasa (Sal. 36:5, 7). ¿Jiwasajj Davidjamarakit Jehová Diosan munasirïtapsa jan jaytjasirïtapsa wali valoranit uñjtanjja? w21.11 pág. 2 párrs. 1, 2; pág. 3 párr. 4

Diosajj jupar adoriri familianiwa, jupanakat yaqhepajj Jesusampi angelanakampiwa (Col. 1:15; Sal. 103:20). Jesusajj aka oraqenkkäna ukhajja, Diosarojj Awkiparjam servirinakapajj uñjapjjaspa ukwa uñachtʼayäna. Mä kutejja, discipulonakapamp parlkäna ukhajj Jehová Diosajj ‘Awkijawa, jumanakan Awkimarakiwa’ sasaw säna (Juan 20:17). Diosar jakäwis katuyasjjtan, bautisasjjaraktan ukhajja, munasir jilat kullakanak taypinkjjtanwa (Mar. 10:29, 30). Jehová Diosajj wali munasiri Awkiwa, janiw jan munasiri wali autoridadani jaqerjam jupar uñjañasäkiti. Jesusajja akhamwa orasiñ qalltäna: “Nanakan Awkija” sasa. Jehová Diosarojj “Taqe Chʼamani”, “Luri[ri]” jan ukajj ‘wiñay Rey’ sasinwa jakʼachasipjjäta sasaw Jesusajj sistaspäna. Ukajj walikïskaspänwa, kunattejj Biblian uka arunakampiw Jehová Diosar uñtʼasiraki (Gén. 49:25; Is. 40:28; 1 Tim. 1:17). Ukampisa Jehová Diosarojj “Awkija” sasinwa mayisipjjäta sasaw Jesusajj sawayistu. w21.09 pág. 20 párrs. 1, 3

Manasés reyejja, qalltan janiw Jehová Diosajj profetanakap toqe ewjjtʼkäna ukar istʼkänti. Ukatsti ‘Jehová Diosajj Asiria markan reyipan ejerciton pʼeqtʼirinakaparojj jupa contraw saytʼayänaʼ, mä arunjja Judá marka contraw saytʼayäna. “Jupanakasti Manasés reyirojj ganchonakampiw katuntapjjäna, ukatsti cobret lurat pä cadenanakamp chinuntasaw Babilonia markar apjjapjjarakïna”. Amuyatajja Babilonian katuntatäkasaw jan wali luratanakapat jupajj amuytʼasïna. “Nayra awkinakapan Diosap nayraqatansa humillasirakïnwa”. Ukatjja ‘Jehová Diosaparojj walpun ruwtʼasïna’, ‘oracionsa luraskakïnwa’ (2 Crón. 33:10-12). Tiempompejja, Jehová Diosajj Manasés chachan oracionanakap istʼänwa, oracionanakapanjja cambiatapaw qhan amuyasïna. Perdón mayisïna ukhajj Diosajj istʼänwa, ukatwa wasitamp reyit uttʼayjjäna. Manasés reyejja cheqpach arrepentisitap uñachtʼayañatakejj wal chʼamachasïna. w21.10 pág. 4 párrs. 10, 11

Priscilampi Aquilampejja jakasipkäna uka lugar jaytasajj yaqha markaruw jakir sarjjapjjañapäna, ukanwa carpa lurañ negociop uttʼayapjjañaparakïna. Corinto markankjjasajja congregacionaruw yanaptʼapjjäna, apóstol Pablomp chikarakiw jilat kullakanakar chʼamañchtʼapjjäna. Tiempompisti kawkjantï jukʼamp predicañatak yanaptʼajj munaskäna uka markanakaruw sarapjjäna (Hech. 18:18-21; Rom. 16:3-5). Ukanjja jan tiemponi trabajisajj wali kusisitaw jakasipjjpachäna. Casarat chacha warminakajja, Priscilampit Aquilampit yateqasisajj Diosan Reinop nayraruw uchapjjarakispa. Uñtʼasisipki ukanakajj janïr casaraskasaw kunsa jakäwipan lurapjjani uka toqet parltʼapjjañapa. Casarat chacha warminakajj Diosar serviñan kunanaksa lurapjjani uk sum amtapjje, ukat uk phoqañatak chʼamachasipjje ukhajja, Diosan yanaptʼap jukʼampwa jakäwipan uñjapjje (Ecl. 4:12). w21.11 pág. 17 párrs. 11, 12

Niyakejjay Jehová Diosajj awk taykasar respetañas maychistojja ukar istʼañasawa. “Naya Jehová Diosamajj santo Diosätwa, ukatwa jumanakajj santo jaqëpjjañamajja” siskäna ukjjarojja, taykamarus awkimarus respetapjjañamawa sasaw Jehová Diosajj Levítico 19:3 texton sarakïna (Lev. 19:2). Sapa mayniw akham jisktʼasiñasa: “¿Jehová Diosajj awk taykamar respetapjjam siski uka mandatorjam phoqasktti?” sasa. Ukarjam jan phoqaskatas amuyasstan ukhajja, uk phoqañatakiw chʼamachasiñasa. Kuntï nayrajj lurawayktan uk janiw mayjtʼayksnati, ukampis jichhat uksarojj awk taykasampïñataki, jupanakar yanaptʼañataki, jukʼamp tiempo jupanakampïñatakiw chʼamachassna. Jan ukajj kunanaktï necesitapki ukanak alasinwa yanaptʼsna, Diosat jan jitheqtapjjañapatakisa, chuymachtʼañatakis chʼamachasiraksnawa. Ukham lurasaw Levítico 19:3 textonkir mandato phoqañäni. w21.12 págs. 4, 5 párrs. 10-12

David reyejj sinti jan walinakwa luräna. Jupajj Bat-Seba warmimpiw adulterio jucha luräna, ukatjja chachaparus jiwayarakïnwa (2 Sam. 11:2-4, 14, 15, 24). Uk lurasajj janiw jupakejj jan waltʼayaskänti, familiaparusa esposanakaparus jan waltʼayarakïnwa (2 Sam. 12:10, 11). Yaqha horasajja, Israel markan ejercitopar munañaparjamak mä censo aptasajj Jehová Diosar jan taqe chuyma confiyatapwa uñachtʼayäna. ¿Kunarus ukajj purtʼasiyäna? 70.000 israelitanakaw mä jan wali usumpi jiwarapjjäna (2 Sam. 24:1-4, 10-15). ¿Jehová Diosajj janiw Davidat khuyaptʼayasiñapäkänti sasat juzgasäna? Jehová Diosajja, kunjamsa Davidajj jupat jan jitheqtas servïna, kunjamsa taqe chuyma arrepentisirakïna ukwa uñjäna. Ukatwa Diosajj jan wali juchanakap perdonäna. Qhawqsa Davidajj jupar munasïna, kunatï walïki uks lurañ munarakïna uk yatïnwa. Jehová Diosajj suma chuymanïtasa suma luratanakas uñjatapat wal yuspärtanjja (1 Rey. 9:4; 1 Crón. 29:10, 17). w21.12 pág. 19 párrs. 11-13

Jesusajj oqaräpkäna ukanakarusa, yaqha ukham usutanakarus khuyapayasiñampiw uñjäna. Bautisiri Juanarojj aka yatiyäwi apayäna: “Juykhunakajj uñjapjjewa, cojonakas sarnaqapjjewa, lepra usuninakas qʼomachatäpjjewa, oqaranakas istʼapjjewa, jiwatanakas jaktayatäpjjewa” sasa. Jesusan milagronakap uñjasajja, ‘jaqenakajj Diosaruw jachʼañchapjjäna’ (Luc. 7:20-22). Cristianonakajj Jesusat yateqasisajja, oqaranakarusa, juykhunakarusa, yaqha ukham usutanakarus munasiñampi khuyapayasiñampi pacienciampiw uñjtanjja. Cheqansa Diosajj janiw milagronak lurañasatakejj chʼama jiwasar churkistuti. Ukampis suma yatiyäwinak yatiyañ privilegio churistu, ukatwa juykhunakarusa, Diosat jan yatipki ukanakarus ‘niyaw mä Paraison jan usuta jakasjjañäni, Jehová Diosampis sumwa apasiñäni’ sasin yatiytanjja (Luc. 4:18). Uka yatiyäwejj Diosar jachʼañchapjjañapatakiw waljanir yanaptʼaski. w21.12 pág. 9 párr. 5

Santiagojj Diosan Arupampiw yatichirïna. Jehová Diosajj Job chachjam jan jitheqtas servirinakaparojj bendisipuniwa, ukjja Santiagojj Diosan Arupampiw jaqenakar amuytʼayäna. Uk yatichañatakejja, fácil amuykañ arunakampiw amuytʼayäna, sum qhanañcharakïna. Ukham lurasasti, jupak jachʼañchasiñat sipansa, Jehová Diosaruw jachʼañchäna. Kunsa yateqsna: fácil amuykaña ukat Jehová Diosan Arupampiw yatichañasa. Janiw qhawqsa yattan uk jaqenakar uñachtʼayañ amtampi yatichañasäkiti, jan ukasti qhawqsa Jehová Diosajj yati, jupanakat llakisiraki uk uñachtʼayañ amtampiw yatichañasa (Rom. 11:33). Bibliarjampun yatichasaw uka amtarjam lurtanjja. Sañäni, kunsa jiwasajj jupäsna ukhajj lursna uk yateqerinakasar sañat sipansa, Biblian utjki uka sarnaqäwinakampiw amuytʼasipjjañapatak yanaptʼañasa. Kunsa Jehová Diosajj amuyi, kunjamas chuymapan jikjjatasi uk amuyapjjañapatakiw yanaptʼañasaraki. Ukham lurañäni ukhajj jiwasar kusisiyañat sipansa, Diosar kusisiyañatakiw taqe kuns lurapjjani. w22.01 págs. 10, 11 párrs. 9, 10

Jehová Diosajj ‘janiw mayninakar jan wal lurätati’ sasakejj janiw siskistuti. Jehová Diosamp sum apasiñ munir cristianojj jupa kikparjamaw jaqe masiparojj munasiñapa. Levítico 19:18 texton parlki uka mandaton wali importantëtap kunjamsa Jesusajj uñachtʼayäna uk uñjañäni. Mä fariseojj akham sasaw mä kutejj Jesusar jisktʼäna: “¿Leyin utjki uka mandamientonakat kawkïris jukʼamp jachʼajja?” sasa. Jesusasti ‘taqet sipans nayrïr jachʼa mandamientojj’ Jehová Diosar taqe chuymasampi, taqe almasampi, taqe amuyusampi munasiñasawa sasaw säna. Ukatsti akham sasaw Levítico 19:18 textot aytasin sarakïna: “Payïristi ukar uñtatarakiwa: ‘Jaqe masimarojj juma kikparjam munasiñamawa’” sasa (Mat. 22:35-40). Kunaymanitwa jaqe masisarojj munasiñ uñachtʼaysna. Kuntï Levítico 19:18 texton siski ukarjam lurasaw uk uñachtʼaysna. Ukan akham siwa: “Janiw jumajj jaqe masimat vengasiñamäkiti, janirakiw jaqe masimar uñisiñamäkiti” sasa. w21.12 págs. 10, 11 párrs. 11-13

Jesusasti jankʼakiw “ampar loqtasajj” Pedror umat salväna. Kunjamsa Pedrojj uma patjja saräna uk amuytʼañäni. Oladanakas utjkchïnjja, Jesusar uñtasajj cheqakwa jan ajjsaras saräna, ukampis jachʼa thaya toqer uñtasajj ajjsarayasjjänwa, payachasjjarakïnwa, ukatwa umar niy chhaqaranttjjäna (Mat. 14:24-31). ¿Kunsa Pedrot yateqsna? Barcot saraqasajj Pedrojj uma patjja saräna, janiw umar chhaqaranttañsa pienskänti, Jesusan ukaruw puriñ munäna, ukampis thaya toqer uñtasajj janiw jupan ukar purjjänti. Cheqas jiwasajj janiw uma patjjan sarnaqksnati, ukampis jan walin uñjastan ukhajj Diosar confiyatasajj yantʼataw uñjasi. Jiwasatï Jehová Diosarusa promesanakaparus jan confiyjjañänejja, jupar serviñan jukʼat jukʼatwa aynachtʼjjañäni, llakinakampiw apayasjjarakiñäni. Jan walinakansa uñjaskchiñänejja, Diosar confiyaskakiñäni, jupajj jiwasar yanaptʼañatakejj chʼamaniwa. w21.12 págs. 17, 18 párrs. 6, 7

Orasisasa, Bibliat yatjjatasasa, lupʼisas Jehová Diosaruw adorasktanjja. Orasktan ukhajja, wal munaskistu uka alajjpachankiri Awkisampiw parlasktanjja. Bibliat yatjjatasajja, taqet sipans jukʼamp yatiñanïki uka ‘Diosaruw uñtʼasktanjja’ (Prov. 2:1-5). Kunapachatï lupʼktan ukhajja, Jehová Diosajj kunjam Diosasa, jiwasatakisa taqe jaqenakatakis kuna amtanisa uka toqenakatwa amuykiptʼtanjja. ¿Tiempos jan ina chʼusar aptʼasiñatak kunas yanaptʼistani? Puedstan ukhajja, jan khitis pantjasiykistaspa uka cheqaruw sarsna. Kunjamsa Jesusajj uk luräna uk amuytʼañäni. Aka oraqen janïr predicañ qalltkäna ukhajja, 40 urunakaw wasarankäna (Luc. 4:1, 2). Ukanwa jupajj orasïna, kun lurañapsa Awkipajj munäna ukatsa lupʼirakïna. Ukaw kuna jan walinakansa qhepat uñjasiñapäna ukatak wakichtʼäna. w22.01 págs. 27, 28 párrs. 7, 8

Mä anciano jan ukajj experienciani mä jilata jan ukajj mä kullakaw kunansa chʼamachasiñasa uk ewjjtʼapjjestaspa. Jiwasar munasitapatwa maynejj Bibliarjam ewjjtʼistaspa. Ukhamajj uka ewjjtʼarjam lurañatak chʼamachasiñasawa. Cheqansa cheqak ewjjtʼapkistu ukhaw ukar istʼañajj chʼamakïspa, inas colerasjjaraksna. ¿Kunatsa chʼamakïspa? Pantjasirïtas amuyañajj janiw chʼamäkiti, ukampis kunapachatï maynejj kunansa pantjastan uk cheqak ewjjtʼistu ukhajja, ukar istʼañajj chʼamakïspawa (Ecl. 7:9). Inas pantjasitas jan uñtʼasiñ munasajj kunaymaninakak parljjsna, jan wali amtampiw ewjjtʼitu sasaw amuyjjsna, jan ukajj kunjamsa ewjjtʼistu ukat colerasjjaksnawa. Inas akham amuyjjaraksna: “Kuna derechonis nayar ewjjtʼitu, ¡jupajj pantjasirakiwa!” sasa. Janitï uka ewjjtʼajj gustkchistojja, janiw ukar istʼjjsnati, jan ukajj maynin ukaruw ewjjtʼayasiñatak sarsna, ukhamat kuntï istʼañ munktan uk istʼañataki. w22.02 págs. 8, 9 párrs. 2-4

¿Kunjamsa Jehová Diosajj kuns luri ukar confiyatasajj machaq mundon yantʼat uñjasispati? Jïsa, Jehová Diosajj israelitanakar Egipto markat irpskäna uka qhepat kunas pasäna uk amuytʼañäni. Yaqhepajja Egipto markan kuna suma manqʼanïpkäntï ukat amtasisajj quejasipjjänwa, Diosajj churkäna uka maná tʼantʼsa uñisipjjänwa (Núm. 11:4-6; 21:5). ¿Jachʼa tʼaqesiña tiempo pasatat ukham pasarakistaspati? Aka oraq qʼomachañatakisa mä paraisor tukuyañatakis qhawqsa trabajiñäni uk janiw yatktanti. Walja lurañanakaw utjpachäni, inas qalltan jan faciläkchiniti. ¿Kunanaktï Jehová Diosajj uka tiempon churkistani ukanakat quejasiñäniti? Jehová Diosajj churkistu ukanakat jichha tiempon yuspärasirïñäni ukhajja, kuntï jutïrin churkistani ukat yuspärarakiñäniwa. w22.02 pág. 7 párrs. 18, 19

Zacarías 8:23 textonjja,“mä judío” ukat ‘jumanakampi’ siski uka arunakaw uñsti, uka arunakajj aka oraqen jiltʼapki uka ajllit cristianonakatwa parlaski (Rom. 2:28, 29). ‘Kunayman arunak parlir markanakat jutiri 10 chachanaka’ sasinjja, yaqha ovejanakat parlaskaraki. Jupanakajj ajllit cristianonakatwa wali chʼamampi ‘katthapisipjje’, mä arunjja janiw jupanakar jaytjapkiti, jupanakamp chikaw Jehová Dios saparuki adorapjjaraki. Ezequiel 37:15-19, 24, 25 texton parlki uka profeciarjamajja, Jehová Diosajj yaqha ovejanakampi ajllit cristianonakampiw mayachthapi. Jehová Diosaw uka profecía arunak phoqasiyi. Uka profeciajj pä lawanakatwa parli. Alajjpachar sarañatak ajllitanakajja, “Judá markataki” sat lawar uñtasitäpjjewa (uka tribu taypitwa Israelan reyinakapajj ajllisïna). Aka oraqen jakañ suytʼirinakasti, “Efrainan” lawapar uñtasitäpjjarakiwa. Uka pä gruponakarojja, Jehová Diosajj mayachtʼañapänwa, ukhamat “mä sapa lawakïñapataki”. Ukhamatwa Cristo Jesús Reyipan pʼeqtʼata mayachtʼat servipjjañapäna (Juan 10:16). w22.01 pág. 22 párrs. 9, 10

Jesusajj jaqenakamp uñjayasiñ laykuki limosnanak pobrenakar churirinakatwa parläna. Amuyatajja ukham lurapjjatapajj walikjamäkchïnsa, Jehová Diosatakejj janiw walïkänti (Mat. 6:2-4). ¿Kunjamsa cheqpachapun khuyaptʼayasirïtas uñachtʼaysna? Mayninakat llakisisa, yanaptʼatasat jan kun katoqañ suyasaw uk uñachtʼaysna. Akhamwa jisktʼasiñasa: “¿Janiw kunatï cheqapäki ukak yatkti jan ukasti ukarjamaw lurtjja sasin siristti? ¿Kunatsa mayninakat khuyaptʼayastjja?” sasa. Diosajj wali trabajtʼiriwa, espíritu santopas jan inaktʼir chʼamawa (Gén. 1:2). Ukhamajj espíritu santon achupan luräwinakap uñachtʼayañajj wali wakiskiriwa. Santiagojj akham sänwa: “Diosar confiyañajj jan luräwinakanïki ukhajj jiwatäjje[wa]” sasa (Sant. 2:26). Espíritu santon achupan mayni luräwinakapampejj ukhamarakiwa. Achuparjam sarnaqatas uñachtʼayktan ukhajja, Diosan espíritu santopajj jiwasar yanaptʼaskatapwa uñachtʼaytanjja. w22.03 págs. 11, 12 párrs. 14-16

Cristianonakajja Jehová Diosar serviñan kunaymaninakwa lurtanjja, yaqha suma luräwinaks luraraktanwa. Ukampis apóstol Pedrojj mä importante luräwi lurañasatakiw cristianonakar chʼamañchistu, taqe luräwisan santöñasatak janïr chʼamañchkasajja, akham sänwa: “Amuyunakamjja wal trabajiñatak wakichtʼasipjjam” sasa (1 Ped. 1:13). Ukampejj ¿kamsañsa munäna? Ajllit cristianonakajja, jupanakar jawskäna uka Diosan khuyapayasiñapatwa taqe cheqan yatiyapjjañapäna, ukwa Pedrojj sañ munaskäna (1 Ped. 2:9). Jichha tiemponjja, taqe cristianonakaw mä importante luräwi lurtanjja, ukaw jaqenakar jukʼamp yanaptʼi. Diosan santo markapjamajja taqe chuymaw predictansa yaticharaktansa, ukajj mä suma privilegiowa (Mar. 13:10). Ukham lurañatak chʼamachasiskakiñäni. Ukhamatwa Jehová Diosarusa jaqe masisarus munasitas uñachtʼayañäni, taqe sarnaqäwinakasan santo jaqëñas munatassa uñachtʼayarakiñäniwa. w21.12 pág. 13 párr. 18

Apóstol Pablojj jilat kullakanakan suma luratanakap uñjañatakipuniw chʼamachasirïna. Maynejj pantjaski ukajja, janiw jan wali jaqëkaspas ukham sañ munkiti, uk Pablojj sum yatïna. Jilat kullakanakarojj munasiñampiw uñjirïna, suma chuymanïpjjatapwa uñjarakirïna. Kunatï walïki uk lurañatak maynir chʼamachasiskir uñjasajja, suma chuymampiw luraski, mä jukʼa yanaptʼañakiw wakisi sasaw amuyirïna. Pablojj kunjamsa Evodia ukat Síntique kullakanakar yanaptʼäna uka toqet parltʼañäni (Filip. 4:1-3). Amuyatajja, uka kullakanakajj jan waltʼayasisajj yaqh yaqhaw sarnaqjjapjjäna. Ukampis Pablojj janiw jupanakar toqenoqkänti, jan ukasti Diosat jan jitheqtas wali sum servipjjatapwa uñjäna. Qhawqsa Diosajj jupanakar munasïna uk jupajj yatïnwa, ukatwa sumankthapipjjañapatak chʼamañchtʼäna. Jilat kullakanakar suma chuymamp uñjañaw kusisitakïskañatakisa, congregacionan amigonakanïskakiñatakis yanaptʼäna. w22.03 pág. 30 párrs. 16-18

Jehová Diosajj sumankañap churkistu ukaw sumak jikjjatasiñataki, sum amuytʼasiñatak yanaptʼistu. Luz sat mä kullakajj ukhamaw jikjjatasïna, jupajj akham siwa: “Awisajja, sapakïkiristsa ukhamaw amuyasta, ukatwa Jehová Diosajj janis munaskitaspa ukham amuyta. Ukham jikjjataskta ukhajja, jankʼakiw Jehová Diosaru taqe ukanak yatiyta. Oracionaw jan ukham amuyjjañatak yanaptʼitu” sasa. Diosar orasisaw sumankañ jikjjatsna, ukwa uka experienciajj amuytʼayistu (Filip. 4:6, 7). Jiwasanakajj akwa yattanjja, mä familiarasajj jiwani ukhajj Jehová Diosampi Jesusampiw yanaptʼistani. Diosampin Jesusampin sinttʼasirïpjjatapajj predicañataki, yatichañatakiw chʼamañchistu. Jehová Diosampi munat Yoqapampejj kunjamas jikjjatastan uk amuyapjjewa, jiwasan aguantañasatakiw yanaptʼañ munapjjarakistu. “Diosajj taqe jachanakapwa nayranakapat picharani” siski uka promesan phoqasiñapjja, wal suyasktanjja (Apoc. 21:4). w22.01 pág. 15 párr. 7; pág. 19 párrs. 19, 20

Pä kasta thakir apiri pä punkunakatwa Jesusajj parläna. Mayni thakejj ‘anchowa’ maynisti “kʼullkʼurakiwa” sasaw säna (Mat. 7:14). Uka pä thakikiw utji. Sapa mayniw kawkïr thakinsa sarañäni uk amtañasa. Uka amtar puriñajj wali wakiskiriwa, kunjjay amtchiñäni ukarjamaw wiñay jakañsa katoqañäni jan ukajj janisa. ‘Ancho’ thakin sarañajj facilakïtapat waljaniw uk ajllipjje. Jilaparte jaqenakajj sarasipki uka thakin saraskakiñ waljaniw amtapjjaraki. Supayaw uka jiwañar apiri thakinjam sarapjjañap muni, jupanakajj janiw uk amuyasipkiti (1 Cor. 6:9, 10; 1 Juan 5:19). ‘Ancho’ thakit sipansa, mayni thakejj ‘kʼullkʼuwa’, jukʼanikiw uk jikjjatapjje sasaw Jesusajj säna. Versículo 15 ukanjja, Jesusajj falso profetanakat wal amuyasipjjam sasaw arkirinakapar ewjjtʼarakïna (Mat. 7:15). w21.12 págs. 22, 23 párrs. 3-5