Noviembre

Jehová Diosajj kunayman toqetwa yanaptʼistu, jan walinakan uñjasktan ukhas sum jikjjatasiñatakiw yanaptʼistu. Ukatjja mä texto amtañatakis yanaptʼarakistuwa, ukhamat Bibliat jukʼamp yatiñ munapki ukanakatak liytʼarapiñataki. Jaqenakajj jan istʼañ munapkistu ukhas predicaskakiñatakejj yanaptʼarakistuwa (Jer. 20:7-9). Suma Diosätapjja jukʼamp suma predikirïñatak yatichasaw jupajj uñachtʼayistu. Semanan utjki uka tantachäwinjja, kunjamsa yatiysna uka toqet suma demostracionanakwa uñjtanjja, ukarjam lurañatakis ewjjtʼapjjarakistuwa. Qalltan uka ewjjtʼanakarjam lurañ inas ajjsarayaschiyätan. Ukampis ukarjam prediktan ukhajja, uka ewjjtʼanakajj territoriosan wali yanaptʼkirïtapwa uñjtanjja. Tantachäwinakansa asambleanakansa, kunjam toqenakattï jan predikirïktan ukham predicañatakiw chʼamañchapjjarakistu. Ukham toqenakat predicañatak chʼamachasiñäni ukhajja, Jehová Diosajj bendisistaniwa. w21.08 pág. 27 párrs. 5, 6

Corinto markankir cristianonakar carta qellqkäna ukhajja, apóstol Pablojj wali qhanwa ewjjtʼäna. Qhepatjja, kunjamsa cartap katoqasipjjäna uk yatiñatakejj Titoruw khitäna. ¡Ewjjtʼanakap katoqasipjjatap yatisajj walpun kusisïna! (2 Cor. 7:6, 7). Pablot yateqasisaw ancianonakajj jilat kullakanakatak tiempo apstʼasipjjañapa. Ukatakejj janïräkipanwa tantachäwinakar puripjjaspa, ukhamat jilat kullakanakar chʼamañchtʼañataki. Awisajj maynir chʼamañchtʼañatakisa, qhawqsa munastan uk uñachtʼayañatakis mä qhawqha minutonakakiw wakisispa (Rom. 1:12). Pablot yateqasir ancianonakajja, Bibliampiw jilat kullakanakar chʼamañchtʼapjje, qhawqsa Diosajj jupanakar munasi uksa sapjjarakiwa. Felicittʼañatak chʼamachasisaw jupanakar munasipjjatap uñachtʼayapjje. Mä ancianojj Bibliarjamapuniw ewjjtʼañapa, ukatjja ewjjtʼanakap katoqasipjjañapatakejj qhanwa ewjjtʼañapa, munasiñampiw ewjjtʼañaparaki (Gál. 6:1). w22.03 págs. 28, 29 párrs. 11, 12

Jichha tiemponjja, Jehová Diosar jan jitheqtas serviskakiñatakejj jupaw “jaqen chʼamapat jilankki” uka chʼam jiwasar churistu. Oración toqew chʼamañchtʼat jikjjatastanjja. Efesios 6:18 textonjja, apóstol Pablojj akham sänwa: ‘Taqe horasana, Diosar mayisisipkakim’ sasa. Ukham lurañäni ukhajja, Diosajj chʼamañchtʼistaniwa. Awisajja, wali llakita jikjjatasisajja, janiw Jehová Diosarojj kun mayisiñsa puedjjsnati, ukampis kunjamas jikjjatastan uk sañajj chʼamäkchinisa, Diosajj jupar orasiñasatakiw invittʼistu (Rom. 8:26, 27). Chʼam katjjatañataki chuymachtʼatäñatakejja, Pabljamarakiw Biblia liysna (Rom. 15:4). Mä jan walin uñjaskasajja, Biblia liyiñasawa, uka toqetwa lupʼiñasaraki. Ukhaw Jehová Diosajj espíritu santopampejj yanaptʼistaspa (Heb. 4:12). w21.05 pág. 22 párrs. 8-10

Jaqenakar Bibliat yatichañajj wali importantëtap yattanwa, ukampis yaqhep jan walinakaw jaqenakar Bibliat yatichañ jarkʼistaspa. Qhawqtï lurañ munktan uk janis lurañ puedksna ukhamwa amuysna. Yaqhep jilat kullakanakajja, edadanëjjapjjewa jan ukajj usutäpjjewa. Jiwasatï ukhaman uñjasstan ukhajja, maynirojj utasatpachwa teléfono toqe jan ukajj Internet toqe Bibliat yatichañ qalltsna. Yaqhep jaqenakajj Bibliat yatichayasiñ munasipkiwa, ukampis jilat kullakanakajj predicapki uka horasanakajj janiw puedipkiti. Ukhamajj kuna horarutï puedipki uka horasanakaw Bibliat yatichsna. Inas wali alwata yatichsna jan ukajj arumanak yatichsna. Nicodemojj arumaw yatichayasiñ munäna, ukatwa Jesusajj arumaru yatichäna (Juan 3:1, 2). w21.07 pág. 5 párrs. 10, 11

Bautisir Juanan arkirinakapajj Jesusan discipulonakapar jan ayunir uñjasajj wal mayjtʼasipjjäna. Jesusasti nayajj jakaskä ukhakamajj janiw ayunapjjañapajj wakiskiti sasaw jupanakar säna (Mat. 9:14-17). Ukham qhanañchkatasa, fariseonakampi Jesusan yaqha enemigonakapampejj jan costumbrenakap arkatapat juchañchapjjänwa. Usutanakar sábado urun qollatapats wal colerapjjäna (Mar. 3:1-6; Juan 9:16). Nanakajj leyirjamaw sábado uru imapjjta sasaw sapjjäna, ukampis jaqenakarojj templon aljañatsa alasiñatsa janiw jarkʼapkänti. Jesusajj uk lurapjjatapat juchañchäna ukhajja, wal colerasipjjäna (Mat. 21:12, 13, 15). Nazaret markankir sinagoganjja jaqenakajj askipak thaqapjjatapa, Diosarus jan confiyapjjatap Jesusajj qhanañchäna ukhajja, jupanakajj wal colerasipjjäna (Luc. 4:16, 25-30). Kuntï Jesusat suyapkäna uk jan lurir uñjasajja, waljaniw jupat jitheqtäna (Mat. 11:16-19). w21.05 págs. 5, 6 párrs. 13, 14

Jachʼa jachʼa tukuñasa ukhamarak maynitakik taqe kun munañas kunja jan walisa ukat amuyasiñasatakejja, jichha tiempon utjki uka sarnaqäwinakat yatjjatañasatakiw Diosajj chʼamañchtʼistu. Maynitakik taqe kuns munañat parlktan ukhajja, inas Supayat amtstan. Diosan angelapäkäna ukhajja, suma privilegionakwa katoqpachäna. Ukampis jukʼampwa munäna. Jehová Diosaruk adorasiñapäki ukwa munäna. Jupjam tukuñaswa Supayajj muni, ukatwa kunatï utjkistu ukat jukʼamp munañasatak chʼamañchistu. Nayraqatjja Evaruw uk lurañapatak chʼamañchäna. Diosajj munasiñatwa Evampiru Adanampirojj “taqe qoqanakat” sistʼasiñkam manqʼasiñapatak churäna, mä qoqatakwa jan manqʼapjjañapäkänti (Gén. 2:16). Ukampis Supayajja, uka qoqat manqʼañapajj wakiskaspasa ukham amuyañapatakiw Evar engañjäna. Diosajj kuntï churkäna ukampejj janiw Evajj kusisitäkänti, jukʼampwa munäna. Qhepatsti jucharuw purtʼasïna, ukatjja jiwjjänwa (Gén. 3:6, 19). w21.06 pág. 14 párrs. 2, 3; pág. 17 párr. 9

Adanampi Evampejj wawanakanïpjjaspa, aka oraqsa sum cuidapjjaspa ukwa Jehová Diosajj munäna. Jupanakatï istʼasirïpjjaspäna kuntï Diosajj maykäna uks lurapjjaspäna ukhajja, wiñayatakiw Diosan familiapäpjjaspäna, jupanakarojj familiap taypin mä lugar churasaw Diosajj jachʼañchäna. Ukatwa Davidajj Jehová Diosar akham säna: ‘Angelanakat sipansa juparojj mä jukʼa minuswa lurtajja, ukatsti kʼajkiriruw juparojj tukuytajja, jachʼañcharaktawa’ sasa (Sal. 8:5). Cheqasa Jehová Diosajj janiw jaqenakarojj angelanakjam lurkistuti (Sal. 103:20). Jupanakat sipansa ‘mä jukʼa minuswa’ luristu. Adanampi Evampejj Diosar jan istʼapjjatapatwa jupan familiapäñ aptʼasipjjäna, ukham lurapjjatapajj jan walinakanwa wawanakapar uñjasiyäna. Ukampis Diosajj jupar istʼiri jaqenakajj wiñayatak jupan wawapäpjjañap munkäna uka amtapjja, janiw mayjtʼaykiti. w21.08 págs. 2, 3 párrs. 2-4

Jichha tiemponjja, Jehová Diosan servirinakapat waljaniw jarkʼat uñjasipjje. Yaqhepanakajj kawkjantï predicañajj jarkʼatäki uka lugaranakanwa jakasipjje, ukat katuntatäsajj “gobernadoranakana reyinakana” nayraqatapar apataw uñjasipjjaspa (Mat. 10:17, 18). Yaqhep Testigonakajja, yaqha toqe jarkʼataw uñjasipjjaraki. Jakasipki uka markan Diosar serviñajj janis jarkʼatäkchejja, familiaranakapaw kunaymanit jarkʼañ munapjje (Mat. 10:32-36). Awisajja Diosar serviñat walsa familiaranakapajj jarkʼapkchejja, inamayakïtap amuyasajj janiw jarkʼjjapjjeti. Yaqhepanakajja nayrajj Testigonak conträpkchïnsa, qhepat Jehová Diosar taqe chuymaw sirvjjapjje. Ukhamajj Diosar serviñan jarkʼatas uñjaskstajja, jan qarjtamti janirak ajjsaramti. Jumarojj Diosaw wali chʼamani espiritupamp yanaptʼasktam, ¡ukhamajj janiw kunatsa ajjsarañamäkiti! w22.03 pág. 16 párr. 8

Jehová Diosajj ‘jachʼa jachʼa tukuñsa, kʼarisiñsa, jan juchan jaqer jiwayañsa’ uñisiwa sasaw Bibliajj wali sum qhanañchi (Prov. 6:16, 17). Ukatjja “wila wartir jaqetsa engañjir jaqetsa ajjtasiwa” (Sal. 5:6). Jehová Diosajj ukham amuyunakatsa luräwinakats walpun ajjtasi, ukatwa Noé chachan tiempopan jakapkäna taqe uka jan wali jaqenakar qʼal tukjäna, kuna laykutejj kunayman jan wali luräwinakampiw oraq phoqantapjjäna (Gén. 6:13). Khititï divorciasiñataki jan juchan esposaparu jan ukajj esposopar engañjki uksa Jehová Diosajj uñisirakiwa, ukwa Malaquías toqejj säna. Ukham luririnakajj juparus adorapkchejja, Diosajj janiw katoqaskiti, ukham lurapjjatapat jupanakar cuenta mayirakini (Mal. 2:13-16; Heb. 13:4). Diosajj “jan walïki ukjja uñisipjjam” sasaw sistu (Rom. 12:9). Uñisiña siski uka arojja ajjtasktan ukatwa amuytʼayistu, chuymatpach mä kun uñisiña ajjtasiña sañwa munarakispa. Ukhamajj kunanakatï Diosatakejj jan walïki ukanak ukhamwa uñisiñasaraki. w22.03 pág. 5 párrs. 11, 12

Akat mä jukʼarojja, alajjpachankir Awkisajj walja bendicionanakwa Reinop toqejj churistani. Jehová Diosar suytʼirinakajja, walja bendicionanakwa jichha tiemponsa ukat Paraisonsa katoqapjjani. Ukanjja Jehová Diosan servirinakapajj janiw mayampis llakinakana jan walinakan uñjasjjañäniti. Janiw usuyasiñasa, ina chʼusat tʼaqesiñas mayamp utj-jjaniti (Apoc. 21:4). Janirakiw kunatï jakañatak munaski ukanak jikjjatañatsa llakisjjañäniti, kuna laykutejj jilarkiriw taqe kunas utj-jjani (Sal. 72:16; Is. 54:13). ¡Kunja kusiskañakïkani! Jehová Diosajja kunanakatï jupar jan gustki uk jaytañataki, suma chuymani cristianor tukuñasatak jiwasar yanaptʼasajja, Reinopan jakañasatakiw wakichtʼaskistu. Ukhamajj nayrar sarantasipkakiñäni, jan qarjtapjjañäniti, kunatï sumäki ukajj niyaw purinini. Ukañkamajj kuntï Jehová Diosajj arsuwayki uk phoqañapkam pacienciamp suytʼaskakiñäni. w21.08 pág. 13 párrs. 17-19

Apóstol Pablon cartap katoqapkäna uka qhepatjja, Judea markankir jilat kullakanakajj utanakapa, negocionakapa, jan cristianöpkäna uka familiaranakap jaytjjasajj ‘qollunakaruw escapjjapjjäna’ (Mat. 24:16). Uka tiemponjja, maynit maynikam yanaptʼasipjjañapajj wali wakiskirïnwa. Jupanakatï nayratpach Pablon ewjjtʼaparjam maynit maynikam yanaptʼasiñ yateqapjjchïna ukhajja, qollunakar escapjjapjjäna ukhajj kunanakapatï utjkäna ukanakampejj kusisitakiw jakasipjjpachäna. Jichha tiemponjja kunansa yanaptʼatäñ munapjje uk janiw jilat kullakanakajj sapkapunistaspati, ukampis yanaptʼa mayiñ janiw ajjsarapjjañapäkiti. Congregacionasanjja, yaqhep jilat kullakanakajj mayninakar yanaptʼañatakejj jankʼakïpjjewa. Jupanakajj taqe chuymaw yanaptʼapjje. Yanaptʼa munsna ukhajja, jupanakaruw jakʼachassna, uka jilat kullakanakatwa yateqasiñasa. w22.02 pág. 23, 24 párrs. 13-15

Aka qhep qhepa maranakanjja walja congregacionanakampi circuitonakampiw wasitat organiztʼasiwayi. Yaqha congregacionar sarañatak mayipjjestaspa ukhajj familiaranakasaru amigonakasaru jaytañajj chʼamakïspawa. ¿Maynejj kawkïr congregacionarus sarañapa uk Jehová Diosat ancianonakar yatiypacha? Janiwa. Ukatwa jupanakar istʼañajj chʼamakïspa. Ukampis kuntï ancianonakajj amtapki ukarojj Jehová Diosajj confiyiwa, jiwasajj confiyañasarakiwa. Kunanaktï ancianonakajj amtapki ukanakajj janis gustkchistojja, ¿kunatsa jupanakar istʼañasa? Jupanakar istʼasajj Diosan markapajj mayachtʼatäñapatakiw yanaptʼtanjja. Kuntï ancianonakajj amtapki ukar humilde chuymamp istʼtan ukhajja, congregacionan nayrar sartañapatakiw yanaptʼaraktanjja (Heb. 13:17). Jukʼampisa Jehová Diosar confiyataswa uñachtʼaytanjja, jupaw ancianonakarojj jiwasar cuidañapatak uttʼayi (Hech. 20:28). w22.02 págs. 4, 5 párrs. 9, 10

Bautisat jilatästa ukhajja, sum arstʼañataki sum yatichañatakiw chʼamachasiñama. Jumatï suma liytʼirïñataki, arstʼirïñataki, yatichirïñatak chʼamachasïtajja, istʼapkätam ukanakaruw yanaptʼäta (1 Tim. 4:15). Sum liytʼañataki yatichañataki chʼamachasiñäni sat folleton suma arstʼirïñ toqeta, suma predikirïñ toqet parlki ukanak yatjjatañataki, ukarjam lurañatak chʼamachasim. “Parlañansa yatichañansa wal chʼamachasisipki” uka ancianonakarusa, consejero auxiliar jilatarus ewjjtʼanak mayirakim (1 Tim. 5:17). Janiw folleton yateqkta ukarjam lurañatakik chʼamachasiñamäkiti, jan ukasti kunjamsa tantachasirinakan Jehová Diosar jukʼamp confiyapjjañapataki, kuntï yateqapki ukarjam lurapjjañapatak yanaptʼasma ukatakis chʼamachasiñamarakiwa. Ukham luräta ukhajja, jukʼamp kusisitäyätawa, tantachasirinakas kusisitäpjjarakiniwa. w21.08 pág. 24 párr. 17

Mayninakajj jiwasat sipan jilïrïpkaspas ukham amuyañäni ukhajja, janiw jiwasat sipan jukʼamp sum lurañ yatipki ukanakampejj atip atipa kuns lurkañäniti, antisas jukʼamp sum lurapjjatapat kusisiñäniwa. Kunanaktï sum lurañ yatipki ukamp Jehová Diosar servis jachʼañchapjje ukhajj jukʼamp kusiskañawa. Ukhamatwa congregacionan sumankañ utjañapatak yanaptʼañäni, mayachtʼatarakïniwa. Jan envidiasiñatakejj humilde chuymanïña, mä arun qhawqtï lurirjamäktan uk amuyañaw yanaptʼistani. Humilde chuymanïñäni ukhajja, janiw jilat kullakanakat sipan jukʼamp sums lurañ yatksna ukham sarnaqkañäniti. Antisas khitinakatï kuns jukʼamp sum lurañ yatipki jupanakat yateqañatakiw chʼamachasiñäni. Sañäni, mä jilatatï suma arstʼirïchi ukhajja, kunjamsa wakichtʼasi ukwa jisktʼsna. Mä kullakatï suma phaytʼirïchi ukhajja, sum phaytʼirïñasatakejj juparuw yanaptʼa mayiraksna. w21.07 pág. 16 párrs. 8, 9

Números libronjja, sábado urun lawanak apthapitapatwa mä israelitarojj jiwañapatak Diosajj juchañchäna sasaw qhanañchi. Ukampis walja maranak qhepatjja, David reyirojj adulterio jucha luratapatsa, jaqe jiwayatapats Jehová Diosajj perdonänwa sasaw 2 Samuel librojj qhanañchi (Núm. 15:32, 35; 2 Sam. 12:9, 13). Uka sarnaqäwinak liytʼasajj inas akham jisktʼassna: “¿Kunatsa Jehová Diosajj Davidarojj jachʼa jucha luratanakapat perdonäna? ¿Kunatsa mä israelitarojj lawanak apthapitap laykuki jiwañapatak juchañchäna?” sasa. Bibliajj janiw taqe kunpun qhanañchkiti. Davidajj taqe juchanakapat arrepentisitap yattanwa (Sal. 51:2-4). Ukampis sábado urutak utjkäna uka ley pʼakintir jaqejj ¿kunjam jaqënsa? ¿Uk luratapat arrepentispachänti? ¿Yaqha horasanakan janirakit Diosar istʼkpachänjja? ¿Ewjjtʼatas janit istʼkpachänjja? Janiw Bibliajj ukanak qhanañchkiti. Ukampis kuntï Diosat yatktan ukaw jupajj “taqe kunsa cheqaparjamapuniw luri” sasin confiyañatak yanaptʼistani (Sal. 145:17). w22.02 págs. 2, 3 párrs. 3, 4

Qhawqtï lurañ puedki uk amuyasiri mä jaqejja, janiw qhawqtï lurañ puedki ukat jukʼamp lurañ suykiti, ukhamïpanwa kusisitak jakasi, wali sum trabajiraki. Akham amuytʼañäni, mä jaqejj autompi amstar makatañatakejja, kʼachatakwa auto apañapa, ukhampachas amstar makataskakiniwa. Qhawqtï lurañ puedki uk amuyasiri jaqejja, ukar uñtasitarakiw kunapachas kʼachatak sarañajj wakisi uk yati. Ukhamatwa Jehová Diosar serviskakini, mayninakarus yanaptʼarakini (Filip. 4:5). Barzilái chachat parltʼañäni, 80 maranëjjäna ukhaw palacion serviñapatak Davidajj invitäna. Barzilái chachajj qhawqtï lurañ puedkäna uk amuyasïnwa, ukatwa Davidan invitacionaparojj jan iyawskänti. Edadanëjjatap laykojj janiw waljanak lurañ puedjjaspänti, ukatwa Kimham sat jukʼamp wayna chachan jupa lanti sarañapatak mayïna (2 Sam. 19:35-37). Barzilái chachjamarakiw edadani jilatanakajj wayna jilatanakar luräwinak jaytasajj kusisipjje. w21.09 pág. 10 párrs. 6, 7

Jehová Diosar munasiri Awkirjam uñjañajj yaqhepatak chʼamakïspawa. Jiskʼäskayätan ukhajj inas awkisajj munasiñ jan uñachtʼaykchistänti. Kunjamas jikjjatastan uk Diosajj yatiwa, jiwas jakʼankañwa munaraki, uk yatiñajj wali chuymachtʼkiriwa. Ukatwa Arupan akham sistu: “Diosar jakʼachasipjjam, jupajj jumanakar jakʼachasirakiniwa” sasa (Sant. 4:8). Diosajj wal munasistu, ‘nayaw wali suma Awkimäyäjja’ sasaw sarakistu. Jesusajja Jehová Dios Awkipar jukʼamp jakʼachasiñatakiw yanaptʼistaspa. Sumwa jupar uñtʼi, kunjam Diosasa uks sumwa uñachtʼayaraki, ukatwa akham säna: “Khititejj nayar uñjkitu ukajj Awkirojj uñjarakiwa” sasa (Juan 14:9). Jesusajj mä jilïr jilar uñtasitawa. Awkisar respetaña, istʼaña, kusisiyaña, Diosamp sumat uñjatäñwa yatichistu. Aka oraqenkkasajj kunanaktï lurkäna ukaw jukʼampis Jehová Diosan suma Diosätapa, munasirïtap amuyayistu. w21.09 pág. 21 párrs. 4, 5

Cheqpach Diosarojj mayachtʼataw sirvtanjja. Congregacionajj qʼomäñapatakejja, Jehová Diosajj ancianonakaruw uttʼayi. Mä cristianojj jachʼa juchar purtʼaski ukhajja, congregacionat jaqsutäniti janicha uka toqet ancianonakajj mä amtar puripjjaspa ukwa Jehová Diosajj muni. Juchachasirejj cheqapunit arrepentisi janicha ukwa ancianonakajj amuytʼapjjañapa. Jupanakajj akanakwa amuytʼapjjañaparaki: juchachasirejj arrepentistwa sasinsa siskchejja, ¿cheqapunit jan wali luratap uñisi? ¿Janipuniw mayampis uka jucha lurjjäti sasat amti? ¿Jan wali amigonakatï juchar purtʼasiychi ukhajj jupanakar jaytjjañti amti? Ancianonakajj Jehová Diosaruw orasipjje, kuntï juchachasirejj lurki uk Bibliarjamaw uñakiptʼapjje, jucha lurataparojj kunjamsa uñji ukwa amuykiptʼapjjaraki. Ukhamatwa juchachasirejj congregacionankaskakiniti janicha uka toqet mä amtar puripjje. Awisajja juchachasirirojj congregacionat jaqsuñaw wakisi (1 Cor. 5:11-13). w22.02 pág. 5 párrs. 11, 12

Walja tiemposa jan ukajj jukʼa tiempos bautisatästanjja, taqeniw kunjam jaqëñastï Jehová Diosajj munki ukhamäñ muntanjja. Ukatakejja kunanaksa amuyasktan ukanakat amuyasiñasawa, kuna laykutejj amuyunakasaw kunjam jaqëtansa uk uñachtʼayi. Jiwasatï sapa kuti jañchin munañanakapat lupʼiskañäni ukhajja, jan walinakwa parlañäni, lurarakiñäni (Efes. 4:17-19). Jiwasatï suma amuyunakanïñänejja, kunjamtï Jehová Dios Awkisajj munki ukhamwa parlañäni, lurarakiñäni (Gál. 5:16). Ukhamarus kunjamatsa jan wali amuyunakajj pʼeqesan utjakipuniniwa, ukampis uka amuyunakarjam jan lurañwa amtsna. Janïr bautisaskasajja, Diosajj uñiski uka jan wali parlañanaksa jan wali lurañanaksa apanukjjañasawa. Ukanak nayraqat apanukuñajj wali importantewa, ukhamat nayrajj kunjam jaqëyätansa uk apanukuñataki. Jehová Diosar wal kusisiyañatakejja, machaq jaqëñamp isthapisiñasawa. w22.03 pág. 8 párrs. 1, 2

Jachʼa jucha lurirejj cheqapunit juchapat arrepentisi janicha uk amuyañajj ancianonakatak chʼamakïspawa. Jupanakajj janiw jaqen chuymap yatipkiti, ukhamajja kunanakas jucha luririn cheqapun cambiatapa, jan wali luratap uñisitaps uñachtʼayi ukanak amuyañatakiw chʼamachasipjjañapa. Awisajja jucha lurirejj jan phenqʼaniw jan wal luraspa, ukatwa cheqapunit arrepentisi janicha ukar creyiñajj ancianonakatak chʼamäspa. Ukhamasti jucha lurirejj cheqapunit cambyi uk uñjañwa ancianonakajj munapjje. Cambiañapatakisa cheqapun arrepentisitap uñachtʼayañapatakis walja tiempow munasispa. ¿Congregacionat jaqsutäki ukajj cheqapuni arrepentisitap kunjamsa uñachtʼayi? Tantachäwinakaruw jan faltasisa sarañapa, ancianonakajj oración lurañ jan armasiñapataki Bibliat yatjjatañapatak ewjjtʼapki ukarojj istʼañapawa. Kunanakatï mayamp juchar puriykaspa ukanakatsa cuidasiñapapuniwa. Jupatï Jehová Diosamp sum apasjjañatak chʼamachasini ukhajja, Diosajj perdonaniwa, ancianonakas congregacionar kuttʼaniñapatakejj yanaptʼapjjarakiniwa. w21.10 pág. 6 párrs. 16-18

Jesusajj Jehová Diosarojj wal munasïna, ukatwa alajjpachankkäna ukhasa, aka oraqenkkäna ukhas Awkiparuk adoräna (Luc. 4:8). Awkip saparuk adorañwa yaticharakïna. Janiw jupasa ni discipulonakapas Diosar adorañatakejj idolonak apnaqapjjerïkänti. Niyakejjay Diosar jan uñjkstantejja, janiw khitis jupar uñtasit mä kun lurkaspati (Is. 46:5). ¿Santo jaqenakäpjjewa sasin idolonak lurañasa jupanakar mayisiñas walikïskpachati? Jichhürutak apstʼat texton jikjjataski uka payïr mandamientjja, Diosaw arsüna. Jupamp sumat uñjatäñ munapki ukanakajja, Diosajj idolonakar adorasiñap jan munatap qhan amuyapjje. Historia toqet yatjjatirinakajja, apostolonakajj jakapkäna uka tiempon Dios saparukiw cristianonakajj adorapjjerïna sasaw sapjje. Jichhürunakan Testigonakajj nayrïr cristianonakjamaw lurapjjaraki. w21.10 págs. 19, 20 párrs. 5, 6

‘Jerusalén markajj ejercitonakan muyuntataw’ uñjasini sasaw Jesusajj Judea markankir jilat kullakanakar säna (Luc. 21:20-24). Uk uñjasajja, Judeankirinakajj ‘qollunakaruw escapjjapjjañapäna’, escapasakiw salvasipjjaspäna, ukampis ukatakejj walja cosasanakapwa jaytapjjañapäna. La Atalaya sat revistan akham sasaw qhanañchasïna: “Utanakapsa oraqenakapsa, jupanakajj jaytjjapjjänwa. Kunanakatï utanakapan utjkäna ukanaksa, ukhampachwa jaytapjjarakïna. Jehová Diosaw yanaptʼistani cuidaskarakistani sasaw confiyapjjäna. Jupanakatakejj Jehová Diosar serviñaw taqe kunat sipans nayrankäna” sasa. Ukatsti akham sarakïnwa: “Jutïrin inas yantʼanakan uñjaschiñäni, ukhaw kunanakatï utjkistu ukat jiwasatak importante janicha ukajj qhan uñjasini. ¿Kunas jiwasatak wali importantejja? ¿Diosat jan jitheqtatasat salvatäña, jan ukajj kunanakatï utjkistu ukacha? Akapachajj tukusjjani ukhajja, inas jan walinakan uñjaschiñäni, kunatï utjkistu ukanak jaytañas wakisirakchini. Jiwasajj ukatak wakichtʼatäñasawa”. w22.01 pág. 4 párrs. 7, 8

Israelitanakajj Egiptot mistunjjapjjäna uka qhepatjja, Jehová Diosajj sutipata, kunjam Diosasa uka toqetwa Moisesar parläna. Akham sänwa: “Jehová, Jehová, jupajj khuyaptʼayasiri, sinttʼasiri, pacienciani, wali munasiri ukhamarak jan jaytjasiri, arupar phoqeri, waranq waranqa jaqenakar munasiñamp uñjiri ukhamarak jan jaytjiri, pantjasitanakatsa jan wali luratanakatsa juchanakatsa perdonir Diosawa” sasa (Éx. 34:6, 7). Uka suma arunakampejja, Jehová Diosajj janiw munasiñat jan jaytjasirïtapak siskänti. ¿Kunampsa sarakïna? Uk uñjañäni. Jehová Diosajj janiw munasiñat jan jaytjasirïtapak siskänti, jan ukasti “wali munasiri ukhamarak jan jaytjasiri” Diosätapwa sarakïna. Uka arunakajj paqallqo kutimpiw Biblian uñsti (Núm. 14:18; Neh. 9:17; 13:22; Sal. 86:15; 103:8; Joel 2:13; Jon. 4:2). ‘Wali munasiri jan jaytjasiri’ sasajj Jehová Dios saparukiw uka textonakan sasi, janipuniw jaqenakarojj saskiti. Jehová Diosajj jupa pachpat ukham walja kuti satapajj wali musparkañawa. w21.11 págs. 2, 3 párrs. 3, 4

Apóstol Pedrompita esposapampitwa casarat chacha warminakajj yateqasipjjaspa. Pedrojj inas Jesusarojj sojjta phajjsinakaki jan ukajj mä maraki uñtʼaskchïna, ukhaw wali wakiskir mä amtar purïna. Jesusajj jupar arkañapatak invitkäna ukhajja, Pedrojj chawlla katusaw trabajiskäna, ukatwa janïr mä amtar purkasajj esposapat amuytʼäna (Luc. 5:1-11). ¿Kuna amtarus purïna? Jesusamp chika predicañwa amtäna. Esposapasti jupar apoyarakïnwa. ¿Kunatsa ukham sistanjja? Jesusajj jaktjjäna uka qhepatjja, Pedromp chikaw esposapajj mä qhawqha tiempo viajïna sasaw Bibliajj qhanañchi (1 Cor. 9:5). Niyakejjay apóstol Pedron esposapajj wali yateqaskay warmïchïnjja, Pedrojj qhana arunakampiw esposanakarusa esposonakarus ewjjtʼaspäna (1 Ped. 3:1-7). Apóstol Pedrosa esposapasa, Diosan Reinoptï nayrar uchañäni ukhajj Jehová Diosaw kunatï jakañatak munaski ukanak churistani sasaw confiyapjjäna (Mat. 6:31-34). w21.11 pág. 18 párr. 14

Apóstol Pablojja jilat kullakanakarojj wal munasïna, jupanak laykojj jan inaktʼasaw trabajïna (Hech. 20:31). Ukatwa jupar wal munasipjjpachäna. Mä kutejja, Éfeso markankir ancianonakajj jupan jan kuttʼanjjañap yatipjjäna ukhajja, “taqpachaniw wal jachapjjäna” (Hech. 20:37). Jichhürunakanjja Pablot yateqasisaw ancianonakajj jilat kullakanakar wal munasipjje, jupanakar yanaptʼañatakejj walja sacrificionak lurapjjaraki (Filip. 2:16, 17). Ukampis awisajj taqe luräwinakapamp phoqañajj chʼamakiwa. Ancianonakajj walja lurañanakanïpjjewa, jupanakajj Pablotwa yateqasipjjaspa. Jupajj janiw angelanakjam chʼamanïkänti, jan ukasti pantjasir jaqekïnwa, ukatwa awisajj kunatï walïki uk lurañatakejj wal chʼamachasiñapäna (Rom. 7:18-20). Walja jan walinakansa uñjaskchïnjja janiw qarjtkänti, kusisitakïskänwa. Ancianonakatï jupat yateqasipjjanejja, jan walinakan uñjaskasas kusisitaw Jehová Diosar servisipkakini. w22.03 pág. 26 párrs. 1, 2

Biblian Levítico 19:3 textojj sábado uru imapjjañamawa sasaw qhanañchi. Cristianonakajj janiw Moisesan Leyiparjamajj sarnaqjjtanti, ukatwa semanan mä uru imañajj jan wakisjjeti. Ukampis israelitanakajj kunsa uka urojj lurapjjerïna, sábado uru imapjjatapat kuna bendicionanaksa katoqapjjäna ukanakat waljanakwa yateqsna. Uka urojj janiw kunsa lurapjjañapäkänti, Jehová Dios saparukiw adorapjjañapäna. Ukatwa Jesusajj uka urojj sinagogar sarirïna, ukanwa Diosan Arup liytʼirïna (Éx. 31:12-15; Luc. 4:16-18). Levítico 19:3 textojj sábado uru imañjjat parlki uka mandatojja, lurañanakasat tiempo apstʼasisin Diosar serviñ nayrar uchañatakiw chʼamañchtʼistu. ¿Uka toqen chʼamachasiñas wakisitapti amuytan? Jehová Diosar serviñatak tiempo apstʼasiñäni ukhajja, jupampejj sapürutjamaw jukʼamp sum apasiñäni. Ukaw santo jaqëñatakejj wali wakiskirejja. w21.12 pág. 5 párr. 13

Jesusajj aka oraqenkkäna ukhajj taqe kasta jaqenakampiw chikachasïna. Wali qollqeninakampi jilïr autoridädanakampiw manqʼäna, pobrenakampis chikachasirakïnwa, juchararanakatsa khuyaptʼayasirakïnwa. Ukham luratapatjja, jachʼa jachʼa tukur jaqenakajj Jesusat pächasipjjänwa. Discipulonakaparojj akham sapjjänwa: “¿Kunatsa jumanakajj impuesto cobririnakampi juchararanakamp chikajj manqʼapjjta, umapjjarakta?” sasa. Jupanakarojja jichhürutak apstʼat textonkir arunakwa Jesusajj säna (Luc. 5:29-31). Mesiasan aka oraqer jutañapatak walja maranak faltkipanjja, jaqenakajj janiw Jesusar katoqapkaniti sasaw Isaiasajj qellqäna. Akham sänwa: “Juparojj jiskʼachapjjänwa, apanukupjjarakïnwa [...]. Jupajj janis khitimpi uñjatäñapas wakiskaspa ukham jiskʼachatänwa, ukhamäkipansa uñisnuktanwa, apanukuraktanwa” sasa (Is. 53:3). Uka profeciarjamajj Mesiasajj ‘jaqenakampi apanukutäñapänwa’, ukhamajj jaqenakan Jesusar jan creyipjjatapatjja, judionakajj janiw mayjtʼasipjjañapäkänti. w21.05 págs. 8, 9 párrs. 3, 4

Yaqhep nayrïr cristianonakajj janiw Diosan ewjjtʼanakaparjam jankʼak lurapkänti (Sant. 1:22). Yaqhepanakasti qollqeninakarukiw sum uñjapjjäna (Sant. 2:1-3). Yaqhepanakasti jan amuytʼasisakiw kuns parlapjjarakïna (Sant. 3:8-10). Uka cristianonakajj ukham jan walinakansa uñjasipkchïnjja, jupanakajj cambiapjjaspawa sasaw Santiagojj amuyäna. Munasiñampi, qhana arunakampiw jupanakar ewjjtʼäna. Jehová Diosar serviñan aynachtʼatäpkäna ukanakarojj ancianonakan yanaptʼap thaqapjjañapatakiw chʼamañchtʼarakïna (Sant. 5:13, 14). Kunsa yateqsna: mayninakajj kunjamäsipkisa uk sumwa amuyañasa, cambiapjjaniwa sasaw amuyañasaraki. Walja yateqerinakatakejja, Biblian ewjjtʼanakaparjam lurañajj janiw faciläkiti (Sant. 4:1-4). Nayra jakäwinakap jaytjjasin cristianjam jakjjapjjañapatakejj tiempow munasispa. Kunansa Bibliat yateqerisajj cambiañapa uk jan ajjsarasaw jupar sañasa. Janiw cambykaspati sasajj janiw jiwasajj amuyañasäkiti, Jehová Diosaw humilde chuymaninakarojj jupan ukar irpanini, cambiañatakis chʼam churani sasaw confiyañasa (Sant. 4:10). w22.01 pág. 11 párrs. 11, 12

Cristianonakajja taqeniw Jehová Diosjam khuyapayasirïñ muntanjja. Jan khuyaptʼayasirinakarojj janiw Jehová Diosajj istʼkiti. Jehová Diosajj oracionanakas istʼistaspa ukwa muntanjja, ukatwa mayninakar jan sinttʼasiñampi uñjañat wal amuyasiñasa. ‘Yanaptʼa munirin artʼasitap jan istʼañatak’ jiñchu lluptʼasiñat sipansa, tʼaqesiski uka cristianor istʼañatakejj jankʼakïñasawa. Ukatjja “khititejj jan khuyaptʼayasirïki ukajja, jan khuyaptʼayasis juzgatarakïniwa” sasin Bibliajj siski uka ewjjtʼarjam lurañatakiw chʼamachasiñasa (Sant. 2:13). Jiwasatï humildëñäni, khuyaptʼayatäñ munatas amuyasiñäni ukhajja, mayninakar khuyapayañajj janiw chʼamäkaniti. Jucha lurirejj arrepentisisin congregacionar kuttʼanjje ukhaw jukʼampis khuyapayasiñ uñachtʼayañasa. Biblian qellqatäki uka sarnaqäwinakajja, mayninakat khuyaptʼayasiñataki, munasiñamp uñjañatakiw yanaptʼistu. w21.10 pág. 12 párrs. 16, 17

Jesusajja janïr jiwayatäkäna uka qhep qhepa arumajja orasiñataki, lupʼiñatakiw mä chʼusa lugar thaqäna, Getsemaní jardinaruw saräna. Ukanwa discipulonakaparojj orasiñ toqet ewjjtʼäna. Getsemaní jardinar puripjjäna ukhajj inas chika arum pasatäjjchïna, ukhamajj wali arumäjjänwa. Apostolonakaparojj jan ikjapjjañapatakiw mayïna, ukatsti orasiriw saräna (Mat. 26:37-39). Jesusajj kuttʼanïna ukhajja ikiraskirwa jupanakar jikjjatäna, ukatwa “amuyasipjjapunim, oracionsa jan jaytas lurasipkakim” sasin mayamp säna (Mat. 26:40, 41). Jupanakan wali estresatäpjjatapa wali qaritäpjjatap Jesusajj yatïnwa, ukatwa jupanakat khuyaptʼayasisajj “jañchejj janiw chʼamanïkiti” sasin säna. Jesusajj pä kutimpiw orasir saräna, kuttʼanïna ukhajj jupanakajj ikirasipkänwa, janiw orasipkänti (Mat. 26:42-45). w22.01 pág. 28 párrs. 10, 11