Diciembre

Kunjamsa discipulonakapampejj apasïna uk uñachtʼayañatakejja, Jesusajj awatirimpit ovejanakapampit parläna (Juan 10:14). Uka uñachtʼäwejj cheqäskapuniwa, ovejanakajj awatiripar uñtʼasipjjewa, aruparus istʼasipjjarakiwa. Mä turistajj pachpa nayrapampiw uk uñjäna. Jupajj akham siwa: “Mä qhawqha ovejanak uñjasajja, mä video grabañ munapjjayäta. Ukatwa ovejanakan nanakar jakʼachasipjjañapatakejj jawsapjjayäta, ukampis arunakaj jan uñtʼapjjatap laykojj janiw istʼapkitänti. Ukhamaruw uka ovejanak awatiri mä waynitojj uñstanïna, arup istʼasasti jankʼakiw ovejanakajj qhepap sarapjjäna” sasa. Kunatï uka turistar paskäna ukajja, kuntï Jesusan discipulonakapajj ovejanakar uñtasit lurapjjañapäkäna uk amtayistu. Jesusajj jupanakat akham sänwa: “Ovejanakasti arunakaj istʼapjjaniwa” sasa. Niyakejjay Jesusajj alajjpachankchejja, ¿kunjamsa juparojj istʼsna? Mä toqetjja, kuntï yatichkäna ukarjam lurasaw juparojj istʼsna (Mat. 7:24, 25). w21.12 pág. 16 párrs. 1, 2

Nayra tiemponjja, apóstol Pablojj jan waltʼayañatakiw cristianonakar arknaqäna. Ukampis tiempompejj jan wal luraskatap amuyasisajj cambiänwa (1 Tim. 1:12-16). Jehová Diosan yanaptʼapampejja, wali munasiri, sinttʼasiri khuyaptʼayasiri, humilde chuymani awatirëjjänwa. Diosajj perdonjjetuwa sasaw jupajj confiyäna, janirakiw pantjasitanakapat jukʼamp piensjjänti (Rom. 7:21-25). Jan perfectötap sum yatïna, ukatwa suma cristianöñatak chʼamachasïna, predicacionamp phoqañatakis humilde chuymampiw Diosamp yanaptʼayasïna (1 Cor. 9:27; Filip. 4:13). Ancianonakajj janiw perfectöpjjatap laykojj ancianot uttʼayatäpkiti, ukampis Jehová Diosajj pantjasitanakapat amuyasipjjañapa, suma cristianöñatak chʼamachasipjjañapwa muni (Efes. 4:23, 24). Kunjamäsipkis uk Biblian yanaptʼapampi amuykiptʼasisajj cambiapjjañaparakiwa. Ukhamtï lurapjjanejja, Jehová Diosajj kusisit jakasipjjañapataki, luräwinakap sum phoqapjjañapatakiw yanaptʼani (Sant. 1:25). w22.03 págs. 29, 30 párrs. 13-15

Mä jilataru jan ukajj mä kullakaru juzgaskatas amuyasstan ukhajja, ¿kunsa lurañasa? Jilat kullakanakarojj munasiñasawa, ukwa amtañasa (Sant. 2:8). Mayninakar jan juzgañatakejja, Jehová Diosaruw oracionan ruwtʼasiñasaraki. Mayisitanakasarjam lurañatakejja, juzgasktan uka jilatampi jan ukajj kullakampiw parltʼañasa jupamp manqtʼasiñatakisa predicañatakis invittʼaraksnawa. Jupar jukʼamp sum uñtʼasajja, Jehová Diosampit Jesusampit yateqasisaw jupan suma chuymanïtap uñjañatak chʼamachasiñasa. Ukhamatwa suma awatirïsajj jan jukʼamp juzgapjjamti siski uka ewjjtʼar istʼatas uñachtʼayañäni. Kunjamtï ovejanakajj awatiripan arup istʼapkejja, ukhamarakiw Jesusan discipulonakapajj arup istʼtanjja. “Jiskʼa tama” taypinkañänisa jan ukajj ‘yaqha ovejanaka’ sasin uñtʼatäpki uka taypinkañänisa, taqeniw suma awatirin arupar istʼaskakiñasa (Luc. 12:32; Juan 10:11, 14, 16). w21.12 pág. 19 párr. 11; pág. 21 párrs. 17, 18

Rehoboam chachajj Israel markan reyipäjjäna ukhajja, Salomón tatamajj nanakan yukuj wali jathir tukuyawayki uk phisnaptayarapipjjeta sasaw markankirinakajj mayipjjäna. Ukhamïpanjja Rehoboam reyejj Israel markan ancianonakaparuw jisktʼasïna, ukham luratapajj wali askïnwa. Jupanakajja kuntï markankirinakajj mayipktam ukanak istʼäta ukhajja, jumarojj servipjjapunïtamwa sasaw jupar sapjjäna (1 Rey. 12:3-7). Amuyatajja jupanakan ewjjtʼapajj Rehoboam reyirojj janiw gustkänti, ukatwa jupamp chik jilsupkäna uka chachanakar jisktʼasir saräna. Jupanakajj markar jukʼamp tʼaqesiyañapatakiw ewjjtʼapjjäna (1 Rey. 12:9-11). Rehoboam reyejj kawkïris walejja uk amtañatakejj Jehová Diosaruw jisktʼasispäna, ukampis jupamp chik jilsupkäna uka chachanakan ewjjtʼaparuw istʼäna. Ukham amtatapatjja, jupasa markasa jan walinwa uñjasipjjäna. Jiwasampejj ukaw pasarakispa, yaqhep ewjjtʼanakajj janiw gustkapunistaspati. Ukampis Bibliarjamächi ukhajj katoqtʼasiñasawa. w22.02 pág. 9 párr. 6

Mä jaqejja kuntï waynanakajj jan lurañ yatipki ukanakak uñchʼukiñat sipansa, kuntï yatipki ukanakwa uñji. Kuntï lurkta uk aparitaniwa sañat sipansa, compañero masinakaparjamaw uñji. Edadani jilat kullakanakajja, wayn tawaqonakarojj Diosan regalopjamaw uñjapjje, kunanaktï lurapki ukanakatsa wal yuspärapjje. Niyakejjay marat maratjamajj jukʼa chʼamanikëjjapjjchejja, wayn tawaqonakan congregacionan yanaptʼapjjatap valoranitwa uñjapjje. Uka toqet Noemí warmejj wali yateqaskayawa, jupajj wali yuspärasirïnwa, mä tawaqon yanaptʼapsa taqe chuymaw katoqasïna. Yoqapajj jiwjjäna uka qhepatjja, Rut yojjchʼaparojj ‘familiaman ukar kuttʼjjam’ sasaw säna. Ukampis Rut tawaqojj janiw jupar jaytañ munkänti, Belén markar jupamp kuttʼañwa mayïna, Noemí warmisti iyaw sänwa (Rut 1:7, 8, 18). Ukajj panpachanitakiw mä suma bendicionäna (Rut 4:13-16). Humilde chuymani edadani jilat kullakanakajj Noemí warmitwa yateqasipjjaraki. w21.09 págs. 10, 11 párrs. 9-11

Alajjpachankir Awkisajj kunjamanakansa sapa maynejj jakastan uk sum yati. Inas jilaparte amigonakamat sipans jukʼamp lurañ puedsta, jan ukajj inas edadanëjjatam layku, usuntatätam layku, jan ukajj familiaman lurañanak utjatap layku jan mayninakjam lurañ puedkstati. Ukampis jan aynachtʼamti (Gál. 6:4). Kuntï jumajj lurkäta uk janiw Jehová Diosajj armaskaniti. Jumatï Jehová Diosatak taqe kuns sum lurañatak chʼamachasïta, suma chuymamp uk lurarakïta ukhajja, jupajj kusisiniwa. Kunjam chuymampis lurta uk Diosajj sum uñjaski. Jupar adorasajj wali kusisita, chuymas chuyma jikjjatasisma ukwa muni. Jan waltʼäwinakan uñjasktan ukhajja, Jehová Diosaw yanaptʼistu, ukatwa jichhas chuymasan sumak jikjjatastanjja (Is. 41:9, 10). Munasir Dios Awkisar kusisit adorañatakejja, walja razonanakaw utjistu, ‘¡jupakiw taqe luratanakapat jachʼañchäwi, honra katoqañatakejj derechoni!’ (Apoc. 4:11). w22.03 pág. 24 párr. 16; pág. 25 párr. 18

Taqeniw Jesusat yateqasiñ muntanjja, ukampis Jesusat taqe kunpun yateqasiñ jan puedkchiñäni ukhajja, janiw aynachtʼañasäkiti (Sant. 3:2). Mä yateqerejja janiw kunjamtï yatichiripajj lurki ukhampun lurkaspati, ukampis pantjasitanakapat yateqani, yatichiripjamäñatak chʼamachasiskakini ukhajja, jukʼat jukʼat jukʼamp sumwa lurjjani. Jiwasampejj niya ukhamarakiwa, Bibliat sapaki yatjjatasajj kunanaktï yateqktan ukarjam lurañäni, jan pantjasiñatak chʼamachasiskakiñäni ukhajja, Jesusat jukʼamp sumwa yateqasiñäni (Sal. 119:59). Diosar jan uñtʼapki uka jaqenakajja, jupanak pachpatakwa llakisipjje, ukampis Jehová Diosan servirinakapajj janiw ukhamäktanti. Jesusajj janiw jupa pachpatak llakisirïkänti, ukaw jiwasarojj jupat yateqasiñatak chʼamañchistu (1 Ped. 2:21). Jesusajj jupa pachpat llakisiñat sipansa mayninakatwa llakisirïna. Jiwasatï ukham lurañatak chʼamachasiñäni ukhajja, Jehová Diosajj kusisiniwa, jiwasas kusisitarakïñäniwa. w22.02 pág. 24 párr. 16; pág. 25 párr. 18

Jehová Diosajj Biblia toqew markapar jichhürunakan irpaski. Jupajj yatichkistu ukanakat lupʼiñatak tiempo apstʼasiñäni ukhajja, kuntï siskistu ukar istʼañäniwa, predicacionampis phoqarakiñäniwa (1 Tim. 4:15, 16). Maysa toqetjja, ‘suma phoqeri amuyasir esclavo’ toqew Diosajj markapar irparaki (Mat. 24:45). Awisajja kuna instruccionanaktï uka esclavojj churkistu ukanak janiw sum amuyksnati. Terremoto jan ukajj yaqha ukham jan waltʼäwinakan uñjasisajj kunjamsa salvassna uka toqet inas instruccionanak katoqchiñäni. Ukhamïpanjja ‘jakasktan uka cheqan janiw ukajj paskaniti’ sasaw amuysna. Katoqkañäni uka instruccionanakajj janis yanaptʼkistaspa ukham amuyañäni ukhajja, Biblian liytʼktan uka sarnaqäwinakatwa lupʼsna. Diosajj walja kutiw servirinakapar instruccionanak churäna, ukanakajj jaqen amuyuparjamajj janis waljamäkchïnjja, salvasipjjañapatakiw yanaptʼäna (Juec. 7:7; 8:10). w22.03 pág. 18 párrs. 15, 16

Jesusajj Diosar taqe chuym confiyasaw jichhürutak apstʼat texton uñstki uka arunak säna. Jehová Diosakiw juparojj jaktayaspänsa janisa, ukwa Jesusajj yatïna. Awkijajj janiw nayat armaskaniti sasaw taqe chuyma confiyäna. ¿Kunsa yateqsna? Jakäwis aptʼasirjamäkasasa, janiw Jehová Diosat jitheqtañasäkiti. Ukatakejj Juparuw taqe chuyma confiyañasa (Prov. 3:5). Joshua jilatat parltʼañäni. Jupajj 15 maranïkasajj jan qollkay usunïnwa. Diosan leyinakap conträkäna uka tratamientonak janiw katoqañ munkänti. Janïr jiwkasajj mamitapar akham sänwa: “Mamita, Jehová Diosaw cuidaskitani. [...] Jupaw jaktayitani, janiw ukat pächaskti. Diosajj chuymaj uñtʼiwa, taqe chuyma jupar munasitajsa yatirakiwa” sasa. Taqeniw akham jisktʼasiñasa: “Jakäwij aptʼasirjama mä yantʼan uñjasirista ukhajja, ¿Diosar jan jitheqtas serviskakïti, jupaw jaktayitani sasin confiyaskakïti?” sasa. w21.04 págs. 12, 13 párrs. 15, 16

Jehová Diosan markapankirinakajja, predicasaw chʼamañchtʼat jikjjatastanjja. Jaqenakajj istʼapjjchistusa janisa, predicasajj wal jiwasajj kusistanjja, chʼamañchtʼarakistuwa. Awisajj kunaymaninakan uñjasisaw jukʼak predikjjsna. Ukampis jiwasatï qhawqtï puedktan ukarjam lurañatak chʼamachasiñäni ukhajja, Jehová Diosarojj wal kusisiyañäni. Jiwasanakat yaqhepajja, janiw utat mistuñ puedktanti, ukampis predicañ wal muntanjja, uk Jehová Diosajj yatiwa. Ukhamajj jupaw jiwasar cuidkistu ukanakar predicañataki, doctoranakar predicañatak yanaptʼistaspa. Kunanaktï nayrajj lurkayätan ukanak jichhajj jan lurañ puedjjasajj aynachtʼsnawa. Ukampis kunjamsa Jehová Diosajj yanaptʼaskistu uk amuyañäni ukhajja, jan walinakan uñjaskañäni ukhas jan aynachtʼas aguantañatakejj chʼamanïñäniwa. Ukhamarusa predicktan ukanakat kawkïris Diosar serviñan jiltani janicha uk janiw yatktanti (Ecl. 11:6). w21.05 págs. 24, 25 párrs. 14-17

Jehová Diosajja Davidarojj wali qollqeniru, reyiru ukhamaw tukuyäna ukatjja walja guerranakwa atipjayarakïna. Taqe ukanakat yuspärasajja, kunanaktï Diosajj churkitu ukanakajj “janiw jaktʼañjamäkiti” sasaw Davidajj säna (Sal. 40:5). Ukampis tiempompejja, kunanaktï Jehová Diosajj churkäna ukanakat armasjjänwa. Walja warminakanïkchïnsa yaqha chachan warmipwa munapayjjäna, ukajj Diosatak janiw walïkänti. Uka warmejj Bat-Seba satänwa, esposopasti Urías sat hitita jaqënwa. Davidajj jupatakik taqe kuns munasajja, adulterio jucharuw Bat-Seba warmimp purtʼasïna, ukat usuriptayänwa, Uriasar guerran jiwayapjjañapatakiw mayirakïna (2 Sam. 11:2-15). ¿Kunsa amuypachäna? ¿Jehová Diosajj janiw uñjkituti sispachänti? Davidajj walja tiempos Diosar jan jitheqtas sirvkchïnjja, jupatakik taqe kuns munañampi apayasisajj jan waliruw purtʼasïna. Ukampis qhepatjja juchap arsusïnwa, arrepentisirakïnwa. Jehová Diosan jupar perdonatapat wal yuspäräna (2 Sam. 12:7-13). w21.06 pág. 17 párr. 10

Maynir Bibliat yatichañatak janis wakichtʼatäksna ukhamwa amuysna. ‘Nayraqatajj Bibliat jukʼamp yatjjatañajaw wakisi, suma yatichirïñajaw wakisiraki’ sasin inas ajjsarayasstan. Ukhamächi ukhajja, kunanakas jan ajjsarañatak yanaptʼistaspa uk kimsa toqet uñjañäni. Maya, Jehová Diosajj Bibliat yatichañatak wakichtʼatätaswa amuyi. Paya, ‘alajjpachansa ukhamaraki aka oraqensa taqe munañanïki’ uka Jesusaw mayninakar yatichañ mayistu (Mat. 28:18). Kimsa, janiw sapakïktanti. Jesusjamarakiw Jehová Diosaw kuntï sañajäki uk parlañatak yanaptʼitani sasin confiyañasa (Juan 8:28; 12:49). Ukatjja predicación sarayir jilatampi, sum yatichañ yatki uka precursorampi, jan ukajj experienciani publicadorampiw parltʼsna. Jupanakaw yatichañ qalltañatakisa, Bibliat yatichañatakis yanaptʼistaspa. Yatichasipki ukar compañtʼañäni ukhajja, jupanakjam suma yatichirïñäniwa. w21.07 pág. 6 párr. 12

Aka jan wali pachan tukusiñapajj sapürutjamaw jukʼamp jakʼankjje, ukatwa kunjamsa Jehová Diosajj taqe kunsa luri ukar jukʼamp confiyañasa. ¿Kunatsa? Kuna instruccionanaktï jachʼa tʼaqesiñ tiempon katoqkañäni ukanakajj janis walïkaspa, janis yanaptʼkistaspa ukham inas amuychiñäni. Uka tiempon Jehová Diosajj janiw jiwasamp cheqak parlkaniti, inas markap irpapki ukanak toqe instruccionanak churchistani. Ukhajj janiw payachasiña jan ukajj akham jisktʼasiñ tiempökaniti: “¿Uka instruccionanakajj Jehová Diosatti jutpacha, jan ukajj markap irpapki ukanakakich munañaparjam ukham lurañ amtapjjpacha?” sasa. Uka tiemponjja ¿Jehová Diosarusa markaparus confiyañäniti? Jichha tiempon Diosan markapan instruccionanakapar istʼasktanti janicha ukaw uk yatiñatak yanaptʼistani. Jiwasatï uka instruccionanakar confiystan istʼarakstan ukhajja, jachʼa tʼaqesiñ tiempon inas ukham lurarakchiñäni. w22.02 pág. 6 párr. 15

Jehová Diosan yanaptʼapampejja, Gedeonajj 300 jaqenakapampejj mä guerranwa atipjapjjäna, ukham lurapjjatapat wal jachʼañchasipjjaspäna. Maysa toqetjja Efraín tribunkirinakajj Gedeonampi parlir sarapjjäna ukhajja, felicitañat sipans toqjapjjänwa, kuna laykutejj janiw chʼajjwawir mayachasipjjañap maykänti (Juec. 8:1). Gedeonajj kunjamsa Diosajj jupanakar bendisïna ukwa amtayäna. Uk istʼasasti, ‘jupanakajj colerap apjtayasipjjänwa’ (Juec. 8:3). Gedeonajj Diosan markapan sumankañ utjañapatakejj janiw jachʼa jachʼa tukkänti. Jiwasajja jachʼañchayasiñat sipansa, Diosar jachʼañchasiñapatakiw yanaptʼañasa, ukwa Efraín tribunkirinakat yateqsna. Maynejj jiwasatak coleratäki ukhajja, kunatsa colerata uk amuyañatakiw chʼamachasiñasa, kuna sumti lurki ukatsa felicittʼañasarakiwa. Ukatakejj humildëñaw wakisi. Razonanïksnas ukham uñachtʼayañat sipansa, jilat kullakanakampi sum apasiñaw wakiskirejja. w21.07 págs. 16, 17 párrs. 10-12

Jehová Diosajj jupar uñtasit lurasaw jachʼañchistu. Niyakejjay Jehová Diosar uñtasit luratästanjja, jupjam munasirïña, khuyaptʼayasirïña, jan jaytjasirïña, cheqapar uñjirïñ yateqsnawa, uñachtʼayaraksnawa (Sal. 86:15; 145:17). Ukham lurañatak chʼamachastan ukhajja Diosaruw jachʼañchtan, yuspärataswa uñachtʼayaraktanjja (1 Ped. 1:14-16). Kunatï Diosar gustki uk lurtan ukhajj kusisitätanwa. Niyakejjay jupjam chuymani luratästanjja, kunjam jaqëñastï familiap taypin munki ukham jaqeruw tuksna. Jehová Diosajj mä suma lugarwa jakasiñasatak wakichawayi. Nayrïr jaqer lurañatak walja tiempo faltkipanwa Diosajj aka oraqe jaqenakatak wakichawayi (Job 38:4-6; Jer. 10:12). Niyakejjay Diosajj wali munasiri, wajjtʼasiri ukhamächejja, kusisit jakasiñasatakejj taqe kunwa lurawayi (Sal. 104:14, 15, 24). Diosajj kunanaktï lurkäna ukanakat awisajj lupʼïna ukhajja, ‘ukanakajj wali sumätapwa uñjäna’ (Gén. 1:10, 12, 31). w21.08 pág. 3 párrs. 5, 6

Taqe cristianonakaw predicañasa ukat jaqenakar Jesusan discipulopar tukupjjañapatak yanaptʼañasaraki (Mat. 28:19, 20; Rom. 10:14). Ukanak jukʼamp sum lurañatakejja, Sum yatichañataki sat folletotwa yatjjatsna. Kunanak lurañtï munktan ukanak amtkasajja, Jehová Diosajj munki ukham jaqëñatakiw chʼamachasiñasa (Col. 3:12; 2 Ped. 1:5-8). Taqeniw Jehová Diosatak jukʼamp lurañ muntanjja. Diosajj arsuwayki uka Paraisonwa jupar phoqatpach serviñäni. Uka uru puriniñapkamajja, kunanaktï jichhajj lurañ puedktan ukanak lurañatak chʼamachasiñäni, ukhamatwa jukʼamp kusisitäñäni, janiw añch llakiskañäniti. Jan ukasti ‘kusisiri Jehová Diosasaruw’ jachʼañchañäni (1 Tim. 1:11). Ukhamajja qhawqtï Diosatak lurañ puedktan uk lurasajj kusisitäpjjañäniwa. w21.08 pág. 25 párrs. 18-20

Jumatï Testigo familian jilsuwaystajja, inas Diosat jiskʼatpach yateqawaysta. Jupajj taqe kun Lurirïtapa, wali suma chuymanïtapa, jaqenakan mä suma Paraison jakasipjjañap munatapwa yateqpachätajja (Gén. 1:1; Hech. 17:24-27). Walja jaqenakajj Diosan utjatapsa, taqe kun luratapsa janiw creyipkiti. Jakañajj ina chʼusatakwa utjawayi, ukat jukʼat jukʼatwa jan yäqañjam jiskʼa animalanakat qalltasin wali musparkañ jakirinakar tukuwayi sasaw amuyapjje. Ukham sirinakat yaqhepajj universidadanakan yatjjatirinakäpjjewa. Jupanakajj akham sapjjaspawa: ‘Ciencia toqet yatjjatirinakajj Biblian pantjatätapwa uñachtʼayi, jan amuytʼasirïpki, jan kuns yatipki ukanakakiw mä Luririn utjatapar creyipjje’ sasa. Jukʼa jan ukajj walja tiempos Diosar sirvjjstanjja, jupar jukʼamp confiyañatakejj chʼamachasiskakiñasawa. Ukhamtï lurañänejja, Biblian yatichäwinakapajj kʼariwa sasin sapkistani ukhajj janiw uka ‘jaqenakan kʼari arunakapampejj’ engañjayaskañäniti (Col. 2:8). w21.08 pág. 14 párrs. 1-3

Abel, Noé, Abrahán ukat Job chachanakajja, Jehová Diosar respetapjjatapsa munasipjjatapsa jupar istʼasa, jupar confiyasa, sacrificionak lurasaw uñachtʼayapjjäna. Diosar jachʼañchañatakejj wal chʼamachasipjjäna, Diosasti jupanakan adoracionap katoqasïnwa. Tiempompejja Abrahanan wawanakaparojj Moisesan Leyipwa Diosajj churäna. Uka Leyinjja, kunjam adoratäñsa Diosajj muni uka instruccionanakwa churäna. Jesusan jiwatap qhepata jaktatap qhepatjja, Jehová Diosajj janiw markaparojj Moisesan Leyiparjam sarnaqjjapjjañap mayjjänti (Rom. 10:4). Cristianonakajj ‘Criston leyiparjamaw’ sarnaqjjapjjañapäna (Gál. 6:2). Ukatakejj janiw mä listarjamajj sarqapjjañapäkänti, jan ukasti Jesusatwa yateqasipjjañapäna, yatichäwinakaparjamaw sarnaqjjapjjañaparakïna. Jichhürunakanjja cristianonakajj Jehová Diosar kusisiyañatakisa, ‘samarañ jikjjatañatakis’ Jesusat yateqasiñatakiw wal chʼamachasipjje (Mat. 11:29). w22.03 págs. 20, 21 párrs. 4, 5

Jehová Diosajj wawanakapar istʼiwa. Jesusajj aka oraqenkkäna ukhajj walja kutiw orasïna, taqe uka oracionanakapwa Awkipajj istʼäna. 12 apostolonakapar ajlliñatak mayisïna ukhajj ukhamarakiw istʼänwa (Luc. 6:12, 13). Wali llakita jikjjatasisin orasïna ukhas istʼarakïnwa. Judasajj janïr aljantkäna ukhajja, jan walinakar saykatañatakiw Jesusajj orasïna. Awkipasti munat Yoqapar istʼänwa, mä angelaruw chʼamañchtʼañapatak khitäna (Luc. 22:41-44). Jichha tiemponjja, Jehová Diosajj oracionanakas istʼarakiwa, kunapachas wakisi, kunjamas wakisi ukarjamaw oracionanakasar jaysistu (Sal. 116:1, 2). India markan jakasiri mä kullakajj jupa pachpaw uk uñjäna. Jupajj wali llakitaw jikjjatasïna, ukatwa Diosar yanaptʼa mayisïna. Kullakajj akham siwa: “Mayo 2019 maran JW Broadcasting^® programajj kunjamsa llakinakar atipjsna uka toqetwa parläna. Ukajj nayatakjamapunïnwa. Uka programa toqew Diosajj oracionanakajar jaysitäna” sasa. w21.09 págs. 21, 22 párrs. 6, 7

¿Nayrïr cristianonakatakejj taqe kun jaytasa yaqha cheqar familiapamp jakir sarjjañajj kunja chʼamäpachänsa uk amuysnati? Jehová Diosaw kunatï jakañatak wakiski uk jikjjatañatak yanaptʼitani sasaw confiyapjjañapäna. Romanonakan Jerusalenar muyuntapjjañapatak phesqa maranak faltaskäna ukhajja, apóstol Pablojj wakiskir ewjjtʼanakwa hebreonakar churäna. Akham sänwa: “Jakañ vidanjja jan qollqe sinti munirïpjjamti, kunanakatï utjapktam ukanakampejj kusisitakïpjjam. Diosajj akham siwa: ‘Nayajj janipuniw jaytanukkämati, janipuniw apanukkämasa’ sasa. Ukhamajj jan ajjsarapjjañäniti, jan ukasti akham sapjjañäni: ‘Jehová Diosaw yanapirijajja, janiw ajjsarkäti. ¿Jaqejj kamacharakitaspasti?’” sasa (Heb. 13:5, 6). Apóstol Pablon uka arunakaparjam luriri cristianonakatakejja, kunanakatï jupanakan utjkäna ukampik yaqha cheqan jakañajj janiw chʼamäkänti, kusisitakiw jakasipjjäna. Jehová Diosaw kunatï jakañatak wakiski ukanak churistani sasaw confiyapjjäna. w22.01 pág. 4 párrs. 7, 9

Kunapachatï khuyaptʼayasiri mä jaqet lupʼtan ukhajja, ¿jupajj kunjamaw sisnasa? Wali munasiriwa, sinttʼasiriwa, wajjtʼasiriwa sasaw sissna. Jesusajj jaqe masipat sinttʼasiri mä samaritano jaqet parlkäna ukat inas amtasstan. Uka yaqha markat jutiri samaritano jaqejja, lunthatanakampi lluchʼsuta uñjasiri judío jaqerojj sinttʼasiñampiw uñjäna. Jupat ‘sinttʼasisajja’ sum cuidapjjañapatakiw munasiñat encargäna (Luc. 10:29-37). Uka uñachtʼäwejja, Jehová Diosajj kunja khuyaptʼayasirisa ukwa yatichistu. Jupajj munasiñatwa khuyaptʼayistu, kunaymanitwa sapüru khuyapayasiñap uñachtʼayistu. Maynin castigatäñapajj wakiskchisa, jan jupar castigasaw maynejj khuyaptʼayasirïtap uñachtʼayarakispa. Jehová Diosajj ukhamwa jiwasanakat khuyaptʼayasistu, uka toqet mä salmo qellqerejj akham sänwa: “Jupajj janiw juchanakasarjamajj uñjkistuti” sasa (Sal. 103:10). Ukampis awisajja, wakiski ukhajj Jehová Diosajj jucha luririrojj jan khuyaptʼayasisaw cheqañchi. w21.10 pág. 8 párrs. 1, 2

Jehová Diosajj munasirïtapsa jan jaytjasirïtapsa jupamp wali sum apasipki ukanakarukiw uñachtʼayi. Ukajja David reyisa ukat Daniel profetasa kamsapjjänsa ukanwa qhan amuyasi. Davidajj akham sänwa: “Khitinakatï jumar uñtʼapktam ukanakarojj munasirïtamsa jan jaytjasirïtamsa uñachtʼayaskakim” sasa. Daniel profetajj akham sarakïnwa: “Jehová Dios Tata, [...] jumar munasirinakarusa mandamientonakam phoqerinakarus munasiñampi jan jaytjasiñampi uñjiri” sasa (Sal. 36:10; 103:17; Dan. 9:4). Ukhamajja Jehová Diosajj jupar uñtʼapjjatapata, jupar ajjsarapjjatapata, jupar munasipjjatapata, mandamientonakap phoqapjjatap laykuw munasirïtapsa jan jaytjasirïtaps servirinakapar uñachtʼayi. Kunjamtï jupajj munki ukarjam adorapki ukanakarukiw munasiñamp uñji, ukhamajj janïr jupar sirvkayätan ukhatpachaw jupajj munasjjestäna (Sal. 104:14). Ukampis Jehová Diosar adorañ qalltjjtan ukhajja, munasirïtapa jan jaytjasirïtapwa uñachtʼayjjestu. w21.11 pág. 4 párrs. 8, 9

Kunas kunäskichinejja, jichhürutak apstʼat textonkir Jesusan arunakapar istʼañwa jiwasajj muntanjja. Jichha tiemponjja, religión pʼeqtʼirinakat wali uñtʼatäpki ukanakar istʼañaw walja jaqenakarojj wal gusti, jupanakarus niyaw adorapjje. Waljaniw iglesiapar sarapjje, libronakapsa alapjje, jupanakar apoyañatakis walja qollqwa churapjjaraki. Yaqhepajj kuntï uka pʼeqtʼirinakajj sapki taqe ukanakwa creyipjje. Jesusar uñjasas janiw ukham kusisipkaspati. Ukampis Jehová Diosan cheqpach servirinakapajj janiw khiti jaqerus arkktanti. Pʼeqtʼapkistu ukanakar respetkstansa, Jesusan yatichäwiparjamaw lurtanjja, jupajj akham sänwa: “Jumanakajj taqenis jilapuräpjjtawa” sasa (Mat. 23:8-10). Religión pʼeqtʼirïskpasa politicöskpasa janiw jaqenakar adorktanti, ni amtanakaparus apoyktanti. Janiw politicarusa akapacharusa mitiskaraktanti. Taqe ukanakanwa cristianöpjjtwa sasin sapki uka religionanakat mayjätanjja (Juan 18:36). w21.10 pág. 20 párrs. 6, 7

Maynitï santo jaqëñ munchi ukhajja, Jehová Diosamp sum apasiñaw taqe kunat sipansa jupatakejj importantëñapa. Diosan Testigonakapjamajja, janipuniw santo sutip qʼañuchañ munktanti (Lev. 19:12; Is. 57:15). Israelitanakajj Diosan leyinakap istʼasaw Diosaparjam katoqasipjjatap uñachtʼayapjjäna. Levítico 18:4 textojj akham siwa: “Nayajj Juezjam amtkta ukanaksa nayan leyinakajsa phoqapjjañamawa, ukanakarjamaw sarnaqapjjañamaraki” sasa. Levítico 19 capitulonjja, niya ukar uñtasit ‘leyinakaw’ Israel markatak uñstaraki. Sañäni, Levítico 19:5-8 ukat 21, 22 textonjja, sacrificionak loqtañatwa parli. Uka sacrificionakajj “Diosatak sagradöki” ukanak janiw jiskʼachañapäkänti. Uka versiculonak liytʼañajja, Jehová Diosatakjam kuns lurañataki, jachʼañchkir sacrificionak loqtañatakiw jiwasar chʼamañchañapa, kunjamtï Hebreos 13:15 textojj siski ukhama. w21.12 págs. 5, 6 párrs. 14, 15

Jichhak casarasirinaka, Jehová Diosar confiyañ yateqjjapjje ukanakan experiencianakapat waljanakwa yateqapjjasma. Yaqhep chacha warminakajja, walja maranakaw precursorat serviwayapjje. Jehová Diosar serviñan kunanaksa lurapjjasma uka toqet yanaptʼa munapjjsta ukhajja, jupanakaruw yanaptʼa mayipjjasma. Ukham lurasaw Diosar confiyapjjatam uñachtʼayapjjasma (Prov. 22:17, 19). Amtapjjapunim, matrimoniojj Jehová Diosan regalopawa, casadonakajj kusisit jakasipjjaspa ukwa jupajj muni (Mat. 19:5, 6). Jichhak casaratanaka, kunsa jakäwimampejj lurasipkta uk amuytʼasipjjam. ¿Jehová Diosajj churapktam uka regalonakat yuspärañatakejj chʼamachasisipktati? Jehová Diosar oracionan parltʼapjjam, kunantï yanaptʼatäñ munapkta ukatakejj Biblian wiñay yatichäwinakap thaqtapjjam, ukatsti uka ewjjtʼanakarjam lurapjjarakim. Jumanakatakitï Jehová Diosar serviñajj nayrankani ukhajja, matrimonion kusisitaw jakasipjjäta, janipun ukat payachasipjjamti. w21.11 pág. 18, 19 párrs. 16, 18

Jupas mayninakat sipans jilankkaspa ukham janiw Santiagojj amuyaskänti. Santiagojj janiw Jesusan jilapätap laykusa, Diosar serviñan suma privilegionak katoqatap laykus mayninakat jilankkaspas ukham tukkänti. Antisas jupanakarojj “munat jilanakaja” sasaw jupajj säna (Sant. 1:16, 19; 2:5). Janipunis pantjasirïkaspa ukham janiw tukkarakïnti. Kunsa yateqsna: taqeniw pantjasirïtanjja, ukwa amtañasa. Khitinakarutï Bibliat yatichktan ukanakat jilankksnas ukham janiw amuyañasäkiti. ¿Kunatsa? Jiwasatï janipunis pantjasirïksna ukham yateqerisar amuyayañäni ukhajja, janipuniw kuntï Diosajj maykitu uk phoqañ puedkäti sasaw amuyaspa. Ukampis Biblian wiñay yatichäwinakaparjam sarnaqañajj jiwasatakis awisajj chʼamakïtap qhan sañäni, kunjamsa Jehová Diosajj cambiañatak yanaptʼistu uks cuenttʼarakiñäni ukhajja, jupas Jehová Diosar serviñ pueditap amuyañapatakiw yanaptʼañäni. w22.01 págs. 11, 12 párrs. 13, 14 

Jiwasatï Jesusjam amuyañatak wal chʼamachasiñäni ukhajja, jupjamaw sarnaqañäni ukatjja kunjam chuymanisa uksa jukʼamp sum uñachtʼayarakiñäni (Heb. 1:3) Inas jumajj akham amuysta: “Jesusajj perfectowa. ¡Janipuniw nayajj jupjamäñ puedkiristti!” sasa. Jumatï ukham amuysta ukhajja, akanakat amtasipunim: maya, jumajj Jehová Diosjamäñataki Jesusjamäñatak luratätawa. Ukhamajj mä jukʼaksa jupanakjamäñ puedismawa (Gén. 1:26). Paya, Diosan espiritupjam yaqha chʼamajj janiw utjkiti. Espíritu santon yanaptʼapampejja, kuntï juma sapakejj jan lurañ puedkasma ukanakwa lurasma. Kimsa, Jehová Diosajja, espíritu santon achupan luräwinakap jan pantjasis phoqañam janiw suykiti. Munasiri Awkisajja, aka oraqen jakañ suytʼasipki ukanakarojj 1.000 maranakwa perfector tukupjjañapatak churani (Apoc. 20:1-3). Ukhamajj Jehová Diosajja, jichha tiempon wal chʼamachasiñaswa muni. Jupaw nayar yanaptʼitani sasin confiyañaswa munaraki. w22.03 pág. 9 párrs. 5, 6

Jehová Diosamp jukʼamp sum apasiñatakejj janiw orasiñakejj yanaptʼkistuti, Bibliat yatjjatañasa, tantachäwinakar sarañas yanaptʼarakistuwa. ¿Sum yatjjatañatakisa tantachäwinakajj yanaptʼkirïñapatakis kunsa lursna? Akham sasaw jisktʼassna: “¿Kunanakas tantachäwinak sum istʼañatsa sum yatjjatañats pantjasiyitu?” sasa. Uka horasanakajj mayniw celularat jawsanistaspa, mensajenak aptʼayanistaspa, jan ukajj yaqha ukham aparatonakaw pantjasiyistaspa. Jiwasatï Bibliat yatjjatkasina, jan ukajj tantachäwinkkasin yaqha toqet lupʼiskatas amuyasstan ukhajja, Jehová Diosaruw yanaptʼa mayisiñasa. Llakinak maysar apanukusin Bibliat wali amuyump yatjjatañajj chʼamakïspawa, ukampis Bibliat yatjjatañajj wali importantewa. Chuymassa, amuyussa jarkʼaqki uka sumankañ jiwasar churañapatakiw Diosar mayisiñasa (Filip. 4:6, 7). w22.01 págs. 29, 30 párrs. 12-14

Uzías reyejj janiw ewjjtʼanak katoqaskänti. Incienso loqtañatakiw templon kawkirutï sacerdotenakak mantapjjerïkäna ukar mantäna. Sacerdotenakajj akham sasaw jupar sapjjäna: “¡Uzías, Jehová Diosar incienso nakhayañamajj janiw jumar waktʼktamti! Sacerdotenakakiw incienso nakhayapjjañapa” sasa. Ukham ewjjtʼatajj ‘wal colerasïna’ sasaw Bibliajj qhanañchi. ¿Kunatsa ewjjtʼa jan katoqaskänjja? Reyïtap laykojj munañaparukis taqe kuns lurañapäkaspa ukham inas amuychïna. Ukampis Jehová Diosajj janiw ukham amuykänti. Uziasatï humilde chuymanïspänjja, ewjjtʼarojj istʼaspänwa, jankʼakiw templotsa sarjjarakispäna, Jehová Diosajj inas perdonarakchispäna. Ukampis jachʼa jachʼa tukutapatjja, Jehová Diosajj lepra usumpiw castigäna, “jiwañkamaw lepra usunïskäna” (2 Crón. 26:16-21). ¿Kunatï Uzías reyir paskäna ukat kunsa yateqtanjja? Khitïskchiñänisa, Biblian ewjjtʼanakaparutï jan istʼkañäni ukhajj janiw Jehová Diosampejj sum apasjjsnati. w22.02 pág. 9 párr. 7

‘Nayrajj kunjam jaqënsa’ ukanakamp apnaqayasir jaqejja, jañchin munañaparjamaw taqe kuns amti, luraraki (Col. 3:9). Jankʼak colerasiri, jupa pachpatak llakisiri, jan yuspärasiri, jachʼa jachʼa tukuri ukhamäspawa. Inas pornografía, qʼañu juchanak luririnaka, jan ukajj nuwasirinakajj utjki uka peliculanak uñchʼukiñajj gustchi. Inas jupajj suma jaqëskchi, jan wal luratapatsa jan wal parlatapatsa llakisirakchi, ukampis jan wali amuyunakapa jan wali luräwinakap cambiañatakejj janiw chʼamachaskiti (Gál. 5:19-21; 2 Tim. 3:2-5). Pantjasir jaqjamajja, janiw khitis pʼeqepatsa chuymapatsa taqpach jan wali amuyunaksa jan wali munañanaks apanukkaspati. Awisajja kun luratasatsa kun arsutasatsa arrepentisiñäniwa (Jer. 17:9; Sant. 3:2). Ukampis nayrajj kunjam jaqëyätansa uk mä isjam apsustan ukhajja, jañchin munañanakapasa luräwinakapas janiw apnaqjjestuti, janirakiw jañchin munañaparjam sarnaqerit uñtʼatäjjtanti (Is. 55:7). w22.03 pág. 3 párrs. 4, 5

Anciano jilatanaka, jilat kullakanakajj kunja suma chuymanïpjjesa uk uñjapjjam. Jupanakajj pantjasirïpkchisa, suma luratanakapajj utjapuniwa. Awisajj maynir cheqañchapjjañamaw wakisini, yaqhepajj arunakapampi luratanakapampiw mayninakar chuym ustʼayapjjaspa. Ukham pasipan apóstol Pablot yateqasisaw suma luratanakap uñjañatak chʼamachasipjjañama. Uka jilatasa jan ukajj uka kullakasa, Jehová Diosarojj wal munasi, aguantasaw serviskaraki, cambiarakispawa, uk uñjapjjañamawa. Suma chuymamp uñjiri ancianonakajja, congregacionan munasiñ utjañapatakiw yanaptʼapjje. Diosajj janiw perfectöpjjañam suykiti, jan ukasti jupat jan jitheqtasa servipjjasma ukwa muni (1 Cor. 4:2). Ukhamajj janipun akat payachasipjjamti, Jehová Diosajj luratanakam wali valoranitwa uñji. “Jupajj janiw luratanakamatsa ni sutipar munasipjjatamatsa armaskiti, ukanakjja santo jilatanakar jichhakam servisaw uñachtʼayapjjtajja” (Heb. 6:10). w22.03 pág. 31 párrs. 19, 21