REVISITANAK LURAM
7 YATICHÄWI
Janiw qarjtañasäkiti
Bibliajj akham siwa: ‘Suma yatiyäwinak yatichasipkakïnwa yatiyasipkarakïnwa’ (Hech. 5:42).
Kunsa Pablojj luräna
1. VIDEO uñtäta, jan ukajj Hechos 19:8-10 liytʼäta. Ukatsti, aka jisktʼanakaruw qhanañchtʼäta:
Yaqhepajj kuntï yatiykäna uk janis istʼañ munapkchïnjja, ¿Pablojj janiw qarjtkänti sasajj kunatsa sissna?
¿Istʼañ munapkäna ukanakarojj qhawqha kutis Pablojj parläna, qhawqha tiempos ukham luraskakïna?
¿Kunsa Pablot yateqassna?
2. Revisitanak lurañatakisa, Bibliat yatichañ qalltañatakis tiempow munasi, chʼamachasiñaw wakisiraki.
Pablot yateqasim
3. Utanejj kunüruy tiemponïchi ukarjamaw visittʼañatakejj tiempo apstʼasiñama. Akham jisktʼasim: “¿Jupajj kunürus nayamp parltʼañatakejj tiemponi? ¿Kawkjan jikisiñsa munaspa?” sasa. Ukarjam lurañajj janis jumatak faciläkchinejja, visittʼañamawa.
4. Kunürus wasitamp parltʼsna sasaw jisktʼañama. Janïr parlañ tukuykasajja, kunürusa, kuna horarus visittʼasma ukwa amtawayapjjañama. Ukatsti uka urojj kuttʼañamapuniwa.
5. Jan qarjtamti. Utanir jan jikjjatkäta, jan ukajj jan tiemponïkani ukhajja, jupajj janiw yatiñ munkpachati sasajj janiw jankʼak amuyañamäkiti (1 Cor. 13:4, 7). Janiw qarjtañamäkiti, jupar thaqer saraskakiñamawa, ukampis janiw tiempo ina chʼusar aptʼasiñamäkiti (1 Cor. 9:26).