¿Kunapachas yatiqañ munirinakar yanaptʼañatakix kuttʼañasa?
1. Arkirinak tukuyañatakixa, ¿kun lurañas wakisispa?
1 Diosan Apnaqäwipat yatiqañ munapki ukanakar yanaptʼañatakix wasitatwa kuttʼañasa, ukhamatwa Jesusan arkirinakapar tukupxaspa (Mat. 28:19, 20). Luräwinakasat tiempo apstʼasisa ukat utanix kunapachas tiemponïspa ukarjamaw kuna horasas wasitat kuttʼañax wakisispa uk amtañasa, ukampis janiw jayarstʼayañasäkiti. ¿Kunatsa?
2, 3. ¿Kunatsa jankʼaki kuttʼañatakix chʼamachasiñasa?
2 ¿Kunatsa jankʼak kuttʼañasa? ‘Diosan reinopat suma yatiyäwinakasti’ taqi chiqanwa yatiyasiski ukat akapachan tukusiñapax jakʼankxarakiwa (Mat. 24:14; 1 Ped. 4:7). Ukhamarusa, yatiqañ munapki ukanakatakix “qhispiyasiñ uruxa” utjaskakiwa. Ukatwa, ‘Tatitun arunakapat’ jankʼak yatiyañasa ukatxa yatiqañ munirinakar yanaptʼañatakis jankʼak kuttʼañasaraki (2 Cor. 6:1, 2; 2 Tim. 4:2).
3 Diosan Apnaqäwipat yatiyktan ukxa jaqinakan chuymapatx jankʼakiw Supayax chhaqtayañ muni (Mar. 4:14, 15). Bibliat yatiqañ munirinakaxa, familiapansa irnaqir masinakapansa ukat yaqhanakans jiskʼachataw uñjasipxi. Supayax jaqinakan chuymapat suma yatiyäwinak jan chhaqtayañapatakix jankʼakiw kuttʼañasa. Jankʼak kuttʼañäni ukhaxa, kuna tuqinakats parltʼawaytan ukxa amxasisipkaniw ukat wasitat parltʼañasa janiw chamäkarakiniti, ukxa janiw armañasäkiti.
4. ¿Wasitat kuttʼañatakix kunanak lurañas wakisispa?
4 Kunapachas kuttʼäta uk amtañamawa. Qalltatpachwa kunürusa kuna horasarus kuttʼäta, ukat kuttʼasin kuna jisktʼarus qhañachtʼäta ukxa amtxañamaraki, ukaw wali askixa. Tiempo utjirjamäspa ukhaxa, qharüruw kuttʼanï sasaw utanir sasma, jan ukasti mä jukʼampxaruw kuttʼani sasaw sarakisma. Irnaqatap laykux seman tukuy urunakaki jikxatsta ukhaxa, inas jutïr seman tukuy urunakan kuttʼaniñam munchispa. Ukhamaxa, kunürus kuttʼäta, kuna horasarusa ukat yaqhanakampi qillqtʼasiñamaw wakisispa, kuttʼaniw sasin saniwaysta ukhax phuqañamapuniwa (Mat. 5:37).
5. Jesusan arunakaparjam phuqañatakixa jankʼakiw yatiqañ munirinakar yanaptʼañatakix kuttʼañasa, ¿kunats ukham sistanxa?
5 ¿Yatiqañ munapki ukanakar yanaptʼañatakix kunats jankʼak kuttʼañasa? Kunattix ‘jukʼa tiempokiw utjxi’, ukatwa kunürusa kuna horasarus kuttʼañäni uk amtañasa (1 Cor. 7:29). Diosan Apnaqäwipat yatiqañ munirinakar yanaptʼañatak jankʼak kuttʼañäni ukhaxa, yatiykasax suma askinakwa jikxatarakiñäni.