Jukʼamp sum yatiyañataki: wasitamp parlañ munañapatakiw wakichtʼañasa

Kunatsa uk lurañajj wakisi. Bibliat jukʼampi yatjjatañ munirinakarojja, Diosan arunakap jukʼampi yatichaskakiñatakejj wasitampiw utapar kuttʼañ muntanjja, ukhamat jukʼampi yateqaskakiñapataki (1 Cor. 3:6). Ukatakejja, parlañ janïr tukuykasaw kunürus parltʼaskakiñatak kuttʼsna uk jisktʼañasa. Mä jisktʼa jaytañas wali askirakiwa, ukhamatwa utanejj jukʼampi yatjjatañ munaspa, ukat kuttʼasinwa uka jisktʼar qhanañcharaksa. Uka jisktʼan qhanañchäwipajj kawkïr qellqattï jaytawayktan ukan utjchi ukhajja, utanejj liytʼaspawa. Wasitat parlañ munaskakiñapatak wakichtʼtan ukhajja, jupamp parlañajj janiw chʼamäkaniti, kuna toqetsa parlañäni uk yatjjaniwa. Kutʼkañäni ukhajja, ‘mä jisktʼa jaytawayktan ukar qhanañchtʼiriw kuttʼanta’ sasaw saraksna, ukhamatwa jupampi parltʼaskaksna.

Kunjamsa uk lursna:

Utat uta yatiykasajj kunjamsa parltʼañäni uk wakichtʼaskasajja, kuna jisktʼsa kuttʼañatakejj jaytañäni uk wakichtʼasiñasarakiwa. Ukatakejj kuna qellqattï jaytkañäni ukatwa ajlltʼsna. Jan ukajj kuna qellqatampitï jaqenakar Bibliat yatichktan ukatwa mä jisktʼa ajlltʼaraksna. Ukat kutʼkañäni ukhaw uka qellqat uñachtʼaysna.
Bibliat jukʼamp yatjjatañ munirimpi parlañ tukuykasajja, ‘mayan jumamp parltʼañ munaskakiristwa’ sasaw saraksna, ukat kuna jisktʼtï jaytañ munktan ukwa jisktʼaraksna. Yaqhep cheqanakanjja, jaqenakajj jan tiemponikiw sarnaqapjje, ukatwa ‘kuttʼaniskakim’ sasajj jan sapkistuti. Ukhamächi ukhajja, akhamwa saraksna: “¿Aka horasarojj utamankapunirïtati? [Kamsanis uk istʼäta.] Maya semanaw visittʼañ munirisma ukat aka jistkʼat parlawaysna... Jan tiemponïkäta ukhajja, walikïskaniwa” sasa.
Kuna horaruy kuttʼañatak jupamp amtawaystan ukjja, phoqañasawa (Mat. 5:37). Wasitampi visitʼkasin parlañ janïr tukuykasajja, mayan parlañ munaskakiñapatakejj wakichtʼañasawa.

Aka phajjsejj ak lurañatak chʼamachasiñäni:

Utat uta yatiykasajj kunjamsa parltʼañäni uk wakichtʼaskasajja, kuna jisktʼsa kuttʼañatakejj jaytañäni uk wakichtʼasiñasarakiwa. Ukat khitinakampitï yatiykañäni ukanakaruw uk yatiyañasa.