Jukʼamp sum yatiyañataki: Mayamp kuttʼapuniñäni

KUNATSA UK LURAÑAJJ WAKISI. Diosan Reinopat suma yatiyäwinakap istʼapkistu uka jaqenakajja, Diosat jukʼamp yatjjatañwa munapjje (Isa 55:6). Jupanakar Diosat jukʼamp yatichañatakejj kutin kutin kuttʼañasaw wakisi. Jaqenakajj kunayman jan walinakanwa uñjasipjje, ukhamajj janiw taqenir mä toqetak parlañasäkiti. Ukampisa, sum wakichtʼaskañäni ukhamarak mä amtampi visitir sarkañäni ukhakiw sumanak jikjjatañäni. Cheqas Bibliat yatichañ amtampiw kuttʼañasa.

KUNJAMSA UK LURSNA:

• Jankʼak kuttʼañatakiw chʼamachasiñasa, inas mä qhawqha urunakat kuttʼsna (Mt 13:19).

• Wali munasiñampi respetompiw parltʼañasa. Janiw ajjsarañasäkiti.

• Sutipatwa arunttʼañasa. Kunatsa kutʼtan ukwa sañasa. Jisktʼamar qhanañchiriw kuttʼanta, jichhak mistki uka revista apanirapsma. Jan ukajj Internetan jw.org cheqar mantañ yatichañataki, mä video uñtayañataki, jan ukajj kunjamsa Bibliat yatichapjjta uk qhanañchiriw kuttʼanta sasaw saraksna. Utanitï yaqha toqet yatjjatañ munanejja, kuna toqettï parlañ munkayätan uk mayjtʼayaraksnawa (Flp 2:4).

• Kuna toqettï nayrïr visitan parlkayätan ukjja, mä textompi jan ukajj mä qellqatampiw jukʼamp qhanañchtʼañasa (1Co 3:6). Utanimpi sum parltʼasiñatakiw chʼamachasiñasaraki.

• Kuttʼañatakejj mä jisktʼa jaytañasa.