Julio

Jehová Diosajj parlirwa lurtʼawayistu, ukajj jupan mä suma regalopawa. Ukhamäkchisa, parlañajj janiw cheqaparjam apnaqasjjänti. Supayajj kʼarinakwa Evar parläna, ukham kʼarisitapatwa jaqenakajj juchararätanjja, pantjasirirakïtanjja (Gén. 3:1-4). Adanajj pantjasitanakapat Evampiru Jehová Diosampir juchañchasajja, jan cheqapar parlirïtapwa uñachtʼayäna (Gén. 3:12). Cainajj Abel jilapar jiwayasajj kʼarinakwa Jehová Diosar parläna (Gén. 4:9). Jichhürunakansa, peliculanakan jan wali arunakakiw istʼasjje. Escuelanakansa trabajonsa, ukham jan wali arunakakwa parljjapjjaraki. Jan amuyasksna ukhajja, jan wali arunak istʼañarojj yatinoqtjjaksnawa, jiwasas ukhamwa parljjaraksna. Ukampis cristianonakjamajj Jehová Diosaruw kusisiyañ muntanjja, ukhamajj janiw jan wali arunak jan parlañ toqetak amuyasiñasäkiti, jan ukasti cheqapäki ukarjam parlañatakiw chʼamachasiñasa, ukhamat Jehová Diosar jachʼañchañataki. w22.04 pág. 4 párrs. 1-3

Jesusajj wali amuyumpiw yänakar uñjäna. Jupajj manqtʼasisas umtʼasisas kusisitänwa (Luc. 19:2, 6, 7). Mä kutejja, wali suma vinoruw um tukuyäna, ukajj nayrïr milagropänwa (Juan 2:10, 11). Jiwayapkäna uka urus jila alani isimp isthapitänwa (Juan 19:23, 24). Ukampis jakäwipanjja janiw yänakajj jukʼamp importantëkänti. Jesusajj akwa yatichäna: jiwasatï Diosan Reinop nayraqat thaqañäni ukhajja, Jehová Diosaw kunanakatï jakañatak munaski ukanak churistani (Mat. 6:31-33). Jehová Diosajj qollqe toqet yatiñan ewjjtʼanak churkistu ukar istʼañajja, waljaniruw yanaptʼawayi. Daniel sat soltero jilatat parltʼañäni. Jupajj akham siwa: “Waynituskayäta ukhajja, Jehová Diosar serviñaw jakäwijan jukʼamp importantëni sasaw amtayäta” sasa. Daniel jilatajj kunatï jakañatak wakiski ukampik jakañatakiw chʼamachasïna, ukhamatwa tiempopampisa, kuntï lurañ yatki ukampis labores de socorro ukana ukat Betelana yanaptʼawayi. Jilatajj akham sarakiwa: “Jehová Diosajj walja bendicionanakwa churawayitu, qollqejj janipuniw ukanak churkitaspänti” sasa. w22.05 págs. 21, 22 párrs. 6, 7

Cheqa yatichäwinakar munasitasjja, Bibliata ukat Bibliat apstʼat qellqatanakat sapa kuti yatjjatasaw uñachtʼaysna. Jukʼa tiemposa jan ukajj walja tiempos Jehová Diosar sirvjjstanjja, yateqañajj utjaskakipuniwa. Bibliat yatjjatañatakejj chʼamachasiñasawa, ukham chʼamachasitasajj janiw inamayäkaniti. Janiw taqenirojj liyiñas yatjjatañas gustkapunistuti, ukampis cheqa yatichäwinak jukʼamp sum amuyañatakejj thaqasipkakim sasaw Jehová Diosajj sistu (Prov. 2:4-6). Taqe chuyma uk lurañäni ukhajja, jiwasan askisatakïniwa. Corey sat mä jilatajja, Biblia liyki ukhajj sapa versiculot sum yatjjati. Jupajj akham siwa: “Página tukuyan utjki uka notanakwa liytʼta, referencias marginales ukanakan utjki uka textonaksa thaqtaraktwa, wal yatjjatarakta. […] Ukham yatjjatañaw walja toqenakat yateqañatak yanaptʼitu” sasa. Uka jilatjamas yatjjatañäni janisa, jiwasatï Bibliat yatjjatañatak tiempo apstʼasiñäni, chʼamachasirakiñäni ukhajj cheqa yatichäwinakar valoranit uñjataswa uñachtʼayañäni (Sal. 1:1-3). w22.08 pág. 17 párr. 13; págs. 18, 19 párrs. 15, 16

Jesusajj aka oraqenkkäna ukhajja, Diosan luratanakapat parlasaw wali wakiskir yatichäwinak arkirinakapar Awkipjjat yatichäna. Ukanakat may uñjañäni. Jehová Diosajj taqeniruw munasiñamp uñji. Jesusajj Qollun Yatichkäna ukhajja, discipulonakaparojj intimpit jallumpit parläna, ukampis walja jaqenakaw ukanakat jan lupʼipkiti. Intis jallus jakañatak wali wakiskiriwa. Jehová Diosajj janiw uka pä suma regalonak servirinakaparuk churkiti, jan ukasti wali munasir Diosätap laykojj taqeniruw ukanak churi, ukhamat taqeni ukanakat beneficiasipjjañapataki (Mat. 5:43-45). Jehová Diosajj taqenir munassna ukwa muni, ukwa Jesusajj discipulonakapar ukamp yatichäna. Mä musparkañ inti jalanta uñjasasa jan ukajj jallun sulljjatatap uñjasasa, Jehová Diosajj kunja munasirisa jan khitir yaqhachirisa ukanakat amuytʼañäni. Jupat ukham munasiñ yateqasiñajj taqe jaqenakar predikañatakiw yanaptʼistaspa. w23.03 pág. 17 párrs. 9, 10

¿Kunas apóstol Juanarojj musparayäna? Mä warmiw llijkir wila color mä salvaje animaljjar qonjjatatäna. Jupajj mä “jachʼa prostituta” warmiwa, sutipajj “Jachʼa Babilonia” satawa. Uka warmejj ‘oraqenkir reyinakampiw qʼañu juchaʼ luri (Apoc. 17:1-5). ¿Kunas ‘Jachʼa Babiloniajja’? Uka warmejj janiw mä política organizacionamp saskiti, ¿kunatsa? Jupajj aka mundonkir politiconakampiw qʼañu jucha luri sasaw Apocalipsis librojj qhanañchi (Apoc. 18:9). Jupajj salvaje animalar qonjjatataw sari, ukajj gobiernonakar apnaqañ munatapwa uñachtʼayi. Jupajj janirakiw Supayan apnaqat akapachankiri taqe kun jupatakik muniri comerciantenakamp saskaspati, ¿kunatsa? Apocalipsis librojj qhepatwa jupanakat parli, ‘oraqenkir comerciantenaka’ sasaw jupanakat saraki (Apoc. 18:11, 15, 16). Nayra Babilonia markajja, falso religionamp phoqantatänwa. Ukhamasti, Jachʼa Babiloniajj taqpach falso religionanakamp sasiwa. Cheqas oraqpachan utjki uka taqpach falso religionanakawa (Apoc. 17:5, 18). w22.05 pág. 11 párrs. 14-16

Mä taykajj inas akham jisktʼaschi: “¿Wawanakajajj Jehová Diosar serviñ amtapjjpachäniti?” sasa. Supayan apnaqat aka jan wali pachanjja, wawanakajj kunayman jan walinakanwa uñjasipjje, awk taykanakajj uk sum yatipjje. Janiw ukakïkiti, wawanakani walja taykanakajja, sapaki jan ukajj Diosar jan serviri esposompiw wawanakapar uywapjje, ukatwa wawanakapar uywañajj jan faciläkiti. Ukampis janiw jupanakatakik chʼamäkiti, Diosar chacha warmi servipki ukanakatakis chʼamarakiwa. Jumatï ukhaman uñjasiraksta ukhajja, jan llakisimti. Jehová Diosaw yanaptʼätam. Yaqha awk taykanakampiw parltʼarakisma, ukhamat kunjamsa Diosan markapan suma herramientanakajj utjki ukampejj Familiapampi Bibliat Yatjjatkasajj yanaptʼayasipjje uk yatiñataki (Prov. 11:14). Jehová Diosaw wawanakamamp sum parltʼasiñatak yanaptʼiristam. Ukhamajj kunsa amuyasipki, kunjamas chuymapan jikjjatasipjje uk yatiñatakejj Diosaruw yanaptʼa mayisma (Prov. 20:5). w22.04 pág. 17 párrs. 4, 7; pág. 18 párr. 9

Jehová Diosar munasitasajj jukʼamp jiltañapatakejj Yoqaparuw jukʼamp sum uñtʼañasa, Awkipajj kunjam chuymanisa uk jupajj sumwa uñachtʼayi (Heb. 1:3). Jesusar sum uñtʼañatakejja, pusi Evangelionakatwa yatjjatañasa. ¿Sapürut Biblia liytʼta? Janitï ukhamäkchi ukhajja, jichhaw Biblia liytʼañ qalltasma. Jesusajj kunsa luräna, kamsarakïnsa uk Biblian liytʼasajja, kunjam chuymanïnsa uk amuytʼam. Waljaniw jupampïñsa jupamp parltʼasiñsa munapjjäna. Jiskʼa wawanakarus ichjjartʼasirakirïnwa (Mar. 10:13-16). Jesusajj wali munasirïnwa, ukatwa discipulonakapajj kunjamas jikjjatasipjjäna uk jan ajjsartʼas sapjjerïna (Mat. 16:22). ¿Kunatsa Jesusajj ukham chuymanïnjja? Kuna laykutejj alajjpachankir Awkipaw ukham chuymanejja. Juparojj taqeniw jakʼachasipjjaspa. Ukatwa Diosarojj orassna, kunjamas chuymasan jikjjatastan uksa saraksna. Ukham luratasat janiw Jehová Diosajj juzgkistaniti. Jupajj munasistuwa, jiwasatsa llakisirakiwa (1 Ped. 5:7). w22.08 pág. 3 párrs. 4, 5

Niyakejjay Jehová Diosajj Luririsächejja, taqe kunwa jiwasat yati. Aka oraqen jakir jaqenakarojj sapa mayniruw sum uñtʼi, ¿uka toqet amuytʼañajj wali musparkañajjaya? (Sal. 139:15-17). Ukhamajj kuna jan walinaktï awk taykasat katoqawayktan taqe ukanakjja, jupajj sumwa uñjaspa. Janiw ukakïkiti, kunjam jaqëtansa, kunjamanakansa jakasiwaytan uk Jehová Diosajj sum yati. ¿Taqe ukanak yatisajj kunsa Jehová Diosajj luri? Jiwasar sum uñtʼatapatjja khuyaptʼayasistuwa (Sal. 78:39; 103:13, 14). Jehová Diosajj jiwasar perdonañ munatapwa uñachtʼayistu. Kunjamsa Adán nayrïr chachan juchapat taqe jiwasanakjjarojj juchana ukat jiwañan maldicionapajj jutäna uksa wali sumwa yati (Rom. 5:12). Uka maldicionat janiw jiwas pachpasa ni khitisa salvasiñ puedkänti (Sal. 49:7-9). Ukampis Diosaw jiwasat khuyaptʼayasisajj salvawayistu, kunjamtï Juan 3:16 textojj siskejja, Jehová Diosajj munasiñapatwa mä sapa Yoqapar jiwas layku jiwañapatak khitanïna (Mat. 20:28; Rom. 5:19). w22.06 pág. 3 párrs. 5, 6

Perdonirïñäni ukhajja, Jehová Diosajj perdonistaniwa. Job chachan tiempopanwa Jehová Diosajj uk qhan uñachtʼayäna. Diosat jan jitheqtir Job chachajja, Elifaz, Bildad, Zofar chachanakan chuyma ustʼayir arunakapwa aguantäna. Ukampis Jehová Diosajj jupanakatak orarapiñapwa Job chachar mayïna. Kunapachatï uk luräna ukhajja, Jehová Diosajj jupar bendisïnwa (Job 42:8-10). Cheqas chuyma ustʼatakïskañajj jiwas pachparuw jan waltʼayistu. Chuyma ustʼatakïskañajja, mä qʼepir uñtasitawa, Jehová Diosajj janiw uka qʼepi aptʼatakïsksna uk munkiti (Efes. 4:31, 32). Ukatwa akham sasin ewjjtʼistu: “Colerasiñjja apanukjjam, sinti colerasiñjja jaytanukjjam” sasa (Sal. 37:8). Uka ewjjtʼar istʼañajj jiwasan askisatakiwa, kuna laykutejj chuyma ustʼatakïskañajj cuerporusa, amuyurus jan waltʼayiwa (Prov. 14:30). Maynitak chuyma ustʼatakïskañajj veneno umantañamp sasiwa, jiwas pachpaw jan waltʼayasisktanjja. Ukhamasti mayninakar perdonasajj jiwas pachparuw mä regalo churasisktanjja. Sumakiw jikjjatastanjja, Jehová Diosar serviñans nayraruw sartaraksna. w22.06 pág. 10 párrs. 9, 10

Diosar suytʼatasajja, mä cascor uñtataw amuyus jarkʼaqestu, kunanaktï jiwasatak wal munktan ukanakamp jan apayasiñatakiw yanaptʼistu, ukanakajj Diosamp sum apasitaswa aptʼasiyistaspa (1 Cor. 15:33, 34). Mä cascor uñtasitäki uka suytʼäwisajja, Jehová Diosar kusisiyañatak chʼamachasiñajj inamayakiwa sasin amuyañatwa jarkʼaqarakistu. Elifaz chachat amtañäni, jupajj Job chachan falso amigonakapat maynïrïnwa. Jupajj akham sänwa: “¿Kunjamarak mä jaqejj qʼomäspasti?” sasa. Ukatsti sarakïnwa: “Diosajj janiw angelanakapar confiykiti, alajjpachanakas janiw nayranakapatakejj qʼomäkiti” sasa (Job 15:14, 15). ¡Ukajj kʼarïnwa! Amtapjjapuniñäni, Supayaw ukham amuyañas muni. Jiwasatï ukham sapa kuti piensaskañäni ukhajja, janiw Diosar taqe chuyma suytʼjjsnati, uk Supayajj yatirakiwa. Ukhamajj Supayan uka kʼari amuyunakapampejj jan apayasipjjañäniti. Taqe servirinakapajj wiñayatak jakassna ukwa Diosajj muni, wiñay jakañ katoqañasatakis yanaptʼarakistaniwa, janipun ukat payachasipjjañäniti (1 Tim. 2:3, 4). w22.10 págs. 25, 26 párrs. 8-10

Jehová Diosajj janiw sum uñj-jjetuti, ukatwa tʼaqesiskta sasin Job chachajj amuyaspa ukwa Supayajj munäna. Uka amtampiw kawkïr utantï tunka wawanakapajj manqʼasipkäna, vino umasipkäna uk mä jachʼa thayamp allthapïna (Job 1:18, 19). Ukatjja alajjpachat nina saraqayanisaw Job chachan ovejanakap jiwarayäna, janiw ukakïkänti, ovej awatirinakaparus jiwarayarakïnwa (Job 1:16). Niyakejjay thayajj alajjpachat thaytʼanchïnjja, ninas alajjpachat saraqanirakchïnjja, Diosas jupar ukanakamp jan waltʼayawaykaspa ukhamwa Job chachajj amuyäna. Diosan chuymap ustʼayañatakejj kuna jan walsa lurkaspa ukhamwa amuyjjarakïna. Ukhampachas janiw alajjpachankir Awkiparojj maldiskänti. Kunatï walïki ukanak walja maranakaw Diosat katoqäna, ukanak taqe chuymaw katoqtʼasïna, ukhamajj ‘¿janit kunanakatï jan walïki ukanak katoqaskarakiristjja?’ sasaw amuyäna. Ukatwa jupajj akham säna: “Jehová Diosan sutipajj jachʼañchatakïskpan” sasa (Job 1:20, 21). w22.06 pág. 21 párr. 7

Jesusajj niya uka pachparakwa discipulonakapar Juan 17:14 texton säna. Uka profecian phoqasir uñjawayjjtanwa, jukʼampis aka qhepa 100 maranakanwa phoqasir uñjawaytanjja. ¿Kunatsa ukham sistanjja? Jesusajj 1914 maranwa Reyit uttʼayatäjjäna. Mä jukʼa tiempotjja Supayaruw alajjpachat aka oraqer jaqoqanjjäna. Jichhajj Supayajj aka oraqenakwa jan walinak lurjjaspa, tukjatäñakwa suyjjaraki (Apoc. 12:9, 12). Ukampis janiw Supayajj jan kun lurasakejj suykiti. Wali colerataw Diosan markapar jan waltʼayaski (Apoc. 12:13, 17). Ukatwa akapachankirinakajj nayrat sipans jukʼamp uñisjjapjjestu. Ukampis janiw Supayarusa ni arkirinakaparus ajjsarañasäkiti. Jan ukasti apóstol Pabljamaw taqe chuyma confiyañasa, jupajj akham sänwa: “Diosatejj jiwasampïskchejja, ¿khitirak jiwas conträspasti?” sasa (Rom. 8:31). Cheqas taqe chuymaw Jehová Diosar confiytanjja. w22.07 pág. 18 párrs. 14, 15

Akapachajj tukuskani uka tiemponjja, walja predikirinakaw utjañapäna, uka toqet Jesusajj janiw payachaskänti. Aka profecía arunak phoqasiñap jupajj yatïnwa, ukan akham siwa: “Kunapachatejj ejercitomar guerratak pʼeqtʼkäta uka urojja, taqe chuymaw markamajj jumar servïtam” sasa (Sal. 110:3). Jumatï suma yatiyäwinak predicasksta ukhajja, Jesusampiru suma phoqeri esclavompiruw apoyasktajja, uka profecian phoqasiñapatakiw yanaptʼaskaraktajja. Jichhürunakan predicaskstansa, jan walinakanwa uñjasiraktanjja. Mä jan waltʼäwejja, predicañ jarkʼapkistu ukawa. Apostatanakasa, politiconakasa, religión pʼeqtʼirinakas predicatasat kunayman kʼarinakwa parlapjje. Familiaranakasasa, uñtʼapkistu ukanakasa, trabajonkir masinakasas uka kʼarinak creyipjjani ukhajja, inas Jehová Diosar jan sirvjjañasataki, jan predikjjañasatak jarkʼapjjchistani. Yaqhep markanakanjja, enemigonakasajj jilat kullakanakar amenazapjjewa, atacapjjewa, katuntapjjewa, carcelar kunaw llawintapjje. w22.07 pág. 8 párr. 1; pág. 9 párrs. 5, 6

Bibliat sapa kut yatjjatañataki, kuntï liyktan ukat lupʼiñatak tiempo apstʼassna ukwa Jehová Diosajj muni. Kuntï yateqtan ukarjam lurañäni ukhajja, jukʼampiw Jehová Diosar confiyañäni, jukʼamp sumaw jupampejj apasjjarakiñäni, ukaw aguantañatak chʼam churistani. Maysa toqetjja, Arupar confiyañäni ukhajj espíritu santopampiw Diosajj yanaptʼistani. Espíritu santon yanaptʼapampejja, ‘jaqen chʼamapat jilankki uka chʼamanïñäniwa’, ukaw jan walinakan aguantañatak yanaptʼistani (2 Cor. 4:7-10). Jehová Diosan yanaptʼapampejja, ‘suma phoqeri amuyasir esclavojj’ walja yatichäwinaka, videonaka, cancionanakwa apsuwayi. Ukanakaw Jehová Diosar jukʼamp confiyañataki, Diosar serviñan jan ikjañatak yanaptʼistu (Mat. 24:45). Jehová Diosan servirinakapajj llakinakan uñjasipki ukhajja, maynit maynikamaw munasiñ uñachtʼayasipjje, chuymachtʼasipjjaraki, Diosaw ukham lurapjjañapatak yatichi (2 Cor. 1:3, 4; 1 Tes. 4:9). Jilat kullakanakajja, jan walinakan uñjasktan ukhajj Diosat jan jitheqtas serviñatakiw yanaptʼapjjestu. w22.08 pág. 12 párrs. 12-14

Apóstol Pablot yateqasisajja, jilat kullakanakasajj kunjam suma chuymanïpjjesa uk qhan sañatakiw chʼamachasiñasa. Ukhamatwa jupanakkam jukʼamp munasipjjañapatakisa, suma amigöpjjañapatakis yanaptʼañäni. Awisajja wali experiencian cristianonakas jan waltʼayasipjjarakispawa, jan ukajj yaqhanakampis toqesipjjarakispawa. Ukaw Pablompiru Bernabé amigopampirojj pasäna. Misionerot wasitat viajiñatakejj Marcosarojj irpañäniti janicha sasaw toqesipjjäna. Ukat ¿kunas pasäna? ‘Wal colertʼasisajj toqentasipjjänwa’, ukat tʼaqjtapjjarakïnwa (Hech. 15:37-39). Ukampis Pablompi Bernabeampi Marcosampejj uka jan waltʼäwip askichjjapjjänwa. Mä qhawqha tiempotjja, Pablojj wali sumwa Bernabeatsa Marcosatsa parläna (1 Cor. 9:6; Col. 4:10). Congregacionan yaqhanakamp jan waltʼayasisajj ukhamarakiw ukanak askichañasa. Jilat kullakanakasajj kunja suma chuymanïpjjesa uk uñjañatakiw chʼamachasiñasaraki. Ukhamatwa congregacionan sumankañ utjañapatakisa mayachtʼatäñapatakis yanaptʼañäni. w22.08 pág. 23 párrs. 10, 11

Diosan cheqap leyinakaparjam sarnaqañatakis chʼamachaskstanjja, janiw mayninakar juzgañasäkiti, janirakiw jupanakat sipans jukʼamp cheqap sarnaqer jaqëksnas ukham amuyasiñasäkiti. Jehová Diosakiw “oraqpachan Juezapa[jja]”, ukwa amtañasa (Gén. 18:25). Diosajj janiw jiwasar juezat uttʼaykistuti. Cheqapar sarnaqeri José chachat parltʼañäni. Mayninakajj jan walsa jupar lurapkchïnjja, janiw jupanakar juzgkänti. Pachpa jilanakapaw jupar jan wal lurapjjäna, esclavotwa aljantapjjäna, Joseajj jiwatäkaspas ukhamwa papitupar creyiyapjjarakïna. Mä qhawqha maranakatjja, mayampiw Joseajj jilanakapamp jikisïna. Niyakejjay Joseajj wali chʼamani apnaqerëjjchïnjja, jan sinttʼasisaw jupanakar juzgaspäna, vengasirakispänwa. Jilanakapajj nayra luratanakapat taqe chuyma arrepentisitäpkchïnsa, Joseajj jiwasat vengasiniwa sasaw ajjsarapjjäna. Ukampis Joseajj akhamwa jilanakapar säna: “Jan ajjsarapjjamti, ¿nayajj Diosätti jumanakar juzgañatakejja?” sasa (Gén. 37:18-20, 27, 28, 31-35; 50:15-21). José chachajja, Jehová Diosakiw jupanakar juzgañatakejj derechoni sasaw humilde chuymamp amuyäna. w22.08 pág. 30 párrs. 18, 19

Jehová Diosajj mä jilatana jan ukajj mä kullakan taqe chuyma orasitaparojj juma toqew jaysaspa, ¿uk yatiyätati? Diosajj ancianonaka, siervo ministerialanaka, precursoranaka, publicadoranaka, wayn tawaqonaka, jilïrinaka, chachanaka jan ukajj warminak toqew servirinakapar yanaptʼi. Diosar munaski ukatï yanaptʼa mayiñatak ruwtʼaschi ukhajja, jilapartejj ancianonak toqe jan ukajj mayni servirinakap toqew Diosajj jupar ‘wal chuymachtʼi’ (Col. 4:11). ¡Jehová Diosar ukham serviñasa jilat kullakanakar yanaptʼañas mä jachʼa privilegiowa! Epidemianakajj sartki, mä akatjamat jan waltʼäwejj utjki jan ukajj arknaqat uñjasktan ukhaw jilat kullakanakasar yanaptʼsna. Ukampis awisajja, mayninakar yanaptʼañ wal munasksna, ukampis pachpa familiasaw tʼaqesiskaspa. Ukhampachas jilat kullakanakar wal yanaptʼañ muntanjja, qhawqtï lurirjamäktan ukarjam mayninakar yanaptʼtan ukhajja, Jehová Diosajj wal kusisi (Prov. 19:17). w22.12 pág. 22 párrs. 1, 2

Confiykañ jaqëñatakejj munasiñaw wakisi. Jehová Diosar munasiñampi jaqe masisar munasiñampiw jukʼamp importante mandamientonakajja sasaw Jesusajj säna (Mat. 22:37-39). Jehová Diosjam wali confiykañajj janiw yaqhajj utjkiti, niyakejjay jupar munasstanjja, jiwasajj jupjamäñwa muntanjja. Jilat kullakanakasar munasiñaw kunanaktï jupanakajj jakäwinakapat cuenttʼapkistu ukanak yaqhanakar jan parlañasatakejj yanaptʼistu. Kunanakatï jupanakar chuym ustʼaykaspa phenqʼachkarakispa ukanakat janipuniw yaqhanakar parlañasäkiti. Confiykañ jaqëñatakejj humilde chuymanïñaw yanaptʼarakistani. Humilde chuymani mä cristianojja, mä noticia yatisajj janiw jupajj nayraqat yaqhanakar yatiyañ munkaniti (Filip. 2:3). Wali importante toqenakats yatkaspa, janis ukanakat yatiyañapäkarakispa ukham janiw yaqhanakar amuyayañ munkarakiniti. Maysa toqetjja, jiwasatï humilde chuymanïñäni ukhajja, janiw amuyusarjamak kuns parlkañäniti, mä arunjja janiw kunatï jan Bibliankki ni Bibliat apstʼat qellqatanakasankki ukanakat parlkañäniti. w22.09 pág. 12 párrs. 12, 13

Mä angelan arunakaparjamajja, Daniel libron utjki uka profecianakjja Diosan markapaw jukʼamp sum amuytʼañapäna, ukampis janiw ni mä jan wali jaqes uka arunak amuyañapäkänti (Dan. 12:10). Jichha tiemponwa jan wali jaqenak kikpa jan sarnaqatas uñachtʼayañasa (Mal. 3:16-18). Jehová Diosajj wali valoranit uñjki uka ‘markaparojj’ tantachtʼaskiwa. ¿Jiwasajj jupanak taypinkañjjay munaraktanjja? Wali kusiskañ urunakanwa jakasktanjja. Ukampis niyaw mä jukʼampit jukʼamp musparkañanakajj pasani. Kunürutï taqe jan walinakajj chhaqtjjani uka urojj jakʼachasisinkiwa. Ukatsti, kuntï Jehová Diosajj Daniel profetar mä promesa arskäna uk phoqasirwa uñjañäni, jupajj akham sänwa: “Tukuy urunakanwa kunatï waktʼktam uk katoqañatak sartäta” sasa (Dan. 12:13). ¿Kunürutï Daniel profetasa, munat amigonakamasa, familiaranakamas jaktanipkani uka uru suytʼasktati? Ukhamächi ukhajja, Jehová Diosat jan jitheqtañatak chʼamachasim. Ukhamtï lurätajja, sutimajj Jehová Diosan jakañ libropan qellqantatakïskaniwa, janipun ukat payachasimti. w22.09 pág. 24 párr. 17; pág. 25 párrs. 19, 20

Uka arunakajj Ezequiel profetar wal chʼamañchtʼpachäna. Jehová Diosajj uka pachpa arunakampiw Moisesarus Isaiasarus profetjam ajllkäna ukhajj chʼamañchtʼarakïna, ukwa jupajj amtpachäna (Éx. 3:10; Is. 6:8). Uka profetanakarojj chʼama luräwinakamp phoqañatakejj Jehová Diosaw yanaptʼäna, uk Ezequielajj yatirakïnwa. Ukhamajj ‘nayaw khitasksma’ sasin pä kuti siskäna ukajj Diosaw yanaptʼitani sasin confiyañapatakiw yanaptʼäna. Ezequiel libronjja, “Jehová Diosaw nayar parlitäna” siski uka arunakajj walja kutiw uñsti (Ezeq. 14:2). “Mä kutimpiw Jehová Diosajj parlitäna” siski uka arunakajj kutin kutiniw uñstaraki (Ezeq. 6:1). Ukhamajj Jehová Diosajj jupar khitkäna ukat janiw Ezequielajj payachaskänti. Niyakejjay tatapajj sacerdotëchïnjja, kunjamsa Jehová Diosajj nayaw yanaptʼäma sasin profetanakapar siskäna ukwa Ezequielar yatichpachäna. Cheqansa Isaac, Jacob, Jeremías chachanakarojj “nayaw jumampïskta” sasaw Jehová Diosajj säna (Gén. 26:24; 28:15; Jer. 1:8). w22.11 pág. 2 párr. 3

Adanamp Evampejj juchachasipjjänwa, ukatwa taqe wawanakapajj jiwtanjja, ukampis Jehová Diosajj janiw amtap mayjtʼaykiti (Is. 55:11). Diosajj jupat jan jitheqtir servirinakapajj wiñayatak jakapjjañap munaskakiwa. Jehová Diosajj amtap phoqañatakejj kunanaksa lurawayi, arsuwayaraki uk uñjañäni. Jiwatanakajj jaktanipjjaniwa wiñayatakirakiw jakapjjaspa sasaw Jehová Diosajj mä promesa arsuwayi (Hech. 24:15; Tito 1:1, 2). Jupat jan jitheqtas serviri Job chachajja, Jehová Diosajj jiwatanakar wal jaktayañ munatapat janiw payachaskänti (Job 14:14, 15). Daniel profetajj jiwatanakan jaktaniñap yatïnwa, wiñay jakañ katoqapjjañapsa yatirakïnwa (Sal. 37:29; Dan. 12:2, 13). Jesusan tiempopan jakir judionakajja, Jehová Diosajj jupat jan jitheqtir servirinakaparojj “wiñay jakañ” churañap yatipjjänwa (Luc. 10:25; 18:18). Jesusajj walja kutiw uka promesat parläna, juparus Awkipaw jaktayäna (Mat. 19:29; 22:31, 32; Luc. 18:30; Juan 11:25). w22.12 págs. 4, 5 párrs. 8, 9

Jehová Diosajj jakʼapankañasatakiw invitistu (Sant. 4:8). Jupajj Diosasäña, Awkisäña, amigosäñwa muni. Diosajj oracionanakas jaysistuwa, jan walinakan uñjasktan ukhas yanaptʼarakistuwa. Janiw ukakïkiti, markap toqew yatichistu, cuidarakistu. Jehová Diosarojj oración lurasa, Arup liyisa, liytʼktan ukat lupʼisaw jakʼachassna. Ukhamatwa jupar munasiñäni, yuspärarakiñäni. Juparojj taqe kunanwa istʼañ munañäni, kunjam jachʼañchañatï wakiski ukhamwa jachʼañchañäni (Apoc. 4:11). Jehová Diosar jukʼamp uñtʼañäni ukhajja, juparusa cuidkistu uka markaparus jukʼampwa confiyañäni. Ukampis Supayajja, Jehová Diosampiru markapampir jukʼat jukʼat jan confiyjjañasatakiw yantʼistu. Ukampis uka yantʼanakaparojj saykatsnawa. Jiwasatï Diosar taqe chuyma confiyañänejja, juparus markaparus janipuniw kunäkipans apanukkañäniti (Sal. 31:13, 14). w22.11 pág. 14 párrs. 1-3

Taqe Kunjjar Munañani Jehová Dios Reyipar munasipjjatap laykojj walja cheqpach cristianonakaw carcelar jistʼantat uñjasipjjäna, vidaps niy aptʼasipjjarakïna. Uka cheqpach cristianonakajja, janiw Jehová Diosat jitheqtañ munapkiti, jupanakajj nayra tiempon jakir kimsa hebreonakar uñtasitäpjjewa. Uka kimsa hebreonakajj janiw Jachʼa Jehová Diosat jitheqtapkänti, ukatwa jupajj nina aqkir hornot jupanakar salväna. Jehová Diosar taqpach chuymamp serviñajj kunja wakiskirisa uk Salmo qellqeri Davidajj yatïnwa. Jupajj akham sasaw qellqäna: “Jehová Diosasti markanakjjarojj juicio arunakwa arsuni. Jehová Dios Tata, cheqap luratajarjam juzguita, taqpach chuymampi servitajarjam juzguita” sasa (Sal. 7:8). Ukatsti sarakïnwa: “Taqpach chuymampi servitajasa cheqapar sarnaqatajas jarkʼaqetpan” sasa (Sal. 25:21). Cheqas Jehová Diosat jan jitheqtas jakañaw jukʼamp sumajja, janiw kunäkipansa jupat jitheqtañ munktanti. Ukhamtï lurañänejja, kuntï mä Salmo qellqerejj siskäna ukhamwa sarakiñäni: “Khitinakatï [...] taqpach chuymamp servipki […], khitinakatï Jehová Diosan leyiparjam sarnaqapki ukanakajj kusisitäpjjewa” sasa (Sal. 119:1, nota). w22.10 pág. 17 párrs. 18, 19

Job chachajj walja kutiw jaqenakamp parlirïna, ukampis Jehová Diosamp parlatap janipuniw armkpachänti. Jehová Diosajj kunatï luratanakapat wali musparkañäki uk uñjañapatakiw Job chachar mayïna. Ukaw Jehová Diosan wali yatiñanïtap amuyañatakisa, servirinakapar cuidirïtapat jan payachasiñatakis yanaptʼäna. Mä toqetjja, kunjams Diosajj animalanakar kunatï jakañatak wakiski ukanak churäna uk uñjasajja, kunsa Diosajj jupa layku lurarakispa ukwa amuyäna (Job 38:39-41; 39:1, 5, 13-16). Diosan uka luratanakapat amuytʼasajja, Diosajj kunjam Diosas ukwa Job chachajj yateqäna. Jiwasajj ukhamarakiw luratanakap uñjasajj Diosat jukʼamp yateqsna. Ukampis awisajj uk lurañajj chʼamakïspawa. Mä ciudadan jan ukajj mä jachʼa markan jakasajja, janiw sapürojj Diosan luratanakap uñjañ puedksnati. Campon jakkasas Diosan luratanakap uñjañatakejj janis tiemponïksna ukhamwa amuyaraksna. Ukampis Diosan luratanakap uñjañatakejj tiempo apstʼasiñasajj wali wakiskiriwa. w23.03 pág. 15 párrs. 1, 2

Janïr akapacha tukuskipanjja, ‘jachʼa terremotonakampi’ yaqha jan waltʼäwinakampiw utjani sasaw Jesusajj discipulonakapar säna (Luc. 21:11). ‘Jan wali luräwinakaw jiljjattani’ sarakïnwa, ukatwa jan walinakasa, nuwasiñanakas utji, terroristanakas jaqenakar jan waltʼayapjje (Mat. 24:12). Ukanakajj Jehová Diosar jan servipki ukanakarukiw jan waltʼayani sasajj janiw Jesusajj siskänti. Diosar jan jitheqtas servirinakas uka jan waltʼäwinakan uñjasisajj tʼaqesipjjarakiwa (Is. 57:1; 2 Cor. 11:25). Inas Jehová Diosajj taqe jan waltʼäwinakat mä milagro lurasajj jan jarkʼaqkchistaniti, ukampis tranquilokïskañasatakisa sumankañ jikjjatañasatakis kunatï wakiski ukanakwa churistani. Mä jan waltʼäwin uñjasiñäni ukhajja, wakichtʼatäñaw tranquilokïñatak yanaptʼistani. ¿Ukampis wakichtʼatäñajj janis Jehová Diosar confiyjjsna ukhamti sañ muni? Janiwa. Jiwasatï mä akatjamat jan waltʼäwejj utjkaspa ukatak wakichtʼasiñäni ukhajja, Diosaw cuidaskitani sasin confiyataswa uñachtʼaytanjja. ¿Kunatsa ukham sistanjja? Diosan Arupajj jan waltʼäwinakatak wakichtʼasiñatakiw ewjjtʼistu. w22.12 pág. 18 párrs. 9, 10

Joseajj carcelankaskäna ukhajja, Egiptonkir reyirojj llakisiyir pä samkanakwa Jehová Diosajj samkasiyäna. Kunapachatï Josean uka samkanak qhanañchirjamätap yatïna ukhajja, juparuw jawsayanïna. Jehová Diosan yanaptʼapampejja, Joseajj janiw uka samkanakak qhanañchkänti, jan ukasti kunsa lurañapa uksa sarakïnwa. Ukaw faraonar wal musparayäna. Uka waynaru Jehová Diosajj yanaptʼatap faraonajj amuyäna ukhajja, taqpach Egiptonkir manqʼañanakat cargo lurasiñapatakiw uttʼayäna (Gén. 41:38, 41-44). Mä qhawqha maranak qhepatjja, Egipto oraqen manqʼat pistʼañ tiempow utjäna, Canaán oraqensa ukhamaraki, ukanwa Josean familiapajj jakäna. Joseajj Egipto markan mä cargo katoqatapatjja familiaparojj salvaspänwa, ukhamatwa jupanakajj Mesiasan nayra awkinakapar tukupjjarakispäna. Cheqas Jehová Diosaw Josean taqe luratanakapajj sumar sarañapatak yanaptʼaskäna. Josean jilanakapajj jiwayañs munapkchïnjja, Jehová Diosajj amtap phoqañatakiw uka jan wali amtanakap cambiäna. w23.01 pág. 17 párrs. 11, 12

¿Jiwas pachpat amuyasiñajj kun sañs muni? Kunanakatï Jehová Diosamp sum apasitas aptʼasiykistaspa ukanakat amuyasiña, ukanakamp jan apayasiña sañ muni. Ukhamatakwa Diosan munasiñapankaskakiñäni (Prov. 22:3; Jud. 20, 21). Apóstol Pablojj jumanak pachpat amuyasipjjam sasaw cristianonakar säna. Éfeso markankir cristianonakarojj akham sasaw qellqarakïna: “Kunjamsa sarnaqasipkta uk sum amuyasipjjam, jan jumanakajj jan amuytʼasir jaqenakjam sarnaqapjjamti, antisas yatiñan jaqenakjam sarnaqapjjam” sasa (Efes. 5:15, 16). Jehová Diosamp sum apasitasjja, Supayajj kunayman toqetwa aptʼasiyañ munistu. Ukatwa ‘kun lurapjjañassa Jehová Diosajj muni uk amuyaskakiñatak’ Bibliajj ewjjtʼistu, ukhamatwa Supayajj jan waltʼayañ munkistu taqe ukanakar saykatsna (Efes. 5:17). Mä suma amtar puriñatakejj ‘kun lurapjjañassa Jehová Diosajj muni’ ukwa amuytʼañasa. ¿Kunjamsa uk lursna? Diosan Arupatwa yatjjatañasa, kuntï liyktan uka toqet sapa kutiw lupʼiñasaraki. Jiwasatï kun lurañassa Jehová Diosajj muni uk amuyañäni, ‘kunjamtï Cristojj amuyki uka pachpa amuyunïñatak’ chʼamachasiñäni ukhajja, “yatiñan jaqenakjam” sarnaqañajj janiw chʼamäkaniti, kunsa lurañasa uka toqet janis mä leyejj utjkchejja, yatiñan jaqjamaw sarnaqañäni (1 Cor. 2:14-16). w23.02 págs. 16, 17 párrs. 7-9

¿Qhawqha kutis jumajj utam qʼomachta? Inas uka utan jakañ janïr qalltkasin sum qʼomachsta. Ukampis jan qʼomachjjasma ukhajj ¿kunas pasaspa? Ratukiw polvontjjaspa, qʼañöjjarakispa. Utasan qʼomäñapatakejja, sapa kutiw qʼomachañasa. Amuyunakasampisa chuymasampis niya ukhamarakwa lurañasa. Janïr bautisaskasajja, jakäwisan cambionak lurañataki, “kunanakatï cuerporusa amuyurusa qʼañuchki” ukanak qʼomachañatakiw chʼamachasiwaytanjja (2 Cor. 7:1). Ukampis jichhajj apóstol Pablon aka ewjjtʼapar istʼañasawa, jupajj akham sänwa: “Jumanakajja amuyunakam machaqar tukuyasipkakiñamawa” sasa (Efes. 4:23). Aka mundon ‘qʼañupasa’ ‘polvopas’ ratukiw chuymas qʼañuchaspa. Jiwasar jan uk pasañapatakisa, Jehová Dios nayraqatan qʼomäskakiñatakisa, sapa kutiw amuyussa, chuymassa, kunanaktï munktan ukanaks uñakiptʼasiñasa. w23.01 pág. 8 párrs. 1, 2

¿Jesusan yatichäwinakap istʼañajj kunja sumäpachänsa uk amuyirïtati? Jupajj Diosan Arupat aytapunirïnwa, pʼeqepatakwa mä texto aytirïna. Jesusajj bautisasjjäna, Diosan espíritu santopampi ajllitäjjäna ukhajja, janïr aka oraqer jutkasin alajjpachan jakkäna ukanakwa amtaspachäna. Ukaw bautisaskäna uka qhepat arskäna uka nayrïr arunakapan amuyasi, janïr jiwkäna uka qhep qhepa arunakapansa ukaw amuyasiraki (Deut. 8:3; Sal. 31:5; Luc. 4:4; 23:46). Jesusajj kimsa mara chikatani aka oraqenkkäna ukhajja, Diosan Arupatwa jilapartejj liytʼirïna, mä texto aytasajj qhanañchtʼarakirïnwa (Mat. 5:17, 18, 21, 22, 27, 28; Luc. 4:16-20). Jesusajj janïr yatiyañ qalltkäna uka nayrajj Diosan Arupat liytʼapunirïnwa, yaqhanakajj Diosan Arup liytʼapkäna ukhasa, ukjjat parlapkäna ukhas istʼapunirïnwa. Mariampi Joseampejj parltʼasipkäna ukhajja, jupanakarojj Diosan Arupat aytirwa istʼirïpachäna (Deut. 6:6, 7). Sapa sábado urunakaw familiapampejj sinagogar sarirïpachäna, Diosan Arupat liytʼaskäna uksa wali sumwa istʼarakpachäna (Luc. 4:16). w23.02 pág. 8 párrs. 1, 2

Walja razonanakatwa Jehová Diosar munastanjja. Sañäni: jupajj ‘jakañ vida chuririwa’, “taqe suma regalonakasa perfectöki taqe uka regalonakasa” jupatwa juti (Sal. 36:9; Sant. 1:17). Taqe kunanakatï kusisitäñatak yanaptʼktam ukanakajja, jiwasar munasiri wajjtʼasiri Jehová Diosatwa jutaraki. Juchampit jiwañampit kutsuykistu ukajj Jehová Diosan mä suma regaloparakiwa. ¿Kunatsa ukham sissna? Jehová Diosampi Yoqapampejj qhawqsa munasipjje uk amuytʼañäni. Jesusajj akham sänwa: “Awkejj nayar munasituwa”, nayajj ‘Awkir munasiraktwa’ sasa (Juan 10:17; 14:31). Walja millón millón maranakanjja, Jehová Diosampi Jesusampejj jukʼampiw wali sum apasipjjäna (Prov. 8:22, 23, 30). Kunapachatï Yoqapajj tʼaqeskäna jiwkäna ukhajj ¿kunjamsa Jehová Diosajj wal llakispachäna uk amuyasmati? Ukampis Jehová Diosajj taqe jaqenakar wal munasi, jumarus munasiraktamwa, ukatwa munat yoqaparojj mä sacrificiot loqtäna, ukhamat jumasa yaqha jaqenakas wiñayatak jakapjjañapataki (Juan 3:16; Gál. 2:20). Ukatwa Diosarojj wal munastanjja. w23.03 págs. 4, 5 párrs. 11-13

Apostatanakan yatichäwinakap jan istʼapjjañäniti. Jesusajja Pérgamo markankir yaqhep cristianonakarojj cheqañchänwa, kuna laykutejj congregacionan tʼaqa tʼaq sarnaqañanakwa utjayapjjäna, sectanakwa uñstayapjjarakïna (Apoc. 2:14-16). Maysa toqetjja, Tiatira markankir cristianonakarojj felicittʼänwa, jupanakajj “Supayat jutki uka kʼari yatichäwina[karojj]” janiw istʼapkänti, cheqa yatichäwinakat katuntasipjjañapatakiw chʼamañchtʼarakïna (Apoc. 2:24-26). Diosar serviñan aynachtʼatäpkäna, kʼari yatichäwinakamp engañjayasipkäna uka cristianonakajja, arrepentisipjjañapänwa. Jiwasajj ukhamarakiw Jehová Diosan amuyup conträki uka yatichäwinak jan istʼañasäkiti. Inas apostatanakajj “Dios chuymäpkaspas ukham tu[kupjjchispa]”, ukampis janiw Dios chuyma sarnaqapkiti (2 Tim. 3:5). Jiwasatï Diosan Arupat suma yatjjatirïñänejja, kʼari yatichäwinak ratukiw amuyañäni, janirakiw ukanakar istʼkañäniti (2 Tim. 3:14-17; Jud. 3, 4). Jehová Diosajj adoracionas katoqasiti janicha uk amuyasiñajj wali importantewa. Ukatwa jiwasatï kuna jan wal luraskstan ukhajja, Diosamp sumat uñjatäñatakejj jankʼak cambiañasa (Apoc. 2:5, 16; 3:3, 16). w22.05 pág. 4 párr. 9; pág. 5 párr. 11