Agosto

Parlatapan jupar ajjsarapjjatap uñachtʼayapki, sutipat lupʼipkaraki ukanakan sutinakapjja, ¿kunatsa Jehová Diosajj mä libror qellqantpacha? Kuna laykutejj kunas chuymasan utji ukwa parlatasajj uñachtʼayi. Jesusajj akham sänwa: “Mä jaqejj kunatï chuymapan phoqantatäki ukanak parlaraki” sasa (Mat. 12:34). Jehová Diosajj khitinakatï jupar munasipki ukanakajj machaq mundon wiñayatak jakasipjjaspa ukwa muni. Kunanaktï parlktan ukarjamaw jupajj adoracionas katoqasiniti janicha uk amtaraki (Sant. 1:26). Jehová Diosar jan munasiri walja jaqenakajja, parlkasajj mayninakaruw usuchjapjje, janiw munasiñamp parlapkiti, jachʼa jachʼa tukupjjaraki (2 Tim. 3:1-5). Jiwasajj janipuniw jupanakjamäñasäkiti, jan ukasti kunanaktï parlktan ukampejj Jehová Diosajj kusisitakïspa ukwa muntanjja. Ukampis maynitejj tantachäwinakansa predicacionans wali suma arunïspa, ukampis familiapampejj wali qhorüspa, janirak munasiñamp parlkaspa ukhajja, ¿jupampejj Jehová Diosajj kusisitäniti? (1 Ped. 3:7). w22.04 pág. 5 párrs. 4, 5

Diosaw tunka wajjrani salvaje animalarojj Jachʼa Babiloniar tukjañapatak amtayani. Ukhamasti, markanakajj llijkir wila color salvaje animal toqewa, mä arunjja Naciones Unidas toqew aka mundonkir falso religionanakar atacapjjani, qʼal tukjapjjarakini, Jehová Diosaw uk lurapjjañapatakejj markanakar amtayani (Apoc. 18:21-24). Ukhamajj “kunjam adorañatejj Dios Awkis nayraqatan qʼomäki jan qʼañuchatäki” ukham adorañatak chʼamachasiñasajj wali importantewa (Sant. 1:27). Janipun Jachʼa Babilonian kʼari yatichäwinakapampisa, costumbrenakapampisa, sarnaqäwinakapampisa, espiritunakamp parlapjjatanakapampis apayasipjjañäniti. Jaqenakarus “uka taypit mistjjapjjam” sasin yatiyasipkakiñäni. Jupanakatï ukham lurapjjani ukhajja, Jehová Diosajj janiw jupanakarojj Jachʼa Babiloniamp chika juchachasirinakarjam uñjkaniti (Apoc. 18:4). w22.05 pág. 11 párrs. 17, 18

Awk taykanaka, kunapachas wawanakamarojj Jehová Diosatsa kuna sumanaktï jumanak layku lurawayki ukanakatsa parlapjjasma uk amuytʼapjjam (Deut. 6:6, 7). Ukanak lurapjjañamajj wali wakiskiriwa, awk taykat mayniki Diosar servitap layku utankkasin Bibliat jan yatjjatañ puedipki ukhaw ukanak lurañajj jukʼamp wakiskirejja. Cristina kullakajj akham siwa: “Niyakejjay wawanakajampi Diosat jukʼak parlañ puedchiyätjja, taqe horasan jupanakamp Diosat parltʼañatakiw chʼamachasirïta” sasa. Diosan markapatsa, jilat kullakanakats sumwa parlañamaraki. Janiw ancianonak contra parlañamäkiti. Kunanaktï jupanakat parlkäta ukarjamaw wawanakamajj jupanakar yanap mayipjjani jan ukajj janisa. Utaman sumankañ utjañapatakiw yanaptʼañama. Qhawqsa esposomarus wawanakamarus munasta uk jupanakar sañamapuniwa. Esposomat munasiñampi respetompi parlañamawa, wawanakamarus ukham lurapjjañapatakiw yatichañama. Ukham luräta ukhajja, wawanakamatakejj Diosat yateqañajj jukʼamp faciläniwa (Sant. 3:18). w22.04 pág. 18 párrs. 10, 11

Jesusajj Éfeso markankir cristianonakar apaykäna uka yatiyäwinjja, jupanakan aguantapjjatapa, jan walinakan uñjaskasajj jan qarjtas Diosar servipjjatapwa qhanañchäna. Ukampis janiw kunjamtï qalltan Jehová Diosar munasipkäna ukham munasjjapjjänti. Ukhamajj Jehová Diosajj adoracionap katoqasiñapatakejja, mayampiw uka munasiñ jiltayapjjañapäna. Jichhürunakan ukhamarakiwa. Janiw aguantañasakejj wakiskiti, jan ukasti Diosar munasitasata, jupar yuspäratasatwa aguantañasa. Jupajj janiw kuntï lurktan ukak uñjkiti, jan ukasti kunatsa uk lurtan ukwa uñjaraki. Kunatsa mä kuns lurtanjja ukaw jupatakejj wali importantejja. Jupar yuspäratasata, munasitasat adorsna ukwa Jehová Diosajj muni (Prov. 16:2; Mar. 12:29, 30). Maysa toqetjja, jan ikjas uñnaqasipkakiñasawa. Sardis markankir congregacionankirinakajj yaqha jan walinwa uñjasipjjäna. Nayrajj taqe chuymas Jehová Diosar servipkchïnjja, jichhajj thayarjjapjjänwa. Ukatwa Jesusajj sartasipjjañapatak mayïna (Apoc. 3:1-3). Cheqansa, kuntï jupa laykojj lurawayktan uk janiw Jehová Diosajj armaskaniti (Heb. 6:10). w22.05 pág. 3 párrs. 6, 7

Wal trabajisajj kusisitaw jikjjatastanjja, ukajj “Diosan regalopawa” sasaw Salomonajj säna (Ecl. 5:18, 19). Jupajj janiw aleqak parlkänti, jupa pachpaw wal trabajäna. Uvasanakwa ayrüna, utanaka, jardinanaka, estanquenaka, markanakwa lurarakïna (1 Rey. 9:19; Ecl. 2:4-6). Cheqas ukanak lurañatakejj wal trabajïna. Ukham trabajisajj kusisitaw Salomonajj jikjjataspachäna, ukampis cheqpachapun kusisitäñatakejj yaqha lurañapaw wakisïna, uk jupajj yatïnwa. Sañäni, Jehová Diosar adorañatak mä suma templo lurasiñapatakiw pʼeqtʼäna, uka trabajojj paqallqo maranakanwa tukuyasïna (1 Rey. 6:38; 9:1). Jakäwipan kunaymaninak lurasajja, Jehová Diosar serviñajj jukʼamp importantëtapwa Salomonajj amuyäna. Jupajj akham sänwa: “Taqe kunanakattï parlaski ukanakatjja, aka amtaruw purisiwayi: cheqpach Diosar ajjsaram, mandamientonakapsa phoqarakim” sasa (Ecl. 12:13). w22.05 pág. 22 párr. 8

Kunjamsa Jehová Diosajj walja jaqenakarojj taqe chuyma perdonäna uka toqetwa Bibliajj parli. Juchanakap perdonkäna uka jaqenakat inas Manasés reyit amtassta. Jupajj sinti jan wali jaqënwa. Jehová Dios contras jachʼa juchanakwa lurarakïna. Falso diosanakar adorapjjañapatakiw jaqenakar amtayäna. Uka diosanakar sacrificio loqtañatakejja, pachpa wawanakaparuw ninar phichantäna. Jan phenqʼaniw Jehová Diosan temploparu, mä arunjja sagrado lugarar mä ídolo apantäna. Uka reyit parlkasinjja, Bibliajj akham siwa: “Jehová Diosan chuymap ustʼayañatakejj kunatï jan walïkäna ukanak sintpun luräna” sasa (2 Crón. 33:2-7). Ukampis Manasesajj cheqpachapun arrepentisïna ukhajja, Jehová Diosajj taqe chuymaw perdonäna (2 Crón. 33:12, 13). Maysa toqetjja, inas David reyit amtasirakstan, jupajj adulterio juch lurasa, jaqe masipar jiwayasaw jachʼa juchanak luräna. Ukampis juchanakap reconocisajj taqe chuymaw arrepentisïna, Jehová Diosas jupar perdonänwa (2 Sam. 12:9, 10, 13, 14). Ukhamajj Jehová Diosajj wal perdonañ muni, uka toqet janiw payachasiñasäkiti. w22.06 pág. 3 párr. 7

Diosar taqe chuyma suytʼañajj janiw faciläkapuniti. Awisajja, Diosan promesanakap phoqasiñap suykasajj janiw pacienciamp suytʼjjsnati. Ukampis Jehová Diosajj wiñay Diosawa, janirakiw tiempjja jiwasjam uñjkiti (2 Ped. 3:8, 9). Amtanakapjja wakisitarjamaw sum phoqani, ukampis inas jiwasajj suyktan uka horasar jan phoqkchiniti. Kunürutï Diosajj promesanakap phoqkani uka urun puriniñapkamajja, ¿kunas taqe chuyma suytʼaskakiñatakisa, pacienciampi suytʼaskakiñatakis yanaptʼistani? (Sant. 5:7). Jehová Diosan jakʼapankañasawa. Kuntï suytʼasktan uk jupaw phoqasiyani. Bibliarjamajja, Diosar taqe chuyma suytʼañatakejj jupan utjataparusa, “jupar taqe chuyma thaqerinakar pago churirïta[parusa]” confiyañasawa (Heb. 11:1, 6). Jiwasatï Jehová Diosan utjatapar cheqpachapun confiyañänejja, jupajj taqpach promesanakapwa phoqani sasaw confiyarakiñäni. Diosar taqe chuyma suytʼaskakiñatakejja, juparuw orasiñasa, Arupsa liyiñasapuniwa. Janis Jehová Diosar uñjkstanjja jupan amigopäsnawa. Jupar orasktan ukhajja, istʼitaniwa sasin confiyasaw jupamp parltʼastanjja (Jer. 29:11, 12). w22.10 págs. 26, 27 párrs. 11-13

Ak amuytʼapjjañäni. Job chachajj qhella patjjan qontʼatäskiwa, uruy arumaw llaganakajj jupar tʼaqesiyaraki (Job 2:8). Amigonakapas janiw suma jaqëktati, kuntï lurawaykta ukajj janiw kuna valoranïkisa sasaw sapjjaraki. Taqe ukanakajj walpun Job chachar aynachtʼayi. Wawanakapan jiwatapats wali llakitapuniw jikjjatasi. Qalltan janiw kamskisa (Job 2:13). Ukham jan kun kamsatapat inas amigonakapajj Jehová Diosarojj apanukjjaniwa sasin amuyapjjchi, ukampis janiw ukhamäkiti. Inas amigonakapar uñkatasajj aka arunak sischïna: “¡Jiwañajkamajj janipuniw Diosar taqpach chuymamp serviñ apanukkäti!” sasa (Job 27:5). Ukham jan walinakan uñjasisajj ¿kunas Job chacharojj chʼamanïskakiñatakisa jan ajjsarañatakis yanaptʼpachäna? Sinti jan walin uñjasisas munasiri Diosajajj yanaptʼitaniwa sasaw suytʼaskakïna. Jiwjjä ukhas Jehová Diosaw jaktayitani sasaw confiyarakïna (Job 14:13-15). w22.06 pág. 22 párr. 9

Alajjpacha ukat aka oraqe Lurir Diosajja, mä jachʼa privilegio churistu: oración toqew jupar jakʼachassna. Jupampejj kuna arutsa, kuna horasans taqe chuymaw parltʼassna. Hospitalan mä ikiñankkasasa jan ukajj carcelankkasasa, jupajj istʼitaniwa sasaw munasir Awkisar orassna. Oración utjatapat wal yuspärtanjja. David reyitakejja, oracionajj mä jachʼa privilegiönwa. Jupajj mä cancionan akham sasaw Jehová Diosar säna: “Oracionajajj inciensor uñtata juma nayraqatan wakichtʼatäpan” sasa (Sal. 141:1, 2). Jupajj jakkäna uka tiemponjja, Jehová Diosar adorañatakejj mä sagrado inciensow apnaqasïna. Uka inciensjja, sacerdotenakaw wali amuyumpi wakichtʼapjjerïna (Éx. 30:34, 35). Inciensot parlkasajja, “alajjpachankir Awkijar oracionanakajan kamsäsa uk sumwa amuytʼasëjja” sañwa Davidajj munaskäna. Jiwasajj ukham lurañwa munaraktanjja, kuna laykutejj oracionanakasajj Jehová Diosar kusisiyañapwa muntanjja. w22.07 pág. 20 párrs. 1, 2; pág. 21 párr. 4

Vengasiñat sipansa Jehová Diosan amparapar jaytjjañäni. Diosajj janiw jiwas contra jucha lurapki ukanakat vengasiñasatak permiso churkistuti (Rom. 12:20, 21). Jupajj taqe kuns sum juzgui, jiwasajj janiw jupjam juzgksnati, kuna laykutejj pantjasirïtanwa, janirakiw taqe kuns sum yatktanti (Heb. 4:13). Awisajj chuymasamp apayasisajj janiw kuns lurañ puedjjsnati. Diosan amuytʼayatäsajj akham sasaw Santiagojj qellqäna: “Colerasir jaqejja janiw kunatï Dios nayraqatan cheqapäki ukarjamajj lurkiti” sasa (Sant. 1:20). Jehová Diosaw cheqaparjam uñjani, justicia utjayarakini, janiw ukat payachasiñasäkiti. Mayninakar perdonktan ukhajja, Jehová Diosan cheqapar uñjirïtapar confiyataswa uñachtʼaytanjja. Jehová Diosan amparapar taqe kuns jayttan ukhajja, kuna jan walinaktï juchajj utjayawayki uk jupaw askichjjani sasin confiyataswa uñachtʼaytanjja. Jehová Diosajj churañ arsuwayki uka jutïr pachanjja, kunanakatï chuym ustʼayawaykistu ukanakajj “janiw amtatäjjaniti, janirakiw khitis ukanakat llakisjjaniti” (Is. 65:17). w22.06 págs. 10, 11 párrs. 11, 12

Uñisipkistu ukajja, Jesusat yateqasis sarnaqatasa, Jehová Diosamp suma uñjatätaswa uñachtʼayi (Mat. 5:11, 12). Supayaw jaqenakarojj jiwas contra saytʼasipjjañapatakejj amtayi. Ukampis Supayat sipansa Jesusaw jukʼamp chʼamanejja. Jesusan yanaptʼapampejja, Reinon yatiyäwinakapajj taqe markanakanwa yatiyasiski. Yaqha jan waltʼäwejja, kunayman arunak utjki ukawa. Jesusajj mä visionan apóstol Juanar uñjaykäna ukanjja, suma yatiyäwinak yatiyasiñapatakejj kunayman arunak utjatapajj janiw jarkʼkaniti sasaw amuytʼayäna (Apoc. 14:6, 7). ¿Kunjamsa uka jan walir atipjawaytanjja? Internetan jw.org cheqanjja, 1.000 jila arunakanwa Bibliat apstʼat qellqatanakajj utj-jje. Ukhamarus ¡Wiñayatakiw kusisit jakasisma! sat librojja, 700 jila arunakan traducisiñapatakiw aprobasiwayi. w22.07 pág. 9 párrs. 6, 7

Jesusajj jaqenakat sinttʼasirïnwa. Apóstol Mateojj akham sänwa: “Jaqenakar uñjasajj walpun sinttʼasïna, jupanakajj jan awatirini ovejanakjam qʼala usuchnoqata, ananukuta ukhamäpjjänwa” sasa (Mat. 9:36). ¿Kunjamsa Jehová Diosajj jaqenakar uñji? Awkipat parlkasajj Jesusajj akham sänwa: “Jupajj janiw jiskʼa wawanakar uñtasitäpki ukanakat maynin chhaqañapsa munkiti” sasa (Mat. 18:14). Jehová Diosajj jiwasar ukham munasitapat ¡walpun kusistanjja! Jiwasatï Jesusar jukʼamp uñtʼañäni ukhajja, Jehová Diosar munasitasajj jukʼampiw jiltarakini. Jehová Diosar munasitamajj jukʼamp jiltañapatakisa Diosar serviñan nayrar sartañatakis ¿kunampsa lurarakisma? Diosar serviñan suma saytʼatäpki uka jilat kullakanakan amigopäñamawa. Uka jilat kullakanakajj kusisitapuniw jakasipjje. Jehová Diosar serviñ amtapjjatapats janiw arrepentisipkiti. Experiencianakap jumar cuenttʼañapatakiw jupanakar mayisma. Mä wakiskir amtar puriñamächi ukhajja, jupanakampiw ewjjtʼayasisma. Cheqas “walja ewjjtʼirinakajj utji ukhajja, taqe kunas sumakiw sari”. w22.08 pág. 3 párrs. 6, 7

Taqeniw mä jan walins uñjasiñäni. Ukampis ukanakar saykatañatakejj janiw sapakïkañäniti. Jehová Diosajj mä munasiri awkjamajj cuidapunistuwa. Jupaw jiwasampïski, yanaptʼañapatak ruwtʼastan ukhajj jankʼakiw istʼistu, yanaptʼañatakis jankʼakirakiwa (Is. 43:2). Jan walinakarojj saykatsnawa, janiw ukat payachasktanti. ¿Kunatsa? Kunanaktï aguantañatakejj necesitktan taqe ukanakwa Jehová Diosajj churistu, mä arunjja oración, Biblia, Biblian yatichäwinakapa ukat munasiri jilat kullakanakwa churistu. Alajjpachankir munasir Awkisajj jiwasat llakisitapat wal yuspärtanjja. Jupïpanwa “chuymanakasajj wal kusisi” (Sal. 33:21). ¿Diosajj munasiñamp jiwasar cuidatapat kunjamsa yuspärsna? Yanaptʼanak churkistu taqe ukanak aprovechasaw yuspärsna. Diosajj jiwasar cuidaskakiñap munstan ukhajj chʼamachasiñasawa, mä arunjja jupar istʼañataki, kunatï jupatak walïki uk lurañatakiw chʼamachasiñasa. Ukhamtï lurañänejja, wiñayatakiw Jehová Diosajj cuidistani. w22.08 pág. 13 párrs. 15, 16

Jichhürunakanjja, jaqenakajj janiw yaqhanakar facilak confiyjjapjjeti. Waljaniw politiconakarusa, cientificonakarusa, negocionak luririnakarus respetapjje, ukampis “¿cheqapunit jaqenakar yanaptʼañ munapjjpacha?” sasaw jisktʼasipjje. Cristianöpjjtwa sapki uka iglesia pʼeqtʼirinakarus janiw respetapkiti. Jupanakajj Bibliaruw istʼapjjta sapkchisa, jaqenakajj janiw Bibliar confiyjjapjjeti. Ukampis jiwasajja, Jehová Diosajj ‘cheq parlir Diosätapatsa’ kunatï jiwasatakejj walïki uk thaqerïtapatsa janiw payachasktanti (Sal. 31:5; Is. 48:17). Kunanaktï Bibliajj siski ukar confiytanwa. Kuntï Bibliat yatjjattʼat mä chachajj siskäna ukhamwa amuyaraktanjja, jupajj akham sasaw qellqäna: “Taqe kunanaktï Diosajj siski ukanakat janipuniw kunas kʼarïkiti, kunanaktï siski ukanakajj phoqasipuniniwa. Diosan markapankirinakajj kuntï Diosajj arski ukar confiyapjjaspawa, kuna laykutejj ukanak arsur Diosaruw confiyapjje” sasa. w23.01 pág. 2 párrs. 1, 2

Jehová Diosar jukʼamp confiyapjjañapatak yanaptʼasaw jiwasajj jilat kullakanakar chʼamañchtʼtanjja. Yaqhepanakajja, jan Testigöpki ukanakan jiskʼachataw uñjasipjje, ukwa jupanakajj aguantapjjañapa. Yaqhepajj wali usutäpjjewa, yaqhepasti chuyma pʼakintat uñjasisajj ukar saykatañatakiw chʼamachasisipkaraki. Yaqhepanakajj walja maranakaw akapachan tukusiñap suyasipkaraki. Taqe ukhamanakan uñjasisajja, mä cristianon Diosar confiyatapajj yantʼataw uñjasispa. Nayrïr cristianonakajj niya ukhamanakanwa uñjasipjjarakïna. Apóstol Pablojj Qellqatanakampiw Diosar jukʼamp confiyapjjañapatak jilat kullakanakar yanaptʼäna. Cristianonakat sipans judionakan religionapaw nayranki sasin familiaranakapajj judío cristianonakar sapkäna ukhajja, jupanakajj janiw kamsañs puedipkpachänti. Pablojj hebreo cristianonakar carta qellqkäna ukajj walpun jupanakar chʼamañchtʼpachäna (Heb. 1:5, 6; 2:2, 3; 9:24, 25). Uka cristianonakarojja, kuntï Pablojj amuytʼaykäna ukaw jan cristianöpkäna uka familiaranakapar kun sañatakis yanaptʼaspäna. w22.08 págs. 23, 24 párrs. 12-14

Supayan apnaqat akapachanjja, jilaparte jaqenakajj janiw khitir confiyañsa yatjjapjjeti. Jupanakajj sapa kutiw empresarionakana, politiconakana, religión pʼeqtʼirinakan engañjatajj uñjasipjje. Waljanejja, amigonakaparusa, vecinonakaparusa, familiaranakaparus janiw confiyjjapjjeti. Ukampis ukanak yatisajj janiw mayjtʼasiñasäkiti. Kuna laykutejj Bibliajja, jaqenakajj ‘qhepa urunakan’ “jaqe masipar jaytanukurinaka”, “kʼarintirinaka”, “traicioneronaka” ukhamäpjjaniwa sasaw janïräkipan qhanañchjjäna. Ukhamajja, jaqenakajj akapachan diosapjamäpjjañapänwa, jupajj jan confiykañawa (2 Tim. 3:1-4; 2 Cor. 4:4). Ukampis cheqpach cristianonakajj taqe chuymaw Jehová Diosar confiysna. Jupajj wal munasistu, amigonakaparus ‘janipuniw jaytanukkaniti’, janiw ukat payachasktanti (Sal. 9:10). Jesucristorojj confiyaraktanwa, kuna laykutejj jupaw taqe jiwasanak layku jakäwip loqtasïna (1 Ped. 3:18). Biblian ewjjtʼanakapas confiykañawa (2 Tim. 3:16, 17). w22.09 pág. 2 párrs. 1, 2

Cheqpach kusisiñajja, janiw mä rato aleq kusistʼañakïkiti, jan ukasti wiñayatakiw kusisitäsna. Jesusajj mä Qollun Yatichkäna ukhajja, kunjamsa kusisitäsna ukwa yatichäna. Jupajj akham sänwa: “Kusisiñanïpjjew Diosat yatjjatañajj kunja wakiskirisa uk amuyasirinakajja” sasa (Mat. 5:3). Jaqenakajja, jiwasar lurkistu uka Jehová Diosar wal uñtʼañ munañataki, jupar adorañatak luratätanwa, uk Jesusajj yatïnwa. “Diosat yatjjatañajj kunja wakiskirisa” sasin Bibliajj siski ukhajja, uka toqetwa parlaski. Niyakejjay Jehová Diosajj ‘kusisir Diosächejja’, jupar servipktan ukanakajj kusisitarakïsnawa (1 Tim. 1:11). ¿Jan kuna problemanïkañäni ukhakit kusisitäsna? Janiwa. Jesusajj Qollun Yatichkäna ukhajja, ‘wali llakitanakajj’ kusisitäpjjaspawa sasaw qhanañchäna. ‘Cheqapar sarnaqapjjatap layku arknaqata uñjasirinakasa’ kusisitäpjjaspawa sasaw sarakïna (Mat. 5:4, 10, 11). Cheqpach kusisitäñatakejj janiw jakañ vidanjj taqe kunapunejj sumäñapäkiti, jan ukasti Diosat yatjjatañajj kunja wakiskirisa ukwa amuyasiñasa, Jehová Diosar jakʼachasiñasarakiwa, ukwa Jesusajj yatichäna (Sant. 4:8). w22.10 pág. 6 párrs. 1-3

Kunapachas ‘amuktʼañ tiempojja’, kunapachas ‘parlañ tiempojja’ uk yatiñatakejja, amuytʼasirïñaw mä cristianorojj yanaptʼani (Ecl. 3:7). Yaqhep cheqanakanjja, jaqenakajj akham sañ yatipjje: “Parlañajj qollqewa, amuktʼañasti qoriwa” sasa. Uka arunakajja, parlañat sipansa amukïñaw awisanakajj wakisi sañwa muni. Experienciani mä anciano jilatat parltʼañäni, juparojj sapa kutiw yaqha congregacionanakar yanaptʼañapatak mayipjje, ukhamat wali chʼamäki uka asuntonak atiendiñapataki. Yaqha ancianojj uka jilatat akham siwa: “Jupajj wali amuytʼasiriwa, kunanaktï yaqha congregacionanakat jan parlañapäki ukanakjja, janiw khitirus yatiykiti” sasa. Experienciani uka ancianorojja, amuytʼasirïtapat congregacionapankir ancianonakajj respetapjjewa, kunanakatï jan parlañapäki ukanak janiw yaqhanakar parlkaniti, uk jupanakajj sum yatipjje. Cheq parlañaw confiykañ jaqëñasatakejj yanaptʼarakistu. Cheq parlir jaqenakajja, kunatï cheqäki ukpunwa parlapjje. Jupanakar confiyañas facilakiwa (Efes. 4:25; Heb. 13:18). w22.09 pág. 12 párrs. 14, 15

Kunapachatï cheqpach yatiñajj ‘callenakan jachʼat arnaqasi’ ukhajja, waljanejj jan istʼasiriw tukupjje (Prov. 1:20). Biblianjja cheqpach yatiñar jan istʼañ munirinakat kimsa kasta jaqenakatwa parli, jupanakajj akanakawa: “jan experiencian jaqenaka”, “burlasir jaqenaka”, “jan amuytʼasir jaqenaka” (Prov. 1:22-25). ‘Jan experiencian jaqenakajj’ taqe kun creyirinakawa, jupanakajj facilakwa kunarus iyaw sapjje jan ukajj engañjayasipjje (Prov. 14:15). Cheqas millón millón jaqenakaw religión pʼeqtʼirinakana, politiconakan engañjatajj uñjasipjje. Ukham engañjat amuyasisajja, yaqhepanakajj chuyma pʼakintataw uñjasipjje. Ukampis Proverbios 1:22 texton parlki uka jan experiencian jaqenakajja, jupanak pachpaw ukham jan experiencianïskakiñ amtapjje (Jer. 5:31). Janiw kuntï Bibliajj siski uk yateqañ munapkiti, ni Biblian leyinakaparus istʼañ munapkiti. Jiwasajj janiw uka jan amuytʼasir jaqenakat yateqasiñ munktanti (Prov. 1:32; 27:12). w22.10 pág. 19 párrs. 5-7

Diosan markapajj instruccionanakwa churistu. Sapa kutiw celular numerossa, jan ukajj uta direccionas ancianonakar churañasatak amtayistu, ukhamat mä akatjamat jan waltʼäwejj utjaspa ukhajj kawkjanktansa uk yatipjjañapataki. Inas Diosan markapajj utan quedasiñasataki, mä cheqat sarjjañasataki jan ukajj manqʼañanaka medicamentonak jikjjatañasatak instruccionanak churchistani. Jan ukajj inas kunapachasa kunjamsa mayninakar yanaptʼsna uk sapjjarakchistani. Mayipkistu ukarjamatï jan lurksnajja, inas pachpa vidas aptʼassna jan ukajj ancianonakan vidaps aptʼasiyaraksna, jupanakajj jiwasaruw cuidapjjestu (Heb. 13:17). Walja jilat kullakanakajja, desastres naturales, guerranaka, jan ukajj markan jan waltʼäwinak utjatap laykojj yaqha cheqanakaruw sarjjapjje. Jupanakajj yaqha cheqan yatinoqtañatakisa, jankʼak wasitat tantachäwinkañatakisa predikir sarañatakis wal chʼamachasipjje. Jupanakajj nayrïr cristianonakat yateqasisaw “Diosan arunakapat suma yatiyäwinak” yatiyasipkaki, nayrïr cristianonakajj arknaqat uñjasisajj ananukutäpkchïnsa yatiyasipkakïnwa (Hech. 8:4). Predicacionajj jan waltʼäwinakat lupʼiskañat sipansa, Diosan Reinopat lupʼiñatakiw yanaptʼi. Ukhamatwa jupanakajj kusisitäpjje, sumankañsa jikjjatapjjaraki. w22.12 pág. 19 párrs. 12, 13

Jehová Diosajj sapa mayniruw wali valoranit uñjistu. Apostolonakapar janïr predikir khitkasajja, Jesusajj jupanak contra saytʼirinakar jan ajjsarapjjañapatakiw yanaptʼäna (Mat. 10:29-31). Ukatakejj Israel markan wali uñtʼat gorrión jamachʼinakatwa jupanakar parläna. Uka tiemponjja, uka jamachʼinakajj jukʼa qollqerukiw aljasïna. Ukampis Jesusajj discipulonakapar akham sänwa: “Uka jamachʼinakatjja, janiw mayas alajjpachankir Awkiman jan uñjkatajj oraqer purkaniti” sasa. Ukatsti sarakïnwa: “Jumanakajj walja gorrión jamachʼinakat sipansa jukʼampi valoranïpjjtawa” sasa. Ukhamatwa sapa mayni jupanakar Jehová Diosajj wali valoranit uñjatap Jesusajj qhanañchäna. Ukaw arknaqatäñar jan ajjsarañatak jupanakar yanaptʼäna. Jupanakajj jachʼa markanakansa jiskʼa markanakansa, predicacionan sapa kutiw gorrión jamachʼinak uñjasajj uk amtapjjpachäna. Ukhamarakiw mä jiskʼa jamachʼi uñjkäta ukhajj qhawqha valoranitsa Jehová Diosajj uñjtam uk amtañama, kuna laykutejj “walja gorrión jamachʼinakat sipansa” jumajj wali valoranirakïtawa. Jehová Diosan yanaptʼapampejj jan ajjsartʼasaw juma contra saytʼirinakar saykatäta. w23.03 pág. 18 párr. 12

Inas awisajj familiaranakasajj jiwas contra saytʼapjjchi jan ukajj jan trabajoni uñjasstan. Walja tiempo mä jan walin uñjastan ukhajja, ukajj janiw askichaskaniti sasin inas amuyjjsna, ukat llakisjjaraksna. Ukhamanakan uñjasktan ukhaw Supayajj janis Jehová Diosajj munaskistaspa ukham amuyañas muni. Ukham jan walinakan uñjasiñasatakejj Jehová Diosasa jan ukajj markapas juchanïkaspa ukham amuyañaswa Supayajj munaraki. Egipto markankapkäna uka yaqhep israelitanakarojj niya ukhamaw pasarakïna. Qalltanjja Jehová Diosas jupanakar esclavöñat salvañatakejj Moisesampir Aaronampir ajllkaspäna ukhamwa amuyapjjäna (Éx. 4:29-31). Ukampis faraonajj jupanakar wal tʼaqesiykäna ukhajja, Moisesampiru Aaronampiruw juchañchjjapjjäna (Éx. 5:19, 20). ¡Jehová Diosat jan jitheqtiri servirinakapar ukham juchañchapjjatapajj janipuniw walïkänti! Jumatï walja tiempo jan walinak aguantasksta ukhajja, Jehová Diosar chuymatpach orasim, yanaptʼap thaqarakim. w22.11 pág. 15 párrs. 5, 6

Jehová Diosaw jakañ churistu, jiwatanakar jaktayañatakis chʼamanirakiwa. Sarepta markankir mä viuda warmin yoqapar jiwatat jaktayañatakejj Jehová Diosaw Elías profetar chʼam churäna (1 Rey. 17:21-23). Tiempompejja, Diosan yanaptʼapampiw Eliseo profetajj Sunem markankir mä warmin yoqapar jiwatat jaktayäna (2 Rey. 4:18-20, 34-37). Jupanakan jiwatat jaktapjjatapasa mayninakan jiwatat jaktapjjatapasa, Jehová Diosajj jiwatanakar jaktayañatak chʼamanïtapwa uñachtʼayi. Jesusajj aka oraqenkkäna ukhajja, Awkipajj jiwatat jaktayañatak jupar chʼam churatapwa uñachtʼayarakïna (Juan 11:23-25, 43, 44). Jichhajj Jesusajj alajjpachankjjewa, juparojj ‘Diosaw taqe autoridad churi, alajjpachansa ukhamarak aka oraqensa’. Ukhamajj “taqe khitinakatï sepulturankapki” ukanakar wiñay jakasipkakiñapatak jaktayañ arsuwayki uka promesap phoqaniwa (Mat. 28:18; Juan 5:26-29). w22.12 pág. 5 párr. 10

Ezequiel profetar jan istʼañ munasajj Jehová Diosaruw israelitanakajj jan istʼapkänti. Ukhamajj jichhürutak ajllita textojj jan sint llakisiñapatakiw Ezequielar yanaptʼpachäna, kuna laykutejj jupar jan istʼañ munapjjatapajj janiw jan wali profetäkaspas ukham sañ munkänti. Ukhamarus Jehová Diosajja, kunapachatï juchañchäwi arunakajj phoqaskani ukhajj “[jiwas] taypin mä profetaw utjäna” sasinwa uka judionakajj amuyapjjani sasaw Ezequielar säna (Ezeq. 2:5; 33:33). Uka chʼamañchtʼkiri arunakaw Ezequielarojj predicacionamp phoqañapatakejj wal chʼamañchtʼpachäna. Jehová Diosajj predicañatak jiwasar khitatap yatiñajj chʼamañchtʼarakistuwa. Jehová Diosan Testigopjam uñtʼatäñajj jupan churat mä jachʼa bendicionawa (Is. 43:10). Jehová Diosajj “jan ajjsaramti” sasaw Ezequielar säna, jiwasarojj “jan ajjsarapjjamti” sasaw sarakistu (Ezeq. 2:6). ¿Kunatsa jiwas contra saytʼapki ukanakarojj jan ajjsarañasäki? Ezequiel profetarjamarakiw Jehová Diosajj khitistu, yanaptʼarakistu (Is. 44:8). w22.11 págs. 3, 4 párrs. 4, 5

Ancianonakasa, siervo ministerialanakas confiykañ jilatanakäpjjewa, kuntï lurapki uk wali valoranitwa uñjtanjja. Diosat jan jitheqtir uka jilatanakajj wali sum cuidapjjestu, ukatwa Jehová Diosar yuspärtanjja. Ukampis ¿kunjamsa jiwasajj confiykañätas uñachtʼaysna? Jilat kullakanakasarojj munastanwa, kunjamanakans uñjasipjje ukanakats llakisiraktanwa. Ukampis wal amuyasiñasawa, janiw jilat kullakanakan jakäwipar mitisiñasäkiti, jan ukasti respetañasawa. Nayrïr patak maranakan utjkäna uka cristiano congregacionanjja, arunak apnaqeri jaqenakaw utjäna. Jupanakajj ‘yaqhanakan luräwinakaparuw mitisipjjäna, kuntï jan parlapjjañapäkäna ukanakwa parlapjjarakïna’, jiwasajj janiw jupanakjamäñ munktanti (1 Tim. 5:13). Maynejj jumarukiw awistʼasksma sasin jakäwipat cuenttʼistaspa ukham amuytʼañäni. Mä kullakatï usutätap yatiychistu jan ukajj mä jan walin uñjasiskatap yatiychistu, janiw khitirus awisätati sasin sarakchistu ukhajja, jan khitir awisañasatak maykistu uk respetañasapuniwa. w22.09 pág. 10 párrs. 7, 8

Janiw mä qhawqha suma luräwinak lurañakejj wakiskiti. Jan ukasti chuymasan kunjamäsktansa ukwa uñakiptʼasiñasa, Jehová Diosan leyinakaparjam sarnaqañatakejj kuna cambionakatï jakäwisan lurañajj wakiski ukanak lurañatakis chʼamachasiñasarakiwa. Janiw mä kutik uk lurañasäkiti, jan ukasti sapa kutiw lurañasa. Perfectöjjañäni ukhajja, taqe kunanwa Jehová Diosar kusisiykir sarnaqjjañäni. Uka urun puriniñapkamajja, Jehová Diosar kusisiyañatakejj chʼamachasiskakiñasawa. Romanos 12:2 textot amuytʼañäni, ukanjja apóstol Pablojj kuntï Jehová Diosajj lurañas munki uk lurañatakejj amuyus machaqar tukuyañajj wali wakiskirïtapwa qhanañchäna. Akapachankir jaqenakan amuyunakapamp apayasiñat sipansa, kunanaktï jutïrin lurañ munktan ukanakasa amtanakasas Jehová Diosan amuyuparjamäskiti janicha uk uñakiptʼasiñasajj wali wakiskiriwa. w23.01 págs. 8, 9 párrs. 3, 4

¿Kunanakatï paskistu ukanak Jehová Diosat apnaqe? ¿Mä jan walit kunatï sumäki uk utjañapatakit Diosajj kunanakatï paskistu ukanak apnaqe? Bibliajj janiw uk yatichkiti (Ecl. 8:9; 9:11). Ukampis janiw aka toqet payachasktanti: mä yantʼan uñjasktan ukhajja, Jehová Diosajj taqe kunwa uñjaski, yanap mayiñatak artʼasitanakassa istʼarakiwa (Sal. 34:15; Is. 59:1). Janiw ukakïkiti, jan walinakan uñjasktan ukhajj uk aguantañatakiw yanaptʼarakistu. ¿Kunjamsa uk luri? Jilapartejj munktan ukhapuniw Jehová Diosajj chuymachtʼistu chʼamañchtʼarakistu (2 Cor. 1:3, 4). ¿Kunapachatï munkayätan ukhapuni Jehová Diosajj jiwasar chuymachtʼatapa chʼamañchtʼatapa amttanti? Niya jilapartejja, mä jan walejj pasjje uka qhepatwa Jehová Diosajj jiwasar yanaptʼatap amuytanjja. w23.01 págs. 17, 18 párrs. 13-15

Uka salvaje animalajja, paqallqo pʼeqenakani salvaje animalar uñtasitawa, ukampis llijkir wila colorawa. Apocalipsis librojja uka salvaje animalarojj ‘salvaje animalan estatuapa’ ukat ‘kimsaqallqöri reyi’ sutinakampiw ayti (Apoc. 13:14, 15; 17:3, 8). Uka reyitjja, utjänwa ukat janiw utj-jjänti, qhepat wasitampiw utj-jjäna sasaw qhanañcharaki. Uka arunakarjamaw Organización de las Naciones Unidas ukampejj pasäna, uka organizacionajj kuntï oraqpachankir politiconakajj munapki ukaruw yanaptʼi. Qalltanjja Sociedad de Naciones sasin uñtʼatänwa. Ukatjja Segunda Guerra Mundialan janiw utj-jjänti. Qhepatsti Organización de las Naciones Unidas sutimpiw uñstarakïna. Salvaje animalanakajja, mä arunjja gobiernonakajja, kunanaktï lurapki ukampejj Jehová Dios contra, markap contra saytʼasipjjañapatakiw jaqenakar chʼamañchapjjani, mä arunjja ‘oraqpachankir reyinakaruw’ Armagedonatak tantachthapipjjani, uka Armagedonajja “Taqe Chʼamani Diosan jachʼa urupan guerrajj apaskani” ukawa (Apoc. 16:13, 14, 16). w22.05 pág. 10 párrs. 10, 11

Jesusajj Diosan Arupat liytʼäna ukhajja, janiw kuntï Diosan Arupajj siski ukak yatkänti, jan ukasti Diosan Aruparojj munasïnwa, yanaptʼayasirakïnwa. Ukatakejja, 12 maranïkäna ukhajj kunas templon pasäna uk amuytʼañäni. Moisesan leyip wali sum uñtʼapkäna uka yatichirinakajja, “wali amuytʼasirïtapatsa jisktʼanakar qhanañchatapatsa wal musparapjjäna” (Luc. 2:46, 47, 52). Jiwasatï Diosan Arupat sapa kuti liytʼañänejja, Diosan Arup jukʼamp sumwa uñtʼañäni, munasirakiñäniwa. Ley wali sum uñtʼir escribanakarusa, fariseonakarusa, saduceonakarus Jesusajj kamsänsa uk yatjjatañäni. Uka religión pʼeqtʼirinakajj sapürus Biblia liyipkchïnjja, janiw yanaptʼkir yatichäwinak jikjjatapkänti. Kunsa ukatakejj lurapjjañapäna ukjja, Jesusajj kimsa toqetwa qhanañchäna. Jesusan arunakapajj akanakatakiw yanaptʼarakistani: 1) Kuntï liyktan ukat jukʼamp sum amuyañataki, 2) wali valorani yatichäwinak jikjjatañataki, 3) Diosan Arupampi jukʼamp sum yanaptʼayasiñataki. w23.02 págs. 8, 9 párrs. 2, 3

Jehová Diosamp sum apasitas aptʼasiykistaspa ukanakat yaqhepajj akanakawa: coqueteaña, jiljas umaña jan ukajj jiljas manqʼaña, chuyma ustʼayir arunak parlaña, televisionana jan ukajj yaqha ukhamanakan nuwasirinak uñchʼukiña jan ukajj pornografía uñchʼukiña (Sal. 101:3). Diablojja, Jehová Diosamp sum apasktan uk kunjamats aptʼasiyañ munapunistuwa (1 Ped. 5:8). Jiwasatï jan amuyaskañänejja, envidiasiñsa, jan honradöñsa, jiwas pachpatak taqe kun munañsa, uñisiñsa, jachʼa jachʼa tukuñsa, chuyma ustʼatäñsa, jathar uñtasitwa pʼeqesarus amuyusarus Diablojj satantaspa (Gál. 5:19-21). Janitï ukanak jankʼak apanukkañäni ukhajja, venenoni ukhamarak jan waltʼayiri mä plantar tukuñkamaw jilaskakini (Sant. 1:14, 15). ¿Kunsa Jehová Diosamp sum apasitas aptʼasiyarakistaspa? Jan wali amigonakamp chikachasiña. Jan ak armañäniti, khitinakampitï chikachasktan jupanakjamarakiw taqe kuns lurañ munjjañäni (1 Cor. 15:33). Jiwasatï jiwas pachpat amuyasiñäni ukhajja, Jehová Diosan leyinakap jan respetapki ukanakampejj janiw walja tiempo chikachaskañäniti (Luc. 21:34; 2 Cor. 6:15). Kuna jan waltʼäwis utjaspa uk amuyañäniwa, ukat jitheqtarakiñäniwa. w23.02 pág. 16 párr. 7; pág. 17 párrs. 10, 11

Jehová Diosat jukʼamp yateqasajja, jukʼampirakiw jupar munasïta. Jehová Diosampejj jichhasa wiñayatakisa jukʼamp sum apasiñ munpachätajja, ukajj phoqasirakiniwa. Arsutanakamampis luratanakamampis jupan chuymap kusisiyasmawa. Cheqas uk lurañamatakejj Jehová Diosajj munasiñampiw chʼamañchtamjja (Prov. 23:15, 16). Kuntï jakäwimamp lurkäta ukampiw cheqpachapun Jehová Diosar munasitam uñachtʼayäta. Jehová Diosar kusisiykir jakañ amtatamaw taqe kunat sipans jukʼamp sumajja. ¿Kunjamsa Jehová Diosar munasitam uñachtʼayasma? Nayraqatjja, mä oracionanwa cheqpach Diosarojj jakäwim katuyasiñama (Sal. 40:8). Ukatsti, Diosar jakäwim katuyasitam yatipjjañapatakejj bautisasiñamawa. Uka urojj wali kusiskañäniwa, vidamans wali importanterakïniwa. Ukürut uksarojj janiw jumatak jakjjätati, jan ukasti Jehová Diosatakiw jakjjäta (Rom. 14:8; 1 Ped. 4:1, 2). Uk lurañajj inas jumatak chʼamächi, cheqansa chʼamäskapuniwa, ukampis sum jakasiñamatakiw yanaptʼätamjja. w23.03 págs. 5, 6 párrs. 14, 15