Abril

Bibliajj qellqaskäna uka tiempon Jehová Diosan servirinakapajj mä akatjamatwa jan walinakan uñjasipjjäna. Jacob chachat parltʼañäni. Juparojj Labán chachan mä phuchapampi casarasiñapatakiw awkipajj mayïna, Labán chachajj Jehová Diosar adorir mä familiarapänwa. Jehová Diosajj walja bendicionanakwa churätam sasaw awkipajj Jacob chachar sarakïna (Gén. 28:1-4). Jacobojj awkipar istʼasajj Labán chachajj jakkäna uka Canaán markaruw viajïna, Labán chachajj pä phuchanakanïnwa, maynejj Lea satänwa, maynïristi Raquel satarakïnwa. Jacobojj Raquel sat sullka phuchapatwa enamorasïna. Jupamp casarasiñatakejj Labán chachatak paqallq maranak trabajiñatakejj dispuestokïnwa (Gén. 29:18). Ukampis janiw kunjamtï amtkäna ukarjam phoqaskänti. Labanajj jupar engañjänwa, Raquelar churañat sipansa Lea sat jilïr phuchaparukiw warmipäñapatak churäna. Mä semana qhepatjja, Raquel phuchapampiw casarjjarakïna, ukampis paqallq maranakampiw jupatak trabajiñapäna (Gén. 29:26, 27). Janiw ukakïkänti, kuna acuerdonaktï lurapkäna ukanakans janiw cheqaparjam Jacobur uñjkänti. ¡Labanajj 20 maranakaw Jacob chachat aprovechasïna! (Gén. 31:41, 42). w23.04 pág. 15 párr. 5

¿Khitirus yanaptʼayasiñatakis chuymachtʼayasiñatakis orastanjja? Jiwasatakejj uka jisktʼar jaysañajj facilakiwa, Jehová Diosaruw orastanjja. Jehová Dios pachpaw jupar orasiñatak invitistu. Walja kuti jupamp parltʼasna ukwa munaraki, ukatwa jupajj “oración lurapjjapunim” sasin sistu (1 Tes. 5:17). Diosarojj confianzampiw orastanjja, kunayman toqetwa jakäwisan yanaptʼa mayiraksna (Prov. 3:5, 6). Niyakejjay Jehová Diosajj wali khuyaptʼayasirïchejja, qhawqha kutis jupar orasiksnawa. Oracionanakasajj Jehová Diosatak wali importantëtap Jesusajj yatïnwa. Janïr aka oraqer jutkäna ukhajja, kunjamsa Awkipajj servirinakapan oracionanakapar jaysäna uk jupajj uñjänwa. Kunapachatï Diosajj Ana warmina, Davidana, Eliasana, mayni servirinakapan chuymatpach mayisitanakapar jaysäna ukhajja, Jesusajj jakʼapankaskänwa (1 Sam. 1:10, 11, 20; 1 Rey. 19:4-6; Sal. 32:5). Ukatwa jupajj sapa kuti orasipjjañapatakisa, taqe confianzampi orasipjjañapatakis discipulonakapar chʼamañchtʼäna (Mat. 7:7-11). w23.05 pág. 2 párrs. 1, 3

Jehoiadá jachʼa jilïr sacerdotejj Jehová Diosaruw ajjsartʼirïna. Kunapachatï Jezabel warmin Atalía phuchapajj leyinak pʼakintasin Judá markan reinapat uttʼaskäna ukhaw Jehoiadá sacerdotejj Jehová Diosar wal ajjsartʼirïtap uñachtʼayäna. Atalía warmejj wali qhorünwa, reinat uttʼasiñatakejj reyit jutir taqe wawanakaruw jiwarayañ munäna. ¡Pachpa allchhinakaparuw jiwarayañ munäna! (2 Crón. 22:10, 11). Ukampis Jehoiadá sacerdoten Jehosabeat esposapaw reyit jutir wawanakat maynir imantäna, uka wawajj Jehoás satänwa. Jehoiadá sacerdotempi esposapampiw uka wawar imantapjjäna, sum uñjapjjarakïna. Ukhamatwa Davidan familiapat jutir reyinakarojj jarkʼaqapjjäna. Jehoiadá sacerdotejj Jehová Diosat janiw jitheqtkänti, janirakiw Atalía warmir ajjsarañat jan kuns lurkänti. Jehoás wawajj paqallqo maranïkäna ukhajja, Jehoiadá sacerdotejj mayampiw Jehová Diosat jan jitheqtirïtap uñachtʼayäna. Kuntï amtkäna ukatejj sum mistuspänjja, Jehoás wawaw Davidat jutir wawjamajj reyit uttʼayatäñapäna. Ukampis kuntï amtkäna ukatejj jan sum mistkaspänjja, Jehoiadá sacerdotejj jiwayataw uñjasispäna. Jehová Diosan yanaptʼapampejj kuntï Jehoiadá sacerdotejj amtkäna ukajj sumaruw mistüna. w23.06 pág. 17 párrs. 12, 13

Danielajj jupa contras saytʼkaspa ukhamwa Nabucodonosor reyejj amuyaspäna, jupar jiwayapjjañapatakiw mä orden churarakispäna. Ukampis Danielajj jan ajjsartʼasaw kuntï sañapäkäna uk arsüna. ¿Kunas Danielarojj jan ajjsartʼirïñatak jakäwipan yanaptʼpachäna? Waynäkäna ukhajj awk taykapan yateqaskañ sarnaqapjjatapatwa yateqpachäna (Deut. 6:6-9). Danielajj janiw Tunka Mandamientonakak yatkänti, jan ukasti israelitanakajj kuna manqʼañanaksa manqʼapjjaspa jan manqʼapkarakispa uk sum yatïna (Lev. 11:4-8; Dan. 1:8, 11-13). Ukatsti Diosan markapan sarnaqäwip sum yatïna, Diosan leyinakapar jan istʼapkäna ukhajj kunas jupanakar pasäna uksa yatirakïnwa (Dan. 9:10, 11). Taqe kunanakatejj jakäwipan paskäna ukanakajja, Jehová Diosasa chʼamani angelanakapas jupar yanaptʼaskatapat jan payachasiñapatakiw yanaptʼäna (Dan. 2:19-24; 10:12, 18, 19). w23.08 págs. 3, 4 párrs. 5, 6

Rebecajj wali yatiñani, kun amtasas jankʼak luriri ukhamänwa, kunapachasa kunjamsa mä kuns lurani uks yatirakïnwa (Gén. 24:58; 27:5-17). Ukampis jupajj mayninakar respetiri istʼasiri warmirakïnwa (Gén. 24:17, 18, 65). Jumatï Rebeca warmjam humilde chuymanïyäta, khitinakarutï Jehová Diosajj pʼeqtʼapjjañapatak uttʼayki ukanakar istʼarakïta ukhajja, familiamas congregacionas kunja yateqaskayätasa uk uñjapjjaniwa. Mayninakat jilanksnas ukham jan amuyasiñajj wali wakiskirirakiwa. Cheqas Diosar jan jitheqtas servir Ester tawaqojj ukham chuymanïnwa. Reinat uttʼayapkäna ukhajj janiw jachʼa jachʼa tukkänti. Mardoqueo primopan ewjjtʼanakapar istʼasajj ukarjamaw lurarakïna (Est. 2:10, 20, 22). Jumajj Esterjamarakiw mayninakar suma ewjjtʼanak mayisma, ukarjamas lurarakisma (Tito 2:3-5). Kunjamsa Ester tawaqojj mayninakat jilankkaspas ukham jan amuyirïtap uñachtʼayäna uk uñjaskakiñäni. Jupajj “wali suma uñnaqtʼanïnwa, suma cuerponirakïnwa”, ukampis janiw jupakejj mayninakamp sum uñjayasiñ munkänti (Est. 2:7, 15). w23.12 págs. 19, 20 párrs. 6-8

Sint juchañchasiñajj mä jathi qʼepir uñtasitäspawa. Jiwasatï juchas arsusjjstan, arrepentisjjstan, jan wasitat uk lurañatak chʼamachasiskarakstan ukhajja, Jehová Diosajj perdonjjestuwa, janiw ukat payachasiñasäkiti (Hech. 3:19). Jiwasatï ukanak lurjjstan ukhajja, Jehová Diosajj janiw jukʼamp juchañchasiskakiñas munkiti, jiwasatï walja tiempo juchañchasiskaksna ukhajja, jiwaspachpaw jan waltʼayasjjsna, uk jupajj yatirakiwa (Sal. 31:10). Jiwasatï llakimp apayasjjsna ukhajj aynachtʼjjsnawa, wiñay jakañar apki uka tʼijüwits mistjjaraksnawa (2 Cor. 2:7). Jumatï jucha luratamat sint juchañchasisksta ukhajja, Diosajj ‘cheqpachapun jaqenakan juchanakap perdonirïtapwa’ amtañama (Sal. 130:4). Maynejj chuymatpach arrepentiski ukhajja, Jehová Diosajj “janirakiw juchanakapats jukʼamp amtasjjäti” siski uka promesaparuw phoqaraki (Jer. 31:34). ¿Kunsa uka arunakajj Jehová Diosat yatichistu? Jehová Diosajj maynir perdonjje ukhajja, janiw jukʼampejj uka jucha luratapat amtjjeti. Jumatï congregacionaman privilegionak aptʼassta ukhajja, jan llakimp aynachtʼamti. Kuna juchanaktï lurkta ukanak Jehová Diosajj janiw amtjjeti, ¿janit jumajj uka pachp lurkarakisma? w23.08 págs. 30, 31 párrs. 14, 15

COVID-19 pandemianjja, walja kʼari yatiyäwinakaw yatiyasïna. Uka kʼari yatiyäwinakar istʼirinakajja, jan walinakanwa uñjasipjjäna, estresasipjjarakïnwa, ukampis Jehová Diosan markapajj churki uka instruccionanakar istʼir Testigonakajj janiw ukhamanakan uñjasipkänti (Mat. 24:45). ‘Kunanakatejj jukʼamp importantëki ukanakaw’ jiwasatakejj nayrankañapa (Filip. 1:9, 10). Kusistʼañanakajj tiempo apaqestaspa, jiwasatï manqtʼasiña, umtʼasiña, kusistʼaña, trabajo nayrar uchjjsna ukhajja, kunanakatï jukʼamp importantëki ukanak janiw lurañ puedjjsnati (Luc. 21:34, 35). Ukhamarus sapüruw jaqenakajj protestapjje, política toqets parlapjje. Janiw jiwasajj ukanakamp apayasiñasäkiti. Ukham lurjjsna ukhajja, chuymasansa amuyusans jupanakaruw apoyjjsna. Kunatï walïki uk jan lurañasatakejja, Supayajj jan walinakampiw aynachtʼayañ munistu. w23.07 págs. 16, 17 párrs. 12, 13

Jehová Diosan servirinakapatakejja, Jesusan jiwatapajj amtaski uka urojj wali importantepuniwa. Jesusaw arkirinakapar uk amtapjjañapatak mayïna (Luc. 22:19, 20). Kunjamanakatsa Jesusan sacrificiot loqtasitapat yuspärsna ukwa amtayarakistu (2 Cor. 5:14, 15). Jilat kullakanakampïñatakisa, maynit maynikam chʼamañchtʼasiñatakis yanaptʼarakistuwa (Rom. 1:12). Waljaniw kuntï uka tantachäwin uñjapki istʼapkaraki ukanakat wal musparapjje, Bibliat yatjjatañwa qalltapjjaraki. Jesusan jiwatap amtaski uka tantachäwejja, oraqpachankir jilat kullakanakasampiw mayachtʼarakistu, ukatwa jiwasatakejj Jesusan jiwatap amtañajj wali wakiskirejja. w24.01 pág. 8 párrs. 1-3

Jehová Diosampi Jesusampejj wali jila precio pagawayapki uka toqet sapa kut lupʼiñäni ukhajja, qhawqsa sapa maynir munasipjjestu uk jukʼamp sumwa amuyañäni (Gál. 2:20). Jesusan jiwasar juchampit jiwañampit kutsuyatapajja, jiwasar munasitap laykuw utjäna, Jehová Diosajj wali valorani Yoqaparuw sacrificiot churäna. Ukhamatwa jiwasar munasitap uñachtʼayistu, jiwasanak layku tʼaqesiñapataki jiwañapatakiw Yoqapar khitanïna. Jehová Diosajj janiw munasiñampik uñjkistuti, jan ukasti jiwasar munasitap sarakistuwa (Jer. 31:3). Jiwasar munasitapatwa jupan ukar irpanistu (Deuteronomio 7:7, 8 liytʼarakïta). Janiw kunas ni khitis munasiñapat apaqkistaspati (Rom. 8:38, 39). Uka toqet amuytʼasajj ¿kunjamas jumajj jikjjatasta? w24.01 pág. 28 párrs. 10, 11

Alajjpachar sarjjañ suytʼasipki ukjja, ajllit cristianonakajj wali valoranitwa uñjapjje. 1991 maranjja Frederick Franz jilatajj akham sänwa: “Kuntï suytʼapkta ukajj cheqapuniw phoqasini, 144.000 ajllitanakat sapa maynirakiw kuntï Jehová Diosajj arsuwayapkitu uk katoqapjjäjja, kuntï katoqapkä ukajj wali sumäniwa, kunatï jichhürun utjapkitu ukat sipans jukʼampïniwa” sasa. Jupajj akham sarakïnwa: “Kuntï suytʼapkta ukarojj wali valoranit uñjasipkaktwa. [...] Jukʼamp maranak suyasajj jukʼamp valoranitwa uñjapjjta [...]. Kuntï suytʼapkta ukarojj nayrat sipans jukʼamp valoranitwa uñjarakta” sasa. Taqeniw wali kusiskañ suytʼäwinïtanjja: yaqhepajj alajjpachana, yaqhepajj aka oraqenwa wiñay jakañ suytʼasktanjja. w23.12 págs. 9, 10 párrs. 6, 8

Tabernaculor mantañäki uka anqäjjanjja, cobret lurat mä altaraw utjäna, ukanwa Jehová Diosar animalanakajj loqtasirïna (Éx. 27:1, 2; 40:29). Ukampis uka sacrificionakajj janiw markan juchanakap taqpach perdonañatak yanaptʼkänti (Heb. 10:1-3). Tabernaculon sapa kuti animalanak sacrificiot loqtaskäna ukajja, jaqenakan juchanakap phoqatpach qʼomachañapäkäna uka sacrificiomp sasïnwa. Jehová Diosajj jaqenakar juchampit jiwañampit kutsuyañatakiw Jesusarojj aka oraqer khitanïna, Jesusajj uk yatïnwa (Mat. 20:28). Ukatwa bautisaskäna ukhajj Jehová Diosan nayraqatapan uñstäna, ukhamat jupan munañap lurañataki (Juan 6:38; Gál. 1:4). Jesusajj ‘mä kutikiw wiñayatak’ jakäwip loqtasïna, ukhamat taqe khitinakatï jupar confiyapki ukanakan juchanakapajj wiñayatak perdonatäñapataki (Heb. 10:5-7, 10). w23.10 págs. 26, 27 párrs. 10, 11

Janiw jiwasakejj juchampit jiwañampit salvaskasänti (Sal. 49:7, 8). Jehová Diosaw wali munat Yoqapan jakäwip churañapatakejj amtäna, panpachaniw jachʼa sacrificio lurapjjäna. Kuna sacrificionaktï jiwas layku lurawayapki uka toqet lupʼiñänejja, Jesusajj juchampit jiwañampit kutsuykistu ukarojj wali valoranitwa uñjañäni. Adanajj juchachasisaw wiñay jakañ aptʼasïna, wawanakapas ukhamaraki. Adanajj aptʼawaykäna uk wasitat alañatakejja, Jesusajj perfecto jakäwipwa loqtawayäna. Jesusajj aka oraqenkkasajj “janiw kuna juchsa lurkänti, janirakiw lakapan kuna engaños utjkänti” (1 Ped. 2:22). Jiwkäna ukhajja, jupajj perfectönwa, ukhamajj jakäwipajj Adanajj aptʼawaykäna uka pachpa valoranïnwa (1 Cor. 15:45; 1 Tim. 2:6). w24.01 pág. 10 párrs. 5, 6

Jesusajja, jiwatat jaktjjasajj Diosan templopankir Santísimo lugararuw mantäna. Cheqpachans Jehová Diosajj jupa saparuk adorasiñapatak uttʼayki ukajja, wali jilankiwa. Jesucristojj juchampit jiwañampit kutsuykistu Jachʼa Jilïr Sacerdotet sirvki ukarjamaw ukajj uttʼayasiwayi. Israel markan jachʼa jilïr sacerdotepajj mantkäna uka Santísimo lugarajja, jaqenakan amparapamp luratakïnwa, animalanakan wilapampiw ukar mantarakïna. Ukampis Jesusajj taqet sipans jukʼamp santöki uka lugararuw mantäna: “pachpa alajjpacharuw jupajj mantäna”, Jehová Diosan nayraqataparu. Ukanwa taqe jiwasanak layku churkäna uka perfecto jakäwipajj qhawqha valoranisa uk katuyäna, ‘ukhamat jupa pachpa sacrificiot loqtasisajj jucha chhaqtayañataki’ (Heb. 9:24-26). Alajjpachan jakañsa jan ukajj aka oraqen jakañs suytʼaskstanjja, taqeniw Jehová Diosarojj templopan adorsna. w23.10 pág. 28 párrs. 13, 14

Kunanaksa Jesusajj alajjpachankir Reyjamasa, khuyapayasir Jachʼa Jilïr Sacerdotjamas luri uk amuytʼañäni. Jupa toqew oracionan “wali khuyaptʼayasir Diosan tronopar” jakʼachassna, ukhamatwa jiwasat khuyaptʼayasiñapatakisa, “horasapar jiwasar yanaptʼañapataki[s]” mayissna (Heb. 4:14, 15). Kunanaktï Jehová Diosas Jesusas jiwas layk lurawayapki jichhas lurasipkaki ukanakat sapüruw amuytʼañasa. Qhawqsa jupanakajj munasistu ukajj chuymasaruw purtʼañapa, Diosar taqe chuyma serviñasatakiw yanaptʼañaparaki (2 Cor. 5:14, 15). Yuspäratasjja, jaqenakar Jehová Diosan Testigopar tukupjjañapataki Jesusan discipulopäpjjañapatak yanaptʼasaw uñachtʼaytanjja (Mat. 28:19, 20). Ukwa apóstol Pablojj luräna. “[Jehová] Diosajj taqe kasta jaqenakan salvasipjjañapa ukhamarak kunatejj cheqäki uk sum uñtʼapjjañapwa muni”, apóstol Pablojj uk yatïnwa (1 Tim. 2:3, 4). w23.10 pág. 22 párrs. 13, 14

Uka arunakjja, jaqenakar chuymachtʼañatakisa Paraison jakasiñajj kunjamänisa uk qhanañchtʼañatakis walja kutiw predicacionan liytʼtanjja. Ukhamajj Apocalipsis 21:3, 4 texton parlki uka bendicionanakajj phoqasipuniniwa sasin confiyapjjañapatakejj ¿kunjamsa jaqenakar yanaptʼsna? ¿Kunsa Jehová Diosarus promesanakaparus jukʼamp confiyañatak lursna? Jehová Diosajj janiw uka promesanak aleq ukhamak arsuwaykiti, jan ukasti uka promesar confiyañatakejj razonanakwa churistu. Apocalipsis 21:5, 6 textonjja, Jehová Diosajj parlki uka promesapar confiyañatakejj yaqha razonanakaw utjaraki. Ukan akham siwa: “Tronon qontʼatäkäna uka Diosajj akham sänwa: ‘Taqe kunsa machaqatwa nayajj luraskta’ sasa. Ukatjja akham sarakïnwa: ‘Qellqantam, aka arunakajja confiykañawa, cheqarakiwa’ sasa. Ukatjja akham sarakituwa: ‘¡Phoqasjjewa! Nayätwa Alfasa Omegasa, qalltasa tukuyasa’” sasa (Apoc. 21:5, 6a). w23.11 págs. 2, 3 párrs. 3-5

Jehová Diosjam amuyuniti janicha ukjja, mä wayna jilatajj isisitapana peinasitapanwa uñachtʼayi. Jilapartejja, khitinakatï isinak diseñapki modat uñstayapki ukanakajj janiw Jehová Diosar respetapkiti, qʼañu juchanakan sarnaqapjjaraki. Ukatwa diseñapki uka chacha isinakajj wali tʼeqëpjje jan ukajj warmi isir uñtasitäpjje. Ukhamajj suma cristianöñatak chʼamachasir mä wayna jilatajja, kunjamsa isisini peinasini uk Biblian wiñay yatichäwinakaparjamaw amuytʼasiñapa, congregacionankir yateqaskañ cristianonakats yateqasiñaparakiwa. Akham sasaw jisktʼasispa: “¿Amtanakajajj amuytʼasirïtajti uñachtʼayi, mayninakar respetatajti uñachtʼayaraki? ¿Diosar servitajajj qhanat isisitajan amuyasi?” sasa (1 Cor. 10:31-33). Amuytʼasirïñ yateqapki uka wayna jilatanakarojja, janiw jilat kullakanakakejj respetomp uñjapkiti, jan ukasti Jehová Diosas ukhamwa uñjaraki. w23.12 pág. 26 párr. 7

Nayra maranakanjja “rey del sur” ukajj Diosan markaparuw atacäna (Dan. 11:40). Ukaw Primera ukat Segunda Guerra Mundialan uñjasïna, walja jilatanakaw guerrar jan sarañ munapjjatapat carcelan llawintatäpjjäna, yaqhep wawanakas banderar jan aruntañ munapjjatapat escuelanakat jaqsutäpjjänwa. Aka qhepa maranakanjja, “rey del sur” ukan apnaqat markanakan jan amuykañak yantʼataw Jehová Diosan servirinakapajj uñjasipjje. Campañas electorales ukanakajj utjki ukhajja, inas mä cristianojj mä partidoru jan ukajj mä candidator apoyañ munchispa. Janis khititakis voto jaqontkchinejja, inas amuyupansa jan ukajj chuymapans maynin atipañap munchini. Ukampis jiwasatï maynir jan apoyañ munkstan, mayni contra jan saytʼañ munkarakstan ukhajja, janiw luratanakasatak amuyasiñasäkiti, jan ukasti kunanakatï amuyusans chuymasans utjki ukanakat amuyasiñasarakiwa (Juan 15:18, 19). w23.08 pág. 12 párr. 17

Wiñay jakañ premio katoqañatakejja, “premio katoqañkamay tʼijupjjam” siski uka ewjjtʼaruw istʼañasa (1 Cor. 9:24). Jesusajj “chuymanakamajj jiljas manqʼañanakampi, jiljas umañanakampi, jakañjjat llakisiñanakamp phoqanta[täspawa]” sasaw säna (Luc. 21:34). Wiñay jakañar apki uka tʼijüwin tukuykam tʼijuskakiñatakejj kuna cambionak lurañas wakisi uk amuyañatakejja, uka textompi yaqha ukham textonakampiw yanaptʼistani. Jiwasajj wiñay jakañar apki uka tʼijüwin premio katoqañkam tʼijuraksnawa, janiw ukat payachasktanti. Kuna laykutejj Jehová Diosaw tukuykam tʼijuñatakejj chʼam churistani (Is. 40:29-31). Ukhamajj tʼijuskakim. Apóstol Pablot yateqasim, jupajj premio katoqañatakejj wal chʼamachasïna (Filip. 3:13, 14). Cheqas janiw khitis juma lantejj tʼijkaspati, ukampis jumar yanaptʼañatakejj Jehová Diosaw jumamp chikäski. Jupaw kunanaktï apañamäki ukanak apañ yanaptʼätam, juparakiw kunanaktï jan apañamäki ukanak apanukuñamatakis yanaptʼätam. Diosan yanaptʼapampejj jan qarjtasaw tʼijuskakïta, premio katoqañkamaw tʼijurakïta. w23.08 pág. 31 párrs. 16, 17

Jesusajj 12 maranïkäna ukhajja, sapa mara amtaskäna uka fiestanakat mä fiestaruw familiapamp chikajj Jerusalén markar viajïna (Luc. 2:46-52). Joseampi Mariampejj utapar kuttʼasipkäna ukhajja, Jesusajj janiw jupanakamp chik kuttʼkänti, ukampis janiw uk amuyasipkänti. Cheqas awk taykapaw taqpach wawanakapat kuttʼasipki janicha uk amuyapjjañapäna. Jesusar jikjjatjjapjjäna ukhajja, ¡jupanakar ukham sustjatapat Mariajj Jesusaruw juchañchäna! Jesusajj ina chʼusat juchañchistajja sasaw mamapar saspäna, ukampis janiw uk siskänti. Antisas suma arunakampi respetompiw mamapar parläna. Ukampis Joseampi Mariampejja, “janiw kuntï jupajj siskäna uk amuyapkänti”. Ukhamäkchïnsa, Jesusajj “jupanakar istʼasapuniw sarnaqarakïna”. Wayn tawaqo, awk taykamajj pantjasipki jan ukajj jan entiendipktam ukhajj ¿jupanakar istʼañajj chʼamakiti? ¿Kunas jupanakar istʼañatakejj yanaptʼiristam? Istʼaskta ukhajj kunjamas Jehová Diosajj jikjjatasi uk amuytʼam. Wawanakapajj awk taykapar istʼapki “ukaw Tatiturojj wal kusisiyi” sasaw Bibliajj qhanañchi (Col. 3:20). Awisajja awk taykamajj janiw entiendipkiristamti, kunanaktï mayipktam ukanak istʼañajj janiw faciläkaspati, Jehová Diosajj ukanak yatiwa. Ukhampachas jumatï jupanakar istʼäta ukhajja, Jehová Diosajj wal kusisini. w23.10 pág. 7 párrs. 5, 6

“Testigonakajj kuntï chachapura jan ukajj warmipura sarnaqañ toqet amuyapki uk cambiapjjañapawa” sasin inas mä compañerosajj sischistaspa. Ukhaman uñjasisajja, sapa maynejj amtañatak derechonïki ukar respetataswa qhanañchsna (1 Ped. 2:17). Inas ukhamat kunatsa Biblian mandatonakapar istʼañajj wakisi uk qhanañchsna. Maynitï Biblian yatichäwinakapat jan jiwasjam amuyatap qhan arstʼaschi ukhajja, kunsa amuyi uk yatksnas ukham janiw jankʼakejj amuyañasäkiti. Diosar creyiñajj janipuniw walïkiti sasas colegionkir mä compañerosajj siskistaspa ukham amuytʼañäni. ¿Jupajj evolucionaruw creyi, uka toqet wal yatiraki sasin jankʼakit sasma? Inas kuntï mayninakajj sapki ukarjamak uk sischi. Inas jw.org cheqan taqe kunas Diosan lurtʼatätapat parlki uka yatichäwina jan ukajj videon enlacep apaychisma. Inas ukan utjir yaqhanakampi parltʼañ munchispa. Jumatï respetomp parlätajja, Bibliat yatjjatañ munañapatakiw yanaptʼasma. w23.09 pág. 17 párrs. 12, 13

Inas jiwasajj pantjasiwaystan, ukampis jiwasatï uk askichañatak chʼamachasiskstan, Jehová Diosarus confiyaskakstan ukhajja, Jehová Diosarojj serviskaksnawa, bendicionanakaps katoqaraksnawa (Prov. 28:13). Sansonajj janiw perfecto jaqëkänti, Dalilamp casarasiñ munasajj pantjasirakïnwa, ukampis janiw aynachtʼkänti, Jehová Diosarojj serviskakïnwa. Jehová Diosajj janiw Sansonar apanukkänti, wali musparkañ mä luräwi lurañapatakis yanaptʼaskakïnwa. Jehová Diosajj jupar taqe chuyma confiyiri mä jaqerjamaw uñjaskakïna, ukatwa Sansonan sutip Diosat jan jitheqtirinakan sutinakapamp chik Hebreos capítulo 11 ukan qellqayäna. Alajjpachankir Awkisajj chʼamwa churañ munistu, jukʼampis jan walinakan uñjasktan yanapap munktan ukhaw chʼam churañ munistu, ¿uk yatiñajj waljjay chʼamañchtʼistojja? Ukhamajj Sansonjam akham sasin mayisipjjañäni: “Jehová Dios Tata, nayat amtasikimaya, mirä amp suma, chʼam churakitaya” sasa (Juec. 16:28). w23.09 pág. 7 párrs. 18, 19

Niyakejjay Jehová Diosan urupan jakʼankatap yatstanjja, taqe jaqenakaruw Reinon suma yatiyäwinakap yatiyañ muntanjja, ukampis awisanakajja jaqer ajjsaratas laykojj yatiyañ ajjsarayassnawa. Ukaw Jesusar juzgapkäna uka arumajj Pedror pasäna. Jupajj janiw Jesusan discipulopjam uñtʼayasiñ munkänti, walja kutiw Jesusar jan uñtʼir tukurakïna (Mat. 26:69-75). Ukampis ukham ajjsarañarojj atipänwa, ukatwa qhepat akham säna: “Kunarutï jaqenakajj ajjsarapki ukarojj jan ajjsarapjjamti, janirak sint llakisipjjamti” sasa (1 Ped. 3:14). Uka arunakaparjamajja, jaqer ajjsarañar atipsnawa. Jaqer jan jukʼamp ajjsarjjañatakejja, Pedron aka ewjjtʼapaw yanaptʼistaspa jupajj akham sänwa: “Chuymanakamanjja Cristorojj Tatiturjam jachʼañchapjjam” sasa (1 Ped. 3:15). Ukatakejj Jesucristo Tatit Reyisajj qhawqha autoridadanisa, kunja chʼamanisa uka toqet lupʼiñasawa. w23.09 pág. 27 párrs. 6-8

Jiwasajj wal amuyasiñasawa, ukhamat ‘chʼamakankir inamay luräwinak jan jukʼamp lurjjañataki’ (Efes. 5:11). Kunapachatï maynejj ajjtaskañanaka, qʼañu jucha lurañanak uñchʼukiskaki, ischʼukiskaki jan ukajj ukanakat parlaskaki ukhajja, kunjamats jucharojj purtʼasikipuniniwa (Gén. 3:6; Sant. 1:14, 15). Kunatï walïki jan walïkaraki uk jan amuyapjjañapatakiw Supayajj nayratpach jaqenakar engañjaski (Is. 5:20; 2 Cor. 4:4). Akapachankir jaqenakajja, kunanakatï Jehová Diosatakejj qʼañüki ajjtaskañäkaraki ukanakajj janis kuna jan walïkaspa ukhamwa amuyayañ munistu (2 Ped. 2:19). Ukatwa walja peliculanakansa, televisionansa, Internetans Jehová Diosan leyinakap conträki uka amuyunakajj jilapartejj utji. Aka mudon utjki uka jan walinakasa qʼañu juchanakas janis kuna jan walïkaspa, aleq kusistʼañatakïkaspasa ukhamwa Supayajj amuyayañ munistu (Efes. 5:6). w24.03 pág. 22 párrs. 8-10

Tabernaculojj ‘Diosamp jikisiñ carpa’ satarakiwa, uka lugaranwa israelitanakajj Diosar adorañatakisa sacrificionak loqtañatakis tantachasipjjerïna (Éx. 29:43-46). Sapa kuti wasaran mä lugarat yaqha lugarar sarjjapjjäna ukhajja, jupanakamp chikaw uk apasipjjerïna (Éx. 25:8, 9; Núm. 9:22). Jerusalenan templojj luraskäna ukhakamaw israelitanakajj niya 500 maranak uka tabernáculo apnaqapjjäna, ukampis tabernaculojj kunatï jukʼamp sumäkäna ukwa uñachtʼayarakïna. Tabernaculojj “kunatï alajjpachan utjki ukanakwa uñachtʼa[yäna]”, Jehová Diosan jachʼa templopwa uñachtʼayarakïna. Pablojj akham sänwa: “Uka carpajja [jan ukajj tabernaculojja] kunanakatï jichha tiempon pasaski ukanakwa uñachtʼayi” sasa (Heb. 9:9). Ukhamajj hebreonakar uka arunak qellqkäna ukhajja, Diosan templopajj utj-jjänwa. Cheqas 29 maranwa ukajj utj-jjäna. Uka maranwa Jesusajj bautisasïna, Jehová Diosan ‘jachʼa jilïr sacerdotepatwa’ Diosan templopan serviñ qalltarakïna (Heb. 4:14; Hech. 10:37, 38). w23.10 pág. 26 párrs. 6, 7

Jehová Diosar kusisit serviskakiñatakejja, janiw kuns munañasarjam lurasiñapatak waytʼirïñasäkiti, jan ukasti amuytʼirïñasawa. ¿Kunas ukhamäñatak yanaptʼistani? Kuna cambionakatï jakäwisan utjki ukar yatinoqtañasawa, mayninakan amuyunakapsa amtanakapsa respetañasarakiwa. Jehová Diosan servirinakapajj taqeniw amuytʼirïñasa. Humilde chuymanïñasawa, sinttʼasirïñasarakiwa. Jehová Diosajj suma thurtʼata suma saytʼata ukhamawa, ukatwa Bibliajj jupat parlkasin ‘Qarqasawa’ sasin qhanañchi (Deut. 32:4). Ukhamäkchisa, jupajj amuytʼirirakiwa. ¿Kunjamatsa uk yattanjja? Aka mundon kunayman cambionakas utjchejja, Diosasajj uka cambionakar yatinoqtawayiwa, ukhamat amtanakap phoqasiñapataki. Niyakejjay Jehová Diosajj jupar uñtasit lurawaychistojja, jiwasajj cambionakar yatinoqtaraksnawa. Qhana amuykañ wiñay yatichäwinakwa Biblian churistu, ukanakaw jan walinakan uñjaskasas suma amtanakar puriñatak yanaptʼistu. Jehová Diosajj luratanakapansa wiñay yatichäwinakapans mä qarqar uñtasitäkaspas ukhamsa uñachtʼaykchejja, jupajj amuytʼir Diosarakiwa. w23.07 pág. 20 párrs. 1-3

Biblianjja Jehová Diosajj wali munasir mä taykamp sasiwa, jupa pachpaw uk qhanañchi (Is. 66:12, 13). Kunjamsa mä taykajj wali munasiñamp wawapar uñji uk amuytʼam. Jupajj kunapachatï wawapajj jachi jan ukajj kuns usuyasi ukhajja, jankʼakiw yanaptʼi. Ukhamarakiw Diosajj llakitäkañäni ukhajj jiwasampïskani. Pantjaskstansa munasiskakistuwa (Sal. 103:8). Israelitanakajj kutin kutiniw Diosar chuym ustʼayapjjäna, ukampis arrepentisipjjäna ukhajja, jupanakar munasiskakitap uñachtʼayaskakïnwa. Mä kutejj markapar akham sänwa: “Nayranakajatakejj jumajj wali valoranïtawa, jumaw jachʼañchäwi katoqtajja, nayajj munassmawa” sasa (Is. 43:4, 5). Jehová Diosajj pachpakïskiwa. Jiwasatï jachʼa juchar purtʼasisajj arrepentisiñäni, jupan ukarus kuttʼjjarakiñäni ukhajja, jiwasar munasiskakitapwa amuyañäni. Jupajj jiwasar ‘taqe chuyma perdonañwa’ arsuwayi (Is. 55:7). Bibliarjamajja, Jehová Diosajj perdonkistu ukhajj ‘samarañ tiemponakwa’ churistu (Hech. 3:19). w24.01 págs. 26, 27 párrs. 4, 5

Jan walinakan uñjastan ukhajj Jehová Diosaw yanaptʼistaspa. Inas mä asamblear sarañatak jefesar permiso mayiñajj wakischini, jan ukajj inas taqpach tantachäwinakar sarañatak yaqha horarion trabajiñatak jefesar mayiñajj wakischini. Ukhamanakan uñjasisajj kunjamsa Jehová Diosajj yanaptʼistu ukwa uñjsna. Uk uñjasajj musparsnawa, Jehová Diosasarus jukʼampiw confiyaraksna. Esdrasajj humildënwa, Jehová Diosaruw yanaptʼa mayirakïna. Luräwinakap jan phoqerjamätap amuyasïna ukhajja, humilde chuymampiw Jehová Diosar orasïna (Esd. 8:21-23; 9:3-5). Diosar confiyatap uñjasinjja, mayninakajj yanaptʼapjjänwa, Diosar confiyatapats yateqasipjjarakïnwa (Esd. 10:1-4). Qollqet pistʼat uñjasisajj llakisiñäni, jan ukajj familiasat llakisisin jan ikiñs puedkañäni ukhajja, Jehová Diosaruw oracionan mayisiñasa, jupajj yanaptʼapunitaniwa sasin confiyañasarakiwa. w23.11 pág. 18 párrs. 15-17

Cheqapar sarnaqerit uñjatäñatakejj Diosar confiyir Abrahanan kayup sum arkapjjañamawa sasin Jehová Diosajj siskistu ukajja, janiw kuntï Abrahanajj lurkäna uka kikpa luraña sañ munkiti. Kunayman toqetwa Diosar confiyatas uñachtʼaysna. Congregacionar jutapki uka machaqanakarojj munasiñampiw katoqsna, yanap wal munapki uka jilat kullakanakaruw yanaptʼsna, familiaranakasarus suma luräwinakampiw yanaptʼsna. Taqe ukanakajj Jehová Diosar wal kusisiyi (Rom. 15:7; 1 Tim. 5:4, 8; 1 Juan 3:18). Diosar confiyatas uñachtʼayañatakejj taqe chuymaw predicañasaraki, ukaw jukʼamp importantejja (1 Tim. 4:16). Diosan promesanakap phoqasitaparusa, kunjamsa jupajj mä kuns sum luri ukarus taqeniw confiysna, ukampis ukar confiyatasjja luratanakasampiw uñachtʼayañasa. Ukhamtï lurañänejja, Jehová Diosajj cheqapar sarnaqeritwa uñjistani, amigoparakïñäniwa, janiw ukat payachasiñasäkiti. w23.12 pág. 2 párr. 3; pág. 6 párr. 15

Niya jiwañap jakʼäjjäna ukhaw David reyejj Salomonar kuntï jichhürutak apstʼat texton siski uka arunak säna (1 Rey. 2:1, 3). Taqe cristiano chachanakaw uka ewjjtʼarjam lurañatak chʼamachasipjjañapa. Taqe kunas sumar sarañapatakejja, Jehová Diosan mandatonakapar istʼaña, Biblian wiñay yatichäwinakaparjam sarnaqañwa yateqapjjañapa (Luc. 2:52). ¿Kunatsa wayna jilatanakan suma cristianöñatak chʼamachasipjjañapajj wali wakiskirejja? Cristiano jilatanakajja, familiansa congregacionansa walja lurañanakanïpjjewa. Jumatï wayna jilatästa ukhajja, jutïrin kuna lurañanakamp phoqañamas wakisispa uka toqet inas lupʼirïsta. Inas jumajj precursoräña, siervo ministerialäña, ukat ancianöñ amtsta. Ukatjja inas casarasiñsa wawanakanïñsa munaraksta (Efes. 6:4; 1 Tim. 3:1). Uka amtanakam phoqañamatakisa, taqe kunas sumar sarañapatakis suma cristianöñamawa. w23.12 pág. 24 párrs. 1, 2

Jehová Diosajj ancianonakaruw munat ovejanakap cuidapjjañapatak uttʼayi. Ancianonakajja, jilat kullakanakapar yanaptʼañ wali valoranitwa uñjapjje, suma ‘awatirïñatakiw’ chʼamachasipjjaraki (Jer. 23:4; 1 Ped. 5:2). ¡Congregacionanakan ukham jilatanak utjatapat walpun yuspärtanjja! Ancianonakajja, juezat servir Gedeonat waljanakwa yateqasipjjaspa (Heb. 6:12). Gedeonajj Diosan markaparuw jarkʼaqäna, awatirakïnwa (Juec. 2:16; 1 Crón. 17:6). Jichha tiemponjja, ancianonakajj Gedeonjamarakiw Diosan markaparojj mä jan wali tiempon uñjapjjañapa (Hech. 20:28; 2 Tim. 3:1). Gedeonajj humilde chuymanïtapa, istʼasirïtapa, aguantirïtapwa uñachtʼayäna, ukanakat walja suma yatichäwinakwa ancianonakajj yateqapjjaspa. Ukhamarus congregacionan taqeniw uka juezat yateqasisajj kunanaktï ancianonakajj lurapki ukanak sapürutjam jukʼamp valoranit uñjañasa, taqe chuymaw yanaptʼañasaraki (Heb. 13:17). w23.06 pág. 2 párr. 1; pág. 3 párr. 3