Marzo

Janïras machaq mundo uñjkstanjja, kunanaksa uñjtan ukanakat mä qhawqha amuytʼañäni: warawaranakata, qoqanakata, animalanakata, jaqenakata. Ukanakajj janis nayratpach utjkchïnjja, janiw khitis ukanakajj janiw utjkiti siskaspati. Cheqas ukanakajj utjaskapuniwa, Jehová Diosaw lurawayi (Gén. 1:1, 26, 27). Juparakiw mä machaq mundo utjañapatak arsuwayi, uka promesap phoqapuniniwa. Wiñayatakiw jakasjjañäni, jan usuntas kʼumaraw jakasjjarakiñäni. Jehová Diosan amtat tiempojj purinjjani ukhajja, kunanakatï jichhajj cheqpachapun utjki ukhamarakiw machaq mundojj cheqpachapun utjani (Is. 65:17; Apoc. 21:3, 4). Uk puriniñapkamajja, Jehová Diosar jukʼamp confiyañatakejj chʼamachasisipkakiñäni. Jesusajj juchampit jiwañampit kutsuykistu uka toqet yuspärañatak lupʼiñäni, Jehová Diosan chʼamapat amuytʼañäni, kunanakatï Jehová Diosan jakʼapankañatak yanaptʼkistaspa ukanak lurarakiñäni. Taqe ukanak lurañäni ukhajja, “khitinakatejj Diosar confiyapjjatap laykusa paciencianïpjjatap laykusa Diosan promesap herenciar uñtat katoqapki” ukanak taypinkañäniwa (Heb. 6:11, 12). w23.04 pág. 31 párrs. 18, 19

Jesusajj alajjpachar uñtasaw taqenin uñjkat mä oración luräna. Kuntï niya lurañampïski ukat Jehová Diosaruw jachʼañchañ munäna. Ukjjarusti, “¡Lázaro, mistunim!” sasaw jachʼat artʼäna, Lazarosti sepulturat mistunïnwa (Juan 11:43). Kunatï mayninakatakejj jan lurañjamäki ukwa Jesusajj luräna. Uka sarnaqäwejja, jiwatat jaktañajj utjapuniniwa sasin jukʼamp confiyañatakiw yanaptʼistu. Kamsasas Jesusajj Mariar mä promesa luräna uk amtañäni, jupajj akham sänwa: “Jilamajj sartjjaniwa” sasa (Juan 11:23). Jesusajj Awkipjamarakiw jiwatanakar jaktayañ muni, jaktayañatakis chʼamanirakiwa. Jesusan jachaqtʼasitapajja, jiwañarusa, jiwañajj kuna llakinaktï utjayki ukanak wal chhaqtayañ munatapwa uñachtʼayi. Lazaror jaktayasajja, jiwatanakar jaktayañatak chʼamanïtapwa Jesusajj uñachtʼayäna. Kuntï Jesusajj jichhürutaki ajllita texton Martar amtaykäna uk amtapjjapuniñäni. Cheqansa, Diosajj jiwatanakar jaktayäwa siski uka arsutapar creyiñatakejj walja razonanakaw utjistu. w23.04 págs. 11, 12 párrs. 15, 16

Kunsa Jehová Diosajj muni uk jukʼamp sum amuytʼasajja, inas oracionanakas mayjtʼayañajj wakischini. Diosajj mä amtaniwa, tiempoparupuniw uk phoqani, ukwa amtañasaraki. Uka amtap taypinjja, taqe kunanakatï tʼaqesiykistu ukanak wiñayatak tukjañawa. Jupajj desastres naturales, usuntañanaka, jiwaña, yaqha ukhamanakwa chhaqtayani. Kunanaktï Jehová Diosajj arsuwayki ukanakjja, Reinop toqew phoqani (Dan. 2:44; Apoc. 21:3, 4). Ukañkamajja Supayaruw aka mundo apnaqañapatakejj permitiski (Juan 12:31; Apoc. 12:9). Jehová Diosatï jaqenakan taqe jan waltʼäwinakap jichhürunakan askichaspa ukhajja, Supayajj sumsa apnaqkaspa ukhamaw amuyasispa. Jehová Diosan yaqhep promesanakap phoqasiñaps suyaskstanjja, ukajj janiw jiwasarojj janis yanaptʼkistaspa ukham sañ munkiti. Jupajj yanaptʼapunistuwa. w23.05 pág. 8 párr. 4; págs. 9, 10 párrs. 7, 8

Jesusan jiwatapajj amtaskani ukat beneficiasipjjañapatakejj ¿kunjamsa mayninakar yanaptʼsna? Nayraqatajj invitañasawa. Predicacionan invitacionanak lakirkchiñänisa, inas invitañ munktan ukanakan sutinakap qellqtʼassna, familiaranakaru, trabajonkir compañeronakaru, escuelankir compañeronakaru, jan ukajj uñtʼatanakaruw invitsna. Imprimit invitacionanakasatï jan utj-jjestanejja, internetan utjkistu uka invitacionwa aptʼaysna. Qhawqhanis jutapjjani uk janiw yatktanti, ukhamajj ¡taqenir invitasipkakiñäni! (Ecl. 11:6). Ak amtañasapuniwa, Jesusan jiwatap amtañatak invitktan uka invitadosajj inas jisktʼanakanïchini, yamas janitï tantachäwinakasar jutirïkchi ukhajj jisktʼanakanïspawa. Ukatwa kuna jisktʼanakanïspasa, kunjamsa ukar qhanañchtʼsna ukanak amuykiptʼañajj wakisispa. Jesusan jiwatap amtaskani uka qhepatjja, inas invitadosajj jukʼamp jisktʼanakanïchini. Ukhamajj Jesusan jiwatap amtaskani uka nayrasa, apaskani ukhasa, uka qhepatsa, kunanaktï lurirjamäktan ukanak lurañatakiw chʼamachasiñasa, ukhamat ‘suma chuyman’ jaqenakan uka wakiskir tantachäwit beneficiasipjjañapataki (Hech. 13:48). w24.01 pág. 12 párrs. 13, 15; pág. 13 párr. 16

Biblianjja jiwatat jaktir kimsaqallqo jaqenakatwa parli, jupanakajj aka oraqen jakañatakiw jaktapjjäna. ¿Sapa mayni ukanakat jukʼamp yatjjatañatakejj chʼamachassnati? Yatjjatkasajja, kunanaksa uka sarnaqäwinakat yateqsna ukwa amuytʼsna, kunjamsa ukanakajj Jehová Diosan jiwatanakar jaktayañ munatapsa, jaktayañatak chʼamanïtapsa uñachtʼayi ukwa amuytʼañasaraki. Jukʼampis Jesusan jaktatapatwa wal lupʼiñasa, jupan jaktatapaw jukʼamp importantejja. Jaktatap qhepatjja, Jesusarojj walja patak jaqenakaw uñjapjjäna, ukaw jiwatat jaktañajj utjapuniniw sasin confiyañatak yanaptʼistu (1 Cor. 15:3-6, 20-22). Jiwatat jaktañaw utjani sasin arsutapat walpun Jehová Diosar yuspärtanjja. Jupajj arsutap phoqañ muniwa, phoqañatakis chʼamanirakiwa sasaw confiytanjja. Diosajj sapa maynirus akham siskistaspa ukhamawa: “Munat familiaranakamas amigonakamas jaktanjjapjjaniwa” sasa. Jiwatat jaktañajj utjaniwa siski uka arunakar confiyasipkakiñäni. Ukhamtï lurañänejja, uka suma arunak arsuri Jehová Diosarojj sapa kutiw jukʼamp jakʼachasiñäni (Juan 11:23). w23.04 pág. 8 párr. 2; pág. 12 párr. 17; pág. 13 párr. 20

Humilde chuyman jaqejja, janiw jupakis jilankkaspa jan ukajj janis kunäkaspa ukham amuyaskiti, kunsa luraspa jan ukajj jan lurkaspa ukanak amuytʼasiwa. Mayninakarojj respetompiw uñji, janiw jilankkaspas ukham amuyaskiti (Filip. 2:3). Gedeonajj ukham humilde chuymanïnwa. Israelitanakajj wali chʼamani madianitanakamp apnaqatäpkäna ukhajja, Diosajj israelitanakar salvañamatakiw ajllistamjja sasaw mä angelajj Gedeonar yatiyäna, ukampis Gedeonajj humilde chuymampiw jupar akham säna: “Manasés tribu taypin familiajajj jukʼanikiwa, tatajan familiap taypins janirakiw kuna yäqat jaqëktsa” sasa (Juec. 6:15). Gedeonajj israelitanakar qhespiyañatak janis kunäkaspa ukhamwa amuyasïna. Ukampis Jehová Diosajj uk phoqañap yatïnwa, Diosan yanaptʼapampejj phoqarakïnwa. Ancianonakajj humilde chuymanïñatakiw wal chʼamachasipjjaraki (Hech. 20:18, 19). Kunanaksa sum lurañ yatipjje, kunanaksa jikjjatapjje ukanakat janiw jachʼañchasipkiti, pantjasipki ukhasa jan ukajj mä kunas jan sumar mistki ukhasa janirakiw jupanak pachpajj wal juchañchasipkiti. w23.06 pág. 3 párrs. 4, 5

Uka profecian phoqasiñapatakejja, 1.000 jila maranakaw faltaski, ukhaw Supayajj pʼeqet takjjatatäni (Apoc. 20:7-10). Ukampis uk janïr paskipanjja, kuna musparkañanakas pasani ukwa Bibliajj qhanañchi. Nayraqatjja, “¡Suman jakasiñampi jan ajjsaras jakasiñampiw utj-jje!” sasaw markanakajj yatiyapjjani (1 Tes. 5:2, 3). Markanakajj taqpach falso religionanakar atacapkani ukhaw jachʼa tʼaqesiñ tiempojj “mä akatjamat” qalltani (Apoc. 17:16). Ukatjja, Jesusajj taqe jaqenakaruw juzgani, ovejanakjamäpki uka jaqenakarojj cabranakjamäpki uka jaqenakatwa yaqhachani (Mat. 25:31-33, 46). Ukañkamajja, Supayajj janiw jan kun lurasajj quedaskaniti. Wali colerataw mayachtʼat markanakarojj Jehová Diosan markapar atacapjjañapatakejj amtayani. Bibliarjamajj uka mayachtʼat markanakajj Magog oraqenkir Gog satawa (Ezeq. 38:2, 10, 11). Jachʼa tʼaqesiñ tiemponjja, ajllit cristianonakat aka oraqenkasipkani ukanakaruw alajjpachan tantachthapisini. Jupanakajj alajjpachanwa Armagedón guerran nuwasiñatakejj Cristompiru alajjpachankir ejercitonakapampirojj mayachtʼasipjjani, ukampiw jachʼa tʼaqesiñ tiempojj tukuyani (Mat. 24:31; Apoc. 16:14, 16). Ukjjarusti, oraqpachjjaru Cristojj Waranqa Maranak apnaqkani ukaw qalltani (Apoc. 20:6). w23.10 págs. 20, 21 párrs. 9, 10

Jichhürunakanjja, Jehová Diosan servirinakapat waljanejj kawkjantï tantachasiñas predicañas jarkʼatäki uka lugaranakanwa jakapjje. Jupanakajj autoridadanakar respetapjjewa, ukampis uka munat jilat kullakanakasajj Abdiasjamarakiw Jehová Dios saparuk adorapjje (Mat. 22:21). Jaqenakar istʼañat sipansa Diosar istʼasaw jupar ajjsartʼapjjatap uñachtʼayapjje (Hech. 5:29). Ukatwa suma yatiyäwinak predicasipkaki, jamasatwa tantachasipjjaraki (Mat. 10:16, 28). Jilat kullakanakan Jehová Diosan yatichäwinakap katoqapjjañapatakis encargasipjjarakiwa. África toqen jakasir Henri jilatat parltʼañäni, ukanjja tantachasiñas predicañas jarkʼatänwa. Uka tiemponjja Henri jilataw jilat kullakanakatakejj Bibliat apstʼat qellqatanak apirïna. Jupajj akham siwa: “Nayajj wali ajjsarirïtwa, Jehová Diosaw jan sint ajjsartʼirïñatak yanaptʼawayitu” sasa. Diosar ajjsartʼañ yateqäta ukhajja, Henri jilatjamarakiw jan ajjsaras kuns luräta. w23.06 pág. 15 párr. 9; pág. 16 párr. 11

Adanampi Evampejj Dios contra saytʼasipkäna ukhajja, Diosajj istʼasiri ukat perfecto jaqenakamp aka oraqe phoqantañ amtkäna ukajj ¿janit phoqasjjaspäna? Jehová Diosajj janis kuns lurirjamäjjaspa ukham inas Supayajj amuychïna. Cheqas Jehová Diosajj Adanampir Evampir tukjasajj jaqenakatak amtkäna uk phoqañatakejj yaqha perfecto chacha warmi luraspäna. Ukampis uk luraspäna ukhajja, kʼarïkaspas ukhamwa Supayajj Diosat parlaspäna. ¿Kunatsa? Génesis 1:28 textorjamajja, Adanampi Evampirojj jumanakat jutir wawanakaw oraq phoqantapjjani sasaw Jehová Diosajj säna. Jehová Diosajj Adanampir Evampirojj wawanakanïpjjañap permitkchïnsa, janipuniw wawanakapajj perfectöpkaniti sasin inas Supayajj amuyarakchïna (Ecl. 7:20; Rom. 3:23). Ukatï pasaspäna ukhajja, Jehová Diosajj amtki ukajj ina chʼusarus tukuskaspa ukhamwa Supayajj parlaspäna. Kuna laykutejj Diosan amtapajj janiw phoqaskaspänti, mä arunjja aka oraqejj janiw perfecto jaqenakamp phoqantatäkaspänti. w23.11 págs. 5, 6 párrs. 15, 16

Ukampis Jehová Diosajj Arup toqesa markap toqes qhana instruccionanak churistu. Janiw ukanakar kunamp yaptʼañas wakiskiti (Prov. 3:5-7). Ukhamajj kunatï Biblian qellqatäki ukarjamakiw lurtanjja, kuntï mayninakajj amtapki uk respettanwa, janiw amuyusarjamakejj kuns lurayktanti. Supayajj ‘inamay kʼari amuyunakampi’ ‘aka mundon amuyunakapampiw’ jaqenakar engañji, tʼaqanoqtayaraki (Col. 2:8). Nayrïr patak maranakanjja, filosofonakan amuyunakapasa, jaqenakan yaqha amuyunakapasa, judionakan jan Bibliarjamäkäna uka yatichäwinakasa, cristianonakajj Moisesan Leyiparjamaw sarnaqapjjañapa sasin creyirinakas utjarakïnwa. Uka amuyunakajj kʼarïnwa, jaqenakarojj cheqpach yatiñ churki uka Jehová Diosats jitheqtayänwa. Jichhürunakanjja, Supayajj política pʼeqtʼirinakan yaqha contra parlapki uksa, kʼari yatiyäwinakapsa, radio, televisión, Internet, redes sociales ukanak toqew yatiyi. w23.07 pág. 16 párrs. 11, 12

Supayampi, Adanampi, Evampi Dios contra saytʼasipkäna uk kunjamsa Jehová Diosajj askichäna ukajja, Supayarojj jan arun jaytpachäna. Adanampir Evampir wawanakanïpjjañap permitisajja, Jehová Diosajj jan kʼarisirïtapa, arupajj phoqasipunirïtapwa uñachtʼayäna. Ukatsti amtapajj jan ina chʼusar phoqasirïtapwa uñachtʼayarakïna. ¿Kunjamsa uk uñachtʼayäna? Diosajj mä ‘wawa’ utjañapatakiw arsüna, uka ‘wawaw’ Adanampit Evampit jutiri ukat istʼasiri wawanakaparojj salvañapäna, ukhamatwa Diosan amtapajj phoqasiskakispäna (Gén. 3:15; 22:18). Jehová Diosajj jaqenakar juchampit jiwañampit kutsuyañapätap janipuniw Supayajj amuykpachänti. Juchampit jiwañampit kutsuyatäñajj munasiñatwa utji (Mat. 20:28; Juan 3:16). Niyakejjay Supayajj jupatakik llakisirïchejja, janipuniw uka kasta munasiñajj jupan utjkaspati. Ukhamajj ¿juchampit jiwañampit kutsuyatäñ utjatapat kunas jikjjatasini? Waranqa Maranak tukuyatarojja, Adanampit Evampit jutiri ukat istʼasiri perfecto wawanakapajj aka oraqen mä Paraisonwa jakapjjani, kunjamtï Jehová Diosajj qalltatpach amtkänjja ukhamäniwa. w23.11 pág. 6 párr. 17

Jakañ vidarusa wilarus sagradot uñjasaw respettanjja. Jehová Diosatakejja, wilajj jakañ vidampi sasiwa, jakañ vidajj jupan mä suma regalopawa (Lev. 17:14). Jehová Diosajj animalanakan aychap manqʼapjjañapatak jaqenakar nayrïr kuti autorizkäna ukhajja, wila jan manqʼapjjañapatakiw mayïna (Gén. 9:4). Qhepatjja, israelitanakar Moisés toqe churkäna uka Leyin uka pachpwa mayirakïna (Lev. 17:10). Nayrïr patak maranakanjja, cuerpo gobernante toqew taqpach cristianonakarojj wilat jitheqtapjjañapatak mä mandato churäna (Hech. 15:28, 29). Jiwasajj kunjamsa qollayasiñäni uk amtkasajja, uka mandamientor taqe chuymaw istʼaraktanjja. Jehová Diosajj qʼañu juchat jitheqtañatak churkistu uka leyinakarjam phoqañatakiw chʼamachastanjja. Apóstol Pablojj akham sasaw ewjjtʼistu: “Cuerponakamatjja akanak chhaqtayapjjam” sasa. Ukham sasinjja, jan walinak lurañ munktan ukanak jan payachasis chhaqtayañatwa parlaskäna. Ukhamajj kunanakatï qʼañu juchar purtʼasiykistaspa ukanak janipuniw uñjañasäkiti ni lurañasäkisa (Col. 3:5; Job 31:1). w23.07 pág. 15 párrs. 5, 6

Ukampis ¿kunatsa Sansonajj Dalilan jan wali amtanakapat jan amuyaskpachäna? ¿Sintipunit Dalilarojj munasjjpachäna? Ukhamächïn janisa, Dalilajj kunatsa Sansonajj wali chʼamanïna uk arsuñapatakejj kutin kutiniw waytʼäna, Sansonasti kunatsa wali chʼamanïna uk Dalilar yatiyjjänwa. Ukatwa Sansonajj mä tiempojj jan chʼamanëjjänti, Jehová Diosampis janiw sumat uñjatäjjänti (Juec. 16:16-20). Sansonajj Jehová Diosar confiyañat sipansa Dalilaruw jukʼamp confiyäna, ukatwa sinti jan walin uñjasïna. Filisteonakajj Sansonar katuntasajj nayranakapwa apsupjjäna. Ukatjja Gaza markanwa mä carcelar llawintapjjäna, ukanwa grano moleñapatak esclavor tukuyapjjäna. Ukatjja filisteonakajj mä fiesta lurapjjäna, Dagón sat falso diosaparuw sacrificionak loqtapjjarakïna, amparanakapar Sansonar katuyañatakejj uka falso diosas yanaptʼkaspäna ukhamwa filisteonakajj amuyapjjäna. Ukatsti, ‘Sansonar carcelat irptanisaw jupat larusipjjäna’, mä arunjja jupat burlasipjjänwa, jiskʼachapjjarakïnwa (Juec. 16:21-25). w23.09 págs. 5, 6 párrs. 13, 14

Inas trabajonkiri jan ukajj colegionkir compañerosajj akham jisktʼchistaspa: “¿Kunatsa jumajj Biblian ewjjanakaparjam sarnaqta?” sasa. Cheqansa, kunarutï creyktan uk arjjatañ muntanwa, ukampis jisktʼkistu ukan amuyunakapar respetasaw jaysañasa (1 Ped. 3:15). Maynejj jisktʼkistu ukajja, kunas jupar llakisiyi uk amuyañatakiw yanaptʼistaspa, janiw jiskhisiñsa munkaspa jan ukajj jiskʼachañsa munkistaspa ukham amuyañasäkiti. Kuna amtampisay maynejj jisktʼkchistojja, munasiñampi llampʼu chuymampi jaysañaw jukʼamp wakiskirejja. Ukaw kunatsa ukham amuyi uk sum amuytʼasiñapatak yanaptʼaspa. Trabajosankir mä compañerosajj “¿kunatsa cumpleaño jan amtapkta?” sasas jisktʼkistaspa ukham amuytʼañäni. Jisktʼapar janïr jayskasajj ¿kunsa nayraqat amuytʼañasa? ¿Mä rat kusistʼañats jarkʼapkistaspa ukhamti jupanakajj amuyapjjpacha? Qalltañatakejja, trabajonkir compañeronakat llakisitapat wal yuspärsna. Inas ukajj jupar yanaptʼchispa, Bibliajj kunsa cumpleañonak amtañ toqet amuytʼayistu uk qhanañchañatakejj inas yanaptʼarakchispa. w23.09 págs. 16, 17 párrs. 10, 11

Tiempo utjkipan taqe markanakankir jaqenakar predicañajj mä jachʼa privilegiowa. Ukatwa Jehová Diosan urup ‘wali amuyump suytʼaskakiñatak’ apóstol Pedrojj ewjjtʼistu (2 Ped. 3:11, 12). ¿Kunas ukatakejj yanaptʼistaspa? Machaq mundon kunja sumas jakasjjañäni uka toqet sapüruw lupʼiñasa. ¿Anqansa suma aire samskasma, suma manqʼanaksa manqtʼaskasma ukham amuyasmati? ¿Jiwatat jaktanipki uka amigonakamarusa jan ukajj familiaranakamarus katoqkasma ukham amuyasmati? Walja patak maranak nayra jakapkäna ukanakarojj ¿kunjamsa Biblian profecianakapajj phoqasïna uk yatiyaskatam amuyaraktati? Uka toqenakat lupʼiñaw taqe chuym suytʼaskakiñatakisa qhepa urunakan jakaskatas amtañatakis yanaptʼätam. Niyakejjay kunas jutïrin pasani uk yatjjstanjja, janipun kʼari yatichäwinak yatichapki ukanakampejj apayasiñäniti. w23.09 pág. 27 párrs. 5, 6

Wayn tawaqonakan compañeronakapatjja, jilapartejj janiw awk taykapar istʼapkiti (2 Tim. 3:1, 2). ¿Kunatsa waljanejj awk taykapar jan istʼapki? Yaqhep awk taykanakajja, kuntï wawanakapar lurañ mayipki uk janiw jupanak pachpas lurapkiti, ukatwa wawanakajj awk taykapajj kʼari chuymanïpkaspas ukham uñjapjje. Yaqhepatakejj awk taykapan ewjjtʼapajj janis jichha tiempotakëjjaspa, sintpuns mä kun lurañat jarkʼjjaspa, janis ukajj jupanakar yanaptʼkaspa ukhamwa amuyapjje. Wayn tawaqo, ¿jumajj ukhamti amuyarakta? Waljanitakejja, jichhürutaki ajllita textojj siski uka arunakarjam sarnaqañajj chʼamakïspawa. ¿Kunas jumarojj uka mandamientomp phoqañatakejj yanaptʼiristam? Jesusatwa istʼasirïñ yateqasma, janiw jupjam istʼasirejj yaqhajj utjkiti (1 Ped. 2:21-24). Jesusajj perfectönwa, ukampis awk taykapajj janiw perfectöpkänti. Awk taykapajj pantjasipkchïnsa jan ukajj janis jupar entiendipkchïnjja, Jesusajj jupanakar respetänwa (Éx. 20:12). w23.10 pág. 7 párrs. 4, 5

Apóstol Pablojja, Leyirjam loqtaski uka sacrificionakajj janiw juchanakas taqpach qʼomachañatak yanaptʼkiti sasaw säna. Ukatwa Leyejj maysar apanukutäjjäna. Ukjjarusti apóstol Pablojj jan fácil amuykañ yatichäwinakat mä qhawqhanakwa jupanakar qhanañchäna. Jesusan sacrificiot loqtasitapat ‘kuna suma suytʼañatejj’ utjkäna, jupanakan ‘Diosar jakʼachasipjjañapatakis’ yanaptʼkäna ukwa jupanakar amtayäna (Heb. 7:19). Nayra tiempon Jehová Diosar adorapkäna ukat sipans kunatsa cristianonakjam Diosar adorapjjatapajj jukʼamp sumajja, ukwa Pablojj hebreo jilat kullakanakapar qhanañchtʼäna. Kunjamtï judío religionankirinakajj Diosar adorapki ukajja, “jutañapäkäna ukanakan chʼiwi[pakïnwa], ukampis kunatï cheqäki uk uñachtʼayirejj Cristowa” sasaw jupanakar säna (Col. 2:17). Mä chʼiwejja, janiw kunan chʼiwipasa uk sumpach uñachtʼaykiti, aleq chʼiwikiwa, janirakiw uka chʼiwejj kuntï amuyktan ukapunïkaspati. Nayra tiempon judionakajj Diosar adorapkäna ukampejj ukhamarakiwa, ukajj jutañapäkäna ukanakan chʼiwipakïnwa. Kunas Diosan templopajja, mä arunjja kunjamsa Jehová Diosar adorañasa uk amuyañasajj wali wakiskiriwa, ukhamatak juchanakasajj perdonatäspa, kunjamtï jupajj munki ukhams adorsna. w23.10 pág. 25 párrs. 4, 5

Daniel capítulo 11 ukanjja, pä reyinakata jan ukajj pä gobiernonakatwa parli, jupanakajj aka oraqpach apnaqañatakiw chʼajjwapjje. Biblian uka profeciampi yaqha profecianakampi igualtʼayasajja, “rey del nortejj” jichhürunakan Rusia markampi uka markar mayachtʼat markanakampïtapwa amuytanjja, “rey del sur” ukajj Reino Unido ukat Estados Unidos mayachtʼat potencia mundialätapwa amuytanjja. Kawkïr markanaktï “rey del nortejj” apnaqki uka markanakanwa Diosan servirinakapajj arknaqat uñjasipjje. Biblian yatichäwinakapar creyipjjatapatwa yaqhep Testigonakarojj nuwjapjje, carcelarus jistʼantapjje. Ukampis kunanaktï “rey del nortejj” lurki ukanak uñjasajj janiw jilatanakasajj ajjsarayasipkiti. Jan ukasti jukʼampiw jichhajj Diosar confiyapjje. ¿Kunatsa? Kuna laykutejj arknaqat uñjasipjjatapajj janïräkipanwa Daniel libron qellqatäjjäna uk jupanakajj yatipjjewa (Dan. 11:41). Uka profecian phoqasitap yatiñajja, jutir urunak suytʼaskakiñataki, Diosat jan jitheqtas suytʼaskakiñatakiw yanaptʼistu. w23.08 págs. 11, 12 párrs. 15, 16

Jehová Diosatakejj nayranakapäksnas ukhamätanwa. Nayranakajj cuerpon wali importantewa, jan llamktʼkañarakiwa. Ukatwa Jehová Diosajj “maynitï jumanakar jan wal lurapjjstamjja, kunatï nayatak wali importantëki ukaruw jan waltʼayasipki” siskaspas ukhamajja. Niyakejjay Jehová Diosajj wal munaschistojja, kunjamäsktansa ukat llakisipuniwa, jarkʼaqañwa munarakistu. Tʼaqestan ukhajj tʼaqesirakiwa, ukatwa akham sissna: “Kunjamtï nayranakamar jarkʼaqta ukhamay jarkʼaqtʼasita” sasa (Sal. 17:8). Jehová Diosajj qhawqsa munastam uka toqet jan payachasiñamwa muni. Inas kunaymanin uñjasisasa jan ukajj problemanakanïsas Diosajj janis munaskiristam ukham amuysta, uk jupajj amuyiwa. Ukatwa Diosan jumar munasitapat jan payachasiñamäkiti. ¿Kunas ukatak yanaptʼiristam? Kunjamsa Jehová Diosajj Jesusarusa, ajllitanakarusa, taqe jiwasanakarus munasiñamp uñjistu uk yatjjatañaw yanaptʼistaspa. w24.01 pág. 27 párrs. 6, 7

Kunjamsa Jehová Diosajj jan waltʼäwinakan markapar yanaptʼäna ukwa Esdrasajj uñjäna. Walja maranak nayrajja, mä arun 484 maranjja, Persia markajj apnaqkäna uka oraqen jakir judionakar qʼal chhaqtayañatakiw Asuero reyejj mä orden apsüna, inas Esdrasajj Babilonia markan jakchïna (Est. 3:7, 13-15). Jupas jiwayataw uñjasirakispäna. Reyin uka decreto apsutap yatisajja, “taqe provincianakankir” judionakaw ayunapjjäna, walpun llakisipjjäna, Jehová Diosarus jupanakar salvañapatakejj ruwtʼasipjjarakpachänwa (Est. 4:3). Kunapachatï taqe kunas mä akatjamat mayjtʼäna, judionakar tukjañ munirinakas jiwayat uñjasipkäna ukhajj kunjamas Esdrasas mayni judionakas jikjjatasipjjäna uk amuytʼañäni (Est. 9:1, 2). Kuna jan walinakantï Esdrasajj uñjaskäna ukajja, inas jutïr yantʼanakar saykatañatak wakichtʼchïna, Jehová Diosajj markapar jarkʼaqapuniniwa sasin jukʼamp confiyañapatakiw yanaptʼpachäna. w23.11 pág. 17 párrs. 12, 13

Apóstol Pablojj jilapartejj ‘leyir istʼasin luratanakatwa’ parlaskäna, mä arunjja Diosajj Moisés toqe israelitanakar churkäna uka Leyitwa parlaskäna (Rom. 3:21, 28). Amuyatajja, yaqhep judío cristianonakatakejj janiw Leyejj tukuskänti, uka Leyirjam lurañajj wakisiskakïnwa. Ukatwa Pablojj Abrahanat parläna, ukhamat Diosamp suma uñjatäñatakejj ‘leyirjam lurañat’ sipans Diosar confiyañak wakisjjatap uñachtʼayañataki. Kuntï Pablojj siskäna ukajj wali chʼamañchtʼkiriwa, kuna laykutejj akwa yatichistu: jiwasatï Diosampir Cristompir confiyañänejja, Jehová Diosampejj wali suma uñjatäsnawa. Santiago capítulo 2 ukan parlki uka ‘luräwinakajja’, Pablojj parlkäna uka ‘leyir istʼasin luratanakampejj’ janiw pachpäkiti. Santiagojj cristianonakan sapür lurañanakapatwa parlaskäna (Sant. 2:24). Uka luräwinakajj cheqapunit mä cristianojj Diosar confiyi janicha ukwa uñachtʼayi. w23.12 pág. 3 párr. 8; págs. 4, 5 párrs. 10, 11

Jumatï casarasiñ munsta ukhajja, khitimpis casarasïta uk wali sum amuytʼasiñamawa. Casaraskäta uka chachajj juman pʼeqemäjjaniwa (Rom. 7:2; Efes. 5:33). Ukhamajj akham jisktʼasim: “¿Suma cristianöñatakit chʼamachasi? ¿Diosar serviñat jakäwipan jukʼamp importantejja? ¿Suma amtanakarut puri? ¿Pantjasitanakap reconositi? ¿Warminakar respetompit uñji? ¿Jehová Diosamp sum apasiskakiñajatak yanaptʼitaniti? ¿Qollqe toqet yanaptʼitaniti, nayan suma amigojäniti?” sasa. Jumatï mä suma esposo jikjjatañ munstajja, suma esposäñatakiw chʼamachasiñama. Mä suma esposajj chachapatakejj “mä yanapiri, mä compañera” ukhamawa (Gén. 2:18). Niyakejjay Jehová Diosar munaschejja, esposoparojj mayninakamp suma uñjatäñapatakiw yanaptʼi (Prov. 31:11, 12; 1 Tim. 3:11). Jumatï casarasiñ amtasksta ukhajja, Jehová Diosar jukʼamp munasiñatak chʼamachasiñamawa, utamansa congregacionansa suma ‘yanapirïñatakiw’ chʼamachasiñamaraki. w23.12 págs. 22, 23 párrs. 18, 19

Suma amtanakar puriñamatak wakiski uka yatiñwa churäma sasaw Jehová Diosajj sistu. Jukʼampis kunanakatï jakäwisan jukʼamp wakiskirïki uka amtanakar puriñatakiw Jehová Diosar yatiñap mayisiñasa. Diosajj aguantañatakiw chʼam churarakistu. Kunjamtï Jehová Diosajj apóstol Pablor chʼam churkänjja, ukhamarakiw jiwasarojj jan waltʼäwinak aguantañatakejj chʼam churistani (Filip. 4:13). Jupajj jilat kullakanak toqew yanaptʼistaspa. Janïr jiwayapkäna uka arumajja, Jesusajj taqe chuymaw wal orasïna. Dios contras jan wal parlkaspa ukham juchañchatäñat salvañapatakiw Jehová Diosar wal ruwtʼasïna. Salvañat sipansa, Jehová Diosajj Jesusan mä ángel jilaparuw jupar chʼamañchtʼañapatak khitäna (Luc. 22:42, 43). Jehová Diosajj ukhamarakiw jiwasarojj yanaptʼistaspa, inas mä jilatasa jan ukajj mä kullakas jiwasar chʼamañchtʼañatakejj jawstʼanchistaspa jan ukajj visitchistaspa. Ukhamajj kunjamatsa jilat kullakanakasarojj ‘mä suma arump’ chʼamañchtʼsna uk amuyapjjapuniñäni (Prov. 12:25). w23.05 págs. 10, 11 párrs. 9-11

Inactivonakatakejj Jesusan jiwatap amtañataki tantachäwir sarañajj chʼamakïspawa, inas jupanakajj kunjamakis jilat kullakanakajj katoqapjjetani sasin llakisipjjchi. Kunanakatï mayjtʼasiykaspa ukanak jan jisktʼapjjañäniti, janirak chuym ustʼaykaspa ukanak sapjjañäniti. Jupanakajj munat jilat kullakanakäsipkakiwa, Jehová Diosar jupanakamp adorjjasajj wal kusisiraktanjja (Sal. 119:176; Hech. 20:35). Jesusaw sapa mara jiwatap amtañasatakejj mä mandato jaytawayistu. Jupan jiwatap amtañajj jiwasarus yaqhanakarus walja toqenakatwa yanaptʼistu (Is. 48:17, 18). Jehová Diosarus Jesusarus jukʼamp munasiñasatakiw yanaptʼistu. Kunanaktï jupanakajj jiwas layku lurawayapki ukanakat yuspäratas uñachtʼayañatakis yanaptʼarakistuwa. Jilat kullakanakasampejj jukʼampiw mayachtʼistu, Jesusajj juchampit jiwañampit kutsuykistu ukat walja bendicionanakwa katoqtanjja, ukanakat disfrutapjjañapatakiw jaqenakar yanaptʼaraksna. Ukhamajj maran may kuti Jesusan jiwatapajj amtaski ukatak wakichtʼatäñatakejj chʼamachasipjjañäni. w24.01 pág. 14 párrs. 18, 19

¿Kunjamsa Diosajj irpistu? Jilapartejj Arup toqew irpistu, representantepäpki ukanak toqew irparakistu. ‘Suma phoqeri amuyasir esclavo’ toqew manqʼar uñtat yatichäwinak churistu, uka yatichäwinakaw suma amtanakar puriñatak yanaptʼistu (Mat. 24:45). Ukampis Jehová Diosajj janiw jupanak toqekejj irpkistuti. Circuito jilatanakasa ancianonakas jan walinakar saykatañatakejj chʼamañchtʼapjjestuwa, ewjjtʼapjjarakistuwa. Kunjamsa Jehová Diosajj aka jan wali qhepa urunakan wali sum irpistu ukat wal yuspärtanjja. Ukhamatwa jupan amigopäskaksna, wiñay jakañar apki uka thaknamas saraskaksna. Jehová Diosajj wali sumsa irpkchistojja, awisajj jupamp irpayasiñajj chʼamakïspawa, jukʼampis pantjasir chachanak toqe irpkistu ukhaw jukʼamp chʼamäspa. Ukampis uka horasanwa kunjamsa Jehová Diosajj markapar irpaski, kunatsa jupamp irpayasiñajj jukʼamp sumajja ukar jukʼamp confiyañajj wakisini. w24.02 pág. 20 párrs. 2, 3

Diosar munasitas jiltañapatakejja, Bibliat taqe chuymaw yatjjatañasa. Biblia liytʼktan ukhajja, kunsa uka versiculonakajj yatichistu ukwa amuytʼañasa. Akhamwa jisktʼasiñasa: “¿Jehová Diosajj nayar munasitap kunjamsa aka versiculonakajj uñachtʼayi? ¿Kunjamsa aka versiculonakajj Jehová Diosar munasiñatak yanaptʼitu?” sasa. Jehová Diosar jukʼamp munasiñatakejja, sapür oraskasajj chuymatpachaw jupar orasiñasa (Sal. 25:4, 5). Jehová Diosasti oracionanakasarojj jaysarakiniwa (1 Juan 3:21, 22). Jaqe masisar munasitasajj jukʼamp jiltañapatak chʼamachasiñäni. Pablojj cristianöjjäna ukhat mä qhawqha maranak qhepatjja, yateqaskañ sarnaqer Timoteo waynaruw uñtʼäna. Timoteojj Jehová Diosarusa jaqenakarus wal munasïna. Ukatwa Pablojj akham sasin Timoteot Filipos markankirinakar qellqäna: “Nayatakejj janiw khitis jupjamajj utjkiti, jupajj cheqpachapuniw jumanakat llakisi” sasa (Filip. 2:20). Pablotakejj qhawqsa Timoteojj jilat kullakanakar munasïna ukaw jukʼamp importantëna. Congregacionankirinakajj Timoteon visitap wal suyapjjpachäna. (1 Cor. 4:17). w23.07 pág. 9 párrs. 7-10

Israelitanakajj janïr Suma Oraqer mantapkäna ukhaw Moisesajj jiwjjäna. ¿Kunas uka qhepat Diosan markapampejj pasäna? Diosat jan jitheqtir Moisesajj jiwjjäna ukhajj ¿sapaki jan khiti yanapirinit quedasipjjpachäna? Janiwa. Jehová Diosajj jupat jan jitheqtirinakarojj yanaptʼapunïnwa. Moisesan janïr jiwkipanjja, ‘Josué chachaw markan pʼeqtʼiripäjjani’ sasaw Jehová Diosajj säna. Juparojj Moisesaw walja maranak pʼeqtʼirïñapatak capacitäna (Éx. 33:11; Deut. 34:9). Ukhamarus markar irpañatakejj experienciani walja chachanakaw utjäna: 1.000, 100, 50 jaqenakar pʼeqtʼirinakaw utjäna, 10 jaqenakar pʼeqtʼirinakas utjarakïnwa (Deut. 1:15). Cheqas Diosan markapajj suma uñjatänwa. Jichhajj Eliasat parltʼarakiñäni. Jupajj walja maranakaw israelitanakarojj Diosar adorapjjañapatak yanaptʼäna. Ukampis mä kutejja, Jehová Diosajj Judá markat jukʼamp aynach toqeruw Eliasar khitäna (2 Rey. 2:1; 2 Crón. 21:12). Israelan tunka tribunakapajj ¿jaytanukutat uñjasipjjpachäna? Janiwa. Eliasajj walja maranakaw Eliseor capacitjjäna. Ukhamajj Jehová Diosajj amtap phoqaskakïnwa, jupat jan jitheqtirinakarus uñjaskakïnwa. w24.02 pág. 5 párr. 12

Efesonkir cristianonakajj Jehová Diosan Aruparjamaw jakjjapjjäna, Arupajj jupanakar irpir mä qhanjamänwa (Sal. 119:105). Falso religionanakan luräwinakapsa qʼañu jucha lurañanaks jaytjjapjjänwa. Diosatwa yateqasipjjäna, jupar adorañatakisa kusisiyañatakis wal chʼamachasipjjäna (Efes. 5:1). Kunatï cheqäki uk janïr yateqkasajja, ukhamarakiw jiwasajj falso religionankatasatsa jan walinak luratasats chʼamakankayätanjja. Jiwasanakat yaqhepajj inas falso religionanakan fiestanakap amtchiyätan, yaqhepajj inas qʼañu juchanakan sarnaqarakchiyätan. Ukampis Jehová Diosar uñtʼjjasajj jakäwisan cambionak lurayätanjja, kunatï Diosatak walïki jan walïkaraki uka leyinakaparjamaw sarnaqjjarakiyätanjja. Ukajj walja toqenakatwa yanaptʼawayistu (Is. 48:17). Ukhamäkchisa, chʼamakat jayankañasa “qhanan wawanakapjam” sarnaqaskakiñas awisajj chʼamakiwa. w24.03 págs. 21, 22 párrs. 6, 7

Diosar katuyasiñatakisa bautisasiñatakis janis wakichtʼatäkasma ukham inas amuyassta. Inas Jehová Diosar istʼañatakejj jakäwiman cambionak lurañamajj wakischi, jan ukajj inas Diosar jukʼamp confiyañatakejj walja tiempojj wakisirakchi (Col. 2:6, 7). Ak amtapunim: Bibliat yateqerinakajj janiw taqenejj mä pachpak Diosar serviñan jiltapkiti. Janirakiw taqe wayn tawaqonakajj mä pachpa maranikejj Diosar serviñan jiltapkiti. Ukhamajj Diosar serviñan jiltañatakejj kuna cambionak lurañamas wakisi uk sum amuytʼasim, ukarjam lurarakim, janipun mayninakamp igualasimti (Gál. 6:4, 5). Jehová Diosar jakäwim katuyasiñatak janïr wakichtʼatätam amuyassta ukhajja, uka amtam phoqañatakejj chʼamachasiskakim. Jehová Diosaruw wakiski uka cambionak lurañatakejj yanaptʼa mayiñama (Filip. 2:13). Jupajj oracionanakam istʼaniwa jaysarakiniwa, janiw ukat payachasiñamäkiti (1 Juan 5:14). w24.03 pág. 5 párrs. 9, 10

Mä kutejja, Sarajj wali llakitäskäna ukhajj Abrahanarukiw colerap samarasïna, ukat juchañchjjarakïna. Ukampis Abrahanajj wali sum Sarar uñtʼäna, familia pʼeqtʼirirjam respetatapsa amtanakapar apoyirïtapsa Abrahanajj yatïnwa. Ukatwa Sararojj istʼäna, kuna jan waltʼäwinakatï utjkäna uk askichañatakis chʼamachasïna (Gén. 16:5, 6). ¿Kunsa jiwasajj yateqsna? Esposojj kunanakas familian lurasini uk amtañatakejj autoridadaniwa (1 Cor. 11:3). Ukampis niyakejjay esposapar munaschejja, kuntï esposapajj amuyki uk istʼiwa, esposapampitaki amtani ukhajj jukʼampiw istʼi (1 Cor. 13:4, 5). Yaqha kutinjja, mä akatjamat utapar purinir chachanakaruw Abrahanajj manqʼa wajjtʼañ amtäna. Sarajj yaqha lurañanakamp wali ocupatäkchïnsa, walja tʼantʼanak lurañapatakiw Abrahanajj mayïna (Gén. 18:6). Sarajj ukaratpachaw tʼantʼanak luräna, ukhamatwa Abrahanan amtapar apoyatap uñachtʼayäna. Casarat kullakanaka, jumanakajj Sara warmjamarakiw kunanaktï esposonakamajj amtapki ukanakar apoyapjjasma. Ukhamtï lurapjjäta ukhajja, chacha warmjamajj jukʼamp sumaw apasipjjäta (1 Ped. 3:5, 6). w23.05 págs. 24, 25 párrs. 16, 17

Jehová Diosajj Gedeonar juezat uttʼaykäna uka qhepatjja, Gedeonan istʼasirïtapasa jan ajjsarirïtapas yantʼataw uñjasïna. Jupajj tatapan utjkäna uka Baal diosan altarap tʼunthapiñapänwa, uk lurasajj jan walinakanwa uñjasispäna (Juec. 6:25, 26). Qhepatjja, Gedeonajj mä jachʼa ejército tantachtʼäna, ukampis Jehová Diosajj pä kutiw uka ejército jukʼaptayañapatak mayïna (Juec. 7:2-7). Qheparusti, Jehová Diosan ordenatajj enemigon campamentoparuw chika arumajj atacarakïna (Juec. 7:9-11). Ancianonakajj ukhamarakiw istʼañatakejj jankʼakïpjjañapa. Mä ancianojj istʼasirïki ukhajja, kuntï Bibliasa Diosan markapas siski ukarojj taqe chuymaw istʼi, ukhamatwa mayninakatak wali yateqaskañajja. Ukampis inas istʼasirïñajj jupatak chʼamakïchispa. Awisajja inas Diosan markapajj apayanki uka machaq instruccionanakarjam lurañajj chʼamakïchispa. Inas awisajj “¿mä instruccionajj jiwasatakjamäskiti jan ukajj ukarjam lurañajj walikïskiti?” sasin jisktʼaschispa. Jan ukajj inas kuntï mayipki uk lurasajj carcelar llawintapjjchispa. Ukhamanakan ¿kunjamsa ancianonakajj Gedeonjam istʼasirïpjjaspa? Instruccionanak katoqasajj ukarjamaw jankʼak lurapjjañapa. w23.06 págs. 4, 5 párrs. 9-11