Febrero

Ezequías reyejj wal usuntäna ukhajj Jehová Diosaruw qolltʼañapatak ruwtʼasïna, Jehová Diosasti qollänwa (2 Rey. 20:1-6). Ukampis apóstol Pablojj ‘mä chʼapi jañchipat’ apaqañapatak maykäna ukhajj janiw Jehová Diosajj uk lurkänti (2 Cor. 12:7-9). Kunas apóstol Santiagompir Pedrompirojj pasäna uk amtañäni. Herodes reyejj panpachaniruw jiwayañ munäna. Qhepatjja, Santiagor jiwayapjjänwa, Pedrosti Diosan mä milagrop toqew salvasïna (Hech. 12:1-11). Inas akham sasin jisktʼassna: “¿Kunatsa Jehová Diosajj maynir salväna, maynirojj jan salvkarakïna?” sasa. Bibliajj janis uk qhanañchkchejja, aka toqet janiw payachasktanti, Jehová Diosajj “janipuniw kunatï jan cheqapäki uk lurkaspati” (Deut. 32:4). Awisajj janiw Diosajj oracionanakasarojj kunjamtï munktan ukham jayskaspati. Ukampis Jehová Diosajj kunjamsa oracionanakasar jaysistu ukat janiw quejasktanti, jupajj munasiñampi kunatï cheqapäki ukarjamaw kuns luri, janiw ukat payachasktanti (Job 33:13). w23.11 pág. 21 párr. 6

Santiago libro qellqerejja, yatiñan jaqejj ‘istʼasiñatakejj jankʼakiwa’ sasaw qellqäna. ¿Ukajj kamsañs muni? Khitinakarutï Jehová Diosajj autoridad churki ukanakarojj jankʼakiw taqe chuym istʼañasa. Ukampis Diosan mandamientonakap pʼakintayañ munapkistu ukanakarojj Jehová Diosajj janiw istʼañas munkiti (Hech. 4:18-20). Jehová Diosajj churkistu uka mandamientonakapajj perfectopuniwa, ukatwa jaqenakar istʼañat sipans Jehová Diosar istʼañajj jukʼamp facilakïspa (Sal. 19:7). Ukampis autoridadanïpki uka jaqenakajj janiw perfectöpkiti. Ukhamäkchisa alajjpachankir Awkisajj awk taykanakarusa, marka apnaqerinakarusa, ancianonakarus autoridadwa churi (Prov. 6:20; 1 Tes. 5:12; 1 Ped. 2:13, 14). Cheqas jupanakar istʼasajja, Jehová Diosaruw istʼasktanjja. w23.10 pág. 6 párrs. 2, 3

Jehová Diosajj qhawqha chʼamanis uka toqet amuytʼañaw jupar jukʼamp confiyañatak yanaptʼistani. Diosajj taqe arsutanakap phoqañatakejj chʼamaniwa. Ukhamarus jupajj Taqe Chʼamani Diosawa (Job 42:2; Mar. 10:27; Efes. 3:20). Amtañäni, Abrahanampi Sarampejj wali jilïrëjjapjjchïnsa, mä wawanïpjjätawa sasaw Diosajj jupanakar säna (Gén. 17:15-17). Jumat jutir wawanakamarojj Canaán oraq churäjja sasaw Diosajj Abrahanar arsurakïna. Ukampis Abrahanat jutir wawanakajja, mä arun israelitanakajja, walja maranakaw Egipton esclavöpjjäna. Ukhamajj inas jupanakajj janipuniw Diosan promesapajj phoqaskaniti sasin amuyapjjchïna, ukampis phoqasïnwa. Diosarakiw María sat virgen tawaqorojj pachpa Wawajaruw ususïta sasin säna. Ukhamatwa kuntï Jehová Diosajj walja maranak nayrajj Edén jardinan arskäna uka promesajj phoqasiñapäna (Gén. 3:15). Jehová Diosan taqpach promesanakapat amuytʼasasa kunjamsa ukanak phoqawayi ukanak amuytʼasasa, wali chʼamanïtapwa amuytanjja. Ukaw Diosajj machaq mundo apanipuniniw sasin jukʼamp confiyañatak yanaptʼistu (Jos. 23:14; Is. 55:10, 11). w23.04 pág. 28 párrs. 10-12

Jehová Diosajj Davidan oracionanakapar istʼänwa, salvarakïnwa (1 Sam. 19:10, 18-20; 2 Sam. 5:17-25). Jiwasan oracionanakasjja istʼarakiwa, janiw ukat payachasiñasäkiti (Sal. 145:18). Inas jupajj kunjamtï munktan ukarjam oracionanakas jan jayskchistaniti. Ukaw apóstol Pablompejj pasäna. ‘Mä chʼapiw jañchipan utjäna’, mä arunjja sinti jan waltʼäwinwa uñjasïna, uk apaqtʼañapatakejj kimsa kutiw Jehová Diosar wal ruwtʼasirakïna. ¿Jehová Diosajj oracionanakapar jaysänti? Jïsa, jaysänwa, ukampis janiw kunjamtï Pablojj munkäna ukarjam jayskänti. Uka jan waltʼäwi apaqañat sipansa, Jehová Diosajj jupat jan jitheqtas serviskakiñapatakiw chʼam churäna (2 Cor. 12:7-10). Awisajja, Jehová Diosajj janiw kunjamtï munktan ukarjampun jayskarakistaspati. Ukampis Jehová Diosajj kunjamats yanaptʼapunistaniwa, janiw ukat payachasiñasäkiti. “Taqe kunanaktï mayktan jan ukajj amuyktan ukanakat sipansa jukʼampinakwa luraspa” (Efes. 3:20). Ukhamajj jan suyktan jan ukajj jan amuyktan ukhaw Jehová Diosajj oracionanakasar jaysistaspa. w23.05 págs. 8, 9 párrs. 4-6

Sapa mä qhawqha tiempotjja, jiwatat jaktañ toqet lupʼiñajj wali wakiskiriwa. Kuna laykutejj kunas qharürojj pasani uk janiw yatktanti. Inas wal usuntsna jan ukajj inas mä munat amigosas mä familiarasas mä akatjamat jiwjjchispa (Ecl. 9:11; Sant. 4:13, 14). Jiwatat jaktañajj utjki uka suytʼäwiw uka yantʼanak aguantañatakejj yanaptʼistaspa (1 Tes. 4:13). Bibliarjamajja, alajjpachankir Awkisajj sum uñtʼistu, wal munasirakistu (Luc. 12:7). Niyakejjay Jehová Diosajj sum uñtʼchistojja, kunjam jaqëtansa kunanaksa amtasktan taqe ukanakwa jiwatat jaktayasajj kuttʼayjjestani. Jiwasar wal munasitapatjja, wiñayatak jakañaswa muni. Jiwjjchiñänis jaktayistaniwa. ¿Jiwatat jaktañajj utjaniwa sasajj kunatsa confiysna? Kuna laykutejj Diosajj uka promesap wal phoqañ muni, uk phoqañatakejj chʼamanirakiwa, janiw uka toqet payachasktanti. w23.04 págs. 8, 9 párrs. 2-4

Joseampi Mariampejja, Jehová Diosamp sum apasiskakiñatakejj panpachaniw chʼamachasipjjäna. Jehová Diosar familjam adorañajj kunja wakiskirisa uksa yatipjjarakïnwa (Luc. 2:22-24; 4:16). ¡Jupanakajj casaratanakatakejj wali yateqaskayäpjjewa! Jumanakatï wawanakanïpjjsta ukhajja, tantachäwinakar sarañasa, familiamp Bibliat yatjjatañatak tiempo apstʼasiñas chʼamakïspawa. Yamas chacha warmjam Bibliat yatjjatañataki, juntuk orasiñatak tiempo apstʼasiñajj jukʼamp chʼamakïspawa. Ukampis ak amtapjjapunim, jumanakatï Jehová Diosar juntuk adorapjjäta ukhajja, jukʼamp sumwa Diosampejj apasipjjäta, jumanakkamas jukʼamp mayachtʼatäpjjätawa. Ukhamajj Jehová Diosar adorañaw jumanakatakejj nayrankañapa. Chacha warmjam jan waltʼayasipkäta ukhajj inas familiampi Bibliat yatjjatañajj chʼamakïchispa. Jumanakatï ukhaman uñjasipjjsta ukhajj ¿janit kunatï panimar gustapktam uka toqet mä jukʼaksa yatjjatañ qalltapkasma? Ukaw chacha warmjam jukʼamp sum apasipjjañamatakisa, Jehová Diosar juntuk adorañ munapjjañamatakis yanaptʼapjjeristam. w23.05 pág. 22 párrs. 7, 8

¿Kunjamsa Diosar ajjsartʼañajj Abdías chachar yanaptʼäna? Mä toqetjja, honrado confiykaña jaqëñatakiw yanaptʼäna. Ukhamätapatjja, reyejj palaciopat encargasiñapatakiw uttʼayäna (Nehemías 7:2 liytʼarakïta). Maysa toqetjja, jan ajjsarirïñatakiw yanaptʼäna. ¿Kunatsa jan ajjsarirïñapäna? Kuna laykutejj jan walinak lurir Acab reyejj apnaqkäna uka tiemponwa jupajj jakäna (1 Rey. 16:30). Ukhamarus Acab reyejj Baal diosar adorir Jezabel warmimp casaratänwa. Uka warmejj walpun Jehová Diosar uñisïna, Israel markan Jehová Diosaruk adoraskäna uk qʼal chhaqtayañ munäna, mä arunjja alay toqenkir reino chhaqtayañwa munäna. Cheqpach Diosan profetanakapat waljaniruw jiwarayarakïna (1 Rey. 18:4). ¿Kunjamsa Abdiasajj jan ajjsarirïtap uñachtʼayäna? Jezabel warmejj Jehová Diosan profetanakapar jiwarayañatak arknaqañ qalltkäna ukhajja, jupajj uka profetanakat patakaniruw qollu pʼiyanakar imantäna, “50 profetanakarojj mä qollu pʼiyaru, 50 profetanakarusti yaqha qollu pʼiyaruraki”, jupaw ‘tʼantʼsa umsa jupanakar churarakïna’ (1 Rey. 18:13, 14). Jezabelatï uk luratap yatispäna ukhajja, jan ajjsarir uka Abdías chachajj jiwayatäspänwa. Kunjamtï jiwasajj jiwañ jan munktanjja, ukhamarakiw jupajj jan jiwañ munkänti. Ukampis pachpa jakañ vidapar munasiñat sipansa, Jehová Diosampiru servirinakapampiruw jukʼamp munasïna. w23.06 págs. 15, 16 párrs. 9, 10

Jichha tiemponjja, nayra tiemponakanjamaw Jehová Diosajj Biblia toqe ukhamarak congregación pʼeqtʼki uka Yoqap toqe markapar irpaski. ¿Jaqenak toqe markapar irpaskakitap uñachtʼayañatakejj pruebanakajj utjiti? Jïsa utjiwa. Kunas 1870 mara qhepat pasäna uk amuytʼañäni. Charles Russell jilatampi yanapirinakapampejja, 1914 marajj Diosan Reinopatakejj wali importantewa sasaw amuyapjjäna (Dan. 4:25, 26). Biblian profecianakap yatjjatasaw ukham amuyapjjäna. Cheqas Jehová Diosaw ukham yatjjatapjjañapatakejj irpaskäna. Kunatï 1914 maran paskäna ukajja, Diosan Reinopajj apnaqañ qalltjjatapwa uñachtʼayäna, uka maraw Primera Guerra Mundialajj qalltäna, jan wali usunakasa, terremotonakasa, manqʼat pistʼañanakas utjarakïnwa (Luc. 21:10, 11). Kunjamsa Jehová Diosajj uka suma chuyman chachanak toqejj markapar yanaptʼaskäna ukajj qhanaw amuyasïna. w24.02 pág. 22 párr. 11

Jehová Diosajj wal munasistu, kunatï walïki ukwa jiwasatak munaraki, taqe servirinakapaw uk yattanjja (Rom. 8:35-39). Biblian wiñay yatichäwinakaparjam sarnaqañajj yanaptʼapunistuwa, janiw ukat payachasktanti (Is. 48:17, 18). Ukampis mä akatjamat jan walin uñjaskañäni ukhajj ¿kamachañänisa? Inas mä familiarasajj kun lurasasa jan ukajj kun arsusas chuym pʼakintchistu. Inas usutätas laykojj nayrjam Jehová Diosar jan serviñ puedjjstanti. Inas desastres naturales ukanakan utjatap laykojj wal tʼaqesiskstan. Jan ukajj inas Diosar servitasat arknaqapjjchistu. Uka jan walinakan uñjasisajja, inas akham jisktʼassna: “¿Kunatsa ukanakajj nayar pasitu? ¿Mä jan walti lurpachätjja? ¿Jehová Diosajj janit bendisjjpachïtu?” sasa. Jumatï ukham amuyirïsta ukhajj jan desanimasimti. Jehová Diosat jan jitheqtir servirinakapat waljaniw ukham amuyapjjarakïna (Sal. 22:1, 2; Hab. 1:2, 3). w23.04 pág. 14 párrs. 1, 2

Mä jan wal lurañatak yantʼat uñjastan ukhajja, jankʼakiw kunatï Jehová Diosamp sum apasitas aptʼasiykistaspa uka amuyunaksa luräwinaksa maysar apanuktanjja. Jehová Diosajj ‘taqe chuym istʼasirïñaswa’ muni (Rom. 6:17). Mandamientonakapasa leyinakapas jiwasan askisatakiwa, janiw jiwasajj ukanak mayjtʼayksnati (Is. 48:17, 18; 1 Cor. 6:9, 10). Kuntï lurañ amtktan uk jan lurañasatakejja, Supayajj cuerposampiru chuymasampiruw jan waltʼayi. Jupajj manqʼantañwa munistu, mä arunjja Jehová Diosamp sum apasktan uk tukjañwa muni (1 Ped. 5:8). Nayrïr patak maranakan jakir cristianonakarojja, Diosan leyinakap toqet saytʼasipjjatapat amenazapjjänwa, nuwjapjjänwa, jiwayapjjarakïnwa (Hech. 5:27, 28, 40; 7:54-60). Jichhürunakanjja, ukhamarakiw Supayajj arknaqestu. Rusia markankiri ukhamarak yaqha lugaranakankir jilat kullakanakarojj wal tʼaqesiyapjje. Cheqas jilat kullakanakasajj waljaniw kunayman jan walinakan uñjasipjje. Supayajj janiw arknaqasakejj aynachtʼayañ munkistuti, jan ukasti ‘engañjir trampanakaparuw’ jaltʼayañ munarakistu (Efes. 6:11). w23.07 págs. 15, 16 párrs. 6-9

Diosan Arupat yatjjatkasajja, Jehová Diosar munasitamajj jukʼampiw jiljjattani. Uka munasiñaw yateqkäta ukarjam lurañatak chʼamañchtʼätamjja. Biblian wiñay yatichäwinakapamp yanaptʼayasisaw jukʼamp suma amtanakar purïta. Diosar kusisiyañatakisti jan wali amuyunakamsa luratanakamsa apanukjjätawa. Kunjamtï mä wawajj tatapat yateqaskejja, ukhamarakiw jumajj wali munasiri alajjpachankir Awkimat yateqasiñ qalltäta (Efes. 5:1, 2). Ukatwa taqenis akham sasin jisktʼasiñasa: “¿Bautisaskta uka tiempot sipans jukʼampit jichhajj Jehová Diosar munastjja? ¿Jehová Diosjamat amuytjja, luraraktjja, jukʼampis kunanaktï nayajj jilat kullakanakar munasiñ uñachtʼayañatak lurkta ukanti ukajj uñjasi?” sasa. Janitï nayrjam munasirëjjstan ukhajj jan aynachtʼañäniti. Nayrïr cristianonakarojj ukajj pasarakïnwa. Ukampis Jesusajj janiw jupanakar apanukkänti, jiwasarojj janirakiw apanukkistaniti (Apoc. 2:4, 7). Biblian cheqa yatichäwinakap yateqkayätan ukhajj munasiñasajj jiltänwa, ukhamarakiw jichhajj jiltaysna, Jesusajj uk yatiwa. w23.07 pág. 8 párrs. 2, 3

Apóstol Pedrojj walja kutiw pantjasïna. Nayraqatjja, jupa pachpar wal confiyasitapat akham sasaw Jesusar säna: ‘Mayni apostolonakajj jumar jaytjapkchïtamsa, janiw nayajj jaytjkämati’ sasa (Mar. 14:27-29). Getsemaní jardinan walja kutirakiw ikimp atipjayasïna (Mar. 14:32, 37-41). Jesusar katuntapjjäna ukhajj jupar jaytanukuwayjjänwa (Mar. 14:50). Ukatjja kims kutiw Jesusar jan uñtʼir tuküna, juramentompiw uk arsurakïna (Mar. 14:66-71). Jachʼa juchar purtʼasitap amuyasïna ukhajj ¿kunjamsa Pedrojj jikjjatasïna? Juchar purtʼasitapat qʼala aynachtʼataw jikjjatasïna, wal jacharakïna (Mar. 14:72). Ukampis Jesusajj kuna jan waltï lurkäna uk ajanupar sañat sipansa, wali importante luräwinakwa katoqäta sasaw Pedro amigopar säna (Juan 21:15-17). Pedrojj mä jachʼa juchar purtʼasitap yatkchïnsa janiw aynachtʼkänti, kuna laykutejj janiw akat pächaskänti: Jesusajj janiw jupar apanukkänti. ¿Kunsa ukat yateqsna? Jehová Diosajj jiwasar munasitapatsa jiwasar perdonañatak jankʼakïtapats jan pächasiñaswa munaraki (Rom. 8:38, 39). w24.03 págs. 18, 19 párrs. 13-15

Qʼañu juchan sarnaqerinakajj inas phenqʼasipjjchispa, jupanak pachpas jan munasjjapjjchispati, jan munkasaw wawanïpjjaspa jan ukajj familiapaw tukusispa. Cheqas ‘jan amuytʼasir warmin’ invitacionaparojj janiw istʼañasäkiti, ukhamatwa yatiñanïtas uñachtʼayañäni. Qʼañu juchar purtʼasirinakat waljanejja, janiw Jehová Diosamp sum apasiñak aptʼasipkiti, jan ukasti jiwañar apir jan wali usunakampiw apjjatasipjjaraki (Prov. 7:23). Proverbios capítulo 9 tuktʼayañatakejja, akham sasaw versículo 18 ukan qhanañchi: “Invitadonakapas Sepultura manqhanakankiwa” sasa. Ukhamajj niyakejjay uka invitacionajj ukham jan walir puriychejja, ¿kunatsa uka invitacionar walja jaqenakajj istʼapjjpacha? (Prov. 9:13-18). Taqe cheqan utjiri yaqha yantʼajj pornografiawa. Yaqhepatakejj uk uñchʼukiñajj janiw kuna jan walïkisa, ukampis ukajj janiw cheqäkiti. Pornografiajj mayni pachparuw jan waltʼayi, mayni pachpar respetasiñsa yaqhanakar respetañsa chhaqtayiwa, jaytañajj wali chʼamarakiwa. Kuna qʼañunaktï uñjksna ukajja, amuyusat janiw fácil chhaqtkaspati. Pornografiajj janiw jan walinak lurañ munañ chhaqtaykaniti, antisaw ukanak jukʼamp utjayaspa (Col. 3:5; Sant. 1:14, 15). Cheqas pornografía uñchʼukirinakat waljaniw qʼañu jucha lurañar purtʼasipjje. w23.06 pág. 23 párrs. 10, 11

Inas awisajj yaqha markanakajj Reino Unido ukat Estados Unidos mayachtʼat potencia mundial contrajj saytʼasipjjchini, ukampis janiw uka potencia mundial lantejj uttʼasipkaniti. ¿Kunatsa ukham sistanjja? Daniel libron profeciaparjamajja, Diosan Reinopamp saski uka ‘qalaw’ uka jachʼa estatuan kayunakaparojj jiskʼa jiskʼa tʼunjani (Dan. 2:34, 35, 44, 45). ¿Daniel profetajj jachʼa estatuan kayunakapat qhanañchkäna ukajj cheqäskapuniwa sistati? Cheqätap amuysta ukhajja, jakäwimanwa ukajj qhan uñjasini. Aka mundojj niyaw tukjatäjjani, uk yatisajj janiw walja qollqe jikjjatañatakisa ni walja yänak jikjjatañatakis chʼamachaskätati (Luc. 12:16-21; 1 Juan 2:15-17). Ukhamarus uka profeciat sum amuyañajja, predicañsa Bibliat yatichañsa nayrar uchañatakiw yanaptʼätam (Mat. 6:33; 28:18-20). Niyakejjay uka profeciat yatjjatawaystanjja, akham jisktʼasiñasawa: “¿Kunanaktï nayajj amtkta ukanakajj niyas Diosan Reinopajj taqe gobiernonakar tukjañampïkaspa ukhamti uñachtʼayi?” sasa. w23.08 pág. 11 párrs. 13, 14

Inas edadanëjjatamatsa, jan kʼumaräjjatamatsa, kunayman jan walinakan uñjasitamats kunanaktï jichhajj luraskta ukanak jan lurirjamäjjstati, humilde chuymanïñaw uk reconosiñamatak yanaptʼätam. Barzilái chachat yateqasim, jumatï jan kʼumarätamat yaqhep luräwinak jan phoqerjamäksta ukhajja, jan uka luräwinak katoqasimti (2 Sam. 19:35, 36). Jan ukajj Moisesat yateqasisajj mayninakamp yanaptʼayasim, wakischi ukhajj kunanaktï lurañamäki ukanak yaqhanakar churam (Éx. 18:21, 22). Jumatï humilde chuymanïyäta ukhajja, kunanaktï lurirjamäkta ukanakakwa luräta. Mayninakan jan wal amtapjjatapatsa, janirakiw jiwasajj juchañchasiñasäkiti. Janiw mayninak lantejj amtksnati, janirakiw jan wal amtapjjatapat jan walinakan uñjasipki ukanakat jarkʼaqksnati. Inas mä wawajj Jehová Diosar jaytjjañ amtchi, ukajj awk taykapatakejj wali jachʼa llakïspawa. Ukampis wawapan jan wali amtar puritapat juchañchasipki uka awk taykanakajja, mä jathi qʼepimpiw apjjatasipjje, Jehová Diosajj janiw uka jathi qʼepi apapjjañap munkiti. w23.08 pág. 29 párrs. 11, 12

Sansonajj jiwasjam pantjasirirakïnwa, ukatwa awisanakajj jan wali amtanakar purïna. Mä kutejja, kuntï Jehová Diosajj luram siskäna ukarjam jan luratapat sinti jan walinakanwa uñjasïna. Mä qhawqha tiempo juezat serviskäna ukhajja, “Sorec sat vallenkir Dalila sutini warmitwa wal enamorasïna”. Dalilar janïr uñtʼkasinjja, mä filistea warmimpiw casarasiñ munäna. Ukampis uka filistea warmimp casarasiñ munatapajj “Jehová Diosatwa jutäna [...] Diosajj filisteonak contra nuwasiñ thaqaskäna” sasaw Bibliajj qhanañchi. Yaqha horasanjja Sansonajj filisteonakan Gaza markapar sarasajj mä prostituta warmin utapanwa quedasïna. Jehová Diosasti Sansonarojj uka markan punkup apasiñapatakiw chʼam churäna, ukhamat markan jarkʼaqasiñap aynachtʼayañataki (Juec. 14:1-4; 16:1-3). Ukampis Dalilampejj janiw ukhamäkänti. Inas jupajj israelitächïna, ukhamajj Dalilamp casarasiñajj janiw Sansonarojj filisteonak contra nuwasiñatakejj yanaptʼkaspänti. Dalilajj Sansonar aljantañatakejj walja qollqwa filisteonakat katoqasïna. w23.09 pág. 5 párrs. 12, 13

Amuytʼasirïñajj llampʼu chuymanïñatakiw yanaptʼistaspa. Biblian yatichäwinakapar creyitapat maynejj jiskhintki ukhajja, amuytʼasir jaqejj controlasiñ yatiwa. Niya jilapartejja, jaqenakajj jisktʼapkistu ukhajj kunatsa ukham jisktʼapjjestu uk janiw sapkistuti. Ukhamätapatjja, janïr jayskasajj kunatsa maynejj ukham jisktʼistu uk jan yatitas amtañasawa (Prov. 16:23). Gedeón chachat amuytʼañäni. Mä kutejja, Efraín tribunkirinakajj wali colerataw jupar toqentapjjäna, jupanakajj Israel markan enemigonakap contra nuwasir sarañatak jan invitatäpjjatapatwa colerasipjjäna. Ukampis ¿kunatsa jupanakajj cheqpachans coleratäsipkäna? ¿Jiskʼachatjam amuyasisat colerasipjjpachäna? Ukhamächïnsa janisa, Gedeonajj wali amuytʼirïnwa, kunjamas chuymanakapan jikjjatasipjjäna uk respetänwa, llampʼu chuymampiw jaysarakïna. ¿Ukhamätapat kunas jikjjatasïna? “Jupanakajj colerap apjtayasipjjänwa” (Juec. 8:1-3). w23.09 pág. 16 párrs. 8, 9

Jehová Diosampi Yoqapampejj wali sumpun apasipjje. Ukhamajj kunjamsa Yoqapar jan walinak lurapjjäna, jiskʼachapjjäna, wal tʼaqesiyapjjarakïna uk uñjasajj walpun Jehová Diosajj chuym usuyaspachäna. Mä wawan jiwatapajj kunja llakkañasa ukjja, khitinakantï mä wawajj jiwki ukanakaw sum amuyapjjaspa. Jiwatat jaktañar wals confiystanjja, janiw ukajj wali munat amigosana wali munat familiarasan jiwatapat wal llakisktan uk chhaqtaykiti. Ukajja, 33 maran munat Yoqapajj tʼaqeskäna, jiwarakïna uk uñjasajj kunjamsa Jehová Diosajj jikjjataspachäna uk amuytʼañatakiw yanaptʼistu (Mat. 3:17). Jesusan jiwatapajj amtaskani uka urun puriniñapkamajj ¿janit Jesusajj juchampit jiwañampit kutsuykistu uka toqet jukʼamp yatjjatañatak tiempo apstʼaskasma? Jesusan jiwatap amtañ urutak wakichatäki uka video uñtañs janirak armasimti. Jiwasatï uka tantachäwitak chuymas wakichtʼañäni ukhajja, mayninakarojj Jesusan jiwatap amtaskani uka tantachäwit beneficiasipjjañapatakiw yanaptʼañäni (Esd. 7:10). w24.01 pág. 11 párrs. 10-12

Jehová Diosat chʼam katoqañatakejj orasiñasawa. Jehová Diosajj “jaqen chʼamapat jilankki uka chʼama” churasaw jaysistu (2 Cor. 4:7). Ukatsti Arupat liytʼañasa liytʼktan ukjjat lupʼiñas wali wakiskiriwa (Sal. 86:11). Kuntï Biblian siskistu ukajj “wali chʼamanirakiwa” (Heb. 4:12). Ukhamajj Jehová Diosar orasïta Arup liytʼarakïta ukhajja, aguantañatakisa, kusisit serviskakiñatakisa, jan phoqañjam luräwimp phoqañatakis chʼamwa katoqäta. Kunjamsa Jehová Diosajj Jonás profetar chʼamañchäna uk yatjjatañäni. Jonasajja, Jehová Diosajj mä luräw churkäna ukhajj wal ajjsarayasisajj mä barcotwa yaqha toqer escapjjäna. Ukham luratapatjja, jupasa barconkir yaqha jaqenakas mä jachʼa thayan utjatapat niyapuniw jiwapjjäna. Barco apnaqerinakajj lamar qotar jaqontapjjäna ukhajja, mä jachʼa chawllan purakapanwa uñstäna, ukan wali chʼamakänwa, wali ajjsarkañarakïnwa. ¿Kunsa Jonasajj jachʼa chawllan purakapankkäna ukhajj chʼam katoqañatak luräna? Sapak jikjjatasisajj Jehová Diosaruw ukan orasïna (Jon. 2:1, 2, 7). w23.10 pág. 13 párrs. 4-6

Apóstol Pedrojj nayrïr patak maranakan jakir cristianonakarus uka cartanak qellqkchïnjja, Jehová Diosan munañapatwa uka cartanakajj Biblianki. Ukhamajj uka cartanakat suma yatichäwinak yateqsna (Rom. 15:4). Jilaparte jaqenakajja, kuntï Bibliajj jutïrit siski ukarojj janiw creyipkiti. Niyakejjay walja maranak akapachan tukusiñapat taqe chuym yatiyaskstanjja, jiwas conträpki uka jaqenakajj inas jiwasat burlasipjjchi, janiw kunapachas aka mundojj tukuskaniti sasin sapjjarakchi (2 Ped. 3:3, 4). Maynitï predicacionansa jan ukajj trabajonkir mä compañerosasa jan ukajj mä familiarasas ukham sistaspa ukhajja, Diosar confiyañan aynachtʼjjsnawa. Kunas jan aynachtʼañatak yanaptʼistaspa uk apóstol Pedrow qhanañchäna. Inas yaqhepanakajj sintjamakiw Jehová Diosajj aka jan wali mundor tukjañatak qheptʼaski sasin amuyapjjchi. Ukampis kuntï Pedrojj siskäna ukajj cheqapar amuyañatakiw yanaptʼistu. Jehová Diosajj janiw kunjamtï jaqenakajj uñjapki ukham tiempor uñjkiti, ukwa Pedrojj amtayistu (2 Ped. 3:8, 9). Diosatakejj waranq maranakajj mä urump sasikiwa. Ukhamarus jupajj pacienciampiw suytʼaski, janiw khitin tukjatäñaps munkiti. Ukampis urupajj purininiwa, aka mundos tukjatarakïniwa. w23.09 págs. 26, 27 párrs. 2-5

¿Kunatsa apóstol Pablojj Judea markan jakir hebreo cristianonakar qellqäna? Inas aka pä importante razonanakat qellqchïna: Maya, jupanakar chʼamañchtʼañataki. Jupanakat jilapartejj judionakan religionaparjam uywatäpjjänwa, uka religionan pʼeqtʼirinakajj inas cristianöjjapjjatap laykojj jupanakat burlasipjjchïna, kuna laykutejj judionakat sipansa, cristianonakajj janiw Diosar adorañatakejj mä templonïpkänti, janiw sacrificionak loqtañatakejj mä altaranïpkänti, ni sacerdotenakanïpkänsa. Inas ukajj Criston discipulonakapar aynachtʼaychispäna, janirakiw Diosarus taqe chuym confiyjjapjjaspänti (Heb. 3:12, 14). Inas jupanakat yaqhepajj judionakan religionapar kuttʼañ amtjjapjjchïna. Paya, Hebreo cristianonakajj janiw ‘waña manqʼar’ uñtasitäki uka machaq yatichäwinaka jan ukajj jan fácil amuykañ yatichäwinak amuyañatakejj chʼamachasipkänti, uk amuyasipjjañapatakiw apóstol Pablojj jupanakar qellqarakïna (Heb. 5:11-14). Amuyatajj jupanakat yaqhepajj Moisesan Leyiparjamaw phoqasipkäna. w23.10 págs. 24, 25 párrs. 3, 4

Yaqhep kullakanakajj solteräskakiñwa amtapjje (Mat. 19:10-12). Jumatï solteräskstajja, Jehová Diosampi Jesusampejj janiw uka laykojj minusäkasmas ukham uñjapktamti. Oraqpachankir congregacionanakan soltera kullakanakajj wali valoranit uñjatäpjjewa. Jupanakajj wali munasirïpjjewa, taqe chuymaw mayninakats llakisipjje, ukatwa waljanejj Diosar serviñan kullakaparjam mamaparjam uñjapjje (Mar. 10:29, 30). Yaqhep kullakanakasti, sapürunjama Jehová Diosar serviñwa amtapjjaraki. Oraqpachan predicacionajj apaski ukanjja, kullakanakaw jilapartejj predicapjje (Sal. 68:11). ¿Janit sapürunjam Diosar serviñ amtkasma? Inas precursorata, construccionana jan ukajj Betelan sirvchisma. ¿Kunas uka amtam phoqañatak yanaptʼiristam? Jehová Diosar orasim, khitinakatï sapürunjam Diosar servisipki ukanakamp parltʼam, kuna mayitanaksa jan ukajj kuna requisitonaksa phoqañama uk yatjjatarakim. Ukatjja kunanaksa uka amtam phoqañatakejj lurasma ukanak qellqtʼasim. Sapürunjam Diosar serviñajj walja toqenakan Jehová Diosar serviñatakiw yanaptʼätam. w23.12 pág. 22 párrs. 16, 17

Jachʼa tʼaqesiñan wali jakʼankatap yattanwa. Ukatwa suma yatiyäwinak jankʼak predicañajj wali importantejja, ukajj Jesusan mä mandatopawa. Ukampis jiwasatï qollqet pistʼata jan ukajj autoridadanakajj predicatas contra saytʼasipjjchi ukhajja, predicañar chuyma uchañajj jiwasatak chʼamakïspawa. ¿Kunas Diosan Reinop nayrar uchañatak yanaptʼistani? “Ejercitonakan Jehová Diosapajja” jiwasampipunïskaniwa sasin confiyañaw yanaptʼistani. Kunanakatï jiwasatak wali wakiskirïki ukanakat sipans Diosan Reinopar wali importantet uñjañäni ukhajja, jupajj yanaptʼistaniwa. Ukhamajj janiw kunarus ajjsarañasäkiti (Ageo 2:4). Jehová Diosajj jaqenakar Jesusan discipulopar tukupjjañapatak yanaptʼaskaksna ukwa muni, uka luräwejj jaqenakan salvasipjjañapatakiw yanaptʼi. Ageo profetajj templo lurañar wasitat kuttʼapjjañapatakiw judionakar chʼamañchtʼäna. Templon cimientonakap wasitat uchapjjam siskaspas ukhamänwa. Jupanakatï istʼasirïpjjaspänjja, Jehová Diosajj bendicionwa churaspäna ukwa Jupajj arsüna (Ageo 2:18, 19). Kuna luräwtï Diosajj churkistu ukatï jiwasatak nayrankanejja, Jehová Diosajj bendisistaniwa, janiw ukat payachasiñasäkiti. w23.11 pág. 16 párr. 8; pág. 17 párr. 11

Romanonakar qellqat cartapanjja, taqeniw juchararätanjja sasaw Pablojj säna. ¿Kunjamsa Diosajj jiwasamp kusisitäspa, cheqapar sarnaqerit uñjarakistaspa? Uka jisktʼar qhanañchtʼañatakejj suma chuyman cristianonakarojj Abrahanatwa Pablojj parläna. Abrahanajj Canaán oraqen jakkäna ukhaw Jehová Diosajj jupar cheqapar sarnaqerit uñjäna. ¿Kunatsa ukham uñjäna? Janiw Moisesan Leyipar jan pantjasis istʼatapat ukham uñjkänti (Rom. 4:13). ¿Kunjamatsa uk yattanjja? Kuna laykutejj 400 jila maranak qhepatwa Israel markajj uka Ley katoqaskäna. Ukhamajj ¿kunatsa Jehová Diosajj Abrahanar cheqapar sarnaqerit uñjäna? Diosajj Abrahanat khuyaptʼayasïnwa, jupar confiyatapatwa cheqapar sarnaqerit uñjäna (Rom. 4:2-4). w23.12 pág. 3 párrs. 4, 5

Natán profetaw uka arunak Davidar säna, ukampis uka pachpa arumaw Jehová Diosajj janiw Davidajj nayatak templo lurkaniti sasin Natán profetarojj yatiyäna (1 Crón. 17:3, 4, 11, 12). ¿Uk yatisajj kunsa Davidajj luräna? Templo lurañatakejj kuna materialanaktï Salomón yoqapajj necesitañapäkäna ukanakwa wakichäna, qollq tantañwa amtarakïna (1 Crón. 29:1-5). Janiw jumajj templo lurkätati sasin yatiykäna ukhajja, Jehová Diosajj mä pacto Davidampejj luräna: jumat jutir wawanakamat maynïriw wiñayatak reyit apnaqani sasaw mä promesa luräna (2 Sam. 7:16). Cristojj Waranqa Maranak Apnaqkani uka machaq mundonjja, Davidajj ukan apnaqer reyejj jupat jutirïtap yatisajj walpun kusisini. ¿Kunsa uka sarnaqäwit yateqsna? Kunanaktï Jehová Diosatak lurañ munktan ukanak janis taqpach lurañ puedkstanjja, Jehová Diosajj jan suyktan uka bendicionanakwa churistaspa. w23.04 págs. 15, 16 párrs. 8-10

Jan walin uñjasktan ukhajj Bibliankir yaqhep cheqanakaw wal chʼamañchtʼistaspa, ukatakejj Job, Salmos, Proverbios libronakwa liytʼsna, Mateo capítulo 6 ukan Jesusan arunakapwa liytʼaraksna. Jumatï Jehová Diosar orasïta, Arups liytʼarakïta ukhajja, kunjamsa chuymachtʼtam ukwa amuyäta. Ak amtapjjapuniñäni, jakäwisan sinti jan walinakansa uñjaskchiñänejja, Jehová Diosajj yanaptʼapunistaniwa. Janipuniw sapak jaytjkistaniti (Sal. 23:4). Jupajj jiwasar jarkʼaqaña, suma saytʼatäskakiñatak yanaptʼaña, chuymachtʼañwa arsuwayi. Isaiasajj akham sasaw Jehová Diosar säna: “Jumar taqe chuyma confiyapki ukanakarojj jarkʼaqätawa, sumankañjja jupanakarojj churapunïtawa, kuna laykutejj jumaruw confiyasipjjtamjja” sasa (Is. 26:3). Ukhamajj Jehová Diosar confiyam, yanaptʼapsa katoqasirakim. Ukhamtï lurätajja, sinti jan waltʼäwinakan uñjaskasas aguantañatakejj chʼamanïskakïtawa. w24.01 pág. 25 párrs. 16, 17

Uka arunakajj jichhürunakanwa phoqasiski. “Taqe wawanakamajj Jehová Diosampi yatichatäpjjaniwa, wawanakaman sumankañapajj waljapunïniwa. Kunanakatï cheqapäki ukanak luratam laykojja jumajj suma uttʼayatäyätawa. [...] Janiw kunarus ajjsarkätati, janirakiw kunats wal ajjsarayaskätati, kuna laykutejj janiw ukajj jumar jakʼachaskaniti” siski uka arunakajj ukhamarakiw phoqasiski (Is. 54:13, 14). Jehová Diosan markapajj jaqenakar Diosat yatichaski uk janiw ‘akapachan diosapäki’ uka Supayas jarkʼkaspati (2 Cor. 4:4). Jehová Dios saparukiw wasitat adorasjje. ¡Janipuniw ukajj qʼañuchatäjjaniti! Janiw kuna armas jiwas contrajj sirvkaniti. w24.02 pág. 4 párr. 10

Jehová Diosar jakañ vidas katuyastan ukhajj kuntï arsuwayktan uk phoqañatakiw cristianonakajj chʼamachasiñasa. Ukajj kuna amtanakarus purtan, familiaranakasar kunjamsa uñjtan ukanwa qhan amuyasi. Familiasar sum uñjañatakejj wal chʼamachastanjja, ukampis janiw familiasan munañap Jehová Diosan munañapat sipans nayrar uchktanti (Mat. 10:35, 36; 1 Tim. 5:8). Awisajja, inas familiasar jan gustki uka amtanakar purchiñäni, ukampis uka amtanakasajj Jehová Diosaruw kusisiyaspa. Niyakejjay jupajj familia uttʼayirïchejja, familianakan kusisitäpjjañapwa muni (Efes. 3:14, 15). Jiwasatï cheqapun kusisitäñ munstan ukhajja, kunjamtï Jehová Diosajj siski ukarjamaw taqe kuns lurañasa. Familiasar cuidkasasa, munasiñampi respetompi uñjkasas kuna sacrificionaktï jupar serviñatak lurktan uk Jehová Diosajj uñjiwa, wali valoranit uñjaraki (Rom. 12:10). w24.02 pág. 17 párr. 11; pág. 18 párr. 13