Septiembre

Jaqenakan taqe llakinakap chhaqtayañatakiw Diosajj Jesusar chʼam churi. Yaqhep jan waltʼäwinak janiw jiwasajj kunjamatsa askichañ puedksnati. Ukampis Jesusajj milagronak lurasaw uk askichañ pueditap uñachtʼayäna. Kunanakatï jaqenakar llakisiyki taqe ukanak chhaqtayañatakejj chʼamaniwa, juch katoqawayktan uksa, juch utjipan jan walinakajj utjki uksa jupajj chhaqtayaniwa, usuntañasa jiwañasa uka taypinkiwa (Mat. 9:1-6; Rom. 5:12, 18, 19). Milagronakapajja, “kunayman usuni jaqenakar” qollirïtapa, jiwatanakar jaktayañatak chʼamanïtapwa uñachtʼayi (Mat. 4:23; Juan 11:43, 44). Jachʼa thayanak tʼakurayañatakisa demonionakar atipjañatakis chʼamanirakiwa (Mar. 4:37-39; Luc. 8:2). Jehová Diosajj Yoqapar chʼam churatap yatiñajj ¿waljjay kusisiyistojja? Diosan Reinopajj apankani uka bendicionanakajj cheqpachapuniw phoqasini. Cheqansa, Jesusajj jaqëkasin aka oraqen milagronak lurkäna ukajja, kunanaktï alajjpachankir Reyjamajj Diosan Reinopan lurkani ukanakan mä uñachtʼäwipakïnwa. w23.04 pág. 3 párrs. 5-7

Congregacionamantï walja publicadoranakajj utjchi ukhajja, inas arstʼañatak ampar loqtañat sipans aleq istʼjjañakiw jukʼamp walïspa sasin amuysta. Ukampis jan aynachtʼamti. Antisas walja comentarionak wakichtʼasim. Ukhamtï luräta ukhajja, nayrïr parrafonakan jan comentario churapkätam ukhajj mayni parrafonakanwa comentasma. Yatiyañataki revistat wakichtʼaskäta ukhajja, sapa parrafojj kunjamsa uka yatichäwin pʼeqeñchäwipampejj mayachtʼasi uk amuytʼam. Ukhamatwa kun arjjattʼañatakis wakichtʼatäyäta. Maysa toqetjja, Biblian jan fácil amuykañ yatichäwinakapat parlki uka parrafonakan arstʼañatakiw wakichtʼasisma. Niyakejjay uka toqenakat qhanañchtʼañajj chʼamächejja, jilapartejj uka parrafonakan jukʼanikiw ampar loqtapjje. Ukampis jumatï tantachäwinakan janipun arstʼañ puedsta ukhajj ¿kunsa lurasma? Yatiyañataki revista sarayir jilataruw kawkïr jisktʼarus qhanañchañ munasma uk yatiyasma. w23.04 págs. 21, 22 párrs. 9, 10

Joseajj jan payachasisaw kuntï Jehová Diosajj siskäna ukar istʼäna, ukaw suma esposöñatakejj yanaptʼäna. Diosajj mä kimsa kutiw Josearojj familiapatak instruccionanak churäna. Janis faciläkchïnjja, jankʼakiw ukanak phoqäna (Mat. 1:20; 2:13-15, 19-21). Jehová Diosar istʼatapatwa Joseajj Mariar jarkʼaqäna, cuidarakïna. Cheqas ukaw Mariarojj Josear jukʼamp munasiñatakisa jukʼamp respetañatakis yanaptʼpachäna. Casarat jilatanaka, jumanakajj Joseyjamäpjjarakismawa, familiamar cuidañatakejj Biblian ewjjtʼanakapwa thaqapjjañama. Biblian ewjjtʼanakaparjam lurañatakejj mä qhawqhanak cambiañas wakiskchejja, ukarjam lurasajj esposanakamar munasipjjatamwa uñachtʼayapjjtajja. Nayrat sipans jukʼamp sum apasipjjarakïta. 20 jila maranak casarat Vanuatu kullakajj akham siwa: “Esposojajj Jehová Diosan yanaptʼap thaqki, ukarjam lurkaraki ukhajja, jukʼampiw jupar respetta. Jan kunar ajjsarañataki, kunanaktï jupajj amtki ukar confiyañatakiw yanaptʼitu” sasa. w23.05 pág. 21 párr. 5

Babiloniat Israel markar kuttʼanipkäna uka judionakajja, ‘Jehová Diosapatakejj sagrado markäpjjañapänwa’ (Deut. 7:6). ¿Uka arunakajj taqe kuns sumsa lurapkaspa ukhamti sañ munäna? Janiwa. Jehová Diosar kusisiyañatakejj cambionakwa jakäwinakapan lurapjjañapäna. Jilaparte judionakajj Babilonianwa nasipjjäna, amuyatajj babilonionakjamaw amuyjjapjjäna, sarnaqjjapjjarakïna. Nayrïr gruponkir judionakat Israel markar kuttʼapkäna ukhat walja maranak qhepatjja, Nehemías gobernadorajj judionakan wawanakapajj hebreo aru parlañ jan yatipjjatapat walpun musparäna (Deut. 6:6, 7; Neh. 13:23, 24). Niyakejjay Diosan Arupajj jilapartejj hebreo arut qellqatächïnjja, ¿kunjamarak uka wawanakajj Jehová Diosar munasiñsa adorañsa yateqapjjaspänsti? (Esd. 10:3, 44). Ukhamajj uka judionakajj walja cambionakwa lurapjjañapäna, ukampis Israel markan jakkasaw uka cambionak lurañajj jukʼamp faciläspäna, kuna laykutejj ukanwa Jehová Dios saparuk adorañajj wasitat qalltaskäna (Neh. 8:8, 9). w23.05 pág. 15 párrs. 6, 7

Taqe chuymas amtanakas phoqañ munkchiñänejja, mä kun utjipan janiw amtas phoqañ puedjjsnati. Inas “akatjamat jan waltʼäwinakan” uñjassna, ukhamïpansti amtanakas phoqañatakejj janiw tiempojj utj-jjestaspati (Ecl. 9:11). Inas mä jan waltʼäwin uñjasiraksna, ukaw aynachtʼayistaspa, jan chʼamaniw uñjasiraksna (Prov. 24:10). Pantjasirïtas laykojja, mä kunan pantjasisajj janiw amtanakas phoqañ puedjjsnati (Rom. 7:23). Jan ukajj inas qaritjam amuyasjjarakstan (Mat. 26:43). ¿Kunas nayrar sartaskakiñatakisa jan ukajj jan walinak atipjañatakis yanaptʼistaspa? Jan walin uñjasisajj amtanakas phoqañatakejj chʼamachasiskakiñasawa. Kunjamtï Bibliajj siskejja, inas walja jan walinakan uñjaschiñäni, ukampis nayrar sarantasipkakiñasawa, kuntï amtktan uksa phoqaskakiñasawa. Jan waltʼäwinakan uñjaskasas nayrar sarantaskaktan ukhajja, Jehová Diosar kusisiyañ munataswa uñachtʼaytanjja. Jupajj amtanakas phoqañatak chʼamachasir uñjasajj wal kusispacha, ¿uk amuyasmati? w23.05 pág. 30 párrs. 14, 15

Precursoräñajj kunayman jaqenakar yanaptʼañataki, qollq sum apnaqañatakiw yanaptʼätam (Filip. 4:11-13). Precursor auxiliarat serviñ qalltañaw precursor regularat serviñatak waljanir yanaptʼawayi. Ukarakiw yaqha toqenakat Jehová Diosar serviñatak yanaptʼiristam, inas siervo de construcción ukham sirvchisma jan ukajj betelitächisma. Taqe jilatanakaw congregacionan ancianot serviñatakejj mayitanakampi jan ukajj requisitonakamp phoqañatakejj chʼamachasipjjañapa. Jilat kullakanakapar ukham serviñ amtir jilatanakajja, Bibliarjamajj ‘mä suma luräwi katoqañ’ munapjjatapwa uñachtʼayapjje (1 Tim. 3:1). Ukatakejja, siervo ministerialat serviñaw nayraqat wakisi. Siervo ministerialanakajj walja toqenakatwa ancianonakar yanaptʼapjje. Ancianonakasa siervo ministerialanakas humilde chuymampiw jilat kullakanakapar yanaptʼapjje, taqe chuymarakiw predicapjje. w23.12 pág. 28 párrs. 14-16

Josías reyejj waynitüskäna ukhatpachaw Jehová Diosar jakʼachasïna. Diosapar jukʼamp uñtʼañsa munañap lurañs wal munarakïna. Ukampis Josiasatakejj janiw reyïñajj faciläkänti; uka tiemponjja jilaparte jaqenakajj falso diosanakaruw adorapjjäna. Ukhamajj cheqpach religionar arjjatañatakejj jan ajjsartʼirïñapänwa. ¡Cheqas jan ajjsartʼirïtapwa jupajj uñachtʼayäna! Janïraw 20 maranïkänsa ukhaw kunanakatï falso diosanakar adorañatakïkäna taqe ukanak chhaqtayäna (2 Crón. 34:1, 2). Jumajj wali waynitükasas Josiasjamarakïsmawa. Ukatakejj Jehová Diosaruw jakʼachasiñama, jupajj kunjam chuymanisa uk jukʼampiw yatjjataskakiñama. Ukham lurañajja, jupar katuyasiñamatakiw chʼamañchätam. ¿Kunjamsa Jehová Diosar jakäwim katuyasitamajj jakäwiman yanaptʼätam? 14 maranïkasin bautisasiri Luke jilatajj akham siwa: “Jichhat uksarojj Jehová Diosar serviñaw nayatakejj nayrankani, jupar kusisiyañatakiw chʼamachasirakëjja” sasa (Mar. 12:30). Jumatï ukham lurätajja, walja bendicionanakwa katoqäta. w23.09 pág. 11 párrs. 12, 13

Apóstol Pablojj Tesalónica congregacionar carta qellqkäna ukhajja, congregacionjam uttʼayaskäna ukhat janiw ni mä maras paskänti. Inas ukankir ancianonakajj jukʼa experiencianïpjjatapat pantjasipjjchïna, ukampis jilat kullakanakajj jupanakar respetapjjañapänwa. Jachʼa tʼaqesiñ tiempo jakʼachasinkipanjja, inas congregacionankir ancianonakan yanaptʼap jukʼamp thaqchiñäni, kuna laykutejj inas central mundialana ukhamarak sucursalan yanaptʼap jan katoqjjchiñäniti. Ukatwa ancianonakar munasiñsa respetañsa yateqañasa, jichhaw uk lurañajj wali importantejja. Kunas kunäskpan wali amuyump sarnaqasipkakiñäni, ancianonakan pantjasitanakap jan uñchʼukiñäniti. Antisas ak amtapjjañäni, Jehová Diosaw jupat jan jitheqtiri ancianonakarojj Cristo toqejj irpaski. Kunjamtï cascojj soldadon pʼeqep jarkʼaqkejja, ukhamarakiw salvación suytʼañajj amuyunakas jarkʼaqestu. Jiwasatakejja, kuntï aka mundojj churañ munkistu ukanakajj jan kunatak serviriwa (Filip. 3:8). Chuymasankki uka suytʼäwisajj sumak jikjjatasiñataki jan aynachtʼañatakiw yanaptʼarakistu. w23.06 págs. 11, 12 párrs. 11, 12

‘Jan amuytʼasir warmin’ arup istʼirinakajja, utapar jawski uka invitacionar istʼapjjaniti janicha uka amtar puripjjañapawa. Qʼañu juchar jan purtʼasiñatakejj walja wakiskir razonanakaw utji. Proverbios libronjja, ‘jan amuytʼasir warmejj’ akham siwa: “Lunthatat umanakajj mojjsawa” sasa (Prov. 9:17). ¿Uka “lunthatat umanakajj” kunamp sasisa? Casarat mä chacha warmejj ikthapki ukajj mojjsa um umtʼañamp saskaspas ukhamwa Biblian qhanañchi (Prov. 5:15-18). Leyinakarjam casarat mä chacha warmejj ikthapki ukajj walikïskiwa. Ukampis ‘lunthatat umanakampejj’ janiw pachpäkiti. Ukanakajj Diosan leyinakap pʼakintir qʼañu jucha lurañanakamp sasispawa. Jilapartejja, qʼañu jucha luririnakajj lunthatanakjamaw qʼañu juchanak jamasan lurapjje. Jamasans jan walinak lurapkaspa ukham amuyirinakatakejja, uka “lunthatat umanakajj” wali mojjsäspawa. Ukampis ukham amuyasajj mayni pachpaw engañjasi. Jehová Diosajj taqe kunwa uñji, janiw khitis juparojj engañjkaspati. Diosamp suma uñjatäñ aptʼasiñajj janipuniw akchʼas walïkiti, janiw ukajj kuna mojjsäkisa (1 Cor. 6:9, 10). w23.06 pág. 22 párrs. 7-9

¿Janis taqe chuym orasjjasma ukhamti amuyasta? Jan ukajj ¿janis predicacionansa nayrjam disfrutjjasma ukhamti amuyasta? Jumatï ukhaman uñjassta ukhajja, janis Jehová Diosajj espíritu santop churjjeristam ukham janiw amuyañamäkiti. Pantjasir jaqenakjamajj ukhamanakan uñjasiñajj utjaspawa. Jumatï jan nayrjam kusisitäjjsta ukhajja, apóstol Pablotwa lupʼisma. Jupajj Jesusat yateqasiñatak chʼamachaskchïnsa, awisanakajj janiw kunatï cheqapäki uk taqe chuyma lurañatakejj chʼamapajj utj-jjänti, uk jupajj sum amuyasïna. Awisanakajj jan chʼamanjamas amuyaskchïnjja, apóstol Pablojj Diosar serviskakiñwa amtäna. Kunanak lurañs amtäta ukhajja, janiw kunjamtï chuymaman jikjjataskta ukampejj apayasiñamäkiti. Jan ukasti jan lurañ munkäta ukhas kunatï walïki uk lurañ amtam. Tiempompejj luratanakamajj sum jikjjatasiñatakiw yanaptʼätam (1 Cor. 9:16). w24.03 págs. 11, 12 párrs. 12, 13

Jiwasajj jilat kullakanakar sum katoqtʼasa ukat amigonakas taypir katoqtʼasaw munasitas uñachtʼaysna (2 Cor. 6:11-13). Congregacionanakan kunayman chuymani kunaymanin jilsur walja jilat kullakanakaw utji. ¿Kunas taqenir jukʼamp munasiñatak yanaptʼistani? Kunja suma chuymanïpjjesa uk uñtʼañatakiw chʼamachasiñasa. Ukhamajj ¿kunjamsa jilat kullakanakasar munasitas uñachtʼaysna? Kunjamtï Jehová Diosajj jupanakar uñjki ukham uñjañatakiw chʼamachasiñasa. Jachʼa tʼaqesiñ tiempon jilat kullakanakasar munasiñajj wali wakiskirïniwa. ¿Kunjamsa Jehová Diosajj jachʼa tʼaqesiñ tiempon jarkʼaqestani? Nayra Babilonia markar atacapkäna ukhajj kuna instruccionanaksa Jehová Diosajj markapar churäna uk amuytʼañäni, jupajj akham sänwa: “Nayan markaja, sarasin manqhäjjankir utanakamar mantam, punkunak llawkatasinim. Mä rat imantasim, Diosan colerasiñapajj pasañapkama” sasa (Is. 26:20). Jachʼa tʼaqesiñ tiempon inas uka pachpa instruccionanakar istʼañasajj wakischini. w23.07 págs. 6, 7 párrs. 14-16

Akham sasaw jisktʼassna: “¿Mayninakajj amuytʼiri, pacienciani, munañajaruk jan lurasiñap muniri ukham jaqetti uñtʼapjjetu? Jan ukajj ¿jan amuytʼiri, munañajar kuns lurayiri, jan istʼasiri ukham jaqetcha uñtʼapjjetu? ¿Kuntï mayninakajj amuyapki ukar istʼti, wakischi ukhas ukarjamat luraraktjja?” sasa. Jiwasatï amuytʼir jaqëñatak chʼamachasiñänejja, Jehová Diosjama Jesusjam amuyirïtasajj jukʼamp qhanäniwa. Cambionakajj utjki ukhajja, amuytʼirïñasawa, ukanakar yatinoqtañatakiw chʼamachasiñasa. Inas mä akatjamat wali usuntata jan ukajj qollqet pistʼat uñjassna, jan ukajj markasan política toqet jan waltʼañanakaw utjaspa. Ukanakaw jakäwis qʼal mayjtʼayaspa, jan suykayätan uka jan walinakanwa uñjasiyarakistaspa (Ecl. 9:11). Jehová Diosan markapan mä asignacionat cambiapkistu ukas llakisiyarakistaspawa. Ukampis aka pusi ewjjtʼanakaw cambionakar yatinoqtañatak yanaptʼistani: 1) cambionakar yatinoqtaña, 2) kunanaksa luräta ukat lupʼiña, 3) kuna sumanaksa jichhajj jikjjataskta ukar chuym uchaña, 4) mayninakar yanaptʼaña. w23.07 pág. 22 párrs. 7, 8

Daniel profetarojj waynäkäna ukhajja, oraqepatsa utapatsa wali jayaruw babilonionakajj presot apapjjäna. Danielajj waynäkchïnsa ‘kuntï mä jaqejj nayrapamp uñjkaspa’ ukwa babilonionakajj uñjapjjäna, jupajj “jan kuna kamachtʼata suma uñnaqtʼani” waynitünwa, wali importante mä familiatwa jutarakïna (1 Sam. 16:7). Ukatwa palacion serviñapatak yatichapjjäna (Dan. 1:3, 4, 6). Jehová Diosajja, kunjam jaqëñsa Danielajj amtäna uk uñjasaw jupar wal munasïna. ¿Kunatsa ukham sistanjja? Danielajj waynitükäna jan ukajj mä 20 maranïkäna ukhajja, Jehová Diosajj jupat jan jitheqtas walja maranak servipkäna, uka Noé ukat Job chachanakan sutinakapamp chikwa Danielar aytäna (Gén. 5:32; 6:9, 10; Job 42:16, 17; Ezeq. 14:14). Jehová Diosajj Danielar munasiskakïnwa, jupajj walja maranakaw sum jakasiwayäna (Dan. 10:11, 19). w23.08 pág. 2 párrs. 1, 2

Mä uta alätati janicha uk janïr amtkasajja, juma pachpaw uka utajj kunjamasa uk uñjañatakejj sarañ munasma. Biblia liytʼkasasa yatjjatkasas ukhamarakwa lursna. Ratuk liyirpayasajj fácil amuykañ yatichäwinakakwa yateqañäni, ukajj “Diosan arunakapankir qallta yatichäwinakapa[wa]” (Heb. 5:12). Ukampis kunjamtï mä uta sum uñakipksna ukhamäñapawa: uta “manqhanak” sum uñakipañasawa. Bibliat sum yatjjatañatakejja, kunjamsa sapa mä yatichäwipajj mayachtʼasi ukwa uñjañasa. Janiw kawkïr yatichäwinakarus creytan ukak yatiñasäkiti, kunatsa uka yatichäwinakar creytan uk yatiñasarakiwa. Diosan Arupat sum amuytʼañatakejja, jan fácil amuyañjamäki uka cheqa yatichäwinakwa yatjjatañasa. Apóstol Pablojj Diosan arunakap wali sum yatjjatapjjañapatakiw taqpach cristianonakar chʼamañchtʼäna, ukhamat “qhawqchʼäkitejj cheqa yatichäwinakajj anchorusa, largorusa, altorusa, manqharusa uk sum amuytʼapjjaña[pa]taki”. Ukhamatwa Diosar confiyañan ‘suma saytʼatäpjjaspäna’, ‘suma saphintatäpjjarakispäna’ (Efes. 3:14-19). Jiwasajj ukhamwa lurañasaraki. w23.10 pág. 18 párrs. 1-3

Biblianjja, pacienciani chacha warminakatwa parli. ¿Janit jupanakan sarnaqäwinakapat yatjjatkasma? David reyit amuytʼañäni, wali waynitüskäna ukhaw Israel markan reyipäñapatakejj ajllitäna, ukampis tronon qontʼasiñapatakejj walja maranakaw suyañapäna. Simeonampi Anampejja, jutañapäkäna uka Mesiasan puriniñapkamajj jan jitheqtasaw Jehová Diosar servipjjäna (Luc. 2:25, 36-38). Uka sarnaqäwinakat yatjjatkasajj akham sasin jisktʼasim: “¿Kunas jupanakarojj paciencianïñatak yanaptʼäna? ¿Paciencianïpjjatapat kunanaksa jikjjatapjjäna? ¿Kunjamatsa jupanakat yateqasirista?” sasa. Jan paciencianïpkäna ukanakat waljanakwa yateqaraksna (1 Sam. 13:8-14). Akhamwa jisktʼasisma: “¿Kunatsa jupanakajj jan paciencianïpkäna? ¿Jan paciencianïpjjatapat kuna jan walinakansa uñjasipjjäna?” sasa. w23.08 pág. 24 párr. 15

Apóstol Pedrojj jan jaytjasirïnwa, janiw kunampis Jesusar arkañat jarkʼayaskänti. Mä kutejja, kuntï Jesusajj siskäna uk janiw discipulonakapajj amuyapkänti, ukhaw Pedrojj jan jaytjasirïtap uñachtʼayäna (Juan 6:68). Mayni discipulonakapajj janiw jisktʼapkänti, ni Jesusan qhanañchañaps mayipkänti, ratukiw Jesusar arkañ jaytjjapjjäna. Ukampis Pedrojj janiw uk lurkänti, taqen istʼkataw “jumaw wiñay jakañar apiri arunakanïtajja” sasin Jesusar säna. Jesusajj Pedrompi mayni apostolonakampejj jupar jaytjapjjañapätap yatïnwa. Ukhampachasa, Pedrojj kuttʼasinkaniwa, janiw jaytjkitaniti sasaw Jesusajj confiyäna (Luc. 22:31, 32). Cheqas “chuymajj qhawqsa lurañ munaskiwa, ukampis jañchejj janiw chʼamanïkiti” uk Jesusajj sum amuyäna (Mar. 14:38). Ukatwa Pedrojj jan uñtʼiris tukchïnjja, Jesusajj jupar jan apanukkänti. Jiwatat jaktjjäna ukhajja, Pedroruw uñstäna, amuyatajj jupampikiw parläna (Mar. 16:7; Luc. 24:34; 1 Cor. 15:5). Ukajj walpun Pedrorojj jan aynachtʼatäjjañatak yanaptʼpachäna. w23.09 pág. 22 párrs. 9, 10

Diosajj jupar confiyirinakarojj taqpach juchanakapwa perdoni, janirakiw amtasjjeti (Sal. 32:1, 2). Jupar confiyirinakarojj cheqapar sarnaqeri jan kuna juchanitwa uñj-jje. Abrahanasa, Davidasa, Diosat jan jitheqtir yaqha servirinakas cheqapar sarnaqerit uñjatäpkchïnsa, pantjasiri juchararäsipkakïnwa. Ukampis Diosar confiyapjjatapatjja, jupanakajj Diosar jan adorapkäna uka jaqenakat sipans jan juchanit uñjatäpjjänwa (Efes. 2:12). Romanonakar qellqat cartapanjja, Jehová Diosan amigopäñatakejj jupar confiyañajj wali wakiskirïtapwa Pablojj qhanañchäna. Abrahanampi Davidampejj Diosar confiyapjjatapatwa jupan amigopäpjjäna, jiwasajj amigoparakïsnawa. w23.12 pág. 3 párrs. 6, 7

Taqpach cristianonakaw Jehová Diosarojj sacrificionak loqtsna, ukajj mä privilegiowa. ¿Kunanak lurasas sacrificionak loqtsna? Tiemposampi, chʼamasampi, utjirinakasamp Diosan Reinopar yanaptʼasaw sacrificionak loqtsna. Jiwasatï Jehová Diosar serviñatak qhawqtï lurirjamäktan uk lurañatak chʼamachasiñäni ukhajja, jupar adoratasjja mä privilegiot uñjataswa uñachtʼayañäni. Jehová Diosar adorkasajj kunanaks lurañasapuni ukwa apóstol Pablojj qhanañchäna (Heb. 10:22-25). Jehová Diosar orasiñasa, suytʼäwisat yaqhanakar parlañasa, jilat kullakanakasamp tantachtʼasiñasa, “[Jehová] Diosan urupajj jakʼankjjatap yatisajj” maynit maynikam chʼamañchtʼasiñas kunja wakiskirisa uka toqetwa parläna. Apocalipsis libron qhep qhepa capitulonakapanjja, Jehová Diosan angelapajj akham siwa: “¡Diosar adoram!” sasa. Uk lurañajj kunja importantesa uk qhanstayañatakejja, pay kutiw ukham arsu (Apoc. 19:10; 22:9). Kunanaktï Jehová Diosan jachʼa templopat yateqawayktan uka jan fácil amuykañ yatichäwinak janipun armapjjañäniti, jachʼa Diosasar adorañajj kunja jachʼa privilegiosa uk janirak armapjjañäniti. w23.10 pág. 29 párrs. 17, 18

“Maynit maynikam munasisipkakiñäni” siski uka mandatorojj taqeniw istʼañasa. Ukampis janiw kuntï Jesusajj siskäna uk armasiñasäkiti, jupajj akham sänwa: “Niya taqe jaqenakan munasiñapaw thayarani” sasa (Mat. 24:12). Uka arunakampejj discipulonakapat waljanejj janis munasjjapjjaspa ukham janiw Jesusajj sañ munkänti. Ukhamäkchisa, akapachan jan munasiñajj utjki ukamp jan apayasiñatakejj amuyasiñasawa. Uk yatisajja, aka jisktʼar qhanañchañäni: ¿Jilat kullakanakasar taqe chuymat munasisktan janicha uk kunjamatsa yatsna? Jakäwisan mä kunas pasi ukhajj kunjamsa ukar saykattan ukhaw jilat kullakanakasar taqe chuymat munasisktan janicha uk yatsna (2 Cor. 8:8). Ukanakat mayjja, apóstol Pedrow akham sasin qhanañchi: “Taqe kunat sipansa, maynit maynikam wal munasipjjam, khititejj munasirïki ukajja walja juchanakwa perdoni” sasa (1 Ped. 4:8). Ukhamajj jilat kullakanakasajj pantjasipjje jan ukajj jan wal lurapkistu ukhaw munasiñasajj yantʼat uñjasi. w23.11 pág. 10 párrs. 12, 13

Jiwasatï congregacionan yaqhep jilat kullakanakaruk munasiñänejja, Jesusajj munasipjjam siskäna ukarojj janiw istʼktanti. Inas yaqhep jilat kullakanakampejj jukʼamp suma amigöstan, Jesusajj ukhamarakiw yaqhep discipulonakapampejj jukʼamp suma amigöpjjäna (Juan 13:23; 20:2). Ukampis apóstol Pedrojja, taqe jilat kullakanakasar “jilapurjam” munasiñ uñachtʼayañatakiw amtayistu, mä arunjja familia taypin munasiñajj utjki uka pachpa munasiñ uñachtʼayañasawa (1 Ped. 2:17). Pedrojj akham sänwa: “Chuymatpach maynit maynikam wal munasipjjam” sasa (1 Ped. 1:22). Uka textonjja, “wal munasipjjam” siski ukajj khitinakarutï chuymatpach jan munasirjamäksna ukanakamppachar munasiñatwa parli. Ak amuytʼañäni, mä jilatatï jan ukajj mä kullakatï chuym ustʼayistaspa jan ukajj mä jan wal luristaspa ukhajj ¿kunsa lursna? Inas munasiñ uñachtʼayañat sipans ukhamat ukham kuttʼaysna. Ukampis ukham luratasajj janiw Jehová Diosar gustkaspati, ukwa Pedrojj Jesusat yateqäna (Juan 18:10, 11). Apóstol Pedrojj akham sasaw qellqäna: “Jan wal luratajja, jan jumanakajj jan walimpi kuttʼayapjjamti, insultatajj janirak insultapjjamti. Antisas jupanakarojj bendisipjjam” sasa (1 Ped. 3:9). Jumatï mayninakar wal munasïtajja, munasiñampiw jupanakar sum uñjarakïta. w23.09 págs. 28, 29 párrs. 9-11

Kunjamsa mä wawajj jilïr jaqer tukuñkam ratuk jilski uk uñjañajj ¿wali musparkañajjaya? Amuyatajja, mä wawajj janiw jiltañatakejj kuns lurkiti. Ukampis Diosar serviñan janiw ukhamäkiti (1 Cor. 13:11; Heb. 6:1). Suma cristianöñatakejj Jehová Diosamp sum apasiñatakiw chʼamachasiñasa. Suma chuymanïñatakisa, kunanak sum lurañ yateqañatakisa, jutïrin utjkistani uka luräwinakatak wakichasiñatakisa, Jehová Diosan espíritu santopampiw yanaptʼayasiñasa (Prov. 1:5). Jehová Diosaw jaqenakar lurawayi, jupaw chacharus warmirus lurawayaraki (Gén. 1:27). Chachanakas warminakas cuerponakapan janiw igualäpkiti, yaqha toqenakans janiw igualäpkarakiti. Jehová Diosajj yaq yaqha luräwinakwa jupanakar churawayi, ukanakamp phoqañatakejj sapa mayniw suma chuymanïpjjañapa, kunanaks sum lurañ yateqapjjañapa (Gén. 2:18). w23.12 pág. 18 párrs. 1, 2

Jesusajj yaqha jaqenakajj Awkipan sutip aytapjjaspa ukwa munäna. Amuyatajj Jesusan tiempopanjja, religión pʼeqtʼir yaqhep jaqenakajj Diosan sutip wali sagradot uñjapjjäna, janis aytasiñapäkaspa ukhamwa amuyapjjarakïna. Ukampis Jesusajj janiw uka costumbremp apayaskänti, jupajj Awkipan sutip jachʼañchaskakïnwa, kuna laykutejj janiw uka costumbrejj Qellqatanakankkänti. Mä kutejja, gerasenonakan lugarapanwa Jesusajj demonion mantat mä chachar qolläna. Uk uñjasajj jaqenakajj wal ajjsarayasipjjäna, uka cheqat sarjjañapatakiw Jesusar wal ruwtʼapjjarakïna (Mar. 5:16, 17). Ukampis Jesusajj Jehová Diosan sutip taqenin yatipjjañapwa munäna. Ukatwa janïr sarjjasajj kuntï Jehová Diosajj jupa layku lurkäna uk jaqenakar yatiyañapatak mayïna, janiw kuntï jupajj lurkäna uk yatiyañap maykänti (Mar. 5:19 ). Jesús Reyisajj ukhamarakiw taqe jaqenakar Jehová Diosan sutip yatiyañas muni (Mat. 24:14; 28:20). Ukham lurasajj juparuw kusisiytanjja. w24.02 pág. 10 párr. 10

¡Jehová Diosan markapankañajj wali khusapuniwa! Niyakejjay aka qhepa urunakan jakasiñajj jan walit jukʼamp jan walir saraskchejja, Jehová Diosajj yanaptʼasir jilat kullakanakwa churistu (Sal. 133:1). Diosajj familiasan kusisitäñatakis yanaptʼarakistuwa (Efes. 5:33-6:1). Llakinakar saykatañatakisa kusisitäñatakis Jehová Diosajj yatiñwa churarakistu. Cheqas Jehová Diosar serviñan jan aynachtʼañatakejja, awisajj wal chʼamachasiñasawa, kuna laykutejj mayninakan luratanakapasa parlatanakapas chuym ustʼayistaspawa. Pantjasisajj desanimassnawa, jukʼampis kutin kutin mä pachpa toqen pantjasktan ukhaw jukʼamp desanimassna. Aka jan walinakan uñjaskasas Jehová Diosar serviskakiñasawa: 1) mä jilatasa jan ukajj mä kullakas chuym ustʼaykistu ukapacha, 2) espososasa jan ukajj esposasas chuym ustʼaykistu ukapacha, 3) pantjasitanakasat desanimatäktan ukapacha. w24.03 pág. 14 párrs. 1, 2

Awispachajja, Jehová Diosar jukʼamp serviñ amtapkäna uka jilat kullakanakan experiencianakapwa istʼäta. Inas jupanakajj Escuela para Evangelizadores del Reino ukar sarapjjchi, jan ukajj inas kawkjantï predicañatakejj yanapajj munaski uka cheqar sarjjapjjchi. ¿Jumajj ukham lurarakismati? ¡Jïsa, lurasmawa! Jehová Diosan servirinakapajj kunjamanakatsa jukʼamp predicapjjaspa uk thaqapjjapuniwa (Hech. 16:9). Ukampis jumatï añchhitajj jan uk lurañ puedksta ukhajja, khitinakatï puedipki ukanakat sipans minusäkasmas ukham janiw amuyasiñamäkiti. Cristianonakajj tʼijusktan uka tʼijüwinjja, aguantañaw jukʼamp importantejja (Mat. 10:22). Janipun ak armamti: jumatï kunjamanakan uñjaskasasa jan ukajj mä kun sum lurasas Jehová Diosar sum serviñatak chʼamachasisksta ukhajja, jupajj wal kusisi. Ukhamtï lurätajja, bautisasjjät uka qhepats Jesusar arkaskakïtawa (Sal. 26:1). w24.03 pág. 11 párr. 11

Jiwasatï arrepentisiñäni ukhajja, Jehová Diosajj jiwasar perdonañwa arsuwayi (Sal. 86:5). Ukhamajj chuymatpach jucha luratasat arrepentisiñäni ukhajja, arsutaparjamajj perdonjjestuwa, janiw ukat payachasiñasäkiti. Ak amtañasawa: Jehová Diosajj amuytʼiriwa, janipuniw qhawqtï lurirjamäktan ukat jukʼamp lurañas maykistaniti. Jiwasatï qhawqtï lurirjamäktan ukarjam lurañatak chʼamachasiskstan ukhajja, ukajj waljäpas jukʼäpas wali valoranit Jehová Diosajj uñji. Kunjamsa jupan nayra servirinakapajj jupar taqe chuyma servipjjäna uk amuytʼañasarakiwa. Apóstol Pablojj walja maranakaw wali jayanak viajisajj jan qarjtas trabajirïna, walja congregacionanak uttʼayarakïna. Ukampis jakäwipan mayjtʼatapatjja, janiw nayrjamajj wal predicañ puedjjänti. Ukhamajj ¿janit Diosajj jupat kusisjjpachäna? Janiw ukhamäkänti. Pablojj kuntï lurirjamäkäna uk luraskakïnwa, Diosajj bendisirakïnwa (Hech. 28:30, 31). Jiwasampejj ukhamarakiwa, janiw Jehová Diosar serviñatakejj mä pachpak lurkapuniñäniti, ukampis kunatsa mä kuns lurtan ukaw jupatak jukʼamp importantejja. w24.03 pág. 27 párrs. 7, 9

Oración lurañ toqetjja, Jesusajj discipulonakapatakejj wali yateqaskayänwa. Aka oraqenkkäna ukhajj oración lurapunirïnwa. Wali ocupatäkchïnsa, walja jaqenakas jupan ukar sarapjjchïnjja, orasiñatakejj tiemp apstʼasipunirïnwa (Mar. 6:31, 45, 46). Awkipamp sapakïñatakisa parltʼasiñatakis jupajj wali alwat sartasirïna. Mä kutejja, wali wakiskir mä amtar puriñatakejj arum paqaraw orasïna (Luc. 6:12, 13). Janïr jiwayapkäna uka arumajja, Jesusajj kutin kutiniw Jehová Diosar orasïna, kuna laykutejj jukʼamp chʼama asignacionampiw aka oraqen phoqañapäna (Mat. 26:39, 42, 44). Wali ocupatäkchiñänisa, Jehová Diosar orasiñatakejj tiemp apstʼasiñasapuniwa, ukwa Jesusat yateqassna. Jiwasajj Jesusjamarakiw kunapachas orasiñäni uk amtsna, inas wali alwat sartassna jan ukajj janïr ikintkasin orasiraksna. Ukhamatwa Jehová Diosar uka suma regalop wali valoranit uñjatas uñachtʼaysna. w23.05 pág. 3 párrs. 4, 5

Qhawqsa Diosajj ajllitanakar munasi uk amuytʼañäni. Jehová Diosajj ‘munasiñampiw chuymanakap phoqtʼi’ sasaw jichhürutaki ajllita texton liytʼawaytanjja. Biblia toqet parlir mä librojja, Diosan munasiñapajj jalir umamp sasiwa sasaw qhanañchi. Ukajj qhawqsa Jehová Diosajj ajllitanakar munasi ukwa uñachtʼayistu. Diosan ‘wali munatäpjjatap’ ajllitanakajj sum yatipjje (Jud. 1). Jupanakajj kuntï apóstol Juanajj siskäna ukhamwa sapjjaraki, jupajj akham sänwa: “¡Qhawqsa Awkejj munasistu uk uñjapjjam, jiwasajj Diosan wawanakapa satäpjjtanwa!” sasa (1 Juan 3:1). ¿Diosajj ajllitanakarukit munaspacha? Janiwa, kunjamtï yatjjatkañänejja, Jehová Diosajj taqe servirinakapar munasitapwa uñachtʼayi. ¿Kunjamsa Jehová Diosajj jiwasar wal munasitap uñachtʼayistu? Jesusajj juchampit jiwañampit kutsuykistu uka toqew jiwasar wal munasitap uñachtʼayistu (Juan 3:16; Rom. 5:8). w24.01 pág. 28 párrs. 9, 10

Uka textorjamajja, jiwayañ munapkäna ukhajj kunsa Diosajj jutïrin lurani uka toqet lupʼiñaw Davidarojj jan ajjsarañatak yanaptʼäna. Horasapar yanaptʼasir Diosätap Davidajj sum yatïna. Jehová Diosajj Davidaw Israel markan reyipäni sasaw arsüna (1 Sam. 16:1, 13). Niyakejjay Jehová Diosajj uk arschïnjja, phoqapuniniwa sasaw Davidajj confiyäna. ¿Kun lurañsa Jehová Diosajj jiwasatak arsuwayaraki? Janiw jan walinakan uñjasipkätati sasajj janiw arsuwaykiti. Ukampis jan walinakansa akapachan uñjaskchiñänejja, machaq oraqen taqe jan walinak chhaqtayañwa Jehová Diosajj arsuwayi (Is. 25:7-9). Jiwatanakar jaktayañatakisa, usutanakar qollañatakisa, enemigonakasar chhaqtayañatakis Jehová Diosajj wali chʼamaniwa (1 Juan 4:4). w24.01 pág. 6 párrs. 12, 13

Kunatsa jakäwis Diosar katuyastan bautisasiraktan ukwa amuytʼañasa. Jehová Dios toqet saytʼasiñatakiw ukanak lurtanjja. Cheqpach religionankatamat jan payachasiñatakejj kunas yanaptʼawaytam uk amtam. Jehová Diosar uñtʼjjasajja, alajjpachankir Awkimarjamaw jupar uñj-jjayätajja, respetayätawa, munasjjarakiyätawa. Jehová Diosar jukʼamp confiyañajja, juchanakamat arrepentisiñamatakiw yanaptʼawaytamjja. Kunanaktï Jehová Diosajj uñiski ukanak jaytjjasajja, kunanakatï jupar kusisiyki ukanakwa lurjjayätajja. Jehová Diosajj juchanakam perdonjjatap amuyasajj chuymas chuymaw jikjjatasiyätajja (Sal. 32:2). Tantachäwinakarus sarjjayätawa, yateqkayäta uka suma yatichäwinakats yaqhanakampiw parljjayätajja. Niyakejjay jichhajj Diosar katuyata bautisata cristianöjjstajja, wiñay jakañar apir thaknamwa sarasktajja, janipun uka thakit saranukuñwa amtaraktajja (Mat. 7:13, 14). Suma thurtʼatäñataki, suma saytʼatäñataki, taqe kunat sipansa Jehová Diosar munasiñataki, leyinakaparus istʼañatak chʼamachasim. w23.07 pág. 17 párr. 14; pág. 19 párr. 19

Jehová Diosan munañap lurañatak arsuwayktan uka toqet lupʼiñaw kunayman tentacionanakat jitheqtañatakejj chʼam churistani. Ak amuytʼañäni: mä casadarusa jan ukajj mä casadorus ¿coqueteysnati? ¡Janiwa! Diosar jakäwis katuyasisajj uk apanukjjtanwa. Chuymasantï jan wali munañanak jan jiltaykañänejja, janiw qhepat ukanak apsuñajj wakisjjaniti. “Jan wali jaqenakan thakiparojj” janiw ni mä jukʼsa jakʼachaskañäniti (Prov. 4:14, 15). Jesusat yateqasiñaw yanaptʼistaspa. Kunjamtï jupajj Jehová Dios Awkipar kusisiyañ amtkänjja, ukhamarakiw jiwasajj jakäwis katuyasktan uka Diosatakejj kunanakatï jan walïki ukanak jan payachasis ratuk apanukuñasa (Mat. 4:10; Juan 8:29). Problemanakana, yantʼanakan uñjasiñajja, Jesusar arkaskakiñ amtatas uñachtʼayañatakiw yanaptʼistu. Cheqas Jehová Diosaw uk lurañatakejj yanaptʼistani. w24.03 págs. 9, 10 párrs. 8-10