Octubre

¿Istʼasirïñajj jumatak chʼamakiti? Awisanakajja, Davidatakejj istʼasirïñajj chʼamakïnwa. Ukatwa jupajj Diosar akham sasin mayisïna: “Suma chuymay jumar istʼañatakejj churita” sasa (Sal. 51:12). Davidajj Jehová Diosar munaskchïnsa, awisanakajj istʼasirïñajj jupatak chʼamakïnwa. ¿Kunatsa jiwasatak istʼasirïñajj chʼamarakïspa? Maya, nayrïr awk taykasatwa jan istʼasir chuymanïñ katoqawaytanjja. Paya, Supayajj jupjam Dios contra saytʼasiñasatakiw sapa kut chʼamañchistu (2 Cor. 11:3). Kimsa, autoridadanïpki ukanak contra saytʼasir jaqenak taypinwa jakastanjja, “aka mundon amuyupaw jan istʼasirinakarojj apnaqaski” (Efes. 2:2). Ukhamajj Jehová Diosar istʼañatakisa, jupajj autoridad churki ukanakar istʼañatakis wal chʼamachasiñasawa, kuntï pantjasirïtas laykojj lurañ munksna uk jan lurañatakisa, kuntï Supayasa, jupan apnaqat aka mundos lurayañ munkistu uk jan lurañatakis wal chʼamachasiñasarakiwa. w23.10 pág. 6 párr. 1

¿Jesusan uka milagro luratapat kunsa yateqsna? Humilde chuymanïñwa yateqsna. Jesusajj janiw uma vinor tukuyatapat jachʼa jachʼa tukkänti. Cheqas Jesusajj janipuniw luratanakapat jachʼañchasirïkänti. Jan ukasti humilde chuymanïnwa, taqe luratanakapatsa Awkiparupuniw jachʼañchirïna, aytarakirïna (Juan 5:19, 30; 8:28). Jiwasatï Jesusat yateqasiñäni ukhajja, humilde chuymanïñäniwa, janirakiw luratanakasatsa jachʼañchaskañäniti, antisas wali musparkañ Diosatwa jachʼañchasiñäni, jupar serviñajj mä suma privilegiowa (Jer. 9:23, 24). Cheqas juparupuniw taqe kunats jachʼañchañasa. Jiwasajj janipuniw Jehová Diosan jan yanaptʼapampejj kuns lurksnati (1 Cor. 1:26-31). Maynitï humilde chuymanïchejja, kunanaktï mayninak layku lurki ukanakat janiw jachʼañchasiñapajj wakiskiti. Cheqas Jehová Diosaw ukanak uñjaski wali valoranitwa uñjaraki, uk yatiñaw juparojj wal kusisiyi (Mat. 6:2-4; Heb. 13:16). Jesusjam humilde chuymanïñatak chʼamachasitas uñjasajj Jehová Diosajj wal kusisi (1 Ped. 5:6). w23.04 pág. 4 párr. 9; pág. 5 párrs. 11, 12

Diosan amuytʼayataw apóstol Pablojj mayninakat llakisipjjañapatak cristianonakar chʼamañchtʼäna. ¿Kunjamsa tantachäwinakan uka ewjjtʼarjam lursna? Mayninakajj comentario arstʼañ munapjjarakiwa, ukwa amtañasa. Ukatakejj ak amuytʼañäni: amigonakamamp parlkta ukhajj ¿jumak parlaskañat sipans jupanakar arstʼayaraktajjaya? Tantachäwinakasan niya ukhamarakiwa. Walja jilat kullakanakasajj arstʼapjjaspa ukwa muntanjja. Cheqas Jehová Diosar confiyapjjatap uñachtʼayapjjañapatak arstʼayasaw jilat kullakanakar chʼamañchtʼaraktanjja (1 Cor. 10:24). Maysa toqetjja, mä qhawqha arunakampikiw comentarionak arstʼañasa. Ukhamatwa mayni jilat kullakanakan arstʼapjjañapatakejj tiempojj utjaskani. Mä qhawqha arunakampikis comentkchiñänejja, janiw walja toqenakat parlañasäkiti. Jumatï parrafon parlki ukanak taqpach arstʼätajja, mayninakajj janiw kun arsuñs puedjjapjjaniti. w23.04 págs. 22, 23 párrs. 11-13

Kuna cambionakas utjani ukhajja, mayninakar yanaptʼaskakiñajj wali importantepuniwa, jukʼampis predicasaw uk lurtanjja, janipun uk armañäniti. Kunjamsa jaqenakajj jikjjatasipjje ukarjam predicañajj wali wakiskiriwa. Predicacionanjja, Diosat kunayman creyiri, kunayman markanakat jutiri, kunayman chuymani jaqenakampiw parltanjja. Apóstol Pablot yateqasiñasawa, jupajj kunayman jaqenakampiw parlirïna. Jesusajj ‘yaqha markanakar khitat apostolotwa’ uttʼayarakïna (Rom. 11:13). Yaqha markanakar khitat apostoljamajja, judionakaru, griegonakaru, yatjjattʼat jaqenakaru, campon jakasirinakaru, jilïr autoridadanakaru, reyinakaruw Pablojj predicäna. “Kunaymani jaqenakar yanaptʼañatakejja taqe kunaruw” apóstol Pablojj tuküna, ukhamat kunayman jaqenakan chuymanakapar purtʼañataki (1 Cor. 9:19-22). Diosan Arup yatiyañatakejja, jaqenakajj kunanakar yatitäpjjesa, kunanakarus creyipjje ukanakwa amuytʼirïna. ¿Kunsa apóstol Pablot yateqsna? Jiwasatï kunayman jaqenakar parlañäni, kunjamsa sapa maynir yanaptʼsna uk amuytʼarakiñäni ukhajja, jukʼamp suma predikirïñäniwa. w23.07 pág. 23 párrs. 11, 12

Llampʼu chuymaninakajj janiw aynachtʼapkiti, antisas chʼamaniw saytʼasipjje. Jan walinakar llampʼu chuymampi saykatañatakejja, chʼam katjjatañasaw wakisi. Llampʼu chuymanïñajj ‘espíritu santon achup’ taypinkiwa (Gál. 5:22, 23). “Llampʼu chuymani” sasin griego arut traducitäki uka arojja, awisajj salvaje caballor mansoptayañat parlañatakiw apnaqasirïna. Cheqas mä salvaje caballojj mansoptaspawa, mansösajj chʼamanirakïspawa. ¿Jiwasat kamsasirakispasa? ¿Llampʼu chuymanïsajj chʼaman saytʼasiraksnati? Janiw sapakejj puedksnati, ukatakejj Diosaruw espíritu santop mayisiñasa. Waljaniw llampʼu chuymanïñ yateqawayapjje. Walja Testigonakajja, jupanakamp jiskhisiñ munapki ukhaw llampʼu chuymanïpjjatap uñachtʼayapjje, ukaw yaqhepanakarojj Testigonakat sum amuyjjañatakejj yanaptʼawayi (2 Tim. 2:24, 25). w23.09 pág. 14 párr. 3

Apóstol Juanajj 24 ancianonakaruw mä musparkañ visionan uñjäna, uka ancianonakajj Jehová Diosaruw alajjpachan adorasipkäna. Jupanakajj Diosaruw jachʼañchasipkäna, “jumaw jachʼañchäwi, honra katoqañatakisa, chʼamanïñatakisa derechonïtajja” sasaw sapjjarakïna (Apoc. 4:10, 11). Angelanakajj walja razonanakatwa Jehová Diosarojj alabapjje, jachʼañchapjjaraki. Jupanakajj Diosampiw alajjpachankapjje, sum uñtʼapjjaraki. Kunanaktï Diosajj lurki ukanak uñjasaw kunjam Diosas uk amuyapjje, chuymatpach jachʼañchapjjaraki (Job 38:4-7). Jiwasajj Jehová Diosamp parlktan ukhajja, jachʼañchañasarakiwa. Kunatsa jupar munastan respetaraktan uk jupar sistan ukhaw jachʼañchtanjja. Bibliat liytʼkasasa yatjjatkasasa, Jehová Diosajj kunjam chuymanis uk amuyañatak chʼamachasipjjañäni (Job 37:23; Rom. 11:33). Ukatjja, kunjam chuymanisa uka toqet lupʼisajj kunjamas jikjjatastan uk Jehová Diosar sarakiñäni. Jehová Diosajj jiwasar yanaptʼkistu jan ukajj taqe jilat kullakanakasar yanaptʼki ukhaw jupar jachʼañcharaksna (1 Sam. 2:1, 2). w23.05 págs. 3, 4 párrs. 6, 7

1919 maranjja, Jachʼa Babilonia sat oraqpachankir taqe falso religionanakajj janiw Diosan markaparojj apnaqjjänti. Uka maranwa ‘suma phoqeri amuyasir esclavorojj’ uttʼayasïna. Suma chuymani jaqenakajj ‘Santo Thakin’ sarnaqañ qalltapjjañapatakejj tiempoparuw uka esclavor uttʼayasïna (Mat. 24:45-47; Is. 35:8). Kunanaktï yaqhanakajj uka “Santo Thaki” wakichañatak lurapkäna ukanakajja, uka thaknam viajiñ qalltapkäna ukanakaruw Jehová Diosampit amtanakapampit yateqapjjañapatak yanaptʼäna (Prov. 4:18). Diosar kusisiyañatakejj cambionakwa jakäwinakapan lurapjjarakïna. Cheqas Jehová Diosajj janiw taqe uka cambionak ratuk lurapjjañap suykänti. Antisas marat maratjamaw markapar qʼomachäna. Taqe kunan Diosar kusisiykir sarnaqkañäni uka urojj purinkani ukhajj ¿kunja kusisitäñänisa uk amuysnati? Mä thakin sumäskakiñapatakejja, sapa kut askichtʼañaw wakisi. 1919 marat aksarojja, ‘Santo Thakejj’ walja kutiw askichtʼasiwayi, ukhamat walja jaqenakajj Jachʼa Babiloniat mistjjapjjañapataki. w23.05 pág. 17 párr. 15; pág. 19 párr. 16

Cuerpo Gobernantenkirinakajja, jupanakar yanaptʼapjjañapatakiw nayratpach wakichtʼasipki. Jupanakar yanapirinakajj walja lurañanakampiw wali sum phoqasipki. Ukhamajj Criston ovejanakapar uñjañatakejj suma wakichtʼatäjjapjjewa. Ajllitanakajj alajjpachar apatäjjapjjani, mä arunjja jachʼa tʼaqesiñajj tukuyañampïskani ukhajja, Jehová Diosan markapajj jan jitheqtasaw aka oraqen jupar adorasipkakini. Jesucriston Pʼeqtʼatajja, Diosan servirinakapajj nayrar sarantasipkakiniwa. Cheqas uka tiemponjja, mayachtʼat markanakaw Diosan markapar atacapjjani, Bibliarjamajj uka mayachtʼat markanakajj Magog oraqenkir Gog satawa (Ezeq. 38:18-20). Ukampis mä jukʼa tiempokiw atacapjjani, janiw uka kawsajj Diosan markapajj jupar adorañ jaytkaniti. Jehová Diosaw markapar salvani. Mä visionanjja, apóstol Juanajj Criston ‘yaqha ovejanakapa’ sasin uñtʼatäpki uka “walja jaqenakaruw” uñjäna, “jupanakajj jachʼa tʼaqesiñatwa mistunipjje” sasaw Diosajj jupar sarakïna. Ukhamajj jupanakajj salvasipjjaniwa (Apoc. 7:9, 14). w24.02 págs. 5, 6 párrs. 13, 14

¿Kunsa espíritu santo katoqañatakejj lursna? Diosaruw mayiñasa, Arupatwa yatjjatañasa, markapamp mayachtʼatäñasarakiwa. Uktï lurañänejja, ‘espíritu santon achuparjamaw’ sarnaqañäni (Gál. 5:22, 23). Jehová Diosajj espíritu santo jiwasar churañapatakejja, janiw juchan sarnaqañasäkiti, amuyunakasas qʼomäñapawa. Jiwasatï qʼañu amuyunakanëjjsna, ukanakamp apayasjjaraksna ukhajja, janiw espíritu santojj jiwasampëjjaspati (1 Tes. 4:7, 8). ¿Kunanakampitsa amuyasiñasa? Pablojj akham sänwa: “Janirak profecía arunakarojj jiskʼachapjjamti” sasa (1 Tes. 5:20). Uka versiculon ‘profecía arunaka’ siski ukajja, Diosajj espíritu santop toqe churki uka yatiyäwinakatwa parlaski. Jehová Diosan urupat parlki uka yatiyäwisa, uka urojj wali jakʼankatapat parlki uka yatiyäwisa, uka taypinkarakiwa. Jehová Diosan urup puriniñapatakejj walja tiempos faltkaspa ukham jiwasajj janiw amuyktanti, janirakiw Armagedonan puriniñaps janiw uñjkañäniti sasin sisktanti. Jan ukasti Jehová Diosan urup puriniñapajj wali jakʼankkaspas ukhamwa amuytanjja, mä arunjja niyas purinjjaspa ukhamwa amuytanjja. Ukatwa juchanakat jitheqtañatakejj chʼamachastanjja, kunanakatï ‘Dios chuymätas uñachtʼayki’ ukanaksa luraraktanjja (2 Ped. 3:11, 12). w23.06 pág. 12 párrs. 13, 14

Mä celularana, mä computadorana jan ukajj yaqha ukhamanakan pornografiajj uñstaspa ukhajja, ¿kunsa mä cristianojj lurañapa? Jankʼakiw maysar uñtañapa. Uk lurañatakejj ak amtañaw yanaptʼistaspa: taqe kunat sipans Jehová Diosan amigopäñaw jukʼamp importantejja. Maysa toqetjja, jan pornografiat uñjatäki uka fotonaka, videonaka, jan ukajj yaqha ukhamanakaw utjaspa, ukampis ukanakajj jan wali amuyunakwa jiwasan utjayaspa. Janirakiw ukanak uñjañasäkiti. ¿Kunatsa? Kuna laykutejj janiw ni chuymasans adulterio jucha lurañ munktanti (Mat. 5:28, 29). Tailandia markankir David sat mä anciano jilatajj akham siwa: “Nayajj akham sasaw jisktʼasirïta: ‘Akanakajj janis pornografiäkchejja, ¿uñjaskakiñajajj Jehová Diosatak walikïskaspati?’ sasa. Ukham amuytʼasiñaw suma amtanakar puriñatak yanaptʼitu” sasa. Jiwasatï Jehová Diosar chuym ustʼayañ ajjsartʼañäni ukhajja, suma amtanakar puriñajj facilakïniwa. Ukatwa Proverbios librojj “Jehová Diosar ajjsarañajj yatiñan qalltapawa” sasin qhanañchi. w23.06 pág. 23 párrs. 12, 13

“Manqhäjjankir utanakamar mantam” sasinjja, congregacionanakatwa parlaskaspa. Jiwasatï uka tiempon jilat kullakanakasamp mayachtʼatäñäni ukhajja, Jehová Diosajj arsutaparjamaw jarkʼaqestani. Ukhamajj janiw jilat kullakanakasampejj aleq ukhamak sum apasiñajj wakiskiti, jupanakarojj cheqpachapuniw munasiñasa. Janitï jupanakar ukham munaskañänejja, inas jan salvaskchiñäniti. “Jehová Diosan jachʼa urupajj” purinkani uka tiemponjja, taqe jaqenakaw wal tʼaqesipjjani (Sof. 1:14, 15). Diosan servirinakapajj ukhamarakiw jan walin uñjasiñäni. Ukampis jichhatpach wakichtʼasiñäni ukhajja, tranquilokïñäniwa, mayninakarus yanaptʼarakiñäniwa. Aguantañampejja, kuna jan walirus saykatakiñäniwa. Sinttʼasirïsajja, puedkañäni ukarjamaw jilat kullakanakasar ratuk yanaptʼañäni, kuntï munapkani uks churañäni. Jupanakar munasitasatjja, jupanakampejj mayachtʼatäñäniwa. Jehová Diosajj machaq mundon wiñay jakañwa churistani, ukan janiw jan waltʼäwinakasa tʼaqesiñanakas amtatäjjaniti (Is. 65:17). w23.07 pág. 7 párrs. 16, 17

Diosat jan jitheqtir nayra servirinakajj wali chʼamanïpjjänwa, walja kutiw Bibliajj uk qhanañchi. Ukampis jupanakajj janiw wali chʼamanïpkaspas ukhampun amuyasipkänti. Awisanakajja, David reyejj jan ajjsartʼirïnwa, ‘mä qollur uñtat chʼamanïkaspas’ ukham amuyasïna, ukampis awisajj wal ajjsarayasïna (Sal. 30:7). Maysa toqetjja, Jehová Diosan espíritu santop katoqasajj Sansonajj wali chʼamanïnwa, ukampis Jehová Diosan jan chʼamapampejja, “janiw chʼamanëjjeristti, mayni chachanakjamakiw tukjjerista” sasaw säna (Juec. 14:5, 6; 16:17). ¿Diosat jan jitheqtir servirinakapajj khititsa chʼam katoqapjjäna? Jehová Diosatwa katoqapjjäna. Apóstol Pablotakejj Jehová Diosan chʼamap katoqañajj wakisirakïnwa (2 Cor. 12:9, 10). Jupajj jiwasjamarakiw usuntat uñjasïna (Gál. 4:13, 14). Ukhamarus kunatï walïki uk lurañatakiw chʼamachasïna (Rom. 7:18, 19). Awisajj llakitänwa, kunatï jupar paskaspäna ukats llakisirakïnwa (2 Cor. 1:8, 9). Ukhamäkchïnsa akham sänwa: “Nayajj debiläkta ukhajja wali chʼamanïtwa” sasa. ¿Kunas ukhamäñatakejj yanaptʼäna? Jehová Diosaw juparojj necesitkäna uka chʼam churäna, ukaw juparojj wali chʼamanir tukuyäna. w23.10 pág. 12 párrs. 1, 2

Awisajj janis kunatakis sirvksna ukham amuyasiñäni ukhajja, Jehová Diosaw markapar irpasinitu sasaw amtañasa (Juan 6:44). Janis jiwasatak ukhamaw sañjamäkchejja, kunja suma chuymanïtansa ukwa jupajj uñji, jiwasat sipans jupaw jukʼamp sum uñtʼistu (2 Crón. 6:30). Ukhamajj wali valoranïpjjtawa siskistu uk creyiñasawa (1 Juan 3:19, 20). Jiwasanakat yaqhepajja, kunatï cheqäki uk janïr uñtʼkasajj kunanaktï lurkayätan ukanakat inas wal juchañchasstan (1 Ped. 4:3). Yaqhepajj inas Jehová Diosarojj jan jitheqtas walja maranak servisipkchi, ukampis yaqhep jan walinak atipjañatakiw chʼamachasisipkaspa. Jumarutï chuymamajj juchañchaskstam ukhajj kunjamsa Jehová Diosan jan jitheqtir servirinakapajj ukhaman uñjasipjjäna uk yatiñaw chuymachtʼiristam. Apóstol Pablojj pantjasitanakapat amtasisajj wal llakisirïna (Rom. 7:24). Juchanakapat arrepentisisajj bautisaskchïnsa, “apostolonak taypitjja jukʼamp sullkätwa”, juchararanakat “nayaw jukʼamp juchararätjja” sasaw sirïna (1 Cor. 15:9; 1 Tim. 1:15). w24.03 pág. 27 párrs. 5, 6

Jehoás reyin jan wali amtanakapat aka wakiskir yatichäwi yateqsna: yanaptʼapkistaspa uka amigonak ajlliñasawa, mä arunjja Jehová Diosar munasipki kusisiyañ munapki uka amigonak ajlliñasawa. Cheqas amigonakasajj jiwasat jilïrinakäspawa jan ukajj sullkanakäspawa. Amtañäni, Jehoás reyejj Jehoiadá sacerdotet sipans wali sullkänwa. Amigonakam ajlliñatakejj akham jisktʼasim: “¿Jehová Diosar jukʼamp confiyañatakit yanaptʼapjjetu? ¿Diosan leyinakaparjam sarnaqañatakit chʼamañchtʼapjjetu? ¿Jehová Diosat parlañasa Bibliat yatjjatapki ukanakat parlañas jupanakar gustiti? ¿Diosan leyinakapar respetapjjeti? ¿Pantjasitajat cheqañchapjjetuti jan ukajj kuntï istʼañ munkta ukakcha sapjjetu?” sasa (Prov. 27:5, 6, 17). Cheqas amigonakamatï Jehová Diosar jan munasipkchejja, janiw amigonakamäpkaspati, ukampis amigonakamatï Jehová Diosar munasipjjchejja, jan jupanakar apanukumti, jupanakajj yanaptʼapjjapunïtamwa (Prov. 13:20). w23.09 págs. 9, 10 párrs. 6, 7

Alfa arojja griego alfabeton qallta letrapawa, omega arusti tukuya letraparakiwa. “Nayätwa Alfasa Omegasa” sasinjja, kuntï qalltkta ukjja tukuytwa sañwa Jehová Diosajj munaskäna. Jehová Diosajj Adanampir Evampir lurkäna uka qhepatjja akham sasaw jupanakar bendisïna: ‘Walja wawanakanïpjjam, waljaptapjjam, oraqpach phoqantapjjam, apnaqapjjarakim’ sasa (Gén. 1:28). Jehová Diosajj amtap qhanañchkäna ukhajja, “Alfa” siskaspas ukhamänwa. Mä urojj Adanampin Evampin istʼasiri ukat perfecto wawanakapaw oraqpach phoqantapjjañapäna, mä paraisoruw tukuyapjjañaparakïna. Uka uruw Jehová Diosajj “Omega” siskaspas ukhamäni. Kunapachatï ‘alajjpachsa oraqsa, taqe kunanakatï alajjpachansa oraqensa utjki’ ukanak lurañ tukuyjjäna ukhajja, Jehová Diosajj amtap phoqapuniniwa sañatakejj mä garantía churäna. Jehová Diosajj kuntï jaqenakatakis oraqetakis amtki ukjja, paqallqöri urun phoqañwa amtäna. Uka amtapajj paqallqöri uru tukuyaruw phoqatpach phoqasini (Gén. 2:1-3). w23.11 págs. 4, 5 párrs. 13, 14

Babiloniat Israel markakamajja, judionakajj mä pusi phajjsinakaw viajipjjañapäna, uka viajejj janiw faciläñapäkänti. Ukampis kuna jan walinakatï thakin utjkäna ukanak chhaqtayañwa Jehová Diosajj arsüna. Diosat jan jitheqtir judionakatakejja, kuna sacrificionaktï lurapjjañapäkäna ukat sipansa, Israel markar kuttʼasajj jukʼamp bendicionanakwa katoqapjjañapäna. Katoqapjjañapäkäna uka bendicionanakatjja, Jehová Diosar adorañaw jukʼamp jachʼa bendicionänjja. Babilonia markanjja, Jehová Diosatakejj janiw ni mä templos utjkänti. Ukhamajj Moisesan Leyiparjam phoqañatakejj janiw israelitanakatakejj sacrificionak loqtañatakejj mä altarajj utjkänti, janirakiw sacrificionak loqtapjjañapatakejj organiztʼat sacerdotenakas utjkänti. Ukhamarus Jehová Diosaru leyinakapar respetirinakajja, falso diosanakar adoririnakat sipans wali jukʼanikïpjjänwa. Ukatwa Jehová Diosar ajjsartʼir waranq waranqa judionakajj oraqepar wal kuttʼañ munapjjäna, ukhamat Jehová Dios saparuk wasitat adorasjjañapataki. w23.05 págs. 14, 15 párrs. 3, 4

“Qhanan wawanakapjam” sarnaqaskakiñatakejj Diosan espíritu santopan yanaptʼapaw wakisi. Kuna laykutejj aka jan wali pachan qʼom sarnaqañajj janiw faciläkiti (1 Tes. 4:3-5, 7, 8). Espíritu santojj aka mundonkir jaqenakan amuyunakapamp jan apayasiñatakiw yanaptʼistaspa, jupanakajj janiw Diosjam amuyapkiti. Espíritu santojj “suma chuymanïñataki, kunatejj cheqapäki uk lurañataki ukhamarak cheqapar sarnaqañatakiw” yanaptʼarakistaspa (Efes. 5:9). Jehová Diosajj “mayipki ukanakarojj espíritu santo chu[rani]” sasaw Jesusajj säna (Luc. 11:13). Ukhamajj mä toqetjja, oracionan mayisisaw Jehová Diosan espíritu santop katoqsna. Maysa toqetjja, tantachäwinakan jilat kullakanakamp Jehová Diosar jachʼañchasaw espíritu santo katoqaraksna (Efes. 5:19, 20). Jehová Diosan espíritu santopamp irpayasiñajja, kusisit sarnaqañatakiw yanaptʼistani. w24.03 págs. 23, 24 párrs. 13-15

Jukʼamp paciencianïñatakejj Jehová Diosaruw yanaptʼap mayisiñasa. Paciencianïñajj espíritu santon achup taypinkiwa (Gál. 5:22, 23). Ukhamajj Jehová Diosaruw espíritu santop mayisiñasa, espíritu santon achuparjam sarnaqañatak yanaptʼita sasaw mayisiñasaraki. Mä jan walin uñjasktan ukhatï paciencianïñajj jiwasatak chʼamächi ukhajja, espíritu santo ‘mayiskakiñasawa’ (Luc. 11:13). Kunjamtï Jehová Diosajj taqe kuns uñjki ukham uñjañatakiw orasiraksna. Orasjjasajja sapüru paciencianïñatakiw chʼamachasiñasaraki. Jiwasatï Jehová Diosar paciencianïñatak yanaptʼa mayiskakiñäni, paciencianïñatak chʼamachasiskakiñäni ukhajja, jukʼat jukʼat jukʼamp paciencianëjjañäniwa. Biblian sarnaqäwinakapat lupʼiñaw yanaptʼarakistani. Biblianjja, pacienciani walja chacha warminakatwa parli, jupanakat lupʼiñäni ukhajj paciencianïñwa yateqsna. w23.08 pág. 22 párrs. 10, 11

Jesusajj Jehová Diosaw cuidaskitani sasin confiyañapatakiw apóstol Pedror chʼamañchtʼäna. Jiwatat jaktjjäna ukhajja, Jesusajj wasitatwa Pedrompiru mayni apostolonakampirojj mä milagro toqejj walja chawllanak katuyäna (Juan 21:4-6). Uka milagro uñjañajja, jakañatak wakiski ukanak Diosaw churitani sasin confiyañatakiw Pedror yanaptʼpachäna. Jesusajj ‘Diosan Reinop nayraqat thaqerinakarojj’ Jehová Diosaw cuidaskani sasin siskäna ukjja, Pedrojj uka horasanwa uk amtpachäna (Mat. 6:33). Uk yatiñaw Pedrorojj chawlla negocio jaytjjañatakisa, predicañ nayrar uchañatakis yanaptʼpachäna. 33 maran Pentecostés urunjja, jan ajjsartʼasaw jupajj Diosan arunakap yatiyäna, ukhamatwa waranq waranqa jaqenakajj suma yatiyäwinak istʼapjjäna (Hech. 2:14, 37-41). Qhepatjja, walja samaritanonakampiru yaqha markankir jaqenakampiruw Criston discipulopäpjjañapatak yanaptʼäna (Hech. 8:14-17; 10:44-48). Ukhamajj Pedro toqew Jehová Diosajj kunayman jaqenakar congregacionapar irpanïna. w23.09 pág. 20 párr. 1; pág. 22 párr. 11

Babilonionakajj Jerusalén mark tukjapkäna uka pä mara qhepatwa Nabucodonosor reyejj ajjsarkañ mä samka samkasïna, ukanjja mä jachʼa estatua uñjäna. Ukatwa reyejj kunsa samkasïna, uka samkajj kamsañs muni uk sapjjañapatakejja, Babiloniankir taqe yatjjattʼatanakampiru Daniel waynampiruw mayïna. Janitï uk sapkaspänjja, jupanakat taqeniruw jiwarayaspäna (Dan. 2:3-5). Danielajj jankʼakiw kuns lurañapäna, janitï jankʼak kuns lurkaspänjja, waljaniw jiwarapjjaspäna. Ukatwa “kuntï uka samkapajj sañ munki uk reyir qhanañchañatak tiempo mayïna” (Dan. 2:16). Uk lurañatakejj Diosar confiyiri jan ajjsartʼiri ukhamäñapänwa. ¿Kunatsa? Kuna laykutejj uka nayrajj samkanak Danielajj qhanañchänwa sasajj janiw Bibliajj siskiti. Danielajj amigonakapampiw parläna. “Jupanakarojj alajjpachankir Diosar khuyapayasiñ mayipjjañapatakiw mayïna, ukhamat jupanakar uka secreto qhanañchañapataki” (Dan. 2:18). Jehová Diosasti orasitanakapar istʼänwa, Diosan yanaptʼapampiw Daniel waynajj reyin samkap qhanañchäna. Danielasa amigonakapas jiwañat salvasipjjänwa. w23.08 pág. 3 párr. 4

Paciencianïsajj kunanaksa jikjjatañäni uk amuytʼañasawa. Paciencianïñajj jukʼamp kusisitäñataki, jukʼamp tranquilokïñatakiw yanaptʼistu. Ukhamajj paciencianïñajj cuerposana amuyusan kʼumaräñatakiw yanaptʼistu. Mayninakamp jukʼamp sum apasiñatakis yanaptʼarakistuwa, ukat congregacionan jukʼamp mayachtʼatäñatakis ukhamarakiw yanaptʼistani. Maynitejj jiwasar colerayirjam kuns lurani ukat jiwasajj jan jankʼak coleraskañäni ukhajja, mä problemajj janiw jukʼamp jachʼaptkaniti (Sal. 37:8, nota; Prov. 14:29). Taqe kunat sipansa paciencianïsajj alajjpachankir Awkisatwa yateqastanjja, juparus jukʼampiw jakʼachasiraktanjja. Paciencia chuymanïñajj wali sumawa, taqeniruw yanaptʼarakistu. Paciencianïñajj janis faciläkchejja, Jehová Diosajj paciencianïñatakejj yanaptʼistaniwa. Machaq mundon puriniñap pacienciampi suykasajja, aka arunakar confiyañasawa: “Jehová Diosan nayranakapajj khitinakatï jupar ajjsarapki ukanakaruw uñchʼukiski, khitinakatï jupan munasiñapsa jan jaytjasirïtapsa suytʼasipki ukanakaruw uñchʼukiski” (Sal. 33:18). Ukhamajj taqeniw paciencia chuymampi isthapisiskakiñatak amtañasa. w23.08 pág. 22 párr. 7; pág. 25 párrs. 16, 17

Santiagojj mä jaqetwa parläna, jupajj Diosar confiytwa siskchïnsa, luratanakapampejj Diosar jan confiyatapwa uñachtʼayaskäna (Sant. 2:1-5, 9). Kunjamsa mä jaqejj mä jilataru jan ukajj mä kullakar isi jan ukajj manqʼa necesitatap uñjkasas jan yanaptʼkäna uka toqetwa parlarakïna. Jupajj Diosar confiytwa siskchïnsa, luratanakapamp jan uñachtʼayatap laykojj ukham satapajj inamayakïnwa (Sant. 2:14-16). Kunjamsa maynejj Diosar confiyatap luratanakapamp uñachtʼayi uka toqet parlañatakejja, Santiagojj Rahab warmitwa parläna (Sant. 2:25, 26). Rahab warmejj Jehová Diosat parlir istʼänwa, israelitanakar yanaptʼaskataps yatirakïnwa (Jos. 2:9-11). ¿Kunsa Diosar confiyatap uñachtʼayañatakejj luräna? Mark uñaqer sarapkäna uka pä israelitanakaruw jan jiwayatäpjjañapatak jarkʼaqäna. Ukham luratapatjja, pantjasirïkasas jan israelitäkasas Abrahanjam cheqapar sarnaqerit uñjatänwa. Rahab warmin luratapajja, Diosar confiyatas luratanakamp uñachtʼayañajj kunja wakiskirisa ukwa yatichistu. w23.12 pág. 5 párrs. 12, 13

Cristianonakajja janiw Biblian fácil amuytʼañjam yatichäwinakapak yateqañasäkiti. “Diosan imantat yatiñapsa” yateqañ munaraktanwa, ukatakejj espíritu santow yanaptʼistani (1 Cor. 2:9, 10). Bibliat sapak yatjjatañatakejj ¿janit kunatï Diosar jukʼamp jakʼachasiñatak yanaptʼkiristam uk yatjjatañ amtkasma? Ukatakejj kunjamsa Jehová Diosajj nayra servirinakapar munasitap uñachtʼayäna, kunjamsa ukajj jumar munasitap uñachtʼaytam ukwa yatjjatasma. Jan ukajj kunjamsa Jehová Diosajj nayra Israel markamp adorayasiñ munäna ukwa yatjjatasma, ukatjja kunjamsa jupajj jichhürunakan adorayasiñ muni ukampiw igualtʼayasma. Jan ukajj Jesusajj aka oraqen jakkasasa, Diosan arunakap yatiyasas kunjamsa taqpach profecianakap phoqawayäna ukwa jukʼamp yatjjatasma. Índice de las publicaciones Watch Tower ukat Jehová Diosan Testigonakapan Bibliat yatjjatapjjañapataki sat yanaptʼanakampiw yatjjatasma. Ukham yatjjatañaw Diosar jukʼamp confiyañatakisa ‘Diosar uñtʼañatakis’ yanaptʼätam (Prov. 2:4, 5). w23.10 págs. 18, 19 párrs. 3-5

Apóstol Pedrojj “wal” siskäna ukajja, griego arun “janatataña” sañ muni. Uka versiculon payïr partepajja, jilat kullakanakasan pantjasitanakap wali munasiñat perdonañatwa parli. Munasiñajj kunjamtï mä telajj imjjatki ukhamawa, ukampis janiw mä juchaksa ni pä juchaksa imjjatkiti, jan ukasti “walja juchanakwa” imjjati. Griego arun “imjjataña” sasinjja “perdonañatwa” parli. Kunjamtï mä jiskʼa telajj mä manchar imjjatkejja, ukhamarakiw munasiñajj mayninakan pantjasitanakapsa jan wali luratanakaps imjjataspa jan ukajj perdonaspa. Jilat kullakanakasarojj taqe chuymaw munasiñasa, ukhamatwa pantjasitanakap perdonañajj chʼamäkani ukhas perdonañäni (Col. 3:13). Mayninakar perdonktan ukhajja, taqe chuyma munasirïtaswa uñachtʼaytanjja, Jehová Diosarus kusisiyaraktanwa. w23.11 págs. 10, 11 párrs. 13-15

Josías reyejj 26 maranïkäna ukhaw templo askichañ qalltäna. Templo askichkasajja, “Jehová Diosan Leyinakan librop” katjapjjäna, “uka librojj Moisés taypi churatänwa”. Kuntï uka libron siskäna uk istʼasajja, jankʼakiw Jehová Diosan leyinakap istʼañatakejj cambionak luräna (2 Crón. 34:14, 19-21). ¿Jumajj sapüru Biblia liyiñ munasmati? Uk lurañatak chʼamachasisksta ukhajja, ¿Biblia liyiñajj gusttamti? Jumar yanaptʼir versiculonakat jan armasiñatakejj ¿kunsa lurta? Josías reyejj 39 maranïkäna ukhaw pantjasïna, pantjasitapajj jiwañaruw purtʼasiyäna. Jehová Diosar yanaptʼa mayiñat sipansa, jupa pachparuw confiyasïna (2 Crón. 35:20-25). ¿Kunsa ukat yateqsna? Qhawqha maranïskstansa, qhawqha tiempos Bibliat yatjjataskstanjja, Jehová Diosar jakʼachasiskakiñasawa. Jehová Diosar jakʼachasiñatakejja, yanaptʼap thaqapuniñasawa, Arupats yatjjataskakiñasawa, experienciani cristianonakan ewjjtʼanakaparus istʼañasarakiwa. Ukham lurasajja, janiw sinti jan wal pantjaskañäniti, kusisitaw jakasirakiñäni (Sant. 1:25). w23.09 pág. 12 párrs. 15, 16

Bibliajj yateqaskañ sarnaqer walja warminakatwa parli, jupanakajj Jehová Diosaruw servipjjäna, juparojj munasipjjarakïnwa. Jupanakajj ‘janiw kunans jiljapkänti, taqe kunans suma phoqerïpjjänwa’ (1 Tim. 3:11). Congregacionaman wali experienciani walja kullakanakaw utjpacha, jupanakat waljanak yateqarakisma. Jumatï tawaq kullakästajja, kawkïr kullakanakas jumatak yateqaskayäpjjaspa ukanakat amuytʼam, jupanakat yateqasiñ amtarakim. Ukatakejj kunjam suma chuymanïpjjes uk uñjasajja, kunjamatsa jupanakjam suma chuymanïsma uk amuytʼam. Humilde chuyman mä warmejja, Jehová Diosampis mayninakampis sum apasi. Jehová Diosar munasiri humilde warmejja, khitinakarutï Diosajj congregacionan irpañapatakisa familian pʼeqtʼañapatakis uttʼayki ukanakarojj istʼiwa (1 Cor. 11:3). w23.12 págs. 18, 19 párrs. 3-5

Mä chachajj esposapar munasispa, kunanaktï necesitki ukanak churaspa, kunjamas jikjjatasi uk amuyaspa, Diosar serviñatakis yanaptʼaspa ukwa Jehová Diosajj muni. Suma chuymanïñasa mä kun sum lurtʼañasa, mä arun amuytʼasirïñasa, warminakar respetañasa, confiykañ jaqëñas suma esposöñataki familiam sum pʼeqtʼañatakiw yanaptʼätam. Jumatï casarasïtajja, inas wawanïchïta. Waw sum uywañatakejj Jehová Diosat waljanak yateqasiñaw yanaptʼiristam (Efes. 6:4). Jehová Diosajj qhawqsa Jesús Yoqaparojj munasïna jupat kusisïna uk qhanwa jupar säna (Mar. 1:11). Jumatï wawanïyäta ukhajja, qhawqsa wawamar munasta uk sapa kutiw jupar sañama, suma luratanakapat felicittʼañamarakiwa. Jehová Diosat yateqasir jilatanakajja, suma cristianöñatakiw wawanakapar yanaptʼapjje. ¿Kunjamsa jichhatpachajj wawamar sum uywañatak wakichtʼasisma? Ukatakejj familiamarus congregacionankir jilat kullakanakarus munasiñampiw uñjañama, qhawqsa jupanakar munasta wali valoranit uñjarakta uk jupanakar sañamarakiwa (Juan 15:9). w23.12 págs. 28, 29 párrs. 17, 18

Jehová Diosan servirinakapajj taqe jaqenakjamarakiw jan walinakan uñjastanjja, usuntaraktansa. Janiw ukakïkiti, Jehová Diosan markapar uñisirinakajj jiwas contra saytʼapki jan ukajj arknaqapkistu uks aguantañasarakiwa. Cheqas Jehová Diosajj jan walinakan uñjasktan ukhajj janiw jarkʼaqkapunistaspati, ukampis jiwasar yanaptʼañatakiw arsuwayi (Is. 41:10). Jupan yanaptʼapampejj kusisitakïsksnawa, suma amtanakaruw pursna, sinti jan walinakan uñjaskasas janirakiw jupat jitheqtksnati. Bibliarjamajja, Diosajj jiwasar ‘sumankañap’ churañwa arsuwayi (Filip. 4:6, 7). Uka sumankañajja, Diosamp sum apasitasat chuymasan sumaki tranquiloki jikjjatasktan ukawa. Ukajj wali sumawa, “kuntï jaqejj amuyki ukat sipansa jukʼampi[raki]wa”. ¿Mä kutis Jehová Diosar chuymatpach wali llakita orasirïtati, uka qhepat kunjamas tranquilok jikjjatasirïta uk amuyarakirïtati? ‘Diosan sumankañapatwa’ maynejj ukham jikjjatasispa. w24.01 pág. 20 párr. 2; pág. 21 párr. 4

Diosar munasirinakajj taqe chuymaw Diosan sutip jachʼañchañ munapjje. David reyitakejj Diosan sutip jachʼañchañajj Jehová Dios pachpar jachʼañchañamp sasïnwa. Jehová Diosan sutip istʼtan ukhajja, jupajj kunja suma Diosasa, kunja suma chuymanisa ukwa pienstanjja, musparkañ luratanakapatsa piensaraktanwa. Davidatakejj Awkipan sutipajj santönwa, jachʼañcharakïnwa. Jupajj ‘taqe chuymapampiwa’, mä arunjja taqe jakañ vidapampiw Diosar jachʼañchañ munäna. Levitanakajj ukhamarakiw Jehová Diosar jachʼañchañ amtapjjäna. Diosan santo sutip kunjamtï wakiski ukham jachʼañchañatakejj janiw arunakajj utjkiti sasaw humilde chuymamp sapjjäna (Neh. 9:5). Chuymatpach arstʼat uka jachʼañchäwinak istʼasajj Jehová Diosajj ¡walpun kusispachäna! w24.02 pág. 9 párr. 6

Kun lurañtï amtkta uk jan phoqatamatjja, Jehová Diosajj janiw jan walit uñjkätamti (2 Cor. 8:12). Ukhamajj pantjasitanakamat yateqañatak chʼamachasim, kunanaktï jichhakamajj lurawaykta ukanak amtarakim. “Diosajj cheqapar uñjir Diosawa, jupajj janiw luratanakamatsa [...] armaskiti” sasaw Bibliajj qhanañchi (Heb. 6:10). Jumajj janirakiw kunanaktï lurawaykta ukanakat armasiñamäkiti. Kawkïr amtanaktï phoqawaykta ukanakat jan armasimti. Ukanakat mä qhawqhajj akanakäspawa: Jehová Diosan amigopäña, predikir mistuña jan ukajj bautisasiña. Jehová Diosar jukʼamp serviñatak amtkayäta ukanak phoqasajja, nayrar sarantaskakismawa, kuntï jichhajj amtkta uksa phoqarakismawa, ukwa ukampejj uñachtʼaytajja. Jehová Diosan yanaptʼapampejja, amtam phoqasmawa. Kuntï lurañ amtkta uk lurkasajja, kunjamsa Jehová Diosajj yanaptʼtam, bendisiraktam uk uñjasajj kusisitaw amtam phoqarakïta (2 Cor. 4:7). Janitï qarjtkätajja, jukʼamp suma bendicionanak katoqäta (Gál. 6:9). w23.05 pág. 31 párrs. 16-18

Jehová Diosajj qhawqsa servirinakapar munasi, jupanakat kusisiraki uk jupanakar uñachtʼayapuniwa. Jesusatjja “jupajj wali munat Wawajawa, nayajj wal jupat kusista” sasaw säna, uka arunakajj pay kutiw Biblian uñsti (Mat. 3:17; 17:5). ¿Qhawqsa Jehová Diosajj jumat kusisi uk istʼañ munasmati? Cheqas jupajj janiw alajjpachat parlankistuti, Biblia toqew parlistu. Kunjamsa Jesusajj discipulonakapar munasiñamp parlirïna uk amuytan ukhajja, Jehová Diosajj jiwasarus ukham parlkistaspa ukhamwa amuyastanjja. Jesusajj Awkipjam chuymanïtap wali sum uñachtʼayäna. Jupat jan jitheqtir discipulonakaparojj pantjasirïpkchïnsa, “munasipjjsmawa” sasaw sirïna. Biblian uk liytʼktan ukhajja, kunjamsa Jehová Diosajj uka pachpa sarakistu ukwa amuytanjja (Juan 15:9, 15). Yantʼanakan uñjaskañäni ukhajja, Diosajj janis jiwasat kusisitäkaspa ukham janipun amuyañäniti, antisas qhawqsa jupar munastan, confiyaraktan uk uñachtʼayañatak mä oportunidadäkaspas ukhamwa uñjañasa (Sant. 1:12). w24.03 pág. 28 párrs. 10, 11