Diciembre

¿Jehová Diosajj jiwatanakar jaktayañatakejj chʼamaniti? Jïsa, ukhamawa. Jupajj ‘Taqe Chʼamani Diosawa’ (Apoc. 1:8). Enemigopajj khitïskpansa, jupajj chhaqtayaspawa, jiwañarus chhaqtayarakiniwa (1 Cor. 15:26). Maysa toqetjja, Diosajj taqe kunwa amtaspa, ukatwa jiwatanakarojj jaktayaniw saraktanjja. Biblianjja, warawaranakarojj sutitkam jawsi siwa (Is. 40:26). Diosajj taqe jiwatanakaruw amtaraki (Job 14:13; Luc. 20: 38). Khitinakatï jiwatat jaktanipkani ukanakat taqe kunwa amtaspa, jiwki ukajj kunjam jaqënsa, kunjamansa jakasïna, kunanaks amtasïna taqe ukanakwa Diosajj amtaspa. Ukhamajja, Jehová Diosajj jiwatanakar jaktayäw siski uka promesaparojj confiysnawa, kuna laykutejj jupajj arupar phoqañ muniwa, chʼamanirakiwa. Maysa toqetjja, jupajj yaqhep jiwatanakarojj jaktayänwa, ukatwa jupajj arupar phoqaniwa sistanjja. Bibliajj qellqaskäna uka tiemponjja, Jehová Diosajj mä qhawqha chachanakarusa Jesucristorusa, jiwatanak jaktayapjjañapatakiw chʼam churarakïna. w23.04 pág. 9 párrs. 7-9

Wali amuyumpi llampʼu chuymampi arstʼañäni ukhajja, maynejj istʼaskakistaspawa. Maynitï jiwasamp jiskhisiñ munchi jan ukajj burlasiñ munchi ukhajja, parlaskakiñasajj janiw wakiskapuniti (Prov. 26:4). Ukampis waljanejj janiw ukhamäpkiti, istʼapjjarakistaspawa. Kunjamtï yatjjatawayktanjja, llampʼu chuymanïñatak chʼamachasisajj walja askinakwa jikjjatsna. Chʼama jisktʼanak jisktʼapkistani jan ukajj ina chʼusat jiskʼachapkistani ukhajja, llampʼu chuymamp jupanakar parlañatakejj Jehová Diosar chʼam mayisipjjañäni. Llampʼu chuymanïñajja, jan jiwasjam amuyapki ukanakamp jan jiskhisiñatakiw yanaptʼistani. Respetompi llampʼu chuymampi arsuñajja, kuntï jiwasata Biblian yatichäwinakapat amuyapki ukajj kʼarïtap amuyañatakiw yaqheparojj yanaptʼaspa. Ukhamajj ‘arjjatañatak wakichtʼatäpjjañäni, ukampis llampʼu chuymampi wali respetompi uk lurapjjañäni’ (1 Ped. 3:15). ¡Llampʼu chuymanïsajj chʼamani saytʼasirakiñäni! w23.09 pág. 19 párrs. 18, 19

Pacienciani jaqejj kunjamasa uk pusi toqet uñjañäni. Maya, janiw ratuk coleraskiti. Estresatäki ukhajj tranquilokïñatakiw chʼamachasi, mayninakajj colerayapki ukhas janiw ukhamat ukham kuttʼaykiti (Éx. 34:6). Paya, pacienciampiw suytʼi. Mä kunas jan jankʼak lurasjje ukhajja, tranquilokïskiwa, janiw jankʼak coleraskiti (Mat. 18:26, 27). Kimsa, janiw jan amuytʼasisajj jankʼak kuns lurkiti. Wali importante mä luräwi lurañapäki ukhajja, pacienciani jaqejj janiw jan amuytʼasisajj ratuk qalltkiti, janirakiw ratuk tukuyañatakejj apur apur lurkiti. Jan ukasti kunsa lurani uk amuykiptʼañatakejj tiempo apstʼasi, ukatsti sum lurañatakejj qhawqha tiempos wakisi ukarjamaw luri. Pusi, yantʼanak aguantañatakiw chʼamachasi. Pacienciani mä jaqejja, kuna sumanakatï jakäwipan utjki ukanakat piensañatakiw chʼamachasi, Jehová Diosarus kusisitaw serviskakini (Col. 1:11). Yatjjataniwayktan uka pusi toqenakanwa cristianonakajj paciencianïtas uñachtʼayañasa. w23.08 págs. 20, 21 párrs. 3-6

¿Kuna wakiskir razonatsa chuymas jarkʼaqasiñasa? Kuna laykutejj Jehová Diosaw chuymanak uñantirejja. ¿Ukajj kamsañs muni? Kuntï jaqejj jan uñjki ukwa Jehová Diosajj uñji. Kunanakatï chuymasan utjki ukanak taqpachwa jupajj uñjaraki. Jehová Diosan ewjjanakap wali valoranit uñjtan ukhajja, jupajj munasistuwa. Chuymasatï jakañ churir yatiñampi phoqtʼatächi ukhajja, janiw Supayampin jupan apnaqat aka mundompin kʼarinakapas jan wali amuyunakapas chuymasan utjkaniti (Juan 4:14; 1 Juan 5:18, 19). Jehová Diosar jukʼamp jakʼachasiñäni ukhajja, jukʼampiw jupar munasiñäni, respetarakiñäni. Janiw kunatï Dios Awkisan chuymap ustʼaykaspa uk lurkañäniti, janirakiw jupa contra juchachasiñas amuyusan utjkaniti. Croacia markankir Marta kullakajj niyapuniw qʼañu jucha lurañar purtʼasïna. Kullakajj akham siwa: “Janiw sum amuytʼasiñ puedkayätti. Uka jucha lurañajj mä ratukis kusistʼaykchitaspänjja, uk jan lurañatak chʼamachasiñajj janiw faciläkänti. Ukampis Jehová Diosar ajjsartʼañaw jarkʼaqetäna” sasa. ¿Kunjamsa ukajj yanaptʼäna? Jehová Diosar ajjsartʼataj laykojja, mä jan wali amtar purisajj kuna jan walinakansa uñjasirista uka toqetwa lupʼiyäta sasaw Marta kullakajj qhanañchi. Jiwasajj ukhamarakwa lursna. w23.06 págs. 20, 21 párrs. 3, 4

Jehová Diosan amtapajj akawa: sutip qʼomachaña, mä arunjja sutip qʼañuchki taqe uka kʼarinakat qʼomachaña, Jesusajj uk yatïnwa. Ukatwa discipulonakapar akham orasiñ yatichäna: “Alajjpachankir nanakan Awkija, sutimajj santot uñjatäpan” sasa (Mat. 6:9, nota). Ukat sipans yaqha jukʼamp wakiskirejj janiw utjkaspati, uk Jesusajj sum amuyäna. Aka oraqenjja, janiw khitis Jesusjamajj Jehová Diosan sutip qʼomachawaykiti. Ukampis Jesusar katuntapjjäna ukhajja, enemigonakapajj Dios contras jan wal parlkaspa, mä arunjja Jehová Diosan sutipsa jiskʼachkaspa ukham kʼarintapjjäna. Ukampis Jesusatakejj janiw yaqha ukham jachʼa juchajj utjkaspänti. Janïr katuntapkäna ukhajja, walpun llakisïna, kuna laykutejj Diosan sutip jiskʼachatapatwa juchañchapjjañapäna. Inas ukat janïr katuntapkäna ukhajj “sinti llakit” uñjaschïna (Luc. 22:41-44). w24.02 pág. 11 párr. 11

Wiñay jakañar apki uka tʼijüwinjja, familiasar munasiñat sipans Jehová Diosampir Jesusampiruw munasiñasa (Mat. 10:37). Ukampis ukampejja, familiasan utji uka lurañanakamp janis phoqañasäjjaspa ukham janiw sañ munktanti, janirakiw familiasajj Jehová Diosar serviñats jarkʼkistaspa ukham sañ munktanti. Antisas jiwasatï Diosampir Jesusampir kusisiyañ munstan ukhajja, familiasan kuna lurañanakatï waktʼkistu ukampejj phoqañasawa (1 Tim. 5:4, 8). Ukanakamp phoqasajj kusisitarakïñäniwa. Kunapachatï chacha warmejj munasiñamp uñjasipjje, respetasipjjaraki, awk taykajj wawanakapar munasipjje, yatichapjjaraki, wawanakajj awk taykapar istʼapjje ukhajja, familianakajj wali sumaw jakasipjje uk Jehová Diosajj sum yati (Efes. 5:33; 6:1, 4). Chacha warminakasa, wawanakasa, taqeniw Biblian yatiñani ewjjanakapar confiyañasa. Janipun kunatï jumatakejj walikjamäki ukarjamak kuns luramti, janirak markaman utjki uka amuyunakarjamasa jan ukajj akapachan yatjjattʼatanakan amuyunakaparjamas kuns luramti. Bibliat apstʼat qellqatanakasamp yanaptʼayasim. Ukanwa kunjamsa Biblian wiñay yatichäwinakaparjam sarnaqasma uka ewjjtʼanak jikjjatäta. w23.08 pág. 28 párrs. 6, 7

Kullakanakajj kunanaks sum lurañ yateqapjjañapawa. Kunanaktï wawäkasajj sum lurañ yateqkta ukajja, taqpach jakäwimanwa yanaptʼätam. Amuytʼañataki, liyiñsa qellqañsa sum yateqañajj wal yanaptʼätam. Yaqhep markanakanjja, warminakan liyiña qellqaña yatipjjañapajj janiw importantëkiti. Ukampis taqe cristianonakan liyiña qellqaña yatipjjañapajj wali importantewa (1 Tim. 4:13). Ukhamajj sum liytʼañ sum qellqañ yateqañat jan khitis jumar jarkʼpanti. ¿Ukanak yateqasajj kunanaks jikjjatäta? Trabajo jikjjatañas trabajonïskakiñas jumatak facilakïniwa. Maysa toqetjja, Diosan Arupat sum yateqäta, mayninakarojj sum yaticharakïta. Jukʼampis Bibliat liytʼasasa liytʼkta ukat lupʼisasa, Jehová Diosampejj jukʼamp sum apasïta (1 Tim. 4:15). w23.12 pág. 20 párrs. 10, 11

Yantʼanakar saykatañatakejj Jehová Diosaruw yanaptʼa mayisiñasa. Niyakejjay pantjasirïstanjja, kunatï jan walïki ukamp jan apayasiñatakejj sapa kutiw chʼamachasiñasa. Supayajj uka jan walinak jaytañajj wali chʼamäkaspas ukham amuyañasatakiw chʼamachasi. Cheqansa jan waltʼaykistaspa uka kusistʼañanakampiw amuyus qʼañuchi. Uka kusistʼañanakajj qʼañu amuyunak pʼeqesar phoqantasajja, Jehová Dios nayraqatan qʼañutwa uñjayistu, jachʼa jucha lurañaruw aparakistaspa (Mar. 7:21-23; Sant. 1:14, 15). Cheqas yantʼanakarojj janiw sapak saykatksnati, Jehová Diosan yanaptʼapwa muntanjja. Ukatwa Jesusajj orasiñ yatichkäna ukhajj akham säna: “Janirak yantʼarus puriyapjjestati, jan ukasti Supayat salvapjjeta” sasa (Mat. 6:13). Jehová Diosajj wal yanaptʼañ munistu, ukampis jiwasaw yanapap mayiñasa, ukarjamaw lurañasaraki. w23.05 págs. 6, 7 párrs. 15-17

Casadonakajj panpachanitï Jehová Diosamp sum apasiñ wali valoranit uñjapjjanejja, taqe chuymaw ewjjtʼanakaparjam sarnaqapjjani. Ukhamatwa kuna jan walinakatï munasiñ thayaraykaspa ukanakat jitheqtapjjani, saykatapjjarakini. Khitinakatï Jehová Diosan amigopäpki ukanakajja, jupjamäñatakiw chʼamachasipjje, jupajj kunjam chuymanisa ukham chuymanïñatakiw chʼamachasipjjaraki. Jupanakajj suma chuymani, pacienciani, perdonasiri ukhamäpjjewa (Efes. 4:32-5:1). Casadonakajj ukham chuymanïpjje ukhajj janiw munasiñajj thayarkiti. 25 jila maranak casarat Lena sat kullakajj akham siwa: “Khititï Diosamp sum apaski ukar munasiñas respetañas facilakiwa” sasa. Biblian parlki uka Joseampit Mariampit parltʼañäni. Davidat jutir wawanakapatjja, Jehová Diosajj Joseampir Mariampiruw Mesiasan awk taykapäñapatak ajllïna. ¿Kunatsa jupanakar ajllïna? Kuna laykutejj panpachaniw Jehová Diosan suma amigopäpjjäna, panpachanitakiw Diosajj nayrankarakïna. w23.05 págs. 20, 21 párrs. 3, 4

Jesús Pʼeqtʼirisajj perfectökchisa, aka oraqen irpapjjañapatak uttʼayki uka jilatanakajj janiw perfectöpkiti. Awisajja, jupanakan instruccionapar istʼañajj chʼamakïspawa, yamas jan lurañ munktan uk lurañasatak mayipkistu ukhaw jukʼamp chʼamäspa. Mä kutejj ukhamanwa apóstol Pedrojj uñjasïna, Moisesan Leyiparjamajj qʼañut uñjatäki uka animalanak manqʼañapatakiw mä angelajj mayïna. Ukampis Pedrojj kimspach kutiw jan manqʼañ munkänti (Hech. 10:9-16). Amuyuparjamajj uka machaq instruccionanakajj janiw walïkänti. Maysa toqetjja, apóstol Pablojj Jerusalenankir ancianonakajj mä Leyir istʼatap uñachtʼayañapatak mayipkäna ukhajja jupajj istʼänwa. Ukatakejj pusi chachanakampiw templor sarañapäna, ukhamat Leyirjam ukan qʼomachasiñapataki. Ukampis Pablojj ak yatïnwa: cristianonakan Leyirjam phoqapjjañapajj janiw wakisjjänti, janirakiw jupajj kuna jan wals lurkänti. Ukhamäkchïnsa, jankʼakiw ancianonakar istʼäna, Biblian akham siwa: “Qhepürusti uka pusi chachanakaruw Pablojj irparakïna, jupanakamp chikaw Leyirjam qʼomachasïna” sasa (Hech. 21:23, 24, 26). Istʼasirïtapatjja, Pablojj jilat kullakanakan mayachtʼatäpjjañapatakiw yanaptʼäna (Rom. 14:19, 21). w23.10 pág. 10 párrs. 15, 16

Mä suma amigonïñatakejj janiw ajjsarañajj wakiskiti sasin inas amuyaraksta. Ukampis Jehová Diosamp suma amigöñatakejj jupar ajjsartʼirïñaw wakisi. Qhawqha tiemposay Jehová Diosar serviskstanjja, taqeniw jupar ajjsartʼaskakiñatakejj chʼamachasiñasa. Diosar ajjsartʼiri wal respetiri jaqejja, Diosarojj munasiwa, kunanakatï jupamp sum apasitap aptʼasiykaspa ukanak janirakiw lurkiti. ‘Diosar ajjsaririnakatjja’, Jesusaw wali yateqaskañajja (Heb. 5:7). Jupajj taqe chuymaw Diosar respetäna (Is. 11:2, 3). Awkiparojj taqe chuymaw munasïna, istʼañwa munarakïna (Juan 14:21, 31). Jiwasajj ukhamarakiw Jehová Diosarojj munasirïtapata, yatiñanïtapata, cheqapar uñjirïtapata, chʼamani Diosätapat chuymatpach respettanjja, jachʼañcharaktanjja. Kunjamsa jupajj munasistu, kunjamsa luratanakasajj jupar kusisiyaspa jan ukajj llakisiyaspa uks yatiraktanwa. Jupar jan istʼktan ukhajj llakisiwa, ukampis istʼktan ukhajj chuymapajj kusisirakiwa (Sal. 78:41; Prov. 27:11). w23.06 pág. 14 párrs. 1, 2; pág. 15 párr. 5

Uziasajj wali chʼamani reyëjjäna ukhajja, taqe kunanaktï jikjjatkäna ukanak Jehová Diosan yanaptʼapamp jikjjatatap armasjjänwa. ¿Kunsa ukat yateqsna? Kunanaktï jakäwisansa Jehová Diosar serviñans jikjjatawayktan ukanakajj Jehová Diosatwa juti, janiw uk armasiñasäkiti. Ukanakat jachʼañchasiñat sipansa, Jehová Diosaruw taqe ukanakat jachʼañchañasa (1 Cor. 4:7). Humilde chuymanïñasawa, pantjasirïtassa mayninakan cheqañchatäñ wakisitapsa, janiw armasiñasäkiti. 60 jila maranakan mä jilatajj akham siwa: “Naya pachpar jan sinti importancia churasiñwa yateqawayta. Pantjasitajat cheqañchapkitu ukhajja, mejorañataki nayrar sarantaskakiñatakiw chʼamachasta” sasa. Humilde chuymanipunïñäni ukhajja, jakäwisan taqe kunaw sumar sarani (Prov. 22:4). w23.09 pág. 10 párrs. 10, 11

Nayrïr cristianonakajj aguantirïpjjañapänwa. Jakañ vidan utjki uka llakinakat sipansa, Diosar servipjjatap laykojj yaqha jan walinakanwa uñjasipjjäna. Waljaniw judío religión pʼeqtʼirinakampi Romankir autoridadanakamp arknaqat uñjasipjjäna, familianakapas jupanak contraw saytʼarakïna (Mat. 10:21). Kʼari yatichäwinakapamp congregación tʼaqjtayañ munir apostatanakats wal amuyasipjjañapänwa (Hech. 20:29, 30). Ukhamanakan uñjaskasas cristianonakajj aguantapjjänwa (Apoc. 2:3). ¿Kunas jupanakar yanaptʼäna? Kunjamsa yaqhanakajj aguantapjjäna ukwa Hebreo Arut Qellqatanakan liytʼapjjäna, ukanakat maynejj Job chachawa (Sant. 5:10, 11). Jehová Diosaruw oracionan chʼam mayisipjjäna (Hech. 4:29-31). Aguantapjjatap laykojj kuna bendicionanakas utjani uk amtapjjapunirïnwa (Hech. 5:41). Bibliansa Bibliat apstʼat qellqatanakasansa, kunjamsa yaqhanakajj aguantapjjäna uka toqet parlir walja sarnaqäwinakaw utji, jiwasatï uka sarnaqäwinakat sapa kuti lupʼiñäni ukhajja, aguantarakiñäniwa. w23.07 pág. 3 párrs. 5, 6

Jehová Diosampi Jesusampejj janipuniw jaytjkistaniti. Pedrojj Cristor jan uñtʼir tuküna ukhajja, Jesusarojj arkaskakiniti jan ukajj ukharukich jaytjjani uka wakiskir amtaruw puriñapäna. Jesusajj Jehová Diosaruw Pedrotak ruwtʼarapïna, ukhamat Diosar confiyañan jan aynachtʼañapataki. Ukatjja Pedrotak orasitapwa jupar yatiyäna, jumaw jilanakamar chʼamañchtʼäta sasaw jupar sarakïna (Luc. 22:31, 32). ¡Jesusan uka arunakap amtañajj walpun Pedror chʼamañchtʼpachäna! Jiwasarojj ukhamarakiw wali wakiskir amtanakar puriñajj waktʼistani. Jehová Diosar jan jitheqtas serviskakiñatakejja, inas jupajj awatirinak toqejj munasiñamp chʼamañchtʼchistani (Efes. 4:8, 11). Kunjamtï uñjktanjja, Jehová Diosajj Pedrompiru mayni apostolonakampirojj kunanakatï jakañatak wakiski ukanak churapunïnwa. Jiwasatï Diosar serviñ nayrar uchañäni ukhajja, ukhamarakiw kunanakatï jakañatak wakiski ukanak churistani. w23.09 págs. 24, 25 párrs. 14, 15

Mayninakat mä jukʼaksa khuyaptʼayaskstanjja, Jehová Diosajj uk uñjiwa. Wali valorani sacrificiotwa uk uñji, manu kuttʼayañapäkaspas ukhamwa Jehová Diosajj uñjaraki. Inas jumajj ancianota jan ukajj siervo ministerialat nayrajj sirvchiyäta. Kunanaktï munasiñat lurkayäta ukanakjja Jehová Diosajj janiw armkiti (1 Cor. 15:58). Kunanaktï jichhajj munasiñat luraskakta ukanaksa uñjaskiwa. Jehová Diosajj taqeni jupar munassna jaqe masisarus munasiraksna ukwa muni. Jupar jukʼamp munasiñatakejj Biblia liyiñasawa, kuntï liyktan ukjjat lupʼiñasawa, sapüruw orasiñasaraki. Jilat kullakanakar wal munasitasajj luratanakasanwa uñjasiñapa. Munasitasajj jukʼamp jiltani ukhajja, Jehová Diosampis jilat kullakanakasampis jukʼamp sumaw apasiñäni. ¡Wiñayatakiw jupanakampejj suma amigöpjjañäni! w23.07 pág. 10 párr. 11; pág. 11 párr. 13; pág. 13 párr. 18

Sapa cristianow kunsa kʼumara jakasiñatakejj lurani uk amtjjañapa. Kunjamsa qollayasiñäni uk amtañatakejja, Biblian utjki uka leyinakapajj kamsis wila toqetsa espiritunakamp parlañ toqets ukwa amuytʼañapa (Hech. 15:20; Gál. 5:19, 20). Ukat uksarojj kunjamsa qollayasiñäni ukajj sapa maynitäjjewa. Kawkïr tratamientos walïspa kawkïris jan walïkarakispa uk jiwasajj sums amtjjstanjja, kunjamsa jilat kullakanakajj qollasiñ amtapjje uk respetañasawa. Ukatakejj aka pusi ewjjtʼanak amtañasawa: 1) Diosan Reinopakiw taqpach usunak wiñayatak chhaqtayani (Is. 33:24), 2) sapa cristianojj kunjamsa qollayasini “ukat janipuniw payachasiñapäkiti” (Rom. 14:5), 3) janiw mayninakarojj juzgañasäkiti, janirakiw khitirus lanktʼasiyañasäkiti (Rom. 14:13), 4) cristianonakkamajj munastanwa, kunanaktï amuyktan ukat sipansa, congregacionan mayachtʼatäñaw jukʼamp importantejja (Rom. 14:15, 19, 20). w23.07 pág. 24 párr. 15

¿Jumajj Jehová Diosar walt munasta? Cheqas wal munaspachätajja. Cheqas nayra maranakatpachaw walja jaqenakajj Diosar munasipjjäna (Sal. 104:33, 34). Waljaniw Jehová Diosar serviñatakejj sacrificionak lurapjjäna, jupanakat yaqhepajj nayra Israel markankir nazareonakäpjjänwa, ukajj “yaqhachata” sañ munaraki. Nazareonakajj Diosat jan jitheqtir israelitanakäpjjänwa, Diosar wali sum serviñatakiw sacrificionak lurapjjarakïna. Moisesan Leyiparjamajja, mä chachasa jan ukajj mä warmis mä qhawqha tiempo nazareöñatakiw mä promesa luraspäna (Núm. 6:1, 2). Maynejj uka promesa luräna ukhajja, mä qhawqha mayitanakampiw phoqañapäna, janiw mayni israelitanakjamajj taqe kuns lurañapäkänti. ¿Kunatsa maynejj nazareöñ amtäna? Jehová Diosar wal munasitapata, walja bendicionanakapat jupar yuspärañatakiw nazareöñ amtäna (Deut. 6:5; 16:17). w24.02 pág. 14 párrs. 1, 2

Biblianjja, “jan jitheqtiri” jan ukajj “munasiri jan jaytjasiri” sasin traducitäki uka hebreo arojj munasiñata, taqe chuym jan jitheqtirïñat parlañatakiw apnaqasi. Jilapartejja, Diosajj servirinakapar munasitapat parlañatakiw apnaqasi, Diosan servirinakapajj jupanakkam munasipki ukat parlañatakejj uka pachpa aruw apnaqasiraki (2 Sam. 9:6, 7). Jehová Diosajj jupat jan jitheqtañaswa munaraki. Tiempompejja, jukʼampiw Diosat jan jitheqtkañäniti. Ukaw Daniel profetan jakäwipan uñjasïna. Danielajj jakkäna taqe uka urunakanjja, Jehová Diosat jan jitheqtatap walja kutiw uñachtʼayäna. Ukampis 90 jila maranëjjäna ukhajja, mä jachʼa yantʼanwa uñjasïna. Palacion trabajirinakat yaqhepajj Danielar uñisipjjänwa, janirakiw Jehová Diosar respetapkänti. Ukatwa Danielar jiwayañatakejj arustʼasipjjäna. Danielar yantʼañatakejj Darío reyimpiw mä ley apsuyapjjäna: Danielajj Diosat jan jitheqtiriti jan ukajj Darío reyit jan jitheqtiricha ukwa uñachtʼayañapäna. Reyit jan jitheqtirïtap uñachtʼayañatakisa jan castigatäñatakisa, Danielajj 30 urunakaw Jehová Diosar jan orasiñapäkänti. Ukampis jupajj janiw Diosat jitheqtkänti (Dan. 6:12-15, 20-22). w23.08 pág. 5 párrs. 10-12

Jehová Diosajj jilat kullakanakasar munasiskaksna ukwa muni. Congregacionan maynitï jan wal uñjchistu ukhajja, jan wals lurañ munkistaspa ukham janiw amuyañasäkiti, jupajj kunatï Jehová Diosatak walïki uk lurañatakiw chʼamachasiski (Prov. 12:18). Pantjasirïskstansa Jehová Diosajj wal munasistu. Pantjasktan ukhajj janiw jaytanukkistuti, janirakiw chuyma ustʼat quedaskiti (Sal. 103:9). Jehová Diosat yateqasis mayninakar perdonañajj wali wakiskiriwa (Efes. 4:32-5:1). Niyakejjay akapachan tukusiñapajj wali jakʼankjjchejja, jilat kullakanakasamp mayachtʼatäñasawa, uk janipun armapjjañäniti. Jukʼamp arknaqataw uñjasiñäni, inas carcelan llawintat uñjasirakchiñäni. Ukhamanakan uñjasisajj jilat kullakanakasampïñajj jukʼamp wakiskirïniwa (Prov. 17:17). w24.03 págs. 15, 16 párrs. 6, 7

Bibliajj Jehová Diosar jakʼachasir waynanakatwa parli, jupanakajj Dios nayraqatan wali suma uñjatäpjjänwa, kusisitaw jakasipjjarakïna. Davidat parltʼañäni. Jupajj waynäkasaw Jehová Diosan amigopäñ amtäna, tiempompejj Diosat jan jitheqtir reyëjjänwa (1 Rey. 3:6; 9:4, 5; 14:8). Davidan jakäwipat yatjjatañajja, Jehová Diosar jan jitheqtas serviñatakiw yanaptʼätam. Marcosar jan ukajj Timoteor jukʼamp sum uñtʼañatakiw yatjjatarakisma. Jupanakajj waynäkasaw Jehová Diosar serviñ amtapjjäna. Diosat jan jitheqtiri servirinakat uñtʼatäpjjarakïnwa. Ukham amtasajja, Jehová Diosaruw kusisiyapjjäna. Kuntï jichhajj lurkäta ukarjamaw jutïrin sum jakasïta jan ukajj jan wals jakasïta. Juma pachpar confiyasiñat sipans Jehová Diosar confiyäta ukhajja, jupaw suma amtanakar puriñatak yanaptʼätam. Wali kusisitaw sum jakasisma, taqe kunanaktï Jehová Dios layk lurkta ukjja, jupajj wali valoranitwa uñji, jan uk armasimti. Jiwasar wal munasiri alajjpachankir Awkisar serviñajj janiw inamayäkiti. w23.09 pág. 13 párrs. 18, 19

Apóstol Pablojj jilat kullakanakan pantjasirïpjjatap yatïnwa. Jerusalenankir congregacionar sarkäna ukhajja, ukankirinakat waljanejj janiw jupar confiyapkänti, ajjsarapjjarakïnwa (Hech. 9:26). Yaqhepanakajj jupar jan confiyjjapjjañapatakejj jan walinakwa jupjjat parlapjjäna (2 Cor. 10:10). Pablojj experienciani mä jilataruw jan wali amtar purir uñjäna, ukajj mayni cristianonakarojj lanktʼasiyaspänwa (Gál. 2:11, 12). Compañeronakapat Marcos sat jilatas jupar chuym pʼakintarakïnwa (Hech. 15:37, 38). Chuym ustʼayapkitu uka jilat kullakanakamp jan chikachasjjañatakejj walja razonanakaw utjitu sasaw Pablojj amuyaspäna. Ukampis janiw ukanakamp apayasisajj Jehová Diosat jitheqtkänti, jan ukasti jan jitheqtasaw jupar serviskakïna. ¿Kunas Pablor yanaptʼpachäna? Jupajj jilat kullakanakapar wal munasïna, pantjasitanakap uñchʼukiñat sipansa kunja suma chuymanïpjjänsa uk uñjañatakiw chʼamachasirakïna. Munasiñaw perdonañatakejj jupar yanaptʼäna, kunjamtï jichhürutak ajllita textojj siski ukhama. w24.03 pág. 15 párrs. 4, 5

Biblian parlki uka sarnaqäwinakajja, llampʼu chuymanïñajj kunja wakiskirisa ukwa qhanstayi. Isaacajj Guerar markan jakkäna ukhajja, uka cheqan jakir filisteonakajj jupat envidiasiñ qalltapjjäna, ukatwa tatapan servirinakapajj allsupkäna uka phujunak laqʼampi tapantapjjäna, uka phujunakat chʼajjwañat sipansa Isaacajj wali jayar sarjjasaw yaqha phujunak allsüna (Gén. 26:12-18). Ukampis filisteonakajj nanakankiwa sasaw sapjjarakïna. Ukhamäkchïnsa, Isaacajj llampʼu chuymanïtapwa uñachtʼayäna (Gén. 26:19-25). Walja kuti jan walinak lurapkäna ukhajja, ¿kunas llampʼu chuymanïñatakejj Isaacar yanaptʼäna? Jupajj awk taykapat yateqpachäna. Abrahanajj pacienciampiw kuns lurirïna, Sarasti ‘pacienciani llampʼu chuymani’ ukhamänwa (1 Ped. 3:4-6; Gén. 21:22-34). w23.09 pág. 15 párr. 4

Jehová Diosajj tiempoparuw munasiñap uñachtʼayäna, jilïr Yoqaparuw aka oraqer khitanirakïna. Jesusasti jaqenakarojj Reinotwa parläna, juchampit jiwañampit jiwasar kutsuyañatakiw jiwarakïna. Ukatjja alajjpachan jakañataki Diosan Reinopan Reyjam apnaqañatakiw jaktarakïna. Kunjamsa Diosajj sutip jachʼañchani uka toqetwa jilapartejj Bibliajj parli, kunapachatï Criston apnaqat Reino toqejj Diosan amtapajj aka oraqetak phoqaskani ukhaw sutipajj jachʼañchatäni. Jehová Diosan amtap phoqasiñap janiw kunas jarkʼkaspati, jupa pachpaw taqe ukanakan phoqasiñapatakejj mä promesa arsuwayi (Is. 46:10; Heb. 6:17, 18). Tiempompejja, aka oraqejj mä suma paraisöjjaniwa, ukanwa Adanampin Evampin cheqapar sarnaqer wawanakapajj perfectöjjapjjani, wiñayatakiw jakapjjarakini (Sal. 22:26). Ukampis Jehová Diosajj janiw ukanakak lurkaniti. Jupajj alajjpachankir servirinakaparusa aka oraqenkir servirinakaparus mä familiak mayachtʼani, taqenis Taqe Kunjjar Munañanïtap taqe chuym reconosipjjaspa ukwa Diosajj muni (Efes. 1:8-11). ¿Kunjamsa Jehová Diosajj amtap phoqani ukajj wali musparkañajjaya? w23.10 pág. 20 párrs. 7, 8

Babilonian jakasiñ jaytjjapjjäna uka judionakajj Jerusalenar puripkäna ukat mä qhawqha tiempotjja, qollqet pistʼataw uñjasipjjäna, política toqets jan waltʼäwinakaw utjäna, enemigonakapas jupanak contraw saytʼapjjäna. Walja jan walinakan uñjasisajja, yaqhepatakejj Jehová Diosan templop wasitat saytʼayaskäna ukan taqe chuym yanaptʼañajj wali chʼamäjjänwa. Ukatwa Jehová Diosajj markar chʼamañchtʼapjjañapatakejj Ageo ukat Zacarías profetanakar khitäna, jupanakajj wali sumwa markarojj chʼamañchtʼapjjäna (Ageo 1:1; Zac. 1:1). Ukampis niya 50 maranak qhepatjja, judionakajj wasitatwa desanimasipjjäna. Ukhamaruw Leyit copianak wali sum lurir Esdrasajj Babiloniat Jerusalenar kuttʼanïna, ukhamat judionakar chʼamañchtʼañataki, Diosar adorañ nayrar uchapjjañapatak yanaptʼañataki (Esd. 7:1, 6). Diosan nayra servirinakapajj jarkʼatas uñjasipjjchïnjja, Ageo ukat Zacarías profetanakan profecianakapaw Jehová Diosar confiyaskakiñatak jupanakar yanaptʼäna, jiwasarojj ukhamarakiw jan walinakan uñjasktan ukhajj Jehová Diosar confiyaskakiñatak yanaptʼistaspa (Prov. 22:19). w23.11 pág. 14 párrs. 2, 3

¿Kunjamsa jilat kullakanakasar munasitas uñachtʼaysna? Mä toqetjja, jilat kullakanakasar chuymachtʼasaw uñachtʼaysna. Ukham luraskakiñatakejj sinttʼasirïñaw wakisi (1 Tes. 4:18). ¿Kunjamsa taqe chuyma munasiskaksna? Mayninakan pantjasitanakap perdonañatak chʼamachasisaw uk lursna. ¿Kunatsa jichhürunakan maynit maynikam munasiñajj wali wakiskirejja? Kuntï Pedrojj siskäna uk amuytʼañäni, jupajj akham sänwa: “Taqe kunan tukusïwipaw jakʼachasinjje. Ukhamajj […] maynit maynikam wal munasipjjam” sasa (1 Ped. 4:7, 8). Akapachan tukusiñap jakʼachasisinkipan ¿kun pasañapsa suytanjja? Discipulonakapat parlkasinjja, Jesusajj akham sänwa: “Sutij laykusti taqe markankir jaqenakaw uñisipjjarakïtam” sasa (Mat. 24:9). Jaqenakan uñisitpachas Jehová Diosar serviskakiñatakejja, mayachtʼatäñasawa. Supayajj tʼaqjtayañwa munistu, ukampis jiwasatï maynit maynikam munasiñäni ukhajja, janiw Supayan amtap phoqasiykañäniti (Filip. 2:1, 2). w23.11 pág. 13 párrs. 18, 19

Biblian cheqa yatichäwinakapajj wali chʼamaniwa. Jehová Diosajj khitisa, kunjam Diosasa uk jaqenakar yatichtan ukhajja, wali musparkañanakaw uñjasi. Niyakejjay jupanakan amuyunakapajj Supayan kʼari yatichäwinakapamp chʼamaktʼayatächïnjja, jukʼat jukʼatwa amuytatasipjje, kunjamtï jiwasajj uñjktan ukhamwa Jehová Diosar uñj-jjapjjaraki (Is. 40:26). Cheqapar uñjir Diosätap yatisajj segurow jikjjatasipjje (Deut. 32:4). Qhawqha yatiñanisa uk yatisajj wal musparapjje (Is. 55:9; Rom. 11:33). Diosan wali munasirïtap yatiñas jupanakar wal chuymachtʼi (1 Juan 4:8). Jehová Diosar jakʼachasisajj wiñayatakiw jakassna, wawaparakïsnawa sasaw confiyjjapjje. Alajjpachankir Awkipar jakʼachasipjjañapatak jaqenakar yanaptʼañajj ¿wali jachʼa privilegiojjaya? Ukham luratasat Jehová Diosajj jupamp ‘chik trabajiritwa’ uñjistu (1 Cor. 3:5). w24.02 pág. 12 párr. 15

¿Jumajj Bibliat yateqasktati? Jan ukajj ¿Testigo awk taykamach Bibliat yatichasipktam? Ukhamächi ukhajj inas bautisasiñ amtasksta. ¡Ukajj wali askiwa! Ukampis janïr bautisaskasajj Jehová Diosaruw nayraqat jakäwim katuyasiñama. ¿Kunjamsa maynejj Jehová Diosar jakäwip katuyasispa? “Jumarukiw adoräma, jakäwijan juman munañam lurañaw nayrankani” sasaw mä oracionan mä promesa Diosar lurañapa. Mä arunjja, taqe chuymapampi, taqe almapampi, taqe amuyupampi, taqe chʼamapamp jupar munasiñatakiw mä promesa luraski (Mar. 12:30). Jan khitin uñjkataw Diosar jakäwim katuyasiñama, Jehová Diosampikiw uk parltʼasiñama. Ukampis bautismojj taqenin uñjkataw lurasi. Ukhamatwa mayninakajj Jehová Diosar jakäwim katuyasjjatam yatipjjani. Jehová Diosar jakäwim katuyasiñatak mä promesa luratamajj wali sagradowa. Uka arsutam phoqañatakiw chʼamachasiñama, ukham lurañamwa Jehová Diosajj munaraki (Ecl. 5:4). w24.03 pág. 2 párr. 2; pág. 3 párr. 5

Taqe matrimonionakajj “jan waltʼäwinakanwa uñjasipjjani” sasaw Bibliajj wali qhan yatichistu (1 Cor. 7:28). Kuna laykutejj chachas warmis pantjasirïpjjewa, mayj mayja chuymanïpjjewa, janiw jupanakar mä igualak kun lurañas gustkarakiti. Inas jupanakajj yaqha costumbren markat jutirïpjjchi jan ukajj kunaymanin jakasir familiat jutirïpjjchi. Inas casarasiñatak uñtʼasisipkäna ukhajj kunjam chuymanipunïpjjänsa ukajj jan qhanäkchïnti, ukampis tiempompiw ukajj qhanstjjaspa. Taqe ukanakaw mä chacha warmirojj jan waltʼayaspa. Pantjasipjjatap reconosiñat sipansa, jan waltʼäwinak panpachan askichañat sipansa, inas purapatak juchañchasjjapjjchispa jan ukajj jaljtañakis jan ukajj divorciasiñakis walëjjaspa ukham amuyapjjchispa. ¿Ukampis uk lurañajj walïspati? Janiwa. Casadonakajj matrimonior respetapjjaspa ukwa Jehová Diosajj muni, esposopampi jan ukajj esposapampi sum apasiñajj chʼamäkchi ukhas chikäskakiñatak chʼamachasipjjaspa ukwa munaraki. w24.03 pág. 16 párr. 8; pág. 17 párr. 11

Bautisaskta uka qhepatsa Diosar jukʼamp uñtʼjjasasa, jupar jukʼamp munasjjasasa, kuntï suytʼaskta ukajj jukʼampiw jiltpachäna (Heb. 5:13-6:1). Kuntï Romanos 5:2-4 textojj siski ukhamwa uñjaspachäyätajja. Kunayman jan walinak aguantasajja, kunjamsa Jehová Diosajj sum uñjtam uk amuyarakpachätawa. Qhawqsa Jehová Diosajj jumat kusisi uk yatisajja, jupajj promesanakap phoqapuniniwa sasin jukʼampiw confiypachätajja. Qalltat sipansa suytʼäwimajj jukʼampiw jiltarakpacha. Jichhajj cheqapunïskiw sisjjpachätawa, wali valoranit uñjpachätajja, chuymaruw purtʼarakpachätamjja. Kuntï suytʼaskta ukajj jakäwiman qhanaw uñjaspacha, kunjams familiamar uñjta, kunanaks amtta, kunjamsa tiempom apnaqta ukanakanwa uñjaspacha. Diosamp sum uñjatäñajj suytʼañatakiw yanaptʼistu siskäna uka qhepatjja, Pablojj aka wakiskir yatichäw qhanstayarakïna: kuntï suytʼasktan ukajj phoqasipuniniwa (Rom. 15:13). w23.12 págs. 12, 13 párrs. 16-19

Jiwasatï sinti jan walin uñjasiskstan ukhajja, janiw kunjamtï jikjjatasirïktan, amuyirïktan jan ukajj lurirïktan ukham lurañ puedjjsnati. Kunjamtï oladanakajj mä barcor uksar aksar jaqnaqkejja, ukhamarakiw jiwasajj chuymasan jikjjatassna. Ukham llakinakajj aynachtʼaykistu ukhajj ¿kunjamsa Jehová Diosajj yanaptʼistu? Jupajj suma saytʼatäñasatak yanaptʼañwa arsuwayi. Mä barcojj jallu taypinkki thaya taypinkki ukhajja, uksar aksar jaqnaqataw uñjasispa. Jan ukham jaqnaqatäñatakejja, walja barconakajj purap lador uma manqhankir chheqanakanïpjjewa. Ukhamatwa barcojj jan sinti jaqnaqatäjjeti, pasajeronakas sumakiw seguro viajipjjaraki. Ukampis uka chheqanakajj barcojj saraski ukhakiw jilpachajj yanaptʼaspa. Jiwasampejj ukhamarakiwa, jiwasatï jan waltʼäwinakan uñjaskasas suma saytʼatäñ munstan ukhajja, nayrar sarantaskakiñasawa, mä arunjja Jehová Diosarojj jan jitheqtas serviskakiñasawa. w24.01 pág. 22 párrs. 7, 8

Ajjsarkäta ukhajj akham jisktʼasim: “¿Kunsa Jehová Diosajj nayra tiempon lurawayi?” sasa. Mä toqetjja, Diosan luratanakapat amuykiptʼam. Jehová Diosajj janiw jamachʼinakarusa panqaranakarus jupar uñtasitsa ni jupar adorapjjañapatakis lurawaykiti, ukampis kunjamsa ukanakar cuidi uk uñjtan ukhajja Jehová Diosaw cuidaskistani sasin jukʼamp confiyañatakiw yanaptʼistu (Mat. 6:25-32). Maysa toqetjja, kuntï Jehová Diosajj servirinakap laykojj lurawayki uka toqet amuykiptʼam. Inas kunjamsa Diosan mä serviripajj nayra tiempon jupar confiyäna uka toqet yatjjatchisma, jan ukajj inas jichha tiempon Diosar servir mä jilatana jan ukajj mä kullakan experienciap liytʼarakchisma. Kunjamsa Jehová Diosajj jichhakam cuidawaytam uka toqet lupʼirakim. ¿Kunjamsa kunatï cheqäki uk uñtʼañatak Diosajj yanaptʼawaytam? (Juan 6:44). ¿Kunjamsa oracionanakamar jaysawayi? (1 Juan 5:14). Wali munat Yoqapar jiwasanak layku khitaniwayki ukajj ¿kunjamsa sapürojj yanaptʼtam? (Efes. 1:7; Heb. 4:14-16). w24.01 pág. 4 párr. 6; pág. 7 párr. 17