¿Kunas cheqpach armagedonajja?

‘Supayan ajayunakapaw taqe reyinakaru tantachañatak mistunipjjäna. Ukatsti reyinakarojj Armagedón satäkis uka cheqaruw tantachapjjäna.’ (APOCALIPSIS 16:14, 16)

ARMAGEDÓN jan ukajj Har-magedón sasin awisajj qellqaski ukajja, mä lugaran sutipawa. Ukham sutini mä lugarajj janiw kawkhans utjkänti.

Ukampis ¿kunatsa Armagedón arjja mä chʼajjwäwit parlañatak apnaqapjjpacha? Ukhamajj ¿kunapunis Armagedonajja?

Armagedón satäkis uka cheqaruw tantachapjjäna

Har-Magedón hebreo arojja “Meguidó qollu sañwa muni”. Ukampis janis ukham sutin mä qollus utjkchïnjja, Meguidó sat cheqajj utjänwa. Ukajja nayra Israel markar puriñatak pä thakhejj jikiskäna, uka cheqat alay toqenwa jikjjatasïna. Uka jakʼanakanwa walja chʼajjwäwinakajj apasirïna, ukatwa Meguidó uka sutejj chʼajjwaña sañs munkaspa ukham amuyapjje.a

Kuna chʼajjwäwinakas Meguidó cheqan utjäna, uk yatiñajj janiw wakiskirïkiti jan ukasti kunatsa nuwasipjjerïna uk yatjjatañwa muntanjja. Meguidó sat cheqajja, israelitanakar Jehová Diosajj Suma Oraqe churkäna uka cheqankänwa (Éxodo 33:1; Josué 12:7, 21). Diosajj uñisirinakamatjja jarkʼaqämawa sasaw jupanakar säna (Deuteronomio 6:18, 19). Ukjja phoqänwa. Kunapachatï Jabín sat cananeo reyejj israelitanakamp nuwasipjjañapatak Sisaran pʼeqtʼat ejercitopar khitäna ukhajja, Je­hová Diosajj qhespiyänwa (Jueces 4:14-16).

Ukampis, Har-Magedón jan ukajj Armagedón, uka arojj kamsañs muni uk yathatañajj wali wakiskiriwa. Armagedonajj pä jachʼa chamanakas nuwasiñatak katjasipkaspa ukham amuyasi.

Apocalipsis qellqatarjamajj mä jukʼa tiempotjja Supayampi ukat sajjranakapampejj niyaw akapachankir gobiernonakarojj ejercitonakap Diosan markap contra saytʼañapatak wiytani. Ukat Diosajj uñisirinakapar tukjkäni ukhajja, millón millón jaqenakaw jiwapjjani (Apocalipsis 19:11-18).

Ukampis Jehová Diosajj ‘khuyapayasiri, jan jankʼak colerasiri, ukhamarak wali munasiriwa’ sasaw Bibliajj qhanañchi. Ukhamajj ¿kunatsa waljja jaqenakar jiwarayani? (Nehemías 9:17.) Uk amuyañatakejj aka kimsa jistʼanakat yatjjatañasawa: 1) ¿Khitis chʼajjwañ qallti? 2) ¿Kunatsa Jehová Diosajj uka chʼajjwäwinki? 3) Uka qhepatjja ¿kunanakas pasani?

1. ¿KHITIS CHʼAJJWAÑ QALLTI?

Armagedón chʼajjwäwejj janiw Diosan castigopäkiti, antisas Diosajj uñisirinakapatjja aski jaqenakarojj arjjataniwa. ¿Khitinakas uñisirinakajja? Akapachankir ‘taqe reyinakawa’ mä arunjja, oraqpachan pʼeqtʼir gobiernonakawa, ukat ¿kunatsa chʼajjwapjje? Kunjamatï jaqenakajj mä tʼejjetar munañaparjam apnaqkejja, ukar uñatasitwa Supayajj akapachankir gobiernonakarusa, ejercitonakaparus apnaqani. Jupanakaruw Diosan markap contra saytʼapjjañapatak wiytani (Apocalipsis 16:13, 14; 19:17, 18).

Jichhürunakanjja parlañatakisa, Diosar yupaychañatakisa maynejj derechoniwa sasaw yaqhep gobiernonakajj sapjje. Ukat religionanak contraw saytʼapjjäni ukat tukjañwa munapjjäni siski ukajj janiw amuyañjamäkiti. Ukampis religionanak contrajj 1900 maranakanjja saytʼapjjapunïnwa. Ukat jichhürunakanjja ukhamarakiw uñjasi.b Ukampisa Armagedón chʼajjwäwitjja pä toqetwa amuyañajj wakisispa. Nayraqatjja, Oraqpachanwa Diosan markap contra saytʼapjjani. Ukat ukjjarusti Jehová Diosajj jukʼamp chʼamampiw markap arjjatañatakejj saytʼani, janiw kunapachas ukham saytʼaskänti (Jeremías 25:32, 33). Ukatwa Bibliajj uka chʼajjwäwirojj ‘Taqe chʼaman Jehová Diosan jachʼa urupa’ sasajj sutichi.

2. ¿KUNATSA JEHOVÁ DIOSAJJ UKA CHʼAJJWÄWINKI?

Taqenimpis sumankapjjam ukat uñisirinakaparus munasipjjarakim sasaw Jehová Diosajj servirinakapar yatichi (Miqueas 4:1-3; Mateo 5:43, 44; 26:52). Ukat kunapachatï jupanak contra saytʼapjjani ukhajja, servirinakapajj janiw chʼajjwapkaniti. Diosatï jupanakar jan arjjatkaspa ukhajja, tukjatäpjjaspawa. Ukampis markapajj Diosan sutipwa api ukhamajj Jehová Diosajj janiw sutip jiskʼachayañ munkäniti. Ukat uñisirinakapatï markapar tukjaspa ukhajja, Diosajj janis munasirïkaspa, janis chʼamanïkaspa, ukat janis cheqapar uñjirikaspa ukhamaw amuyasispa. Ukampis ukajj janiw ukhamakaniti (Salmo 37:28, 29).

Jehová Diosajj janiw khitin jiwañaps munkiti, ukatwa janïräkipan kuntï lurkäni ukjja yatiyistu (2 Pedro 3:9). Nayrapachajja markap contra saytʼapjjerïna ukhajja, Jehová Diosajj jankʼakiw arjjatirïna sasaw Bibliajj qhanañchi (2 Reyes 19:35). Kunapachatï Supayampi ukat jupan apnaqat gobiernonakampi Diosan markaparu tukjañ munapjjäni ukhajja, Jehová Diosajj jankʼakiw chʼamapampejj jupanakar tukjani. Ukat jan wali jaqenakarojj Diosajj tukjaniwa sasaw Bibliajj jayäkipan qhanañcharakistu (Proverbios 2:21, 22; 2 Tesalonicenses 1:6-9). Ukhaw uñisirinakajj Taqe chʼaman Diosamp nuwasiskatap amuyasipjjani (Ezequiel 38:21-23).

3. UKA QHEPATJJA ¿KUNANAKAS PASANI?

Armagedón chʼajjwäwejja walja millón millón jaqenakan qhesphipjjañapatakiw yanaptʼani. Uka qhepatwa aka Oraqen suma jakasiñajj qalltjjani (Apocalipsis 21:3, 4).

Apocalipsis qellqatanjja jan jaktʼkay ‘walja jaqenakaw’ Armagedonat qhesphipjjani sasaw qhanañchi (Apocalipsis 7:9, 14). Ukat Jehová Diosan yanaptʼapampejj uka qhespirinakajj mä paraisoruw aka Oraq tukuyapjjani, kunjam­tï ­Jehová Diosajj qalltatpach munkäna ukhama.

Ukhamasti, ¿kunapachas Diosan markap contra saytʼapjjpachäni?

[Qhanañchäwinaka]

[6 janan fotopa]

Nayrapachajja, Jehová Diosajj markaparojj arjjatänwa

[7 janan fotopa]

Armagedón chʼajjwäwinjja, ukhamarakiw Jehová Diosajj markapar arjjatani