Jilat kullakanakasajj kunjamsa Diosar serviñansa, chuymapansa jikjjatasipjje, kuna yanaptʼanaksa munapjje ukwa amuyañasa.
¿Tamaman misionerjam yanaptʼasmati?
JANÏR alajjpachar makatkasajja, Jesusajj akham sasaw arkirinakapar säna: ‘Jumanakajj taqe aka Oraqpachanwa nayat qhanañchapjjetäta’ sasa (Hech. 1:8). Ukampis ¿kunjamsa Oraqpachan yatiyapjjasapäna?
Wali uñtʼat Universidadan trabajiri Martin Goodman sat mä profesorajj akham siwa: “Romanonakajj apnaqkäna uka tiempon jakasiri cristianonakajj judionakat sipansa, mayni religionankirinakat sipansa mayjapjjänwa” sasa. ¿Kunansa mayjapjjäna? Jupanakajj Jesusat yateqasisaw “Diosan reinopat” yatiyirejj yaqha markanakaru sarapjjäna. Ukhamatwa cheqa yatichäwinak yateqañ munirinakarojj thaqhapjjäna (Luc. 4:43). Ukatwa nayrïr patak maranakanjja, cristiano taman “apostolonakajj” utjäna. Apóstol siski uka arojja ‘khitatäña’ sañwa muni. Jupanakajja, yatiyir sarapjjañapataki khitatäpjjänwa (Mar. 3:14, NM). Jesusajj akham sasaw jupanakar ewjjtʼawayäna: “Taqe akapachankir jaqenakar yatiyir sarapjjam, nayar arkir tukuyapjjam” sasa (Mat. 28:18-20).
Jichhürunakanjja, Jehová Diosan servirinakapat waljanejj ukhamarakiw apostolonakat yateqasisajj taqe chuym yatiyasipki. Jupanakasti, kawkhantï yanaptʼajj munaski ukar sarañatakejj jankʼakiw “akankasktwa nayajj, nayar khitasita” sasin sapjje (Isa. 6:8). Kunjamtï Galaad Escuelar saririnakajj yaqha markanakaru sarapkejja, ukhamarakiw uka jilat kullakanakajj sarapjje. Yaqhepasti, pachpa markapanwa yaqha cheqanakar sarapjjaraki. Mayninakasti, yaqha aru parlapki uka tamanakana, gruponakana yanaptʼañatakejj yaqha aru parlañwa yateqapjjaraki. Ukanak lurañajj jupanakatak chʼamakïchisa, Jehová Diosaru ukhamarak Jesusar munasipjjatap laykuw lurapjje. Yanaptʼañatakejj qawqha qollqes munasini uk sum amuytʼasaw yaqha cheqanakar sarapjje (Luc. 14:28-30). Uka jilat kullakanakajj wali sumwa tamanakan yanaptʼasipki.
Cheqansa yaqhepanakatakejj yaqha aru parlañ yateqañasa, kawkhantï yatiyirinakajj munaski uka cheqanakar sarañas chʼamakiwa. Ukampis taqeniw tamasanjja misionerjam yanaptʼsna. ¿Kunjamsa uk lursna? Uk jichhajj yatjjatañäni.
TAMASAN MISIONERJAM YANAPTʼAPJJAÑÄNI
¿Kunanakansa mayninakar yanaptʼasma?
Nayrïr patak maranakanjja, cristianonakajj janis taqenejj misioneröpkchïnjja, pachpa markapanwa Diosan arunakap taqe chuyma yatiyapjjerïna. Apóstol Pablojj Timoteor ewjjtʼkäna uka arunakarjamaw lurapjjäna. Pablojj sänwa: “Qhespiyasiñ arunak parlañaru uchasirakim, lurañanakamjja sumrak phoqham” sasa (2 Tim. 4:5). Jichhürunakanjja, jiwasajj uka ewjjanakarjamaw Diosan arunakap yatiyaraksna. Diosan Reinopatjja, taqeniw jaqenakar yatiyañasa, yatichañasaraki. Kunjamtï misioneronakajj tamanakan yanaptʼapki ukhamarakwa jiwasajj tamasan yanaptʼsna.
Jilat kullakanakajj misionerot yaqha markar sarasinjja, uka markan yatinoqtañatakiw chʼamachasipjjañapa. Jiwasajj inas kawkhantï yatiyirinakajj munaski uka cheqar jan sarirjamäkstanti, ukampis ¿yaqha toqenakat yatiyañatak chʼamachassnati? Khä 1940 maranjja, semanan mä kuti callenakan yatiyapjjañapatakiw jilat kullakanakar chʼamañchtʼasïna. Jiwasasti ¿callenakan yatiyaraksnati? ¿Nuknaqañ carritonakajj tamasan utjki ukampi yatiyañ yantʼtati?
Yatiyir sarapjjañapatak yanaptʼam.
Jiwasatï ‘jaqenakajj istʼapjjestaniwa’ sasin amuyañäni ukhajja, taqe chuymaw yatiyir sarañäni. Kawkhantï yatiyirinakajj munaski uka cheqanakarusa, yaqha aru parlapki uka tamanakan yanaptʼañatakisa, experienciani jilat kullakanakaw jilpachajj sarapjje. Ukhamatwa jilat kullakanakarojj jukʼamp yatiyapjjañapataki yanaptʼapjje. Tamanakan walja lurañanakaw utji, mä tamantï wakichtʼat jilatanakajj jan utjkchi ukhajja, misionerot irnaqtʼir jilatanakaw uka luräwinak lurañ yatipjje. Jumatï bautisat jilatästajja, ¿janit tamamankir jilat kullakanakaru yanaptʼañatakejj chʼamachaskasma? (1 Tim. 3:1).
TAMANKIRINAKAR YANAPTʼAM CHʼAMAÑCHTʼARAKIM
Wakiski ukapachan yanaptʼam.
¿Kunanak lurasas tamasan yanaptʼaraksna? Jilatästansa, kullakästansa jan ukajj wayn tawaqöstansa, taqeniw tamanjja jilat kullakanakar yanaptʼsna (Col. 4:11).
Jilat kullakanakasar yanaptʼañatakejja, sumwa jupanakar uñtʼañasa. Bibliajj akham sasaw ewjjtʼistu: “Thaqañasaw maynit maynikama kunjäman yanaptʼasiñasataki” sasa (Heb. 10:24). Ukham lurañatakejja, janiw jilat kullakanakan jakäwipar mitisiñasäkiti, jan ukasti kunjamsa jikjjatasipjje, kuna yanaptʼsa munapjje ukwa amuytʼañasa. Inas Diosar serviskakiñatak yanaptʼatäña, jan ukajj yaqha toqet yanaptʼatäñ munapjjchi. Awisajj irpir chuymaninaka ukhamarak yanapirinakapakiw ukjj lurapjje (Gál. 6:1). Ukampis taqeniw jilïr jilat kullakanakarusa, jan waltʼäwinakan jikjjatasipki uka familianakarus yanaptʼsna.
Llakitanakar chuymachtʼam, chʼamañchtʼarakim.
Salvatore jilatat parltʼañäni. Jupajj qollqe toqet qʼala aynachtʼatänwa. Uka jan waltʼäwit mistuñatakejj negociopsa, utapsa yaqhep cosasanakapsa aljasjjänwa, familiapatsa llakisirakïnwa. Ukhaman jikjjatasitapjja tamapankir yaqha familiaw amuyäna. Ukatwa qollqemp yanaptʼäna, mä trabajo jikjjatañatakis jilatampiru kullakampirojj yanaptʼapjjarakïnwa. Walja arumanakaw llakinakap istʼasajj familpachar chʼamañchtʼapjjäna. Ukhamatwa uka pä familiajj jichhürkamas wali sum apasisipkaki. Salvatore jilatan familiapajj jan walinsa jikjjataskchïnjja, kunjamsa yanaptʼa katoqäna uk amtasajj wali kusisitaw uka pä familiajj jikjjatasipjje.
Cheqpach cristianonakajja, Diosan arunakap yatiyañatakejj jankʼakïtanwa. Jesusat yateqasisajj taqeniruw Diosan amtanakap yatiytanjja. Yaqha cheqar yanaptʼirejj sarirjamästansa janisa, mayninakar yanaptʼañatakejj chʼamachasiñasapuniwa. Ukampis tamasankir jilat kullakanakasaruw jukʼamp yanaptʼañasa (Gál. 6:10). Jiwasatï tiemposampi, chʼamasampi, kunanakatï utjkistu ukanakampi yaqhanakar yanaptʼañäni ukhajja, kusisitaw jakasiñäni. Ukatjja kunatï askïki uk luraskakiñatakis yanaptʼarakistaniwa (Col. 1:10; Hech. 20:35).