¿Kuntï yatichapktam ukajj Bibliarjamäskiti?

ORAQPACHANJJA sapa kimsa jaqetjja, mä jaqew nayajj cristianötwa, jan ukajj Criston arkiripätwa sasin sapjje. Jumajj jupanak ¿taypinkaraktati? Jichhürunakanjja, walja religionanakaw cristianöpjjtwa sasin sapjje, ukampis yatichäwinakapajj mayj mayjawa ukhamarak mayj mayjwa amuyapjjaraki. Inas kuntï jumajj creykta ukajj jan kuntï yaqhanakajj creyipki ukamp pachpäkchiti. Uka toqet yatjjatañamajj ¿wakisispati? Jïsa, jumatï Bibliajj kuntï yatichki ukarjam sarnaqañ munsta ukhajja, yatjjatañamajj wakisiwa.

Jesucriston nayrïr arkirinakaparojja, cristianonaka sasaw uñtʼasïna (Hechos 11:26). Uka tiemponjja, uka sapa yupaychäwikiw utjäna. Jupanakajja, cristianonak uttʼayiri Jesusan yatichäwinakaparjama ukat kamachinakaparjamaw taqe kunsa lurapjjäna. Iglesiamanjja ¿ukhamarakti lurapjje? Jesusajj yatichkäna ¿ukanakti yatichapjje? ¿Kuntï Jesusan nayrïr arkirinakapajj creyipkäna ukhamarakti creyipjje? ¿Kunjamatsa uk yatisma? Bibliat yatjjatasakiw uk yatisma.

Ak amuytʼam: Jesusajj Diosan Aruparjamaw Qollan Qellqatanak uñjäna, ukatwa wal respetäna. Khitinakatï Biblian yatichäwinakap maysar apanukusin amuyunakap yatichapkäna ukanakarojj janiw askit uñjirïkänti (Marcos 7:9-13). Ukhamajj Jesusan cheqpach arkirinakapajja, kuntï Bibliajj yatichki ukarjamaw kunsa lurapjjeripachäna. Ukhamasti cristianonakajj akham sasaw jisktʼasipjjañapa: “¿Kuntï religionajan yatichapki ukajj Bibliarjamaskiti?” sasa. Uka jisktʼan qhanañchäwip yatiñatakejja, kuntï iglesiaman yatichapki ukat kuntï Bibliajj yatichki ukampejj pachpati janicha uk yatjjatañamaw wakisi.

Jesusajj cheqa kankañampiw Diosarojj yupaychasiñapa sasaw säna. Uka cheqa kankañajj Biblianwa jikjjatasi (Juan 4:24; 17:17). Apóstol Pablojja, “kunatejj cheqäki uk [uñtʼañäni, jan ukajj yatiñäni]” ukhakiw qhespiyassna sasaw säna (1 Timoteo 2:4). Ukhamajj kuntï creyktan ukajja, Bibliajj yatichki ukarjamäñapawa. Jan ukhamäkaspa ukhajja, ¡jan waliruw purtʼassna!

KUNTÏ CREYKTAN UKAJJ BIBLIARJAMATI JANICHA UK ¿KUNJAMATSA YATSNA?

Recuadron sojjta jisktʼanakajj utjki uk liytʼañamataki ukat kamsasas Bibliajj uka jisktʼanakar qhanañchi uk yatjjatañamatakiw chʼamañchtʼapjjsma. Biblian jiskʼa tʼaqanakap liytʼäta ukat kunsa uka toqet qhanañchi uksa lupʼirakïtawa. Ukat akham sas jisktʼasim: “¿Kuntï religionajan yatichapki ukat kuntï Bibliajj yatichki ukampejj pachpakiti?” sasa.

Uka toqet yatjjatañajja, sum amuytʼasiñatakiw yanaptʼätam. Jumatï religionaman yatichapki ukajj Bibliarjamati janicha uk yatjjatañ munsta ukhajja, Jehová Diosan Testigonakapaw yanaptʼapjjeristam. Ukhamajj Bibliat jan qollqe mayisaki yatichayasiñatakejj jupanakaruw mayisma, jan ukajj Internetan jw.org sat cheqaruw mantasma.

1 JISKTʼA: ¿Khitis Diosajja?

QHANAÑCHÄWI: Jehová Diosawa, Jupajj Jesusan Awkipawa. Wiñay Dios, Taqe kun luriri ukhamarak Taqe chʼamaniwa.

BIBLIAJJ AKHAM SIWA

“Jesucristo Tatitusan [Jehová] Dios Awkiparojj yuspagarapjjapuntwa jumanakatak Diosat maykasinjja” (Colosenses 1:3).

“Tata, nanakan [Jehová] Diosajja, jumajj askïtawa jachʼañchäwi, gloria, ukhamarak munañanïña katoqañatakejja. Jumaw taqe kuns ina chʼusat lurtajja, munañamatarakwa taqe kunas jakaskaraki, juman uskutarakiwa” (Apocalipsis 4:11).

Romanos 10:13; 1 Timoteo 1:17 qellqatanak uñjjattʼarakïta.

2 JISKTʼA: ¿Khitis Jesucristojja?

QHANAÑCHÄWI: Jesusajja Diosan jilïr Yoqapawa. Niyakejjay Diosan luratächejja, jupajj qalltaniwa. Ukhamarusa, taqe chuymaw Diosarojj istʼaraki.

BIBLIAJJ AKHAM SIWA

“Awkejj nayata jukʼampi jiliriwa” (Juan 14:28, MT).

‘Jesucristojja jan uñjkaya Diosar uñtasitawa, jupasti taqe kunatejj utjki ukatjja nayrïriwa’ (Colosenses 1:15, NM).

Mateo 26:39; 1 Corintios 15:28 qellqatanak uñjjattʼarakïta.

3 JISKTʼA: ¿Kunas qollan ajayojja?

QHANAÑCHÄWI: Qollan ajayojj janiw mä jaqëkiti, jan ukasti Diosan chʼamapawa ukampiw munañap phoqe. Jaqenakajja, qollan ajayumpi phoqtʼatäpjjaspawa ukat chʼamapsa katoqapjjarakispawa.

BIBLIAJJ AKHAM SIWA

“Kunapachatejj Elisabetajj Marian aruntatap istʼkän ukapachaw, purakapan wawajj onjjti. Elisabetasti qollan ajayumpi phoqtʼatänwa” (Lucas 1:41).

“Qollan ajayuw jumanakjjar jutani, ukatjja chʼam katoqapjjäta” (Hechos 1:8).

Génesis 1:2; Hechos 2:1-4; 10:38 qellqatanak uñjjattʼarakïta.

4 JISKTʼA: ¿Kunas Diosan Reinopajja?

QHANAÑCHÄWI: Diosan Reinopajj alajjpachankir mä gobiernowa. Reyipasti Jesusawa, juparakiw Diosan munañap aka oraqpachan phoqasiñapataki yanaptʼani.

BIBLIAJJ AKHAM SIWA

“Paqallqöri angelasti trompetapwa phustʼasïna, ukatsti mä arunakarakiw alajjpachana jachʼat istʼasïna, akham sasa: ‘Akapach markanakajj Tatit Cristosaruw jaqkatjjapjje. Jichhajj juparakiw wiñayan wiñayapataki apnaqani’” (Apocalipsis 11:15).

Daniel 2:44; Mateo 6:9, 10 qellqatanak uñjjattʼarakïta.

5 JISKTʼA: ¿Suma jaqenakajj alajjpacharut sarapjje?

QHANAÑCHÄWI: Janiwa. Diosajj Jupar jan jitheqtas servir mä qawqha jaqenakaruw alajjpachar sarapjjañapatak ajlliwayi, jupanakarojj “jiskʼa tama” sasaw uñtʼasi. Jupanakajj Jesusamp chikaw reyinakjama aka Oraqenkir jaqenakar apnaqanipjjani.

BIBLIAJJ AKHAM SIWA

“Jan ajjsarapjjamti, jiskʼa tama ovejanakajja, ukampis alajjpach Awkimajj khuyapayasiñapana reinop churaña munapjjtam” (Lucas 12:32).

“Jupanakajj Diosampina Cristompina sacerdotepäpjjaniwa. Waranqa mararakiw jupampejj reinapjjani” (Apocalipsis 20:6).

Apocalipsis 14:1, 3 qellqat uñjjattʼarakïta.

6 JISKTʼA: ¿Diosajj aka Oraqempi ukat jaqenakamp kun lurañsa amtawayi?

QHANAÑCHÄWI: Diosan Reinopajj aka Oraq apnaqjjani ukhajja, mä Paraisoruw tukuyani. Ukansti Diosat jan jitheqtas servir jaqenakaw jan usuntasa ukat wiñayatak suman jakasipjjarakini.

BIBLIAJJ AKHAM SIWA

“Llampʼu chuymaninakasti oraq katoqapjjani, jilarkir sumankañampiw kusisipjjarakini” (Salmo 37:10, 11).

“Diosajj taqe jachanakapwa nayranakapatjja picharani, janirakiw jiwañas, jachañas utjkjjaniti, warariñasa ni usuyasiñasa. Taqe kunanakatï nayrajj utjkän ukanakajj tukusjjewa” (Apocalipsis 21:3, 4).

Salmo 37:29; 2 Pedro 3:13 qellqatanak uñjjattʼarakïta.