Jehová Diosamp sapüru trabajipjjañäni

1. ¿Kunjamanakatsa Jehová Diosampi trabajipjjsna?

JEHOVÁ DIOSAJJ lurkistäna ukhajja, amtanakap phoqañatak Jupamp chika trabajsna ukwa munäna. Pantjasirïkstansa Diosar jan jitheqtas servirinakajj sapüruw Jupamp trabajiraksna. Sañäni, Diosan arunakap yatiyasa, Jesusan arkirip tukupjjañapatak jaqenakar yanaptʼasajj ‘Diosamp chikaw trabajipjjtanjja’ sasaw Bibliajj qhanañchi (1 Cor. 3:5-9). Taqe kun Luriri Diosamp chika trabajiñajj mä suma bendicionawa. Ukampis janiw Diosan arunakap yatiyasaki Jesusan arkirip tukuyasakejj Jupamp trabajksnati. Aka yatichäwinjja, kunanakansa Jehová Diosampi trabajiraksna ukwa mä qhawqha uñjaskañäni. 1) Familiasaru, jilat kullakanakasaru yanaptʼasa, 2) mayninakar katoqtʼasa, 3) Jehová Diosan markapatak trabajisa, Diosar jukʼamp serviñatak chʼamachasisa (Col. 3:23).

2. Jehová Diosar serviñatak kuntï mayninakajj lurapki uk luratanakasampejj ¿kunatsa jan igualayañasäki?

² Aka yatichäwi yatjjatkasajja, Jehová Diosar serviñatak kuntï mayninakajj lurapki uk jan luratanakasampejj igualayapjjañäniti. Ak amtañasawa, janiw taqenis mä pachpa maranïktanti, ni taqenis kʼumaräktanti, janirakiw mä pachpaki kuns lurañ yatktanti ukat yaqha ukhamanakansa janiw pachpäktanti. Apóstol Pablojj Diosan amuytʼayatäsajj akham sänwa: “Sapa mayniw pachpa luratanakapat amuykiptʼasiñapa, ukhamatwa luratanakaparjam kusisini. Jupajj janiw luratanakapjja yaqhan luratanakapampejj igualayañapäkiti” sasa (Gál. 6:4).

FAMILIASARUS JILAT KULLAKANAKARUS YANAPTʼAPJJAÑÄNI

3. Familiapar sum uñjirinakajj Jehová Diosamp chikaw trabajipjje sasajj ¿kunatsa sissna?

³ Jehová Diosajj familiasaru sum uñjsna ukwa muni. Amuytʼañataki, inas familiamaru jan kuns faltañapatakejj trabajiñamächi. Walja taykanakajja, jiskʼa wawanakaparuw utan cuidapjje. Yaqhep cristianonakajja, chuymankipstata awk taykaparuw cuidapjjaraki. Ukanak lurañajj wakisipuniwa, Bibliajj akham siwa: “Maynitejj jupankirinakat jan llakiskchi, cheqansa familiapat jan llakiskchejja, kuna yatichäwinakarutï jiwasajj creyktan ukjja apanukjjewa, Diosar jan confiyiri jaqet sipansa jukʼampëjjarakiwa” sasa (1 Tim. 5:8). Jiwasantï uka lurañanakajj utjchistojja, inas Diosar serviñan jan jukʼampi lurirjamäkstanti. Ukampis janiw llakisiñasäkiti, familiasaru yanaptʼasajj Jehová Diosaruw kusisiytanjja (1 Cor. 10:31).

4. ¿Kunjamsa awk taykanakajj Diosan Reinop nayrar uchapjjaspa, ukat kuna bendicionanaksa jikjjatapjje?

⁴ Awk taykanakajja, wawanakapar Diosar jukʼamp servipjjañapatak chʼamañchtʼapjje ukhajja, Jehová Diosampiw trabajisipki. Tiempompejj uka wawanakapajj jaya cheqanakaruw Diosar sapürunjam serviñataki sarjjapjje. Yaqhepajj misionerota, mayninakajj kawkjantï yatiyirinakajj jukʼamp munaski ukanwa precursorat servipjje, yaqhepasti Betelanwa servipjjaraki. Niyakejjay wali jayankapjjchejja, janiw familiapampejj sapakuti jikisjjapjjeti. Ukampis wawanakapar yanaptʼañataki chʼamachasipki uka awk taykanakajja, kawkjantï wawanakapajj servisipki uka pachpan servisipkakiñapatakiw chʼamañchapjje. ¿Kunatsa ukham lurapjje? Wawanakapajj Diosan Reinop nayrar uchapjjatap uñjasajj wal kusisipjje, ukatwa ukham lurapjje (3 Juan 4). Uka awk taykanakat yaqhepajja, Ana warmjamaw jikjjatasipjje. Jupajja, “[Samuel] wawjja Tatituruw katuyta” sasaw säna. Awk taykanakatakejj Jehová Diosampi ukham trabajiñajj mä suma bendicionawa, janipuniw kunampis uk cambiapkaspati (1 Sam. 1:28).

5. ¿Kunjamsa jilat kullakanakarojj yanaptʼsna? (Página 23 ukankir foto uñjjattʼäta).

⁵ Inas familiasajj jan ukhaman jichhajj jikjjataskchiti, ukhamächi ukhajj ¿kunsa lursna? Chuymankipstat jilat kullakanakaru, usutanakaru jan ukajj yanaptʼa munapki ukanakaruw yanaptʼsna. Jan ukajja, familiapar uñjasipki ukanakarus yanaptʼaraksnawa. Ukhamajj congregacionan ¿khitinakas yanaptʼa munasipki uk janit uñjksna? Inas mä kullakajj chuymankipstat awk taykaparu cuidaskchi, ¿janit kullakarojj awk taykaparu uñjas yanaptʼksna, ukhamat yaqha luräwinakap lurañapataki? Jan ukajj yanaptʼa munapki ukanakaruw tantachäwinakar irpsna, ukat kunanaktï munapki uk alañatakiw yanaptʼsna, jan ukajj hospitalankapki ukanakar visittʼiriw sarsna. Ukanak lurasajja, jilat kullakanakan mayisitanakap Jehová Diosajj istʼañapatakiw yanaptʼasktanjja, mä arunjja Diosampiw trabajisktanjja (1 Corintios 10:24 liytʼañataki).

KATOQTʼASIRÏPJJAÑÄNI

6. ¿Katoqtʼasirïñajj kamsañsa muni?

⁶ Jehová Diosampi trabajirinakajj katoqtʼasirinakäpjjewa. Griego Arut Qellqatanakanjja, ‘katoqtʼasiri’ siski uka arojj “yaqha jaqenakar munasiñat yanaptʼa[ña]” sañwa muni (Heb. 13:2; nota). Biblian qellqatäki uka sarnaqäwinakatwa katoqtʼasirïñ yateqassna (Gén. 18:1-5). Ukhamajj ‘jiwasjam creyentëpjjpasa’ janisa, mayninakar yanaptʼañ thaqañasapuniwa (Gál. 6:10).

7. Congregacionar chʼamañchtʼañataki visittʼapkistu ukanakarojj ¿kunatsa sum katoqtʼañasa?

⁷ Congregacionar chʼamañchtʼañataki visittʼapkistu ukanakarojj sum katoqtʼañasawa, ukhamatwa Diosampejj trabajiraksna (3 Juan 5, 8 liytʼañataki). Ukham katoqtʼasajj ‘purapatwa chʼamañchtʼasipjjañäni’ (Rom. 1:11, 12). Olaf sat jilatat parltʼañäni, jupajj waynitüskäna ukhajja, congregacionaparojj tamanak tumptʼiri mä soltero jilataw visittʼäna, uka jilatarojj janiw khitis alojtʼirjamäkänti. Uk uñjasajja, Olaf jilatajj awk taykaparuw uka jilatar alojtʼañatakejj jisktʼäna, jupanakajj janiw Testigöpkänti. Ukhamäkchïnsa, ‘walikiwa alojtʼasmawa ukampis jumajj sillonaruw ikïta’ sasaw sapjjäna. Uka jilatan ukham katoqtʼatapajj wali askïnwa, jupajj akham siwa: “Uka semanajj wali kusiskañapunïnwa, tamanak tumptʼiri jilatampejj sapüruw alwata sartapjjerïta, juntʼüma umaskasajj wakiskirïkis ukanakatwa parltʼasipjjerïta. Kunjamsa jupajj chʼamañchtʼitäna ukaw Diosar sapürunjam serviñataki yanaptʼawayitu” sasa. Olaf jilatajj aka 40 qhepa maranakanjja, walja markanakanwa misionerot serviwayi.

8. Janis yanaptʼatajj yuspärapkchistojja, ¿kunatsa mayninakar munasiñat yanaptʼaskakiñasa? Uk mä experienciampi qhanañchtʼma.

⁸ Yaqhepajj qalltan janis yuspärapkchistanejja, kunayman toqetwa yaqha jaqenakar munasiñat yanaptʼsna. Kunjamsa uk lursna uk uñjañäni, ukatakejj España markankir mä kullakat parltʼañäni. Jupajja, Yésica sat warmiruw Bibliat yatichäna, uka warmejj Ecuador markatänwa, jupar mä kutejj wal jachir uñjasajja, ‘¿kunatsa ukham jachta?’ sasaw kullakajj jisktʼäna. Uka warmejj janïr España markar jutkasajj kunjamsa wali pobre jakasïna, kunanakas pasäna taqe ukanakwa kullakar yatiyäna. Mä kutejja, janiw manqʼañapatakejj kunapas utjkänti, wawaparojj umakwa churäna. Mä urojja, wawap ikjayañatak ichnaqkasaw Diosar wal mayisïna. Mä jukʼatjja, pä Testigonakaw utap leqtʼanipjjäna, ukampis Yésica warmejj janiw jupanakar sum katoqkänti, revista churapkän uksa chʼiyanoqänwa. Akham sasaw toqjjäna: “¿Aka revistti wawajar manqʼayäjja?” sasa. Kullakanakajja, jan colerañapatakiw chuymachtʼañ munapjjäna ukampis inamayakïnwa. Mä jukʼatjja, manqʼañanakani mä canastwa uta punkuparu jaytapjjäna. Kunjamsa uka kullakanakajj uka urojj munasiñat yanaptʼapjjäna uk amtasaw Yésica warmejj chuymap wal chʼalljjtayasïna. Mayisitaparojj Diosajj istʼänwa, ukampis jupajj janiw istʼañ munkänti, ukanak amtasaw wal jachäna. Ukampis jichhajja, Jehová Diosar serviñwa amtäna. Cheqas uka kullakanakan munasiñat yanaptʼapjjatapatwa jupajj cambiäna (Ecl. 11:1, 6).

DIOSAN MARKAPAN YANAPTʼAÑATAK JANKʼAKÏPJJAÑÄNI

9, 10. 1) Nayra Israel markanjja, ¿kunanakansa yanaptʼajj munasïna? 2) ¿Kunanakansa congregacionan yanaptʼajj munasi?

⁹ Nayra Israel markanjja, kunayman luräwitakiw yanaptʼirinakajj munasïna (Éx. 36:2; 1 Crón. 29:5; Neh. 11:2). Jichhürunakanjja, ukhamarakiw jiwasajj tiemposampi, qollqesampi, chʼamasampi jilat kullakanakarojj yanaptʼaraksna. Ukham yanaptʼasajja, wali kusisitäñäniwa, walja bendicionanakwa katoqarakiñäni.

¹⁰ Bibliajja, taqe jilatanakaruw jilïr irpirïpjjañapataki, congregacionan yanapiripäpjjañapataki chʼamañchtʼi, ukhamat Jehová Diosampi trabajipjjañapataki (1 Tim. 3:1, 8, 9; 1 Ped. 5:2, 3). Ukatak chʼamachasipki ukanakajja, jilat kullakanakar Diosar serviñansa kunanjjay wakischi ukansa yanaptʼañwa munapjje (Hech. 6:1-4). Inas jilïr irpirinakajj tantachäwinakan katoqtʼañamataki, qellqatanak congregacionan churañamataki, kawkjatsa yatiyir mistusini uk waktʼayañamatak mayipjjstam jan ukajj yaqha ukhamanak mayipjjstam. Uka trabajonakan yanaptʼirinakajja, mayninakar yanaptʼañajj wali kusiskañawa sapjjewa.

11. Tantachasiñ Utanak lurañan yanaptʼasajj jikjjatkäna uka amiganakapajja, ¿kunjamsa mä kullakarojj yanaptʼapjjäna?

¹¹ Khitinakatï Jehová Diosan markapatak trabajipki ukanakajja, walja amigonakwa jikjjatapjje. Margie kullakat parltʼañäni, jupajj 18 maranakaw Tantachasiñ Utanak luraski ukan yanaptʼawayi. Uka maranakanjja, walja tawaq kullakanakaruw ukan trabajiñ yatichawayi. ‘Ukham yanaptʼañajj wali askiwa, Diosar serviñanjja, purapatwa chʼamañchtʼasipjjta’ sasaw jupajj saraki (Rom. 1:12). Margie kullakajj llakinakan uñjasïna ukhajja, uka amiganakapaw jupar wal chuymachtʼapjjäna. ¿Jiwasajj Tantachasiñ Utanak lurapki ukana jan ukajj yaqha ukhamanakan yanaptʼawaytanti? Inas jan kuns sum lurañ yatkapunstanti, ukampis yanaptʼsnawa.

12. ¿Kunjamsa jan waltʼäwinak utjki ukhajj yanaptʼsna?

¹² Jan waltʼäwinakajj utjki ukhaw Diosampejj trabajiraksna, ¿kunjamsa uk lursna? Jilat kullakanakasar kunanjjay yanaptʼañajj wakischi ukanwa yanaptʼsna, inas qollqempi yanaptʼsna (Juan 13:34, 35; Hech. 11:27-30). Jan ukajj utanakap askichasa, qʼomachasaw yanaptʼaraksna. Polonia markankir Gabriela kullakat parltʼañäni, jupajja jallu wal purintatap laykojj jan utaniw uñjasïna. Ukampis uka jakʼankir congregacionanakatwa jilat kullakanakajj yanaptʼir sarapjjäna, ukajj walpun jupar chuymachtʼäna. Kullakajj akham siwa: “Kunanaktï aptʼasiwaykta ukanakat janiw parlañ munkti, ukanakajj aleq yänakakiwa. Antisas kunanaksa jikjjatawayta ukanakatwa parlañ munta. Cheqas Diosan markapankañajj mä suma bendicionawa, janiw kunas ukhamajj utjkiti, ukanwa kusisiñ jikjjattanjja” sasa. Ukham jan walinakan uñjasipki ukat yanaptʼa katoqawayapki uka jilat kullakanakat waljanejja, ‘jukʼamp chʼamañchtʼataw jikjjatasta’ sasaw sapjje. Ukhamanakan yanaptʼiri jilat kullakanakasa Jehová Diosampi trabajisajj wali kusisitäpjjarakiwa (Hechos 20:35; 2 Corintios 9:6, 7 liytʼañataki).

13. Jan waltʼäwinak utjki ukan yanaptʼañajj ¿kunjamsa Jehová Diosar jukʼamp munasiñatak yanaptʼistu? Uk mä experienciamp qhanañchtʼma.

¹³ Stephanie sat kullakampi ukat yaqha jilat kullakanakampejja, ukhamarakiw Jehová Diosampi trabajipjjäna. Jupanakajja, guerra utjipan markapat Estados Unidos markar escapanipkäna uka Testigonakaruw uta ukat kunatï utan munaski ukanak jikjjatañataki yanaptʼapjjäna. Kullakajj akham siwa: “Kunjamsa uka jilat kullakanakajj yanaptʼa katoqasajj wal kusisipjjäna, wal yuspärapjjäna uk uñjañajj walpun chuym chʼalljjtayapjjetäna. Jupanakajj nanakas yanaptʼapkirista ukhamwa amuyasipjjäna, ukampis jupanakaw antisas nanakarojj jukʼamp yanaptʼapjjetäna. Jupanakajj wali munasiri, mayachtʼata, Diosarus wal confiyiri ukhamäpjjänwa, ukanak uñjañaw Jehová Diosar jukʼamp munasiñatak yanaptʼawayapjjetu. Jehová Diosajj markap toqe taqe kun churkistu uk wali askit uñjañatakis yanaptʼawayapjjarakituwa” sasa.

DIOSAR JUKʼAMP SERVIÑATAK CHʼAMACHASIPJJAÑÄNI

14, 15. 1) ¿Isaías profetajj kunjam chuymanïnsa? 2) ¿Kunjamsa Isaías profetat yateqasipjjsna?

¹⁴ ¿Jehová Diosampi jukʼamp trabajiñ muntanti? ¿Kawkjantï Diosan markapan yanaptʼajj jukʼampi munaski ukar yanaptʼir sarsnati? Cheqas janiw yanaptʼañatakejj jaya cheqar sarañapunejj wakiskiti. Ukampis yaqhep jilat kullakanakajj Jehová Diosar serviñatakejj jaya cheqar sarapjjaspawa. Jupanakajj Isaías profetjamaw sapjjarakispa. Jehová Diosajj “¿khitirus khitäjja? ¿Khitis nayat arsur sarani?” säna ukhajja, “akankasktwa nayajj, nayar khitasita” sasaw Isaías profetajj säna (Is. 6:8). Yanaptʼajj wakiski, ukat lurirjamäskstan ukhajja, ¿Isaías profetjamat saraksna? ¿Kunan yanaptʼañas jichha tiempon munasi?

¹⁵ Diosan arunakap yatiyañata, arkirip tukuyañat parlkasajja, Jesusajj akham sänwa: “Cosecha apthapiñajj waljawa, trabajirinakasti jukʼanikiwa. Ukhamasti khititï cosecha apthapiyaski ukar mayipjjam, trabajirinak yapupar khitaniñapataki” sasa (Mat. 9:37, 38). ¿Kawkjantï yatiyañajj jukʼamp munaski ukan precursorat servir sarsnati? ¿Yaqha jilatarusa jan ukajj kullakarus ukham sarañapatak yanaptʼsnati? Walja jilat kullakanakajja, ukham jaya cheqan servisaw Jehová Diosaru, jaqe masipar munasitap uñachtʼayapjje. ¿Kunjamanakansa Jehová Diosarojj jukʼamp serviraksna? Jiwasatï Diosar jukʼamp serviñataki chʼamachasiñäni ukhajja, wali kusisitäñäniwa.

16, 17. ¿Kunjamanakatsa Jehová Diosarojj jukʼamp serviraksna?

¹⁶ ¿Betelana, Tantachasiñ Utanak luraski jan ukajj yaqha ukhamanak luraski ukan mä qhawqha phajjsitak trabajir sarsnati? Jan ukajj ¿semanan mä qhawqha urunak yanaptʼir sarsnati? Kawkinjjay yanapajj munaschi ukan yanaptʼañatak jankʼakïpki uka jilat kullakanakaw wal munasi. Yanaptʼir sarañäni ukhajja, inas kuntï lurañ yatktan ukanpun jan trabajkchiñäniti, ukhamäkchisa jupanakarojj Diosajj wali valoranit uñji (Sal. 110:3).

¹⁷ Jiwasatï Jehová Diosar jukʼamp sum serviñataki wakichtʼatäñ munstanjja, Diosan Reinopat Yatiyirinakataki Escuelar sarañatakiw mä solicitud phoqantsna. Ukanwa Diosar sapürunjam servipki uka jilat kullakanakarojj Diosan markapan jukʼamp trabajipjjañapatak wakichtʼapjje. Uka solicitud phoqantirinakajja, escuela tukuyasajj kawkir khitatas taqe chuymaw iyaw sapjjañapa. ¿Diosar ukham jukʼamp serviñ munsnati? (1 Cor. 9:23).

18. Jehová Diosampi sapüru trabajipjjañäni ukhajja, ¿kuna askinaksa jikjjatapjjañäni?

¹⁸ Jehová Diosan servirinakapjamajja, wajjtʼasiri, munasiri, khuyaptʼayasiri ukhamäñwa muntanjja. Ukham lurasajj kusisita, sumakiw jikjjatasiñäni (Gál. 5:22, 23). Cheqas taqeniw Jehová Diosat yateqasisajj mayninakar yanaptʼasa Jupampi trabajiraksna (Prov. 3:9, 10).