Jan aguantañjamäjjepana

Brasil markankiri Adriana warmejj akham siwa: “Sapüru wali llakita jikjjatasisajja jiwayasïñwa amtjjayäta” sasa.

¿SINTI jan walin jikjjatasisajj jiwayasiñ amtirïtati? Ukhaman uñjasirïsta ukhajja, kunjamtï Adriana warmejj jikjjatasïna uk amuypachätawa. Jupajja, sapürus wali llakita jan kamachtʼirjama ukhamaw sarnaqerïna. Qhepatjja, “llaki usunïtawa” (depresión grave) sasaw doctoranakajj sapjjäna.

Japón markankiri Kaoru sat chacharojj kunatï paskäna uk amuytʼam. Jupajj chuymankipstata usuta awk taykaparuw cuidirïna. Jupajj akham siwa: “Uka tiempon walja trabajonitajat jan aguantʼirjamaw amuyasiyäta. Tiempompejja, janiw manqʼajj munasjjetänti, ni ikiñsa puedjjayätti. Jan tʼaqesiñatakejj jiwañakwa munjjayäta” sasa.

Nigeria markankir Ojebode sat chachajj akham siwa: “Sapa kutiw llakit sarnaqerïta kunats jachaskakirïtwa. Jiwayasiñ kunwa amtjjayäta” sasa. Ojebode, Kaoru chachanakasa ukat Adriana warmisa janiw jiwayasipkänti. Ukampis sapa marajja, niya 800.000 jaqenakaw jiwayasipjje.

KAWKINSA YANAPTʼA JIKJJATASMA

Jiwayasirinakat jilapartejj chachanakäpjjewa. Jupanakajj phenqʼasiñatwa jan yanaptʼa mayipkiti. Ukampis usutanakajj doctorampiw yanaptʼayasipjjañapa sasaw Jesucristojj säna (Lucas 5:31). Jumatï ukhaman jikjjatasta ukhajj yanaptʼayasiñ janiw phenqʼasiñamäkiti. Llaki usunïpki ukanakat waljanejja, kuntï doctorajj siski ukarjam lurasaw qollasipjje. Ojebode, Kaoru chachanakasa ukat Adriana warmisa usupat yatjjatat doctoranakampiw yanaptʼayasipjjäna, jichhajj nayrat sipansa walikëjjapjjewa.

Yaqhep doctoranakajj llaki usuninakar qollañatakejja, qollanak umapjjañapwa mayipjje jan ukajj kunjamäsipkisa uk mä psicologor cuenttʼapjjañapwa mayipjjaraki. Maysa toqetjja, usutanakajj familiaranakapampi amigonakapampi istʼatäña, pacienciamp uñjatäña, yanaptʼatäñwa munapjje. Jehová Diosjam wali suma amigojj janiw utjkiti, Jupajj Biblia toqew yanaptʼistu.

¿LLAKIMPI AYNACHTʼATÄÑAJJ TUKUSJJPACHÄNITI?

Llaki usumpi usutanakajja, walja tiempo qollayasipjjañapawa, ukatjja jakäwip mayjtʼayapjjañaparakiwa, ukaw usupamp jan aynachtʼañatak yanaptʼani. Ukampis jumatï llaki usumpi jan aynachtʼañatak chʼamachasisksta ukhajja, jutïrin sumaw jakasjjäta, ukat jan pächasimti. Ojebode sat chachajj ukwa suytʼaski, jupajj akham siwa: “Kuntï Isaías 33:24 textojj siski uk phoqasiñap wal suyaskta, ‘jutïrin janiw khitis usutätwa sisjjaniti’ sasaw ukan qhanañchi” sasa. Diosajj ‘mä machaq oraqe’ churañwa arsuwayi, ukanjja janiw ‘usuyasiñajj’ utj-jjaniti, janirakiw llaki usus utj-jjaniti, uk yatiñajj wal chuymachtʼistu (Apocalipsis 21:1, 4). Llaki usumajj wiñayatakiw chhaqtjjani, janirakiw mayampsa ukanak amtjjätati (Isaías 65:17).

Aka textonakaw yanaptʼiristam

Kunjamäsktasa uk Diosajj yatiwa

“Naya, juman [Jehová] Tatitu Diosamaw, jumarojj amparat wayjjarsma, irparaksma; nayaw saraksma: ‘Jan ajjsaramti, nayaw yanapaskäma’” (Isaías 41:13).

Jehová Diosajja, kunjamäsktansa uk jaqenakat sipansa sum yati, ukatjja yanaptʼañwa munarakistu.

Diosan Arupatwa lupʼiñama

Eliasajj “jiwjjañakwa munäna akham sasa: ‘¡Ukkhakëjjpan Tata! ¡Nayarojj jakañajj apaqjjeta’” (1 Reyes 19:4).

Ojebode sat chachajj akham siwa: “Diosan Arupat lupʼiñaw yanaptʼitäna. Elías profetajj nayjamarakiw jikjjatasïna, ukwa amuyta” sasa.

Biblian qellqatäki uka sarnaqäwinakatwa yateqasiñama

Jesusajj Pedror akham sänwa: “Nayajj taqe chuymaw Diosar jumatak mayirapsma, ukhamat Diosar confiyañan jan aynachtʼañamataki” sasa (Lucas 22:32).

Pedrojj Jesusar kimsa kuti jan uñtʼir tukkäna uka qhepatjja, wali llakitaw jikjjatasïna chuymas kawkstʼataw jacharakïna. Kaoru sat chachajj akham siwa: “Jehová Diosasa Jesusas Pedrojj kunjamäskänsa ukat llakisipjjänwa, uk yatiñaw wal chuymachtʼitu” sasa.

Llaki usumajj wiñayatakiw chhaqtjjani, janirakiw mayampsa ukanak amtjjätati (Isaías 65:17)