Jehová Diosar yupaychir familianaka
1 Biblia qillqaskän uka urunakanxa, utan kuna lurañanakatï utjkäna ukanakxa familpachaw taqi kuns lurapxirïna. Ukhamarusa, Jehová Diosarux familpachapuniw yupaychapxäna (Lev. 10:12-14; Deu. 31:12). Jichhürunakanx walja chiqanakanxa, sapa mayniw amtaparjam kuns luri. Ukampis cristianonakax familpachaw taqi kuns lurañax wakisi sapxtanwa, yamas Jehová Diosar yupaychañanxa mayakïñasawa. Awk taykanakax wawanakapampi ukham mayak yupaychapxatapatxa, familia Uñstayirix walwa kusispacha.
2 Familpach yatiyir sarapxañäni. Suma arunak jaqinakar yatiyañax familiasan sum apasiñatakiw chʼamañchi. Ukatpï, irpir chuymaninakax janiw yatiyir jilat kullakanakampiki irnaqapxañapäkiti jan ukasti warmipampisa wawanakapampisa yatiyir mistsupxañaparakiwa (1 Tim. 3:4, 5). Ukhamarakiw tamanak tumptʼir jilatanakax warmipampi yatiyir mistsuñatakix tiempo apstʼasipxi.
3 Wawanakax familiamp chika yatiyir sarapxi ukhaxa, jukʼamp sumwa yatiyañxa yatiqapxi. Janiw awk taykaparux wali kusisita chuymas chuymätap ukak uñjapkiti, jan ukasti qhawqsa Jehová Diosarus jaqi masiparus munasipxi uksa amuyapxarakiwa (Deu. 6:5-7). Kunapachatï wawanakax jachʼäxapxi ukhasa ukax uñjasiskakiwa. Mä chacha warmixa 15-21 maran kimsa yuqanïpxiwa, jupanakax sapa kutiw wawanakapamp yatiyir mistsupxi. Awkix akham siwa: “Sapa kutix kuns yatichapxapuntwa. Wali sum jikxatasipxañapwa munapxtxa ukat wali chʼamañchatäpxaspa ukpun thaqhapxtxa” sasa.
4 Familpach wakichasiñäni. Walja jilat kullakanakaw yatiyir sarañatakix familpach wakichasiñax askipuniw sapxi. Yatiyir sarañataki kunjamsa utankirinakaru parltʼapxaspa, familian ukanak mayn mayni yatiqtʼañxa wawanakax walwa munapxi. Yaqhipanakaxa familpach Bibliat yatxatasipki uk tukuyasaw mä jukʼa minutonakxa yatiyir mistsuñatak wakichasipxi.
5 Uka kusiskañ luräwinakan familpacha irnaqtan ukhaxa jukʼampiw kusistanxa. Ukhamax familpach utat ut sarañasa, yatiqañ munirinakar wasitat kuttʼañasa, Bibliat yatichañasa wali askipuniwa. Jehová Diosar familpach yupaychañäni ukhaxa kusisitaw akham sañäni: “Nayampi taqi familiaxampixa Diosaruw servipxä” sasa (Jos. 24:15).