Familiamampi kusisita jakasim

¿Chiqapuniti familianakaxa kusisita jakasipxaspa?

¿Kunjamatsa?

Kunjamtï aka qillqatan uñjaski, ¿ukham mayachtʼata ukat wali kusisita familianak uñtʼtati? Taqi chiqanwa familianakax jaljtasipki. Chacha warmi jaljtaña, jan irnaqawinïña, awkis jan ukax taykas wawanakaparu sapaki uywasaxa chʼam tukupxi, ukanakaw familianakarux jan waltʼaykiti. Familiat yatxatata mä warmixa llakitaw säna: “Jichhürunakanxa familian chhaqtañapatxa taqiniw yatipxi”.

¿Kunatsa jichhürunakan familianakax sinti jan waltʼañanakan uñjasipxi? ¿Kunjamsa familiasampi kusisit jakassna?

Familian qalltapa

Aka jisktʼäwinakaru jaysañatakixa, jaqichäwita ukat familian qalltapatwa yatiñasa. Mä Uttʼayirin —jan ukax Luririn—, chhixnuqatächixa familiankirinakaxa juparuw jakʼachasipxañapa irpayasiñataki, kunattix khitit sipansa Jupaw sum yatispa kunjamsa familiasampi kusisita jakassna.

Waljaninakatakiwa familiax jan Uttʼayirini. The Encyclopedia Americana qillqataxa siwa: “Yaqhip yatxatatanakaxa, jaqichasiñan qalltapax jaqir nayrtʼiri uywanakan katusiñapatsa jutkaspa ukham amuyapxi”. Ukampisa, chachasa warmisa luratapxiw sasaw Jesucristox säna. Nayrïri Qullan qillqatat arsusaxa sänwa: “Ukhamax jaqix janiw jaljtaykaspati kuntix Diosax mayachkis ukxa” (Mateo 19:4-6).

Jesucriston arunakapaxa chiqäskapuniwa. Yatiñan Diosawa nayrïri jaqinakarux chhijnuqäna, mä kusisit familian jakapxañapatakixa wakiskirinakwa uchäna. Diosax chacharu warmimpi jaqichasaxa, chacharux sänwa: ‘warmimampi mayachasxasaxa, panpachanisti mä sapa jaqikïpkasmasa ukhamäpxañamawa’ (Génesis 2:22-24). Ukhamaxa, familian jan waltʼañanakaxa, ¿Luririna kamachinakapata saranukuta sarnaqäwinakaru arkañatäspati?

¿Kunjamatsa familiasampi kusisit jakassna?

Yatpachätawa, akapachanxa akham amuyunakawa wiytasi: maynitakiki munirïña ukat jila jilankaña. Estados Unidos markankiri yatiqañ jachʼa utat mistsurinakaruxa, qullqimp mä irnaqirixa akham sasaw säna: “Taqi kuns maynitakiki munirïñaxa askiwa. Jupatakiki munas taqi kunanïxasaxa, chuymapax phuqtʼatakïskaspawa”. Ukampisa, yänak thaqhañaxa janiw kusisiñaru apkiti. Chiqasa, yänak munañaxa jukʼampwa familiaru jan waltʼaykiti, jaqi masimpisa janiw sum apasiykiti, ukat qullqisa, tiemposa aptʼasxarakiwa. Maysatuqitxa, kusisit jakasiñatakix Bibliata pä wakiskir proverbionaka amuykipañäni:

“Vaka aycha uñisiñampi manqʼañat sipansa, jukʼamp askiwa munasiñampi chʼuxñanaka manqʼañaxa”.

¿Musparkañ arunakaxaya? ¡Kunja mayjaspasa akapachaxa taki familianakatï aka aski arunakaru arkapxaspa ukhaxa! Bibliax amuytʼayarakiwa kunjamsa familiankirinakax sum apasipxaspa. Mä qhawqha yatichäwinakap uñjañäni:

Warmininaka: ‘Warmimarux munasiñamawa, pachpa janchimarjama’ (Efesios 5:28-30).

Mä qhawqha arukïchisa, ¡ukampis wakisiripuniwa! Bibliax chacharux iwxiwa, ‘jachʼaru aptam warmimaruxa’ sasina (1 Pedro 3:7). Ukatakixa, uñachtʼayañapawa warmiparjam uñjaña, akhama: qʼayachtʼasa, llampʼu chuymampi uñjasa, walikïskataw sasa. Ukhamaraki warmipan arunakaparu jaysañapawa ukat yäqañaparakiwa (uñxatarakim Génesis 21:12). ¿Kunjamtï chachanakaxa munasiñampi uñjayasiñ munapki ukham warminakaparux uñjapxaspa ukhaxa, janit familianakatakix askipunispaw sasax jiskasma? (Mateo 7:12.)

Chachaninaka: ‘Chachamarux istʼañamapuniwa’ (Efesios 5:33).

Chʼama lurañanakapan chachaparu yanapasaxa, warmixa familiataki kusisiñ apani, ukwa Diosax muni, chacharuxa churiwa “mayni jupampi chika jakiri, ukhamaraki yanaptʼiri” warmi (Génesis 2:18). Warmitï chachaparu istʼaspa, chʼama lurañanakapana yanapaspa ukat familian amtapa jikxatañaru yanapaspa, ¿ukhaxa janit familiatakix askïw sasax amuykasma?

Jaqichasitanaka: “Janirak casadökasin yaqhanakamp wachuqa juchan sarnaqapxamti” (Hebreos 13:4).

Jaysapxani ukhaxa familiax askïniwa. Yaqhanakampi wachuqas juchan sarnaqañaxa familiaruw tʼunji (Proverbios 6:27-29, 32). Ukatpï Bibliax iwxtʼistuxa: “¡Kusisitaki jakasim waynäkasin warmimampixa! [...], ¿kunatakirak yaqha warmi thaqätasti[?]” (Proverbios 5:18-20.)

Awkinaka: ‘Wawaruxa suma sarnaqañapatakixa jiskʼatpach sum yatichsupxam’ (Proverbios 22:6).

Kunapachatï awkinakax wawanakapampïñataki tiempo apstʼasipxixa, familia jakäwix waltʼapuniwa. Ukatpï Bibliax awkinakaruxa iwxtʼixa; wawanakamaru aski kamachinaka yatichapxam “utamankkasina, thaki sarkasina, ukhamaraki ikintañataki, ikiñat sartañatakisa” (Deuteronomio 11:19). Bibliax sarakiwa, awkinakaxa wawanakaparu munasisaxa chiqañchapxañapawa (Efesios 6:4).

Wawanaka: “Wawanaka, awkimar taykamarux taqi kunansa istʼapxapunim, uka lurañasti askiw Dios nayraqatanxa” (Colosenses 3:20).

Chiqasa, wayna, tawaqu, jan apnaqkañ akapachanxa, awk taykanakaru istʼañax chʼamaspawa. Ukampisa, ¿janit askïkaspa familia Uttʼayirin kamachinakaparu istʼañaxa? Wali kusisita familianïñatakixa Jupaw kunatix askïki uk yati. Ukatpï awkinakamaru istʼañamapunixa. Akapachankirinakan jan wali sarnaqäwinakatxa jithiqtañamapuniwa (Proverbios 1:10-19).

Qhawqhakamxay sapa mayni familiankirinakax Biblian kamachinakaparjama sarnaqapxchini, ukhamarjamaw familia jakäwix jukʼamp askïni. Familiamaxa janiw jichhürunakaki suma jakawin kusiskaniti, jan ukasti Diosan arsutaparjamaw mä muspharkañ machaq jutïrpachan wali kusisit jakapxani (2 Pedro 3:13; Apocalipsis [Revelación] 21:3, 4). Ukatwa, familiamamampix sapurupuniw Bibliata yatiqañama. Uraqpachanxa millón millón familianakaw El secreto de la felicidad familiar uka libroru askipuniw sasaw sapxi.

Jiskʼa tʼaqanakaxa Qullan Arunaka Bibliat apstʼatawa, jan ukhamäkanixa qhanañchasiniwa.