¡Akanwa jachʼa bendicionanakax utji!
1. ¿Kunatsa precursor regularjam irnaqtʼañatakix lupʼiñasäspa?
1 ¿Jakäwimanxa kusisita jikxatasiñ munasmati? ¿Jaqinakar yanaptʼasax wali kusisitat jikxatasta? ¿Jehová Diosatak jukʼampi irnaqtʼañ munasmati? Aka jisktʼanakarutï jïsa sasin sasmaxa, precursor regularjam irnaqtʼañatakix lupʼiñamawa. Ukampisa, janiw taqinix precursorjam irnaqtʼapkaspati. Familiar uñjañatakix irnaqañasawa ukat Biblian yaqha mayitanakapsa phuqañasarakiwa, ukat inas usurnukstatästan jan ukax chʼama qaritäxstan.
2. Precursoranakaxa walja bendicionanakwa katuqapxi uka tuqit mä qhawqha arstʼma
2 Diosampi amuytʼayatäsaxa, yänakax Diosan bendicionapaw sasaw Salomonax satayna (Pro. 10:22). Ukampisa, Diosan bendicionapax yaqha tuqitarakwa jichhürux uñjasi. Uka bendicionanakwa precursoranakax jukʼamp katuqapxaraki. Sañäni, “tiempo apsus[ipxi]” munäwinakap apunukusa, ukhamatwa yaqhanakar yanaptʼasax jukʼamp kusisitäpxaraki (Col. 4:5, MT; Hech. 20:35). Jehová Diosar munasipxatap laykuwa suma luräwinakanïpxi, ukatwa Diosax jupanakar munasi ukat ‘alaxpacharu suma yänaksa’ jupanakatak imaraki ukax janirakiw inamayäkaniti (Mat. 6:20; Heb. 6:10). Ukhamaraki, precursoranakax ‘suma nayranïpxatap’ laykuxa mä arunxa kunatï jakañatak wakiski ukampik jakasipxiritap laykuxa Diosaruw jukʼampi jakʼachasipxi ukat Jehová Diosaw jupanakarux imaraki (Mat. 6:22, 25, 32; Heb. 13:5, 6).
3. ¿Kunatsa akapach yänak thaqhañampi Diosan bendicionap katuqañampix jan kikpäki?
3 Yaqhipanakax yänak jikxatäta sasinxa “taqi casta luqhi amtäwinakan sipitaparuw jalantapxi” (1 Tim. 6:9, 10; Sant. 5:1-3). Ukampisa Jehová Diosan bendicionanakapax janiw ukhamäkiti. Diosar yupaychañ tuqit jan aynachtʼapxañapatakisa ukhamarak askïkis ukpun ajllipxañapatakisa walja horanak irnaqtʼañaw precursoranakarux yanaptʼaraki (Fili. 1:10). Mä jilataxa ingenierjam irnaqtʼasax janipuniw tiemponïxänti ukat uka irnaqäwip jaytxasaxa precursorjamaw irnaqtʼxäna. Ukat sarakïnwa: “Irnaqäwijanxa qarita jan walin uñjasiyitäna. Precursorjam irnaqtʼañax janiw ukhamäkiti. Jichhax jaqinakar Diosan arupat yatichtʼasaw yanaptʼasktxa. Chiqpachansa jaqinakar yanaptʼañax wali kusiskañapuniwa”.
4. Precursor regularanakaxa, ¿kuna askinaksa jaqinakar yanaptʼasax jikxatapxi?
4 Mayninakan askipataki. Jaqinakax Uraqpachanwa ‘jan wali tiemponakan’ uñjasipxi (2 Tim. 3:1). Taqi chiqanwa jaqinakax mä suma suytʼäwinïñ munapxi. Jaqinakax llakita jan kuna suytʼäwiniw sarnaqapxi ukat suma yatiyäwinakar iyawsapxi ukhaxa kusisita chuymas qhanartata ukhamwa sarnaqxapxaraki uk uñjasaxa Diosan Apnaqäwipat yatiyirinakax wal kusistanxa. ¡Jaqinakaru qhispiyañataki mä maran 800 jila horanak yatiyasaxa, precursor regularanakax walpun kusisipxi! (1 Tim. 4:16.)
5, 6. Precursor regularjam irnaqtʼañatakixa, ¿kunas yanaptʼiristamxa?
5 ¿Precursor regularjam irnaqtʼañatakix lupʼiskayätati? Inas ‘jan tiempo ina chʼusaru tukuyasa’ jan wakiskir luräwinakama jaytanukuñamächi (Efe. 5:15, 16). Walja jilat kullakanakaw jakäwinakapan walja luräwinakap jaytxasaxa jukʼa tiempoki irnaqtʼxapxi ukhamatwa jukʼampi Diosan Apnaqäwipat yatiyapxi. ¿Jupanakamp chika irnaqtʼañatakix tiempo apstʼasismati?
6 Tiempo apstʼasiñatakixa Jehová Diosaruw yatiñ kankañ churita sasin mayisiñama (Sant. 1:5). Ukham luratamatxa, ¿kuns jikxatasma? ¡Jachʼa bendicionanakwa jikxatäta! Ukhamarusa, Jehová Diosax kunatï jakañamatak wakiski uksa churätamwa (Mat. 6:33). Khitinakatï Jehová Diosar ukham yantʼapxani ukhaxa ‘walja jilarkir bendicionanakwa’ katuqapxani (Mal. 3:10).