Jisktʼäwinaka

◼ ¿Yatiyañataki Tantachäwina ukhamarak Yatiyañataki Diosan Yatichäwipa sat tantachäwinxa sapa arstʼäwxar tʼaxllirtʼañax walikïskaspati?

Jehová Diosax aka Uraqi lurkän ukhaxa, ‘qhanjtaniri warawaranakax qʼuchupxänwa ukhamaraki alaxpacha servirinakax kusisipxarakïnwa’, mä arunxa, kusisiñatwa tʼaxllirtʼapxäna (Job 38:7). Alaxpach servirinakaxa, mä arunxa, angelanakaxa Jehová Diosan muspharkañ luräwinakapatwa yupaychañ munapxäna, uka luratanakapax yatiñanïtapa, munasirïtapa ukat chʼamanïtapwa uñachtʼayäna.

Jilat kullakanakasax chʼamachtʼasisaw jiwasanakar yatichtʼañatak arstʼapxi, ukatwa jiwasanakax ukham arstʼapxatapatxa taqi chuyma yuspärañasa. Sañäni, kunapachatï jachʼa tantachäwinakan arstʼaski jan ukax uka tantachäwinakan demostracionanakax utjki ukhax tʼaxllirtʼapuntanwa. Uka arstʼäwinak demostracionanak wakichtʼañax janiw ukhamakïkiti chʼamachtʼasisa tiempo apstʼasisa wakichatawa, ukat tʼaxllirtʼasaxa janiw arstʼirin arstʼatapatak yuspärktanti jan ukasti Jehová Diosaruw yuspäraraktanxa Arup tuqi markap tuqi yatichatapata (Isa. 48:17; Mat. 24:45, 47).

Ukhamasti, Yatiyañataki Tantachäwinsa ukat Yatiyañataki Diosan Yatichäwipa sat tantachäwinsa, ¿tʼaxllirtʼañax walïskaspati? Chuymasatpach lursna ukhaxa walïskaspawa ukhamas janirakiw uka tuqit janiw tʼaxllirtʼañäkiti sasin kuna qillqatas utjkiti, mä Bibliat yatiqiritï nayrïr arstʼäwip arstʼaspa ukhaxa tʼaxllirtʼaskaraksnawa. Ukampisa, sapa kuti ukham lursna ukhaxa, janiw taqi chuymäxaspati. Ukatwa sapa arstʼäwxaruxa jan tʼaxllirktanti.

Chiqpachansa, janisay Yatiyañataki Tantachäwinsa jan ukax Yatiyañataki Diosan Yatichäwipa sat tantachäwinsa sapa arstʼäwin tʼaxllirtʼkchiñänixa, ukampisa yaqha tuqitarakwa arstʼirinakan wakichtʼasitapatxa yuspäraraksna. Sañäni, sum istʼañasawa, janirakiw ikiñasäkiti. Ukat tantachäwi tukuyaruxa, arstʼirinakar jakʼachtʼasisaxa wali sumapuniw arstʼäwimaxa sasin chʼamañchtʼañax askirakïspawa (Efe. 1:15, 16).