¿Yatiyir masijar yanaptʼaskti?

1. ¿Kunatsa panin panini yatiyir sarañax wali aski?

¹ Mä kutixa, Jesusax 70 arkirinakaparuw yatiyir sarapxañapatakix “panin panini” khitäna (Luc. 10:1). Ukham panin yatiykasaw purapat yanaptʼasipxäna, chʼamañchtʼasipxarakïna. Yatiyir masisampi yatiykasaxa, ¿kunjamats yanaptʼsna?

2. Yatiyir masisax parlaski ukhaxa, ¿kunatsa sum istʼañasa ukat kunjamsa sum istʼaskatas uñachtʼaysna?

² Sum istʼañasawa. Yatiyir masimax yatiykani ukhax sum istʼañamawa (Sant. 1:19). Bibliat liytʼkani ukhaxa, Bibliamanx liytʼañamarakiwa. Yatiyir masimasa jan ukax utanis parlkani ukhax uñkattʼañamawa. Yatiyir masimax kuntï parlaski uk sum istʼäta ukhaxa, utanix istʼarakiniwa.

3. ¿Kunapachas yatiyir masimax yanaptʼatamatx yuspäriristamxa?

³ Wakiski ukhakiw arstʼañasa. Yatiyir masimaru parlañ waktʼkani ukhaxa, jupaw utanimpix parltʼañapa ukhamatwa respeto uñachtʼaysna (Rom. 12:10). Mä arunxa, janiw pantjasiyañamäkiti. Ukampis kuntï sañ munki uk armtʼaschi jan ukax utanin kuna jisktʼapar jan qhanañchirjamäxasin yanaptʼa maystam ukhakiw yanaptʼañama, ukampis kuna tuqittï parlaskäna uka tuqitakwa parltʼañamaraki (Pro. 16:23; Ecl. 3:1, 7). Ukhamatwa, arunakamax kuntï yatiyir masimax yatiyañ munkäna ukar jukʼamp chʼamañchtʼani (1 Cor. 14:8).

4. ¿Yatiyir sarkasax kunas kusisitäñasataki ukat chuymas phuqtʼatäñasatakix yanaptʼistani?

⁴ Kunapachatï Jesusan panin panini 70 arkirinakapax yatiyañ tukuyxapxäna ukhaxa, “wali kusisitaw kuttanxapxäna” (Luc. 10:17). Jiwasax ukhamarakiw yatiyir masisaru sum istʼañäni ukat wakisitarjam arstʼañäni ukhaxa, kusisita ukat chuymas phuqtʼatarakiw kutʼxañäni.