¿Precursor regularjam irnaqtʼawaytati?
1. ¿Walja jilat kullakanakax kuna aski luräwinsa irnaqtʼawayapxi? ¿Yaqhipax kuns lurawayapxi?
1 Nayra maranakatpachwa waranq waranqa jilat kullakanakax Diosan suma yatiyäwinakap “yatichasa” ukat yatiyasa precursorjam irnaqtʼasipki (Hech. 5:42). Ukampis yaqhipaxa jakäwinakapan kunaymanin jikxatasipxatapatwa jan precursorjam irnaqxapxiti. Jumatï ukhaman uñjastaxa, ¿jichhax wasitat precursorjam irnaqtʼirjamäxtati?
2. Khitinakatï nayrax precursoräpkäna ukanakax ¿kunatsa wasitampi sum amuykiptʼasipxañapax wakisi?
2 Jakäwisax mayjtʼaspawa. Kunay precursorjam irnaqtʼañamatakix chʼamächïna ukampis jichhax inas jan ukhamäxchiti. Inas 90 horanak jan phuqirjamäkchiyäta, ukampis jichhax 70 horanak phuqañakïxipanxa, ¿janit wasitat precursorjam irnaqañ qalltkasma? Inas jichhax wal irnaqañamax jan wakisxchiti jan ukax inas familian jan khitir uñjañas utjxchiti. Mä kullakaxa usuntat uñjasisaw precursorjam irnaqañ jaytxatayna ukat mä mara jil hospitalar jan sarxatapatxa, 89 maranïkäna ukhaw wasitamp precursorjam irnaqañ qalltatayna.
3. ¿Familian maynikis precursoräñapatakix kunjamsa taqinix yanaptʼasipxaspa?
3 Inas jumax janipun precursorjam irnaqirïkstati ukampis familiamat mayniw precursoränxa, ukat inas chuymankipstat awkiparu jan ukax taykapar uñjañatak precursorjam jan irnaqxchiti (1 Tim. 5:4, 8). ¿Janit jumasa jan ukax familiamat maynis yanaptʼkaspa? ¿Janit taqini aruskiptʼapxañam wakiskaspa? (Pro. 15:22.) Familian maynikis precursoräñapatak taqini yanaptʼasipxi ukhaxa, wali askit uñjatapuniwa.
4. Janitï precursorjam jichhax irnaqtʼirjamäksta ukhaxa, ¿kuns lurasma?
4 Jumatï precursorjam wasitat jan irnaqtʼirjamäkstaxa jan llakisimti. Precursorjam wasitat irnaqtʼañ munatamaxa Jehová Diosarux kusisiyiwa (2 Cor. 8:12). Ukhamasti, kuntï precursorjam yatiqawayta ukarjam irnaqtʼaskakim. Oracionamansa uka tuqit mayisiskakim ukatsti jakäwimax jan nayrjamäxani ukhaxa precursoräñatak chʼamachasipunim (1 Juan 5:14). Ukat tiempompix inas Jehová Diosax yatiyaskakiñamatak “jachʼa punku jistʼara[rapchïtam]” ukhamatwa wasitampi wali kusisit precursorjam irnaqtʼxchisma (1 Cor. 16:9, MT).