Taqe kasta jaqenakar yatiyañäni
1. ¿Diosan Arupat yatiyirimpi ukat mä artesanompejj kunansa niya kipkakïpjje?
1 Wali yatjjattʼat mä artesanojj janiw kunayman herramientanakanikïkiti, jan ukasti kunawrsasa ukat kunjams sapa mayni apnaqasiñapa uk sum yati. Ukhamarakiw jiwasajj suma yatiyäwinak yatiyir sarañatakejj kunayman yanapanakanïtanjja. Amuytʼañataki, taqe kasta jaqenakar yatiyañatakejj kunayman folletonakaw utjistu (1 Cor. 9:22). Qhanar uchañataki siski uka qellqatanwa, khitinakatakisa ukat ukanakampejj kunjamsa yatiysna uk qhanañchi.
2. ¿Kunäwrsas folletonakampi yatiyañ wakisispa?
2 Kunäwrsas folletonakampi yatiysna. Yatjjattʼat mä suma artesanojja, herramientanakap yäparuw apnaqe. Ukhamarakiwa, maynir yatiyasatï folletonak churañ wakisitap amuysna ukhajj chursnawa, janis uka phajjsejj uka qellqatampi yatiykstan ukhasa. Sañäni, uka phajjsintï Kunsa yatichi sat librompi yatiyaskstan ukat jan cristiano mä jaqeru yatiyaksna ukat Bibliat yateqañ munatap amuysna ukhajja, janïr libro aparapkasajj Bibliat yatjjatañ munaskakiñapatakejj folletompi yatiyañaw wakisispa.
3. ¿Kunatsa Bibliat apstʼat qellqatanakamp suma yatiyirïñasa?
3 Trabajopan kuns sum lurañ yatki ukanakat Bibliajj sum parli (Pro. 22:29). Cheqansa, jichhürunakanwa “Diosan qhespiyasiñ arunakap” yatiyañajj wali wakiskirejja, janipuniw jukʼampi suma luräwejj utjkaspati (Rom. 15:16). “Mä suma irnaqerjama [...] jan kunatsa pʼenqasi[ri]” ukhamäñatakejja, Bibliat apstʼat qellqatanakamp suma yatiyirïñasawa (2 Tim. 2:15).