Diosan arunakap chuymar purtʼkir yatiyapjjañäni
1. Nayrïr cristianonakajj kunaymanitwa Diosan arup yatiyapjjerïna, ¿kuns jupanakat yateqassna?
1 Nayrïr cristianonakajj Diosan suma yatiyäwinakapjja, kunayman costumbreni ukat kunayman kasta jaqenakaruw yatiyapjjäna (Col. 1:23). Diosan Reinopatpuns yatiyapjjerïkchïnjja, kuna kasta jaqenakampiy parlapjjchïna ukarjamaw yatiyapjjerïna. Amuytʼañataki, Qollan Qellqatanak respetapkäna uka judionakarojja, apóstol Pedrojj Joel profetat aytasaw parlañ qalltäna (Hech. 2:14-17). Ukampis Hechos 17:22-31 qellqatarjamajja, Pablojj mä qhawqha griegonakamp parlkasajj yaqha toqetarakwa parlarakïna. Kawkhantï yatiyktan ukawjanakanjja, yaqhep cheqanakanjj Bibliarojj respetapjjewa ukat jupanakamp Bibliat parltʼañajj janiw chʼamäkiti. Ukampisa, khitinakatï Bibliatsa ukat religionatsa jan kuns yatiñ munapki ukanakampejj janiw Bibliamp cheqaki parlañ wakiskaspati.
2. Kawkïr qellqatanakampitï yatiyasiñapäki ukampejj ¿kunjamsa Bibliar respetapki ukat jan respetapki ukanakarus yatiysna?
2 Bibliat apstʼat qellqatanakamp sum yatiyapjjañäni. Kuna qellqatanakampitï, 2012 maran septiembre phajjsit 2013 agosto phajjsikamajj yatiyaskañäni ukajja, sapa pä phajjsitwa mayjtʼani ukat kunayman kasta revistanakampi, tratadonakampi ukat folletonakampiw yatiyaskañäni. Ukat Bibliat jan yatiñ munirinakarojj kuna toqetsa yatiñ munapjjaspa uka toqetwa parltʼsna. Ukat maynikis jupanakat jukʼamp yatjjatañ munani, mä arunjja, Bibliat jan qhanañchkata ni liytʼarapkata kuntï parltʼawayktan uka toqet jukʼampi yatjjatañ munani ukhajja, jankʼakiw kuttʼañasa ukat taqe kun Lurir Diosaru ukhamarak Arupar atinisiñapatakiw yanaptʼañasa. Ukampis Bibliar respetapki ukanakamp parlkañäni ukhajja, Bibliampiw parltʼsna ukat Bibliat apstʼat qellqatanaksa churaraksnawa. Ukat Kunsa yatichi, Diosar istʼañäni ukat wiñayatakiw jakañäni ukatjja Diosar istʼañäni sat qellqatanakampiw yatiyaraksna, janis uka phajjsin uka qellqatanakamp yatiyasiñapäkchi ukhasa, churaraksnawa. Cheqansa Diosan arunakapjja chuymanakapar purtʼkirwa yatichañ muntanjja.
3. ¿Kunansa jaqenakan chuymapajj mä oraqjama?
3 Jaqenakan chuymanakapar purtʼañatak chʼamachasipjjañäni. Jaqenakan chuymapajj yapuchañ oraqjamawa (Luc. 8:15). Yaqhepanakarojj chuymapar cheqa yatichäwinak sum saphintañapataki ukat jiltañapatakejj jukʼamp sum wakichtʼañaw wakisi. Nayrïr cristianonakajja, cheqa yatichäwinak jaqenakan chuymapar phawantasajja, suma askinakwa jikjjatapjjäna, ukaw jupanakar wal kusisiyäna (Hech. 13:48, 52). Yatichäwisajj kunjamäskisa uk sum uñjañäni ukhajja, kusisiñ jikjjatarakiñaniwa.