Tratadonakamp yatiyapjjañäni
1. Diosan markapanjja, ¿kunjamsa tratadonak apnaqasiwayi?
1 Diosan arunakap yatiyañatakejj Jehová Diosan markapajj walja maranakaw tratadonakamp yatiyapjje. Khä 1880 maranjja, Watch Tower sat revista liytʼirinakan tratadonak lakirapjjañapatakejj C. T. Russell jilatampi ukat yanapirinakapampejj walja tratadonakwa apsupjjäna. Niyakejjay uka tratadonakajj wali wakiskirïchïnjja, Russell jilatajj 1884 maranjja, Diosan Reinopat jukʼamp yatiyasiñapatakejj mä corporacionwa uttʼayäna, ukajja: Zionʼs Watch Tower Tract Society (jichhürunjj Watch Tower Bible and Tract Society of Pennsylvania sasin uñtʼatäjjewa) satänwa ukat ukanwa track (“tratado”) arojj uñstäna. Uka corporacionajja janiw qollqe ganañ amtamp uttʼayatäkiti. Ukat 1918 maratakejja, Bibliat Yatjjatirinakajj 300 millones ukha tratadonakwa lakirapjjäna. Jichhürunakan tratadonakamp yatiyañajj wali wakiskirikïskiwa.
2. ¿Kunatsa tratadonakajj wali wakiskirejja?
2 Kunatsa wali wakiskirejja. Taqpach tratadonakajja wali suma munkañ lurtʼatawa. Yatiyäwipajj chuymar purtʼkiripuniwa ukatjja, jukʼa arunakampikiw wali sum qhanañcharaki. Ukat jaqenakajj libronakampi, revistanakamp qheparañat sipansa, tratadonakwa munapjje. Ukat jichhak yatiyir mistusipki ukanakasa, wawanakasa, tratadonakampiw yatiyapjjaraki. Ukat apañas janiw chʼamäkarakiti kawkharus apasiksnawa.
3. Tratadonakajj kunja wakiskirisa uk experienciamampi cuenttʼam jan ukajj Bibliat apstʼat qellqatanakatsa cuenttʼarakismawa.
3 Walja jaqenakajja, tratadonak toqew cheqa yatichäw uñtʼawayapjje. Uk amuytʼañatakejja Haití markankir mä warmit parltʼañäni, jupajj calletwa mä tratado aptasitayna uk liytʼasajja, “¡akapï cheqa yatichäwejja!” sataynawa. Ukat Tantachasiñ Utaruw visttʼir saratayna, Bibliat yateqañ qalltatayna ukat bautisasjjarakitaynawa. ¡Cheqas Diosan arupajj wali chʼamaniwa!
4. Tratadonakamp yatiykañäni uka phajjsinakanjja, ¿kunäñapas amtasajja?
4 Utat uta yatiykasa. Niyakejjay tratadonakajj yatiyañatakejj wali askïchejja, noviembre phajjsitjja, yaqheppachajj tratadonakampiw yatiyaskañäni. Tratadonakajj janiw aleq jaytañatakïkiti jan ukasti parlañ qalltañatakiwa. Ukat khitimpitï parlktan ukatï jukʼamp yatjjatañ munani jan ukajj wasitamp kutʼktan ukhas yatjjatañ munani ukhajja, kunjamsa Kunsa yatichi sat librompi jan ukajj yaqha qellqatampis yatjjatasi ukwa qhanañchtʼañasa. ¿Kunjamsa tratadonakamp yatiysna? Niyakejjay tratadonakajj walja kastächejja, kawkirimpitï yatiykañäni ukanakjja sum yatjjatañasa.
5. Utat uta yatiykasajja, ¿kunjamsa tratadonakamp yatiysna?
5 Kawkhanjjay yatiychiñäni ukat kuna tratadjjay ajllstan ukarjamaw parltʼañasa. Ukat mä tratado churasinwa parltʼañ qalltsna. Tratadon qallta janap uñjasajja inas jukʼamp yatjjatañ munchispa. Jan ukajj mä tratado ajlltʼasiñapatakiw walja tratadonak uñachtʼaysna. Ukat punku jan jistʼarañ munapki ukawjanakanjja, kunjamatsa utanejj uñjaspa ukawjaruw tratado uñachtʼayaraksna, jan ukajj ¿punku manqhnam pastʼayanirismati? sasaw jisktʼaraksna, ukat uka toqet kuns amuyi uksa jisktʼaraksnawa. Tratadon pʼeqenchäwipatï mä jisktʼanïchejja, uka toqet qhanañchañapatakiw maysna, jan ukajj kunas chuymapar purtʼaspa ukarjamaw jisktʼsna ukhamatwa jupamp parlañ qalltsna. Ukjjarojj tratadotwa mä cheq liytʼarapsna ukhamat kuna jisktʼanakatï utjki ukar jaysañapataki ukat arstʼañapatakis mayiraksnawa. Ukatjja, wakiskirïki ukwa Biblia pachpat liytʼarapsna. Parlañ tukuyasajja, kuna ratusa, kuna horas kuttʼañäni ukwa amtawayaraksna. Tamasantï jan utankapki ukanakar Bibliat apstʼat qellqatanak jaytapjjerïchi ukhajja, inas mä tratado jan anqäjjat amuykay usktʼañ wakischispa.
6. Callenakan yatiykasajja, ¿kunjamsa tratadonakamp parltʼsna?
6 Callenakan yatiykasa. ¿Callenakan tratadonakamp yatiyiritäti? Callenjja, yaqhepanakajj wali apurataw sarasipki, janiw jiwasamp parltʼañatak tiemponïpkiti, ukhamajja Diosan arup istʼañ munaspat janicha ukajj janiw yatiñjamäkiti. Ukhamajj jichhak mistki uka revistanak churañat sipansa, tratadonakwa liyiñapatak chursna, kunattejj revistanak liyipjjaspati janich uk janiw yatktänti. Niyakejjay tratadon qallta janapajj munkañjam lurtʼatächejja ukat jukʼa letranikirakïchejja, inas tiemponïkas liytʼañ munapjjchispa. Ukat sarkasin jiwasamp parlañatak mä rat saytʼapjjchi ukhajja, kuna toqetsa tratadojj parli ukwa qhanañchtʼaraksna.
7. Kunjamsa taqe cheqanakan tratadonakamp yatiysna uk mä qhawqha uñachtʼäwimp qhanañchtʼma.
7 Taqe cheqan yatiykasa. Tratadonakampejj taqe cheqanwa yatiysna. Mä jilatajja, utapat janïr mistkasajj mä qhawqha tratadonak bolsillopar apasipuniwa. Ukat khitimp jikisisasa, jan ukajj tiendan aljañ yanapirimpi parltʼasasa, jankʼakiw mä tratado liytʼañapatak jaytañ yati. Mä chacha warmejja, Nueva York markan kunayman arut parlir jaqenak utjatap yatisajja, uka markar pasiytʼir sarkasajj Naciones sat folleto ukat kunayman arut qellqat walja tratadonakwa apasipjjatayna. Ukat callen aljirinakaru, parquen samartʼasipki ukanakaru jan ukhajj restauranten manqʼasipki ukanakan yaqha aru parlir istʼasajj pachpa arupat parlki uka tratadwa churapjjerïna.
8. ¿Kunansa tratadonakajj jathanakar uñtasitajja?
8 “Yapucham.” Tratadonakajj jathanakar uñtasitawa. Patan jakasirinakajja, yapuchañatakejj taqe cheqaruw jathanak phawantapjje, kunattejj kawkhansa sum achuni uk janiw yatipkiti. Ukatwa Eclesiastés 11:6 jiskʼa tʼaqajj akham sispacha: “Alwatajja yapucham, jaypʼusa yapucharakim, janiw jumajj yatktati kunjämäkanitejj nayra, ukhamarak qhepa yapuchatasa, jan ukajj paypach satas mayak jilapjjchini” sasa. Cheqas tratadonakanwa ‘suma yatichäwinakajj’ utji ukhamajj uka suma yatiyäwinakjja taqe cheqan yatiyaskakiñäni (Prov. 15:7).
[3 janan qhanañchäwipa]
Niyakejjay tratadonakajj yatiyañatakejj wali askïchejja, noviembre phajjsitjja yaqheppachajj tratadonakampiw yatiyaskañäni.