¿Kuna askinaksa yatiyir mistsuñatak gruponakan jikjjatsna?
1. Kunanakatï Librot Yateqañataki Taman Tantachäwi sat wakichäwin utjkän uka pachpa yanaptʼanak ¿yatiyir mistsuñatak gruponakan jikjjatsnati?
1 Kunanakatï Librot Yateqañataki Taman Tantachäwi sat wakichäwin utjkän ukanakat ¿faltachastati? Jukʼanik tantachtʼasisajja, taqenimpiw sum uñtʼasiyätan (Prov. 18:24). Librot yateqañatak tantachäwi sarayir irpir chuyman jilatasa, kunansa yanaptʼa munayätan ukanak sum yatïna ukat jankʼakirakiw yanaptʼistäna (Prov. 27:23; 1 Ped. 5:2, 3). Uka yanaptʼanakjja, yatiyir mistsuñatak gruponakan jikjjataskaksnawa.
2. Yatiyir mistsuñatak grupoman ¿kunjamsa waljanimp sum uñtʼasisma?
2 Jiwasaw qalltañasa. Yatiyir mistsuñatak gruponakajja, Librot Yateqañataki Taman Tantachäwi siskän ukar uñtasitarakiwa. Ukat jilat kullakanakasampi yatiyir mistsusajja, “mä jaqjamaki[w]” purapat yanaptʼastan ukat waljanimpiw uñtʼasiraktan (Fili. 1:27). Grupomanjja, ¿qhawqhanimpis niy yatiyir mistjjta? ¿Janit taqpach jilat kullakanakamp mistsuñatak chʼamachaskasma? (2 Cor. 6:13, NM.) Ukat grupomankirit mä qhawqhaniruw utaman manqtʼasiñatak jan ukajj Familiana Diosar Yupaychañataki Aruma sat tantachäwimar jawstʼarakisma. Yaqhep tamanakanjja, yatiyir mistsuñatak gruponakajj yaqha tamat arstʼir jutki uka jilatar manqʼa wajjtʼañatakiw turnasipjje. Mä grupor waktʼki ukhajja, arstʼir jilatas jan jupanakamp manqʼer sarkchi ukhasa grupjamajj tantachasisipkakiwa.
3. Yatiyir mistsuñatak gruposanjja, ¿kunjamanakatsa ajay toqet yanaptʼa katoqsna?
3 Niyakejjay semanan pä kutik tamjamajj tantachasjjstanjja, ukhamajj irpir chuymaninakajj jilat kullakanakar ajay toqet yanaptʼapjjañapajj ¿janit sint wakisjjpacha? Janiw ukham amuyañasäkiti. Grupo uñjir jilatanakajja, grupopankir jilat kullakanakarojj kunjamsa sum yatiyapjjaspa uka toqetwa yanaptʼapjjañapa, chʼamachtʼapjjañapa ukat wakichtʼapjjañaparaki. Grupo uñjir jilatampitï yatiyir jan mistkstajja, ¿janit jupamp mistsuñatak maykasma? Ukat sapa phajjsi seman tukuyaruw yatiyañ toqet irpir chuyman jilatajj gruponakar tumptʼir sararaki. Tamajj jukʼanikïpki ukanakanjja, inas maran pä kutik gruponakar tumptʼapjjchi. Uka jilatajj grupomar tumptʼir jutki ukhajj ¿yatiyir misttati?
4. 1) Yatiyir mistsuñatak tantachäwejj ¿kunjamsa wakichtʼasiñapa? 2) Yatiyir mistsuñatak utasan tantachasipjjañapatakejj ¿kunatsa utas maytʼañajj wakisispa?
4 Gruponakajj yaqha yaqha seman tukuyar yatiyir mistsuñatak tantachasisajja, walja askinakwa jikjjatapjje. Sañäni: niya pachpa horasaruw walja cheqat mistsupjje ukat tantachäwir puriñasa, yatiyir sarañasa jilat kullakanakatakejj janiw chʼamäkiti. Ukat khitimpis maynejj mistsuni uk sañas janiw chʼamäkarakiti ukat jankʼakirakiw yatiyir mistsusi. Ukatsti, kunjams irnaqasipki uk uñjañas grupo uñjir jilatatakejj janiw chʼamäkiti. Ukhamäkchi ukhasa, awisajj mayas jan ukajj pä grupos mayarukiw tukuyañajj wakisjjaspa. Ukat tamankir taqpach gruponakatï sapa phajjsi nayrïr sabadojj yatiyir mistsuñatak tantachasipjjchi, jan ukajj Yatiyañataki sat revista yatjjatasin tukuyar mistsupjjañapächi ukhajja, grupjamajj mayawjaruk qontʼasipjjañapaw wakisispa, ukhamat sapa grupon uñjir jilatanakajj kunjamsa irnaqasini uk janïr oracionamp tukuykipan sañapataki. (“¿Utamat yatiyir mistsupjjaspati?” sat recuadro uñjjattʼäta.)
5. Niyakejjay Librot Yateqañataki Taman Tantachäwejj jan utj-jjchejja, ¿kuna yanaptʼas utjaskistu?
5 Librot Yateqañataki Taman Tantachäwi sat wakichäwejj janis utj-jjchejja, Jehová Diosajj munañap phoqhañatakejj kuntï munktan ukanak churaskakistuwa (Heb. 13:20, 21). Janipuniw Jupajj kuns faltaykistaniti (Sal. 23:1). Yatiyir mistsuñatak gruponakanjja, walja bendicionanakaw utji. Ukhamajj “walja yapuchasiristi, waljaraki apthapini” siski uka arunak amtasajja, jiwasaw kun lurañatakis qalltañasa (2 Cor. 9:6).
[6 janan recuadropa]
¿Utamat yatiyir mistsupjjaspati?
Yaqhep tamanakanjja, jan kawkhat yatiyir mistuñatak uta utjatapatjja, seman tukuyanakajj mä qhawqha gruponakajj mayawjatak mistsjjapjje. Utasat yatiyir mistsuñatak tantachasipki ukajj mä bendicionawa, kunattejj mayni tantachäwinakjamarakiwa. Ukhamajj ¿yatiyir mistsupjjañapatak utam maytʼasmati? Janis wali suma utapunïkchejja, maytʼañ jan ajjsaramti. Irpir chuyman jilatanakajj janiw suma lurtʼatati janicha uk uñchʼukipkaniti antisas ukawjat mistsuñajj waljamäspati janicha ukwa uñjapjjani. Jumatï utam maytʼañ munstajja, grupom uñjir jilataruw yatiyañama.