Chuymankipstatanakar uñjapki uka utanakan yatiyapjjañäni
1. Chuymankipstatanakar uñjapki uka utanakan ¿kunatsa Diosan arunakap yatiyañasa?
1 Waljaniw chuymankipstjjapjje (Ecl. 12:1-7). Yaqhepanakajja, chuymankipstatanakar uñjapki uka utanakanwa jakasjjapjje. Utat uta yatiykasajj janiw jupanakar jikjjatjjtanti. Yaqhep markanakanjja, wawanakapampi jan ukajj familiaranakapamp jakasiriw sarjjapjje, jupanakarus janirakiw jikjjatktanti. Chuymankipstatanakar uñjapki uka utanakan jakasirinakasa, ukat jukʼamp sum uñjatäñ wakiski ukanakasa, inas jan sartirjamäpkchiti jan ukajj kuns armasjjapjjakchi. Ukampis Jehová Diosat yateqasipkaspawa, Diosarojj munjjapjjarakispawa. ¿Kunjamatsa ‘kusiskañ suytʼäwit’ jupanakar parljjaysna? (Tito 2:13.)
2. Chuymankipstatanakar uñjapki uka utanak ¿kunjamatsa jikjjatsna?
2 Kunjams qalltsna. Chuymankipstatanakar uñjapki uka utanakajj kawkhansa utji ukjja, directorio telefónico sat libronwa aka sutinakampi thaqtsna: “Residencias de ancianos”, “clínicas geriátricas” jan ukajj “asilos”. Yatiyañ toqet irpir chuymani jilataw yatjjattʼat yatiyirinakar uka utanakar visitir sarapjjañapatak ajlltʼaspa. Sum wakichtʼasiñäni ukat Jehová Diosar confiyañäni ukhajja, uka utanakan Bibliat grupor yatichañajj janiw chʼamäkaniti (Pro. 21:5; 1 Juan 5:14, 15).
3, 4. 1) Bibliat grupor yatichañatakejj ¿khitimpis nayraqat parltʼsna? 2) Bibliat kunjamsa yatichasi uk ¿kunjamsa qhanañchtʼsna?
3 Uka utanakan qawqhanis jakapjje, ukarjamaw Bibliat yatichsna. Waljani jakapjjchi ukat waljanirak ukan trabajapjjchi ukhajja, uka utan katoqki ukaruw ‘¿encargadompi parltʼiristi?’ sasinwa jisktʼañasa. Mä qawqhanikïpjjchi ukat jukʼanikirak trabajapjjchi ukhajja, uka utan dueñopampiw parltʼsna.
4 ‘Biblian utjki uka sarnaqäwinakat yatjjatañ munapki jan ukajj liyipki ukanakar chʼamañchtʼañ amtampiw jutapjjta, jan qollqe mayisakiw yanaptʼapjjta’ sasaw sañasa. “Sapa semanan 30 minutonaka ¿khitinakach Bibliat yatjjatañ munapjjaspa?” sasaw jisktʼañasa. Bibliat apstʼat kunayman qellqatanakampiw yatichsna. Waljanejja, Bibliat apstʼata sarnaqäwinaka ukat El hombre más grande de todos los tiempos sat libronakampiw askinak jikjjatapjje. Nayraqatjja, uka utan sarayki ukaruw qellqatanak uñachtʼayañajj wakisispa. Jupampirakiw kunürusa, kuna horasa ukat kawkïr utansa tantachasiñajj walïspa uk parltʼsna, ukat ukjja, kunanaktï uka utan lurapki uka listaparuw qellqtʼjjapjjani. Ukat Jehová Diosan Qhanañchiripätasjja, jankʼakiw yatiyañasaraki. ‘Bibliat yatichañ amtampiw jutapjjta, janiw mayni iglesianakjam lurir jutapkti’ sasaw sañasa.
5. Bibliat yatichkasa askinak utjañapatakejj ¿kunanaksa lursna?
5 ¿Kunjamsa yatichsna? Chuymankipstatanakar uñjapki uka utanakan kunjamächiy ukarjamaw Bibliat yatichasispa, ukampis paciencianïñasawa ukat amuytʼañasarakiwa. Khititejj yatichkani ukajja, kawkïr qellqatatsa yatjjatapjjani uk waljpachwa apañapa, ukat tukuyatarojj apasjjañaparakiwa. Jan sum uñjapki ukanakatak jachʼa letranakani qellqatanak apañajj wakisirakispawa. Liytʼañ munapki ukat liytʼirjamäsipki ukanakarojj Biblian utjki uka sarnaqäwinaka jan ukajj tʼaqanaksa liytʼayaraksnawa, ukat ukjjaruw jisktʼaraksna. Yatichkasajj kusisita ukat munasiñampiw parltʼañasa. Bibliar jukʼampi confiyapjjañapataki jan ukajj Biblian utjki uka sarnaqäwinak sumpach amuyapjjañapatakejj Diosan markapan utjki uka videonakwa uñachtʼaysna, ukampis nayraqatjja, uka utan sarayki ukaruw permiso mayiñasa. Ukat yatichañ qalltañatakisa tukuyañatakisa, Diosat mayisiraksnawa, ukampis janiw wali jaya mayiñasäkiti. Yaqhep yatiyirinakajja, qʼochunaksa qʼochupjjarakiwa.
6. Yatichktan uk maynejj mayj amuyani ukhajja, ¿kamachsnasa?
6 Yatichkasin kuntï sisktan jan ukajj liytʼktan ukatï maynïritaki jan waljamäni ukhajja, ¿kuns lursna? Wali amuyumpiw qhanañchtʼañasa (Col. 4:6). Biblian kawkïr jiskʼa tʼaqapas uka jisktʼapar sum qhanañchaspa uk inas uñachtʼaysna. Uka rato jan qhanañchañ wakiskani ukhajja, kuntï jupajj amuyki ukanakat yuspärañasawa ukat ‘tukuyataruw uka toqet parltʼañäni’ sasaw saraksna.
7. Maynitï jukʼamp yatjjatañ munani jan ukajj jisktʼistani ukhajja, ¿kuns lursna?
7 Awisajja, jisktʼapjjestaspawa jan ukajj yaqha toqetwa jukʼamp yatjjatañ munapjjaspa. Ukhaman uñjasisajja, mä kullakajj akham sañ yati: “Ukham amuytʼatamajj wali askiwa. Niyakejjay juma sapaki uk jisktʼchistajja, tukuyatar uka toqet parltʼsna ukajj ¿walïspati?” sasa. Ukampis Bibliat jukʼamp yatjjatañ munirinakarojj yaqha horasanwa sapaparuki yatichsna.
8. Chuymankipstatanakar uñjapki uka utanakan Bibliat gruporu jan ukajj mayni saparuki yatichstan ukanakjja, ¿kunjamsa informe papilar qellqañasa?
8 Chuymankipstatanakar uñjapki uka utanakan khitinakatï Bibliat grupor yatichañ qalltapki jupanak pachpa yatichasipkakispa ukajj askïspawa. Ukat jupanakarakiw horanak jakhusipjjaspa. Sapa semana grupor yatichasjjchi ukhajja, Bibliat mä yateqeripäkaspas ukhamwa informe papilar qellqasipjjaspa, ukat sapa kuti yatichapkani ukjja, mä revisitjamwa jakhusipjjarakispa. Ukat sapaparuki maynir Bibliat yatichañ qalltañäni ukhajja, ukhamarakiw jakhusiñasa.
9, 10. Bibliat yatichirinakajj ¿kunjamäpjjañapasa?
9 Sarañasapuniwa. Uka utanakan kuna urusa ukat kuna horasa grupor yatichañäni uk sum amtjjañasa. Yateqerinakasa ukat ukan trabajirinakasa, sapa semanajj horasaparu qalltasispa ukat tukuyasispa ukwa munapjje (Mat. 5:37). Ukhamajja, jankʼakïñasawa, sum wakichtʼasiñasa ukat phoqañasarakiwa. Yatichirejj paninipuniw sarañasa ukaw wali askïni (Ecl. 4:9, 10). Ukampis uka utanakantï waljanïpjjchi ukhajja, inas mä qawqhanpach sarañ wakischispa.
10 Jupanakat llakisitasa, munasitas uñachtʼayañajj wali askiwa (Fili. 2:4). Nayrïr kuti sarkañäni ukhajja, sapa maynir uñtʼañatakiw chʼamachasiñasa. Sutinakap qellqtʼasiñasawa ukat yaqha seman kutʼkañäni ukatakejj yatjjañasawa. Jiwasatï jupanakar khuyaptʼayañäni ukat pacienciampi uñjañäni ukhajja, jakʼachasipjjakistaniwa ukat jupanakar munasitassa amuyapjjarakiniwa.
11. Bibliat yatichapki ukanakajj ¿kunjamsa chuymankipstatan familiaranakaparu ukat ukan trabajirinakarus respeto uñachtʼayapjjaspa?
11 Uka utanakan trabajirinakarusa, chuymankipstatanakan familiaranakaparus respetompi ukat munasiñampiw uñjañasa. Sapa semana Bibliat yatichasjjchi ukhajja, uka utan sarayki ukar janïr yatiykasajj janiw horarionaksa ni kunjamtï yatichasktan uksa mayjtʼayañasäkiti. ‘¿Yatichapkt ukajj jumatak kunjamakisa?’ sasin yaqheppach jupar jisktʼañajj wakisirakispawa. Chuymankipstatanakan familiaranakapajj tantachasitäsktan ukhapuni visitir jutapjjani ukhajja, khitïtansa, kuna amtampis yatichasktan ukat qawqhsa chuymankipstat familiapar yanaptʼañ muntan ukanak yatiyañasawa. Ukat jupanakamp chika istʼañapatakis invittʼaraksnawa.
12, 13. Chuymankipstatanakar uñjapki uka utanakan Bibliat grupor yatichasajj kuna experiencianakas utjawayi, uk qhanañchtʼam.
12 Kunanakas jikjjatasini. Tamanak tumptʼirinakasa ukat kawkïr tamanakatï uka utanakan yatiyapki ukanakasa, ukan yatiyasajj walja askinakaw jikjjatasi sasaw sapjje. Mä utanjja, pä tunkaniw nayrïr kuti tantachäwirojj sarapjjatayna, ukat sojjtanirakiw sapaparuki Bibliat yatichayasiñatak mayitayna. Mä warmejja, Bibliat yatjjatasajj bautisasjjewa. Yaqha utanjja, Bibliat grupor yatichaski ukajj 85 maran mä warmirojj tantachäwinakar sarañapataki ukat bautisasiñ munatap yatiyañatakis yanaptʼawayarakiwa. Yaqha utansti, kunanaktï lurapki ukanakat yaqhep luräwinak apsjjaña ukat Bibliat grupor yatichaski uk chhaqtayañ munapjjäna ukhajja, ukan jakirinakajj uka utan sarayki ukaruw quejasipjjäna. Ukhamïpansti Bibliat yatichaski uk janiw chhaqtayjjapjjänti, mä 25 jan ukajj 30 ukhaniw uka grupor sarjjapjjäna.
13 Munasiñ uñachtʼayatassa ukat chʼamachasitassa, janiw ukan jakasirinakakejj amuyapkiti. Uka utan yaqhep trabajirinakajja, uka gruponakarojj awisajj sarapjjewa ukat arstʼapjjarakiwa. Janiw ukakïkiti, uka jakʼanakan jakirinakasa, Jehová Diosan Qhanañchirinakapat sumwa parlapjjaraki (1 Ped. 2:12). Ukham utanakan mä sarayirir kuna amtampis Bibliat grupor yatichasi uk qhanañchtʼatajja, jupajj akham sänwa: “¿Kunatsa nayratpach jan jutapkayäta? ¿Kunapachas qalltapjjasma?” sasa. Ukat yaqha ukham utan mä sarayir warmejj akham sasaw qellqatayna: “Bibliat grupor yatichapki ukajj taqe akham utanak utjki ukanakan yatichapjjaspa ukajj walipunïspawa. Jehová Diosan Qhanañchirinakapajj jan qollqe mayisakiw jaqenakar yanaptʼañ amtampi Bibliat yatichapjje” sasa. Hawái sat markan chuymankipstatanakar uñjapki ukanakat mä utanjja, Jehová Diosan Qhanañchirinakaparojj ukham jan qollqe mayisaki yanaptʼapjjatapatjja, mä certificado churapjjatayna. Ukat ‘akan jakirinakatakisa, trabajirinakatakis jumanakajj “mä suma joyäpkasmas” ukhamäpjjtawa’ sasaw satayna.
14. Chuymankipstatanakar uñjapki uka utanakan jakasirinakar ¿kunatsa Diosan arunakap yatiyañ muntanjja?
14 Jehová Diosajj Juparu jachʼañchapjjañapatakiw chuymankipstatanakar invittʼi (Sal. 148:12, 13). Chuymankipstatanakar uñjapki uka utanakan jakasirinakarus invittʼarakiwa. Yatiyktan ukhanakan ukham utanakajj ¿utjiti? Uka utanakan sarayirinakana ukat irpir chuymaninakan yanaptʼapampejja, Diosan suma yatiyäwinakap ukanakan yatiysnawa, ukhamatwa jupanakajj askinak apsupjjani. Jupanakar ukham yanaptʼasajja, Jehová Diosat yateqasitaswa uñachtʼaytanjja (Sal. 71:9, 18).