Diosar yupaychañatak machaq qʼochunakaw utjani
1 Pasïr marajja, octubre phajjsit 4 uru saraqataruw maran mä kuti tantachäwejj (reunión anual) Watch Tower Bible and Tract Society of Pennsylvania corporacionan utjäna, ukanjja, qʼochuñ librojj wasitatwa uñakiptʼasini sasaw yatiyasïna. Uka yatiyäwejj ¡wali kusiskañapunïnwa! Ukat qʼochunakajja, Jehová Diosar yupaychañatakejj wali wakiskiriwa sasaw tantachasirinakar amtayasirakïna (Sal. 96:2).
2 ¿Qʼochuñ librojj kunatsa wasitat uñakipasiñap wakisi? sasin inas jisktʼasta. Cheqas wakisiwa, kunattejj Diosan Arupajj marat maratjamaw jukʼamp sum amuyasiwayjje, ukhamïpansti qʼochuñ libron qellqatäki uka arunakajj inas mayjtʼayasiñap wakisirakchini (Pro. 4:18). Ukat Traducción del Nuevo Mundo de las Santas Escrituras Bibliajja, walja arunakanwa wasitampi uñakipasiskaraki, ukhamajja qʼochuñ librosan yaqhep arunakajj inas mayjtʼayasiñap wakisirakchini. Niyakejjay qʼochuñ libro wasitat uñakipañajj wali chʼamächispajja, qʼochuñ libror machaq qʼochunaka yaptʼasiñwa amtasiwayi.
3 ¿Mä machaq qʼochuñ libro imprimisiñapkamati uka qʼochunak qʼochuñatakejj suyaskañäni? Janiwa. Uka machaq qʼochunakajj jutïr phajjsinakanwa Internetan jw.org cheqan uchatäjjani. Mä machaq qʼochu Internetan utj-jjani ukhajja, Yatiyañataki Tantachäwinwa tuktʼayañatak qʼochusini, ukatakejj wakichäwinwa “machaq qʼochu” sasin qhanañchasini.
4 ¿Kunjamatsa machaq qʼochunak yateqsna? Mä machaq qʼochu yatsuñajj chʼamakïspawa. Ukampis salmo qellqerjamaw tama taypin “jan amuktʼas jachʼañchañ qʼochunak” qʼochuñ muntanjja (Sal. 30:12). Ukhamajj machaq qʼochunak yatsuñataki ukat taqe chuyma qʼochuñatakejj akanakwa lursna:
Qʼochuñataki grabacionjja, walja kutiw istʼañasa, ukhamatwa ratuki yatsuñäni. Qʼochuñataki grabacionajja, jw.org cheqan utj-jjarakiniwa.
Kunatï qellqatäki uk sum yatjjatañasa, ukat yatsuñatakiw chʼamachasiñasa.
Grabacionamp chikaw qʼochuñasa. Ukat yatsuñkamaw chʼamachasiñasa.
Familjam Diosar yupaychkasaw walja kuti qʼochuraksna, ukhamatwa familiasajj sum qʼochuñ yateqapjjarakini.
5 Jutïr phajjsinakanjja, Yatiyañataki Tantachäwi tukuyañatak machaq qʼochu qʼochuñ waktʼkani ukhajja, nayraqatjja, tantachäwinwa grabación istʼapjjañäni. Ukatsti ukjjaruw grabacionamp chika qʼochupjjañäni, kunjamtï qʼochurïktan ukhama.
6 Cheqas tantachäwin qʼochuñajja, Jehová Diosar kusisita yupaychañatakiw yanaptʼistu. Ukhamajj tantachäwin qʼochkañäni ukhanakajja, janiw yaqhanak luraskañajj wakiskaspati.
7 Jachʼa tantachäwinakan janïr wakichäwi qalltkipanjja, musicanak istʼañatakiw utjki, ukanak sum istʼasaw Diosar yupaychañatak qʼochunak askit uñjatas uñachtʼayaraksna. Walja jilat kullakanakajja, pasajenakap pagasisaw walja markanakat Patterson, (Nueva York) markaru suma musicanak tokir maran pay kuti sarapjje, ukhamatwa uka musicanakampejj Diosar yupaychtanjja. Ukhamajj kunapachatï jachʼa tantachäwi sarayir jilatajj qontʼasiñataki ukat music istʼañatak invittʼistani ukhajja, jankʼakiw istʼañasa. Ukhamatwa kunanaktï tantachäwin istʼkañäni ukanak sum istʼañataki chuymas wakichtʼistani (Esd. 7:10).
8 Aka tantachäwi tukuyatarojja, uka machaq qʼochunakat maywa qʼochupjjañäni. Pʼeqeñchäwipajj akham siwa: “¡Diosan uttʼayatäki uka Reinojj jutpan!” sasa. Uka machaq qʼochojja pasïr mara tantachäwinwa (reunión anual) apsusiwayi. Ukajja, Diosan Reinop pataka maranaka uttʼayatäjje uk amtañatakiw lurasiwayi.
9 Uka machaq qʼochunakajja, Jehová Diosajj ‘kuna sumanaktï’ churkistu ukanak taypinkarakiwa (Mat. 12:35a, NM). Ukhamajj yatsuñataki ukat taqe chuyma qʼochuñataki chʼamachasipjjañäni. Ukhamat Jehová Diosar jachʼañchañataki (Sal. 147:1).