Diosan Arupat yatjjatañataki sat folletompi jaqenakamp parlañ qalltapjjañäni
1. Yatiyir sarañatakejj ¿kuna machaq yanaptʼas utjistu?
1 Jichhanakakiw Diosan Arupat Yatjjatañataki sat folleto katoqawaytanjja. Uka folletojj Biblian yatichäwinakapat qhanañchtʼañatakejja, textonakajj Razonamiento libror uñtasit mayar apthapitarakiwa, ukatwa yatiyañ qalltañatakejj wali askïspa. ¿Kunjamsa yatiyir sarañatakejj uka folletompi wakichtʼassna?
2. ¿Kunjamsa Diosan Arupat Yatjjatañataki sat folletompi yatiysna?
2 Amuytʼañataki, 8 jisktʼata jisktʼasajja, akham sisnawa: “Vecinonakamampiw mä rato parltʼasipkayäta, ukatjja waljaniw ‘¿Diosat tʼaqhesitasat juchanïpacha?’ sasin jisktʼasipjje. [Yaqhep cheqanakanjja, folletot cheqaki jisktʼasaw askinak jikjjatapjje.] ¿Jumajj kamsasmasa? [Kamsanis uk istʼäta.] Bibliaw uka toqet sum qhanañchi” sasa. Ukjjarusti folleton nayrïr janapan uñstki uka 20 jisktʼanak uñjjattʼayañasa, ukat jutïrin ukanakat maya toqet parltʼañatakiw jupamp amtawayañasa. Bibliat yaqhanakar yatichktan uka qellqatanaksa churaraksnawa, ‘akanwa uka toqet jukʼampi parltʼaski’ sasaw saraksna.
3. Jan cristian religionanakajj utjki uka cheqanjja, ¿kunjamsa Diosan Arupat Yatjjatañataki sat folletompi parlañ qalltsna?
3 Kawkhanakantï jaqenakajj jan cristian religionanakankapki ukanakarojj folleton 4 ukat 13-17 jisktʼanakaparjam yatiyañaw wakisispa. Amuytʼañataki, 17 jisktʼampejj inas akham sissna: “Familianakar yanaptʼañatakiw mä rato visittʼasipkta. Jichha tiemponakan jukʼamp jan walinakanwa familianakajj jikjjatasjjapjje. ¿Jumajj kamstasa? [Kamsanis uk istʼäta.] Walja chacha warminakajj aka suma arunakaruw istʼapjje: ‘Warmisti chacharojj istʼañapawa’. [Warmimpitï parlaskstanjja, janiw Efesios 5:33 qellqat apsutaw sañajj wakiskaspati. Antisas Efesios 5:28 qellqatatwa qhanañchtʼsna.] Uka qellqatarjam sarnaqañajj chacha warmir yanaptʼaspaw ¿sasmati?” sasa.
4. Jan cristian religionankirinakampi parlañ tukuyasajj ¿kamsnas jupanakarojja?
4 Parlañ tukuyasajja, ‘yaqha horasaw uka toqet jukʼamp parlaskakiñatak kuttʼanï’ saraksnawa. Kuttʼasajja, kawkïr jisktʼattï jupampi yatjjatawayktan uka pachpankir Biblian yaqha jiskʼa tʼaqapatwa yatjjataraksna. ‘Parlktan uka suma ewjjtʼanakajj Bibliat apstʼatawa’ sasaw wakiski ukhajj saraksna. Kunanakattï parltʼawayktan ukat Bibliat kunjamsa amuyi ukarjam amuytʼasaw Bibliat apstʼat kawkïr qellqatatsa jupajj yatjjatañ munaspa uk jaytsna. (Diosan Apnaqäwipat Yatiyañataki, diciembre 2013, 3 janat 6 janakam uñjjattʼäta.)