Sadoc waynjam jan ajjsarirïpjjañäni

1, 2. ¿Khitïnsa Sadoc waynajja? (1 Crónicas 12:22, 26-28).

AKHAM amuytʼañäni, 340.000 jila chachanakaw Davidar taqpach Israel markjjar reyit uttʼayañatak tantachasipjje. Hebrón marka jakʼankir jiskʼa qollunakanjja, kimsa urunakaw chachanakan taqe chuym parltʼasipjjatapasa, alabanzanak cantapjjatapasa, kusisiñat lartʼasitanakapas istʼasi (1 Crón. 12:39). Sadoc sutini mä wayna chachaw ukankaraki, walja jaqenak taypinjja inas jan khitis jupan ukankatap amuykchiti. Ukampis Jehová Diosajj jupan ukankatap yatïnwa, uka waynan ukankatap yatipjjañassa munarakïnwa (1 Crónicas 12:22, 26-28 liytʼäta). Ukampis ¿khitïns uka Sadoc waynajja?

² Sadoc waynajj sacerdotënwa, Abiatar sat jachʼa jilïr sacerdotempiw trabajïna. Sadoc waynajj visionanak amuytʼirirakïnwa, mä arunjja Jehová Diosaw juparojj wali yatiñanïñapatakisa voluntadap amuyañapatakis yanaptʼäna (2 Sam. 15:27). Jaqenakas jupan ukaruw ewjjtʼayasiñatak sarapjjerïna. Ukhamarus jupajj jan ajjsarirïnwa. Aka yatichäwinjja, kunjamsa jan ajjsarirïtap uñachtʼayäna ukwa yatjjataskañäni.

3. 1) ¿Kunatsa jan ajjsarirïñasa? 2) ¿Kunsa aka yatichäwin yatjjataskañäni?

³ Aka qhepa urunakanjja, Supayajj jukʼampiw Diosan markapar atacaski (1 Ped. 5:8). Jehová Diosajj Supayampiru jupan apnaqat jan wali pachampir tukjkani uka urun puriniñapkamajj jan ajjsarirïñasawa (Sal. 31:24). Kunjamanakatsa Sadoc waynjam jan ajjsarirïsna uk kimsa toqet yatjjataskañäni.

DIOSAN REINOPARUW APOYAÑAMA

4. ¿Kunatsa Diosan Reinopar apoyañatakejj jan ajjsarirïñasa? (Foto uñjjattʼarakïta).

⁴ Jehová Diosan servirinakapajj taqe chuymaw Diosan Reinopar apoytanjja, ukampis jilapartejj uk lurañatakejj jan ajjsarirïñasawa (Mat. 6:33). Aka jan wali pachanjja, Diosan leyinakapar istʼañatakisa, Reinon suma yatiyäwinakap predicañatakis jan ajjsarirïñasawa (1 Tes. 2:2). Akapachajj jukʼamp jukʼamp tʼaqanoqtatäjjewa, ukhamajj politicar jan mitisiñajj jukʼamp chʼamäjjewa (Juan 18:36). Testigonakat waljaniw politicar jan mitisipjjatapata jan ukajj cuartelar jan sarapjjatap laykojj qollqet pistʼata, nuwjata, carcelar llawintat uñjasipjje.

5. ¿Kunatsa Sadoc waynajj Davidar apoyañatakejj jan ajjsarirïñapäna?

⁵ Sadoc waynajj janiw Davidar reyit uttʼayapkäna ukaruk Hebrón markar sarkänti. Jupajj armantatänwa, guerratakis wakichtʼatarakïnwa (1 Crón. 12:38). Davidamp chik guerrar sarañatakisa, Israel markar enemigonakapat jarkʼaqañatakis jankʼakïnwa. Inas guerrar sarañatakejj jan experiencianïkchïnti, ukampis jupajj jan ajjsarirïnwa.

6. ¿Kunjamsa Davidajj jan ajjsarirïñatak Sadoc waynar yanaptʼäna? (Salmo 138:3).

⁶ ¿Kunas Sadoc waynarojj jan ajjsarirïñatak yanaptʼäna? Chʼamani jan ajjsariri chachanakan sum sarnaqapjjatapaw wal yanaptʼpachäna. Jupanakat maynïrejj Davidänwa. Niyakejjay Davidajj jan ajjsaras ‘Israel markar guerran nuwasiñan pʼeqtʼchïnjja’, Israel markpachaw reyit uttʼayañ munäna (1 Crón. 11:1, 2). Davidajj Jehová Diosaruw confiyäna, enemigonakapajj arknaqapkäna ukhas Jehová Diosarupuniw yanap mayisirïna (Sal. 28:7; Salmo 138:3 liytʼäta). Sadoc waynarojj tiempopan jakir yaqha jan ajjsarir chachanakaw yanaptʼapjjarakïna, jupanakat yaqhepanakajj akanakänwa: Jehoiadá chachampi guerran nuwasir Benaya yoqapampi, David toqet saytʼasipkäna uka familia pʼeqtʼirinakat 22 chachanakampi (1 Crón. 11:22-25; 12:26-28). Jupanakajj taqeniw Davidarojj reyïñapatak apoyapjjäna.

7. 1) ¿Khitinakas jichha tiempon jan ajjsarirïñ toqet wali yateqaskañäpjje? 2) ¿Ayenge Nsilu jilatat parlki uka videojj kunsa yatichistu?

⁷ Diosan Reinopar apoyapkäna uka servirinakat yatjjatañaw chʼamañchtʼistu, jan ajjsarañatakis yanaptʼistu. Jesucristo Reyisajj janiw Supayan apnaqat politicar kunäkipans mitiskänti (Mat. 4:8-11; Juan 6:14, 15). Chʼam katjjatañatakejj Jehová Diosarupuniw confiyäna. Jichha tiemponjja, yaqhep waynanakajj janiw cuartelar sarapkiti, janirakiw politicarus mitisipkiti, jupanakajj wali yateqaskañäpjjarakiwa. ¿Jupanakan experiencianakap janit jw.org cheqan thaqkasma?a

JILAT KULLAKANAKAR YANAPTʼAM

8. Jilat kullakanakar yanaptʼañatakejj ¿kunjamanakansa ancianonakajj jan ajjsarirïpjjañapa?

⁸ Jehová Diosan servirinakaparojj yanaptʼasiñajj wal gusti (2 Cor. 8:4). Ukampis awisajj uk lurañatakejj jan ajjsarirïñaw wakisi. Guerrajj utjki ukhajja, jilat kullakanakajj chʼamañchtʼatäña, yanaptʼatäña jan ukajj Bibliat apstʼat qellqatanak katoqaña jan ukajj isinaka, manqʼañanaka, quedasiñatak mä lugar munapjje, ancianonakajj uk sum yatipjje. Niyakejjay jupanakajj jilat kullakanakar wal munasipjjchejja, kuntï necesitapki uk churañatakejj jankʼakïpjjewa, uk lurañajj peligrosökchis lurapjjewa (Juan 15:12, 13). Ukhamatwa Sadoc waynjam jan ajjsarirïpjjatap uñachtʼayapjje.

9. 2 Samuel 15:27-29 textorjamajj ¿kun lurañapsa Davidajj Sadoc waynar mayïna? (Dibujo uñjjattʼarakïta).

⁹ Davidajj jiwayañatak arknaqataw uñjasïna. Absalón yoqapaw reyïñat apaqañ munäna (2 Sam. 15:12, 13). Ukatwa Davidajj Jerusalenat jankʼak escapjjañapäna. Akham sasaw servirinakapar säna: “¡Sarjjañäni, escapjjañäni! Janiw jiwasat maynis Absalonan amparapat escapkaspati” sasa (2 Sam. 15:14). Niy sarjjapjjäna ukhajja, Davidajj mä qhawqhanin Jerusalenan quedasipjjañapwa munäna, ukhamat Absalonan jan wali amtanakapat jupanakar yatiyañapataki. Ukatwa Sadoc waynampiru yaqha sacerdotenakampir Jerusalenar kuttʼayäna (2 Samuel 15:27-29 liytʼäta). Jupanakajj wal amuyasipjjañapäna, kuna laykutejj kunsa Absalonajj luraskäna uk uñaqañajj wali peligrosönwa, vidaps aptʼasipjjaspänwa. Absalonajj jupatakik kuns muniri, nuwasiri, traicionero jaqënwa. Davidar jarkʼaqañatak jupar uñaqerinakar katjaspäna ukhajj ¿kunas pasaspäna uk amuyasmati?

10. ¿Kunjamsa Sadoc waynasa jupamp chikäpkäna uka chachanakas Davidar salvapjjäna?

¹⁰ Davidajja, Sadoc waynampiru jupat jan jitheqtir Husái amigopampirojj mä amtapan yanaptʼapjjañapatakiw mayïna (2 Sam. 15:32-37). Davidan instruccionanakaparjam lurasajja, Husái chachajj Absalonarus yanaptʼkaspa ukhamwa tuküna, kunjamsa Davidar atacaspa uksa jupar ewjjtʼarakïnwa, ukhamat Davidajj wakichtʼasiñatak tiemponïñapataki. Ukat uka amtapjja, Husái chachajj Sadoc ukat Abiatar chachanakaruw awisäna (2 Sam. 17:8-16). Jupanakasti David chacharuw uka yatiyäwi apayapjjarakïna (2 Sam. 17:17). Jehová Diosan yanaptʼapampejja, Sadoc waynasa mayni sacerdotenakas Davidan jakañ vidapwa salvapjjäna (2 Sam. 17:21, 22).

11. Jilat kullakanakar yanaptʼañatak mayipjjestaspa ukhajj ¿kunjamsa Sadoc waynjam jan ajjsartʼirïsna?

¹¹ Mä sinti jan waltʼäwin jilat kullakanakar yanaptʼañatak mayipjjestaspa ukhajj ¿kunjamsa Sadoc waynjam jan ajjsarirïsna? 1) Instruccionanakarjam lurañasawa. Ukhamanakan uñjasisajj istʼasirïñajj wali wakiskiriwa, ukhamat mayachtʼatäñataki. Ukatwa sucursalan mayitaparjam lurañasa (Heb. 13:17). Mä jachʼa jan waltʼäwitakejja, sum wakichtʼasiñatakisa kunsa lurapjjani uk yatiñatakis ancianonakajj instruccionanakwa sapa kut repastʼapjjañapa (1 Cor. 14:33, 40). 2) Jan ajjsartʼirïñasawa, ukampis amuytʼasirïñasawa (Prov. 22:3). Janïr kun lurkasajj amuytʼasirïñasawa. Janiw jan amuytʼasisajj ina loqhek kuns lurañasäkiti. 3) Jehová Diosar confiyañasawa. Jupajj taqe jiwasanakatwa llakisi, janiw kuna jan walir purtʼasiñassa munkiti. Jilat kullakanakar jan kunar purtʼasis sum yanaptʼañasatakiw jupajj yanaptʼarakistaspa.

12, 13. ¿Kunsa Víktor ukat Vitali jilatanakat yateqta? (Foto uñjjattʼarakïta).

¹² Víktor ukat Vitali ancianonakajja, Ucrania markanwa jilat kullakanakan ukarojj manqʼsa umsa apapjjäna. Víktor jilatajj akham siwa: “Taqe cheqanakaruw manqʼ thaqer sarapjjayäta. Niya sapa kutiw nanak jakʼan disparonak istʼapjjayäta. Mä jilatajja, imatäkäna uka manqʼañanakwa donacionjam churäna, ukanakampiw walja publicadoranakajj mä qhawqha tiempojj yanaptʼasipjjäna. Uka manqʼañanak autor cargantasipkayäta ukhajja, mä misilaw nanakat mä 20 metronak jayar purïna, ukampis janiw phallkänti. Jurnälpachaw jan ajjsarañatak Jehová Diosar ruwtʼasiyäta, ukhamat jilat kullakanakar yanaptʼaskakiñataki” sasa.

¹³ Vitali jilatajj akham sarakiwa: “Jan ajjsarirïñaw wakisïna. Nayrïr kutejj 12 horanakaw viajiyäta. Taqpach viajenwa Jehová Diosar orasiyäta” sasa. Jupajj jan ajjsartʼirïkchïnsa, amuytʼasirirakïnwa. Jupajj akham saskakiwa: “Jehová Diosarojj yatiña, humilde chuymanïñ sapa kutiw mayisiyäta. Autompejj gobiernon autorizat lugaranakak sarayäta. Kunjamsa jilat kullakanakajj juntuk trabajipjjäna uk uñjasajj jukʼampiw Jehová Diosar confiyjjayäta. Pasañatakejj thakinak jistʼarapjjäna, manqʼañanak apthapipjjäna, autoruw ukanak cargantapjjarakïna. Víktor jilatampir nayampirojj manqʼa churapjjetäna, alojtʼapjjarakitänwa” sasa.

JANIPUN JEHOVÁ DIOSAT JITHEQTAMTI

14. Wali munat familiarasas jan ukajj amigosas Jehová Diosat jitheqtjje ukhajj ¿kunjamas jikjjatastanjja?

¹⁴ Kunapachatï mä familiarasasa jan ukajj mä amigosas Jehová Diosat jitheqtjje ukhajja, walpun chuym usuyastanjja (Sal. 78:40; Prov. 24:10). Yamas jupamp wali sum apaschiyätan ukhajj jukʼampiw chuym usuyassna. Jumatï ukhaman uñjassta ukhajja, Sadoc waynan Diosat jan jitheqtatapaw chʼamañchtʼiristam.

15. Jehová Diosat jan jitheqtañatakejj ¿kunatsa Sadoc waynajj jan ajjsarirïñapäna? (1 Reyes 1:5-8).

¹⁵ Davidan reyit apnaqañapajj niya tukuyañampëjjäna, jupajj wali jilïrëjjäna, niya jiwañampëjjarakïna ukhajja, Jehová Diosajj Salomonan reyïñapsa munkchïna ukhas Adonías yoqapaw David lantejj reyïñ munäna (1 Crón. 22:9, 10). Sadoc waynajj janiw Jehová Diosat jitheqtkänti, ukampis Abiatar amigopajj Adoniasar apoyañwa amtäna (1 Reyes 1:5-8 liytʼäta). Ukhamatwa Abiatar chachajj Davidatsa Jehová Diosatsa jitheqtaskäna. Sadoc waynajj wal llakispachäna, chuyms usuyasirakpachänwa. 40 jila maranakaw sacerdotenakjam juntuk trabajipjjäna (2 Sam. 8:17). Panpachaniw “cheqpach Diosan arcap” cuidapjjäna (2 Sam. 15:29). Davidaruw yanaptʼapjjäna, Jehová Diosar serviñan kunaymaninak lurapjjarakïna (2 Sam. 19:11-14).

16. ¿Kunas Jehová Diosat jan jitheqtañatakejj Sadoc waynar yanaptʼäna?

¹⁶ Abiatar chachajj Diosat jitheqtañsa amtkchïnjja, Sadoc waynajj janipuniw Jehová Diosat jitheqtkänti, Davidatakejj confiykañarakïnwa. Adoniasan amtapat Davidar yatiyapjjäna ukhajja, Davidajj Sadoc, Natán, Benaya chachanakaruw yanaptʼa mayïna, ukhamat Salomonajj reyit uttʼayatäñapataki (1 Rey. 1:32-34). Sadoc waynarojj Natán ukat mayni Jehová Diosan servirinakapar uñjañaw wal chʼamañchtʼpachäna, jupanakajj janiw Diosat jitheqtapkänti, David reyirus yanaptʼapjjarakïnwa (1 Rey. 1:38, 39). Salomonajj reyit uttʼayatäjjäna ukhajja, ‘Abiatar lantejj Sadoc sacerdoteruw’ reyejj uttʼayäna (1 Rey. 2:35).

17. Mä munat familiaramatï jan ukajj amigomatï Jehová Diosat jitheqtani ukhajj ¿kunjamsa Sadoc waynat yateqasiñajj yanaptʼiristam?

¹⁷ ¿Kunjamsa Sadoc waynat yateqasisma? Mä munat familiarasatï jan ukajj amigosatï Jehová Diosat jitheqtani ukhajja, jumajj Jehová Diosat jan jitheqtañwa amtañama (Jos. 24:15). Jehová Diosaw chʼam churätam, jan ajjsarañatakis yanaptʼarakïtam. Jupar orasim, jupat jan jitheqtir servirinakap jakʼapankapunim. Jehová Diosajj jupat jan jitheqtatam wali valoranitwa uñji, bendisirakïtamwa (2 Sam. 22:26).

18. ¿Kunsa Marco jilatampit Sidse esposapampit yateqta?

¹⁸ Marco jilatampit Sidse esposapampit parltʼañäni. Pä phuchanakapajja, jilsjjasajj Jehová Diosatwa jitheqtapjjäna. Jilatajj akham siwa: “Wawanakasarojj nasipjje ukhatpachaw wal munastanjja. Jupanakar jarkʼaqañatakejj kuns luraksnawa. Ukhamajj Jehová Diosat jitheqtapjje ukhajja, walpun chuymas usuyastanjja” sasa. Akham saskakiwa: “Ukampis Jehová Diosajj janipuniw jaytjapkituti. Nayajj aynachtʼkta ukhajja, esposajan chʼamani saytʼasiñapatakejj Diosaw jupar yanaptʼi, esposajajj aynachtʼki ukhajja, chʼamani saytʼasiñajatakejj Diosaw yanaptʼarakitu” sasa. Kullakajj akham siwa: “Jehová Diosan chʼamapampikiw aguantapjjta. Naya kawsas phuchanakajajj Jehová Diosat jitheqtapkaspa ukhamwa amuyasiyäta. Jehová Diosaruw ukanak awistʼasiyäta. Mä qhawqha tiempotjja, walja maranak jan uñj-jjayäta uka kullakampiw jikisiyäta. Jupajj jakʼachasisaw kallachinakajat loqjjattʼitäna, nayar uñkattʼasajj ‘Sidse, janiw juchamäkiti, uk amtapunim’ sasaw sitäna. Jehová Diosan yanaptʼapampejj kusisitaw jupar serviskta” sasa.

19. ¿Kun lurañsa amtta?

¹⁹ Jehová Diosajja, taqe servirinakapajj Sadoc waynjam jan ajjsarirïsna ukwa muni (2 Tim. 1:7). Ukampis jupajj janiw chʼamasaruk confiyasiñas munkiti, jan ukasti jupar confiyañaswa muni. Ukhamajj jan ajjsarirïñamajj wakiskani ukhajj Jehová Diosaruw jakʼachasiñama. Jupaw Sadoc waynjam jan ajjsarañatakejj yanaptʼätam, janiw ukat payachasiñamäkiti (1 Ped. 5:10).