¡AMUYASIPJJAPUNIM!
Ucrania markan utjki uka guerratsa religionatsa ¿Bibliajj kamsisa?
Wali uñtʼata religión pʼeqtʼirinakajj Ucrania markan utjki uka guerrat kamsapjjesa uk uñjañäni:
“Iglesia Ortodoxa Rusa ukan pʼeqtʼiri Kirill sat chachajja, kuna jan walinaktï Rusia markajj Ucrania markar luraski uka toqet janiw kamskisa [...]. Kuntï uka Iglesiajj Ucrania marka contrajj siskäna ukarjamaw Vladimir Putin sat presidentejj ‘utjki uka guerrajj walikïskiwa’ sasin säna” (EUobserver, 7 de marzo, 2022).
“Kirill chachajja, ‘Ucrania marka contra utjki uka guerrajj juchar atipjañatakiwa’ sasaw säna. Ukham sasaw Rusia markajj Ucrania marka contra nuwaski ukajj walikïskatapa uñachtʼayi” (AP News, 8 de marzo, 2022).
“Iglesia ortodoxa ucraniana ukan pʼeqtʼiri ukhamarak Kiev markankiri Epifanio I sat chachajja, Rusia markankiri soldadonak contra nuwasipjjañapatakiw lunes urojj Ucrania markankir jaqenakar bendisïna. ‘Ruso soldadonakar jiwayañajj janiw juchäkiti’ sasaw sarakïna (The Jerusalem Post, 16 de marzo, 2022).
“Nanakajj Ucrania markan ejercitopampi, markasar arjjatapki ukanakampïpjjtwa. Enemigonakasat arjjatapkistu ukanakarojj bendisipjjtwa, jupanak laykus orapjjaraktwa” (Declaración del Consejo de Iglesias y Organizaciones Religiosas de Ucrania,a 24 de febrero, 2022).
¿Kunsa jumajj uka toqet amuyta? “Cristoruw arkapjjta” sasin sapki uka Iglesianakajj ¿guerrar sarapjjañapataki jaqenakar chʼamañchapjjatapajj walikïskiti? ¿Kunsa Bibliajj uka toqet yatichi?
Religionanakajj nayratpachaw guerranakar mitisipjjerïna
“Sumankañaw utjañapa” sasinsa Iglesianakajj nayratpach sapkchïnjja, “guerra utjañapajj walikïskiwa” sasaw sapjjäna, jan ukajj guerranak utjañapatakiw chʼamañchapjjarakïna. Jehová Diosan Testigonakapajja, walja maranakaw Iglesian kʼari chuymampi lurapjjatap qhan sawayapjje, qellqatanakasajj kamsänsa uk jichhajj mä qhawqha uñjañäni:
“Las cruzadas: ‘trágica ilusión’” sat yatichäwinjja, kunjamsa Iglesia católica romana ukajj Diosan sutipjjaru ukhamarak Criston sutipjjaru walja jaqenakar jiwarayäna uka toqetwa parli.
Pä tribunkiri jaqenakajj jiwarayasipkäna ukhajja, religionanakajj janiw jarktʼirjamäpkänti, uka toqetwa “La Iglesia Católica y África” sat yatichäwejj parli.
“¿Tiene la culpa la religión?”, “El papel de la religión en las guerras”, “La religión toma partido” sat yatichäwinakajja, kunjamsa católico, ortodoxo ukhamarak protestante religionanakan pʼeqtʼirinakapajj paypach markan guerranak apoyapjjäna uka toqetwa parli.
¿Iglesianakan guerranak apoyapjjatapajj walikïskiti?
¿Kunsa Jesusajj yatichäna? “Jaqe masimarojj juma kikparjam munasiñamawa” (Mateo 22:39). “Enemigonakamar munasiñampi uñjasipkakim” (Mateo 5:44-47).
Ak amuytʼañäni: Jesusajja, “jaqe masimar munasipjjañamawa” sasaw säna, uka arunakar istʼapjjtwa sasin sapki uka Iglesianakajj ¿guerrar sarapjjañapataki Iglesiapar sarir jaqenakar chʼamañchapjjañapajj walikïskiti? Uk yatiñatakejja, “Los cristianos verdaderos y la guerra”, “¿Es posible amar a un enemigo?” sat yatichäwinak liytʼañamatakiw chʼamañchtʼapjjsma.
¿Kunsa Jesusajj yatichäna? “Reinojajj janiw aka mundonkirïkiti. Reinojatï aka mundonkirïspajja, arkirinakajajj nuwasipjjasapänwa, ukhamat jan nayajj judionakar apjjaruyatäñajataki” (Juan 18:36). “Espada aytirejj espadampi jiwayatarakïniwa” (Mateo 26:47-52).
Ak amuytʼañäni: Cristianonakajj janiw ni Jesusar arjjatañatakisa espada aytapjjañapäkänti, ukhamajj ¿yaqha razonanakat guerran nuwasipjjañapajj walikïskiti? Nayrïr cristianonakajj kunjamsa Jesusat yateqasipjjäna, yatichäwinakaparjamas sarnaqapjjäna uk yatiñatakejja, “El cristianismo y la guerra: ¿son compatibles?” sat yatichäwi liytʼañamatakiw chʼamañchtʼapjjsma.
¿Guerranak utjañapataki chʼamañchapki uka religionanakampejj kunas pasani?
“Jesusaruw arkapjjta” sasin sapki, ukampis janirak Jesusan yatichäwinakaparjam sarnaqapki uka religionanakajj janiw Diosamp katoqatäpkaniti sasaw Bibliajj yatichi (Mateo 7:21-23; Tito 1:16).
Religionanakaw ‘taqe jiwayatanakan wilapat’ juchanïpjje sasaw Apocalipsis librojj qhanañchi (Apocalipsis 18:21, 24). Kunatsa ukham sispacha uk yatiñatakejja, “¿Qué es Babilonia la Grande?” sat yatichäwi liytʼañamatakiw chʼamañchtʼapjjsma.
Kunjamtï ‘jan wali achuri qoqajj phatʼanukutäsajj ninar phichhantatäki’ ukhamarakiw jan walinak luriri religionanakajj tukjatäpjjani sasaw Jesusajj säna (Mateo 7:15-20). Uka toqet jukʼamp yatiñatakejja, “¡Se acerca el fin de la religión falsa!” sat yatichäwi liytʼasma.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a 15 Iglesianakaw ukankapjje, ukanakajj Iglesia ortodoxa, Iglesia católica romana, Iglesia católica griega, protestante ukhamarak evangélica Iglesianakawa, judionakasa musulmananakasa ukankapjjarakiwa.