13 YATICHÄWI
Falso religionanakajj Diosarojj jan walitwa uñjayapjje
Niyakejjay Diosajj munasiñächejja, ¿kunatsa Diosat parlir religionanakajj kunayman jan walinak lurapjje? Falso religionanakäpjjatap laykuw ukham lurapjje. Kʼari yatichäwinakapasa luratanakapas Diosarojj jan walitwa uñjayapjje. ¿Kunjamanakatsa Diosarojj jan walit uñjayawayapjje? ¿Kunjamakis ukanak lurir uñjasajj Diosajj jikjjatasi? ¿Kunsa Diosajj falso religionanakampejj lurani?
1. ¿Kunjamsa kʼari yatichäwinakapampejj Diosarojj jan walit uñjayapjje?
Falso religionanakajja, “kunatï Diosat cheqäki ukar creyiñat sipansa kunatï kʼarïki” ukaruw creyipjje (Romanos 1:25). Sañäni, walja religionanakajja janiw Diosan sutip jaqenakar yatichapkiti. Ukampis Bibliajja Diosan sutip aytasiñasapuniwa sasaw qhanañchi (Romanos 10:13, 14). Religión pʼeqtʼirinakat yaqhepanakajja, ‘mä jan waltʼäwejj paski ukhajj Diosan munañapawa’ sasaw sapjje, ukampis ukajj kʼariwa. Kuna jan walinakatï paski ukanakat Diosajj janipuniw juchanïkiti (Santiago 1:13 liytʼäta). Uka kʼari yatichäwinakajj Diosatwa jaqenakar jitheqtayawayi, ukajj wali llakkañawa.
2. ¿Kunjamsa luratanakapampejj Diosarojj jan walit uñjayapjje?
Falso religionanakajja, janiw jaqenakarojj Diosjam munasiñamp uñjapkiti. “Juchanakapajj alajjpachkam montontʼatawa” sasaw Bibliajj uka religionanakat qhanañchi (Apocalipsis 18:5). Religionanakajja walja patak maranakaw politicar mitisipjje, guerranakarus apoyapjjaraki, ukatjja walja jaqenakaruw jiwarayapjje, jaqenakar jiwayapjjañapatakis chʼamañchapjjaraki. Religión pʼeqtʼirinakat yaqhepanakajj wali qamirïpjjewa, ukham jakaskakiñatakejj religionapar saririnakaruw qollqe mayipjjaraki. Ukham lurapjjatapajj Diosar jan uñtʼapjjatapwa uñachtʼayi, ukhamasti janiw Diosan sutipjjar parlañatakejj derechonïpkiti (1 Juan 4:8 liytʼäta).
3. Falso religionanakan jan wali luratanakap uñjasajja, ¿kunjamas Diosajj jikjjataspacha?
Falso religionanakan jan wali luratanakap yatisajj jiwasajj wal colertanjja. ¡Jehová Diosajj jukʼampiw colerpacha! Diosajj jaqenakar wal munasi, ukampis religión pʼeqtʼirinakatakejj wali coleratawa. Jupanakajj jan walitwa Diosarojj uñjayapjje, religionanakapar saririnakarus jan waltʼayapjjarakiwa. Falso religionanakajj tukjatäpjjaniwa, “jan mayampitak chhaqtayatäniwa” sasaw Diosajj arsuwayi (Apocalipsis 18:21). Diosajj niyaw taqpach falso religionanakar tʼunjani (Apocalipsis 18:8).
JUKʼAMP YATJJATAÑÄNI
Kunsa Jehová Diosajj falso religionanakat amuyi ukwa jichhajj jukʼamp yatjjatañäni, ukatjja kunanaktï falso religionanakajj lurawayapki ukanakatwa yatjjatarakiñäni. Ukjjarusti kunatsa jan wali luratanakapajj Jehová Diosat yateqaskakiñamatak jan jarkʼañapäki uka toqetwa yatjjatarakiñäni.
4. Diosajj janiw taqpach religionanakarojj sumat uñjkiti
Religionanakajj thakinakar uñtasitäpjjewa, taqpachaw Diosar jakʼachasiñatak yanaptʼapjjarakistu sasaw waljanejj creyipjje. Ukampis ¿ukajj cheqäpachati? Mateo 7:13, 14 liytʼasajja aka toqetwa parltʼapjjäta:
¿Bibliarjamajj jakañar apki uka thakejj kunjamasa?
VIDEO uñtasajja aka toqetwa parltʼapjjäta:
¿Taqe religionanakaruw Diosajj sumat uñji sasat Bibliajj yatichi?
5. Falso religionanakajj janiw Diosan munasiñap uñachtʼayapkiti
Religionanakajja kunaymaninakatwa Diosarojj jan walit uñjayapjje, jukʼampejj guerranakar mitisisaw ukham lurapjje. Ukanakat may uñjañatakejja, VIDEO uñtapjjäta. Ukatjja aka toqetwa parltʼapjjäta:
¿Kunsa walja religionanakajj Segunda Guerra Mundialan lurapjjäna?
¿Kuntï lurapkäna ukanakat kunsa jumajj amuyta?
Juan 13:34, 35; 17:16 liytʼasajja aka toqetwa parltʼapjjäta:
¿Religionanakajj guerranakar mitisipki ukhajj kunjamas Diosajj jikjjataspacha?
Falso religionanakajj walja jan walinakwa utjayawayapjje, jupanakajj janiw Jehová Diosjam munasirïpjjatap uñachtʼayapkiti. Ukhamätapjja ¿kunanakansa jumajj uñjawayta?
Falso religionanakajj janiw Diosjam munasirïpjjatap uñachtʼayawayapkiti.
6. Diosajj falso religionanakat mistjjapjjañapatakiw jaqenakar yanaptʼañ muni
Apocalipsis 18:4 liytʼasajjaa aka toqetwa parltʼapjjäta:
Falso religionanakamp engañjatäpki uka jaqenakaruw Jehová Diosajj yanaptʼañ muni, ¿Diosan ukham lurañ munatapajj jumatakejj kunjamakisa?
7. Cheqpach Diosat yatjjataskakim
Falso religionanakan jan wali luratanakap uñjasajja, ¿Diosarojj jan walitti uñjañamäspa? Awkipan ewjjtʼanakapar jan istʼañ muniri mä waynat parltʼañäni, jupajj utat sarjjasajj jan walinakwa luri. Yoqapan jan wal sarnaqatapajj janiw awkipatakejj walïkiti. Ukhamajj ¿jan istʼasir waynan jan wal sarnaqatapat awkipar juchañchañajj walikïskaspati?
¿Falso religionanakajj kuntï lurapki ukanakat Jehová Diosar juchañchasin jupat jitheqtañajj walikïskaspati?
YAQHEPANAKAJJ AKHAM SAPJJEWA: “Janiw religionat kun yatiñs munkti, taqpach religionanakaw jan walïpkiti” sasa.
¿Jumajj ukhamarakti amuyta?
Kunanaktï falso religionanakajj lurapki ukanak uñjasajja, ¿kunatsa Jehová Diosat jan jitheqtañasäki?
¿KUNSA YATEQAWAYTAN?
Falso religionanakajja jan wali yatichäwinakapampisa jan wali luratanakapampisa, Diosan sutipwa qʼañuchawayapjje. Ukatwa Diosajj uka religionanakar tʼunjani.
Amtañataki
Kunanaktï falso religionanakajj yatichawayapki, kunanaktï lurawayapki ukanakat ¿kunsa jumajj amuyta?
¿Kunsa Jehová Diosajj falso religionanakat amuyi?
¿Kunsa Jehová Diosajj falso religionanakamp lurani?
JUKʼAMP YATJJATAÑAMATAKI
Jilaparte religionanakarojja Jehová Diosajj pä razonatwa jan walit uñji, ukanakajj kawkïrinakasa uk yatjjatam.
“¿Nos acercan a Dios todas las religiones?” (Artículo de jw.org)
¿Kunatsa tantachasisin jupar adorañas Jehová Diosajj muni?
“¿Es necesario pertenecer a una religión?” (Artículo de jw.org)
Mä sacerdotejj religionapat payachaskchïnsa, janiw ukajj kunatï Diosat cheqäki uk yatjjatañatak jarkʼkänti.
“Un sacerdote abandona la Iglesia” (¡Despertad!, febrero de 2015)
Walja maranakaw religionanakajj kʼarinak Diosat yatichawayapjje, jan sinttʼasiriwa sasaw yatichawayapjjaraki. Uka kʼarinakat kimsa yatjjatam.
“¿Kuna kʼari yatichäwinakas jaqenakar Diosat jitheqtayi?” (Yatiyañataki noviembre 1, 2013)