Núm. 37 Diosan Apnaqäwipat yatiyäwinaka

Taqinitak mä yatiyäwi

¡Kʼari yupaychäwin tukusiñapax jakʼankxiwa!

▪ ¿Kunas kʼari yupaychäwixa?

▪ ¿Kunjam chhaqtayatänisa?

▪ ¿Chhaqtxani ukhax kamachätasa?

¿Kunas kʼari yupaychäwixa?

Diosan sutipxaruw jan walinak lurapxi, ¿ukax llakisiytamti? Diosar yupaychirinakäpxtwa sirinakaw chʼaxwäwinakar sarapxi, jaqinak jiwthapiyapxi, jan walinak lurapxi, ¿ukax janit chuymam ustʼayktamxa? ¿Kunatsa yupaychäwinakas jan waltʼäwinak utjaykaspa ukhamaxa?

Janiw taqi yupaychäwinakax ukham lurapkiti jan ukasti kʼari yupaychäwikiw ukanak luri. Yupaychäwinakan wali respetata Jesucristosti, kʼari yupaychäwinakax jan wali achunakaniwa sataynawa, ‘jan suma quqjama jan wali achunakarakwa achuraki’ sasa (Mateo 7:15-17). ¿Kʼari yupaychäwix kuna kasta achunisa?

Kʼari yupaychäwixa...

◼ ... CHʼAXWÄWINAKARU UKAT POLITICARUW MITISI. Asiaweek qillqatax siwa: “Asia tuqi markanakansa yaqha chiqanakansa, taqi kun apnaqañ munir irpirinakaw yupaychäwi tuqitxa jan sinttʼasisa munañanakapar jaqinakxa apnaqapxi” sasa. Ukatwa “akapachax luqhiptaski” sarakiwa. Estados Unidos markankiri mä yupaychäwin uñtʼat irpiripax akham sataynawa: “Jiwayasiñanak jan utjañapatakixa, jaqi jiwthapiyirinakar tukjañäspawa” sasa. Uka jan walinak askichañatakixa, “Tatitun sutipxar jiwarayañaw” sarakitaynawa. Janiw Bibliax ukham yatichkiti jan ukasti akham siwa: “Ukampis kawkïritix sixa: ‘Nayax Diosarux muntwa’ sasa, ukatsti jilapar uñisiskarakixa, ukasti kʼariwa” (1 Juan 4:20). Ukat Jesusax akham mä kamachi churarakïna: “Uñisirinakamarux munapxam” sasa (Mateo 5:44). ¿Qhawqha yupaychäwinakas arkirinakap chʼaxwäwinakaru khitapxi? ¿Kamsasmasa?

◼ ... KʼARINAK YATICHI. Jiwatatxa almas ajayus jakaskaspasa ukhamwa jila part kʼari yupaychäwinakax yatichapxi. Walja kʼari yupaychäwinakaw qullq apsuñatakixa jiwatan almapatakiw risaña sas sapxi, ukhamatwa arkirinakaparux kʼarinak yatichapxi. Ukampis janiw Bibliax ukham yatichkiti, jan ukasti “khitinakatix jakasipki ukanakaxa yatisipxiwa jiwxañanakapa, ukampis jiwatanakax janiw kunsa yatipkiti” siwa (Eclesiastés 9:5). Jesusax jiwatanakax jaktaniniw sänwa, jaqix jan jiwir almanïspaxa janiw ukham siskaspänti (Juan 11:11-25). Yupaychir sarkta ukanxa, ¿almax jan jiwiriw sasat yatichapxi?

◼ ... WACHUQA QʼAÑU LURÄWINAKXA UKHAMAKIW UÑCHʼUKI. Yaqhip markanakanxa chachapura jan ukax warmipura sarnaqirinakaruw yupaychäwi irpirinakjama uttʼayasipxi, ukat chachapura jan ukax warmipura jaqichasiñ utjañapatakixa gobiernoruw mä kamachi mayipxi. Ukatxa, janiw uka qʼañunakax lurañäkiti siri yupaychäwinakasa, yupaychäwi irpirinakaparux ukhamakiw unchʼukipxi wawanakaru abusapxi ukhaxa, janiw kuns kamachapkiti. Ukampisa, ¿kunsa Bibliax yatichi? Wali qhanwa akham sas parli: “Jan sallqjayasipxamti, wachuqa juchan sarnaqir jaqix janiw Diosan markapar mantkaniti, [...] wachuqa juchan sarnaqirisa, chacha pura jan wali sarnaqirinakasa” sasa (1 Corintios 6:9, 10). ¿Ukham qʼañunak lurañax walikïskiw siri yupaychäwinakat istʼirïtati?

¿Ukham jan wali ñusantat achunakani yupaychäwinakax kunarus purtʼasipxani? Jesusax akham sataynawa: “Taqi jan wali achuri quqaxa phatʼanukutäñapawa, ukatsti ninar phichhantatäñaparakiwa” sasa (Mateo 7:19). Ukhamawa, kʼari yupaychäwixa phichhantatäniwa, mä arunxa chhaqtayatäniwa. Ukampisa, ¿kunapachas ukat kunjam tukjatänisa? Apocalipsis 17, 18 jaljanakaw uka tuqit qhanañchistu.

¿Kʼari yupaychäwix kunjam chhaqtayatänisa?

Ak amuytʼma. Mä qʼañu warmixa, paqallqu pʼiqini tunka waxrani axsarkañ mä jachʼa animalxaru latʼxatatawa (Apocalipsis 17:1-4). ¿Uka warmix khitïpachasa? ‘Aka uraqina taqi reyinakaru apnaqkis ukawa’. Ukatxa uka warmisti wila isimpi isthapitawa, incienso aptʼata, ukat wali qamirirakiw siw Bibliaxa. Ukatsti, ‘taqi markanakarusti layqasitanakapampirakiw sallqji’ (Apocalipsis 17:18; 18:12, 13, 23). Ukhamasti, uka qʼañu warmixa, uraqpachan apnaqiri kʼari yupaychäwiwa, ukwa Bibliax amuytʼayistu. Janiw mä sapa yupaychäwikïkiti, jan ukasti taqi jan wali ñusantat achunakani yupaychäwinakawa.

Uka axsarkañ jachʼa animalaxa, akapachankir taqi jachʼa apnaqäwinak sañ munaraki (Apocalipsis 17:10-13). a Uka patar kʼari yupaychäwix qunxatatawa; apnaqaña, amtanakap mayjtʼayañwa tiraski.

Niyaw aka muspharkañ arunakax phuqasini: “Uka tunka waxranaka uñjktas ukanakasti uka qʼañu warmirux uñisipxaniwa, qʼalalpacharaki irpanukupxani, janchipsti manqʼapxarakiniwa, ninampirakiw nakhantayapxani” (Apocalipsis 17:16). Mä akatjamatwa, akapachankir taqi jachʼa apnaqäwinakaxa kʼari yupaychäwirux kutxatapxani, ukatxa jan mayampitakiw tukjapxani. ¿Kunatsa? Apocalipsis librox akham siwa: “Diosarakiw jupanakan chuymaparux usku mayakïpxañapataki, ukatsti kuntï Diosax munki uk lurapxañapataki” sasa (Apocalipsis 17:17). Ukhamaxa, Diosan sutipxar ñanqha luräwinakapatxa, kʼari yupaychäwinakax Diosaruw cuenta churapxani. Ukatsti, uka qʼañu warmimpi sarnaqir pachpa reyinakampiw uka warmiruxa Diosax tukjayani, ukxa chiqapar uñjasaw lurani.

¿Kun lurañamasa kʼari yupaychäwimp chik jan tʼunjatäñamatakixa? “Nayankir jaqinaka, mistxapxam uka markata”, siw Diosan yatiyiripaxa (Apocalipsis 18:4). Jichhpachaw kʼari yupaychäwit mistxañamaxa. ¿Ukat kawkirus saräta? ¿Diosax janiw utjkit sirinak tuqirut saräta? Janiwa, kunattix jupanakax tukjatäpxarakiniwa (2 Tesalonicenses 1:6-9). Chiqa yupaychäwirukipuniw imantasiñasaxa. ¿Kunjamatsa chiqa yupaychäwi uñtʼasma?

Kawkïris chiqa yupaychäwix uk kunjamats yatsna

¿Chiqa yupaychäwix kuna suma achunakanïñapasa? (Mateo 7:17.)

Chiqa yupaychäwixa...

◼ ... MUNASIÑ UÑACHTʼAYI. Diosan chiqa yupaychirinapaxa ‘janiw akapachankirïpkiti’, yaqha kast jaqinakarusa yaqha markankirinakarusa janiw uñisipkiti, jan ukasti ‘maynit maynikamaw munasipxi’ (Juan 13:35; 17:16; Hechos 10:34, 35). Janiw jupanakpura jiwayasipkiti, jan ukasti jilat kullakanakap laykux jakañap aptʼasipxaspawa (1 Juan 3:16).

◼ ... DIOSAN ARUPARUW ATINISI. Chiqa yupaychäwix janiw jaqin ‘amtäwipsa’ ni sarnaqäwipsa yatichkiti, janirakiw ‘jaqinakan yatichäwinakapsa’ yatichkiti; jan ukasti Bibliat yatichi (Mateo 15:6-9). ¿Kunatsa? Kunattix “taqi Qillqatasti Diosan amuytʼayatawa, askirakiw yatichañataki, chiqachañataki, ukhamarak qʼuma jakañan sarnaqañ yatichañatakisa” (2 Timoteo 3:16).

◼ ... FAMILIANAKARUX MAYACHIWA, SUM SARNAQAÑWA YATICHI. ‘Chachasti warmiparux janchiparjamaw munasiñapa’ sasaw chiqa yupaychäwix yatichi, ‘warmirusti chachapar istʼañapatakiw’ yanaptʼaraki, wawanakarux “awkimaru taykamaru istʼapxam” sarakiwa (Efesios 5:28, 33; 6:1). Ukatsti, irpirinakax uñtkañ qʼuma sarnaqäwinïpxañapawa siwa (1 Timoteo 3:1-10).

¿Kawkir yupaychäwis ukanak phuqaskpacha? Holocaust Politics, 2001 maran lurat librox siwa: “Jaqinakatï Jehová Diosan Qhanañchirinakapjama ukat yatichäwinakaparjama sarnaqapxaspaxa, janiw chʼaxwäwinakan jiwarayasiñax utjkaspati, janirakiw ukham jaqi pura jiwthapiyasiñas uraqpachan utjkarakispati” sasa.

Jisa, 235 markanakana, Jehová Diosan Qhanañchirinakapax janiw ukhamaki Biblian kamachinakap yatichapkiti; jan ukasti ukarjamaw sarnaqapxi. Kunjamtï Diosax munki ukarjam yupaychañatakixa kunsa Jupax mayistu uk yatxatañataki yanaptʼayasisma, ukax walipunïspawa. Jichhpachaw uk lurañamax wakisispa. Jan qhiparamti. ¡Kʼari yupaychäwin tukusiñapax jakʼankxiwa! (Sofonías 2:2, 3.)

Jehová Diosan Qhanañchirinakapax kunsa Bibliat yatichapxi uk jukʼampi yatxatañatakixa, qillqasmawa aka aynachankiri direccionaru.

□ Akïr folleto apayanipxita ¿Kunsa Diosax jiwasanakaru mayistu?

□ Utana Bibliat inak yatichayasiñatakiw yatxatañ muntxa.

[Qhanañchäwi]

[3 janan qhanañchäwipa]

Kʼari yupaychäwix “aka uraqina taqi reyinakaruwa” munañapampi apnaqi

[3 janan qhanañchäwipa]

“Nayankir jaqinaka, mistxapxam uka markata”