¿Kunatsa jichhürunakan respetasiñajj jan utj-jje? | ¿Bibliajj uka toqet kamsisa?

Jichhürunakanjja, janiw respetojj utj-jjeti. Sañäni, hospitalanakanjja qollayasir sarapki uka jaqenakajj doctoranakarojj toqjjapjjakiwa, restaurantenakansti jaqenakajj ukan trabajirinakaruw jiskʼachapjje, avionanakansti viajirinakajj ukan trabajirinakarojj ukhamarakiw toqjjapjje, nuwjañ kunwa munapjje ukat jan istʼasir wawanakasti profesoranakapatwa burlasipjje, amenazapjje, nuwjañwa munapjjaraki. Janiw ukakïkiti, yaqhep politiconakajj kunayman jan walinak lurapjje, yaqhepasti wali suma jaqëpkaspas ukhamwa tukupjjaraki.

Kunjam sarnaqañasas wakisi uk Bibliaw yatichistu, kunatsa jichhürunakan respetasiñajj jan utj-jje uksa qhanañcharakiwa.

¿Kunatsa jaqenakajj jan respetasirëjjapjje?

Jaqenakajj janiw nayrjamäjjapjjeti, kunatï walïki ukar respetañasa, qʼom sarnaqañasa, jaqenakar respetomp uñjañas oraqpachanwa chhaqtaski.

• Mä encuestarjamajja, nayrat sipans jaqenakajj jukʼamp jan respetasirëjjapjjewa sasaw Estados Unidos markankir jaqenakajj amuyapjje, 22 maranak nayrajj janiw ukhamäkänti sasaw sapjjaraki.

• 28 markanakan 32.000 jila jaqenakar jisktʼaskäna uka yaqha encuestanjja, 65% ukan participir jaqenakaw respetasiñajj janiw jichhürunakan utj-jjeti sasin sapjjäna.

Jaqenakajj jan walinak luririnakäpjjaniwa sasaw Bibliajj nayratpach sisjjäna.

• “Qhepa urunakanjja chʼama tukuña jan wali tiemponakaw utjani. Jaqenakajj akhamäpjjaniwa: jupanak pachpa munasirinaka, qollqe sinti munirinaka, pʼeqe waytat sarnaqerinaka, jachʼa jachʼa tukurinaka [...] awkiparus taykaparus jan istʼirinaka, jan yuspärasirinaka, jaqe masipar jaytanukurinaka, jan munasirinaka, [...] qhorunaka” (2 Timoteo 3:1-3).

Uka arunakajj kunjamsa jichhürunakan phoqasiski uk yatiñatakejja, “¿Predijo la Biblia cómo sería la gente en nuestros días?” sat yatichäwi liytʼam.

Bibliaw suma jaqëñatak yanaptʼistaspa

Oraqpachan jaqenakajj jukʼamp jan walinaksa lurapkchejja, walja millón jaqenakaw Biblian yanaptʼapampejj suma jaqenakar tukusipki. Biblian yatichäwinakapajja, “confiykañapuniwa, jichhasa wiñayatakisa” (Salmo 111:8). Ukanakat mä qhawqhanak uñjañäni.

• Texto: “Taqe kunans kunjamtï jaqenakampi uñjatäñ munapktajja, ukhamarak jumanakajj jupanakar uñjapjjam” (Mateo 7:12).

  ¿Kamsañsa muni? Kunjamtï jiwasajj uñjatäñ munktanjja, ukhamarakiw jaqenakar uñjañasa, mä arunjja, munasiñampi respetompiw uñjañasa.

• Texto: “Niyakejjay jichhajj engañjasiñanak apanukjjapjjstajja, sapa maynisa jaqe masipampejj cheq parlpan” (Efesios 4:25).

  ¿Kamsañsa muni? Kunatï cheqäki ukpunwa parlañasa, taqe kunansa honradöñasawa.

Jukʼamp yatiñatakejja, akanakwa liytʼasma:

• “Suma amtanakar puriñatakejj ¿kawkinsa yanaptʼa jikjjatsna?” sat pʼeqeñchäwini Yatiyañataki revista.

• “¿Nos ayuda la Biblia a ser tolerantes?” sat yatichäwi.