Oraqpachanwa 50 maranakan animalanakajj minustʼawayi | ¿Bibliajj uka toqet kamsisa?

9 de octubre de 2024 urojj Fondo Mundial para la Naturaleza siski ukankirinakajja, jaqenakajj kunjamsa animalanakar jan waltʼayasipki uka toqet parlkasajj akham sasaw yatiyapjjäna: “50 maranakanakwa oraqpachan utjki uka animalanakajj minustʼawayapjje, 1970 maran utjkäna uka animalanakat chikatapan chikatapakiw 2020 maratak utj-jjäna” sasa. Ukat akham sasaw sapjjarakïna: “Jakañ vidajj utjaskakiniti janicha ukajj kunanakatï aka jutir 5 maranakan pasani ukarjamaw yatisini” sasa.

Ukham jan wali yatiyäwinak istʼasajj waljaniw wal llakisipjje. Kuna laykutejj aka oraqen jakañajj wal gustistu, animalanakar tʼaqesir uñjtan ukhas wal llakisiraktanjja. Cheqas Diosaw animalanakar sum cuidañ munañasatakejj lurawayistu (Génesis 1:27, 28; Proverbios 12:10).

Ukatwa akham sasin jisktʼassna: “¿Animalanakar salvañ puediñäniti? ¿Bibliajj uka toqet kamsisa?” sasa.

Jutïritak mä suma suytʼäwi

Jaqenakajj kunatï aka oraqen utjki ukanakar salvañatak walsa chʼamachaskchiñänejja, janiw uk lurañ puedkañäniti, cheqas Diosakiw animalanakar salvaspa. Bibliajja, Apocalipsis 11:18 texton akham sasaw qhanañchi: Diosajj ‘oraqe tukjasipki ukanakar tukjaniwa’ sasa. Uka versiculojj akanakwa yatichistu:

1. 1. Diosajj janiw jaqenakajj aka oraqe tukjapjjañap permitkaniti.

2. 2. Diosajj niyaw jan walinak chhaqtayjjani. ¿Kunatsa ukham sistanjja? Janiw kunapachas jichhürunakjam kunjamsa jaqenakajj oraqsa animalanaksa qʼal tukjasipki ukajj uñjasiwaykiti.

¿Kunjamsa Diosajj uka jan wal askichani? Niyaw jupajj alajjpachankir gobiernop toqejj uk askichjjani, uka Reinow aka oraqpachjjar apnaqjjarakini (Mateo 6:10). Uka Reinop toqerakiw animalanakar sum cuidapjjañapatakisa jan walinakat jarkʼaqapjjañapatakis istʼasir jaqenakar yatichani (Isaías 11:9).