Uraqpachan Jilïr Irpirinakan cartapa

Jehová Diosar munasir taqi jilat kullakanaka:

“Uñtʼapxarakïtawa kunatix chiqäki ukxa, uka chiqa kankañasti qhispiyat sarnaqasiñ churapxarakïtam” sasaw Jesusax säna (Juan 8:32). ¡Uka arunakapax wali askipuniwa! Aka jan wali “qhipa” urunakanxa kʼarisiñakiw kawkins utjaski, ukampis uka chiqa yatichäwinakxa yatiqsnawa (2 Timoteo 3:1). Jumatakix Diosan Arupan utjki uka chiqa yatichäwinak yatxatañaxa ¡wali askipunïpachänwa!

Ukampis janiw aliqaki yatiñasäkiti ni yatiyañasakïkisa. Jan ukasti ukarjam sarnaqañasawa. Mä arunxa, Diosan munasiñapan jakasiñasawa. Ukampis ¿kunjamsa uk lursna? Katuntapkäna uka arumaw Jesusax uka tuqit chiqa chuyman arkirinakapar akham sasa qhanañchäna: “Iwxanakaxa katxäsipxäta ukaxa, munasiñaxanwa jakapxäta; kunjamatï nayaxa Awkixan iwxanakapa katxasirakta, ukatsti munasiñapana jakarakta ukhama” sasa (Juan 15:10, MT).

¿Kunjamatsa Jesusax Diosan munasiñapan jakasïna uk amuytati? Awkipan iwxanakap katxasïna, mä arunxa kamachinakapwa phuqäna. Jiwasax ukham lurañasarakiwa. Diosan munasiñapan jakasiñ munasaxa, chiqa yatichäwinakaparjamapuniw taqi kunansa sarnaqañasa. Ukatwa Jesusax uka pachpa arumax akham sarakïna: “Akanaktix amuytʼapxäta, ukat lurapxarakïta ukaxa, kusisitäpxätawa” sasa (Juan 13:17).

Aka librox Diosan chiqa yatichäwiparjam sarnaqañ yanaptʼistani ukat ‘wiñay jakañ suytʼasina’ “Diosan munasiñapan jaka[siñ]” taqinirus yanaptʼarakistaniwa, ukwa taqi chuyma munapxta (Judas 21).