“Diosan munasiñapan jakasipxañäni”
1. ¿Kunjamsa yanaptʼistani “Diosan munasiñapan jakasipxañäni” sat libroxa?
1 Febrero phaxsit 23 uru saraqkani uka semanaw “Diosan munasiñapan jakasipxañäni” sat machaq librot Taman Bibliat Yatxatañataki sat tantachäwin yatxataskañäni. Uka librot yatxatañatakix walpun suytʼasktanxa, ¿janich ukhamäki? Uka libro qalltanxa Uraqpachan Jilïr Irpirinakax mä carta Diosar munasirinakarux qillqapxi, ukanxa uka librot akham sapxiwa: “Aka librox Diosan chiqa yatichäwiparjam sarnaqañ yanaptʼistani ukat ‘wiñay jakañ suytʼasina’ “Diosan munasiñapan jaka[siñ]” taqinirus yanaptʼarakistaniwa, ukwa taqi chuyma munapxta (Judas 21)” sasa.
2. ¿Kunanakansa uka machaq librox yanaptʼistani?
2 Kunanakans yanaptʼistani. Masinakamp apasiñxata, kusistʼañanakxata, autoridadanakar respetañxata, kuna lurañarus yatitätan ukxata, jaqichasiñ tuqita, kuna kasta parlanïtansa ukhamarak costumbrenakatsa. Taqi uka tuqinakatxa, ¿kunjamsa Biblian iwxtʼanakaparjam sarnaqañäni? Uka libromp Bibliat yatxatañax wali askïniwa, Diosan Arupan jikxataski uka kamachinakaparjamaw concienciasar yatichañatak yanaptʼistani (Sal. 19:7, 8). Ukatxa kunjamtï Diosax amuyki ukham amuyaraktanxa, ukatwa jakäwisan taqi kunsa Diosar kusisiyañatak lurtanxa (Pro. 27:11; 1 Juan 5:3).
3. ¿Sapa semana arstʼañatakix kunatsa chʼamachasiñasa?
3 Arstʼañatak wakichtʼasiñasawa. Tantachäwin Diosar yupaychañatakiw wakichasiñama (Heb. 13:15). Tantachäwin taqiniw uka librot yatxatañäni. Niyakixay sapa wakichäwin mä jukʼaki yatichtʼaschinixa, taqiniw wali sum wakichtʼassnaxa, ukhamat kuna askinaktï yatiqkañäni ukanakat taman arstʼañataki. Wali sum wakichtʼasisin jukʼa arunakampi arstʼañäni ukhaxa, munasiñanïñasataki suma luräwinak uñachtʼayañasatakiw yanaptʼistani, ukat kuntï yatiqkañäni ukax taqinitak chʼamañchkirirakïniwa (Heb. 10:24). Ukham iyawsäwisat arsusaxa, kusisitaw jikxatasirakiñäni.
4. ¿Kunatsa Diosan kamachinakaparjam sarnaqañax wali wakiskirixa?
4 Jesusax janïr alaxpachar sarkasaxa, Diosan munasiñapan sarnaqañasa ukat mandamientonakap phuqañasa mayakïkaspas ukham uñachtʼayawayi (Juan 15:10). “Diosan munasiñapa” sat libron yanaptʼapampixa, sapürus Diosan kamachinakaparjam sarnaqañatakiw taqi chuyma amtañäni ukhamat ‘Diosan munasiñapan jakasiñasataki’ (Jud. 21).