Pusi waynanakaw Jehová Diosar istʼapjjäna

Nabucodonosor reyejj Judá markat principenakaruw Babilonia markar apasjjäna. Jupanakar uñjañapatakejj palaciopan trabajiri mä jilïr jaqeruw jaytäna, jupajj Aspenaz satänwa. Uka principenak taypitjja, jan usuta wali chʼikhi waynanak ajlliñapwa reyejj mayïna. Uka waynanakajja, Babilonia markan suma cargonak katoqañatakiw kimsa mara estudiapjjañapäna. Jupanakajj babilonionakan acadio sat aru parlaña, qellqaña, liyiña yateqapjjañapäna. Reyejj manqʼkäna uka pachpwa manqʼapjjañaparakïna. Uka waynanakat pusinejj Daniel, Hananías, Misael, Azarías satäpjjänwa. Ukampis Aspenaz sat jaqejj babilonionakan sutipwa uchäna: Beltsasar, Sadrac, Mesac, Abednego sasa. ¿Ukham yatichatäsajj Jehová Diosat jitheqtapjjpachänti?

Uka pusi waynanakajj Jehová Diosar istʼañwa munapjjäna. Ukampis reyin manqʼapanjja Diosan Leyiparjamajj jan walïki ukanakaw utjäna, ukatwa manqʼañ jan munapkänti. Aspenaz chachar akham sapjjänwa: ‘Mirä amp suma, jan reyin manqʼap manqʼañatakejj obligapjjestati’ sasa. Aspenazajj sarakïnwa: ‘Jan sum manqʼasipkätajja, reyejj jumanakar usutjam uñjasajj jiwayitaniwa’ sasa.

Daniel waynajj may amuytʼasajj akham sarakïnwa: ‘Mirä amp suma, verduranakampi, chʼojjña achunakampi, umampi, ukak tunka urunakajj churapjjeta. Ukatsti reyin manqʼap manqʼapki uka waynanakampi igualtʼayapjjeta’ sasa. Jupanakar uñjiri chachatakisti ukajj walikïnwa.

Tunka urunakatjja, Danielompi kimsa amigonakapampejj mayni waynanakat sipansa jukʼamp kʼumaräpjjänwa. Jehová Diosajja, ukham istʼasirïpjjatap uñjasajj wal kusisïna. Maysa toqetjja Danielorojj visionanaka, samkanak entiendeñapatakejj yatiñ churäna.

Kimsa maranak estudiañ tukuyapjjepanjja, Aspenaz chachajj Nabucodonosor reyin ukaruw taqpach waynanakar irpäna. Reyejj jupanakampiw parltʼäna, ukhamatwa Daniel, Hananías, Misael, Azarías waynanakajj mayninakat sipansa jukʼampi chʼikhïpjjatap amuyäna. Ukatwa reyin palaciopan trabajipjjañapatakejj ajllïna. Uka pasatatsti, reyejj wali wakiskirïki ukanakatwa jupanakar jisktʼasirïna. Reyin wali yatiñani jaqenakapat sipansa reyin magonakapat sipansa, Jehová Diosaw uka waynanakarojj jukʼamp yatiñ churäna.

Daniel, Hananías, Misael, Azarías waynanakajj markapat wali jayankapkchïnsa, Jehová Diosar servirïpjjatapat janiw armasipkänti. ¿Jumasti? Tatamasa mamamas jayankapjjani ukhasa, ¿Jehová Diosat amtasipunïtati?