Jesusajj orasiñwa discipulonakapar yatichäna

Fariseonakajj jaqenakar musparayañatakikiw kunsa lurapjjäna. Mä kuns sum lurapjjäna ukhajja, jaqenakamp uñtayasiñatakikiw lurapjjäna. Amuytʼañataki, taqenin uñjkañäki uka lugaranakanwa Diosar orasipjjerïna. Wali jachʼa oracionanakwa pʼeqer yatsupjjerïna, uksti istʼayasiñ laykojj sinagoganakana, callenakanwa jachʼat repetipjjerïna. Ukatwa Jesusan arup istʼasajj jaqenakajj musparapjjpachäna, jupajj akham sänwa: ‘Jan fariseonakjam orasipjjamti. Jupanakajj walja arunak arsusas Diosamp istʼayasipkaspa ukhamwa amuyapjje. Janiw taqenin uñjayasiñatakejj orasipjjañamäkiti, antisas jumampi Jehová Diosampikiw parltʼasipjjañama. Janirak pachpa arunakaks repetipjjamti. Kunjamas jikjjatasta uk yatiyañamwa Diosajj muni’ sasa.

Jesusajj kunjamsa orasiñasa ukjja akham sasaw yatichäna: “Alajjpachankir nanakan Awkija, sutimajj jachʼañchatäpan. Reinomajj jutpan. Munañamajj luratäpan, kunjamtï alajjpachan luraski ukhamarak aka oraqens luraspan” sasa. Ukatjja Jesusajj manqʼ sapür mayisiñataki, juchanakat perdón mayisiñataki, yaqha ukhamanak toqet orasiñatakiw yaticharakïna.

Jesusajj akham saskakïnwa: ‘Sapa kuti Diosar orasipjjam. Jehová Dios Awkimarojj kunatï sumäki ukanak mayisipkakim. Taqe awkinakaw kunatï sumäki ukanak wawanakaparojj churañ yatipjje. Wawamatï tʼantʼa mayiristam ukhajj ¿qalakti churasma? Chawlla mayiristam ukhajj ¿mä asirti churasma?’ sasa.

Uka arunakampejj kamsañsa munäna ukwa Jesusajj akham sasin qhanañchäna: ‘Jumatï wawanakamar suma regalonak churañ yatstajja, ¿janit Jehová Diosajj espíritu santo churkätamjja? Diosajj churätamwa, mayiskakiñamawa’ sasa. ¿Kuntï Jesusajj siskäna ukti jumajj lurta? ¿Jehová Diosar orasta ukhajj kunsa mayta?